ᑲᑎᙵᓂᐅᔪᑦ ᓴᖅᑭᑎᑦᑎᕗᑦ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᑐᖅᑯᖅᑕᐅᓂᖓᓂ ᖃᐅᔨᓴᕐᓂᕐᒧᑦ ᑯᐸᐃᖕᒥ ᐊᓯᐅᖅᑲᔪᓂ ᐊᒻᒪ ᐃᓄᐊᖅᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ ᖃᓄᐃᓐᓂᐅᔪᓂ
ᐱᓕᕆᖃᑎᖃᖅᑐᒥ ᓄᓇᙳᐊᖑᔪᖅ ᐃᓚᖃᕐᓂᐊᖅᐳᖅ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᐊᒻᒪ ᓇᖕᒥᓂᖅ ᐊᑐᖅᑕᐅᓂᑯᓂ
ᓴᐅᒥᖕᒥ, ᑯᐸᐃᖕᒥ ᐊᓪᓚᓄᑦ ᐊᕐᓇᓄᑦ ᐊᖓᔪᖅᑳᖓ ᒫᔾᔪᓚᐃᓐ ᐃᑎᐊᓐ, ᐃᔅᑭᐅ ᐱᓕᕆᐊᒃᓴᒧᑦ ᐱᓕᕆᔨᐅᔪᖅ ᔮᓂᔅ ᖃᕙᕙᐅᖅ−ᐱᐳ ᐊᒻᒪ ᓯᓚᑦᑐᖅᓴᕐᕕᒡᔪᐊᖅ ᐆᑐᐅᐊᐃᒥ ᐃᓕᓴᐃᔨᐅᔪᖅ ᐋᑐᕆ ᕉᓲ ᐅᖃᐅᓯᖃᓚᐅᖅᐳᑦ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᑐᖅᑯᖅᑕᐅᓂᖓᓂ Cabot Square−ᒥ ᒪᐃ 5−ᒥ. (ᓴᑐᕆᒃ ᒐᓛᓐᑦ ᐊᔾᔨᖁᑎᖓ)
For the English version of this story, see Group creating database to track Quebec’s MMIWG cases.
ᐱᓕᕆᖃᑎᖃᖅᑐᒥ ᓄᓇᙳᐊᖑᔪᖅ ᖃᐅᔨᓴᖅᑐᒥ ᖃᓄᐃᓐᓂᐅᔪᓂ ᐊᓯᐅᖅᑲᔪᓂ ᐊᒻᒪ ᐃᓄᐊᖅᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᓂᕕᐊᖅᓵᓄᓪᓗ ᑯᐸᐃᓕᒫᒥ ᕿᓚᒻᒥᐅᔪᒥ ᑎᑭᓐᓂᐊᖅᐳᖅ ᑲᓇᑕᒥ ᐊᕕᒃᑐᖅᓯᒪᓂᐅᔪᒧᑦ.
ᑯᐸᐃᖕᒥ ᐊᓪᓚᓄᑦ ᐊᕐᓇᓄᑦ, ᓯᓚᑦᑐᖅᓴᕐᕕᒡᔪᐊᖅ ᐆᑐᐅᐊᐃᒥ ᐊᒻᒪ ᐃᔅᑭᐅ ᐱᓕᕆᐊᒃᓴᐅᔪᖅ ᐅᖃᐅᓯᖃᓪᓚᕆᒃᐳᖅ ᐱᓕᕆᖃᑎᒌᖕᓂᖏᓐᓂ ᒪᐃ 5−ᒥ ᐅᕙᓂ ᐊᐅᐸᖅᑐᒥ ᐊᕐᓇᙴᔾᔪᑎᒥᒃ ᐅᓪᓗᖓᓂ ᖃᓄᐃᓐᓂᐅᔪᒥ ᑕᐃᑲᓂ Cabot Square−ᒥ.
ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᑐᖅᑯᖅᑕᐅᓂᖓᓂ ᐃᓚᖃᕐᓂᐊᖅᐳᖅ ᑭᓪᓕᓯᓂᐊᖅᑕᐅᓂᑯᓂ ᑐᓴᒐᒃᓴᓂ ᐊᒻᒪ ᓇᖕᒥᓂᖅ ᐊᑐᖅᑕᐅᓂᑯᓂ. ᑕᒪᒃᑭᑦ ᕿᓂᕐᕕᐅᔪᓐᓇᕐᓂᐊᖅᐳᑦ ᐱᓕᕆᖃᑎᖃᕐᓂᐅᔪᒥ ᓄᓇᙳᐊᒥ ᓴᖅᑭᑎᑕᐅᔪᒥ ᓯᓚᑦᑐᖅᓴᕐᕕᒡᔪᐊᒥ.
ᐅᖃᐅᓯᐅᓪᓗᓂ ᑯᐸᐃᖕᒥ ᐊᓪᓚᓄᑦ ᐊᕐᓇᓄᑦ ᐊᖓᔪᖅᑳᖓᓄᑦ ᒫᔾᔪᓚᐃᓐ ᐃᑎᐊᓐᒧᑦ, ᓄᓇᙳᐊᖅ ᐱᒻᒪᕆᐅᓗᐊᖅᐳᖅ ᓇᓂᓯᓂᕐᒥ ᓇᒥ ᐋᓐᓂᖅᓯᕆᓂᐅᕙᒃᑐᖃᖃᑦᑕᕐᓂᖓᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ.
ᐅᖃᓚᐅᖅᐳᖅ “ᑐᓂᓯᓂᐊᖅᐳᖅ ᑲᑐᔾᔨᖃᑎᒌᑦᑎᓐᓂ ᐱᔪᓐᓇᕐᓂᐅᔪᒥ ᐅᔾᔨᕈᓱᖕᓂᖅᓴᐅᓂᐅᔪᒥ ᐱᔨᑦᑎᕋᕐᓂᐅᔪᒥ ᐱᔭᕆᐊᖃᕐᓂᑦᑎᓐᓂ ᐊᑐᐃᓐᓇᐅᑎᑕᐅᓗᑎᒃ ᐊᕐᓇᓄᑦ ᐃᓚᖏᓐᓂᓪᓗ.”
ᑲᑎᖅᓱᐃᓂᕐᒥ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ, ᑕᒪᒃᑭᑦ ᐱᖓᓱᑦ ᑲᑐᔾᔨᖃᑎᒌᖑᔪᑦ ᐊᐅᓪᓛᕐᓂᖃᕈᒪᕗᑦ ᐊᓪᓚᓄᑦ ᓄᓇᓕᐅᔪᓄᑦ ᑯᐸᐃᖕᒥ. ᓄᓇᕕᒃ ᐃᓚᒋᔭᐅᖃᑕᐅᙱᓚᖅ ᐊᐅᓪᓛᕐᓂᕐᒧᑦ ᐸᕐᓇᒃᑕᖏᓐᓂ ᐊᐅᓚᑦᑎᑐᐃᓐᓇᕈᓐᓇᕐᒪᑕ ᐊᓪᓚᓄᑦ ᓄᓇᓕᐅᔪᓄᑦ. ᑭᓯᐊᓂ ᐃᔅᑭᐅ ᐱᓕᕆᐊᒃᓴᐅᔪᖅ ᑲᑎᖅᓱᐃᕗᖅ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᓄᓇᕕᖕᒥ.
“ᐅᐱᒍᓱᒃᐳᖓ ᐃᓚᒋᔭᐅᓂᕐᒥ ᐆᒥᖓ ᐱᓕᕆᖃᑎᖃᕐᓂᐅᔪᒥ,” ᐅᖃᓚᐅᖅᐳᖅ ᔮᓂᔅ ᖃᕙᕙᐅᖅ−ᐱᐳ, ᖃᐅᔨᓴᕐᓂᕐᒧᑦ ᐱᓕᕆᔨᐅᔪᖅ ᐃᔅᑭᐅ ᐱᓕᕆᐊᒃᓴᐅᔪᒧᑦ.
“ᐊᑯᓂᒻᒪᕆᐊᓗᒃ, ᐊᒥᓱᓂ ᐃᓚᒌᖑᔪᓂ ᐳᐃᒍᖅᑕᐅᓯᒪᔫᔮᖅᓯᒪᕗᑦ, ᐃᒃᐱᒍᓱᒃᖢᑎᒃ ᐃᓄᖕᓄᑦ ᐃᒃᐱᒋᔭᐅᙱᓐᓂᖏᓐᓂ, ᐊᑯᓂᒻᒪᕆᐊᓗᒃ ᐃᓄᐃᑦ ᐃᒃᐱᒍᓱᓚᐅᙱᓚᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓂᑦ ᐃᓄᐊᖅᑕᐅᓂᖏᓐᓂ.
“ᑐᓴᕈᒪᕙᒃᑲ ᑕᐃᒃᑯᐊ ᐃᓚᒋᔭᐅᔪᑦ, ᑐᓴᕈᒪᕗᖓ ᐅᓂᒃᑳᖅᑐᐊᕐᓂᑦ, ᐅᓂᒃᑳᖅᑐᐊᑎᑦ ᐱᓪᓚᕆᐅᖕᒪᑕ.”
ᐅᓄᕐᓂᐅᔪᓂᑐᐊᖅ ᐱᑕᖃᕐᓂᖓᓂ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᑐᖅᑯᖅᑕᐅᓂᖓᓂ — ᓇᖕᒥᓂᖅ ᐊᑐᖅᑕᐅᓂᑯᓂ ᐱᑕᖃᕐᓇᓂ — ᐃᒃᐱᒍᓱᑦᑎᐊᕐᓂᖃᕋᔭᙱᓚᖅ ᐃᓄᖕᓄᑦ ᐊᒃᑐᖅᑕᐅᓯᒪᔪᓄᑦ, ᐅᖃᓚᐅᖅᐳᖅ.
ᐱᓕᕆᓂᖓᓂ ᐃᔅᑭᐅ ᐱᓕᕆᐊᒃᓴᐅᔪᒥ, ᖃᕙᕙᐅᖅ−ᐱᐳ ᓇᓂᓯᓚᐅᖅᐳᖅ 200 ᐅᓄᕐᓂᖅᓴᐅᔪᓂ ᖃᓄᐃᓐᓂᐅᔪᓂ ᐊᓯᐅᖅᑲᔪᓂ ᐅᕝᕙᓘᓐᓃᑦ ᐃᓄᐊᖅᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐊᕐᓇᓂ, ᓂᕕᐊᖅᓵᓂ, ᐊᖑᑕᐅᓇᓱᒋᙱᑦᑐᓂ ᐊᕐᓇᐅᓇᓱᒋᙱᑦᑐᓂ ᐊᒻᒪ ᒪᕐᕉᖕᓂ−ᑕᕐᓂᓕᖕᓂ ᐃᓄᖕᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᑯᐸᐃᖕᒥ.
ᑕᐃᔅᓱᒪᓂ ᖃᐅᔨᓴᕐᓂᖓᓂ, ᑲᓇᑕᒥ ᐸᓖᓯᒃᑯᑦ ᑎᑎᕋᖅᓯᒪᑐᐃᓐᓇᓚᐅᖅᐳᑦ 46−ᓂ ᐃᓄᐊᖅᑕᐅᓯᒪᔪᓂ ᐱᕋᔭᒃᑕᐅᓂᑯᓂ.
ᖃᕙᕙᐅᖅ−ᐱᐳ ᐅᖃᓚᐅᖅᐳᖅ ᑕᒪᒃᑭᒐᓚᖕᓂ ᓄᓇᕕᐅᑉ ᖃᓄᐃᓐᓂᐅᔪᓂ 2019-20−ᒥ ᐃᓚᖃᓚᐅᖅᐳᖅ ᐃᓄᖕᓂ ᐊᕐᓇᓂ.
“ᒪᒥᓴᕐᓂᕐᒧᑦ ᑎᑭᐅᑎᑦᑎᓛᕈᒪᕗᖓ ᐃᓚᖓᒍᑦ,” ᐅᖃᓚᐅᖅᐳᖅ. “ᓇᓗᓇᐃᖅᓯᓪᓚᕆᒍᒪᕗᖓ ᐅᓂᒃᑳᖅᑐᐊᖏᓐᓂ, ᐱᓂᕐᓗᒃᑕᐅᓂᑯᖏᓐᓂ.”
ᐱᒻᒪᕆᐅᓗᐊᖅᑐᖅ, ᐅᖃᓚᐅᖅᐳᖅ, ᑐᓴᒐᒃᓴᐅᔪᑦ ᐊᑐᐃᓐᓇᐅᓂᖏᓐᓂ ᑭᒃᑯᓕᒫᓄᑦ. ᐊᑐᓕᒪᓂᖓᓂ, ᖃᐅᔨᒪᕗᖅ ᐊᔪᕐᓇᕐᓂᖓᓂ ᖃᓄᐃᑦᑐᑐᐃᓐᓇᕐᒥ ᑐᓴᒐᒃᓴᐅᔪᓂ ᐱᓇᓱᐊᕐᓂᕐᒥ ᐱᔪᓐᓇᕐᓂᓕᖕᓂ.
“ᐃᓚᒌᑦ ᐱᔪᒪᔪᓂ ᑭᐅᔾᔪᑎᓂ, ᖃᓄᐃᒻᒪᑦ ᐊᒥᓱᐊᓗᖕᓂ ᐱᒋᐊᕐᓂᖃᕐᓂᖓᓂ ᐱᓕᕆᔾᔪᓯᐅᔪᒥ,” ᐅᖃᓚᐅᖅᐳᖅ.
“ᐃᓱᒪᕕᑦ ᓄᓇᖃᖅᑳᖅᓯᒪᔪᓄᑦ ᐃᓚᒌᑦ ᐱᓕᕆᔪᓐᓇᕐᒪᖔᑕ ᑕᒪᒃᑭᓂ ᐱᓕᕆᔭᕆᐊᓕᖕᓂ ᐊᑐᐃᓐᓇᖃᕐᓂᕐᒧᑦ ᑐᓇᒐᒃᓴᓂ? ᐋᒃᑲ, ᐃᒃᓯᓐᓇᐃᑐᐃᓐᓇᕋᔭᖅᑐᒃᓴᐅᕗᑦ ᕿᓂᕐᓂᖓᓂ ᐊᒻᒪ ᒪᓕᒐᓕᕆᓂᖃᔾᔮᙱᓚᑦ.”
ᐱᒋᐊᕈᑕᐅᔪᖅ ᐱᓯᒪᕗᖅ ᑮᓇᐅᔭᓂ ᐊᕐᕌᒍᓄᑦ ᐱᖓᓱᓄᑦ, ᐃᓚᖃᖅᑐᒥ ᒐᕙᒪᑐᖃᒃᑯᓐᓂ. ᐱᓕᕆᓂᖅ ᐊᓂᒍᖅᐸᑦ, ᐱᓕᕆᖃᑎᖃᕐᓂᐅᔪᒥ ᓄᓇᙳᐊᖅ ᐊᒻᒪ ᐱᔭᕇᖅᓯᒪᔪᒥ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ ᑐᖅᑯᖅᑕᐅᓂᖓᓂ ᐊᑐᐃᓐᓇᐅᓂᐊᖅᐳᖅ ᑭᓇᑐᐃᓐᓇᕐᒧᑦ ᖃᐅᔨᒋᐊᕐᓂᕐᒧᑦ.
(0) Comments