ᑎᓴᒪᑦ (4) ᐃᓄᐃᑦ ᓴᓇᙳᐊᒐᖏᑦ ᓂᐅᕕᐊᕆᔭᐅᔪᑦ ᐊᑭᒃᑐᕆᐊᖅᓯᒪᓪᓚᕆᒃᖢᑎᒃ
ᐅᕕᓗ ᑐᓂᓕᐅᑉ ᓴᑦᓇ ᐃᒫᓃᙳᐊᖅᖢᓂ ᓴᓇᐅᒐᖓ ᓂᐅᕐᕈᑎᐅᕗᖅ $31,200-ᒧᑦ
ᑭᙵᓂᒃ ᐃᓅᓂᑯᕕᓂᖅ ᓴᓇᙳᐊᖅᑎ ᐅᕕᓗ ᑐᓂᓕᐅᑉ ᓴᓇᙳᐊᕐᓂᑯᖓ, ᓴᑦᓇ ᐃᒫᓃᙳᐊᖅᖢᓂ (ᐅᐃᓂᒍᒪᓱᐃᑦᑐᖅ), ᓂᐅᕕᐊᕆᔭᐅᓚᐅᕐᑐᖅ $31,200-ᒧᑦ — ᐱᖓᓱᐃᖅᖢᓂ ᐊᑭᑐᓂᕐᓴᐅᓪᓗᓂ ᓯᕗᓂᐊᒍᑦ ᓂᐅᕕᐊᕆᔭᐅᓚᐅᕐᓯᒪᓂᖓᓂᒃ — ᔪᓚᐃ 15-ᖑᑎᓪᓗᒍ. (ᐊᔾᔨᓕᐅᕆᔨ ᔮᓐ ᒍᕇᑕᓐ, ᐅᑯᓇᙵᑦ ᐃᓄᐃᑦ ᓴᓇᙳᐊᖅᑎᑦ ᑐᙵᕕᖓᓂᒃ)
For an English version of this story, see 4 Inuit carvings set world record prices
ᐃᓄᐃᑦ ᓴᓇᙳᐊᒐᖏᑦ ᖃᖓᑦᑎᐊᓵᖅ ᓴᖅᑭᔮᓛᖑᓚᐅᖅᑐᑦ ᑎᓴᒪᓂᒃ ᓂᐅᕕᖅᑕᐅᔪᖃᖅᑎᓪᓗᒍ ᐊᑭᖃᖅᑐᓂᒃ ᐊᑐᓂ $20,000-ᓗ $40,000-ᓗ ᐊᑯᓐᓂᖓᓂ ᐅᕙᓂ ᑐᕌᓐᑐᒥᓐ ᓂᐅᕐᕈᑎᖃᕋᓱᖕᓇᒥᑦ ᐊᑭᑦᑐᕋᐅᑎᓂᒃᑯᑦ, ᑕᒪᕐᒥᒡᓗ ᐅᖓᑖᓄᑦ ᐊᑭᒋᔭᐅᓂᐊᕋᓱᒋᔭᐅᔪᓄᑦ ᓂᐅᕐᕈᑎᐅᓪᓗᑎᒃ.
ᐅᑯᐊ ᓴᓇᙳᐊᒐᐃᑦ ᐊᑭᑦᑐᕋᐅᑎᕙᓪᓕᐊᓂᒃᑯᑦ ᓂᐅᕐᕈᑎᐅᓚᐅᕐᓯᒪᔪᑦ ᐅᑯᓇᙵᑦ ᕘᔅᑦ ᐋᑦᔅ ᔪᓚᐃ 15-ᒥᑦ.
ᓴᓇᙳᐊᖅᑕᐅᓂᑯᕕᓂᖅ ᐃᓚᐃᔭᔅᓯᐊᐱᒃᒧᑦ, ᐃᓄᒃᔪᐊᖅᒥᐅᑕᖅᒧᑦ, ᐊᑭᑐᓛᖑᓚᐅᕐᑐᖅ ᓂᐅᕕᖅᑕᐅᓪᓗᓂ $38,400-ᒧᑦ. ᓇᓄᙳᐊᖅ ᐃᒃᓯᕚᙳᐊᖅᑐᖅ 1950-ᖏᓐᓂᒃ ᓴᓇᔭᐅᓚᐅᖅᓯᒪᔪᖅ ᐅᒃᑯᓯᒃᓴᒥᒃ, ᑑᒐᓃᒃ ᐊᒻᒪᓗ ᑎᑎᕋᐅᔭᒐᕐᒧᑦ. ᐊᑭᖓ ᐊᑭᑐᓛᖑᓯᒪᔪᖅ ᑖᔅᓱᒧᖓ ᓴᓇᙳᐊᖅᑎᒧᑦ ᐅᖃᓚᐅᕐᑐᑦ ᕘᔅᑦ ᐋᑦᔅ ᑐᓴᒐᒃᓴᓕᐊᖏᑦᑎᒍᑦ.
ᓇᐃᑏᓐ ᑎ ᒫᓐᑎ, ᓇᖕᒥᓂᖃᖃᑕᐅᔪᖅ ᕘᔅᑦ ᐋᑦᔅᒥᒃ, ᐅᖃᓚᐅᖅᑐᖅ ᐊᓯᖏᓐᓂᒃᑕᐅᖅ ᓂᐅᕐᕈᑎᖃᑲᑕᓚᐅᕐᓂᖏᓐᓂᒃ ᓴᓇᙳᐊᖅᑕᐅᓂᑯᓂᒃ.
“ᐅᓇ ᐃᓱᒪᕈᓘᔭᕐᓇᓕᓚᐅᕐᑐᖅ ᐊᑭᑐᓛᖑᑲᑕᒋᐊᒃᓴᖏᓐᓂᒃ ᓂᐅᕐᕈᑎᐅᔪᑦ,” ᐅᖃᖅᑐᖅ.
ᐅᐸᒍᑎᔪᓄᓪᓕ ᐱᐅᒋᔭᐅᓂᖅᐹᖑᓚᐅᕐᑐᖅ ᐆᒧᖓᓕ ᑎ ᒫᓐᑎᒧᑦ, ᐅᓇ ᐅᕕᓗ ᑐᓂᓕᐅᐃ ᓴᓇᙳᐊᕐᓂᑯᕕᓂᖓ ᐊᑎᖃᖅᑐᖅ ᐳᐃᔾᔪᕋᖅᑐᖅ ᓴᑦᓇ, ᑖᓐᓇ ᓂᐅᕐᕈᑎᐅᓚᐅᕐᑐᖅ $31,200-ᒧᑦ.
“ᐅᓇ ᐊᒃᓱᐊᓗᒃ ᐱᐅᒋᔭᐅᕙᖕᒪᑦ ᑎᑎᕋᕐᕕᒃᒥᑦ, ᕿᒥᕐᕈᐊᖅᑕᐅᑎᓪᓗᒋᓪᓗ ᐊᒻᒪᓗ ᑖᓐᓇ ᓴᓇᙳᐊᖅᑐᕕᓂᖅ ᐊᑭᑐᖃᖓᓂᒃ ᐱᖓᓱᐃᖅᖢᓂ ᐊᑭᒃᑐᖅᐹᓪᓕᒍᔾᔨᓪᓗᓂ, ᑕᐃᒪᓐᓇᑦᑕᐅᖅ ᐊᑭᑦᑐᕋᐅᑎᑦᑎᑲᑕᖕᓂᒃᑯᑦ,” ᐅᖃᖅᑐᖅ.
ᑐᓂᓕ, ᑭᙵᓂ ᓄᓇᖃᕐᓂᑯᕕᕕᓂᖅ ᐃᓅᔪᓐᓃᓚᐅᖅᓯᒪᔪᖅ 2014-ᒥᑦ. 2019-ᒥᑦ ᐅᖃᓕᒫᒐᓕᐅᕐᑐᖃᓚᐅᖅᓯᒪᔪᖅ ᑕᐃᔭᔪᒥᒃ ᐅᕕᓗ ᑐᓂᓕ: ᐃᓅᓯᖓ ᐊᒻᒪ ᓴᓇᐅᒐᖏᑦ ᑎᑎᕋᖅᑕᐅᓯᒪᓪᓗᓂ ᑖᓖᓐ ᑲᐅᕙᑦ ᕗᐊᐃᑦ, ᐅᖃᐅᓯᖃᖅᑐᖅ ᐊᖑᑎᓄᑦ ᐱᓕᕆᐊᖑᑐᐃᓐᓇᕋᓱᒋᔭᐅᔪᒥ ᓲᕐᓗ ᓱᕋᐃᓚᐅᕐᓯᒪᓂᖓᓂᒃ ᓴᓇᙳᐊᖃᑦᑕᓕᓚᐅᕐᓯᒪᓂᖓᓂᒃ ᐊᖑᑎᓄᑦ ᐊᑐᖅᑕᐅᓂᖅᓴᐅᕙᒃᑎᓪᓗᒍ.
ᐊᑭᑦᑐᕋᐅᑎᓐᓇᐅᑉ ᓯᕗᓂᐊᓂᒃ, ᓂᐅᕕᕈᒪᔪᑦ ᕿᒥᕐᕈᐊᖅᑎᑕᐅᓚᐅᕐᓯᒪᔪᑦ ᐅᐸᒍᑎᓪᓗᑎᒃ ᒪᐅᓇ ᑕᒪᐃᓐᓂᓕᒫᖅ ᑕᕐᕆᔭᐅᑎᒃᑯᑦ ᕿᒥᕐᕈᐊᖅᑎᑕᐅᓪᓗᑎ ᐊᒻᒪᓗ ᐅᖃᓪᓚᖃᑎᖃᕈᓐᓇᖅᑎᑕᐅᓪᓗᑎᒃ.
ᓯᐅᕐᔪᒃ ᐅᖂᑕᐅᑉ ᓴᓇᐅᒐᖓ, ᐊᑎᖃᖅᑐᖅ ᐃᓅᓱᒃᑐᖅ ᐊᖑᓇᓱᒃᑎ ᓂᕐᓕᖅᓯᒪᓪᓗᓂ, ᓂᐅᕐᕈᑎᐅᓚᐅᕐᒥᔪᖅ ᐊᑭᑐᓛᖓᒍᑦ $31,200-ᒧᑦ.
ᐅᖂᑕᖅ ᐃᓅᓚᐅᕐᓯᒪᔪᖅ 1920-ᒥᑦ ᐊᒻᒪ ᐃᓅᔪᓐᓃᓚᐃᖅᓯᒪᓪᓗᓂ 1982-ᒥᑦ. ᑭᙵᓂᒃ ᓄᓇᖃᓚᐅᖅᓯᒪᔪᖅ.
2006-ᖑᑎᓪᓗᖑ ᐃᓚᖓᑦ ᓴᓇᐅᒐᕕᓂᖓ, ᑎᖕᒥᐊᙳᐊᖅ, ᓂᐅᕐᕈᑎᐅᓚᐅᖅᓯᒪᓪᓗᓂ $18,000-ᒧᑦ, ᐊᑭᒋᓂᐊᕋᓱᒋᔭᐅᔾᔪᑎᐊᓂ ᐱᖓᓱᐃᖅᖢᓂ ᖄᖏᐅᑎᓯᒪᔪᒧᑦ.
ᐃᒃᐱᐊᕐᔪᒃᒥᐅᑕᖅ ᒫᓇᓯ ᐊᒃᐸᓕᐊᐱᒃ, ᓴᓇᙳᐊᒐᖃᐅᖅᑐᖅ ᑲᓇᑕᒥ ᑕᑯᔭᒐᖃᖅᕕᒃᒥᑦ (National Gallery of Canada) ᐊᒻᒪᓗ ᐊᓯᖏᓐᓂ ᑕᑯᔭᒐᖃᕐᕕᖕᓂᒃ ᑲᓇᑕᒥ, $26,400-ᓂᒃ ᑮᓇᐅᔭᖅᑖᕈᑎᐅᓚᐅᕐᒥᔪᖅ ᓴᓇᐅᒐᖓᓄᑦ ᕿᓚᐅᔾᔭᖅᑎᙳᐊᕐᒧᑦ — ᑖᓐᓇᑦᑕᐅᖅ ᐊᑭᑦᑐᕋᐅᑎᓂᒃᑯᑦ ᖁᑦᑎᓛᖑᔪᖅ ᓴᓇᙳᐊᖅᑎᒧᑦ.
“ᐅᔾᔨᕐᓇᓗᐊᓚᐅᕐᒥᔪᕐᓕ ᓇᓗᓇᐃᖅᑕᐅᓯᒪᙱᑦᑐᓄᑦ ᓴᓇᔭᐅᓂᑯᕕᓃᑦ ᓂᐅᕐᕈᑕᐅᑲᑕᓚᐅᕐᒥᖕᒪᑕ ᑕᕝᕙᓂ,” ᐅᖃᖅᑐᖅ ᑎ ᒫᓐᑎ.
ᓴᓇᐅᒐᕕᓂᖅ ᐊᕐᓇᖅ ᓇᖏᖅᑐᖅ ᓱᕈᓯᖃᖅᖢᓂ ᓂᐅᕐᕈᑎᐅᒪᐅᕐᒥᔪᖅ $33,600, ᐊᒻᒪ ᐊᓯᒃᑲᓐᓂᖓ, ᓇᖏᖅᑐᖅ ᐊᕐᓇᖅ ᖃᑦᑕᖃᖅᖢᓂ ᐊᒻᒪ ᐅᓪᓗᖃᖅᖢᓂ, ᓂᐅᕐᕈᑎᐅᓚᐅᕐᒥᔪᖅ $19,200. ᑕᒪᕐᒥᒃ ᑖᒃᑯᐊᒃ ᓴᓇᔭᐃᓂᑰᓪᓗᑎᒃ 1950-ᖏᓐᓂᒃ.
ᑎ ᒫᓐᑎ ᐅᖃᐅᓯᖃᓚᐅᕐᑐᖅ ᐊᑭᒋᓕᖅᑕᖏᓐᓂᒃ “ᐅᐊᑲᓪᓚᕈᓘᓂᕋᖅᖢᓂᒋᑦ” ᐊᒻᒪᓗ ᐅᖃᖅᖢᓂ ᓇᓗᓇᐃᒃᑯᑎᐅᓂᖏᓐᓂᒃ ᐃᒻᒪᑲᓪᓛᓗᖕᓂ ᐃᓄᐃᑦ ᓴᓇᐅᒐᖏᑦ ᐅᑭᐅᕐᑕᖅᑐᕐᒥ ᐱᔭᐅᖃᑦᑕᕈᒪᓕᓚᐅᕐᓯᒪᓂᖏᓐᓂᒃ.
ᑎᓴᒪᑦ ᐊᑭᑐᓛᒃᑯᑦ ᐃᓄᖕᓄᑦ ᓴᓇᙳᐊᖅᑕᐅᓯᒪᔪᑦ ᐃᓚᒋᔭᐅᓚᐅᖅᑐᑦ ᖁᓕᓂᒃ ᓄᓇᖃᖅᑳᖅᑐᓂᒃ ᓴᓇᐅᒐᕆᔭᐅᔪᓂᒃ ᓂᐅᕐᕈᑎᐅᔪᓂᒃ ᐊᑭᑐᓛᒃᑯᑦ ᑕᕝᕙᓂ ᐊᑭᑦᑐᕋᐅᑎᓂᕐᒥᒃ.
ᓂᐅᕐᕈᑎᖃᕋᓱᖕᓂᒃᑯᑦ ᐊᑭᑐᓂᖅᐹᖑᓚᐅᕐᑐᖅ ᐅᓇ ᑮᓇᑉᐸᓕᐊᕆᔭᐅᓂᑯᒃ ᐊᓪᓚᒧᑦ (ᕼᐊᐃᑕ) ᐅᕌᐳᑦ ᑕᐃᕕᑦᓴᓐᒧᑦ ᐊᑎᖃᖅᖢᓂ S’gan Mask, ᑖᓐᓇᓗ ᓂᐅᕐᕈᑎᐅᓚᐅᖅᖢᓂ $90,000-ᒧᑦ.
ᑎ ᒫᓐᑎ ᐅᖃᓚᐅᕐᑐᖅ ᖃᐅᔨᒪᙱᓐᓂᕋᖅᖢᓂ ᑖᒃᑯᐊ ᓇᓃᓐᓂᐊᓕᕐᓂᖏᓐᓂᒃ ᓄᓇᕐᔪᐊᒥ, ᑭᓯᐊᓂᓕ “ᐅᓄᖅᑐᑦ” ᓴᓇᐅᒐᐃᑦ ᑲᑎᖅᓱᐃᔨᓄᑦ ᐱᔭᐅᕙᒃᑐᑦ ᖃᐅᔨᒪᔭᐅᕙᖕᒪᑕ ᐊᑐᖅᑐᐊᖅᑎᑦᑎᕙᖕᓂᖏᓐᓂᒃ ᑕᑯᔭᒐᖃᖅᕕᐅᔪᓂᒃ ᑕᑯᔭᒐᕆᔭᐅᓂᐊᕐᒪᑕ.
ᐅᖃᓚᐅᕐᑐᖅ ᐊᑭᑦᑐᕋᐅᑎᓂᐅᑉ ᐊᓂᒍᐃᑦᑎᐊᕐᓂᖓ ᐅᑯᓂᖓ ᕘᔅᑦ ᐋᑦᔅᑯᓐᓂ ᐃᑲᔪᕈᑎᐅᓂᐊᕐᓂᕋᖅᖢᓂᐅᒃ ᐊᓯᖏᓐᓂᒃ ᓴᓇᐅᒐᓕᐅᖅᑎᐅᕙᒃᑐᓂᒃ ᐊᒻᒪᓗ ᐃᓕᖅᑯᓯᒃᑯᑦ ᐱᓕᕆᐊᖃᖅᐸᒃᑐᓂᒃ ᐊᒻᒪᓗ ᐃᑲᔪᕈᑎᐅᓗᓂ ᓄᓴᖃᖅᑳᖅᑐᑦ ᓄᓇᓕᖏᓐᓂᒃ ᑐᓐᓂᖅᑯᓯᐊᑎᒍᑦ.
ᓄᑖᓂᒃ ᑐᓐᓂᖅᑯᓯᐊᒃᓴᓂᒃ ᑐᓴᖅᑎᑦᑎᔾᔪᑎᖃᓛᖅᑐᑦ ᐊᐅᔭᒃᑲᓐᓂᖅ, ᑎ ᒫᓐᑎ ᐅᖃᓚᐅᕐᑐᖅ.
(0) Comments