ᑲᑎᒪᔩᑦ ᖃᓄᐃᓕᐅᕈᓐᓇᕐᓂᐊᕋᓱᒋᔪᑦ ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔨᐅᓂᕐᒧᑦ ᐊᖏᖅᑎᑕᐅᑎᓪᓗᒋᑦ

For the English version of this story, please see Members express optimism as new Iqaluit city council sworn in.

ᐅᒃᑑᐱᕆ 23ᒥ ᓄᓇᓕᖕᓄ ᓂᕈᐊᕐᓇᒥ ᐃᖃᓗᐃᑦ ᑲᑎᒪᔨᑖᕆᓵᖅᑕᖏᑦ ᐊᖏᖅᑎᑕᐅᓚᐅᖅᑐᑦ ᐃᖅᑲᖅᑐᐃᕕᖕᒥ ᓄᕕᐱᕆ 2ᒥ.

“ᖁᕕᐊᓱᒻᒪᕆᒃᑐᖓ ᑭᒡᒐᖅᑐᐃᔨᐅᓂᐊᕋᒪ ᑲᑎᒪᔨᓄᑦ,” ᐅᖃᕐᑐᖅ ᔮᒃ ᐊᓇᕈᐊᖅ, ᐱᖓᔪᒋᔭᐅᔪᖅ ᓄᑖᓂ ᑲᑎᒪᔨᒧᑦ ᓂᕈᐊᖅᑕᐅᔪᓂᒃ 8ᖑᑎᓪᓗᒋᑦ ᑲᑎᒪᔩᑦ ᐅᑯᐊ ᐃᓚᐅᓪᓗᑎᒃ ᕼᐃᐅᕆ ᕕᓕᐅᕋᑎ ᐊᒻᒪ ᒥᑐᓴᓕ ᑯᓄᒃ.

ᓂᕈᐊᖅᑕᐅᓚᐅᖅᑐᑦ ᐅᑯᓇᙵᑦ ᑲᑎᒪᔨᐅᓚᐅᕐᑐᓂᒃ ᐃᓂᒋᔭᐅᓂᑯᓄᑦ ᐹᓪ ᖁᐊᓴ ᐊᒻᒪ ᐅᑲᓕᖅ ᑰᓕ, ᓂᕈᐊᒐᒃᓴᐅᒃᑲᓐᓂᓚᐅᙱᓪᖢᑎᒃ ᐊᒻᒪ ᓱᕙᓂ ᐊᒪᕋᐸᓚ ᑖᓐᓇᓕ ᓂᕈᐊᖅᑕᐅᓚᐅᙱᑦᑐᖅ.

ᐅᑯᐊ ᑲᑎᒪᔨᑦ ᓂᕈᐊᖅᑕᐅᒃᑲᓐᓂᓚᐅᕐᑐᑦ ᑭᒻᐳᓕ ᓯᒥᑦ, ᑲᐃᐅᓪ ᓴᐳᑦ, ᕈᒦᓐ ᓯᑏᕙᓐᓴᓐ, ᓵᒻ ᑕᓕ ᐊᒻᒪ ᓴᐃᒪᓐ ᓇᑖᖅ.

ᑯᓄᒃ ᓄᓇᕗᑦ ᒐᕙᒪᒃᑯᓐᓂ ᐃᖅᑲᓇᐃᔭᕐᓂᑯᑦ ᒥᓂᔅᑕᐅᑉ ᑐᒡᓕᖓᑕ ᐃᑲᔪᖅᑎᒋᓪᓗᓂᐅᒃ ᐱᕙᓪᓕᐊᔪᓕᕆᔨᒃᑯᓐᓄᑦ ᐊᒻᒪ ᐃᖏᕐᕋᔾᔪᑎᓕᕆᔨᒃᑯᓐᓄᑦ. ᐊᖓᔪᖅᑳᒧᑦ ᑐᒡᓕᕆᔭᐅᓚᐅᕐᓯᒪᒋᓪᓗᓂ ᕿᑭᖅᑖᓗᒃᒥᑦ ᐃᖃᓗᓕᕆᔨᒃᑯᓐᓄᑦ.

ᕕᓕᐅᕋᑎ ᐊᖓᔪᖅᑳᖅ ᕿᑭᖅᑖᓗᒃ ᑯᐊᐳᕇᓴᓐᑯᓐᓄᑦ ᐊᒻᒪᓗ ᐊᓇᕈᐊᖅ ᓕᐳᕈᑯᓐᓄᑦ ᒪᓕᒐᓕᕆᔨᐅᓂᑯ ᓄᓇᕗᒥᑦ ᑭᒡᒐᖅᑐᐃᓪᓗᓂ 1988-ᒥ 1997-ᒧ ᓄᓇᑦᓯᐊᖑᑎᓪᓗᒍ. ᐊᓇᕈᐊᖅ ᓄᓇᕗᒧᑦ ᒪᓕᒐᓕᐅᖅᑎᐅᓂᑯ 1999-ᒥ 2004-ᒧ ᐊᒻᒪᓗ ᒪᐃᔭᐅᓚᐅᕐᓯᒪᓪᓗᓂ ᑲᖏᖅᖠᓂᖅᒥ.

“ᐅᕙᓐᓄ ᖁᕕᐊᓇᕈᓘᔭᕐᑐᖅ ᐃᓚᒋᔭᐅᓂᐊᕐᓗᓂ ᐊᓯᙳᖅᑎᑦᑎᓇᓱᒃᑐᓂᒃ ᐃᖃᓗᖕᓂ,” ᐊᓇᕈᐊᖅ ᐅᖃᕐᑐᖅ.

ᐅᖃᓚᐅᕐᑐᖅ ᐃᓚᖃᕐᓂᖓᓂᒃ ᓄᓇ ᐋᖅᑭᒃᓱᕆᐊᖃᕐᓂᖓᓂᒃ, ᐃᒡᓗᐃᑦ ᐊᒥᒐᓗᐊᕐᓂᖏᓐᓂᒃ ᐊᒻᒪᓗ ᐊᑭᑐᓂᐊᓗᒃ ᐃᓗᕕᕐᓯᓇᓱᒃᖢᓂ.

ᐊᓇᕈᐊᖅ ᐅᖃᓚᐅᕐᒥᔪᖅ ᑲᑎᒪᔩᑦ ᖃᓄᐃᓕᖓᓂᖏᓐᓂᒃ ᐅᖃᖅᖢᓂ ᐃᓄᐃᑦ ᐃᖃᓗᖕᓂ ᑭᒡᒐᖅᑐᖅᑕᐅᓂᕐᓴᐅᓂᐊᓕᕐᓂᖏᓐᓂᒃ.

“ᐊᑯᓂᐊᓗᒃ ᐃᓄᐃᑦ ᑭᒡᒐᖅᑐᖅᑕᐅᓯᒪᙱᒻᒪᑕ ᑲᑎᒪᔨᓂᒃ,” ᐅᖃᖅᑐᖅ.

ᑲᑎᒪᔨᐅᓂᕐᒧᑦ ᓂᕈᐊᖅᑕᐅᒃᑲᓐᓂᖅᑐᖅ ᑲᐃᐅᓪ ᓴᐳᑦ ᐅᖃᓚᐅᕐᑐᖅ “ᓂᕆᐅᑦᑎᐊᕐᓂᕋᖅᖢᓂ ᐊᒻᒪ ᖁᕕᐊᓱᒃᖢᓂ ᐱᓕᕆᒃᑲᓐᓂᕐᓂᐊᓕᕐᓂᖏᓐᓂᒃ.”

“ᐊᔾᔨᒌᙱᑦᑐᓂᒃ ᐃᓕᖅᑯᓯᖃᑎᒌᙱᑦᑐᓂᙶᕋᑦᑕ, ᐊᔾᔨᒌᙱᑦᑐᓂᒃ ᐊᔪᙱᓐᓂᖃᖅᖢᑕ ᐊᒻᒪ ᐱᓕᕆᐊᖃᓕᒪᓪᓗᑕ,” ᐅᖃᐅᓯᖃᖅᖢᓂ ᓄᑖᓂ ᑲᑎᒪᔨᐅᓕᖅᑐᓂᒃ.

ᐅᖃᐅᓯᖃᓚᐅᕐᑐᖅ ᐊᓇᕈᐊᖅ ᒪᓕᒐᓕᐅᖅᑎᐅᓯᒪᓂᑰᓂᖓᓄᑦ ᐊᒻᒪ ᕕᓕᐅᕋᑎᐅᑉ ᓇᖕᒥᓂᖅ ᐱᓕᕆᐊᖃᕐᓂᕐᒧᑦ ᖃᐅᔨᒪᔭᖏᓐᓂᒃ.

ᐊᖏᔪᕈᓗᖕᒥ ᐃᒥᖅᑕᕐᕕᓕᕆᓂᐅᔪᖅ ᐱᓕᕆᐊᖑᑎᓪᓗᒋ ᐊᒻᒪᓗ ᐃᒪᕐᒧᑦ ᐊᑭᓕᐅᑎᒃᓴᑦ ᐱᓕᕆᐊᖑᑎᓪᓗᒋ ᑕᐃᒪᓕ ᐱᓕᕆᐊᒃᓴᖃᒻᒪᕆᖕᓂᐊᖅᑐᑦ ᓄᑖᑦ ᑲᑎᒪᔨᙳᖅᑐᑦ, ᓴᐳᑦ ᐅᖃᕐᑐᖅ.

“ᑕᒪᓐᓇ ᐊᒃᓱᕈᕈᓘᔭᕐᓇᕐᓂᐊᖅᑐᖅ ᑕᒪᐃᓐᓄᑦ,” ᐅᖃᖅᖢᓂ. “ᓯᕗᓪᓕᖅᐹᒥ ᑲᑎᒪᓂᐊᖅᓂᒃᓴᖏᓐᓂᒃ ᓄᕕᐱᕆ 14ᒥ ᐊᕐᕌᒍ ᐃᓱᓕᖕᓇᓱᖕᓂᖓᓂᒃ ᐋᖅᑭᒃᓱᐃᓂᐊᕋᑦᑕ ᐊᐅᓚᑦᑎᔾᔪᑎᒃᓴᓂᒃ ᐊᒻᒪᓗ ᖃᓄᐃᓕᐅᕈᑎᒃᓴᓂᒃ ᐊᕐᕌᒍᒥ.”

ᖃᐅᔨᓴᕐᓂᐊᕐᓗᒋ ᐊᑯᓂᕈᓗᒃ ᐱᓕᕆᐊᖑᔭᕆᐊᓖᑦ ᓴᐳᑦ ᐅᖃᓚᐅᕐᑐᖅ ᐃᑲᔪᕋᔭᕐᓂᖓᓂᒃ ᑖᒃᑯᐊ ᑲᑎᒪᔨᐅᖏᓐᓇᖅᐸᑕ ᐊᕐᕌᒍᓂ ᑎᓴᒪᓂᒃ, ᐅᖃᕆᓪᓗᓂ ᑭᖑᓪᓖᑦ ᑲᑎᒪᔩᑦ ᐊᓯᔾᔨᑲᑕᒻᒪᕆᓚᐅᕐᓂᖏᓐᓂᒃ ᐃᓚᐅᔪᓐᓃᕐᓯᒪᓂᕐᒧᑦ ᐃᓱᓕᓚᐅᙱᓐᓂᖏᓐᓂᒃ ᑲᑎᒪᔨᐅᓂᒃᓴᖏᑦ.

ᐃᖃᓗᐃᑦ ᓄᓇᓕᐸᐅᔭᖓᓄᑦ ᑲᑎᒪᔨᓂᒃ ᓂᕈᐊᖅᑕᐅᔪᕕᓂᕐᓂᒃ 2019ᒥ, ᑕᓪᓕᒪᑦ ᑲᑎᒪᔩᑦ – ᒪᐃᔭ ᑭᐊᓂ ᐱᐊᓪ ᐊᒻᒪ ᑲᑎᒪᔩᑦ ᔪᐊᓇᓯ ᐊᑯᒪᓕᒃ, ᔮᓇᑦ ᐱᑦᓯᐅᓛᖅ ᐳᕉᔅᑐ, ᓰᓚ ᕕᓕᐅᕋᑎ ᐊᒻᒪ ᒪᓚᐃᔭ ᓘᖓᓯ – ᐃᓱᓕᑦᑎᓚᐅᙱᒻᒪᑕ ᑲᑎᒪᔨᐅᕝᕕᖏᓐᓂᒃ.

ᑲᑎᒪᔨᐅᖃᑕᐅᓂᑯ ᔮᓐ ᕚᓴᑦ ᑲᑎᒪᔨᓄᑦ ᓂᕈᐊᖅᑕᐅᓚᐅᕐᓯᒪᖕᒪᑦ ᐃᓇᖏᕐᓯᓪᓗᓂ ᑲᑎᒪᔨᒥ ᐃᓱᓕᑦᑎᓯᒪᙱᑦᑐᒥ ᓄᖅᑲᕐᓂᑯᒥᒃ.