ᐱᓕᕆᖃᑎᒌᒃᑐᑦ ᖃᒡᓕᕙᓪᓕᐊᕗᑦ ᐃᓄᒃᑎᑐᑦ ᐅᖃᓪᓚᒃᕕᒃᓴᖓᓂ

For English version, see Iqaluit group gains ground in hopes of opening local Inuktitut radio station

ᑕᖅᑭᐅᙱᑦᑐᖅ 2024 ᐱᒋᐊᓕᕐᓂᖓᓂ ᐅᓇ ᓄᑖᖅ ᐊᕐᕌᒍ ᐱᐅᑦᑎᐊᖅᑰᔨᔪᖅ ᐅᑯᓄᖓ ᐃᖃᓗᐃᑦ ᑕᔅᓯᐅᔭᖅᔪᐊᖅ ᑐᓴᐅᑦ ᐅᖃᓪᓚᒡᕕᓕᕆᔨᒃᑯᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᑐᕌᒐᖓᓄᑦ ᐱᒋᐊᖅᑎᑦᑎᔪᒪᓂᕐᒥ ᐃᓄᒃᑎᑐᑦ ᐅᖃᓪᓚᒡᕕᒃᒥ ᐃᖃᓗᖕᓂᑦ.

ᑭᓯᐊᓂᓕ ᐱᓕᕆᔭᒃᓴᖅᑕᖃᕈᓘᔭᓕᒑᖕᒪᑦ, ᐅᖃᕐᑐᖅ ᐊᖓᔪᖅᑳᕆᔭᐅᔪᖅ ᓄᐊ ᐸᐸᑦᓯ

ᐅᖃᓚᐅᕐᑐᖅ ᐃᖃᓗᐃᑦ ᓄᓇᓕᑐᐊᖑᓂᖓᓂᒃ ᓄᓇᕗᒥᑦ ᐅᖃᓪᓚᒡᕕᖃᙱᑦᑐᖅ. ᐅᖃᖅᖢᓂ ᐱᑖᕈᑎᒃ ᐱᒻᒪᕆᐅᓇᔭᕐᑐᖅ “ᓯᕗᓂᒃᓴᒧᑦ ᐱᐅᓂᕐᓴᐅᓇᔭᖅᖢᓂ ᐊᒻᒪᓗ ᐃᓄᒃᑎᑐᑦ ᐅᖃᐅᓯᕐᒥ ᐊᑐᖅᑕᐅᑎᑦᑎᔾᔪᑎᐅᖏᓐᓇᕐᓗᓂ ᓴᙱᑎᑦᑎᔾᔪᑎᐅᓗᓂᓗ.”

ᐊᕐᕌᓂ ᔫᓂᐅᓚᐅᕐᑐᒥ ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᓂᕈᐊᓚᐅᕐᓯᒪᖕᒪᑕ ᓄᓇᓖᑦ ᐃᑲᔪᖅᑐᐃᓂᐊᕐᓗᑎᒃ ᐱᓇᓱᐊᖅᑕᐅᔪᒧᑦ. ᐸᐸᑦᓯ ᐅᖃᓚᐅᕐᑐᖅ ᐸᐃᕆᔩᑦ ᑎᒍᒥᐊᖅᑎᒃᑯᑦ ᐃᖃᓗᖕᓂ ᐃᓐᓇᑐᖃᕐᓄᑦ ᑲᑐᔾᔨᖃᑎᒌᑦ ᐃᓂᒃᓴᖃᖅᑎᑦᑎᓂᖏᓐᓂ ᐅᖃᓪᓚᒃᕕᒃᓴᒥ ᐅᕙᓂ ᓴᓇᓂᐊᖅᑕᖓᓂ ᐃᖃᓗᐃᑦ ᐃᓐᓇᑐᖃᒃᑯᑦ ᐃᒡᓗᖁᑎᒃᓴᖓᓂ.

“ᐅᓇ ᑐᓴᒐᒃᓴᑦᑎᐊᕚᓗᒃ. ᐊᓕᐊᓇᐃᑦ ᐊᐱᕆᓚᐅᕐᓯᒪᖕᒪᑕ ᐃᓂᒃᓴᖃᕈᒪᔭᕆᐊᒃᓴᑦᑎᓐᓂ,” ᐅᖃᕐᑐᖅ. “ᑎᑎᕋᕐᓂᐊᖅᑐᒍᑦ ᑐᒃᓯᕋᐅᑎᓂᒃ ᐊᒻᒪ ᑖᓐᓇ ᖃᓄᐃᓕᐅᕈᑎᐅᓂᐊᕆᐊᒃᓴᖓᓂ ᐅᑕᕿᓗᑕ ᐊᖅᑭᐅᓂᐊᖅᑐᓂᒃ ᐊᒡᒋᖅᑐᓂᒃ.”

ᐊᒻᒪᓗ ᑖᒃᑯᐊ ᐅᖃᓪᓚᒡᕕᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᐃᑲᔫᑎᑖᓚᐅᕐᓯᒪᓪᓗᑎᒃ $29,000-ᓂ ᐅᑯᓇᙵᑦ ᑕᓚᔅ ᓯᕗᓂᒃᓴᓕᕆᓂᕐᒧᑦ ᑐᙵᕕᒃᑯᓐᓂ (Telus Friendly Future Foundation), ᐃᑲᔫᑎᒃᓴᓕᕆᔨᒃᑯᑦ ᒪᐅᖓ ᐋᓐᓂᐊᖃᖅᑕᐃᓕᓂᕐᒨᖓᔪᓄᑦ ᐊᒻᒪ ᐃᓕᓐᓂᐊᕐᓂᕐᒨᖓᔪᓄᑦ ᐃᑲᔫᑎᒃᓴᓕᕆᔨᐅᓪᓗᑎᒃ ᐃᓅᓱᒃᑐᓄᑦ ᓄᓇᓕᖕᓂ. ᐅᓄᕐᑐᒻᒪᕆᐊᓗᖕᓂ ᐱᓇᓱᒍᑎᓂᒃ 7 ᓂᕈᐊᕆᔭᐅᓚᐅᕐᒪᑕ ᐊᒻᒪ ᐅᓇ ᐃᖃᓗᐃᑦ ᑕᓯᐅᔭᖅᔪᐊᖅ ᑐᓴᐅᑦ ᐃᓚᒋᔭᐅᓪᓗᓂ.

“ᐃᑲᔫᑎᒃᓴᓂᒃ ᐱᓕᕆᔾᔪᑎᒃᓴᓄᑦ ᐊᖏᖅᑕᐅᓚᐅᕐᒪᑦ ᐃᒪᓐᓇ $29,000 ᐊᓯᖏᑦᑎᑐᑦ ᐅᖃᓪᓚᒡᕕᓕᕆᔨᓄᑦ ᐱᔭᐅᕙᒃᑐᓂ ᒪᑯᓄᖓ ᓯᐅᑎᙳᐊᒃᓴᒧᑦ ᓇᐸᔪᒥᒃ, ᐅᖃᓪᓚᒡᕕᒃᓴᒥᑦ, ᓂᐱᖃᐅᑎᓕᕆᕝᕕᒃᒧᑦ, ᓂᐱᖃᕈᑎᓄᑦ, ᑕᒪᒃᑯᓄᖓᕈᓘᔭᖅ,” ᐅᖃᕐᑐᖅ ᐸᐸᑦᓯ.

“ᓯᕗᓂᒃᓴᖅ ᐱᐅᑦᑎᐊᖂᔨᔪᖅ ᐅᑯᓄᖓ ᑕᓯᐅᔭᖅᔪᐊᖅ ᑐᓴᐅᑦᒧᑦ,” ᐅᖃᕐᑐᖅ.

“ᒫᓐᓇᓕ ᐋᖅᑭᒃᓱᐃᕙᓪᓕᐊᒐᑦᑕ ᖃᕋᓴᐅᔭᒃᑯᑦ ᓴᖅᑭᔮᒐᒃᓴᒥᒃ ᐊᒻᒪᓗ ᐃᓄᐃᑦ ᐃᑲᔫᑎᒃᓴᓂ ᑐᓂᓯᔪᓐᓇᕐᓗᑎᒃ. ᐱᓕᕆᓂᕐᓴᐅᒍᑦᑕ ᐊᑕᐅᑦᑎᒃᑯᑦ ᑕᒪᓐᓇ ᐊᓂᒍᑦᑎᐊᕐᓂᕐᓴᐅᓂᐊᖅᑐᑦ ᑕᒪᐃᓐᓄᑦ.”

ᑭᖑᓪᓕᕐᓕ ᐊᖏᔪᖅ ᐱᓕᕆᐊᖑᔭᕆᐊᖃᖅᑐᑦ ᑲᑐᔾᔨᖃᑎᒌᓄᑦ ᑖᔅᓱᒧᖓ ᓇᓚᐅᑎᒧᑦ ᓚᐃᓴᓐᓯᑖᕋᓱᖕᓂᖅ ᐅᑯᓇᙵᑦ ᑲᓇᑕᒥ ᓈᓚᐅᑎᓄᑦ-ᑕᓚᕖᓴᓄᑦ ᑐᓴᐅᒪᔾᔪᑎᓕᕆᔨᒃᑯᓐᓂᒃ ᑲᓇᑕᒥ (CRTC).

ᐸᐸᑦᓯ ᐅᖃᓚᐅᕐᑐᖅ “ᑐᕌᒐᖃᓚᐅᕋᑦᑕ ᐅᖃᓪᓚᒡᕕᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂᒃ ᐱᒋᐊᖅᑎᑦᑎᔪᒪᓪᓗᑕ. ᑭᓯᐊᓂᓕ ᐊᖏᓂᕐᓴᒃᑯᑦ, ᑐᕌᒐᖃᓚᐅᕋᑦᑕ ᓇᖕᒥᓂᖅ ᐃᒡᓗᖃᓕᕐᓂᐊᕐᓗᑕ.

“ᓄᓇᓖᑦ ᐱᙳᐊᕐᕕᒃᑖᕆᐊᖃᕐᒪᑕ ᐊᒻᒪ ᐱᓕᕆᖃᑎᒌᒃᑯᑦᑕ ᑖᔅᓱᒧᖓ ᑕᐃᒪᓕ ᐃᓄᐃᑦ ᐅᖃᓪᓚᒡᕕᒃᒧᐊᕈᓐᓇᕐᓗᑎᒃ ᑐᓴᒐᒃᓴᓕᐅᕆᐊᖅᑐᖃᑦᑕᕋᔭᖅᑐᑦ ᖃᓄᐃᑦᑐᑐᐃᓐᓇᕐᓂ.”