ᒪᓕᒐᓕᐅᕐᑎᐅᔪᑦ ᐃᓱᒫᓘᑎᖏᓐᓂᒃ ᐅᖃᐅᓯᖃᖅᐳᑦ ᐃᓐᓇᑐᖃᐃᑦ ᐅᓗᕆᐊᓇᙱᑦᑐᒦᑲᓗᐊᕆᐊᒃᓴᖏᓐᓂᒃ ᐃᒡᓗᖏᓐᓂ
ᐹᑦ ᐊᕐᓇᑲᒃ ᐅᖃᐅᓯᖃᖅᐳᖅ ᐃᓄᒋᐊᓗᐊᖃᑦᑕᖅᑐᓂᒃ, ᐃᓵᖅᑕᐅᖃᑦᑕᖅᑐᓂᒃ
ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯ ᓴᐳᔾᔨᔨᖃᖅᑎᑦᑎᙱᑦᑐᑦ ᐃᓐᓇᑐᖃᐃᑦ ᐃᒡᓗᒋᔭᖏᓐᓂᒃ ᐅᕝᕙᓘᓐᓃᑦ ᖃᐅᔨᒪᓇᓱᙱᖢᑎᒃ ᑭᒃᑯᓐᓂ ᐃᒡᓗᖃᑎᖃᕐᒪᖔᑕ, ᒪᓕᒐᓕᕆᕕᒡᔪᐊᕐᒥ ᐅᖃᓚᐅᕐᑐᖅ ᓄᓇᕗᒧᑦ ᓯᕗᓕᐅᕐᑎ ᔫ ᓴᕕᑲᑖᖅ ᓄᕕᐱᕆ 4-ᖑᑎᓪᓗᒍ ᑖᓐᓇᓗ ᒥᓂᔅᑕᒋᔭᐅᑲᐃᓐᓇᖅᖢᓂ ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯᓐᓄᑦ. (ᐊᔾᔨᓕᐅᕐᓯᒪᔪᒥᑦ)
For an English version of this story, see Iqaluit MLA raises concerns about safety of Nunavut elders’ apartments
ᐃᖃᓗᖕᓂ ᒪᓕᒐᓕᐅᕐᑎ ᐊᐱᕆᔪᖅ ᐱᓕᕆᐊᖃᑦᑎᐊᕋᓗᐊᕆᐊᒃᓴᖏᓐᓂᒃ ᐅᓗᕆᐊᓇᙱᑦᑐᒦᑎᑦᑎᒐᓱᖕᓂᕐᒥᒃ ᐊᒻᒪ ᓴᐳᔾᔭᐅᓯᒪᒍᑎᓂᒃ ᐅᑯᓇᓂ ᓄᓇᕗᑦ ᐃᒡᓗᖁᑎᖏᓐᓂᒃ ᐃᓐᓇᑐᖃᕐᓄᑦ ᑐᕌᖓᔪᓂᒃ.
ᐃᓛᓐᓂᒃᑯ ᐃᓐᓇᑐᖃᐃᑦ ᐃᓚᖏᓐᓂ ᓄᒃᑎᕐᕕᐅᖃᑦᑕᕐᒪᑕ ᐃᒡᓗᒋᔭᖏᓐᓄᑦ, ᐹᑦ ᐊᕐᓇᑲᒃ, ᒪᓕᒐᓕᐅᕐᑎ ᐃᖃᓗᐃᑦ-ᓂᐊᖁᙴᒧᑦ, ᐅᖃᓚᐅᕐᑐᖅ ᒪᓕᒐᓕᕆᔨᒃᑯᑦ ᐱᖓᔪᐊᓐᓂᑦ, ᓄᕕᐱᕆ 4, ᐅᖃᐅᓯᖃᑲᑕᒃᑎᓪᓗᒋᑦ ᐃᓐᓇᑐᖃᕐᓅᖓᔪᓂᒃ.
“ᐃᓐᓇᐃᑦ ᑲᒪᒋᔭᖃᕆᐊᖃᕋᓱᒋᓕᖃᑦᑕᕐᒪᑕ ᐅᕙᑦᑎᖏᓐᓃᑦᑐᓂᒃ ᐃᒡᓗᒃᓴᖃᙱᓐᓂᖏᓐᓄᑦ ᐊᓯᐊᓂᒃ, ᑭᓯᐊᓂᓕ ᐃᓱᒫᓘᑎᖃᕐᓇᕐᒥᖕᒪᑦ ᑖᒃᑯᐊ ᐅᓗᕆᐊᓇᙱᑦᑐᒦᒃᑲᓗᐊᕆᐊᒃᓴᖏᓐᓂᒃ,” ᐊᕐᓇᑲᒃ ᐅᖃᖅᑐᖅ.
ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯᑦ ᐸᕐᓇᒍᒪᔪᑦ ᓄᑖᓂᒃ ᐃᒡᓗᒃᓴᓕᐅᕐᓗᑎᒃ 18-ᓂ ᓄᓇᓕᖕᓂ ᐊᒻᒪᓗ ᑖᒃᑯᐊ ᐊᑐᐃᓐᓇᐅᓕᕋᔭᕐᓗᑎᒃ ᐅᒃᑑᐱᕆ 2022-ᒥᑦ.
ᓄᓇᓕᖕᓂ ᐃᒡᓗᓕᕆᔨᐅᔪᑦ, ᐅᑯᑎᑐᓇᖅ ᐃᖃᓗᐃᑦ ᐃᒡᓗᓕᕆᔨᖏᑦᑎᑐᑦ, ᐃᓱᒪᓕᐅᕆᔪᓐᓇᖅᑐᑦ ᑖᒃᑯᐊ ᐃᒡᓗᒃᓴᐃᑦ ᐃᓚᖏᑦ ᐃᓐᓇᑐᖃᕐᓄᑦ ᑐᕌᖓᑎᑕᐅᓗᑎᒃ. 8-ᓂᓪᓕ ᑖᒃᑯᓄᖓ ᑐᕌᖓᔪᓄᑦ ᐃᒡᓗᓂ ᐋᖅᑭᒃᓯᓯᒪᔪᑦ ᐃᖃᓗᖕᓂᑦ.
ᐅᑯᐊ ᐃᒡᓗᒃᓴᐃᑦ ᐋᖅᑭᒃᑕᐅᓯᒪᓇᔭᕐᑐᑦ ᐊᑐᐃᓐᓇᐅᔪᓐᓇᕈᑎᓂᒃ ᐃᓱᒪᒋᔭᖃᖅᖢᑎᒃ, ᐊᑦᑎᖕᓂᕐᓴᓂ ᓂᕿᓕᕆᕝᕕᒃᓴᓂᒃ, ᖃᐅᒻᒪᖁᑎᖏ ᑎᑭᒐᒃᓴᐅᓗᑎᒃ ᐊᒻᒪᓗ ᐅᐊᓴᕐᕕᖏᑦ.
ᑭᓯᐊᓂᓕ ᐊᕐᓇᑲᒃ ᐃᓱᒫᓘᑎᖃᖅᑐᖅ ᓴᐳᔾᔨᔨᖃᕆᐊᖃᕐᓂᕐᒥᒃ.
ᐃᓐᓇᑐᖃᐃᑦ ᐃᒡᓗᖏᑦ ᐃᓵᖅᑕᐅᖃᑦᑕᕐᓯᒪᖕᒪᑕ ᐊᒻᒪᓗ ᐱᖁᑎᒋᔭᖏᑦ ᑎᒡᓕᒃᑕᐅᕙᒃᖢᑎᒃ, ᐊᕐᓇᑲᒃ ᐅᖃᖅᑐᖅ.
“ᐃᒡᓗᖃᖅᑐᑦ ᒪᓂᑐᐃᓐᓇᖅᑰᔨᒋᓯᒪᖕᒪᑕ ᒫᓐᓇ ᐱᓗᐊᖅᖢᓂ,” ᐅᖃᖅᑐᖅ.
2017-ᒥᑦ, ᐃᓐᓇᑐᖃᖅ ᐃᒡᓗᖃᖃᑕᐅᔪᖅ ᐃᓐᓇᑐᖃᕐᓄᑦ ᐃᒡᓗᓂ ᐃᖃᓗᖕᓂ ᐋᓐᓂᐊᕕᓕᐊᕈᔾᔭᐅᔭᕆᐊᖃᓚᐅᕐᓯᒪᔪᖅ ᑮᓇᖓᒍᑦ ᐊᒻᒪ ᓂᐊᖁᖓᒍᑦ ᐋᓐᓂᕐᓱᖅᑕᐅᓗᐊᕐᓂᑯᒧᑦ ᓯᓂᒃᑎᓪᓗᒍ. ᐊᓯᒃᑲᓐᓂᐊᒍᓪᓕ, ᐊᓯᖓᑦᑕᐅᖅ ᐃᓐᓇᑐᖃ ᑕᐃᑲᓂ ᐊᖏᕐᕋᖃᖅᑐᖅ ᐃᖃᓗᐃᑦ ᐸᓖᓯᒃᑯᓐᓄ ᐅᖃᓚᐅᕐᓯᒪᖕᒥᔪᖅ ᐅᐊᔭᒨᒐᓚᒃᑐᑦ ᐱᖁᑎᖏᑦ ᑎᒡᓕᒃᑕᐅᓂᑰᓂᖏᓐᓂᒃ.
ᑖᒃᑯᐊ ᖃᓄᐃᓕᐅᕈᑎᐅᓂᑯᑦ ᐃᖃᓗᖕᒥᐅᓂᒃ ᓂᙵᒍᑎᐅᓚᐅᕐᓯᒪᔪᑦ, ᑖᒃᑯᐊᓗ ᐃᖃᓗᐃᑦ ᐃᒡᓗᓕᕆᔨᕐᔪᐊᒃᑯᓐᓂᒃ, ᑲᒪᔨᐅᓂᖏᓐᓄᑦ ᐃᒡᓗᓂ, ᓴᐳᔾᔨᓯᒪᓂᕐᒥ ᐱᓕᕆᐊᖃᕐᓂᕐᓴᐅᖁᔨᓪᓗᑎᒃ ᑖᒃᑯᓄᖓ ᐃᓐᓇᑐᖃᕐᓄᑦ.
ᐊᕐᓇᑲᒃ ᐊᐱᕆᓚᐅᕐᑐᖅ ᓯᕗᓕᐅᕐᑎ ᔫ ᓴᕕᑲᑖᕐᒧᑦ, ᑖᓐᓇᓗ ᒥᓂᔅᑕᐅᑲᐃᓐᓇᖅᖢᓂ ᓄᓇᕗᑦᒥ ᐃᒡᓗᓕᕆᔨᕐᔪᐊᑯᓐᓄᑦ, ᐱᔨᑦᑎᕋᐅᑎᖏᑦ ᐃᓚᖃᕈᓐᓇᕆᐊᐊᒃᓴᖏᓐᓂᒃ ᓴᐳᔾᔨᓯᒪᓂᕐᒥᒃ ᐊᒻᒪ ᐅᓗᕆᐊᓇᙱᑦᑐᒦᑎᑦᑎᓂᕐᒥ ᐃᓐᓇᑐᖃᕐᓂ ᐃᒡᓗᖃᕐᑐᓂᒃ.
ᑭᓯᐊᓂᓕ ᓴᕕᑲᑖᖅ ᑭᐅᓚᐅᕐᑐᖅ ᑕᒪᑐᒪᖑ ᖃᐅᔨᒪᔭᖓᒍᓪᓕ, “ᐃᓐᓇᑐᖃᐃᑦ ᐃᒡᓗᖏᓐᓂ ᓴᐳᔾᔨᔨᖃᕐᓂᕐᒥ ᐱᓕᕆᓯᒪᙱᑦᑐᒍᑦ.”
ᐊᕐᓇᑲᒃ ᖃᐅᔨᔪᒪᓚᐅᕐᒥᔪᖅ ᐃᓄᖕᓂ ᐃᓐᓇᑐᖃᐃᑦ ᐃᒡᓗᖏᓐᓃᖃᑕᐅᔪᓂᒃ ᖃᐅᔨᒪᔭᕆᐊᒃᓴᖏᓐᓂᒃ.
“ᐃᓛᓐᓂᒃᑯ ᐃᓚᒌᒃᑐᑦ ᐃᓐᓇᑐᖃᐅᑉ ᐃᒡᓗᖓᓃᒻᒥᔪᑦ ᐅᓄᕐᓂᕐᓴᐅᖃᑦᑕᕐᒪᑕ ᐃᒡᓗᕈᓯᖏᓐᓂᒃ ᐃᒡᓗᒋᔭᐅᔫᑉ. ᐃᓐᓇᑐᖃᐃᑦ ᐱᕕᖃᕋᓱᒋᕙᙱᒻᒪᑕ ᐃᓄᖕᓂ ᓄᒃᑎᕐᕕᐅᑎᓪᓗᒋᑦ ᓲᖃᐃᒻᒪ ᑕᒫᓂᕐᕆᖁᔨᙱᒻᒥᖕᒪᑕ ᐃᓚᖏᓐᓂᒃ,” ᐊᕐᓇᑲᒃ ᐅᖃᖅᑐᖅ.
“ᒥᓂᔅᑕ ᐅᖃᕈᓐᓇᕐᐸᑦ ᖃᐅᔨᓇᓱᖃᑦᑕᕆᐊᒃᓴᖏᓐᓂᒃ ᑖᒃᑯᓇᓂ ᐃᓐᓇᑐᖃᕐᓄᑦ ᐃᒡᓗᓂ ᐃᒡᓗᖃᖃᑕᐅᖃᑦᑕᖅᑐᓃ ᐊᒻᒪᓗ ᖃᓄᖅ ᐃᑲᔫᑎᒃᓴᖅᑕᖃᖅᐸᑦ ᐃᓄᒋᐊᓗᐊᖅᑐᓄᑦ ᐅᕝᕙᓘᓐᓃᑦ ᐃᓚᒋᔭᐅᔪᑦ ᐊᓯᐊᓂ ᐃᒡᓗᖃᖅᑎᑕᐅᔪᓐᓇᕆᐊᒃᓴᖏᓐᓂᒃ ᑖᒃᑯᓇᓂ ᐃᒡᓗᓃᑦᑕᕆᐊᖃᙱᑦᑐᓃ?”
ᑭᓯᐊᓂᓕ ᓴᕕᑲᑖᖅ ᐅᖃᓚᐅᕐᑐᖅ ᓄᓇᕗᑦᒥ ᐃᒡᓗᓕᕆᔨᕐᔪᐊᒃᑯᑦ ᖃᐅᔨᒪᓇᓱᖃᑦᑕᙱᓐᓂᕋᖅᖢᓂᒋᑦ ᑭᒃᑯᑦ ᓇᓂ ᐃᒡᓗᓃᑦᑕᕆᐊᒃᓴᖏᓐᓂᒃ.
“ᑕᐃᒪᓕ ᐃᓐᓇᑐᖃᕐᒥ ᑕᕝᕙᓂ ᐃᒡᓗᖃᖅᑐᖃᖅᐸᑦ, ᐃᓱᒪᔪᖓ ᖃᐅᔨᒪᓇᓱᖃᑦᑕᙱᓐᓂᑦᑎᓐᓂᒃ ᑭᒃᑯᑦ ᐃᒡᓗᖃᖃᑕᐅᖕᒪᖔᑦ ᐃᓐᓇᕐᒥ,” ᐅᖃᖅᑐᖅ.
ᑎᓴᒻᒥᕐᒥ, ᓄᕕᐱᕆ 5, ᐅᓄᕈᓘᔭᕐᑐᑦ ᒪᓕᒐᓕᐅᕐᑎᐅᔪᑦ ᐅᖃᓚᐅᕐᑐᑦ ᓄᓇᖏᓐᓂᒃ ᐃᓐᓇᑐᖃᕐᕕᖃᕈᒪᓂᕋᖅᖢᑎᒃ.
ᐊᕐᕕᐊᑦ ᐅᐊᖕᓇᖓᓄᑦ-ᑎᑭᕋᕐᔪᐊᕐᒧᑦ ᒪᓕᒐᓕᐅᕐᑎ ᔮᓐ ᒪᐃᓐ ᐅᖃᓕᒫᓚᐅᕐᑐᖅ ᖃᓄᐃᓕᐅᕈᑎᒃᓴᓂᒃ ᓄᓇᕗᑦ ᒐᕙᒪᒃᑯ ᐃᑲᔪᕈᑎᒋᒃᑲᓐᓂᕈᓐᓇᖅᑕᖏᓐᓂᒃ ᐃᓐᓇᑐᖃᕐᓄᑦ ᐊᒻᒪᓗ ᑲᒪᔨᒋᖃᑦᑕᖅᑕᖏᓐᓂᒃ.
ᒐᕙᒪᒃᑯᑦ ᐸᕐᓇᐅᑎᖏᑦᑎᒍᑦ ᐃᓐᓇᑐᖃᕐᓄᑦ ᑲᒪᒋᔭᖃᕐᕕᒃᓴᓕᕆᓕᕈᑎ ᐊᓯᖏᓐᓂᒃ ᐃᓱᒪᔪᓐᓇᖃᑦᑕᕆᐊᖃᕐᓂᖏᓐᓂᒃ, ᐊᒻᒪᓗ ᐃᓱᒪᒋᔭᖃᕐᓗᑎᒃ ᐱᓕᕆᐊᖃᕈᒪᔪᓂᒃ ᐃᓐᓇᑐᖃᓕᕆᓂᕐᒥᒃ ᐱᔨᑦᑎᕋᐅᑎᓕᕆᓂᒃᑯᑦ ᐱᓕᕆᑎᑦᑎᓂᕐᒥᒃ.
ᔪᐊᔾ ᕼᐃᒃᔅ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕᐅᓚᐅᕐᑐᖅ ᑕᓪᓕᕐᒥᕐᒥ ᐊᓯᓅᖅᑕᐅᑲᑕᙱᑎᓪᓗᒋ, ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᒫᓐᓇ ᐸᕐᓇᐅᑎᖏ ᐋᖅᑭᒃᓯᒪᖕᒪᑕ ᓴᓇᓗᑎᒃ ᐱᖓᓱᓂᒃ ᐃᓐᓇᒃᑯᕕᐅᓂᐊᕐᑐᓂᒃ: 24-ᓂ ᐃᒡᓗᕈᓯᖃᖅᑐᒥ ᑭᕙᓪᓕᕐᒥ, 24-ᓂ ᐃᒡᓗᕈᓯᖃᖅᑐᒥᑦ ᕿᑎᕐᒥᐅᓂ ᐊᒻᒪᓗ 48-ᓂ ᐃᒡᓗᕈᓯᖃᖅᑐᒥ ᐃᖃᓗᖕᓂ.
(0) Comments