ᒪᒥᓴᕐᓂᖅ ‘ᓴᓗᒪᙱᓚᖅ,’ ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐅᖃᖅᐳᖅ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑏᑦ ᖃᓄᐃᓐᓂᐅᔪᒥ

For an English version of this story, please see ‘Healing is messy,’ NTI president says at Iqaluit Orange Shirt Day event.

ᓯᓚᑦᑎᐊᕙᐅᙱᑦᑐᒥ ᓄᖅᑲᖅᑎᑦᑎᔪᓐᓇᓚᐅᙱᓚᖅ ᐃᖃᓗᖕᒥᐅᓂ ᐃᓕᓴᖅᓯᓂᕐᒥ ᐊᐅᐸᔮᖓᔪᖅ ᐅᕕᓂᕈᕐᒥ ᐅᓪᓗᖓᓂ ᐊᒻᒪ ᑲᓇᑕᒥ ᐅᓪᓗᖓᓂ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒧᑦ 200−ᐸᓗᖕᓂ ᐃᓄᖕᓂ ᐸᖕᒥᐅᖅᖢᑎᒃ ᐅᓇᑕᖅᑐᒃᓴᙳᐊᑦ ᐃᒡᓗᖁᑎᖓᓐᓂ ᖁᕕᐊᓱᒍᑕᐅᔪᓄᑦ.

“ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒧᑦ ᐱᒻᒪᕆᕐᔪᐊᖑᕗᖅ,” ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖅ ᓗᐊᕆ ᐃᓪᓚᐅᑦ ᐅᖃᓚᐅᖅᐳᖅ ᐅᖃᓪᓚᖕᓂᐅᔪᒥ.

“ᐅᖃᐃᓐᓇᐅᔭᖅᐳᖓ, ᐅᖁᒪᐃᖦᖢᓂ ᐅᓪᓘᕗᖅ.”

ᐊᐅᐸᔮᖓᔪᖅ ᐅᕕᓂᕈᕐᒥ ᐅᓪᓗᖓ ᐊᒻᒪ ᑲᓇᑕᒥ ᐅᓪᓗᖓᓂ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒧᑦ ᑕᒪᒃᑭᑦ ᐱᓕᕆᐊᖑᓲᖑᕗᑦ ᓯᑎᐱᕆ 30−ᒥ. ᐊᐅᐸᔮᖓᔪᖅ ᐅᕕᓂᕈᕐᒥ ᐅᓪᓗᖓ ᓄᓇᖃᖅᑳᖅᓯᒪᔪᓄᑦ−ᐊᐅᓚᑕᐅᓪᓗᓂ ᐅᓪᓘᕗᖅ ᓴᖅᑭᑎᑦᑎᓲᒥᒃ ᐅᔾᔨᕈᓱᖕᓂᐅᔪᒥ ᖃᔅᓯᒐᓚᖕᓂ ᐱᐅᓯᖃᑎᒌᖑᔪᓂ ᓴᖅᑮᓐᓇᖅᑐᓂ ᐊᒃᑐᐃᓂᖃᖅᑐᒥ ᐊᒻᒪ ᐱᓂᕐᓗᒡᔪᐊᕐᓂᐅᔪᒥ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ. ᐊᔾᔨᐸᓗᐊᓂ, ᑲᓇᑕᒥ ᐅᓪᓗᖓᓂ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒧᑦ ᑐᕌᖓᕗᖅ ᐃᖅᑲᐅᒪᓂᕐᒥ ᓱᕈᓯᕐᓂ ᐅᑎᓚᐅᖅᓯᒪᙱᑦᑐᓂ ᐊᖏᕐᕋᒧᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ, ᐊᒻᒪᓗᑦᑕᐅᖅ ᐃᓚᒋᔭᐅᔪᑦ ᐊᒃᑐᖅᑕᐅᓯᒪᔪᓄᑦ.

ᓇᓚᐅᑦᑖᕆᔭᐅᔪᒥ 150,000−ᓂ ᓄᓇᖃᖅᑳᖅᓯᒪᔪᓄᑦ ᓱᕈᓯᕐᓂ ᐊᖅᓵᖅᑕᐅᓚᐅᖅᐳᑦ ᐃᓚᖏᓐᓂ ᐊᒻᒪ ᐊᔭᐅᕆᔭᐅᓪᓗᑎᒃ ᐅᐸᖕᓂᕐᒧᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ ᕿᑎᐊᓂ 1830−ᖏᓐᓂ ᐊᒻᒪ 1990−ᖏᓐᓄᑦ.

ᑕᒪᑐᒪᓂ ᐊᕐᕌᒎᔪᒥ ᐱᖓᔪᒋᔭᐅᓚᐅᖅᐳᖅ ᑲᓇᑕᒥ ᐅᓪᓗᖓᓂ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒧᑦ ᑕᑯᔭᐅᓯᒪᓂᖓᓂ ᑲᓇᑕᒥ, ᑲᓇᑕᐅᑉ ᒪᓕᒐᓕᐅᖅᑎᖏᑦ ᓇᓗᓇᐃᖅᓯᓚᐅᖅᑎᓪᓗᒋᑦ ᓯᑎᐱᕆ 30−ᒥ ᖃᑭᕐᓂᐅᓂᖓᓂ 2021−ᒥ ᑭᐅᓂᕐᒧᑦ ᑲᓇᑕᒥ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒧᑦ ᑭᓪᓕᓯᓂᐊᖅᑎᒃᑯᑦ 94−ᓂ ᖃᐃᖁᔨᓂᐅᔪᒥ ᖃᓄᐃᓕᐅᕐᓂᐅᔪᓄᑦ, ᖃᐃᖁᔨᒥᖃᖅᖢᑎᒃ ᐅᓪᓘᔪᒥ ᓇᓗᓇᐃᖅᓯᓂᕐᒧᑦ ᐃᓄᖕᓂ ᐊᒃᑐᖅᑕᐅᓯᒪᔪᓄᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ ᐱᓕᕆᔾᔪᓯᐅᔪᒥ.

ᓯᕗᓪᓕᖓᓂ, ᐸᕐᓇᐅᑎ ᐃᖃᓗᖕᓂ ᐊᑕᐅᑦᑎᒃᑰᕐᓂᐅᔪᒥ ᐃᒡᓗᕗᑦ ᐃᒡᓗᖁᑎᖓᓐᓂ ᐃᖃᓗᖕᓄᑦ ᑭᑉᐹᕆᖕᓂᖓᓄᑦ, ᑭᓯᐊᓂ ᓴᖁᒃ ᐊᒻᒪ ᐊᓄᕆ ᐊᔭᐅᕆᓚᐅᖅᐳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓂ, ᑲᒪᒋᔭᖃᓚᐅᖅᑐᒥ ᐊᑕᐅᑦᑎᒃᖂᕐᓂᐅᔪᒥ, ᖃᓄᐃᓕᐅᕐᓂᐅᔪᒥ ᐅᓇᑕᖅᑐᒃᓴᙳᐊᑦ ᐃᒡᓗᖁᑎᖓᓐᓅᖅᑕᐅᓂᖓᓂ.

ᓇᑲᓱᖕᒥ ᐃᓕᓐᓂᐊᓕᓵᖅᑐᓄᑦ ᐃᓕᓐᓂᐊᕐᕕᖓᓂ ᖏᓕᓐᓂᐊᖅᑏᑦ ᐊᒻᒪ ᐃᖅᑲᓇᐃᔭᖅᑎᖏᑦ ᑲᑎᑉᐳᑦ ᓯᑎᐱᕆ 29−ᒥ ᓴᓇᓂᕐᒧᑦ ᐊᐅᐸᔮᖓᔪᖅ ᐅᕕᓂᕈᕐᓂ ᐊᐅᐸᔮᖓᔪᖅ ᐅᕕᓂᕈᕐᒥ ᐅᓪᓗᖓᓄᑦ. (ᓇᑲᓱᒃ ᐃᓕᓐᓂᐊᕐᕕᖓᑕ ᐊᔾᔨᖁᑎᖓ)

“ᐋᓐᓂᕐᓇᕐᔪᐊᖅᐳᖅ,” ᐅᖃᓚᐅᖅᐳᖅ ᑖᓐ ᑯᓄᒃ, ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ ᐆᒪᐃᓐᓇᕐᓂᑯ ᐅᐸᒃᓯᒪᓚᐅᖅᑐᒥ ᐅᓇᑕᖅᑐᒃᓴᙳᐊᑦ ᐃᒡᓗᖁᑎᖓᓐᓂ ᖁᕕᐊᓱᒍᑕᐅᔪᒥ. ᐃᓚᒋᐊᖅᓯᓚᐅᖅᐳᖅ ᑕᒪᒃᑭᒐᓚᑦ ᐃᓄᐃᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖃᑎᒋᓚᐅᖅᓯᒪᔭᖏᓐᓂ ᐃᓅᔪᓐᓃᖅᓯᒪᓕᖅᐳᑦ.

ᔮᓂ ᐊᒻᒪ ᓈᓐᓯ ᖃᒪᓂᖅ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ ᐆᒪᐃᓐᓇᕐᓂᐅᕗᑦ ᐃᓚᐅᖃᑕᐅᓚᐅᖅᑐᓂ ᐅᓇᑕᖅᑐᒃᓴᙳᐊᑦ ᐃᒡᓗᖁᑎᖓᓐᓂ ᖁᕕᐊᓱᒍᑕᐅᔪᒥᑦᑕᐅᖅᔭ ᔮᓂ ᐅᖃᓚᐅᖅᐳᖅ ᐅᓪᓗᒥ ᐱᒻᒪᕆᐅᓪᓗᓂ ᐅᓪᓘᓂᖓᓂ.

ᑕᑯᓂᕐᒥ ᐅᓇᑕᖅᑐᒃᓴᙳᐊᑦ ᐃᒡᓗᖁᑎᖓᓐᓂ ᑕᑖᖅᑐᒥ ᐃᓄᖕᓂ ᐊᑐᖅᑐᓂ ᐊᐅᐸᔮᖓᔪᓂ ᐅᕕᓂᕈᕐᓂ, ᔮᓂ ᐃᓚᒋᐊᖅᓯᓚᐅᖅᐳᖅ, “ᐱᐅᔪᒻᒪᕆᐊᓘᕗᖅ.”

ᐅᓇᑕᖅᑐᒃᓴᙳᐊᑦ ᐃᒡᓗᖁᑎᖓᓐᓂ ᑕᑖᓕᕐᒪᑦ 2 ᐅᓐᓄᓴᐸᓗᒃᑯᑦ, ᐅᖃᓪᓚᖕᓂᐅᔪᑦ ᐱᒋᐊᓚᐅᖅᐳᑦ.

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᑐᓂᓯᓚᐅᖅᐳᖅ ᓴᙱᔪᒥ, ᕿᐊᓱᙳᓇᖅᑐᒥ ᐅᖃᓪᓚᖕᓂᐅᔪᒥ ᖃᔅᓯᒐᓚᖕᓂ ᐱᐅᓯᖃᑎᒌᖑᔪᓂ ᓴᖅᑮᓐᓇᖅᑐᓂ ᐱᓂᕐᓗᒡᔪᐊᕐᓂᐅᔪᒥ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ ᐊᒻᒪ ᐱᒻᒪᕆᐅᓂᖓᓂ ᒪᒥᓴᕐᓂᕐᒥ.

“ᐱᒻᒪᕆᕐᔪᐊᖑᕗᖅ ᐅᖃᓪᓚᖃᑦᑕᕐᓂᕐᒥ ᓱᓕᓂᐅᔪᒥ ᖃᓄᖅ ᓱᕈᓰᑦ ᐊᖅᓵᖅᑕᐅᓚᐅᕐᓂᖏᓐᓂ ᐃᓚᑦᑎᓐᓂ,” ᑰᑦᑎᖅ ᐅᖃᓚᐅᖅᐳᖅ.

ᐅᖃᓪᓚᓚᐅᖅᐳᖅ ᖃᓄᖅ ᐋᓐᓂᐊᕐᓂᕐᒥ ᓴᖅᑭᑦᑐᓐᓇᕐᓂᖓᓂ ᓂᕆᐅᙱᓛᙱᓐᓂᐅᔪᒥ.

“ᑭᓯᐊᓂ ᑭᒃᑯᓕᒫᓂ ᐃᖅᑲᐃᑎᑦᑎᔪᒪᕗᖓ ᒪᒥᓴᕐᓂᖅ ᓴᓗᒪᙱᑦᑐᖅᓴᕆᐊᓘᓂᖓᓂ,” ᑰᑦᑎᖅ ᐅᖃᓚᐅᖅᐳᖅ.

“ᐊᒻᒪᓗ ᐅᖃᓪᓚᖕᓂᕐᒥ ᐅᑯᓂᖓ ᐊᔪᕐᓇᕐᔪᐊᕐᓂᐅᔪᓂ ᐊᓂᒎᑎᔪᓐᓇᕐᓂᐊᖅᐳᒍᑦ ᓴᐃᒪᓂᖅᓴᐅᔪᒥ, ᓴᐃᓕᓂᐅᔪᒥ ᐊᒻᒪ ᓇᒡᓕᒍᓱᖕᓂᐅᔪᒥ ᐃᓅᓯᖃᕐᓂᐅᔪᒥ.”

ᐃᓚᒋᐊᖅᓯᓚᐅᖅᐳᖅ ᑕᐃᒪᑐᖅ ᐃᓄᐃᑦ ᐱᓕᕆᔪᓐᓇᕐᓂᐊᕐᓂᖏᓐᓂ ᐅᖁᒪᐃᓐᓂᐅᔪᓂ ᐊᒡᔭᖅᑕᒥᖕᓂᑦ “ᖃᐅᒪᓂᖅᓴᐅᔪᒥ ᓯᕗᓂᖃᕈᓐᓇᕐᓂᐊᕋᑦᑕ ᓄᓇᕗᒻᒥ.”

ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖅ ᓚᐅᕆ ᐃᓪᓚᐅᑦ ᒪᓕᓚᐅᖅᐳᖅ ᑰᑦᑎᕐᒥ ᑕᐃᒪᓐᓇᑎᒋ ᕿᐊᓱᙳᓇᖅᑐᒥ ᐅᖃᓪᓚᖕᓂᐅᔪᒥ.

ᐃᓪᓚᐅᑦ ᐅᖃᓪᓚᓚᐅᖅᐳᖅ ᐃᖅᑲᐅᒪᓂᖓᓂ ᐃᓐᓇᐃᑦ ᐃᒻᒥᓂᒃ ᐊᖓᔪᒃᖠᐅᔪᑦ ᐅᖃᐅᓯᖃᕈᒪᙱᓐᓂᖏᓐᓂ ᐊᑐᕐᓂᑯᖏᓐᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᐸᓚᐅᖅᓯᒪᔪᓄᑦ.

“ᐋᓐᓂᕐᓇᓗᐊᓚᐅᕐᒪᑦ ᐅᖃᐅᓯᕆᔭᕆᐊᒃᓴᖅ,” ᐃᓪᓚᐅᑦ ᐅᖃᓚᐅᖅᐳᖅ.

“ᐃᒻᒥᖕᓄᑦ ᑲᙳᓇᓗᐊᓚᐅᖅᐳᖅ.”

ᑭᓯᐊᓂ ᐃᓪᓚᐅᑦ ᐅᖃᓚᐅᖅᐳᖅ ᒫᓐᓇ ᐱᕕᒃᓴᖃᓕᖅᐳᒍᑦ ᖃᓄᐃᙱᓐᓂᖓᓂ ᐅᖃᐅᓯᖃᕐᓂᕐᒥ ᐅᑯᓂᖓ ᐅᓂᒃᑳᓕᐊᖑᔪᓂ ᐊᒻᒪ ᐃᑲᔪᓲᖑᓂᖓᓂ ᒪᒥᓴᕐᓂᕐᒧᑦ ᐱᓕᕆᓂᐅᔪᒥ.

“ᑕᐃᒃᑯᐊ ᐃᔨᖅᓯᓯᒪᓂᐅᔪᑦ ᐊᑐᖅᑕᐅᓂᑯᓂ ᐊᓂᒍᖅᐳᑦ,” ᐅᖃᓚᐅᖅᐳᖅ.

ᐃᓪᓚᐅᑦ ᐅᖃᓪᓚᓚᓕᓚᐅᕆᕗᖅ ᒫᓐᓇᓕᓴᐅᔪᒥ ᐊᑐᕐᓂᑯᖓᓂ ᑲᖏᖅᖠᓂᕐᒥ, ᐅᖃᓪᓚᓚᐅᕐᓂᖏᓐᓂ ᐱᔭᕆᐊᖃᕐᓂᐅᔪᒥ ᖃᔅᓯᒐᓚᖕᓂ ᐱᐅᓯᖃᑎᒌᖑᔪᓂ ᓴᖅᑮᓐᓇᖅᑐᓂ ᓇᒡᓕᒍᓱᖕᓂᐅᔪᒥ.

“ᓇᓗᓇᐃᖅᓯᔪᓐᓇᖅᓯᕗᒍᑦ ᐅᖃᓪᓚᑐᐃᓐᓇᙱᓐᓂᑦᑎᓐᓂ ᖃᔅᓯᒐᓚᖕᓂ ᐱᐅᓯᖃᑎᒌᖑᔪᓂ ᓴᖅᑮᓐᓇᖅᑐᓂ ᐱᓂᕐᓗᒡᔪᐊᕐᓂᐅᔪᒥ, ᑭᓯᐊᓂ ᐅᖃᓪᓚᒃᐸᓪᓕᐊᖔᕈᓐᓇᖅᓯᕗᒍᑦ ᖃᔅᓯᒐᓚᖕᓂ ᐱᐅᓯᖃᑎᒌᖑᔪᓂ ᓴᖅᑮᓐᓇᖅᑐᓂ ᓇᒡᓕᕐᓂᐅᔪᒥ,” ᐅᖃᓚᐅᖅᐳᖅ.

ᓂᐱᖅᑯᖅᑐᔪᒥ ᐸᑦᑕᒃᑐᕐᓂᖃᓚᐅᖅᐳᖅ ᒪᓕᒃᑐᒥ ᑕᒪᒃᑭᓂ ᑰᑦᑎᖅ ᐊᒻᒪ ᐃᓪᓚᐅᑦ ᐅᖃᓪᓚᖕᓂᖏᓐᓂ.

ᑐᒃᓯᐊᕐᓂᕐᒥ ᒪᓕᓚᐅᖅᐳᖅ ᐅᖃᓪᓚᖕᓂᐅᔪᓂ. ᐊᒻᒪᓗᑦᑕᐅᖅ, ᖁᙱᐊᖅᑕᐅᓂᖃᓚᐅᖅᐳᖅ ᐃᓄᒃᓱᒃ ᕿᓚᐅᔾᔭᖅᑎᐅᔪᓂ, ᐃᙱᖅᖢᑎᒃ ᐊᒻᒪ ᕿᓚᐅᔾᔭᖅᖢᑎᒃ ᐃᓄᐃᑦ ᐱᓯᖏᓐᓂ.

ᖁᕕᐊᓱᒍᑕᐅᔪᖅ ᐃᓱᓕᓚᐅᖅᐳᖅ ᐱᐅᓂᐅᔪᒥ, ᓱᕈᓰᑦ ᑲᑎᖦᖢᑎᒃ ᐃᓱᐸᓗᐊᓂ ᐅᓇᑕᖅᑐᒃᓴᙳᐊᑦ ᐃᒡᓗᖁᑎᖓᓐᓂ ᐅᖁᒻᒥᐊᒐᓄᑦ ᐸᕐᓚᓂᐅᔪᒧᑦ.

ᕿᑭᖅᑕᓂ ᐃᓄᐃᑦ ᑲᓱᔾᔨᖃᑎᒌᖑᔪᓄᑦ ᐊᖓᔪᖅᑳᖓ ᐅᓛᔪᒃ ᐊᑭᓱᒃ ᐊᑕᐅᓯᐅᖃᑕᐅᓚᐅᖅᐳᖅ ᐃᓄᖕᓂ ᐅᖁᒻᒥᐊᒐᓂ ᐃᒋᑦᑎᖃᑕᐅᔪᓂ. ᐅᖃᓚᐅᖅᐳᖅ ᐱᒻᒪᕆᐅᓪᓗᓂ ᐊᒻᒪ ᓄᓵᓇᖅᑑᓪᓗᓂ ᐅᓪᓘᕗᖅ, ᐊᒻᒪ ᐃᓚᓯᓂᕐᒥ ᐅᖁᒻᒥᐊᒐᓂ ᐸᕐᓚᓂᐅᔪᒥ ᐱᔪᓐᓇᖅᑎᑦᑎᕗᑦ ᐃᓄᖕᓂ ᕿᒪᐃᓂᖏᓐᓂ ᐃᒡᓗᕐᔪᐊᒥ ᖁᕕᐊᓱᒃᖢᑎᒃ.