ᐊᖏᕐᕋᒥ ᕿᒪᐃᓂᖅ

ᓄᓇᕗᒥᑦ ᓄᓇᑐᖃᖏᓐᓃᒍᓐᓃᖅᑎᑕᐅᓯᒪᔪᑦᓄᓇᕗᒥᑦ ᓄᓇᑐᖃᖏᓐᓃᒍᓐᓃᖅᑎᑕᐅᓯᒪᔪᑦ

200-ᖏᓐᓃᑦᑐᑦ ᐃᓄᐃᑦ ᐋᑐᕚᒦᑦᑐᑦ ᑐᙵᓱᕝᕕᒃ ᐃᓄᐃᑦ ᑕᕿᑕᒫᑦ ᓂᕆᕕᒡᔪᐊᕐᓇᒧᑦ ᐅᐸᒍᑎᕗᑦ ᔭᓄᐊᕆ 18, 2018-ᒥᑦ, ᐅᕙᓂ ᐊᐅ ᓚᐃᑎ ᐊᕝ ᐊᓴᒻᓴᓐ ᑐᒃᓯᐊᕐᕕᒃᒥᑦ (Our Lady of Assumption Church) ᕚᓂᐃᒥᑦ. (ᐊᔾᔨᓕᐅᕆᔨ ᔨᒻ ᐱᐅᓪ)

By ᔭᐃᓐ ᔪᐊᔾ

ᖁᕕᐊᓲᑎᖃᕋᑦᑕ ᓄᓇᕗᑦ 20-ᐅᓕᕐᓂᖓᓂᒃ ᕿᒥᕐᕈᐊᖅᖢᑎᒍᑦ ᑖᔅᓱᒪ ᓇᖕᒥᓂᖅ ᒐᕙᒪᓕᕆᔨᖃᖅᑐᑦ ᑎᐅᕆᑑᕆᐅᑉ ᐊᓂᒍᐃᓯᒪᓂᖏᓐᓂ ᐊᒻᒪ ᐱᓇᓱᒋᐊᖃᖅᓯᒪᔭᖏᓐᓂᒃ ᒫᙵᑦ ᑎᑕᐅᓯᕆᓂᕐᒥᒃ ᐊᒻᒪ ᑕᑯᓐᓇᒐᒃᓴᓕᕆᓂᕐᒥᒃ ᒪᐅᖓ ᑮᓇᐅᔭᓕᐅᕋᓱᖕᓂᕐᒧᑦ, ᐃᓄᒃᑐᑦ ᖃᓄᐃᓕᕐᓂᖓᓂᒃ ᐊᒻᒪᓗ ᓯᓚᐅᑉ ᐊᓯᙳᖅᓂᖓᓂᒃ. ᐃᓚᖏᓐᓂᒃ ᓄᓇᕗᒻᒥᐅᑕᑦ ᐅᓂᒃᑲᐅᓯᖏᓐᓂᒃ ᑐᓴᕐᓂᐊᖅᑐᒍ ᖃᓄᖅ ᓄᓇᕗᑦ ᑐᑭᖃᕐᒪᖔᑦ ᑖᒃᑯᓄᖓ ᐊᒻᒪᓗ ᖃᓄᐃᑦᑐᓂ ᐊᓯᙳᕈᑎᒃᓴᓂᒃ ᑕᑯᔪᒪᖕᒪᖔᖏᓐᓂᒃ ᐊᕐᕌᒍ 20 ᐊᒡᒋᖅᑐᓂᒃ. 

ᐊᓂ ᐱᓱᒃᑎ, ᑎᑎᕋᖅᑎᒋᔭᐅᔪᖅ ᑯᐸᐃᒃ ᓂᒋᐊᓂ ᐃᓄᐃᑦ ᑲᑐᔾᔨᖃᑎᒌᓄᑦ, ᓄᓇᕗᒥᐅᑕᕕᓂᖅ, ᐅᖃᓚᐅᕐᑐᖅ ᕙᐃᓐᔅ ᑲᒥᓴᓐᑯᓐᓄᑦ (Viens commission) ᐊᕐᕌᓂ ᐱᔭᐅᔭᕆᐊᖃᖅᑐᓂᒃ ᒪᓐᑐᕆᐊᒥᑦ ᐃᓄᖕᓄᑦ. ᑲᒥᓴᓐᑯᑦ ᕿᒥᕐᕈᐊᓚᐅᕐᑐᑦ ᖃᓄᖅ ᑯᐸᐃᒃ ᒐᕙᒪᖏᑦᑕ ᐱᓕᕆᐊᒃᓴᖏᑦ ᐱᔨᑦᑎᕋᕐᓯᒪᖕᒪᖔᑕ ᓄᓇᖃᖅᑳᖅᑐᓂᑦ ᑯᐸᐃᒃᒥᑦ. (ᐊᔾᔨᓕᐅᒐᖅ)

ᓂᕆᐅᒃᑐᖃᓚᐅᕐᓯᒪᓐᓂᕈᓂ 1999-ᒥ ᐅᑯᐊ ᐃᓄᐃᑦ ᐅᑭᐅᕐᑕᖅᑑᑉ ᑲᓇᖕᓇᖓᓃᒃᑐᑦ ᓄᑖᖅ ᑎᐅᕆᑑᕆᐅᓂᐊᓕᖅᑐᖅ ᓄᓇᕗᑦ ᐃᒪᓐᓇ “ᓄᓇᕗᑦ” ᐊᒻᒪ ᐅᑭᐅᕐᑕᖅᑐᕐᒦᖏᓐᓇᕐᓗᓂ, ᑕᒻᒪᓚᐅᕐᐳᑦ: ᓄᓇᕗᑦ ᐱᒋᐊᓕᓚᐅᖅᑎᓪᓗᒍ, ᓄᓇᕗᒻᒥᐅᑕᑦ ᐅᓄᕐᓯᕙᓪᓕᐊᔪᑦ ᐸᕐᓇᒃᑲᒥᑦ ᐊᐅᓪᓚᓚᐅᕐᑐ ᖃᓪᓗᓈᑦ ᓄᓇᖓᓄᑦ.

ᐅᓪᓗᒥ, ᐊᕐᕌᒍᑦ ᐊᕙᑎᑦ (20) ᓇᓪᓕᖅᑎᓪᓗᒋᑦ, ᐃᓄᐃᑦ ᓄᓇᖃᕐᓂᕋᓕᖅᑐᑦ ᐋᑐᕚᒥᑦ, ᒫᓃᓕᕐᑐᑦ 5,000 ᖃᓂᒋᔭᖓᓂᒃ.

ᑭᓯᐊᓂᓕ, 1999-ᒥᑦ, ᐃᓄᐃᑦ ᐋᑐᕚᒦᓚᐅᕐᑐᑦ ᕼᐊᓐᓇᓚᑲᓪᓚᐅᓚᐅᕐᓯᒪᔪᑦ.

ᐅᔾᔨᕆᔪᖃᖅᑰᔨᓚᐅᙱᑦᑐᖅ ᐊᕐᕌᒍᓂ ᐊᕙᑎᓂᒃ ᐋᑐᕚᒥᐅᑕᑦ ᐃᓄᐃᑦ ᐅᓄᕐᓂᕐᓴᐅᓕᕐᓂᐊᕆᐊᒃᓴᖏᓐᓂᒃ ᐊᒥᓱᓂᒃ ᓄᓇᕗᒥᑦ ᓄᓇᓕᖏᓐᓂᒃ ᐊᒻᒪᓗ ᓄᓇᕗᒻᒥᐅᑕᒥ ᐃᓚᖃᙱᑦᑐᒥᒃ ᐋᑐᕚᒦᑦᑐᒥᑦ ᑐᓴᕐᓇᓗᐊᕈᓐᓃᕐᖢᓂ.

ᓄᓇᕗᒥᑦ ᐃᓄᐃᑦ ᐅᓄᕐᑐᑦ ᐊᐅᓪᓚᕐᓚᐅᕐᓂᖏᓐᓄᑦ ᓂᒋᕐᒧᑦ ᐱᕈᖅᑎᑦᑎᕚᓪᓕᕈᑎᐅᕗᖅ ᐅᓄᕐᓂᒃᓴᓂᒃ ᐃᑲᔫᑎᐅᔪᓐᓇᖅᑐᓂᒃ ᐃᓄᖕᓄᑦ ᓄᓇᕗᒻᒥᐅᓂᒃ ᐊᒻᒪ ᐊᓯᖏᓐᓂ ᐃᓄᐃᑦ ᓄᓇᖓᓂ ᐋᑐᕚᒥ ᐊᒻᒪ ᐊᓯᖏᓐᓂᒃ ᓄᓇᓕᐸᐅᔭᓂᒃ ᑲᓇᑕᓕᒫᒥᑦ, ᐅᖁᐊ ᐃᓚᐅᓪᓗᑎ ᓴᐃᓐᑦ ᔮᓐᔅ, ᒪᓐᑐᕆᐊᓪ, ᑐᕌᓐᑐ, ᐅᐃᓂᐱᒡ ᐊᒻᒪ ᐊᑦᒪᓐᑕᓐ.

ᐅᑯᑎᒎᓇᕐᓕ ᐃᓄᐃᑦ ᑕᐱᕇᑦ ᑲᓇᑕᒥ, 2006-ᒥᑦ 2016-ᒧᑦ ᐃᓄᐃᑦ ᓄᓇᖃᖅᑐᑦ ᐃᓄᐃᑦ ᓄᓇᖓᑕ ᓯᓚᑖᓂᑦ ᐅᓄᕐᓯᕚᓪᓕᓚᐅᕐᑐᑦ 10,920-ᒥᑦ 17,690-ᒧᑦ.

ᑭᓯᐊᓂᓕ ᐊᒥᓱᑦ ᐃᓄᐃᑦ ᓄᓇᕗᒥᙶᖏᑦᑐᑦ, ᐊᕐᕌᒍᓂ ᖁᓕᓂᒃ ᐅᓄᕐᓯᕚᓪᓕᕐᓂᖃᓚᐅᕐᑐᑦ 62-ᐳᓴᓐᑎᒥ ᐃᓄᐃᑦ ᐅᓄᕐᓂᖏᑦ ᐃᓄᐃᑦ ᓄᓇᖓᑕ ᓯᓚᑖᓃᑦᑐᓂᒃ.

2016-ᒥᑦ ᐅᓂᒃᑳᓂᑦ ᐋᑐᕚᒦᑦᑐᖅ ᑐᙵᓱᕝᕕᖓᑦ ᐃᓄᐃᑦ ᐊᒻᒪ ᓴᕿᑎᑦᑎᓯᒪᖕᒥᔪᖅ ᐃᒪᓐᓇ 2001-ᓗ 2006-ᓗ ᐊᑯᓐᓂᖓᓂ ᐅᓄᕐᓯᓂᖏᑦ ᐃᓄᐃᑦ ᖁᕝᕙᖅᐹᓪᓕᕐᓯᒪᓚᐅᕐᑐᖅ 30-ᐳᓴᓐᑎᒥ ᑐᕌᓐᑐᒥ ᐊᒻᒪ 60-ᐳᓴᓐᑎᒥ ᐋᑐᕚᒥᑦ.

ᑐᙵᓱᕝᕕᖓᑦ ᐃᓄᐃᑦ ᖃᓄᐃᓕᐅᕋᓱᖕᓂᕐᒧᑦ ᐅᓂᒃᑳᖏᑦ ᖃᐅᔨᔾᔪᑎᐅᓚᐅᕐᑐᑦ ᐃᓄᐃᑦ ᑕᒪᐅᙵᕐᓯᒪᓂᖏᓐᓂᒃ ᐃᖅᑲᓇᐃᔮᒃᓴᓄᑦ, ᐃᒡᓗᖃᕈᒪᓂᕐᒧᑦ, ᐋᓐᓂᐊᕐᕕᖕᒥᑦ ᑲᒪᒋᔭᐅᔭᕆᐊᖃᕐᓂᕐᒧᑦ ᐊᒻᒪ ᐃᓕᓐᓂᐊᕈᒪᓂᕐᒧᑦ.

ᑐᙵᓱᕝᕕᖓᑦ ᐃᓄᐃᑦ 2016-ᒥᑦ ᐅᓂᒃᑳᖏ ᖃᐅᔨᒍᑎᐅᓚᐅᕐᑐᖅ:

  • ᐱᖓᓱᑦ ᖁᓕᑦ ᐃᓄᐃᑦ ᓄᓇᖏᓐᓄᑦ ᐅᑎᕐᓂᐊᕈᒪᔪᑦ.
  • ᒫᓂ 9-ᖑᔪᑦ ᓯᕗᓪᓕᐅᓯᒪᓪᓗᑎᒃ ᐃᓚᒌᓐᓂᑦ ᖁᓕᓂᑦ ᑕᒪᐅᙵᖅᑳᖅᓯᒪᔪᑦ ᐃᓄᒋᐊᓄᑦ.
  • ᓇᑉᐸᖓᓂ ᐅᓄᙱᓐᓂᕐᓴᑦ ᐃᓱᒪᓯᒪᔪᑦ ᓄᓇᖃᖅᑳᓯᑐᓂᑦ ᑲᑐᔾᔨᖃᑎᒌᖑᔪᑦ ᐱᓕᕆᑦᑎᐊᕐᓯᒪᓂᖏᓐᓂᒃ ᐃᓱᒪᒋᔭᖏᓐᓂᒃ ᑖᒃᑯᐊ.

ᐃᓄᐃᑦ ᐅᓄᕐᓂᖏᑦ ᐅᓄᕐᓯᕙᓪᓕᐊᑎᓪᓗᒋᑦ ᐋᑐᕚᒥᑦ, ᑐᙵᓱᕝᕕᖓᑦ ᐃᓄᐃᑦ, ᐊᕐᕌᒍᓂ 30-ᓂ ᐱᓕᕆᓯᒪᓕᖅᖢᑎᒃ, ᐱᓕᕆᕚᓪᓕᕐᓯᒪᓕᕐᑐᑦ ᐱᔨᑦᑎᕋᐅᑎᖏᑦᑎᒍᑦ.

ᑖᓇ ᒪᐃ ᑭᒪᓕᐊᕐᔪᒃ, ᐃᓄᒃ ᐆᒻᒪᑎᓕᕆᓂᕐᒧᑦ ᐱᓚᑦᑐᐃᔨᑐᐊᖅ ᑲᓇᑕᒥ ᑲᑎᖃᑎᖃᖅᐳᖅ ᐃᓕᓐᓂᐊᕐᑎᓂᒃ ᐋᑐᕚᒦᑦᑐᒥᒃ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᕐᕕᒃᒥᑦ. ᑭᒪᓕᐊᕐᔪᒃ ᐋᑐᕚᒥᑦ ᐆᒻᒪᑎᓕᕆᕕᒃᒥ ᐱᓕᕆᖃᑦᑕᖅᑐᖅ. (ᐊᔾᔨᙳᐊᖃᖁᑎᖓᑦ ᓄᓇᕗᑦ ᓯᕗᓂᒃᓴᕗᑦ)

ᐊᕐᕌᒍᑦ ᐱᖓᓱᑦ ᐊᓂᒍᕐᑎᓪᓗᒍ ᓄᓇᕗᙳᓚᐅᕐᑎᓪᓗᒍ, 2002-ᒥ ᑐᙵᓱᕝᕕᖓᑦ ᐃᓄᐃᑦ ᓄᓇᓕᖕᓂ ᖃᑎᖃᑎᖃᓚᐅᕐᐳᑦ ᐱᓕᕆᐊᖓ ᐃᓱᒪᒋᔭᐅᓕᕐᑎᒐᓱᒃᖢᒍ ᐋᓐᑎᐅᕆᐅᒥᐅᑕᑎᑐᑦ ᐃᓱᒪᒋᔭᐅᓕᕐᓗᓂ. ᑕᐃᒪᐃᓐᓂᖓᓄᑦ, ᑐᙵᓱᕝᕕᖓᑦ ᐃᓄᐃᑦ ᐃᓕᓴᕆᔭᐅᓕᓚᐅᕐᑐᖅ ᐋᓐᓂᐅᕆᐅᒥᑦ ᐃᓄᒃᓄᑦ ᑲᑐᔾᔨᖃᑎᒌᖑᓂᖓᓂᒃ.

ᑭᖑᓂᐊᒍᓪᓕ 2005-ᒥᑦ, ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒋᑦ ᐋᓐᑎᐅᕆᐅᒥ ᑲᑎᓚᐅᖅᑎᓪᓗᒋᑦ, ᑐᙵᓱᕝᕕᖓᑦ ᐃᓄᐃᑦ ᑐᙵᓱᒃᑎᑦᑎᔨᐅᓚᐅᕐᑐᖅ ‘ᐊᑕᐅᓯᖅ ᓂᐱ’ ᑲᑎᒪᕕᒡᔪᐊᕐᓇᕐᒥᒃ, ᑖᓐᓇᓗ ᑲᑎᖃᑎᒌᒍᑎᐅᓚᐅᕐᑐᖅ ᐃᓄᖕᓂᑦ 7-ᓂ ᓄᓇᓕᐸᐅᔭᓂᙶᖅᑐᓂᒃ ᑲᓇᑕᒥ ᑐᓴᖃᑦᑕᐅᑎᓂᐊᕐᒪᑕ ᐅᓂᒃᑳᓂᒃ ᐊᖏᕐᕋᕆᙱᑕᒥ ᐊᖏᕐᕋᖃᕐᓂᕐᒥᒃ.

ᑕᐃᒪᙵᑦ 1999-ᒥᑦ, ᐃᓄᐃᑦ ᑲᑐᔾᔨᖃᑎᒌᑦ ᐋᑐᕚᒦᖏᓐᓇᓚᐅᕐᐳᑦ: ᐃᓄᐃᑦ ᑕᐱᕇ ᑲᓇᑕᒥ, ᐃᓄᐃᑦ ᓄᓇᕐᔪᐊᕐᒥᑦ ᑲᑎᒪᔨᕐᔪᐊᖏᑦ ᐊᒻᒪ ᐸᐅᒃᑑᑎᑦ ᓄᓇᓕᐸᐅᔭᓃᖏᓐᓇᖅᑐᑦ, ᑕᒫᓂᓗ ᐊᒥᓱᓂᒃ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓪᓗᑎᒃ. ᐋᑐᕚᒥᑦ ᐃᓄᐃᑦ ᓱᕈᓯᖏᓐᓄᑦ ᐱᓕᕆᕝᕕᒃ ᐊᔾᔨᒌᙱᑦᑑᑎᓂᒃ ᖃᓄᐃᓕᐅᒐᒃᓴᖃᐅᓕᕐᐳᑦ ᐃᓕᓐᓂᐊᖅᑐᓄᑦ ᓱᕈᓯᓛᓄᑦ, ᐃᓅᓱᒃᑐᓄᑦ ᐊᒻᒪ ᐃᓚᒌᓄᑦ, ᐊᒻᒪ ᐅᓇ ᐋᑐᕚᒦᑦᑐᖅ ᓯᓚᑦᑐᖅᓴᕐᕕᒃ ᐃᓅᓱᒃᑐᓄᑦ ᐃᓄᖕᓄᑦ ᐃᓕᓐᓂᐊᖅᑎᓄᑦ, ᓄᓇᕗᑦ ᓯᕗᓂᒃᓴᕗᑦ, ᐊᒻᒪ ᐊᖏᒡᓕᒋᐊᕐᒥᔪᖅ.

ᐊᒻᒪᓗ, ᐊᒥᓱᑦ ᐃᓕᓐᓂᐊᕐᓯᒪᔪᑦ ᓄᓇᕗᒻᒥᐅᑦ, ᐃᓚᖃᖅᖢᓂ ᓄᓇᕗᒥᐅᑕᒥᑦ ᐃᓄᖕᒥᑦ ᐆᒻᒪᑎᓕᕆᓂᕐᒧᑦ ᐱᓚᒃᑐᐃᔨᒥᑦ, ᑮᓇᐅᔭᓕᕆᔨᒻᒪᕆᖕᒥᑦ ᐊᒻᒪᓗ ᒐᕙᒪᒃᑯᓐᓂᑦ ᑭᒡᒐᖅᑐᐃᓪᓗᓂ ᓗᐊᐃᔭ, ᓂᕈᐊᕐᓯᒪᕗᑦ ᓄᓇᕗᒧᑦ ᐅᑎᕈᒪᙱᖢᑎᒃ.

ᐅᑯᐊ ᐃᓚᐃᓐᓇᑯᓗᖏᑦ ᓄᓇᕗᑦ ᐃᓄᖏᓐᓂᒃ ᐅᑭᐅᕐᑕᖅᑐᕐᒥᑦ ᓄᓇᖃᕈᓐᓃᕐᓯᒪᔪᓂᒃ, ᓄᓇᖃᕈᓐᓃᕐᓯᒪᓂᖅ ᐅᕘᓇ ᐃᒪᐃᓕᖓᔪᖅ ᓄᓇᑐᖃᖏᓐᓃᒍᓐᓃᕐᑐᑦ.

ᓈᒻᒪᙱᓕᐅᕈᑎᐅᔪᑦ, ᒪᑯᑎᑐᓇᖅ ᐊᖏᕐᕋᖃᕈᓐᓃᕐᓂᖅ, ᐊᑐᓗᐊᕐᓂᖅ ᐊᒻᒪ ᐱᑦᑎᐊᙱᓗᐊᕐᓂᖅ ᕿᒪᒃᑕᐅᓇᓱᒃᓯᒪᒐᓗᐊᖅᖢᑎᒃ ᓄᓇᕗᒻᒥᐅᓄᑦ ᓱᓕ ᒪᓕᔭᑉᐳᑦ. ᑕᐃᒪᐃᓐᓂᖓᓄᑦ ᐊᒥᓱᕈᓗᖕᓂ ᐃᓅᔪᓐᓃᕐᓯᒪᒍᑎᐅᓯᒪᓕᖅᐳᑦ.

ᓱᕈᓰᑦ ᐊᔾᔨᒌᙱᑦᑐᓂᒃ ᐃᓕᖁᓯᖃᖅᑐᑦ ᖁᙱᐊᖅᑕᐅᓚᐅᕐᐳᑦ ᓈᑦᑏᖑᔭᓛᕐᓂᐊᕐᒥᑦ, ᕕᕝᕗᐊᕆ 16-ᒥᑦ, ᐃᖃᓗᐃᑦ ᓴᐃᓐᑦ ᔫᑦ ᐋᖕᓕᑲᓐᑯᑦ ᑐᒃᓯᐊᕐᕕᖓᓂᒃ ᐆᒧᖓ ᐅᐸᓐᑐ (Ubuntu) ᖃᓄᐃᓕᐅᕐᓇᒧᑦ ᐋᕿᒃᓱᖅᑕᐅᓯᒪᔪᒥᒃ ᓄᓇᕗᒥᑦ ᕿᕐᓂᖅᑕᐃᑦ ᖃᓄᐃᓕᐅᕈᓯᕕᓂᖏᓐᓄᑦ ᑲᑐᔾᔨᖃᑎᒌᓄᑦ ᕿᕐᓂᖅᑕᐃᑦ ᖃᓄᐃᓕᐅᕈᓯᕕᓂᖏᓐᓄᑦ ᑕᕿᐅᑎᓪᓗᒍ. (ᐊᔾᔨᙳᐊᖅ ᓄᓇᕗᒥᑦ ᕿᕐᓂᖅᑕᐃᑦ ᖃᓄᐃᓕᐅᕐᓂᕕᓂᖏᓐᓄᑦ ᑲᑐᔾᔨᖃᑎᒌᓂᒃ)

ᐃᓚᖏᑦ ᑲᒪᒋᔭᖃᖅᑐᑦ ᓂᒋᕐᒥ ᓱᒃᑲᐃᑦᑐᒥᑦ ᐱᓕᕆᐊᖃᑎᖅᐸᓪᓕᐊᖕᒪᑕ ᓄᓇᕗᒻᒥᐅᑦ ᐃᓄᖏᓐᓄᑦ ᐱᔭᐅᔭᕆᐊᓕᖕᓂ.

ᐊᕐᕌᓂ, ᐊᓂ ᐱᓱᒃᑎ, ᑎᑎᕋᖅᑎ ᑯᐸᐃᒃ ᓂᒋᐊᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐊᒻᒪᓗ ᓄᓇᕗᒥᐅᑕᑐᖃᐅᓪᓗᓂ, ᐅᖃᓚᐅᕐᑐᖅ Viens ᑲᒥᓴᒧᑦ ᖃᓄᖅ ᑯᐸᐃᒃ ᐱᔨᑦᑎᕋᖅᓯᒪᓂᖏᓐᓂᒃ ᓄᓇᖃᖅᑳᖅᑐᓂᒃ ᐱᔭᐅᔭᕆᐊᖃᒻᒪᕆᒃᑐᓂᒃ ᒪᓐᑐᕆᐊᒥᑦ ᐃᓄᖕᓂᑦ ᒪᐅᓇ ᐅᖅᑯᐊᖃᕈᓐᓇᕐᓂᒃᑯᑦ, ᐃᑲᔪᖅᑕᐅᓂᒃᑯᑦ ᖃᓄᐃᒍᑎᖏᓐᓂᒃ ᐊᒻᒪ ᐊᓯᖏᓐᓂᒃ ᐃᑲᔪᕈᑎᒃᓴᑎᒍᑦ.

ᓄᓇᕗᒥᑦ ᐱᒋᐊᖅᑎᑦᑎᔨᐅᔪᑦ ᓯᕗᓂᒃᓴᒥᑦ ᑕᑯᔪᓐᓇᓚᐅᙱᑦᑐᑦ ᐃᓄᐃᑦ ᐊᒥᓱᑦ ᐊᐅᓪᓚᕐᓂᐊᕐᓂᖏᓐᓂᒃ ᓄᓇᕗᒥᑦ, ᐊᒻᒪᓗ ᑕᑯᔪᓐᓇᓚᐅᙱᒻᒥᔪᑦ ᐊᒥᓱᒻᒪᕆᐊᓗᐃᑦ ᐃᓕᓐᓂᐊᕐᓯᒪᑦᑎᐊᖅᑐᑦ ᓄᓇᑖᕆᐊᖅᑐᓛᕐᓂᖏᓐᓂᒃ ᐃᓚᖏᓪᓗ ᓄᓇᕗᒥᑦ.

ᐅᑯᐊ ᓄᑖᑦ ᑎᑭᓵᕐᓂᑯᐃᑦ ᐃᓕᓐᓂᐊᕐᓯᒪᑦᑎᐊᖅᖢᑎᒃ ᐅᖓᓯᒃᑐᒥᙶᖅᑐᑦ ᐅᑯᓇᙵᑦ ᕕᓕᐲᓐᔅ, ᔨᒻᐹᑉᕗᐃ, ᐃᓐᑎᐊ ᐊᒻᒪ ᓇᐃᔨᐅᕆᐊᒥᑦ—ᑖᒃᑯᐊ ᐸᕐᓇᓯᒪᓕᖅᖢᑎᒃ ᑕᐅᕐᓰᔪᓐᓇᕐᓂᕐᒥᒃ ᑲᓇᑕᐅᑉ ᓂᒋᐊᓂᑦ ᓄᓇᕗᒧᙶᖅ, ᑕᒫᓂᓗ ᐋᕿᒃᓯᓪᓗᑎᒃ ᐃᑲᔪᖅᑎᒋᔪᓐᓇᕐᓂᐊᖅᑕᖏᓐᓂᒃ ᖃᕋᓴᐅᔭᒃᑯᑦ, ᐃᓚᖃᖅᖢᑎᒃ ᒪᑯᓂᖓ ᐋᕗᕆᑲᓐ-ᑯᕇᐱᐊᓐ ᐃᓄᖏᓐᓂᒃ ᐊᒻᒪᓗ ᐃᖃᓗᖕᓂ ᒪᔅᓕᒻ ᑐᒃᓯᐊᕐᕕᖓᓂᒃ.

ᖃᓄᐃᓕᕈᑎ: ᐊᔾᔨᒌᙱᑦᑑᑎᒃᑲᓐᓂᕐᓂᒃ ᐃᓕᖁᓯᖃᐅᖅᑐᑦ, ᐊᔾᔨᒌᖏᑕᖓ ᓄᓇᕗᑦ ᐃᓱᒪᒋᔭᐅᓚᐅᕐᑐᒥᑦ, ᒪᑯᐊ ᐊᒥᓲᙱᓐᓂᕐᓴ ᓄᓇᖃᖅᑐᑦ ᓄᓇᕗᒥᑦ 2.5 ᐳᓴᓐᑎᐅᓪᓗᑎᒃ, ᐃᒪᓐᓇ, 1,000 ᐊᖏᕐᕋᖃᓕᖅᑐᑦ 500-ᐅᓚᐅᕐᓯᒪᓪᓗᑎᒃ ᐊᕐᕌᒍᑦ ᑕᓪᓕᒪᑦ ᐊᓂᒍᓚᐅᕐᑐᓂᒃ.

ᔭᐃᓐ ᔪᐊᔾ ᑐᓴᒐᒃᓴᓕᐅᕐᑎᓂ ᐊᖓᔪᒃᖠᐅᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ. ᔪᐊᔾ, ᑐᓴᒐᒃᓴᓕᐅᕐᑎᐅᓕᖅᑐᖅ ᐱᕙᓪᓕᐊᔪᓂ ᐱᒋᐊᖅᖢᓂ 1997-ᒥ, ᑎᑎᕋᐅᓯᖃᕐᓯᒪᔪᖅ ᖃᓄᐃᓕᐅᖁᑎᓂᒃ ᓄᓇᕗᒥᑦ, ᓄᓇᕕᒃᒥᑦ ᐊᒻᒪ ᓄᓇᕐᔪᐊᕐᒥ ᐅᑭᐅᕐᑕᖅᑐᕐᒥᐅᑕᓂᒃ.

Share This Story

(0) Comments

Join the Conversation

Your email address will not be published. Required fields are marked *

*