ᑐᐊᕕᕐᓇᖅᑐᑦ ᓂᖀᑦ ᐊᕐᕕᐊᓄᑦ ᑎᑭᑎᑕᐅᕙᓪᓕᐊᓯᕗᑦ, ᓄᓇᕗᒥᑦ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖅᑖᕐᓯᒪᓛᓄᑦ
“ᒪᒥᓵᓕᓂᕐᓴᐅᓂᐊᕐᒪᑕ ᓂᕿᑦᑎᐊᕙᖕᓂ ᓂᕆᓂᕐᓴᐅᑲᑕᒃᑯᑎᒃ ᐊᖏᕐᕋᖏᓐᓂᒃ”
ᕼᐋᒻᒪᓚᒃᑯᑦ ᐊᕐᕕᐊᓂ ᐱᓕᕆᖃᑎᖃᑐᑦ ᓂᐅᕕᕐᕕᖕᓂ ᓄᓇᖓᓂ ᐱᓇᓱᒃᖢᑎᒃ $500,000 ᐅᖓᑖᓂᒃ ᓂᕿᓂᒃ ᓄᓇᓕᖕᓂᒃ ᐃᒡᓗᖃᖅᑐᓄᑦ ᑐᓐᓂᖅᑯᑎᐅᓂᐊᕐᑐᓂᒃ ᑕᕝᕙᓂ ᐅᓄᓛᖑᖕᒪᑕ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖅᑖᕐᓯᒪᔪᓂᒃ. (ᐊᔾᔨᙳᐊᖁᑎᒋᔭᐅᔪᖅ)
For an English version of this story, see Arviat stores deal with getting food to customers in Nunavut’s COVID-19 hotspot
ᓂᕿᓂᒃ ᐊᕐᕕᒥᐅᑕᓄᑦ ᑐᓂᔭᐅᓂᐊᕐᑐᓂᒃ ᑎᑭᑦᑐᖃᕐᐸᓪᓕᐊᓯᕗᖅ, ᑕᕝᕙᓂ 107 ᐋᓐᓂᐊᖅᑖᕐᓯᒪᓕᕐᒪᑕ ᓄᕙᒡᔪᐊᕐᓇᖅ-19-ᒥ.
ᕼᐋᒻᒪᓚᒃᑯᑦ ᐊᕐᕕᐊᓂ ᐅᖃᓚᐅᕐᑐᑦ ᓂᕿᓂᒃ $500,000-ᖏᓐᓃᑦᑐᓂᒃ ᐊᕐᕕᐊᓄᑦ ᑎᑭᑦᑐᖃᕐᓂᐊᕐᓂᕋᖅᖢᓂᐅᒃ, ᐃᓚᖃᕐᓗᓂ 26-ᓂᒃ ᐃᓛᒃᑰᖓᔪᓂᒃ ᓂᕿᓂᒃ ᐊᔪᕐᓴᖅᑐᓄᑦ ᓂᕿᑖᕐᕕᖕᒥᓐ ᑲᓇᑕᒥᑦ (Food Banks Canada).
ᓂᕿᓄᑦ ᐃᑲᔪᕈᑎᒃᓴᑦ ᐅᕙᙶᖅᑐᑎ $200 ᒥᓕᐊᓐ ᑖᓚᓂᒃ ᑐᐊᕕᕐᓇᖅᑐᒧᑦ ᓂᕿᑖᕈᑎᒃᓴᓄᑦ ᐃᑲᔫᑎᒃᓴᓂᒃ, ᓯᕗᓪᓕᖅᐹᒥ ᐅᖃᐅᓯᐅᓚᐅᕐᓯᒪᔪᖅ ᑖᓐᓇ ᐋᑐᕚᒥ ᐄᐳᕉᑎᓪᓗᒍ, ᒪᑯᐊ ᓂᕿᑖᕐᕕᐅᔪᓐᓇᖅᑐᑦ ᐊᒻᒪ ᓄᓇᓕᖕᓂ ᓂᕿᓕᕆᓂᕐᒧᑦ ᐱᓕᕆᔨᐅᔪᑦ ᐸᕐᓇᒃᓯᒪᒍᓐᓇᕐᑎᑕᐅᓗᑎ ᐋᓐᓂᐊᕕᒡᔪᐊᕐᓇᖅ ᐱᒋᐊᓕᓵᕐᓯᒪᓂᖓᓂᒃ ᓄᓇᖃᖅᑐᑦ ᐱᔭᕆᐊᖃᕐᓂᕐᓴᐅᕙᓪᓕᐊᓂᖏᓐᓄᑦ.
ᒫᓐᓇᓕ, ᒫᓃᓪᓗᐊᕐᑐᑦ 3,000-ᖏᓐᓃᑦᑐᑦ ᐊᕐᕕᐊᓃᒻᒪᑕ, ᑕᕝᕙᓂᓗ ᐊᒥᓱᑦ ᓂᕿᖃᑦᑎᐊᕈᓐᓇᙱᖢᑎᒃ ᑕᐃᒪᓕ ᐃᑲᔪᖅᑕᐅᔭᕆᐊᖃᖅᐸᓪᓕᐊᓕᕐᒪᑕ.
ᐊᕐᕕᐊᕐᒥᐅᑕᐅᖃᑕᐅᔪᖅ, ᓯᐊᑕᓐ ᓂᐱᓴ, ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᖃᐅᔨᓴᖅᑐᓂᒃ ᐃᑲᔪᖅᑎᐅᔪᖅ ᐅᕙᓂ ᐊᖅᑭᐅᒪᕝᕕᒃ ᑲᑐᔾᔨᖃᑎᒌᓄᑦ, ᐅᖃᓚᐅᕐᑐᖅ ᑖᓐᓇ ᑐᙵᓱᒃᑎᑦᑎᐊᕐᓂᕋᖅᖢᓂᐅᒃ ᐃᑲᔪᖅᑕᐅᒍᑎ.
ᐱᔾᔪᑎᖃᕐᑐᕐᓕ ᓂᕆᑦᑎᐊᑲᑕᖕᓂ ᐃᑲᔪᕈᑎᐅᓂᐊᕐᒪ ᐊᕐᕕᐊᕐᒥᐅᑕᐅᖃᑎᖏᓐᓄᑦ, ᐱᓗᐊᕐᑐᒥᑦ ᓄᕙᒡᔪᐊᕐᓇᖅ-19-ᒥ ᐊᒃᑐᖅᑕᐅᓯᒪᔪᑦ.
“ᓂᕆᐅᒃᑐᖓᓕ ᓂᕿᑦᑎᐊᕙᐅᓂᕐᓴᓂ ᐱᑖᕐᑎᑕᐅᒐᔭᕐᓂᖏᓐᓂᒃ ᐱᔭᕆᐊᖃᖅᑕᖏᓐᓄᑦ,” ᓂᐱᓴ ᐅᖃᖅᑐᖅ. “ᑕᐃᒪᑐᖅ ᖃᓄᐃᑦᑐᓐᓃᕐᓵᓕᓂᕐᓴᐅᓂᐊᕐᐳᑦ ᓂᕿᑦᑎᐊᕙᖕᓂ ᓂᕆᑲᑕᓕᕈᑎ ᐊᖏᕐᕋᖏᓐᓂ.”
ᓂᐱᓴ, 25, ᐅᖃᓚᐅᕐᑐᖅ ᖃᐅᔨᓴᖅᑕᐅᓚᐅᕐᓂᖓᓂ ᐅᒃᑑᐱᕆᒥ ᓄᕙᒡᔪᐊᕐᓇᖅ-19-ᒧᑦ ᓄᕙᓕᕋᒥ — ᓯᕗᓂᐊᒍᑦ ᑖᓐᓇ ᓄᑖᖅ ᑯᕉᓇᕙᐃᕋᔅ ᐋᓐᓂᐊᖅᑖᕐᓇᖅᑐᖅ ᓄᓇᓕᖕᓅᓚᐅᙱᑎᓪᓗᒍ — ᖃᐅᔨᓴᖅᑕᐅᔾᔪᑎᖓ ᖃᓄᐃᙱᓐᓂᕋᐃᓯᒪᓚᐅᕐᑐᖅ.
ᓂᐱᓴ ᖁᔭᓕᑦᑎᐊᖅᑐᖅ ᐊᓯᖏᓪᓗ ᓄᓇᖓ ᐃᑲᔪᖅᑕᐅᓯᒪᓕᕐᓂᖓᓂᒃ ᐊᒻᒪᓗ ᖁᔭᓕᓯᒪᓗᐊᕐᑐᖅ ᓄᓇᕗᒥᑦ ᒐᕙᒪᒃᑯᓐᓂ.
“ᓄᓇᕗᑦ ᒐᕙᒪᒃᑯᑦ ᐱᔭᒃᓴᒥᓂᒃ ᐱᓕᕆᐊᖃᓚᐅᕐᒪᑕ. ᐅᕙᑦᑎᓐᓂ ᐃᑲᔪᕐᓯᒪᓪᓚᕆᖕᒪᑕ. ᖁᔭᓕᔪᒪᕗᖓ ᑭᒃᑯᓕᒫᓂᒃ ᐃᑲᔪᕐᓯᒪᔪᓂᒃ ᖃᓄᐃᒍᑎᒋᔭᑦᑎᓐᓄ,” ᐅᖃᖅᑐᖅ.
ᐃᑲᔪᖅᑐᖃᑲᑕᓚᐅᕐᒥᔪᖅ ᐃᒻᒥᒃᑰᖓᔪᓂᒃ ᐊᕐᕕᐊᓂ: ᑕᒪᑐᒪᓂ ᐱᓇᓱᐊᕈᓯᕐᒥ, ᔨᒻ ᐅᕌᒻᓯ, ᓇᖕᒥᓂᖃᕐᑎᐅᔪᖅ ᐋᑎᒃ ᑲᓇᒃᓴᓐᔅ ᓂᐅᕕᕐᕕᖕᒥᑦ, ᐃᑲᔪᕐᑎᖏᓪᓗ, ᓂᕿᓕᐅᓚᐅᕐᓯᒪᖕᒪᑕ 150-ᓄᑦ ᓂᕆᔭᐅᔪᓐᓇᕐᑐᓂᒃ ᒪᑯᓇᙵᑦ ᓂᕿᓂᒃ, ᐳᑕᐃᑐᓂᒃ ᐊᒻᒪ ᐱᕈᖅᑐᕕᓂᕐᓂᒃ, ᑖᒃᑯᐊᓗ ᑐᓂᐅᖃᖅᑕᐅᓪᓗᑎᒃ ᐆᓯᒪᔪᓂᒃ ᓂᕆᔭᕆᐊᓕᖕᓄᑦ.
ᓂᐱᓴᓕ, ᒫᓐᓇ ᐊᖏᕐᕋᖓᓂ ᐃᖅᑲᓇᐃᔭᕐᑐᖅ, ᑕᕝᕙᓂ ᐊᑖᑕᒌᒃ ᐃᒡᓗᖓᓂ.
ᐱᓇᓱᐊᕈᓰᖕᓂ ᒪᕐᕉᖕᓂ ᓄᖅᑲᖓᑎᑦᑎᓂᖅ ᐱᒋᐊᖅᑎᑕᐅᓚᐅᕐᑐᖅ ᐃᖅᑲᓇᐃᔭᖅᑎᑐᐃᓐᓇᕐᓄᑦ ᓄᓇᕗᒥᑦ ᓄᕕᐱᕆ 18-ᖑᑎᓪᓗᒍ ᐅᓇ ᓄᕙᒡᔪᐊᕐᓇᖅ-19 ᐊᐃᑦᑑᑎᐅᓗᐊᖅᑎᑦᑕᐃᓕᒪᓪᓗᒍ.
ᑕᐃᒪᓕ ᓂᐱᓴ ᐅᖃᓚᐅᕐᑐᖅ ᐊᓂᖃᑦᑕᕐᓂᕋᖅᖢᓂ ᑭᓯᐊᓂ ᐱᔭᕆᐊᖃᓪᓚᕆᓕᕌᖓᑦ.
“ᖃᐅᔨᒃᑲᓐᓂᕋᓱᐃᓐᓇᖃᑦᑕᖅᑕᒃᑲ ᓂᐅᕕᕆᐊᖃᖅᑕᒃᑯ ᓂᐅᕕᕐᕕᓕᐊᓕᕌᖓᒪ ᐊᒻᒪᓗ ᐱᓱᑲᑕᑐᐃᓐᓇᓚᐅᕐᐸᒃᖢᖓ ᐅᕙᓐᓄ ᐃᖢᐊᕐᓯᕚᓪᓕᕐᓂᐊᕋᒪ,” ᐅᖃᖅᑐᖅ.
ᑕᐃᒪᐃᒃᑲᓗᐊᕐᑎᓪᓗᒍ, ᑭᐱᙳᓇᙱᓐᓂᕐᓴᐅᔪᕐᓕ ᐊᒻᒪ ᐊᔪᕐᓇᙱᓐᓂᕐᓴᐅᓪᓗᓂ ᐅᐃᓂᐱᒡᒥ ᐃᓄᑑᕝᕕᖕᒦᓚᐅᕐᓂᖓᓂᒃ ᐊᕐᕕᐊᓅᓚᐅᕐᑎᓐᓇᒍ.
ᓂᐱᓴ, ᐊᐃᑉᐸᖓᓂ ᐃᓕᓐᓂᐊᕆᐊᕐᓂᑯ ᐋᑐᕚᒧᑦ ᓄᓇᕗᑦ ᓯᕗᓂᒃᓴᕗᑦ ᓯᓚᑦᑐᕐᓴᕐᕕᖕᒧᑦ, ᐃᓚᒋᔭᐅᓚᐅᕐᓯᒪᔪᖅ 60 ᐅᖓᑖᓃᑦᑐᓂᒃ ᐃᓕᓐᓂᐊᕆᐊᒃᑲᓐᓂᕐᓯᒪᔪᓂᒃ ᒪᕐᕉᖕᓂ ᐱᓇᓱᐊᕈᓰᖕᓂ ᐃᓄᑑᔭᕆᐊᖃᓚᐅᕐᑐᓂᒃ ᓄᓇᕗᒧᐊᓚᐅᕐᑎᓐᓇᒋᑦ.
ᒫᔅᓯ 19-ᒥᑦ, ᐃᓱᒫᓘᑎᖃᖅᐸᓪᓕᐊᓕᕐᑎᓪᓗᒋᑦ ᓄᕙᒡᔪᐊᕐᓇᖅ-19 ᐋᓐᓂᐊᕆᔭᐅᔪᖅ ᐱᕚᓪᓕᐊᒍᑎᐅᓂᐊᕆᐊᒃᓴᖓᓂᒃ, ᓄᓇᕗᒥᑦ ᒐᕙᒪᒃᑯᑦ ᑖᒃᑯᓂᖓ ᐃᓕᓐᓂᐊᕐᑐᓂ ᐆᑐᓇᖅ ᓂᐱᓴᑐ, ᑖᒃᑯᐊᓗ ᐃᓕᓐᓂᐊᕈᑎᓄᑦ ᐃᑲᔫᓯᐊᖅᑖᖅᐸᒃᖢᑎᒃ ᓄᓇᕗᒧᑦ ᐃᓕᓐᓂᐊᖅᑎᓄᑦ ᐃᑲᔫᑎᒃᓴᓂᒃ, ᐅᕝᕙᓘᓐᓃᑦ FANS – ᖃᓄᐃᓕᐅᖁᔨᓚᐅᙱᑦᑐᑦ – ᑭᓯᐊᓂᓕ ᑖᓐᓇ ᓄᓇᕗᒥᑦ ᒐᕙᒪᒃᑯᑦ ᐃᓱᒪᓕᐊᖓ ᐊᓯᙳᕐᑎᑕᐅᓚᐅᕐᑐ ᖃᖓᑦᑎᐊᙳᖅᑎᓪᓗᒍ.
ᓂᐱᓴ ᐃᓄᑑᓐᓇᖅᑐᒦᒋᐊᖃᖅᑎᓪᓗᒍ, ᓈᒻᒪᙱᓕᐅᕈᑎᖃᓕᓚᐅᕐᒥᔪᖅ ᐃᓱᒫᓗᑲᑕᓗᐊᕐᓂᕐᒥᒃ, ᑲᑉᐱᐊᓱᑲᑕᓕᔭᓐᓂᕐᒥᒃ ᐊᒻᒪ ᕿᖓᖓᒍᑦ ᐊᐅᑲᑕᓕᔭᓕᖅᖢᓂ.
ᑭᓯᐊᓂᓕ ᒫᓐᓇᐅᔪᖅ ᐅᖃᖅᑐᖅ ᖃᓄᐃᙱᓐᓂᕋᖅᖢᓂ.
ᐃᑲᔪᖅᑕᐅᔾᔪᑎᑖᓚᐅᕐᑐᖅ ᐃᖅᑲᓇᐃᔭᕐᕕᖓᓂᒃ ᒪᑯᓂᖓ ᐃᖂᑎᒃᓴᓂᒃ, ᑮᓇᑉᐸᖕᓂᒃ, ᓴᓗᒻᒪᕐᓴᐅᑎᓂᒃ ᐊᒻᒪ ᑕᒧᓗᒐᒃᓴᓂᒃ.
(0) Comments