ᐊᑕᐅᓯᕐᒥ 21−ᓂ ᐃᓄᖕᓂ ᑲᓇᑕᒥ ᐸᓖᓯᒃᑯᓐᓄᑦ ᐱᓕᒻᒪᒃᓴᐃᓂᓕᐊᓚᐅᖅᑐᓂ ᐱᓕᕆᐊᖑᔪᒥ ᐱᓇᓱᐊᖅᓯᒪᕗᖅ ᐃᓚᐅᖃᑕᐅᓂᕐᒥ ᐸᓖᓯᒃᑯᓐᓂ

ᖃᔅᓯᒐᓚᖕᓂ ᐊᒡᕕᐊᕈᑎᑕᖃᖅᐳᖅ ᐸᓖᓯᙳᕐᓂᕐᒥ ᓄᓇᕗᒻᒥᒪ ᐅᖃᖅᐳᖅ ᑲᓇᑕᒥ ᐸᓖᓯᒃᑯᓐᓄᑦ ᑯᐊᐳᕉᔪᖅ

ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᐊᑕᐅᓯᕐᒥ ᐱᓇᓱᐊᖅᑐᖃᖅᐳᖅ 21−ᖑᔪᓂ ᐃᓄᖕᓂ ᐸᓖᓯᒃᑯᓐᓄᑦ ᐱᓕᒻᒪᒃᓴᐃᓂᓕᐊᓚᐅᖅᑐᓂ ᐱᓕᕆᐊᖑᔪᒥ 2020−ᒥ ᐊᒻᒪ 2021−ᒥ. (ᑐᓴᒐᒃᓴᓕᕆᔨᒃᑯᑦ ᐊᔾᔨᖁᑎᖓ)

By ᐃᐊᒪ ᑐᕌᓐᑐᕐᒧᑦ

For English version, see One of 21 Inuit in RCMP training program has applied to join the force

ᐱᓕᒻᒪᒃᓴᐃᓂᓕᐊᓚᐅᖅᑐᓂ ᐱᓕᕆᐊᖑᔪᒥ ᑐᕌᒐᖃᖅᑐᒥ ᐃᖅᑲᓇᐃᔭᖅᑎᑖᕐᓂᕐᒥ ᐃᓄᖕᓂ ᑲᓇᑕᒥ ᐸᓖᓯᒃᑯᓐᓄᑦ ᑕᑯᓯᒪᕗᖅ ᐊᑕᐅᓯᕐᒥ 21−ᓂ ᐃᓄᖕᓂ ᐱᓕᕆᐊᖑᔪᒃᑰᖅᓯᒪᔪᓂ ᐱᓇᓱᐊᕐᓂᖏᓐᓂ ᐸᓖᓯᙳᕐᓂᕐᒥ, ᐅᖃᐅᓯᐅᓪᓗᓂ ᓄᓇᕗᒻᒥ ᒪᓕᒐᓕᕆᔨᒃᑯᑦ ᒥᓂᔅᑕᖓ ᑯᕋᐃᒡ ᓯᒪᐃᓚᒃ.

ᐅᖃᐅᔾᔨᓚᐅᖅᐳᖅ ᒪᓕᒐᓕᐅᕐᕕᖕᒥ ᑲᑎᒪᔩᑦ ᑲᑎᒪᑐᐃᓐᓇᖅᑎᓪᓗᒋᑦ ᔫᓂ 9−ᒥ ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᐊᑕᐅᓯᕐᒥ ᐃᓄᒃᑕᖃᖅᐳᖅ “ᒥᐊᓂᖅᓯᔨᐅᔪᒥ ᐊᒻᒪ ᓈᒻᒪᖕᓂᖓᓂ ᐱᓕᕆᓂᐅᔪᒥ” ᐱᓇᓱᐊᕐᓂᕐᒧᑦ ᐱᓕᕆᓂᐅᔪᒥ.

ᑕᖅᑭᓂ-ᑎᓴᒪᓂ ᐱᓕᕆᐊᖑᔪᖅ, ᑕᐃᔭᐅᔪᒥ ᐃᑲᔪᖅᓯᖅᑕᐅᓪᓗᓂ ᐱᓇᓱᐊᕐᓂᕐᒧᑦ ᐱᓕᒻᒪᒃᓴᐃᓂᕐᒧᑦ ᐱᓕᕆᐊᖑᔪᒥ ᐱᓕᕆᐊᖑᓚᐅᖅᐳᖅ ᐱᓕᕆᖃᑎᖃᖅᖢᑎᒃ ᐃᓄᓕᕆᔨᒃᑯᓐᓂ ᐊᒻᒪ ᒪᑭᒋᐊᖅᑕ ᐃᓄᐃᑦ ᐱᓕᒻᒪᒃᓴᐃᓂᐅᔪᒥ ᑎᒥᖁᑕᐅᔪᓂ ᐅᕘᓇ ᓄᓇᕗᒻᒥ ᑐᙵᕕᒃᑯᓐᓂ.

ᐱᓕᕆᐊᖑᔪᖅ ᓴᓇᓯᒪᓚᐅᖅᐳᖅ ᐸᕐᓇᐃᓂᕐᒥ ᐃᓄᖕᓂ ᐱᓕᕆᓂᖏᓐᓂ ᑲᓇᑕᒥ ᐸᓖᓯᒃᑯᑦ ᐃᓯᕈᓐᓇᐅᒻᒥ ᖃᐅᔨᓴᕈᑕᐅᓂᖓᓂ, ᐱᔭᕆᐊᖃᕐᓂᐅᔪᒥ ᐃᓯᕈᓐᓇᐅᒻᒥ ᐸᓖᓯᒃᑯᑦ ᑕᖅᑭᓂ−6−ᓂ ᐱᓕᒻᒪᒃᓴᐃᓂᕐᒥ ᐃᓕᓐᓂᐊᕐᓂᐅᔪᒥ ᖃᓪᓗᓈᑦ ᓄᓇᖓᓐᓂ ᑲᓇᑕᒥ.

ᑕᑯᓚᐅᖅᐳᖅ ᒪᕐᕉᖕᓂ ᑲᑎᙵᓂᐅᔪᓂ ᓄᓇᕗᒻᒥ ᐃᓄᖕᓂ: ᐊᑕᐅᓯᕐᒥ ᐃᖃᓗᖕᓂ 2020−ᒥ ᐊᒻᒪ ᐊᓯᒃᑲᓐᓂᐊᓂ ᑲᖏᖅᖠᓂᕐᒥ 2021−ᒥ.

7−ᓂ ᐱᓇᓱᐊᖅᑐᖃᓚᐅᖅᐳᖅ 2020−ᒥ. ᓄᕙᒡᔪᐊᕐᓇᖅ-19 ᐊᒥᓱᓂ ᖃᓂᒻᒪᓐᓇᐅᔪᒥ ᓴᖅᑭᑎᑦᑎᓚᐅᖅᐳᑦ ᐃᓚᖏᓐᓂ ᐊᒃᓱᕈᕈᑕᐅᔪᓂ ᐅᑯᓄᖓ ᑲᑎᙵᓂᐅᔪᓄᑦ — ᐊᖏᕐᕋᖅᑎᑕᐅᓚᐅᖅᐳᑦ ᓄᓇᓕᖏᓐᓄᑦ ᑲᔪᓯᑎᑦᑎᓂᖓᓂ ᐱᓕᒻᒪᒃᓴᐃᓂᓂ ᐅᖓᓯᒃᑐᒥ ᓄᓇᕗᑦ ᐅᐸᒃᑕᐅᑦᑕᐅᓕᓕᖅᑎᓪᓗᒍ.

6-ᖑᔪᑦ 7-ᓂ ᖄᖐᑎᑦᑎᑎᓪᓗᒋᑦ ᑲᓇᑕᒥ ᐸᓖᓯᒃᑯᑦ ᐃᓯᕈᑎᖓᓂ ᖃᐅᔨᓴᖅᑕᐅᓂᖓᓂ, ᑕᒪᒃᑭᑦ ᑭᓯᐊᓂ ᐊᑕᐅᓯᖅ ᓄᖅᑲᓕᓚᐅᖅᐳᖅ ᐱᓇᓱᐊᕐᓂᐅᔪᒥ ᐱᓕᕆᓂᐅᔪᒥ ᐅᕝᕙᓘᓐᓃᑦ ᐊᐱᕆᔭᐅᓚᐅᖅᐳᑦ ᓄᖅᑲᖁᔭᐅᓪᓗᑎᒃ “ᐱᔾᔪᑎᖃᖅᑐᒥ ᐊᔾᔨᒌᙱᕈᓘᔭᖅᑐᓂ ᐊᑲᐅᙱᓕᐅᕈᑕᐅᔪᓄᑦ, ᐃᓚᖃᖅᑐᒥ ᒪᓕᙱᓐᓂᖃᕐᓂᖏᓐᓂ,” ᓯᒪᐃᓚᒃ ᐅᖃᓚᐅᖅᐳᖅ.

2021−ᒥ, 14−ᓂ ᐃᓚᐅᖃᑕᐅᔪᓂ ᓴᓪᓕᓂ, ᑲᖏᖅᖠᓂᖅ, ᐊᕐᕕᐊᑦ, ᐃᒡᓗᓕᒑᕐᔪᒃ, ᑰᒑᕐᔪᒃ, ᖃᒪᓂᑦᑐᐊᖅ, ᐊᒻᒪ ᓴᓂᑭᓗᐊᕐᒥ ᐱᓕᒻᒪᒃᓴᓚᐅᖅᐳᑦ ᑲᖏᖅᖠᓂᕐᒥ.

ᑕᐃᒃᑯᓇᙵᑦ 14−ᖑᔪᓂ, 10 ᐱᔭᕇᕈᓐᓇᑦᑎᐊᓚᐅᖅᐳᑦ ᑲᓇᑕᒥ ᐸᓖᓯᒃᑯᑦ ᐃᓯᕈᓐᓇᐅᑎᖓᓂ ᖃᐅᔨᓴᖅᑕᐅᓂᖓᓂ, ᑭᓯᐊᓂ 8 ᓄᖅᑲᓚᐅᖅᐳᑦ “ᓇᖕᒥᓂᖅ ᐱᔾᔪᑕᐅᔪᓄᑦ,” ᓯᒪᐃᓚᒃ ᐅᖃᓚᐅᖅᐳᖅ.

ᐊᒥᐊᒃᑯᔪᓂ ᒪᕐᕉᖕᓂ, ᐊᑕᐅᓯᖅ ᐱᓕᒻᒪᒃᓴᕙᓪᓕᐊᕗᖅ ᐅᖃᓗᒃᐸᒃᑐᓂ ᐊᐅᓚᑦᑎᔨᐅᔪᒥ, ᐊᒻᒪ ᐊᐃᑉᐸᖓ ᐱᒋᐊᖅᓯᒪᕗᖅ ᐊᓪᓚᕝᕕᓕᕆᓂᕐᒥ ᐃᓂᐅᔪᒥ, ᐅᖃᐅᓯᐅᓪᓗᓂ Cpl. ᔪᐊᔾ ᕼᐊᓄᕆ, ᑐᕌᖅᑎᑦᑎᕙᒃᑐᒥ ᓄᓇᕗᒻᒥ ᑲᓇᑕᒥ ᐸᓖᓯᒃᑯᓐᓄᑦ ᐃᖅᑲᓇᐃᔭᖅᑎᑖᕋᓱᐊᕐᓂᕐᒧᑦ ᑲᑎᙵᓂᐅᔪᒥ.

ᕼᐊᓄᕆ, ᐊᑕᐅᓯᐅᓪᓗᓂ ᓄᓇᕗᒻᒥ ᑲᓇᑕᒥ ᐸᓖᓯᒃᑯᓐᓂ ᑕᓪᓕᒪᓂ ᐃᓄᖕᓂ ᐃᓚᒋᔭᐅᔪᓂ, ᐅᖃᓚᐅᖅᐳᖅ “ᐊᖏᔪᒻᒪᕆᐊᓗᖕᓂ ᐊᒡᕕᐊᕈᑎᑕᖃᕐᓂᖓᓂ” ᐃᓄᖕᓄᑦ ᐱᓇᓱᐊᕈᒪᔪᓄᑦ ᐸᓖᓯᒃᑯᓐᓄᑦ.

ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒥ ᐊᔭᐅᕆᓯᒪᕗᖅ ᑲᓇᑕᒥ ᐸᓖᓯᒃᑯᓐᓂ ᓅᑎᕆᓂᖓᓂ ᑕᒪᒃᑭᒐᓚᖕᓂ ᐱᓇᓱᐊᕐᓂᐅᔪᒥ ᐱᓕᕆᓂᖓᓂ, ᐃᓚᖃᖅᑐᒥ ᐃᓯᕈᓐᓇᐅᒻᒥ ᖃᐅᔨᓴᖅᑕᐅᓂᖓᓂ, ᖃᕋᓴᐅᔭᑎᒍᑦ.

“ᐊᖏᓛᖑᔪᖅ ᐊᕖᐊᕈᑕᐅᔪᖅ ᖃᕋᓴᐅᔭᒃᑰᕈᑎᖃᙱᓗᐊᕐᓂᖓᓂ,” ᕼᐊᓄᕆ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᐊᒥᓱᑦ ᐃᓄᐃᑦ ᖃᕋᓴᐅᔭᖃᙱᒻᒪᑕ ᐊᖏᕐᕋᖏᓐᓂ, ᐅᖃᓘᑎᕋᓛᖃᑐᐃᓐᓇᖅᖢᑎᒃ. ᑭᓯᐊᓂ ᐱᓇᓱᐊᕐᓂᕐᒧᑦ ᐱᓕᕆᓂᐅᔪᖅ, ᐃᓚᖃᖅᑐᒥ ᖃᐅᔨᓴᖅᑕᐅᓂᖓᓂ, ᐱᓕᕆᐊᖑᔭᕆᐊᖃᖅᐳᖅ ᖃᕋᓴᐅᔭᑎᒍᑦ ᐅᔾᔨᖅᓱᕐᓂᖃᑦᑎᐊᖅᑐᒥ ᖃᕋᓴᐅᔭᒥ ᑲᓱᖃᑎᖃᕐᓂᐅᔪᒥ.”

ᑲᓇᑕᒥ ᐸᓖᓯᒃᑯᑦ ᐱᓇᓱᐊᖅᑐᑦ ᐱᔭᕆᐊᖃᕆᕗᑦ ᓯᕗᓪᓕᖅᐹᒥ ᐋᓐᓂᖅᑐᓄᑦ ᐊᒻᒪ CPR ᐸᐃᑉᐹᖃᕆᐊᖃᖅᐳᑦ ᐊᒻᒪᓗ ᑭᒡᓕᖃᖅᑎᑕᐅᙱᑦᑐᒥ ᐊᖁᑦᑐᓐᓇᐅᒻᒥᒃ ᓚᐃᓴᓐᓯᒥ.

“ᐊᔪᕐᓇᖅᑐᒻᒪᕆᐅᕗᖅ ᐱᓕᕆᓇᓱᐊᕐᓂᕐᒧᑦ ᐃᓄᑭᑦᑐᒥ ᓄᓇᓕᖕᒥ, ᐱᓗᐊᖅᑐᒥ ᐅᓪᓗᓕᒫᖅᓯᐅᑎᐅᔪᒥ ᓄᓇᓯᐅᑎᓄᑦ ᖃᐅᔨᓴᖅᑎᑕᖃᙱᑎᓪᓗᒍ,” ᐅᖃᓚᐅᖅᐳᖅ.

ᑕᐃᔅᓱᒪᓂᒃᑲᓐᓂᖅ, ᕼᐊᓄᕆ ᐅᖃᓚᐅᖅᐳᖅ ᐊᑐᖅᑐᐊᖅᑎᑦᑎᓯᒪᓂᖓᓂ ᓇᖕᒥᓂᖅ ᓄᓇᓯᐅᑎᖓᓂ ᐱᓇᓱᐊᖅᑐᓄᑦ ᐃᖃᓗᖕᓂ ᐱᓕᕆᔪᓐᓇᕐᓂᐊᕐᒪᑕ ᐊᖁᓐᓂᕐᒧᑦ ᖃᐅᔨᓴᖅᑕᐅᓂᖓᓂ.

ᐊᓯᐊᓂ ᐊᑲᐅᙱᓕᐅᕈᑕᐅᔪᖅ ᖃᐅᔨᓴᖅᑕᐅᓂᖅ ᐊᑐᐃᓐᓇᐅᙱᒻᒪᑦ ᐃᓄᒃᑎᑐᑦ. ᐅᓇ ᓴᖅᑭᑎᑦᑎᕗᖅ ᓱᓕᒃᑲᓐᓂᕐᒥ ᐊᒡᕕᐊᕈᑕᐅᔪᒥ ᐱᓇᓱᐊᖅᑐᓂ ᐊᑕᐅᓯᑐᐊᒥᒃ ᐅᖃᐅᓯᖃᖅᑐᓂ ᐅᕝᕙᓘᓐᓃᑦ ᐃᓄᒃᑎᑐᑐᐊᖅ ᓯᕗᓪᓕᖅᐸᐅᔪᒥ ᐅᖃᐅᓯᖃᕐᓂᖏᓐᓂ.

“ᑕᑭᔪᒻᒪᕆᐊᓘᓪᓗᓂ, ᐱᔭᕆᑐᓪᓗᓂ ᐱᓕᕆᓂᐅᕗᖅ,” ᕼᐊᓄᕆ ᐅᖃᓚᐅᖅᐳᖅ. “ᐊᑭᑦᑐᕋᐅᑎᖃᕐᓂᖃᕆᕗᒍᑦ ᐊᓯᖏᓐᓂ ᐱᓕᕆᔨᐅᔪᓂ ᓄᓇᕗᒻᒥ ᐊᑐᐃᓐᓇᖃᖅᑎᑦᑎᔪᓂ ᖁᑦᑎᖕᓂᖅᓴᐅᔪᓂ ᑮᓴᐅᔾᔭᒃᓴᓂᐅᔪᓂ, ᐅᔭᕋᖕᓂᐊᕐᕖᑦ, ᓄᓇᕗᒻᒥ ᒐᕙᒪᒃᑯᓐᓂ, ᕼᐋᒻᓚᐅᔪᓂ.”

ᕼᐊᓄᕆ ᐅᖃᓚᐅᖅᐳᖅ ᑲᓇᑕᒥ ᐸᓖᓯᒃᑯᑦ ᒫᓐᓇᐅᔪᒥ ᕿᓂᖅᐳᑦ ᑐᒃᓯᕋᕐᓂᕐᒥ ᑮᓇᐅᔭᖃᖅᑎᑕᐅᓂᐅᔪᒥ ᐱᒋᐊᖅᑎᑦᑎᓂᕐᒥ ᐱᖓᔪᖓᓐᓂ ᐊᕐᕌᒎᔪᒥ ᐱᓕᒻᒪᒃᓴᐃᓂᕐᒥ ᐱᓕᕆᐊᖑᔪᒥ.

ᐊᒻᒪᓗᑦᑕᐅᖅ, ᒪᕐᕉᖕᓂ ᐱᓇᓱᐊᖅᑐᓂ 2021−ᒥ ᑐᕌᖅᐸᓪᓕᐊᕗᑦ ᐸᓖᓯᒃᑯᓐᓄᑦ ᐃᓕᓐᓂᐊᕐᕕᐅᔪᒧᑦ ᑕᖅᑭᐅᑉ ᐃᓱᐊᓂ ᓄᓇᖃᖅᑳᖅᓯᒪᔪᓄᑦ ᐱᓕᒻᒪᒃᓴᐃᓂᕐᒥ ᐃᓕᓐᓂᐊᕐᕕᐅᔪᒧᑦ.

“ᓱᓕ ᐱᒧᒪᓂᖃᖅᐳᖅ, ᑕᐃᒫᒃ ᓱᓕ ᐅᑕᖅᑭᑦᑎᐊᕋᓱᐊᖅᐳᒍᑦ ᖃᐅᔨᓇᓱᖕᓂᕐᒥ ᐱᓇᓱᐊᕈᒪᖕᒪᖔᑕ ᐃᖅᑲᓇᐃᔮᖃᕐᓂᕐᒥ ᑲᓇᑕᒥ ᐸᓖᓯᒃᑯᓐᓂ,” ᐅᖃᓚᐅᖅᐳᖅ.

ᔭᓯᑲ ᔭᖕ, ᓄᓇᕗᒻᒥ ᒥᓂᔅᑕᐅᑉ ᑐᒡᓕᖓᑕ ᐃᑲᔪᖅᑎᖓ ᐃᓄᓕᒫᓄᑦ ᐊᑦᑕᓇᔾᔭᐃᖅᓯᓯᒪᓂᕐᒥ, ᐅᖃᐅᔾᔨᓚᐅᕆᕗᖅ ᑲᑎᒪᔨᕋᓛᖑᔪᓂ ᑲᓇᑕᒥ ᐸᓖᓯᒃᑯᑦ ᐊᒻᒪᓗ ᐱᓕᕆᕝᕕᒃ ᐅᖃᓪᓚᒃᐸᓪᓕᐊᕗᑦ “ᐱᑕᖃᑐᐃᓐᓇᕆᐊᖃᕐᓂᖓᓂ ᕿᓂᕐᓂᕐᒧᑦ ᐊᓯᐊᒎᖅᑐᒥ ᐸᓖᓯᐅᔪᓂ ᐱᓕᕆᐊᖑᔪᓂ ᐱᑕᖃᓚᐅᖅᓯᒪᔪᓂ ᑕᐃᔅᓱᒪᓂᒃᑲᓐᓂᖅ” ᐊᒻᒪ ᓂᕈᐊᒐᒃᓴᐅᔪᓂ ᓄᓇᓕᖕᓂ ᐊᑦᑕᓇᔾᔭᐃᖅᓯᒪᓂᐅᔪᓄᑦ ᐱᓕᕆᔨᐅᔪᓄᑦ.

Share This Story

(0) Comments

Join the Conversation

Your email address will not be published. Required fields are marked *

*