ᑯᕙᓐᔮᑎᒍᑦ, ᐃᖃᓗᓐᓂ ᐳᐊᑎᑮᑦ ᓄᓇᖅᑲᑎᒌᒃᑐᖁᑎᖏᑦ ᖁᕕᐊᓱᒍᑎᖃᖅᐸᑦᑐᑦ ᐱᐅᓯᑐᖃᕆᔭᒥᑦᑎᒍᑦ

“ᑕᒪᒃᑯᐊ ᑭᓇᑐᐃᓐᓇᒥᑦ ᓇᖕᒥᓂᖅ ᐊᑐᓕᖅᑎᑕᐅᔪᓐᓇᕐᒪᑕ ᐃᓅᓯᕐᒥᓐᓄᑦ”

7-ᖑᔪᑦ ᓇᑉᐸᖅᑕᐃᑦ, ᐊᑐᓂ ᐱᔾᔪᑎᖃᕈᑎᐅᔪᑦ 7-ᖑᔪᓄᑦ ᐊᑐᕐᓂᖃᖅᑎᑕᐅᔪᓄᑦ ᐋᕝᕆᑲᒥᐅᑦ ᐱᐅᓯᑐᖃᖓᓐᓂ, ᐃᑭᑕᐅᓚᐅᖅᑐᑦ ᑭᓈᕋᒥ ᑯᕙᓐᔮ ᖁᕕᐊᓱᒍᑎᖃᖅᑎᑦᓯᑎᓪᓗᒋᑦ ᖃᔪᕐᑐᕐᕕᒃ ᓂᕿᑖᕐᕕᖓᓂ ᓇᒡᒐᔾᔭᐅᒥ, ᑎᓯᐱᕆ 29. (ᐊᔾᔨᓕᐅᖅᑕᖏᑦ ᑕᔅᑎᓐ ᐸᑖᕐ)

By ᑎᑎᕋᖅᑕᖏᑦ ᑕᔅᑎᓐ ᐸᑖᕐ

For an English version of this story, see Through Kwanzaa, Iqaluit’s black community celebrates culture

ᑭᒃᑯᑐᐃᓐᓇᑦ ᓴᓂᐊᒍᑦ ᐃᖃᓗᐃᑦ ᖃᔪᕐᑐᕐᕕᒃ ᓂᕿᑖᕐᕕᐅᑉ ᐱᓱᒃᑐᑦ ᐅᓐᓄᖓᓂ ᓇᒡᒐᔾᔭᐅᑦ, ᑎᓯᐱᕆ 29-ᖑᑎᓪᓗᒍ ᑐᓵᖃᑦᑕᓚᐅᖅᑐᒃᓴᐅᕗᑦ ᐹᓐ-ᐋᕝᕆᑲᒥᐅᑦ ᑎᑕᒍᓯᖏᓂᒃ ᑎᑕᒃᐸᓗᒃᑎᑦᓯᑎᓪᓗᒋᑦ, ᐃᓚᒋᔭᐅᓕᖅᐸᑦᓱᑎᒃ ᑖᓐᔾ’ᐋᕝᕈ ᒧᒥᖅᑎᖏᑕ ᒧᒥᑎᓪᓗᒋᑦ ᐃᓗᐊᓂ ᐃᒡᓗᕐᔪᐊᑉ.

ᖁᕕᐊᓱᒍᑎᖃᖅᑎᑕᐅᓂᖏᑦ ᐃᓚᒋᔭᐅᖃᑕᐅᓚᐅᖅᑐᑦ ᑯᕙᓐᔮ ᖁᕕᐊᓱᖃᑎᒌᒍᓯᖓᓂᒃ ᐋᖅᑭᒃᓱᐊᖑᔪᓂᑦ ᓄᓇᕗᑦ ᐳᐊᑎᑮᑦ ᐊᑐᖅᓯᒪᔭᖏᓂᒃ ᑎᒥᖁᑎᒋᔭᐅᔪᓂᑦ.

ᐊᔾᔨᒋᔭᐅᓇᓂ ᖁᕕᐊᓱᓐᓇᐅᑎᓪᓗᒍ ᐅᕝᕙᓘᓐᓃᑦ ᓴᓅᑲ ᖃᓄᐃᓕᐅᕈᓯᐅᕙᑦᑐᓂᑦ, ᑯᕙᓐᔮ ᐅᒃᐱᕐᓂᒃᑯᑦ ᓄᖅᑲᖓᑲᐃᓐᓇᕐᓇᐅᕙᖖᒋᑦᑐᖅ ᑭᓯᐊᓂᓕ, ᖁᕕᐊᓱᒍᑎᖃᕈᓯᐅᕙᑦᑐᖅ ᐱᐅᓯᑐᖃᕆᔭᖓᓐᓂᒃ.

“ᖁᕕᐊᓱᓐᓇᐅᓂᖓᓂ, ᑯᕙᔮᒥ, ᓴᓅᑲᒥ ᐊᒻᒪᓗ ᐊᓯᖏᓂᒃ ᓄᖅᑲᖓᑲᐃᓐᓇᕐᓇᐅᔪᒥ ᖁᕕᐊᓱᒍᑎᐅᕙᑦᑐᓂᒃ ᖁᕕᐊᓱᒍᑎᖃᕈᓐᓇᕐᒪᑕ ᑭᒃᑯᑐᐃᓐᓇᑦ,” ᐅᖃᖅᓱᓂ ᓱᕋᐃᐊ ᒍᕇᕝᔅ, ᖃᓄᐃᓕᐅᖅᑎᑦᓯᓂᕐᒧᑦ ᐋᖅᑭᒃᓱᐃᔨᐅᖃᑕᐅᔪᖅ.

“ᐃᓱᒪᒃᑯᑦ ᒪᑐᐃᖖᒐᑎᑦᓯᒋᐊᑐᐃᓐᓇᕐᓗᓂ ᐃᓚᒋᔭᐅᖃᑕᐅᓕᕈᓐᓇᕐᒪᑦ ᑭᓇᑐᐃᓐᓇᖅ ᖃᓄᐃᓕᐅᖅᑎᑦᓯᓂᐅᔪᓄᑦ.”

ᐊᒻᒪᓗᑦᑕᐅᖅ ᐊᔾᔨᒋᔭᐅᖖᒋᒃᑭᓪᓗᓂ ᐊᒥᓱᓄᑦ ᐊᓯᖏᓄᑦ ᓄᖅᑲᖓᑲᐃᓐᓇᕐᓂᐅᕙᑦᑐᓄᑦ ᑎᓯᐱᕆᐅᑎᓪᓗᒍ, ᑯᕙᓐᔮ ᓄᑖᐸᓘᒻᒪᑦ ᖃᓄᐃᓕᐅᕈᓯᐅᕙᓕᕐᑐᖅ, ᐱᒋᐊᖅᑎᑕᐅᓚᐅᖅᓯᒪᓪᓗᓂ ᒪᐅᓛᓇ ᑲᕆᖓᒥᑦ 1965-ᖑᑎᓪᓗᒍ, ᑕᐃᔅᓱᒪᓂ ᐋᕝᕆᑲᒥᐅᑦ-ᐊᒥᐊᕆᑲᒥᐅᑦ ᓄᓇᖅᑲᑎᒌᖏᑦ ᐱᔪᓐᓇᐅᑎᖃᕐᓂᕐᒥᓐᓄᑦ ᐱᓕᕆᓂᖃᖅᑎᓪᓗᒋᑦ, ᓴᖅᑭᑕᐅᔾᔪᑕᐅᓪᓗᓂ ᖑᔫᐅ ᓵᐸ, ᓱᕚᕼᐄᓕᑎᑐᑦ ᑐᑭᖃᖅᑐᒥᒃ 7-ᖑᔪᑦ ᑐᖖᒐᕝᕕᖁᑏᑦ.

ᑭᓕᐊᕆᔅ ᕗᐊᕐᐹᖒ (ᓴᐅᒥᐊᓂ) ᐊᒻᒪᓗ ᐅᒪᓅᓚ ᑖᓛᒡ (ᑕᓕᖅᐱᐊᓂ) ᐱᖖᒍᐊᖃᑎᒌᖃᑎᖃᖅᑎᓪᓗᒋᑦ ᐃᓚᒋᔭᐅᖃᑕᐅᔪᓄᑦ ᑖᓐᔾ’ᐋᕝᕇ ᒧᒥᖅᑎᓂ ᑯᕙᓐᔮ ᖁᕕᐊᓱᒍᑎᖃᖅᑎᑦᓯᑎᓪᓗᒋᑦ ᓇᒡᒐᔾᔭᐅᒥ, ᑎᓯᐱᕆ 29.

ᑖᒃᑯᐊ 7-ᖑᓪᓗᑎᒃ ᐊᑐᕐᓂᖃᖅᑎᑕᐅᔪᑦ ᑯᕙᓐᔮᒥ ᑐᕌᖓᑎᑕᐅᓯᒪᕗᑦ ᐃᑲᔪᕈᑎᔅᓴᐅᑎᓪᓗᑎᒃ ᐱᕈᖅᑎᑦᓯᒋᐊᕐᓂᕐᒧᑦ ᐊᒻᒪᓗ ᓴᖖᒋᒃᑎᑦᓯᒋᐊᕐᓂᕐᒧᑦ ᐃᓚᒌᓐᓂᕐᒥᒃ, ᓄᓇᖅᑲᑎᒌᓄᑦ ᐊᒻᒪᓗ ᐱᐅᓯᑐᖃᕆᔭᐅᔪᓄᑦ ᐋᕝᕆᑲᒥᐅᑦ-ᐊᒥᐊᕆᑲᒥᐅᑦ ᐃᓄᖁᑎᖏᓐᓂᑦ ᐃᓅᖃᑎᒌᑦᑐᓄᑦ, ᐊᒻᒪᓗ ᐋᕝᕆᑲᒥᐅᖑᒻᒥᔪᓄᑦ ᓯᓚᕐᔪᐊᓕᒫᒥ ᐋᕝᕆᑲᒥᐅᑦ ᓄᓇᖅᑲᑎᒌᖏᓄᑦ.

ᑕᐱᕇᓐᓂᖅ: ᑕᐱᕇᓕᕆᐊᕐᓂᖅ ᐊᒻᒪᓗ ᑲᒪᒋᔭᖃᑦᓯᐊᕐᓂᖅ ᑕᐱᕇᒃᑑᓂᖏᑕ ᐃᓚᒌᖑᔪᑦ, ᓄᓇᖅᑲᑎᒌᖑᔪᑦ, ᓄᓇᕐᔪᐊᖃᑎᒌᖑᔪᑦ ᐊᒻᒪᓗ ᐅᕕᓂᖃᖃᑎᒌᒃᑐᑦ.

ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖅ: ᓇᖕᒥᓂᖅ ᐅᕙᑦᑎᓐᓂᒃ ᓇᓗᓇᐃᔭᐃᔨᐅᔪᓐᓇᕐᓗᑕ, ᐊᑦᓰᔪᓐᓇᕐᓗᑕ ᐅᕙᑦᑎᓐᓂᒃ ᓇᖕᒥᓂᖅ, ᐱᒋᐊᖅᑎᑦᓯᔨᐅᔪᓐᓇᕐᓗᑕ ᓇᖕᒥᓂᖅ ᐊᒻᒪᓗ ᓇᖕᒥᓂᖅ ᐅᖃᓪᓚᒃᑎᒋᔭᐅᔪᓐᓇᕐᓗᑕ.

ᑕᒪᕐᒥᐅᓪᓗᑕ ᐱᓕᕆᐊᕆᔭᕗᑦ ᐊᒻᒪᓗ ᐱᓕᕆᐊᒃᓴᕆᔭᕗᑦ: ᐱᕈᖅᑎᑦᓯᔨᐅᓗᑕ ᐊᒻᒪᓗ ᑲᒪᔨᒋᔭᐅᓗᑕ ᓄᓇᖅᑲᑎᒌᖑᔪᓂᒃ ᑲᑐᔾᔨᓂᖃᕐᑑᓗᑕ ᐊᒻᒪᓗ ᐊᓯᑦᑕ ᐊᖑᑏᑦ ᐊᒻᒪᓗ ᐊᕐᓇᐃᑦ ᓈᒻᒪᖖᒋᓐᓂᖃᓕᕐᕕᐅᔪᖁᑎᖏᓂᒃ ᓇᖕᒥᓂᖅ ᑎᒍᒥᐊᖃᑎᒌᒃᑎᐅᓕᕐᓂᐊᕐᓗᑕ ᐊᒻᒪᓗ ᑲᑐᔾᔨᓗᑕ ᐋᖅᑮᓯᒪᓕᖃᑎᒌᒃᐸᓐᓂᐊᕐᓗᑕ ᑕᒪᒃᑯᓂᖓ.

ᐱᓕᕆᖃᑎᒌᓐᓂᒃᑯᑦ ᑮᓇᐅᔭᓕᐅᕋᓱᐊᕈᑎᐅᕙᑦᑐᑦ: ᐱᕈᖅᑎᑦᓯᓯᒪᔨᐅᓂᐊᕐᓗᑕ ᐊᒻᒪᓗ ᑲᒪᔨᐅᓕᕐᓂᐊᕐᓗᑕ ᓇᖕᒥᓂᖅ ᓂᐅᕕᕐᕕᖁᑎᑦᑎᓐᓂᒃ, ᓂᐅᕕᐊᒃᓴᖃᕐᕕᑦᑎᓐᓂᒃ ᐊᒻᒪᓗ ᐊᓯᖏᓂᒃ ᐱᓕᕆᕝᕕᐅᔪᓂᒃ ᐊᒻᒪᓗ ᑮᓇᐅᔾᔭᒃᓴᕝᕕᒋᓕᕐᓂᐊᕐᓗᑎᒍ ᑕᒪᑦᑕᐅᓗᑕ.

ᐱᔾᔪᑎᐅᔪᖅ: ᑕᒪᑦᑕᐅᓪᓗᑕ ᐱᓕᕆᐊᒃᓴᖃᓕᖅᑎᑕᐅᓗᑕ ᐱᕈᖅᑎᑦᓯᓯᒪᓕᕆᐊᒥᒃ ᐊᒻᒪᓗ ᐋᖅᑭᒃᓱᐃᓯᒪᓕᕆᐊᒥᒃ ᓄᓇᖅᑲᑎᒌᑦᑐᖁᑎᑦᑎᓐᓂᒃ ᐅᑎᖅᑎᑕᐅᓯᒪᓕᖁᓪᓗᒋᑦ ᐃᓄᖁᑎᑦᑕ ᐃᓕᖅᑯᓯᑐᖃᒥᒃᑎᒍᑦ ᓴᖖᒋᓂᕆᔭᑐᖃᕆᔭᖏᓐᓄᑦ.

ᓴᓇᔨᐅᔪᓐᓇᕐᓂᖅ: ᐱᔪᓐᓇᕐᓂᓕᒫᑦᑎᒍᑦ ᐅᕙᑦᑎᓐᓂᒃ ᐱᓕᕆᐊᖃᖅᑎᐅᒋᐊᖅᐸᓪᓗᑕ, ᖃᓄᑐᐃᓐᓇᖅ, ᓄᓇᖅᑲᑎᒌᖑᔪᖁᑎᕗᑦ ᑕᑯᕋᓐᓂᖅᑑᑎᑕᐅᖁᓪᓗᒋᑦ ᐊᒻᒪᓗ ᐃᑲᔪᕐᓂᖃᕈᓐᓇᓕᖅᑎᑕᐅᓗᑎᒃ ᑎᒍᓯᓯᒪᓕᓚᐅᕐᕕᑦᑎᓐᓂᑦ ᖃᓄᐃᓚᐅᕐᓂᖓᓂᑦ ᓯᕗᒻᒧᒋᐊᖅᑎᑕᐅᓯᒪᓕᕐᓗᑎᒃ.

ᐅᒃᐱᕐᓂᖅ: ᐆᒻᒪᑎᑦᑎᓐᓂ ᐊᖏᔪᐊᓗᒻᒪᕆᒻᒥᒃ ᐅᒃᐱᕆᓗᑎᒍ ᐃᓄᖁᑎᒋᔭᕗᑦ, ᐊᖓᔪᖅᑳᕆᔭᕗᑦ, ᐃᓕᓴᐃᔨᒋᔭᕗᑦ, ᓯᕗᓕᖅᑎᒋᔭᕗᑦ ᐊᒻᒪᓗ ᒪᑭᑕᑦᓯᐊᖅᑑᓂᖏᓂᒃ ᐊᒻᒪᓗ ᓵᓚᒋᓯᒪᓕᕐᓗᒋᑦ ᐊᒃᓱᕈᕐᓇᖅᑐᒃᑰᕈᑎᒋᓯᒪᔭᕗᑦ.

ᐅᑭᐅᑕᒫᑦ ᑯᕙᓐᔮ ᖁᕕᐊᓱᒍᑎᖃᕐᕕᐅᕙᑦᑐᖅ 7-ᓂᒃ ᐅᓐᓄᓐᓄᑦ, ᑎᓯᐱᕆ 26-ᒥᑦ ᔮᓄᐊᕆ 1-ᒧᑦ, ᓄᑖᒥᒃ ᓇᑉᐸᖅᑕᒥᒃ ᐃᑭᑎᓯᕙᓐᓂᒃᑯᑦ, ᐊᑐᓂᓗ ᐱᔾᔪᑎᖃᕈᑎᐅᕙᑦᑐᓄᑦ ᐃᓚᖓᓐᓂᒃ ᖑᔫᐅ ᓵᐸ, ᐃᑭᑎᑕᐅᕙᑦᑎᓪᓗᒋᑦ ᐊᑐᓂ ᐅᓐᓄᒻᒥ ᑭᓈᕋ, ᓱᕚᕼᐄᓕ ᓇᑉᐸᖅᑕᖁᑎᖃᕐᕕᖓᓐᓂ.

ᐃᖃᓗᓐᓂ, ᐱᖓᓱᓄᑦ (3) ᐅᓐᓄᓐᓄᑦ ᑭᒃᑯᑐᐃᓐᓇᐃᑦ ᖁᕕᐊᓱᒍᑎᖃᖅᑎᑕᐅᕙᑦᑐᑦ, ᑕᑯᓐᓇᖅᑎᑕᐅᓪᓗᑎᒃ ᑯᕙᓐᔮ ᐅᓂᒃᑳᓕᐊᖑᓯᒪᔪᓂᒃ ᑕᑯᓐᓇᒐᔅᓴᓂᒃ ᑕᐃᔭᐃᓪᓗᑎᒃ “ᕿᕐᓂᖅᑕᖅ ᓇᑉᐸᕐᑕᖅ,” ᐅᓐᓄᖓᓂ ᐅᓂᒃᑳᖅᑐᐊᖅᐸᑦᑐᑦ ᐊᒻᒪᓗ ᑭᖑᓪᓕᕐᒥ ᐅᓐᓄᖓᓂ, ᓂᕆᕕᒡᔪᐊᖅᑎᑦᓯᕙᑦᑐᑦ ᐃᓚᖃᖅᑎᓪᓗᒋᑦ ᐱᐅᓯᑐᖃᒥᓐᓂ ᐋᕝᕆᑲᒥᐅᑦ ᐊᒻᒪᓗ ᐋᕝᕉ-ᑲᕆᐱᐊᓐ ᓂᕿᓕᐊᕆᕙᑦᑕᖏᓂᒃ ᓲᕐᓗ ᑰᕆᓕᖅᓯᒪᔪᑦ ᒎᑦ ᓂᕿᖏᑦ ᐊᒻᒪᓗ ᐋᒃᑎᐊᓪ.

ᐊᐱᕆᔭᐅᒐᒥ ᐊᔾᔨᒋᔭᐅᖖᒋᑦᑐᓂᒃ ᐱᔭᕆᑐᔫᓪᓗᑎᒃ ᐱᔭᒃᓴᖅᑕᖃᖅᐸᒻᒪᖔᑦ ᖁᕕᐊᓱᒍᑎᖃᖅᑎᓪᓗᒋᑦ ᑯᕙᓐᔮ ᐅᑭᐅᖅᑕᖅᑐᒥ, ᒍᕇᕝᔅ ᐃᒡᓚᓯᓪᓗᓂ ᑭᐅᓚᐅᕐᑐᖅ, “ᑕᒪᕐᒥᒃ ᐊᓂᓕᖅᐸᒃᑦ ᖁᕕᐊᓱᓐᓇᖖᒍᕌᖓᑦ!”

ᒍᕇᕝᔅ ᑖᔅᓱᒥᖓ ᐃᓱᒪᒋᔭᖃᕐᐳᖅ, ᐊᖏᓂᖅᐸᐅᓪᓗᓂ ᐱᔭᕆᑐᓂᕆᕙᒻᒪᒍ ᖃᐅᔨᒪᓕᕆᐊᒥᒃ ᑭᒃᑯᑦ ᑕᒫᓃᒻᒪᖔᑕ ᐊᒻᒪᓗ ᑭᒃᑯᑦ ᖁᕕᐊᓱᒍᑎᖃᖅᑎᑦᓯᓂᐅᔪᒧᑦ ᐅᐸᒍᑎᔪᓐᓇᕐᓂᐊᕐᒪᖔᑕ ᑐᓴᐅᒪᓕᕋᓱᒋᐊᕐᓗᓂ.

ᐅᖃᖅᓱᓂᓗ ᐃᓱᒪᔾᔪᓯᐅᓕᕐᑐᖅ ᑯᕙᓐᔮᒧᑦ ᓄᑖᐸᓘᒻᒪᑦ ᓱᓕ, ᑕᐃᒪᓐᓇᐃᒃᑭᓪᓗᓂ ᐋᕝᕆᑲᒦᑦᑐᓄᑦ, ᑕᐃᒪᓕ ᖁᕕᐊᓱᒍᑎᖃᖅᑎᑦᓯᓂᕐᒥᓂ ᐃᓕᓐᓂᐊᖅᑎᑦᓯᔪᓐᓇᓕᖅᐸᒃᑲᒥ ᐱᔾᔪᑎᖃᕐᓂᐅᔪᓄᑦ ᖁᕕᐊᓱᒍᑎᒋᔭᐅᕙᓐᓂᖓᓄᑦ ᐊᒻᒪᓗ ᐊᒥᖅᑲᖃᑎᒌᓐᓂᐅᕙᑦᑐᓄᑦ ᓄᓇᖅᑲᑎᒌᖑᔪᓂ.

ᒍᕇᕝᔅ ᐅᖃᓚᐅᕐᒥᔪᖅ ᑐᑭᓯᓂᕐᓗᒍᑕᐅᕙᒻᒥᒻᒪᑦ ᑯᕙᓐᔮ ᑐᕌᖓᑎᑕᐅᓇᓱᒋᔭᐅᓪᓗᓂ ᑕᐃᒃᑯᓄᖓ ᐋᕝᕆᑲᒥᐅᓄᑦ ᑭᓯᐊᓂ.

“ᐅᖃᓕᒫᓚᐅᕈᕕᒃᑭᑦ ᑐᖖᒐᕝᕕᖁᑎᐅᔪᓂ ᐅᖃᖅᑕᐅᓯᒪᓂᖏᑦ, ᑐᑭᓯᐅᒪᓕᕋᕕᑦ ᑕᒪᒃᑯᐊ ᑐᕌᖓᑎᑕᐅᓯᒪᓂᖏᑕ ᑭᒃᑯᑐᐃᓐᓇᓄᑦ ᐊᒻᒪᓗ ᓇᖕᒥᓂᖅ ᐊᑐᓕᖅᑎᑕᐅᔪᓐᓇᕐᓂᖏᓄᑦ ᐃᓅᓯᕐᒥᓐᓂ, ᐱᐅᓯᒋᐊᖅᑎᑦᓯᒋᐊᕐᓂᕐᒧᑦ ᐃᓅᓯᕐᒥᓐᓂᒃ ᐊᒻᒪᓗ ᓄᓇᖅᑲᑎᒌᖑᔪᓄᑦ ᐊᕙᑎᒥᓐᓃᑦᑐᓄᑦ.”

Share This Story

(0) Comments