ᑲᑎᕕᒃ ᓄᓇᓕᓕᒫᑦ ᒐᕙᒪᖓ (KRG) ᐅᖃᓚᐅᕐᑐᑦ ᐋᖅᑭᒃᑲᓐᓂᖅᐸᓪᓕᐊᓂᖅ ᑕᖅᑭᒐᓴᖕᓂ ᐱᓕᕆᐊᕆᔭᐅᑐᐃᓐᓇᕆᐊᓕᒃ

For English version, see KRG says recovery from security breach may take months

ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦ ᓱᓕ ᐋᖅᑭᒃᑲᓐᓂᖅᐸᓪᓕᐊᔪᑦ ᓴᐳᔾᔭᐅᓯᒪᔾᔪᑎᖏ ᐱᕋᔭᒃᑕᐅᓚᐅᕐᓯᒪᓂᖓᓄᑦ ᐊᒻᒪ ᖃᒥᑎᑦᑎᔾᔪᑎᒋᔭᐅᓪᓗᓂ ᑐᓴᐅᒪᔾᔪᑎᓕᕆᔾᔪᑎᖏ ᔫᓂ ᐃᓱᓕᓕᕐᑎᓪᓗᒍ.

ᑕᒪᐃᓐᓂ ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦ ᐊᒻᒪᓗ ᑯᐸᐃᒃ ᐸᓖᓯᖏᑦ ᖃᐅᔨᓴᖅᑐᐃᑦ ᐱᕋᔭᒍᑎᕕᓂᕐᒥᒃ. ᐸᓖᓯᓄᑦ ᐅᖃᕐᑎᒋᔭᐅᔪᖅ ᐅᖃᒃᑲᓐᓂᕈᒪᓚᐅᙱᒻᒪᑦ ᐱᓇᓱᐊᕈᓯᐅᓚᐅᕐᑐᒥᑦ ᐅᖃᖅᖢᓂ ᓱᓕ ᖃᐅᔨᓴᓂᕋᐃᓪᓗᓂ.

ᑭᓱᒧᑦ ᐊᒃᑐᖅᑕᐅᓂᑰᖓᒫᑦ ᐱᓕᕆᔾᔪᑎ ᓱᓕ ᖃᐅᔨᔭᐅᓚᐅᙱᑦᑐᖅ ᐅᓇᓗ ᓄᓇᖃᖅᑐᐃᑦ ᒥᒃᓵᓅᖓᔪᑦ ᐊᒃᑐᖅᑕᐅᓚᐅᕐᒪᖔᑕ.

ᐃᖅᑲᓇᐃᔭᖅᑎᐅᔪᑦ ᐅᔾᔨᕈᓱᓕᓚᐅᕐᑐᑦ ᖃᓄᐃᓕᐅᕈᑎᐅᔪᓂᒃ ᔫᓂ 25ᒥ ᐊᑐᖅᑕᐅᕙᙱᑦᑐᒥᒃ ᖃᐅᔨᓴᖅᑕᐅᑎᓪᓗᒍ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂᒃ ᖃᕋᓴᐅᔭᕐᓄᑦ ᐊᑦᑕᑕᐅᑎᓂᒃ, ᐅᖃᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᑐᑭᒧᐊᖅᑎᑦᑎᔨᖓ ᐹᓪ ᐹᓴᓐᔅ ᐊᐱᕐᓱᖅᑕᐅᑎᓪᓗᒍ ᔪᓚᐃ 4ᒥ.

“ᕿᒥᕐᕈᐊᖅᑕᐅᓕᕋᒥ ᖃᐅᔨᓕᓚᐅᕐᑐᑦ ᓯᓚᐃᓐᓇᒃᑯᑦ ᑕᐃᒪᐃᑎᑕᐅᓂᖓᓂᒃ,” ᐅᖃᕐᑐᖅ.

ᑕᒪᐃᓐᓂ ᐊᐅᓚᑦᑎᔨᐅᓂᕐᒥ ᐃᖅᑲᓇᐃᔭᖅᑐᑦ ᑎᑎᕋᕐᕕᒃᒧᐊᖅᑎᑕᐅᓚᐅᖅᖢᑎᒃ ᓈᑦᑏᖑᔭᒥ, ᐃᓱᒪᓕᐅᓕᓚᐅᕐᑐᑦ ᖃᒥᑕᐅᔪᒪᓕᖅᖢᓂ ᑕᒪᐃᓐᓂᓕᒫᖅ ᐃᖅᑲᓇᐃᔭᕐᕕᐅᑉ ᖃᕋᓴᐅᔭᒃᑯᑦ ᐊᑦᑕᑕᕈᓐᓇᐅᑎᖏᓐᓂᒃ. ᐅᓇ ᑕᐃᒪᐃᑦᑐᓐᓇᕐᑐᖅ ᑭᓯᐊᓂ ᐊᑐᐃᓐᓇᕐᓯᒪᙱᑦᑐᓄᑦ.

ᐅᑯᐊ ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᐱᓕᕆᐊᖃᕐᓂᖏᓐᓂᒃ ᖁᒻᒧᒃᑎᑕᐅᓯᒪᔪᒃᑯᑦ ᐊᑦᑕᑕᕈᓐᓇᐅᑎᓂᒃ, “ᑕᐃᒪᓕ ᑕᒪᓐᓇ ᐅᕙᑦᑎᓐᓂᒃ ᐊᑦᑕᑕᕈᓐᓃᖅᑎᑦᑐᓐᓇᕋᑦᑎᒍᑦ,” ᐅᖃᕐᑐᖅ ᐹᓴᓐᔅ.

ᐅᑯᐊ ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᐊᑦᑕᑕᕐᓯᒪᓚᐅᕐᐸᑕ ᕙᐃᐳ ᐋᑉᑎᒃ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᒧᑦ ᑕᐃᒪᓗ ᑕᐃᒪᐃᑦᑐᓐᓇᕋᔭᓚᐅᙱᑦᑐᑦ ᐅᖃᕐᑐᖅ. ᖃᓄᐃᓕᐅᕈᑎᐅᔭᕆᐊᓖᑦ ᓈᒻᒪᙱᓕᐅᕈᑎᖃᓕᔭᒻᒪᑕ ᐊᒻᒪᓗ ᑕᒪᓐᓇ ᐊᒃᑐᐃᓯᒪᓕᖅᖢᓂ ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᖃᕋᓴᐅᔭᓄᑦ ᐊᑦᑕᑕᕈᓐᓇᐅᑎᖓᓂᒃ, ᐅᖃᕐᑐᖅ.

ᐱᓇᓱᐊᕈᓯᓕᒫᖅ ᐃᖅᑲᓇᐃᔭᕐᕖᑦ ᐅᖄᓚᐅᑎᖏᑦ ᐊᒻᒪ ᑎᑎᕋᕈᓐᓇᐅᑎᖏᑦ ᖃᒥᓯᒪᓚᐅᕐᑐᑦ ᐊᒻᒪᓗ ᑐᓴᐅᒪᖃᑦᑕᐅᑎᔪᓐᓃᖅᖢᑎᒃ 14 ᓄᓇᓖᑦ ᓄᓇᕕᒃᒥ.

“ᐋᖅᑭᒃᐸᓪᓕᐊᓂᒃᑰᓕᕋᑦᑕ,” ᐅᖃᕐᑐᖅ ᐹᓴᓐᔅ.

“ᖃᐅᔨᓇᓱᒃᑐᒍᑦ ᖃᓄᐃᓕᓂᑰᔭᕆᐊᒃᓴᖓᓂᒃ, ᖃᓄᐃᓕᐅᕈᑎᐅᓂᑰᖕᒪᖔᓪᓗ ᐊᒻᒪᓗ ᖃᓄᖅ ᓄᖃᖅᑎᑦᑐᓐᓇᕐᒪᖔᑦ.”

ᒫᓐᓇᓂ ᐋᖅᑭᒃᐸᓪᓕᐊᓇᓱᒃᑐᑦ, ᐅᖃᕐᑐᖅ. ᑭᖑᓂᐊᒍᑦ ᐅᑯᐊ ᑲᑎᕕᒃ ᓄᓇᓕᓕᒫᑦ ᒐᕙᒪᖓ ᖃᐅᔨᓇᓱᖕᓂᐊᖅᑐᑦ ᑭᓱᒧᑦ ᐱᕋᔭᒃᑕᐅᓯᒪᓂᑰᖕᒪᖔᑕ. ᒫᓐᓇᓕ ᖃᐅᔨᒪᙱᑦᑐᑦ ᑭᓱᒧᑦ ᑕᐃᒪᐃᒻᒪᖔᑦ.

ᐹᓴᓐᔅ ᐅᖃᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᒐᕙᒪᖓᑦ ᐅᖃᕈᓐᓇᓚᐅᕐᑐᑦ ᑲᑐᔾᔨᖃᑎᒌᑦ ᑖᒃᑯᓄᖓ ᐊᒃᑐᖅᑕᐅᓚᐅᙱᓐᓂᖏᓐᓂᒃ. ᐅᑯᓂᖓ ᐃᓚᖃᓚᐅᕐᑐᑦ ᓄᓇᕕᒃᒥ ᐸᓖᓯᓕᕆᔨᒃᑯᑦ, ᖃᖓᑕᓲᓕᕆᔩᑦ, ᖃᕋᓴᐅᔭᖃᖅᑎᑦᑎᔩᑦ ᑖᒫᓂ ᐊᒻᒪ ᐃᒪᓕᕆᔨᖏᑦ.

ᑕᒪᕐᒥ ᐃᖅᑲᓇᐃᔭᖅᑏᑦ ᖃᕋᓴᐅᔭᒃᑯᑦ ᑐᕌᕈᑎᖏ ᐊᓯᔾᔨᖅᑕᐅᓚᐅᕐᑐᑦ ᐊᒻᒪᓗ ᑐᓴᐅᒪᔾᔪᑎᓕᕆᓂᖅ ᐱᓕᕆᐊᕆᔭᐅᑦᑎᐊᕐᓂᐊᖅᖢᓂ ᐃᑲᔪᖅᑕᐅᓗᑎᒃ ᓯᓚᐃᓐᓇᒃᑯᑦ ᓴᐳᓐᓂᐊᖅᑎᓄᑦ.

“ᐅᓇ ᐱᓕᕆᐊᖑᔾᔮᙱᑦᑐᖅ ᐱᓇᓱᐊᕈᓯᕐᓂ ᐅᓄᙱᑦᑐᓂᒃ,” ᐹᓴᓐᔅ ᐅᖃᕐᑐᖅ. “ᑕᖅᑭᒐᓴᖕᓂ ᐱᓕᕆᐊᖑᑐᐃᓐᓇᕆᐊᓕᒃ, ᐅᓄᒻᒪᕆᒃᑐᓂᒃ. ᑕᐃᒪᓕ ᑕᒪᓐᓇ ᖃᖁᒍᑲᓐᓂᖅ ᐊᓂᒍᕐᓂᐊᖅᑑᒐᓗᐊᖅ.”