ᐋᑐᕚ ᐅᖃᒻᒪᕆᒃᑐᖅ ᐅᑎᖅᑎᑦᑎᓂᐊᕐᓂᕐᒥᒃ ᓄᓇᖃᖅᑳᖅᑐᑦ ᓄᓇᑖᕋᓱᖕᓂᕐᒧᑦ ᐊᑭᓕᒃᓴᖅᑖᕆᓂᑯᖏᓐᓂᒃ

ᐱᓕᕆᖃᑎᒌᖑᔪᑦ ᑭᒡᒐᖅᑐᐃᔨᐅᕙᒃᑐᑦ ᓄᓇᖃᖅᑳᖅᑐᓂᒃ ᐊᑎᓕᐅᓚᐅᕐᓯᒪᔪᓂᒃ ᒫᓐᓇᓕᓴᕐᓂᒃ ᑕᒪᐃᓐᓄᐸᓗᒃ ᓄᓇᒥᑦ ᐱᖃᕐᓂᕐᒧᑦ ᐊᖏᕈᑎᓂᒃ ᐊᒻᒪ ᐊᓪᓚᓄᑦ ᐊᖏᕈᑎᓂᒃ ᑲᓇᑕᒧ ᖁᕕᐊᓱᒃᑐᑦ 2019-ᒥ ᓕᐳᕈᑯᑦ ᐊᑐᖅᑐᒃᓴᓕᐊᖏᓐᓂᒃ ᐅᖃᕐᓯᒪᓂᖏᓐᓂᒃ ᑮᓇᐅᔭᓂᒃ ᐅᑎᖅᑎᑦᑎᓂᐊᕐᓂᖏᓐᓂᒃ ᑖᒃᑯᓄᐊ ᐱᓕᕆᖃᑎᒌᖑᔪᓄᑦ ᐊᑐᖅᑕᕕᓂᖏᓐᓂᒃ ᐋᔩᖃᑎᖃᑲᑕᖕᓂᕐᒧᑦ ᓄᓇᑖᕋᓱᖕᓂᖏᓐᓂᒃ.

2018-ᒥ ᒐᕙᒪᑐᖃᒃᑯᑦ ᐊᐅᓚᔾᔪᑎᒃᓴᖏᓐᓂᒃ, ᓕᐳᕈ ᒐᕙᒪᒃᑯᑦ ᐅᖃᓚᐅᕐᓯᒪᔪᑦ ᓄᖃᕐᓂᐊᕐᓂᕋᖅᖢᑎᒃ ᐊᑭᓕᖅᓱᐃᖁᔨᓂᕐᒥᒃ ᓄᓇᖃᖅᑳᖅᑐᑦ ᓄᓇᑖᕋᓱᖕᓂᕐᒧᑦ ᐋᔩᖃᑎᒌᑲᑕᖕᓂᕐᒧᑦ ᐊᑐᖅᑕᕕᓂᖏᓐᓂᒃ.

ᑕᐃᒪᐃᓚᐅᕐᑎᓐᓇᒍ, ᑲᑐᔾᔨᖃᑎᒌᑦ ᓄᓇᑖᕋᓱᖕᓂᕐᒧᑦ ᐋᔩᖃᑎᒌᖑᔪᑦ ᑐᒃᓯᕋᕆᐊᖃᓚᐅᕐᓯᒪᔪᑦ ᑮᓇᐅᔭᓂᒃ ᐋᑐᕚᒥᑦ ᐊᒻᒪ ᐅᑎᖅᑎᑕᐅᓂᐊᕐᓗᓂ ᐊᖏᖃᑎᒌᖕᓂᕈᑎᒃ ᓄᓇᑖᕋᓱᖕᓂᕐᒧᑦ.

ᑭᓯᐊᓂᓕ ᓇᓗᓇᕈᓐᓃᑕᐃᓐᓇᓚᐅᕐᑐᖅ ᑮᓇᐅᔭᓕᕆᓂᕐᒧᑦ ᒥᓂᔅᑕ ᐱᐅᓪ ᒧᐊᓅ ᑮᓇᐅᔭᓂᒃ ᐊᐅᓚᔾᔪᑎᒃᓴᓕᕆᑎᓪᓗᒍ ᒫᑦᓯ 19-ᒥᑦ ᐅᖃᕐᓯᒪᓪᓗᑎᒃ ᖃᔅᓯᓪᓚᕆᖕᓂ ᓴᓂᕐᕙᐃᓂᐊᕐᓂᖏᓐᓂᒃ ᐅᑎᖅᑎᑕᐅᔪᒃᓴᓂᒃ ᑖᒃᑯᓄᖓ ᑲᑐᔾᔨᖃᑎᒌᓄᑦ.

ᐅᓇ 1.4 ᐱᓕᐊᓐ ᑖᓚᐃ ᐊᑐᖅᑕᐅᓂᐊᕐᓗᑎᒃ ᐊᕐᕌᒍᓂᒃ 7-ᓂᒃ, ᐱᒋᐊᕐᓗᓂ 2018/19, ᐅᖃᕐᓯᓚᔪᖅ ᒐᕙᒪᑐᖃᒃᑯᑦ ᐊᑐᕐᑐᒃᓴᓕᕆᓂᕐᒧᑦ ᑎᑎᕋᕐᓯᒪᔭᖏᑦ.

“ᐱᓂᐊᕐᓂᕋᕐᓂᖅ ᐃᓱᒪᒋᔪᓐᓃᕐᓂᕐᒥᒃ ᐊᒻᒪ ᐅᑎᖅᑎᑦᑎᓂᐊᕐᓂᕐᒥᒃ ᓄᓇᓕᕆᓂᕐᒧᑦ ᐋᔩᕈᑎᓄᑦ ᐊᑐᖅᑐᐊᖅᑕᐅᓂᑯᑦ ᖁᕕᐊᓇᖅᑐᑦ ᑐᓴᖅᖢᒍ,” ᐊᓗᑭ ᑰᑦᑎᖅ, ᐊᖓᔪᖅᑳᖅ ᓄᓇᕗᑦ ᑐᙵᕕᒃᑯᓐᓄᑦ ᐅᖃᓚᐅᕐᑐᖅ ᐅᕘᓇ ᓄᓇᑖᕋᓱᖕᓂᕐᒧᑦ ᐊᖏᕈᑎᓄᑦ ᐱᓕᕆᖃᑎᒌᖕᓂᕐᒧᑦ ᑐᓴᒐᒃᓴᓕᐊᖏᓐᓂᒃ.

ᑰᑦᑎᖅ ᐃᒃᓯᕙᐅᑕᐅᖃᑕᐅᖕᒥᔪᖅ ᓄᓇᑖᕋᓱᖕᓂᕐᒧᑦ ᐱᓕᕆᖃᑎᒌᒃᑐᓂᒃ, ᑭᒡᒐᖅᑐᐃᔪᓂᒃ ᐱᓕᕆᖃᑎᒌᓂᒃ ᑕᐃᒪᙵᓂᑦ 1970-ᖏᑦᑕ ᐊᑯᓐᓂᖏᓐᓂᒃ, ᐊᑎᓕᐅᓚᐅᕐᐳᖅ ᒫᓐᓇᓕᓴᕐᓂᒃ ᑕᒪᐃᓐᓄᐸᓗᒃ ᓄᓇᒥᑦ ᐱᖃᓂᕐᒧᑦ ᐊᖏᕈᑎᓂᒃ.

ᐃᓚᒋᔭᐅᖕᒥᔪᖅ ᐱᓕᕆᖃᒌᓄᑦ ᐅᑯᐊ, ᓂᔅᒐ’ᐊ ᓄᓇᖓ (Nisga’a Nation), ᒫᓃᑦᑐᖅ ᐳᕆᑎᔅ ᑲᓚᒻᐱᐊ ᐅᐊᖕᓇᖅᐸᓯᐊᑕ ᐱᖓᖕᓇᖓᓂ ᖁᕕᐊᒋᔭᖃᕐᒥᔪᖅ ᑐᕋᒍᑎᒋᔭᐅᔪᒥᒃ.

“ᑕᒪᓐᓇ ᐊᔪᕐᓇᙱᔾᔪᑎᒋᓂᐊᕋᑦᑎᒍᑦ ᐱᔭᕆᐊᖃᒻᒪᕆᒃᑐᓂᒃ ᐱᓕᕆᐊᒃᓴᓂᒃ. ᐊᑭᓕᓚᐅᕋᑦᑎᒍᑦ ᐊᑐᖅᑐᐊᓚᐅᕐᓯᒪᔭᕗᑦ ᐋᔩᖃᑎᒌᖕᓂᕐᒧᑦ ᐊᖏᖃᑎᒌᒍᑎᑦᑎᓐᓂᒃ 2014-ᒥᑦ, ᖁᕕᐊᓱᒃᑐᐃᓐᓇᐅᕗᒍᓪᓗ ᐅᑎᕐᓂᐊᓕᕐᒪᑦ ᐊᑐᕐᓂᐊᕐᓗᓂ ᐃᓄᖁᑎᑦᑎᓐᓄᑦ,” ᐅᖃᖅᑐᖅ ᓂᔅᒐᒡᐊ ᓄᓇᖓᓄᑦ ᐊᖓᔪᖅᑳᖅ ᐄᔭ ᑲᓚᐃᑕᓐ.

ᓄᓇᕗᑦ ᐃᓄᖏᓐᓄᑦ, ᐊᖏᖃᑎᒌᒍᑎ ᑐᑭᖃᖅᑐᒃᓴᐅᕗᖅ ᐅᑎᖅᑎᕝᕕᐅᓂᐊᕐᓂᖏᓐᓂᒃ ᒫᓂ 40 ᒥᓕᐊᓐ ᑖᓚᖏᓐᓂᒃ.

ᐅᓇ ᐊᑐᖅᑕᐅᔪᕕᓂᕐᓂᒃ ᐱᔾᔪᑎᓕᒃ ᓄᓇᕗᑦ ᑐᙵᕕᒃ ᑎᒥᖓᑕ ᓯᕗᓂᐊᒍᑦ ᑲᑐᔾᔨᖃᑎᒌᖑᓚᐅᕐᑐᓂᒃ, ᑐᙵᕕᒃ ᑲᑐᔾᔨᖃᑎᒌᑦ ᓄᓇᕗᒥᑦ, ᐊᑐᓚᐅᕐᓯᒪᔭᖏᓐᓂᒃ ᐋᔩᖃᑎᒌᖕᓂᕐᒧᑦ ᓄᓇᕗᒥᑦ ᓄᓇᑖᕐᓂᕐᒧᑦ ᐊᖏᕈᑎᓂᒃ, ᒫᓐᓇ ᑕᐃᔭᐅᓕᕐᑐᖅ ᓄᓇᕗᒧᑦ ᐊᖏᕈᑎ.

ᐋᑎᑯᓪ 29 ᐅᕙᓂ ᓄᓇᕗᒧᑦ ᐊᖏᕈᑎ ᐅᖃᕐᓯᒪᔪᖅ ᑐᙵᕕᒃ ᑲᑐᔾᔨᖃᑎᒌᖏᑦ ᓄᓇᕗᒥᑦ ᐊᑭᓕᒃᓴᖃᕐᓂᖏᓐᓂᒃ 39.7 ᒥᓕᐊᓐ ᑖᓚᓂ ᐋᔩᖃᑎᒌᕐᓂᕐᒧᑦ ᐊᑐᖅᑐᐊᖅᑕᕕᓂᖏᓐᓂᒃ ᑎᑭᖢᒍ ᐊᖏᕈᑎᑦ ᐊᑎᓕᐅᖅᑕᐅᓂᖏᓐᓄᑦ.

ᐋᕿᒃᓯᓚᐅᕐᒥᔪᖅ ᐊᕐᕌᒍᓄᑦ 14-ᓂ ᐊᑐᖅᑕᐅᔪᒃᓴᓂᒃ ᐊᑭᓕᖅᓱᐃᕙᓪᓕᐅᓂᕐᒧᑦ ᑖᒃᑯᓂᖓ ᑮᓇᐅᔭᓂᒃ ᓄᓇᕗᑦ ᐸᐸᑦᑎᕕᖓᓄᑦ, ᑎᒥᐅᔪᖅ ᐸᐸᑦᑎᔨᐅᓂᐊᕐᓗᓂ ᐊᒻᒪ ᐃᑲᔫᑎᖃᕈᑎᐅᓂᐊᕐᓗᓂ ᒫᓐᓂ 1.17 ᐱᓕᐊᓐ ᑖᓚᓂ ᐅᑎᖅᑎᑕᐅᔪᒃᓴᓂᒃ ᐅᑯᐊ ᒐᕙᒪᑐᖃᒃᑯᑦ, ᐱᒋᐊᖅᖢᓂ 1993-ᒥ, ᐊᖏᕈᑎᒋᓚᐅᕐᓯᒪᔭᖓᒍᑦ ᐊᑭᓕᐅᑎᒋᓂᐊᕐᓗᒍ ᐃᓄᖕᓄᑦ ᓄᓇᕗᒥᑦ.

ᓯᕗᓕᖅᐹᖅ ᐅᑎᖅᑎᑕᒃᓴᖅ ᓄᓇᕗᑦ ᐸᐸᑦᑎᔨᓄᑦ ᐊᑐᖅᑐᐊᕐᓂᕐᒧᑦ, ᐊᑭᖃᖅᑐᑦ ᒫᓂ 2.9 ᒥᓕᐊᓐ ᑖᓚᓂ ᐋᑐᕚᒧᐊᖅᑕᐅᓪᓗᐊᓚᐅᕐᑐᖅ ᓯᕗᓪᓕᖅᐹᒥ ᓇᓪᓕᐅᑎᑎᓪᓗᒍ ᐊᑎᓕᐅᕐᓂᖅ ᓄᓇᑖᕈᑎᒧᑦ ᐊᖏᕈᑎᓂᒃ ᒪᐃ 25, 1994-ᒥᑦ.

ᑭᖑᓕᖅᐹᖅ ᐊᑭᓕᐅᑎᒃᓴᖅ, ᒫᓃᓪᓗᐊᖅᑐᖅ 1.9 ᒥᓕᐊᓐ ᑖᓚᓂ ᐊᑭᓕᖅᑕᐅᓇᔭᓚᐅᕐᓯᒪᔪᖅ 2008-ᒥ.

ᒫᓐᓇᓕ, ᓇᓗᓇᖅᑐᖅ ᑕᒪᒃᑯᐊ ᐊᑐᖅᑐᐊᕐᓂᕐᒧᑦ ᐅᑎᖅᑎᑕᐅᓂᐊᕐᑐᑦ ᑲᑐᔾᔨᖃᑎᒌᖑᔪᓄᑦ ᐊᑎᓕᐅᓚᐅᕐᓯᒪᔪᓄᑦ ᒫᓐᓇᓕᓴᓂᒃ ᑕᒪᐃᓐᓄᐸᓗᒃ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐃᓚᖃᕐᓂᐊᕆᐊᒃᓴᖏᓐᓂᒃ ᕿᑐᕐᖏᐅᕈᑎᓂᒃ.

“ᐅᑎᖅᑎᑕᐅᔾᔪᑎᐅᔪᑦ ᑖᒃᑯᓂᖓ ᐃᑲᔫᑎᒃᓴᓂᒃ ᒐᕙᒪᒃᑯᓐᓂ ᑐᙵᓱᒃᑎᑕᐅᕗᑦ ᐱᕕᖃᕈᑎᐅᓕᕈᓐᓇᕐᓂᐊᕐᒪᑕ ᐊᒥᓱᓂᒃ ᐱᔭᐅᔭᕆᐊᖃᒻᒪᕆᒃᑐᓂᒃ ᐱᓕᕆᐊᒃᓴᓂᒃ ᒫᓐᓇᓕᓴᐅᓕᖅᑐᓄᑦ ᓄᓇᖃᖅᑳᕐᓂᒃᑯᑦ ᓄᓇᓕᖕᓂᒃ,” ᓄᓇᑖᕋᓱᖕᓂᕐᒧᑦ ᐱᓕᕆᖃᑎᒌᑦ ᐅᖃᓚᐅᕐᑐᑦ ᑐᓴᒐᒃᓴᑎᒍᑦ.

ᒐᕙᒪᑐᖃᒃᑯᑦ ᐅᖃᖅᑐᑦ ᐅᓇ ᐊᑐᖅᑐᒃᓴᓕᕆᓂᖅ ᐃᑲᔫᑎᐅᔪᓐᓇᕐᓂᐊᕐᓂᖓᓂᒃ ᒫᓂ 200-ᖏᓐᓂᒃ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ.