ᐊᑯᓕᕕᒃᒥ ᒪᐃᔭᐅᓚᐅᕐᓯᒪᔪᖅ ᐃᓚᐃ ᐊᐅᓪᓚᒃ ᐃᓅᔪᓐᓃᖅᐳᖅ 74ᖑᓕᖅᖢᓂ

For English version, see Former Akulivik mayor Eli Aullaluk dies at 74

ᐊᑯᓕᕕᒃᒥ ᒪᐃᔭᐅᓚᐅᕐᓯᒪᔪᖅ ᐃᓚᐃ ᐊᐅᓪᓚᓗᒃ ᐃᖅᑲᐅᒪᔭᐅᔪᖅ ᓱᓕᕙᓚᐅᕐᓯᒪᓂᖓᓂᒃ ᐊᒻᒪ ᓇᒡᓕᒍᓱᑦᑎᐊᖅᐸᒃᖢᓂ.

ᐅᓇ 74ᓂ ᐅᑭᐅᖃᓚᐅᕐᑐᖅ ᐃᓅᔪᓐᓃᓚᐅᕐᑐᖅ ᐋᒐᓯ 2ᒥ ᐃᒫᒃᑰᖅᖢᓂ.

“ᐃᓄᑦᑎᐊᕚᓗᖕᒥ ᐊᓯᐅᔨᕗᒍᑦ.” ᐅᖃᕐᑐᖅ ᒪᓐᓯ ᓄᕙᓕᙵ, ᑖᓐᓇᓕ ᐊᑯᓂᐊᓗᒃ ᐃᖅᑲᓇᐃᔭᖃᑎᖃᓚᐅᕐᑐᖅ ᐊᒻᒪ ᐱᖃᓐᓇᕆᔭᖃᖅᖢᓂ ᐊᐅᓪᓚᓗᒃᒥ.

“ᐊᐃᑦᑖᖑᒐᓗᐊᖅ ᑭᓯᐊᓂᓕ ᓈᒻᒪᒃᓯᒍᔾᔨᒻᒪ, ᐃᓚᒥᓂ ᐅᐸᒍᑎᔪᖅ.”

ᓄᕙᓕᙵ ᐊᒻᒪ ᐊᐅᓪᓚᓗᒃ ᐱᓕᕆᖃᑎᒌᓚᐅᕐᓯᒪᔫᑦ ᒪᐃᔭᐅᓚᐅᕐᓂᒃᑯᑦ ᑕᒪᕐᒥᒃ ᐊᑯᓕᕕᒃᒥ. ᐊᐅᓪᓚᓗᒃ ᒪᐃᔭᐅᑎᓪᓗᒍ ᓄᕙᓕᙵ ᑲᑎᒪᔨᐅᓚᐅᕐᓯᒪᓪᓗᓂ ᐊᒻᒪᓗ ᑖᓐᓇ ᒪᐃᔭᐅᑎᓪᓗᒍ ᐱᖃᑎᖓ ᑲᑎᒪᔨᐅᓪᓗᓂ.

ᐱᓕᕆᖃᑎᒌᓚᐅᕐᑑᒃ ᐊᔾᔨᒌᓂ ᑐᕌᒐᖃᕋᓱᒃᖢᑎᒃ: ᓄᓇᓕᖕᓅᖓᔪᓂᒃ, ᐅᖃᕐᑐᖅ ᓄᕙᓕᙵ. ᐱᓕᕆᐊᖃᖅᐸᓚᐅᕐᑐᑦ ᓄᓇᓖᑦ ᐱᕙᓪᓕᐊᑎᑕᐅᓇᓱᒃᖢᑎᒃ ᒪᐅᓇ ᖃᓄᐃᓕᐅᕈᑎᒃᓴᑎᒍᑦ ᐃᓅᓱᒃᑐᓄᑦ ᐊᒻᒪ ᐃᓐᓇᕐᓄᑦ.

“ᐱᓕᕆᖃᑎᑦᑎᐊᕚᓘᓚᐅᕐᑐᖅ,” ᓄᕙᓕᙵ ᐅᖃᕐᑐᖅ. “ᐃᓚᐃ ᐃᑲᔪᖅᓯᒪᓪᓚᕆᒃᑐᖅ ᑕᒪᐅᖓ.”

ᐊᑕᐅᑦᑎᒃᑯ ᐃᓚᒋᔭᐅᓕᓚᐅᕐᓯᒪᔫᒃ ᓄᓇᕕᒃᒥ ᑕᕆᐅᕐᒥᐅᑕᓂᒃ ᐸᕐᓇᐅᑎᓄᑦ ᑲᒥᓴᓐᑯᓐᓄᑦ ᑲᑎᒪᔨᐅᖃᑕᐅᓪᓗᑎᒃ, ᑭᒡᒐᖅᑐᐃᓪᓗᑎᒃ ᓄᓇᖓᓂᒃ ᐊᑯᓕᕕᒃᒥ.

ᐊᐅᓪᓚᓗᒃ ᐃᓱᒪᒥᓂ ᐅᖃᕐᓴᕋᐃᑉᐸᓚᐅᕐᓯᒪᔪᖅ, ᒪᓕᒐᓕᕆᓂᕐᒨᖓᒐᓗᐊᖅᐸᑦ ᑕᒫᓂᒥᐊᕐᓘᓐᓃᑦ, ᓄᕙᓕᙵ ᐅᖃᕐᑐᖅ.

“ᐃᓱᒪᙱᖢᓂ ᑕᒻᒪᕋᓗᐊᕈᓂ ᐅᖃᕐᓂᖓ, ᐃᓚᐃ ᐅᖃᐅᓯᖃᖅᐸᓚᐅᕐᑐᖅ ᑕᒻᒪᕋᓗᐊᖅᐸᑦ ᑕᒻᒪᙱᖢᓂᓘᓐᓃᑦ,” ᐅᖃᕐᑐᖅ. “ᐃᓚᐃ ᐃᒪᐃᓕᕙᓚᐅᕐᑐᖅ ‘ᐅᖃᕐᙱᑦᑐᖅ ᑕᒻᒪᕋᔭᕐᒪᖔᑦ ᑕᒻᒪᙱᓪᓗᓂᓘᓐᓃᑦ ᑭᓯᐊᓂᓕ ᐅᖃᐅᓯᕆᔭᕆᐊᓕᒃ.’”

ᐊᐅᓪᓚᓗᒃ ᒪᓕᒐᓕᕆᓂᕐᒥ ᓄᖅᑲᓚᐅᕐᓯᒪᔪᖅ 2010ᒥ.

“ᐅᕙᓐᓄ ᐊᑕᐅᓰᖅᖢᓂ ᑕᒪᑐᒥᖓ ᐃᓅᓯᕆᔭᖓᓂ ᐃᕿᐊᙳᕐᓂᕋᖅᖢᓂ,” ᐅᖃᕐᑐᖅ ᓄᕙᓕᙵ. “ᐅᕙᓐᓄ ᐅᖃᖅᖢᓂ, ‘ᑐᓂᓯᔪᓐᓇᕐᓂᓐᓂ ᑐᓂᐊᓂᒃᑰᕋᒃᑯ ᑕᒪᓐᓇ ᓄᓇᕗᑦ ᐊᒻᒪᓗ ᓄᓇᒋᔭᕗᑦ. ᒫᓐᓇᓕ ᐃᓚᒃᑲ ᐅᐸᒃᓯᒪᑐᐃᓐᓇᕆᐊᖃᓕᕋᒃᑭᑦ.”

ᑭᓯᐊᓂᓕ ᓄᓇᓕᖕᓄᑦ ᐱᔨᑦᑎᕋᐅᑎᓕᕇᓐᓇᓚᐅᕐᑐᖅ ᒪᐅᓇ ᐊᑐᖅᐸᒃᑐᓄᑦ ᐃᑲᔪᖅᑎᑦ ᐱᓕᕆᐊᒃᓴᑎᒍᑦ (Natural Helpers Program), ᑖᓐᓇᓕ ᐊᐅᓚᑕᐅᔪᖅ ᓄᓇᕕᒃᒥ ᓄᓇᓕᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐃᓄᓕᕆᓂᕐᒧᑦ ᑲᑎᒪᔨᓄᑦ.

ᐊᑐᖅᐸᒃᑐᓄᑦ ᐃᑲᔪᖅᑎᑦ (Natural Helpers) ᐅᑯᐊᖑᔪᑦ ᐃᓄᐃᑦ ᓄᓇᓕᖕᓄᐊᖅᑎᑕᐅᕙᒃᑐᑦ ᐃᓅᔪᓐᓃᑳᓪᓚᑐᓂᒃ ᐃᓚᐃᖅᑐᓂᒃ, ᐅᖃᕐᑐᖅ ᓄᕙᓕᙵ, ᑐᑭᒧᐊᖅᑎᑦᑎᔨ ᑖᔅᓱᒥᖓ ᐱᓕᕆᐊᒥᒃ.

“ᐱᓕᕆᐊᒃᓴᖃᕋᒪ ᐃᓄᖕᓂ ᐃᑲᔪᕈᓐᓇᖅᑐᓂ ᐃᓚᐃᖅᑐᓂᒃ,” ᐅᖃᕐᑐᖅ. “ᐊᐱᕆᓚᐅᕐᓯᒪᒐᒃᑯ ᐃᓚᐃ ᐱᓕᕆᔪᒪᓇᔭᕆᐊᒃᓴᖓᓂ ᑖᔅᓱᒥᖓ ᐊᒻᒪᓗ ᐊᖏᖅᖢᓂ.”

ᐊᐅᓪᓚᓗᒃ ᐃᖅᑲᓇᐃᔭᓕᖅᑎᓐᓂᖓ ᐃᖅᑲᐅᒪᑦᑎᐊᖅᑕᖓ ᓄᕙᓕᙵᐅ, ᐅᖃᖅᖢᓂ ᓇᒡᓕᒍᓱᑦᑎᐊᓚᐅᕐᓯᒪᓂᖓᓂᒃ ᐊᒻᒪ ᐃᓱᒪᒋᔭᖃᑦᑎᐊᕐᓂᖓᓂᒃ ᐊᐅᓪᓚᓗᒃ ᐊᓯᒥᓂᒃ, ᐱᓗᐊᖅᑐᒥ ᐃᓚᐃᓵᕐᓂᑯᓂᒃ.

ᒫᓐᓇᓕ ᓄᕙᓕᙵ ᐃᑲᔪᑲᑕᒃᑐᖅ ᓇᓕ ᐊᐅᓪᓚᓗᒃᒥ, ᐃᓚᐃ ᐊᐅᓪᓚᓘᑉ ᓄᓕᐊᖓᓂ.

“ᐃᓚᐃ ᐃᓄᒻᒪᕆᓚᐅᕐᑐᖅ, ᐅᖃᕐᓴᕋᐃᖢᓂ ᐊᒻᒪ ᐃᓱᒪᒋᔭᒥᓂ ᐅᖃᕈᓐᓇᑐᐃᓐᓇᑦᑎᐊᖅᖢᓂ,” ᐅᖃᕐᑐᖅ ᓄᕙᓕᙵ.

“ᐊᖓᔪᒃᖠᖅᐹᖑᓚᐅᕐᑐᖅ ᐊᒻᒪ ᐃᓱᒪᑦᑎᐊᓛᖑᕙᒃᖢᓂ ᐃᓚᖏᓐᓂ… ᐃᓚᓕᒫᖏ ᑖᔅᓱᒥᖓ ᐱᒻᒪᕆᒋᔭᖃᓚᐅᕐᑐᖅ ᖃᐅᔨᒋᐊᕐᕕᐅᕙᒃᖢᓂ ᓲᕐᓗ ᐊᑖᑕᒋᔭᐅᓪᓗᓂ.”