ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᖅᑎ ᐋᑕᒻ ᐋᕆᐊᒃ ᓚᐃᑦᓯᑑᓐ ᐅᖃᓚᐅᕐᑐᖅ ᐊᓂᒍᐃᓂᑯᑦ ᐃᓕᓐᓂᐊᖅᑐᑦ ᓄᓇᕗᒻᒥ ᓯᓚᑦᑐᖅᓴᕐᕕᒃᒥ ᐃᓕᓴᐃᔨᒃᓴᐅᓂᕐᒧᑦ ᐃᑲᔪᖅᑕᐅᒃᑲᓐᓂᕆᐊᖃᕐᓂᕋᖅᖢᓂᒋᑦ ᐃᖅᑲᓇᐃᔮᖅᑖᕋᓱᖕᓂᒃᑯᑦ, ᒪᑯᑎᒎᓇᖅ ᐃᖅᑲᓇᐃᔮᒃᓴᖅᑖᕋᓲᑎᓂᒃ ᑎᑎᕋᕆᐅᕐᓴᕐᓂᕐᒥᒃ ᐊᒻᒪ ᐊᐱᖅᓱᖅᑕᐅᓂᐊᕐᓂᕐᒧᑦ ᐸᕐᓇᒃᓯᒪᔪᓐᓇᕐᓂᕐᒥᒃ ᐃᖅᑲᓇᐃᔮᖅᑖᓚᐅᖅᑎᓐᓇᒋᑦ. (ᐊᔾᔨᙳᐊᖅ ᐊᔾᔨᓕᐅᖅᓯᒪᔪᒥᒃ ᐅᑯᓇᙵᑦ ᓄᓇᕗᒥᑦ ᒪᓕᒐᓕᕆᔨᒃᑯᓐᓂᒃ)
ᒪᓕᒐᓕᐅᖅᑎ ᐊᐱᕆᔪᖅ ᐅᑯᐊ ᓄᓇᕗᒻᒥ ᓯᓚᑦᑐᖅᓴᕐᕕᒃᒥ ᐊᓂᒍᐃᔪᑦ ᐃᖅᑲᓇᐃᔮᖅᑖᖅᐸᓪᓕᐊᔭᕆ-
ᐊᒃᓴᖏᓐᓂᒃ
ᐊᓂᒍᐃᔪᑦ ‘ᐃᑲᔪᖅᑕᐅᙱᓗᐊᖃᑦᑕᕐᒪᑕ’ ᐃᖅᑲᓇᐃᔮᖅᑖᕋᓱᖕᓂᒃᑯᑦ, ᐅᖃᕐᑐᖅ ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᖅᑎ ᐋᑕᒻ ᐋᕆᐊᒃ ᓚᐃᑦᓯᑑᓐ
For the English version of this story, see MLA asks if Nunavut Arctic College grads are getting hired.
ᐊᓂᒍᐃᔪᑦ ᓄᓇᕗᒻᒥ ᓯᓚᑦᑐᖅᓴᕐᕕᒃᒥ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᓂᒃ ᐃᑲᔪᖅᑕᐅᒃᑲᓐᓂᕆᐊᖃᕐᒪᑕ ᓯᓚᑦᑐᖅᓴᕐᕕᒃᒥ ᐃᖅᑲᓇᐃᔮᖅᑖᕋᓱᓕᕌᖓᑕ ᐊᖏᕐᕋᖏᓐᓄᑦ ᖃᓂᑦᑐᓂᒃ, ᐅᖃᓚᐅᕐᑐᖅ ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᖅᑎ ᐋᑕᒻ ᐋᕆᐊᒃ ᓚᐃᑦᓯᑑᓐ.
“ᖃᐅᔨᓕᓚᐅᕋᒪ ᐊᓂᒍᐃᓯᒪᔪᑦ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᓂᒃ ᐃᑲᔪᖅᑕᐅᙱᓗᐊᖃᑦᑕᕐᓂᖏᓐᓂᒃ ᐃᖅᑲᓇᐃᔮᖅᑖᕋᓱᖕᓂᒃᑯᑦ,” ᓚᐃᑦᓯᑑᓐ ᐅᖃᓚᐅᕐᑐᖅ ᒪᓕᒐᓕᕆᕝᕕᒃᒥ ᐅᒃᑑᐱᕆ 20-ᐅᑎᓪᓗᒍ.
ᐅᖃᐅᓯᖃᖅᖢᓂ ᓯᓚᑦᑐᖅᓴᕐᕕᒃ ᐃᑲᔪᕈᑎᖃᙱᓐᓂᖓᓂᒃ ᐃᖅᑲᓇᐃᔮᒃᓴᖅᑖᕋᓲᑎᓂᒃ ᑎᑎᕋᕆᐅᕐᓴᓂᕐᒧᑦ ᐊᒻᒪ ᐊᐱᖅᓱᖅᑕᐅᓂᐊᕐᓂᕐᒧᑦ ᐸᕐᓇᒃᓯᒪᔪᓐᓇᕈᑎᓂᒃ.
ᐊᓂᒍᐃᔪᑦ ᐃᓕᓐᓂᐊᒐᒃᓴᓂᒃ ᐱᒻᒪᕆᖕᓂ ᑐᑭᓯᐅᒪᓂᖃᕐᒪᑕ ᓄᓇᕗᒥᑦ ᐃᓅᓯᕆᔭᐅᔪᓂᒃ, ᐊᒻᒪᓗ ᐅᓄᕐᓂᕐᓴᐃᑦ ᓄᓇᕗᒥᑦ ᐊᔪᕈᓐᓃᕐᓴᖅᓯᒪᔪᑦ ᐃᓕᓴᐃᔨᐅᓂᕐᒧᑦ ᐅᖃᐅᓯᕐᓂ ᖃᐅᔨᒪᖕᒪᑕ ᐃᑲᔪᕈᑎᐅᔪᓐᓇᖅᑐᓂᒃ ᓄᓇᕗᒥᑦ ᐅᖃᐅᓯᕐᓄᑦ ᐊᑐᖅᑕᐅᔪᓐᓇᕈᑎᓂᒃ, ᓚᐃᑦᓯᑑᓐ ᐅᖃᓚᐅᕐᑐᖅ.
“ᓄᓇᕗᒻᒥ ᓯᓚᑦᑐᖅᓴᕐᕕᒃᒥ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᖏᑦ ᐃᑲᔪᕈᑎᐅᔭᕆᐊᖃᖅᑐᑦ ᓄᓇᕗᒥᑦ ᐃᓕᓴᐃᔨᓄᑦ ᐃᖅᑲᓇᐃᔮᒃᓴᓄᑦ,” ᐅᖃᕐᑐᖅ.
81 ᐃᓕᓴᐃᔨᓄᑦ ᐃᓂᒋᔭᐅᓪᓗᐊᖅᑐᑦ ᐃᓄᖃᙱᒻᒪᑕ ᓄᓇᕗᒥᑦ 2023 ᐃᓕᓐᓂᐊᕐᓇᖅ ᐱᒋᐊᖅᐸᓪᓕᐊᓕᖅᑎᓪᓗᒍ, ᐃᓕᓐᓂᐊᕐᓂᓕᕆᔨᒃᑯᓐᓄᑦ ᒥᓂᔅᑕ ᐹᒥᓚ ᒍᕉᔅ ᐅᖃᓚᐅᕐᓯᒪᔪᖅ ᓰᐲᓰᒃᑯᑦ ᑐᓴᒐᒃᓴᓕᐅᖅᑎᖏᓐᓄᑦ ᐋᒐᓯᐅᑎᓪᓗᒍ.
ᓚᐃᑦᓯᑑᓐ ᐅᖃᓚᐅᕐᑐᖅ ᒪᓕᒐᓕᕆᕝᕕᒃᒥ “ᐃᒪᓐᓇᐅᖂᔨᖕᒪᓐ” ᑐᓴᐅᒪᖃᑦᑕᐅᑎᓂᖃᙱᓗᐊᖅᖢᑎᒃ ᓯᓚᑦᑐᖅᓴᕐᕕᒡᓗ ᐃᓕᓐᓂᐊᕐᓂᓕᕆᔨᒃᑯᓪᓗ ᓇᓗᓇᐃᕐᓯᓇᓱᖕᓂᒃᑯᑦ ᐃᖅᑲᓇᐃᔮᖅᑖᕈᓐᓇᕋᔭᖅᑐᓂᒃ ᒪᓕᒡᓗᑎᒃ ᐃᓅᑉ “ᖃᓄᐃᓕᐅᕈᓯᖏᓐᓂᒃ, ᓴᙱᓂᖏᓐᓂᒃ ᐊᒻᒪ ᐱᓕᕆᐊᖃᕈᒪᓂᖏᓐᓂᒃ.”
“ᐱᓕᕆᕈᓘᔭᖃᑦᑕᕐᑐᑦ ᐊᒻᒪᓗ ᐃᑲᔪᕈᑎᓂᒃ ᐋᖅᑭᒃᓯᓯᒪᓪᓗᑎᒃ ᐃᓕᓐᓂᐊᖅᑎᑦᑎᔾᔪᑎᒃᓴᓂᒃ, ᐊᔪᕈᓐᓃᕐᓴᖅᑎᑦᑎᔾᔪᑎᓂᒃ ᐊᒻᒪᓗ ᓇᓗᓇᐃᒃᑯᑎᑖᕈᑎᒃᓴᓂᒃ ᐃᓕᓴᐃᔨᖑᕐᓂᐊᖅᑐᓄᑦ,” ᐅᖃᕐᑐᖅ.
“ᑭᓯᐊᓂ, ᐊᓂᒍᐃᔪᓐᓇᕐᓂᖅ ᐃᓱᖃᖃᑦᑕᕐᒪᑦ ᐃᑲᔪᕈᑎᑕᖃᙱᓗᐊᕐᓂᖓᓄᑦ ᐃᓅᓱᒃᑐᑦ ᐊᓂᒍᐃᔪᑦ ᐃᖅᑲᓇᐃᔮᓂᒃ ᐱᓇᓱᒍᓐᓇᕐᓯᔾᔪᑎᒃᓴᖏᓐᓂᒃ.”
ᓚᐃᑦᓯᑑᓐ ᐊᐱᕆᓚᐅᕐᑐᖅ ᑖᓂᐅᓪ ᖃᕝᕕᒃᒥ, ᒥᓂᔅᑕ ᑲᒪᒋᔭᖃᖅᑐᖅ ᓄᓇᕗᒻᒥ ᓯᓚᑦᑐᖅᓴᕐᕕᒃᒥ, ᖃᓄᐃᒻᒪᑦ ᓯᓚᑦᑐᖅᓴᕐᕕᐅᑉ ᐊᕐᕌᒍᒧᑦ ᐅᓂᒃᑳᖏᑦ ᓇᓗᓇᐃᕐᓯᒪᙱᓚᑦ ᐃᖅᑲᓇᐃᔮᖃᓕᕐᑐᕕᓂᕐᓂᒃ ᐊᓂᒍᐃᓂᑯᓂᒃ.
“ᑖᔅᓱᒥᖓ ᐊᐱᕆᖃᑦᑕᖅᑐᖓ ᓲᖃᐃᒻᒪ ᐱᒻᒪᕆᐅᓛᖑᖕᒪᑦ ᖃᓄᐃᓕᐅᕈᓐᓇᕐᓂᕐᒥᒃ ᖃᐅᔨᓇᓱᖕᓂᒃᑯᑦ ᐃᓕᓐᓂᐊᕐᕕᒃᑲᓐᓂᕐᓄᑦ ᑲᓇᑕᒥ ᐊᒻᒪ ᓄᓇᕐᔪᐊᓕᒫᒥᑦ,” ᓚᐃᑦᓯᑑᓐ ᐅᖃᕐᑐᖅ.
ᖃᕝᕕᒃ ᐅᖃᐅᓯᖃᓚᐅᕐᑐᖅ ᖃᔅᓯᐅᓂᖏᓐᓂᒃ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᓂᒃ ᐊᓂᒍᐃᔪᕕᓂᕐᓂ 2019-ᒥ ᐱᒋᐊᖅᖢᑎᒃ, 9 ᐊᓂᒍᐃᔪᕕᓃᑦ 2019-ᒥ, 4 ᐊᓂᒍᐃᔪᑦ 2020-ᒥ, 8 ᐊᓂᒍᐃᔪᑦ 2021-ᒥ, 19 ᐊᓂᒍᐃᔪᑦ 2022-ᒥ ᐊᒻᒪ 6 ᐊᓂᒍᐃᔪᑦ 2023-ᒥ.
ᐅᖃᐅᓯᖃᓚᐅᙱᑦᑐᕐᓕ ᖃᔅᓯᑦ ᐃᓕᓐᓂᐊᖅᑐᕕᓃᑦ ᐃᖅᑲᓇᐃᔮᖅᑖᖅᑎᑕᐅᓯᒪᔭᕆᐊᒃᓴᖏᓐᓂᒃ ᓲᖃᐃᒻᒪ ᓯᓚᑦᑐᖅᓴᕐᕕᒃ ᐃᖅᑲᓇᐃᔮᒃᓴᓕᕆᓂᕐᒥᒃ ᐱᓕᕆᐊᖃᙱᒻᒪᑕ.
ᖃᕝᕕᒃ ᐅᖃᓚᐅᕐᑐᖅ ᖃᐅᔨᓇᓱᒃᑲᓐᓂᕐᓂᐊᕐᓂᕋᖅᖢᓂ ᓯᓚᑦᑐᕐᓴᖅᕕᒃᒥ ᐊᒻᒪ ᐃᓕᓐᓂᐊᕐᓂᓕᕆᔨᒃᑯᓐᓂᒃ ᐃᖅᑲᓇᐃᔮᖅᑖᖅᑎᑕᐅᔪᑦ ᖃᔅᓯᐅᓯᒪᓂᖏᓐᓂᒃ ᐊᒻᒪᓗ ᖃᓄᐃᑦᑐᓂ ᐃᑲᔫᑎᑕᖃᕐᒪᖔᑦ ᐱᐅᓯᕚᓪᓕᕈᑎᐅᔪᓐᓇᖅᑐᓂᒃ ᐃᓕᓐᓂᐊᖅᑎᑦ ᐃᖅᑲᓇᐃᔮᓄᑦ ᐱᓇᓱᒍᓐᓇᑦᑎᐊᕐᓂᕐᓴᐅᓂᐊᕐᒪᑕ, ᖃᐅᔨᓴᕈᑎᐅᕙᒃᑐᓂᒃ ᐃᓕᓐᓂᐊᖅᓯᒪᓂᕐᒧᑦ ᐊᒻᒪᓗ ᐃᖅᑲᓇᐃᔮᒃᓴᓂᒃ ᖃᐅᔨᓴᕈᑎᓂᒃ.
“ᐅᓇ ᐃᓕᓐᓂᐊᕆᐊᒃᑲᓐᓂᕐᕕᒃᓴᑐᐊᖑᓪᓗᓂ ᓄᓇᕗᒥᑦ ᐃᓕᓐᓂᐊᕆᐊᖃᑦᑕᖅᑐᑦ ᐊᓂᒍᐃᔪᓐᓇᖁᒐᑦᑎᒍᑦ,” ᐅᖃᕐᑐᖅ.
ᐱᓕᕆᑦᑎᐊᖅᑐᖅ ᐋᑕᒻ