ᑕᐅᑐᒋᑦᑎ ᓴᖅᑭᔮᑲᐅᑎᒋᔪᒥᒃ: ᐱᓕᕆᔨᐅᔪᑦ ᐊᖅᐱᒃ ᔮᒻ ᓴᖅᑭᑎᑦᑎᕙᓪᓕᐊᔪᓂᒃ

For English version, see Watch it live: The team behind Aqpik Jam’s livestream

ᖁᔭᓐᓇᒦᕐ ᕙᐃᔅᐳᒃᑯᑦ ᐱᐅᔪᒻᒪᕆᖕᓂ ᓴᖅᑭᔮᖅᑎᑦᑎᓐᓇᖅᑐᖅ ᐅᑯᓇᙵᑦ ᑰᔾᔪᐊᖅᒥ ᐱᓕᕆᐊᖃᖅᑐᓂᒃ ᑲᒻᒪᓂᒥ, ᐅᑯᐊ ᑕᒪᑐᒪᓂ ᐊᕐᕌᒍᒥ ᐊᖅᐱᒃ ᔮᒻ ᑕᐅᑐᒃᑕᐅᔪᓐᓇᓚᐅᕐᒪᓐ ᓇᓂᑐᐃᓐᓇᖅ ᓄᓇᕐᔪᐊᕐᒥ.

ᑭᓇᑐᐃᓐᓇᖅ ᑕᐅᑐᒃᑐᖅ ᖃᕋᓴᐅᔭᒃᑯᑦ ᐋᒐᓯ 18ᒥ, ᑭᖑᓪᓕᖅᐹᕆᓕᕐᑕᖓᓂᒃ ᐅᓪᓗᑦ ᑎᓴᒪᑦ ᖁᕕᐊᓲᑎᖃᕐᓇᒥ ᑰᔾᔪᐊᖅᒥ, ᑕᐅᑐᒍᓐᓇᓚᐅᖅᑐᑦ 8ᓂ ᐃᙱᖅᑎᓂᒃ ᐅᑯᐊ ᐃᓚᒋᔭᐅᓪᓗᑎᒃ ᔫᕆᓂ, ᑳᑉᔅ ᐊᒻᒪ ᐸᐃᓚᑦᔅ, ᐊᒻᒪᓗ ᐊᒃᑎᔅᑎᒃᑯᓐᓂ.

ᐅᕙᓂ ᑐᒦᑦ ᑐᓴᒐᒃᓴᓕᕆᔨᒃᑯᑦ ᐋᖅᑭᒃᓱᐃᕙᓪᓕᐊᑎᓪᓗᒋᑦ ᓴᖅᑭᔮᑲᐅᑎᒋᑎᑦᑎᓂᕐᒥᒃ, ᐅᓇ ᓵᒥᐅᓪ ᓚᒑᔅ ᐊᐅᓚᑦᑎᔨᐅᔪᖅ ᐊᔾᔨᓕᐅᖅᑕᐅᔪᓂᒃ ᓴᖅᑭᑎᑦᑎᕙᓪᓕᐊᓂᕐᒥᒃ ᐊᒻᒪ ᐅᓇ ᑎᐅᕆᒃ ᑕᒍᕐᓈ ᐱᓕᕆᐊᖃᖅᖢᓂ ᑎᑎᖃᑎᒎᖓᔪᓂᒃ ᐊᒻᒪ ᖃᓄᖅ ᓴᖅᑭᔮᕈᑎᐅᓂᐊᖅᑐᓂᒃ.

ᓯᕗᓪᓕᕐᒥ ᐅᑯᐊ ᑐᒦᑦ ᑎᑎᖃᑎᒎᖅᑐᒃᓴᓂᒃ ᐊᒻᒪ ᓴᖅᑭᔮᕈᑎᐅᓂᐊᖅᑐᓂᒃ ᐱᓕᕆᐊᖃᕐᓂᕐᓴᐅᓚᐅᕐᓯᒪᔪᑦ, ᑕᐃᒪᓐᓇ ᐊᑎᖏᑦᑎᑐᑦ: ᑐᒦᑦ (Paw Print) Media.

“ᐊᕐᕌᒍᓂ 7ᓂ ᑰᔾᔪᐊᖅᒥᐅᑕᐅᓕᕐᑐᖓ,” ᐅᖃᕐᑐᖅ ᓚᒑᔅ ᐊᐱᖅᓱᖅᑕᐅᑎᓪᓗᒍ ᐃᙱᖅᑏᑦ ᐱᒋᐊᕐᓂᐊᓵᕐᓂᖏᓐᓂᒃ ᐋᒐᓯ 17ᖑᑎᓪᓗᒍ.

ᑲᖏᖅᓱᐊᓗᔾᔪᐊᖅᒥ ᓄᓇᖃᐃᓐᓇᓚᐅᕐᓯᒪᔪᖅ, ᐅᖃᕐᑐᖅ, ᐊᒻᒪᓗ ᐃᓕᓐᓂᐊᖃᑦᑕᖅᖢᓂ ᑕᕐᕆᔭᒐᓕᐅᕐᓂᕐᒥᒃ ᐊᔾᔨᒌᙱᑦᑑᑎᓂᒃ ᐃᓕᓐᓂᐊᕐᕕᖕᓂ ᖃᓪᓗᓈᑦ ᓄᓇᖓᓂ.

“ᐅᕗᖓ ᓄᒃᑎᖅᑎᓪᓗᖓ,” ᐅᖃᕐᑐᖅ. “ᐊᐱᕆᓚᐅᕐᓯᒪᒐᒃᑯ ᑎᐅᕆᒃ, ‘ᐃᖅᑲᓇᐃᔮᖅᑖᕆᐊᖃᖅᑑ. ᐊᔾᔨᓕᐅᕆᔪᓐᓇᖅᑐᖓ ᐊᐅᓚᔪᓂᒃ, ᑕᒪᓐᓇ ᐊᑐᖅᑕᐅᔪᓐᓇᕆᕚ ᑲᒻᐸᓂᔅᓯᓐᓂ?”

ᑕᒍᕐᓈ ᐊᖏᓚᐅᕐᓯᒪᔪᖅ ᐊᒻᒪ ᐱᓕᕆᖃᑎᒌᖕᓂᖅ ᐱᒋᐊᓕᖅᖢᓂ.

ᑕᒍᕐᓈ, ᓚᒑᔅ ᐊᒻᒪ ᑐᓴᐅᒪᔾᔪᑎᓕᕆᓂᕐᒧᑦ ᐱᓕᕆᔨᐅᔪᖅ ᐃᐊᑦ ᒪᕈᔭᒪ ᓴᖅᑭᔮᑲᐅᑎᒋᔪᓂ ᑲᒪᒋᔭᖃᓚᐅᕐᑐᖅ ᐋᖅᐱᒃ ᔮᒻᒥ, ᑕᐃᒪᓐᓇᓗ ᐱᓕᕆᐊᖃᕋᓱᒃᓯᒪᓪᓗᑎᒃ ᑭᓯᐊᓂᓕ ᕿᓚᒥᐅᓂᕐᓴᒃᑯᑦ.

ᓯᕗᓂᐊᓂᓪᓕ ᐅᓇ ᖁᕕᐊᓲᑎᖃᕐᓂᖅ ᓈᓚᐅᑎᒃᑯᑦ ᓴᖅᑭᔮᖅᑎᑕᐅᕙᓚᐅᕐᓯᒪᔪᖅ ᐅᕘᓇ ᑕᕐᕋᕐᒥᐅᑦ ᓂᐱᖓᒍᑦ ᓄᓇᓖᑦ ᑕᓚᕖᓴᓐᑯᑦ ᓴᖅᑭᔮᕐᕕᐊᒍᑦ. “ᑭᓯᐊᓂᓕ ᐊᕐᕌᒎᓕᕐᑐᓂᒃ ᖁᓕᒃ ᐅᓇ ᓯᕗᓪᓕᖅᐹᖅ ᓴᖅᑭᔮᑲᐅᑎᒋᔭᐅᓪᓗᓂ ᐊᖅᐱᒃ ᔮᒻ,” ᐅᖃᕐᑐᖅ ᓚᒑᔅ.

ᐃᑭᐊᖅᑭᕕᒃᑰᖅᑎᑦᑎᓂᖅ ᓱᒃᑲᐃᓗᐊᓚᐅᕐᓯᒪᓂᖓᓄᑦ ᐅᓇ ᐊᔪᕐᓇᖅᐸᓚᐅᕐᓯᒪᔪᖅ ᑕᒪᑐᒪ ᐊᕐᕌᒎᑉ ᑭᖑᓂᐊᓂᒃ.

“ᑕᐃᒪᓐᓇ ᐱᓇᓱᓚᐅᕐᓯᒪᒐᓗᐊᕋᑦᑕ,” ᐅᖃᕐᑐᖅ. “ᑭᓯᐊᓂᓕ ᐊᔪᕐᓇᓚᐅᕐᓯᒪᖕᒪᑦ.”

ᓯᕗᓪᓕᕐᒥ ᑐᒦᑦ ᑐᓴᒐᒃᓴᓕᕆᔨᒃᑯᑦ ᐱᓕᕆᑎᑕᐅᓚᐅᕐᓯᒪᔪᖅ ᐅᓪᓗᕐᒥ ᐊᑕᐅᓯᕐᒥ ᓴᖅᑭᔮᖅᑎᑦᑎᑲᐅᑎᒋᓂᐊᕐᓗᑎᒃ ᑕᒪᑐᒪᓂ ᐊᕐᕌᒍᒥ ᐊᖅᐱᒃ ᔮᒻᒥ.

“ᑕᒪᓐᓇ ᐅᖃᐅᓯᕆᖃᑦᑕᕐᓯᒪᓕᕋᑦᑎᒍᑦ,” ᓚᒑᔅ ᐅᖃᕐᑐᖅ, ᑭᓯᐊᓂᓕ “ᑲᑎᒪᔨᕋᓛᖏᑦ ᐊᖅᐱᒃ ᔮᒻᒧᑦ ᑕᒪᑐᒥᖓ ᐱᔪᒪᓗᐊᖅᑰᔨᓚᐅᙱᑦᑐᑦ, ᐅᖃᖅᖢᑎᒃ ‘ᐃᓄᐃᓪᓕ ᖃᐃᙱᑉᐸᑕ ᐊᒻᒪᓗ ᐊᖏᕐᕋᖏᓐᓂᒃ ᑕᐅᑐᒍᒪᙶᕐᓗᑎᒃ?’”

ᑭᓯᐊᓂᓕ, ᐅᓇ ᓴᖅᑭᔮᑲᐅᑎᒋᑎᑦᑎᓂᖅ ᐊᒃᑐᐃᓂᖃᓗᐊᓚᐅᙱᑦᑐᖅ ᐃᓄᖕᓂ ᖃᐃᑲᑕᒃᑐᓂᒃ ᑕᑕᑦᑎᐊᖅᑕᐅᕙᒃᖢᓂ ᑰᔾᔪᐊᖅᒥ ᖁᙱᐊᕐᕕᒃ ᐅᓪᓗᕐᓂ ᑎᓴᒪᓂ ᖁᕕᐊᓲᑎᖃᑲᑕᒃᑎᓪᓗᒋᑦ.

ᐃᓄᐃᑦ ᖃᖓᑕᔫᖓ ᓯᕗᓪᓕᖅᐹᖑᓚᐅᕐᑐᖅ ᑮᓇᐅᔭᑎᒍᑦ ᐃᑲᔪᖅᑐᓂᒃ ᓴᖅᑭᔮᑲᐅᑎᒋᑎᑦᑎᓂᕐᒥᒃ ᐊᒻᒪᓗ ᓚᒑᔅ ᐅᖃᖅᖢᓂ ᑖᓐᓇ ᐱᒋᐊᕈᑎᒻᒪᕆᐅᓕᓚᐅᕐᓂᖓᓂᒃ.

“ᓯᕗᓪᓕᕐᒥ ᐋᖅᑭᒃᓯᓯᒪᓚᐅᕐᑐᒍᑦ ᐅᓪᓗᕐᒥ ᐊᑕᐅᓯᕐᒥ ᐱᓕᕆᐊᖃᕐᓂᐊᕐᓗᑕ,” ᐅᖃᕐᑐᖅ. “ᑭᓯᐊᓂᓕ ᖃᐅᔨᓕᓚᐅᕋᑦᑕ ᐅᓪᓗᓂ ᑎᓴᒪᓂᒃ ᐱᓕᕆᓂᐊᕐᓂᑦᑎᓐᓂᒃ.”

ᐊᐃᐸᖓᓂ ᐅᓐᓄᖕᒥ, ᐅᐊᖕᓇᖅᐸᓯᖕᒥ ᓄᓇᓖᑦ ᑰᔾᔪᐊᖅᒥ ᐃᑲᔪᖅᑐᐃᓕᓚᐅᕐᑐᑦ ᓴᖅᑭᔮᑲᐅᑎᒋᑎᑦᑎᔪᓂᒃ. ᐅᓪᓗᖓᓂᓪᓕ ᐱᖓᔪᖓᓐᓂᒃ ᐅᑯᐊ ᕗᐃᓕ ᐊᒻᒪ ᑖᓂᐅᓪ ᒐᐳᐊ ᐃᑲᔪᖅᑐᐃᓕᓚᐅᕐᑐᑦ ᑳᒻᐸᓂᒐᒍᑦ.

ᐊᐱᕐᓱᖅᑕᐅᑎᓪᓗᒍ, ᓚᒑᔅ ᐅᖃᓚᐅᕐᑐᖅ “ᖃᐅᔨᒪᙱᑦᑐᒍᑦ ᑭᒃᑯᓐᓄᑦ ᐃᑲᔪᖅᑐᖅᑕᐅᓂᐊᕐᒪᖔᑕ ᑕᓪᓕᕐᒥᕐᒥ ᓱᓕ, ᑭᓯᐊᓂᓕ ᓴᖅᑭᔮᖅᑎᑦᑎᔪᓐᓇᕐᓂᐊᕐᒥᔪᒍᑦ.”

ᐅᓇ ᐱᓕᕆᐊᖃᕐᓂᖅ ᐊᔪᕈᓐᓃᖅᐸᓪᓕᐊᔾᔪᑎᐅᓚᐅᕐᑐᖅ ᑐᒦᑦ ᑐᓴᒐᒃᓴᓕᐅᖅᑎᓄᑦ. ᑕᐃᒪᓕ ᓴᖅᑭᔮᑲᐅᑎᒋᑎᑦᑎᒃᑲᓐᓂᕐᓂᐊᖅᐸᑕ ᖃᑯᒍᒃᑲᓐᓂᖅ ᓚᒑᔅ ᐅᖃᓚᐅᕐᑐᖅ ᑖᓐᓇ ᐱᐅᑎᒃᑲᓐᓂᕋᓱᓛᕐᓂᖓᓂᒃ.

“ᐊᔾᔨᓕᐅᕈᑎᓂᒃ ᐃᓄᖕᓄᑦ ᑲᒪᒋᔭᐅᔪᓂᒃ ᐱᒃᑲᓐᓂᕈᒪᒐᑦᑕ,” ᐅᖃᕐᑐᖅ, ᐅᖃᐅᓯᖃᖅᖢᓂ ᑎᒍᒥᐊᒐᕐᓂᒃ ᐊᔾᔨᓕᐅᕈᑎᓂᒃ ᐱᓱᑲᑕᒃᑐᓂᒃ ᐃᓄᐃᑦ ᐊᑯᓐᓂᖏᑦᑎᒍᑦ ᖁᙱᐊᖅᑕᐅᔪᓪᓘᓐᓃᑦ ᓵᑦᑎᐊᖓᓂ.

“ᐊᐅᓚᔪᓂ ᓴᖅᑭᑎᑦᑎᓯᒪᓪᓗᓂ ᑕᑯᔪᒥᓇᕐᓂᕐᓴᐅᕙᖕᒪᑕ,” ᐅᖃᕐᑐᖅ.