‘ᐱᔪᒪᓂᖃᕈᕕᑦ, ᐱᓇᓱᐊᖏᓐᓇᕐᓗᒍ’

For English version, see ‘If you have a dream, keep chasing it’: Sanikiluaq rapper releases debut album

ᓄᓇᕗᒻᒥ ᕌᐳᕐᒧᑦ ᐃᔅᑭᒧᑦ, ᓂᔾᔮᑎᑦᑎᓂᖓ ᐱᓕᕆᓂᐅᕗᖅ ᐃᓅᓯᐅᑉ ᑖᓛᖑᔪᒥ ᐊᒃᓱᕈᕈᑎᒋᓯᒪᔭᖏᓐᓂ.

“ᐃᓚᖓᒍᑦ ᐅᕙᖓᐅᔪᓐᓇᖅᐳᖓ” ᓂᔾᔮᑎᑦᑎᓂᕐᒥ, ᐅᖃᓚᐅᖅᐳᖅ 30-ᓂᒃ-ᐅᑭᐅᓕᒃ ᑎᑕᒃᑎ ᓴᓂᑭᓗᐊᕐᒥᐅᑕᖅ.

ᐃᔅᑭ, ᐊᑎᓪᓚᕆᖓ ᐅᖃᐃᑦᑐᖅ ᐋᑕᒻ ᐃᒧᖅᑯᑕᐅᓚᖅ ᓴᖅᑭᑎᑦᑎᓚᐅᖅᐳᖅ ᓯᕗᓪᓕᖅᐹᒥ ᓴᖅᑭᔮᕐᓂᖓᓂ ᓂᔾᔭᐅᑎᓕᐊᖓ ᑭᖑᓪᓕᖅᐹᒥ ᕿᒻᒪᑯᖓᓐᓂ ᐋᒍᔅᑎ 25−ᒥ.

11-ᓂ ᐃᙱᐅᓯᓕᒃ ᓂᔾᔭᐅᑎᓕᐊᖓ ᓇᖕᒥᓂᖅ ᐃᖅᑲᐅᒪᓂᐅᕗᖅ ᐃᙱᐅᓯᓂᑦ ᐃᔅᑭᐅᑉ ᐃᓅᓯᖓᓂ ᐱᕈᖅᓴᓪᓗᓂ ᓄᓇᕗᒻᒥ, ᐊᒃᓱᕈᕈᑎᒋᔭᖏᓐᓂ ᓂᑲᓪᓗᖓᓂᕐᒥ ᐊᒻᒪ ᓂᕆᐅᖕᓂᖏᓐᓂ ᓯᕗᓂᒃᓴᒧᑦ.

ᐅᖃᓚᐅᖅᐳᖅ ᓴᓇᔪᒪᓚᐅᖅᐳᖅ ᐃᙱᐅᓯᓂ ᐃᒃᐱᒋᔭᐅᕐᔪᐊᕋᔭᖅᑐᓂ ᐊᓯᖏᓐᓂ ᐊᑐᖅᑐᓂ ᐊᔾᔨᐸᓗᖏᓐᓂ ᐊᒃᓱᕈᕐᓇᕐᓂᐅᔪᓂ.

“ᓵᙵᓯᒪᕗᖓ ᓂᑲᓪᓗᖓᓂᕐᒥ ᐊᑦᑎᓛᖓᓂ,” ᐅᖃᓚᐅᖅᐳᖅ. “ᖃᐅᔨᒪᖁᕙᒃᑲ ᐃᓄᑑᙱᓐᓂᖏᓐᓂ.”

ᐃᔅᑭ ᑎᑎᕋᖅᐸᓪᓕᐊᓕᓚᐅᖅᐳᖅ ᓇᖕᒥᓂᖅ ᐃᙱᐅᓯᖏᓐᓂ ᐅᑭᐅᖃᖅᑎᓪᓗᒍ 13−ᓂ, ᐅᖃᓚᐅᖅᐳᖅ, ᐱᓪᓗᓂ ᑲᔪᖏᖅᓴᐃᓂᕐᒥ hip-hop ᑎᑕᒃᑎᐅᔪᓂ ᓲᕐᓗ Eminem ᐊᒻᒪ Insane Clown Posse, ᐊᒻᒪ ᑭᖑᓂᒃᑲᓐᓂᐊᒍᑦ ᐃᓅᓯᕐᒥ ᕌᐴᔪᓂ ᓲᕐᓗ Lucidious.

ᐊᒃᓱᕈᕐᓇᖅᑐᒃᑰᓚᐅᖅᑎᓪᓗᒍ ᐃᓅᑐᒃᑑᑎᓪᓗᒍ, ᐃᔅᑭ ᑎᒍᔭᐅᓯᒪᓚᐅᖅᐳᖅ ᐃᓱᒪᖅᓱᙱᑦᑐᒃᑯᕕᖕᒥ ᒪᒃᑯᒃᑐᓄᑦ, ᐃᒡᓗᕐᔪᐊᖅ ᒪᒃᑯᒃᑐᓄᑦ ᐱᔭᕋᒃᓯᒪᔪᓄᑦ ᐃᖃᓗᖕᓂ.

ᑕᐃᑲᓂ ᑎᑎᕋᖅᐸᓪᓕᐊᓕᓚᐅᖅᐳᖅ ᐅᖃᓗᕋᐅᔭᐅᑎᓂᑦ ᐊᒻᒪ ᐃᙱᐅᓯᓂ ᐃᓱᒪᑐᓂᖃᕐᓂᕐᒧᑦ, ᐊᒻᒪ ᐃᓕᑦᑎᓚᐅᖅᐳᖅ ᐃᒻᒥᓂᒃ ᐅᖃᐅᓯᕆᔪᓐᓇᕐᓂᕐᒧᑦ ᓂᔾᔮᑎᑦᑎᓂᒃᑯᑦ.

ᐃᔅᑭ ᑕᐅᕗᙵᕋᔮᓕᓚᐅᖅᐳᖅ ᐊᔪᙱ ᐊᔪᕆᖅᓱᖅᑕᐅᕙᓪᓕᐊᓂᐅᔪᒥ ᐱᓕᕆᐊᖑᔪᒥ, ᖃᕋᓴᐅᔭᑎᒍᑦ ᓂᔾᔮᑎᑦᑎᓂᕐᒥ ᐱᓕᕆᕝᕕᐅᔪᒥ ᐱᓕᒻᒪᒃᓴᐃᔪᒥ ᐱᓕᕆᐊᖑᔪᒥ ᐊᐅᓚᑕᐅᔪᒥ ᐃᖃᓗᖕᓂ ᓂᐱᙵᑕᐅᔪᒥ Hitmakerz−ᑯᓐᓂ ᐃᑲᔪᓲᖑᔪᓂ ᒪᒃᑯᒃᑐᓂ ᑎᑕᒃᑎᓂ ᓄᓇᕗᒻᒥ ᓴᖅᑭᑎᑦᑎᓂᕐᒥ ᐊᒻᒪ ᓂᐱᓂᐅᕆᓂᕐᒥ ᓂᔾᔮᑎᑦᑎᓂᐅᔪᓂ.

ᑐᓂᓯᓚᐅᖅᑎᓪᓗᒍ ᓯᕗᓪᓕᒻᐸᐅᔪᒥ ᐃᙱᐅᓯᒥᒃ, ᐃᓅᕋᒪ (I Am a Person),  2019−ᒥ ᐊᔪᙱ ᑲᑎᖅᓱᖅᑕᐅᓯᒪᔪᓂ ᓂᔾᔮᑎᑦᑎᓂᐅᔪᓂ ᐊᓯᖏᓐᓂ ᓄᓇᕗᒻᒥ ᑎᑕᒃᑎᐅᔪᓂ, ᐃᔅᑭ ᐱᓕᕆᕙᓪᓕᐊᓕᓚᐅᖅᐳᖅ 2021−ᒥ ᑕᑖᖅᑐᒥ-ᑕᑭᓂᓕᖕᒥ ᓂᔾᔭᑎᑦᑎᓂᐅᔪᒥ ᐃᑲᔪᖅᑕᐅᓪᓗᓂ ᐊᔪᕆᖅᓱᖅᑕᐅᓂᐅᔪᒥ ᐱᓕᕆᓂᐅᔪᓂ ᖁᙱᐊᖅᑕᐅᓂᕐᒥ ᐊᔪᙱᓐᓂᐅᔪᓂ, ᓴᖅᑭᑎᑦᑎᓂᐅᔪᒥ ᐊᒻᒪ ᓂᐅᕕᐊᒃᓴᖃᕆᐊᖅᑐᕐᓂᕐᒥ.

ᖃᓄᐃᓕᖓᓂᖓ ᓂᔾᔮᑎᑦᑎᓂᐅᕗᖅ ᑲᑎᖅᓱᐃᔪᒥ ᐊᓇᐅᓪᓛᔪᒥ ᐊᒻᒪ ᑲᙳᓱᙱᖦᖢᓂ ᐃᙱᐅᓯᕐᓂ ᐋᓐᓂᐊᕐᓂᐅᔪᒥ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᐊᔪᕐᓇᖅᑐᓂ ᐊᐃᑉᐸᖃᕐᓂᐅᔪᓂ ᐱᐊᓅᕐᓂᕐᒥ ᐊᒻᒪ ᐃᙱᐅᓯᓂ ᐃᒻᒥᓂᒃ ᐅᒃᐱᕈᓱᖕᓂᕐᒥ ᐊᒻᒪ ᓄᓇᓕᖕᓂ ᐃᑲᔪᖅᓱᐃᓂᕐᒥ.

ᑭᖑᓪᓕᖅᐹᒥ ᕿᒻᒪᑯᖓᓐᓂ ᐃᖏᕐᕋᓂᐅᒋᕗᖅ ᐃᔅᑭᐅᑉ ᐃᓕᖅᑯᓯᖓᓐᓂ, ᐃᙱᐅᓯᓂ ᖃᓪᓗᓈᑎᑐᑦ ᐊᒻᒪ ᓯᕗᓪᓕᖅᐹᖓᓂ ᐅᖃᐅᓯᖓᓂ, ᐃᓄᒃᑎᑐᒻᒥ.

ᐱᒻᒪᕆᐅᕗᖅ ᐅᖃᐅᓯᕐᒥ ᐆᒪᑎᑕᐅᓂᖓᓂ ᐅᖃᓪᓚᒃᐸᒡᓗᓂ, ᐅᖃᓚᐅᖅᐳᖅ, ᐃᑲᔪᕐᓂᕐᒧᑦ ᓂᔾᔮᑎᑦᑎᓂᖓᓂ ᐊᑐᐃᓐᓇᐅᑎᑕᐅᓂᖓᓂ ᐃᓄᒃᑎᑐᑦ−ᐅᖃᓪᓚᒃᐸᒃᑐᓄᑦ ᖁᙱᐊᖅᑐᓄᑦ.

ᑎᑎᕋᖅᑎᓪᓗᒍ ᐃᙱᐅᓯᒥᒃ, ᐃᔅᑭ ᐆᒃᑐᕋᓲᖑᕗᖅ ᒪᓕᖃᑦᑕᐅᑎᔪᓂ ᓴᓇᓯᒪᔪᓂ ᖃᐅᔨᓇᓱᐊᕐᓂᕐᒧᑦ ᐃᒻᒥᓂᒃ ᐅᖃᐅᓯᕆᔪᓐᓇᕐᓂᖓᓂ ᐃᓄᒃᑎᑐᑦ ᖃᓪᓗᓈᑎᑐᓪᓘᓐᓃᑦ.

“ᐊᒃᓱᕈᕐᓇᖅᐳᖅ ᐱᓕᕆᓇᓱᐊᕐᓂᕐᒥ ᒪᓕᖃᑦᑕᐅᑎᔪᓂ,” ᐅᖃᓚᐅᖅᐳᖅ.

ᓂᔾᔮᑎᑦᑎᓂᐅᔪᖅ ᐃᓚᖃᕆᕗᖅ ᑲᑐᔾᔨᖃᑎᒌᖕᓂᐅᔪᓂ ᑕᐃᓂᔅ-ᑲᓇᑕᒥᐅᑕᐅᔪᒥ ᑎᑕᒃᑎ ᑐᐊᕐ ᓴᐃᒪᓐᓴᓐ ᐊᒻᒪ ᐃᖃᓗᖕᒥᐅᑕᖅ ᓵᓇ ᓰᑏᓐᓇᖅ, ᓂᐱᖓ ᐃᓚᐅᖃᑕᐅᔪᒥ ᓂᔾᔮᑎᑦᑎᓂᐅᔪᒥ ᑕᐃᒎᓯᖓᓂ ᐃᙱᐅᓯᒥᕐ ᐊᒻᒪ ᐃᔅᑭᐅᑉ ᑐᓵᕐᓂᕆ]<ᖓᓂ ᐃᙱᐅᓯᒥᒃ ᓂᔾᔮᑎᑦᑎᓂᐅᔪᒥ.

“ᑭᖑᓪᓕᖅᐹᖑᓪᓗᓂ ᕿᒪᐃᓂᕆᒋᕙᕋ, ᓴᒃᑯᐃᓂᕐᒥ ᐊᑐᖅᐸᓚᐅᖅᑕᓐᓂ, ᕿᓂᕐᓂᕐᒥ ᓴᐃᓕᓂᕐᒥ,” ᕌᑉᒥ ᐃᙱᖅᐳᖅ, ᑐᕌᕐᓂᐅᔪᒥ ᓇᓂᓯᓂᕐᒥ ᖁᕕᐊᓱᖕᓂᐅᔪᒥ “ᐃᒻᒥᒃᑯᑦ” ᐊᒻᒪ ᑭᓇᐅᔪᒪᓂᕐᒧᑦ, ᐅᓂᒃᑳᓚᐅᖅᐳᖅ

ᐃᓚᖃᕆᕗᖅ ᓇᒡᓕᒍᓱᖕᓂᐅᔪᒥ ᐃᕆᐊᓛᕐᓂᐅᔪᒥ ᐃᓪᓗᕆᓚᐅᖅᑕᖓᓄᑦ, ᑲᓕ ᕗᕋᐃᓱᕐᒧᑦ, ᔫᓅᒥ ᓵᓚᖃᕋᓱᐊᕐᓂᐅᔪᒥ-ᓵᓚᒃᓴᖅᑎᐅᔪᒥ ᐃᙱᖅᑎᐅᔪᒥ.

ᓂᔾᔮᑎᑦᑎᓕᐊᖑᔪᖅ ᐱᔭᕇᕐᒪᑦ, ᐃᔅᑭ ᐅᖃᓚᐅᖅᐳᖅ ᓂᕆᐅᒃᐳᖅ ᐃᓂᒃᓴᓕᐅᖃᑦᑕᕐᓂᐊᕐᓂᖓᓂ ᐱᙳᐊᕐᓂᐅᔪᒥ ᐊᒻᒪ ᐃᙱᕐᓗᓂ ᖁᙱᐊᖅᑕᐅᓗᓂ.

ᐊᓯᖏᓐᓄᑦ ᒪᒃᑯᒃᑐᓄᑦ ᓄᓇᕗᒻᒥᐅᑕᐅᔪᓄᑦ ᐱᓇᓱᐊᕈᒪᔪᓂ ᓂᔾᔮᑎᑦᑎᓂᕐᒥ, ᐃᔅᑭ ᐊᔭᐅᕆᕗᖅ ᐃᒻᒥᓂᒃ ᐅᖃᐅᓯᖃᕐᓂᖏᓐᓂ ᐊᒻᒪ ᐊᑐᕐᓗᑎᒃ ᓂᔾᔮᑎᑦᑎᓂᐅᔪᒥ ᐱᐅᔪᒥ ᐊᓂᐊᑎᑦᑎᓂᐅᓂᖓᓂ.

“ᐱᔪᒪᓂᖃᕈᕕᑦ, ᐱᓇᓱᐊᖏᓐᓇᕐᓗᒍ,” ᐅᖃᓚᐅᖅᐳᖅ.

“ᐆᒃᑐᕋᐃᓐᓇᐅᔭᕐᓗᑎᑦ. ᑕᒪᒃᑭᑦ ᑕᒻᒪᕐᓂᐅᔪᑦ ᐱᕕᒃᓴᐅᕗᖅ ᐃᓕᑦᑎᓂᕐᒥ.”