ᑯᐸᐃᒃᒥ ᑲᒥᓴᓐ ᐃᓕᓐᓂᐊᕈᑎᓂᒃ ᐊᑐᐃᓐᓇᖃᕐᓂᖅᓴᐅᖁᔨᔪᑦ ᐃᓅᓱᒃᑐᓄᑦ ᐃᓄᖕᓄᑦ ᑲᒪᒋᔭᐅᔪᓄᑦ

“ᖃᐅᔨᓴᕈᑎᑦᑎᒍᑦ ᖃᐅᔨᓕᓚᐅᕐᑐᒍᑦ ᖃᓄᐃᓕᐅᕈᑎᒃᓴᖃᙱᓗᐊᕐᓂᖓᓂᒃ,” ᐅᖃᖅᑐᖅ ᐊᖓᔪᖅᑳᑉ ᑐᒡᓕᖓ ᑲᒪᒋᔭᖃᖅᑐᖅ ᓱᕈᓯᓕᕆᓂᖅᒥᒃ

ᐊᖁᑎᒦᑦᑐᑦ ᑰᔾᔪᐊᖅᒥᓐ. ᓄᓇᕕᒃᒥᑦ ᓱᕈᓰᑦ ᑲᒪᒋᔭᐅᔪᑦ ᓄᓇᕕᒃ ᓯᓚᑖᓂᑦ ᐃᓕᓐᓂᐊᒐᒃᓴᖃᙱᑦᑐᑦ ᐃᓕᖅᑯᓯᕐᒨᖓᔪᓂᒃ, ᓄᑖᖅ ᐅᓂᒃᑳᖅ ᓴᖅᑭᑕᐅᔪᖅ ᓴᖅᑭᑦᑎᔪ. (ᐊᔾᔨᙳᐊᖅ ᓴᐃᕋ ᕌᔾᔪᔅ)

By ᓴᐃᕋ ᕌᔾᔪᔅ

For an English version of this story, see Quebec commission calls for better access to education for Inuit youth in care

ᐃᓄᐃᑦ ᓱᕈᓰᑦ ᑲᒪᒋᔭᐅᔪᑦ ᓄᓇᕕᒃ ᓯᓚᑖᓂᒃ ᐃᓕᓐᓂᐊᖅᑐᓕᕆᓂᒃᑯᑦ ᐱᐅᓂᖅᓴᒥᒃ ᐱᔨᑦᑎᕋᐅᑎᖃᕆᐊᖃᖅᑐᑦ, ᐃᓕᖅᑯᓯᕐᒨᖓᓂᖅᓴᓂᒃ ᐱᓕᕆᐊᒃᓴᓂᒃ ᐊᒻᒪᓗ ᐃᓄᒃᑎᑐᑦ ᐅᖃᓪᓚᖃᑦᑕᕐᓂᖅᓴᐅᓗᑎᒃ.

ᐅᓇ ᐅᓂᒃᑳᓄᑦ ᐃᓱᓕᑦᑎᔾᔪᑎᒋᔭᐅᔪᖅ ᓴᖅᑭᑕᐅᓚᐅᖅᑐᓂᒃ ᒪᐃ 19-ᖑᑎᓪᓗᒍ ᐅᑯᓇᙵᑦ ᑯᐸᐃᒃᒥᑦ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᓄᑦ ᑲᒥᓴᓐᑯᓐᓄᑦ.

ᑲᒥᓴᓐᑯᑦ ᖃᐅᔨᓕᓚᐅᖅᑐᑦ ᐃᓄᐃᑦ ᐃᓅᓱᒃᑐ ᒪᓐᑐᕆᐊᒥ ᐃᓚᒌᓄᑦ ᑲᒪᒋᔭᐅᔪᑦ ᐅᕝᕙᓘᓐᓃᑦ ᐃᓅᓱᒃᑐᒃᑯᕕᖕᒦᑦᑐᑦ ᒪᑯᓂᖓ ᐃᓕᓐᓂᐊᕈᑎᒃᓴᓂᒃ ᐱᖃᖅᑎᑕᐅᙱᓗᐊᕐᓂᖏᓐᓂᒃ ᐊᒻᒪᓗ ᐃᓕᓐᓂᐊᕐᓂᒃᑯᑦ ᑭᖑᕙᓯᖕᓂᖅᓴᐅᕙᓪᓕᐊᓪᓗᑎᒃ ᑲᒪᒋᔭᐅᑎᓪᓗᒋᑦ.

ᐱᔾᔪᑎᖃᖅᖢᑎᒃ ᐅᓄᙱᓗᐊᕐᓂᖏᑦ ᓱᕈᓯᕐᓂᒃ ᑲᒪᔨᐅᕙᒃᑐᓂᒃ ᐅᕝᕙᓘᓐᓃᑦ ᐃᓅᓱᒃᑐᒃᑯᕕᖕᓂᒃ ᓄᓇᕕᒃᒥᑦ, ᐅᓄᖅᑐᑦ ᐃᓄᐃᑦ ᐃᓅᓱᒃᑐᑦ ᒫᓐᑐᕆᐊᒧᐊᖅᑕᐅᓕᖃᑦᑕᖅᑐᑦ ᑲᒪᒋᔭᐅᓂᐊᕐᒪᑕ, ᐅᑯᑎᒎᖅ ᓄᓇᓕᐸᐅᔭᐃᑦ ᐋᓐᓂᐊᖃᕐᓇᙱᑦᑐᓕᕆᔨᖏᑦᑎᒍᑦ ᐊᒻᒪ ᐃᓄᓕᕆᔨᑎᒍᑦ.

ᑲᒥᓴᓐᑯᑦ ᐅᖃᓚᐅᕐᑐᖅ ᐅᓇ ᖃᐅᔨᔾᔪᑎᒋᔭᐅᓕᓚᐅᕐᑐᖅ ᐃᓄᐃᑦ ᐃᓅᓱᒃᑐᑦ ᑲᒪᒋᔭᐅᔪᑦ ᐃᓅᖃᑎᒌᖕᓂᒃᑯᑦ ᐊᒻᒪ ᐃᓕᖅᑯᓯᒃᑯᑦ ᐃᓄᑑᓗᐊᖃᑦᑕᕐᓂᖏᓐᓂᒃ. ᑕᒪᓐᓇ ᖃᐅᔨᓴᖅᑕᐅᓕᓚᐅᖅᓯᒪᔪᖅ ᐊᕐᕌᓂ ᑐᓴᑲᑕᓕᖅᑎᓪᓗᒋᑦ ᐅᓄᖅᑐᑦ ᓄᓇᕕᒃᒥᐅᑕᑦ ᓱᕈᓰᑦ ᑲᒪᒋᔭᐅᔪᑦ ᒪᓐᑐᕆᐊᒥ ᐃᓄᒃᑎᑐᑦ ᐅᖃᓪᓚᖃᑦᑕᖁᔭᐅᓚᐅᙱᓐᓂᖏᓐᓂᒃ.

2019-ᒥ ᐅᓂᒃᑳᓕᐊᖑᓂᑯᓂᒃ ᐋᖅᑭᒃᑕᐅᓯᒪᔪᑦ ᒪᓐᑐᕆᐊᒥᒃ ᐹᑦᓵ (Batshaw) ᐃᓅᓱᑦᑐᓄᑦ ᐊᒻᒪ ᐃᓚᒌᓄᑦ ᐅᐸᒡᕖᑦ ᖃᐅᔨᓕᓚᐅᕐᓯᒪᔪᑦ ᓄᓇᕕᒻᒥᐅᑉ ᓱᕈᓯᖏ ᒪᓐᑐᕆᐊᒥ ᖃᓪᓗᓈᑎᑑᖓᔪᓄᑦ ᐃᓕᓐᓂᐊᕐᕕᖕᓄᑦ ᐊᔪᕐᑎᑕᐅᓂᕐᓴᐅᖃᑦᑕᓚᐅᕐᓂᖏᓐᓂᒃ ᐱᔾᔪᑎᒋᓪᓗᒍ ᑯᐸᐃᒃᒥᑦ ᐅᖃᐅᓯᕐᓄᑦ ᐱᖁᔭᖃᓗᐊᕐᓂᖏᓐᓄᑦ, ᑖᒃᑯᓂᖓᓗ ᐃᓚᒌᓂᒃ ᓴᖅᑭᑦᑎᑦᑎᔭᕆᐊᖃᕈᑎᐅᓪᓗᓂ ᖃᓪᓗᓈᑐᑦ ᐊᔪᙱᓐᓂᖅᒥᒃ ᐃᓕᓐᓂᐊᕈᑎᒃᓴᐅᔪᓐᓇᖅᑐᓂᒃ.

ᑕᐃᒪᐃᓐᓂᖓᓄᑦ, ᐹᑦᓵ ᖃᐅᔨᓕᓚᐅᕐᓯᒪᔪᑦ ᐅᓄᒻᒪᕆᒃᑐᑦ ᐃᓕᓐᓂᐊᕆᐊᖃᑦᑕᙱᓐᓂᖏᓐᓂᒃ.

ᐅᓂᒃᑳᑦ ᓴᖅᑭᑕᐅᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥ ᐅᖃᕐᓯᒪᖕᒪᑕ ᖃᔅᓯᒐᓴᒻᒪᕇᑦ ᑯᐸᐃᒃ ᒐᕙᒪᒃᑯᑦ ᐱᔨᑎᑦᕋᐅᑎᖏᑦ ᐱᒃᑲᖅᑎᒐᒃᓴᐅᓂᖏᓐᓂᒃ.

“ᐃᓕᓐᓂᐊᕐᓂᓕᕆᓂᖅᒧᑦ ᒥᓂᔅᑕᐅᔪᑦ ᑕᒪᑐᒥᖓ ᖃᐅᔨᓴᕋᓱᒃᓯᒪᙱᑦᑐᑦ ᐊᒻᒪᓘᓐᓃᑦ ᐃᓕᓐᓂᐊᖅᑎᑦᑎᓇᓱᙱᑦᑐᑦ ᑕᒪᐅᓇ ᐊᕐᕌᒍᖃᖅᑐᓂᒃ ᑕᐃᒪᐃᓐᓂᖓᓄᓪᓗ ᑕᒪᓐᓇ ᐱᔪᓐᓇᐅᑎᖏᓐᓂᒃ ᓱᕋᐅᔾᔪᑎᒋᔭᐅᓯᒪᓇᓱᒋᕙᕗᑦ,” ᓱᓵᓐ ᐋᐱᓐ, ᑲᒥᓴᓐᒧᑦ ᐊᖓᔪᖅᑳᖅᒧᑦ ᑐᒡᓕᕆᔭᐅᔪᖅ ᑲᒪᒋᔭᖃᖅᖢᓂ ᐃᓅᓱᒃᑐᓄᑦ ᐱᓕᕆᐊᒃᓴᓂᒃᒪ ᐅᖃᓚᐅᖅᑐᖅ ᑐᓴᒐᒃᓴᓕᐅᕐᓂᒃᑯᑦ.

“ᑲᒥᓴᓐᑯᑦ ᐃᓱᒪᓕᐅᕆᓕᖅᑐᑦ ᐅᑯᐊ ᐃᓕᓐᓂᐊᕐᓂᓕᕆᔨᒃᑯᑦ ᓇᓂᓯᓗᑎᒃ ᐊᑯᓂᕈᓗᒃ ᐊᑐᖅᑕᐅᔪᓐᓇᖅᑐᒥᓐ ᒪᑯᐊ ᐃᓅᓱᒃᑐᑦ ᐃᓄᐃᑦ ᓄᓇᕕᒃ ᓯᓚᑖᓃᑦᑐᑦ ᖃᓪᓗᓈᑐᑦ ᐃᓕᓐᓂᐊᖅᑎᑕᐅᖃᑦᑕᖁᓪᓗᒋᑦ.”

ᐅᓂᒃᑳᖏᑦᑎᒍᓪᓕ, ᑖᒃᑯᐊ ᑲᒥᓴᓐᑯᑦ ᑎᑎᕋᕐᓯᒪᓚᐅᕐᑐᑦ ᑲᑎᕐᓱᐃᔪᓐᓇᙱᓐᓂᕋᖅᖢᑎᒃ ᒪᑯᓂᖓ ᖃᔅᓯᐅᖕᒪᖔᑦ ᐃᓄᐃᑦ ᐃᓅᓱᒃᑐᑦ ᐃᓕᓐᓂᐊᕈᑎᒃᓴᓂᒃ ᐊᑐᐃᓐᓇᖃᙱᑎᑕᐅᔭᕆᐊᒃᓴᖏᓐᓂᒃ ᑲᒪᒋᔭᐅᓂᖏᓐᓂᒃ ᓄᓇᕕᒃ ᓯᓚᑖᓂ.

ᐊᒻᒪᓗ ᐅᑯᐊ ᓄᓇᕕᒃᒧᑦ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᑲᑎᒪᔩᑦ, ᑲᑎᕕᒃ ᐃᓕᓴᕐᓂᓕᕆᓂᖅ, ᒪᓂᒻᒪᐃᓯᒪᖕᒪᑕ ᐃᓕᓐᓂᐊᖅᑎᑦᑎᒍᑎᒃᓴᓂᒃ ᑖᒃᑯᓄᖓ ᐃᓅᓱᒃᑐᓄᑦ ᐊᒻᒪᓗ ᑕᒪᒃᑯᐊ ᐱᔨᑦᑎᕋᐅᑏᑦ ᐊᑐᖅᑕᐅᙱᖢᑎᒃ ᒪᓐᑐᕆᐊᒥᑦ ᑲᒪᒋᔭᖃᕐᕕᐅᔪᓂᒃ.

ᑲᒥᓴᓐᑯᑦ ᐃᓱᒪᓕᐅᕆᓚᐅᕐᑐᑦ ᐃᓄᐃᑦ ᐃᓚᒌᑦ ᐊᒻᒪ ᑲᑐᔾᔨᖃᑎᒌᖑᔪᑦ ᐅᖃᖃᑎᒌᒋᐊᖃᕐᓂᖏᓐᓂᒃ ᖃᓄᐃᓕᐅᕈᑎᒃᓴᓂᒃ ᐋᖅᑭᒃᓱᐃᔪᓐᓇᕐᓂᐊᖅᒪᑕ ᑕᒪᒃᑯᐊ ᐸᖅᑭᔨᐅᕙᒃᑐᑦ ᐃᓅᓱᒃᑐᓕᕆᕝᕕᐅᔪᓪᓘᓐᓃᑦ ᐃᓕᖅᑯᓯᕐᒨᖓᔪᓂᑦ ᖃᓄᐃᓕᐅᖅᑎᑦᑎᔪᓐᓇᕐᓗᑎᒃ ᓈᒻᒪᒐᔭᖅᑐᓂᒃ ᐃᓅᓱᒃᑐᓄᑦ ᐊᒻᒪᓗ ᐃᓂᖃᖅᑎᑕᐅᓗᐃᑦ ᐃᓄᐃᑦ ᐃᓅᓱᒃᑐᑦ ᑲᑎᖃᑎᒋᕝᕕᒋᔪᓐᓇᖅᑕᖏᓐᓂᒃ ᐊᒻᒪ ᐃᓄᒃᑎᑐᑦ ᐅᖃᓪᓚᖃᑎᒌᒍᓐᓇᕐᓗᑎᒃ.

ᑲᒥᓴᓐᑯᑦ ᓇᓂᓯᔪᓐᓇᓚᐅᙱᑦᑐᑦ ᒪᓕᒋᐊᖃᖅᑐᓂᒃ ᐃᓄᒃᑎᑐᑦ ᐅᖃᐅᓯᖅ ᐊᑐᖅᑕᐅᖁᔭᐅᙱᖢᓂ ᑲᒪᒋᔭᖃᖅᕕᐅᔪᓂᒃ, ᑭᓯᐊᓂᓕ ᐅᖃᓚᐅᕐᑐᑦ ᐃᓅᓱᒃᑐᓕᕆᓂᖅᒧᑦ ᐱᔨᑦᑎᕋᖅᑎᐅᔪᑦ ᐃᓄᒃᑎᑐᑦ ᐅᖃᐅᓯᕐᒥᒃ ᐊᑐᖅᑕᐅᑎᑦᑎᖃᑦᑕᖁᔭᐅᓪᓗᑎᒃ ᐱᓕᕆᕝᕕᖏᓐᓂᒃ ᐃᓄᒃᑎᑐᑦ ᑎᑎᕋᖅᓯᒪᓗᑎᒃ ᐱᓕᕆᐊᒧᑦ ᖃᓄᐃᓕᐅᕈᓯᐅᒪᔭᕆᐊᖃᖅᑐᑦ.

ᑲᒥᓴᓐᑯᑦ ᐃᓱᒪᓕᐅᕆᓚᐅᕐᒥᔪᑦ ᑐᓵᔨᑕᖃᕐᓗᓂ ᐱᔨᑦᑎᕋᐅᑎᑕᖃᖅᑐᒥ ᑕᒪᐃᓐᓄᓕᒫᖅ ᐃᓄᖕᓄᑦ ᐃᓅᓱᒃᑐᓄᑦ ᑐᑭᓯᐅᒪᑦᑎᐊᖃᑦᑕᖁᓪᓗᒋᑦ ᐃᓕᓐᓂᐊᖅᑎᑦᑎᔨᐅᔪᑦ ᐊᒻᒪᓗ ᓱᕈᓰᑦ.

ᐊᒻᒪᓗ ᑭᖑᓪᓕᖅᐹᒥᒃ, ᑲᒥᓴᓐᑯᑦ ᐊᐱᕆᓚᐅᕐᑐᑦ ᓄᓇᕕᑦ ᓄᓇᓕᓕᒫᓄᑦ ᑲᑎᒪᔨᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᒻᒪ ᐃᓄᓕᕆᔨᒃᑯᓐᓄᑦ ᐸᕐᓇᐅᑎᖏᓐᓂᒃ ᖃᐅᔨᒪᑎᑦᑎᖁᔨᓪᓗᑎᒃ ᐊᕕᒃᑐᖅᓯᒪᓂᒃᑯᑦ ᑲᒪᒋᔾᔪᓯᕆᓂᐊᖅᑕᖏᓐᓂᒃ.

Share This Story

(0) Comments

Join the Conversation

Your email address will not be published. Required fields are marked *

*