ᐋᑐᕚᒦᑦᑐᑦ ᐃᓄᐃᑦ ᑲᐱᔭᐅᔭᕆᐊᖃᖅᑐᑦ, ᖃᐅᔨᒪᔭᐅᑦᑎᐊᕐᑐᖅ ᓯᕗᓕᐅᕐᑎ ᐅᖃᕐᑐᖅ

ᐃᓚᒋᔭᐅᔪᖅ ᐅᔾᔨᕐᓇᓗᐊᕐᑐᓂᒃ ᐃᓄᖕᓂ ᓯᕗᓕᐅᕐᑎᓂ ᐋᑐᕙᒥ ᐃᓄᖕᓂ ᑲᐱᔭᐅᔭᖅᑐᖁᔨᒻᒪᕆᒃᑐᖅ ᓄᕙᒡᔪᐊᕐᓇᖅ-19 ᑲᐴᑎᒧᑦ ᐅᕗᖓ ᐊᑲᐅᓯᕕᒃᒧᑦ, ᐃᓄᐃᑦ ᐃᓚᒌᓄᑦ ᐋᓐᓂᐊᓯᐅᕐᕕᒃᒧᑦ ᐋᑐᕚᒥ.

“ᐃᓕᔅᓯᓐᓂ ᓴᐳᑎᓯᒪᒍᔅᓯ ᐊᒻᒪ ᐊᓯᔅᓯᓐᓂ, ᑕᐃᒪᓕ ᑕᒪᑐᒥᖓ ᐋᓐᓂᐊᕕᒡᔪᐊᕐᓇᒥ ᐊᓂᒍᐃᔪᓐᓇᕐᓂᐊᕐᑐᒍᑦ,” ᓴᐃᒪᓐ ᐅᖃᓚᐅᕐᑐᖅ ᑕᕐᕆᔭᒐᓕᐊᒃᑐᒃ ᑐᓴᒐᒃᓴᒥ ᓴᖅᑭᑕᐅᓚᐅᕐᑐᒥ ᒫᔅᓯ 10-ᖑᑎᓪᓗᒍ.

ᐅᑯᐊ ᐊᑲᐅᓯᕕᒃ ᐃᓄᐃᑦ ᐃᓚᒌᓄᑦ ᐋᓐᓂᐊᓯᐅᕐᕕᒃᒥᑦ ᐱᓕᕆᔨᐅᔪᑦ, ᐱᓕᕆᖃᑎᖃᖅᖢᑎᒃ ᐋᑐᕚᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ, ᐃᓄᖕᓂ ᑲᐱᓯᑲᑕᓕᓚᐅᕐᒪᑕ ᐋᑐᕚᒥ ᓄᓇᖃᖅᑐᓂᒃ ᐊᒻᒪ ᐋᓐᑎᐅᕆᐅᒦᑦᑐᓂᒃ ᕕᕝᕗᐊᕆ 17-ᒥ ᐱᒋᐊᖅᖢᑎᒃ.

ᐋᓐᓂᐅᕆᐅ ᒐᕙᒪᒃᑯᑦ ᑲᐱᔭᐅᔪᒃᓴᓂᒃ ᐸᕐᓇᐅᑎᖏᑦᑎᒍᑦ, ᑕᒪᕐᒥᓕᒫᖅ ᓄᓇᖃᖅᑳᖅᑐᑦ ᐃᓐᓇᐃᑦ ᐋᓐᑎᐅᕆᐅᒦᑦᑐ ᓯᕗᓪᓕᐅᑎᑕᐅᓂᐊᖅᖢᑎᒃ, ᐊᒻᒪᓗ ᑖᒃᑯᐊ ᓂᕆᐅᒃᖢᑎᒃ ᑕᒪᕐᒥᒃ ᓯᕗᓪᓕᖅᐹᒥ ᑲᐱᔭᐅᓯᒪᔭᐅᔪᒪᓪᓗᑎᒃ ᑕᖅᑭ ᐃᓱᐊᓂ.

ᑭᓯᐊᓂᓕ ᓴᐃᒪᓐ, ᑖᓐᓇ ᖃᖓᑦᑎᐊᓵᖅ ᑲᐱᔭᐅᓚᐅᕐᑐᖅ ᐊᑲᐅᓯᕕᒃᒥ, ᐅᖃᓚᐅᕐᑕᖅ ᐅᓄᕐᑐᒻᒪᕇ ᐃᓄᐃᑦ ᐋᑐᕚᒦᑦᑐᑦ ᖃᐅᔨᒪᙱᑐᐃᓐᓇᕆᐊᖃᕐᓂᖏᓐᓂᒃ ᐊᑲᐅᓯᕕᒃᒥ ᓄᕙᒡᔪᐊᕐᓇᖅ-19-ᒧᑦ ᑲᐱᓯᑲᑕᓕᕐᓂᖏᓐᓂᒃ.

ᐊᒻᒪᓗ ᑕᑯᓯᒪᓕᖅᖢᓂ ᐃᓄᖕᓂ ᐋᑐᕚᒦᑦᑐᓂᒃ ᐃᓱᒪᔪᓂᒃ ᑲᐱᔭᐅᔭᕆᐊᖃᕋᓱᒋᙱᑦᑐᓂᒃ, ᐃᓱᒪᖕᒪᑕᓕᖃᐃᑦ ᐊᐃᑦᑐᕐᓗᒃᑕᐅᔪᓐᓇᙱᓐᓂᖏᓐᓂᒃ.

ᑕᒪᓐᓇ ᐱᔾᔪᑎᒋᓪᓗᓂᐅᒃ, ᐅᖃᓚᐅᕐᑐᖅ ᐱᒻᒪᕆᐊᓘᓂᖓᓂᒃ ᐃᓄᐃᑦ ᐃᓚᖏᓐᓄᑦ ᐅᖃᑲᑕᖁᓪᓗᓂᒋ ᑲᐱᔭᐅᔭᕆᐊᖃᕐᓂᖏᓐᓂᒃ ᐆᒧᖓ ᓄᕙᒡᔪᐊᕐᓇᖅ-19-ᒧᑦ.

“ᐅᖃᖃᑎᒋᓚᐅᕐᑕᒃᑲ ᑕᒪᑐᒥᖓ. ᐃᓚᒃᑲᓘᓐᓃ. ᐅᖃᖅᖢᓂ ᑲᐱᔭᐅᒍᕕ, ᐊᑯᓂᐊᓗᒃ ᐃᓕᖕᓂ ᐊᓐᓇᐅᒪᔪᓐᓇᕐᑐᖅ ᐊᒻᒪᓗ, ᐊᓯᖕᓂᑦᑕᐅᖅ ᓴᐳᑎᓯᒪᓂᐊᕆᓪᓗᓂ,” ᐅᖃᖅᑐᖅ.

ᐊᑲᐅᓯᕕᒃ ᑲᐱᔭᐅᔭᕐᑐᕐᕕᐅᔪᖅ ᐅᕙᓃᑦᑐᖅ 24 ᓯᐊᑯᒃ ᓯᑐᕇᑦ ᐋᑐᕚᒥ ᕚᓃᕐᐸᓯᖕᒦᖢᓂ ᐊᒻᒪᓗ ᒪᑐᐃᖓᕙᒃᖢᓂ 10:30 ᐅᓪᓛᒃᑯᑦ 4:30-ᒧᑦ ᐅᓐᓄᓴᒧᑦ ᓇᒡᒐᔾᔭᐅᒥ ᑕᓪᓕᕐᒥᕐᒧᑦ.

ᐅᕗᖓ ᐅᖄᓚᓗᓯ ᐊᑕᐅᓯᕕᒃᒧᑦ ᐃᓂᒃᓴᓕᐅᕐᓂᐊᕋᕕ 613-740-0999.

ᓴᐃᒪᓐ ᒐᕙᒪᒃᑯᓐᓄᑦ ᐱᓕᕆᔨᒻᒪᕆᐅᓂᑯᑦ ᑲᓇᑕᒥ ᑭᒡᒐᖅᑐᐃᔨᐅᓪᓗᓂ ᑎᐊᓐᒫᒃᒥ ᐊᒻᒪᓗ ᑲᓇᑕᒥ ᑭᒡᒐᖅᑐᐃᔨᐅᓪᓗᓂ ᐅᑭᐅᕐᑕᖅᑐᓕᕆᓂᕐᒧᑦ ᐱᓕᕆᐊᒃᓴᓂᒃ

ᐊᖓᔪᖅᑳᖑᓚᐅᕐᓯᒪᒋᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᐃᓄᐃᑦ ᐅᑭᕐᑕᖅᑐᕐᒥᑦ ᑲᑎᒪᔨᕐᔪᐊᖏᓐᓄᑦ ᐊᒻᒪᓗ ᒐᕙᒪᓕᕆᓂᒃᑯ ᐊᖓᔪᖅᑳᖑᓯᒪᓪᓗᓂ ᑐᕋᓐᑦ ᓯᓚᑦᑐᖅᓴᕐᕕᒃᔪᐊᕐᒥᑦ.