ᓄᑖᖅ ᐃᖃᓗᖕᓂ STEAM ᐃᓕᓐᓂᐊᒐᒃᓴᖅ ᐱᓕᕆᐊᖃᕈᒪᔾᔪᑎᐅᑦᑎᐊᖅᐳᖅ
ᐃᓅᓱᒃᑐᑦ ᐃᓕᓐᓂᐊᖅᑎᑕᐅᓂᐊᕐᑐᑦ ᓇᑭᙶᕈᓯᑦᑎᓐᓂᒃ (DNA), ᖃᓄᖅ ᖃᕋᓴᐅᔭᐃᑦ ‘ᐃᓱᒪᕙᖕᒪᖔᑕ’ ᐊᒻᒪᓗ 3D-ᒥ ᐊᒥᐊᕆᓂᕐᒥᒃ
ᒪᕐᕉᒃ ᐊᑕᐅᓯᕐᒥᒃ ᐱᓇᓱᐊᕈᓯᕐᒥᒃ STEAM ᐃᓕᓐᓂᐊᒐᒃᓴᖅ ᐱᓕᕆᐊᖑᓂᐊᖅᑐᖅ ᐅᑯᓄᖓ ᐱᙳᐊᖅ ᐃᓂᒋᕙᒃᑕᖓᓂᒃ ᐃᖃᓗᖕᓂ ᑕᒪᑐᒪᓂ ᑕᖅᑭᒥᓐ. (ᐊᔾᔨᓕᐅᕆᔨ ᒥᓚᓂ ᐅᕆᑦᓵᑦ)
For an English version of this story, see New Iqaluit STEAM camp sees high demand
ᐃᓕᓐᓂᐊᕈᒪᕈᓘᔭᕐᒪᑕ ᖃᐅᔨᓴᖅᑐᓕᕆᓂᕐᒥᒃ ᐊᒻᒪᓗ ᐱᓕᕆᔾᔪᑎᓕᕆᓂᕐᒥᒃ ᐃᖃᓗᖕᓂ ᐅᑯᓄᖓ STEAM ᐃᓕᓐᓂᐊᒐᒃᓴᓄᑦ ᐃᓂᒃᓴᐃᑦ ᓈᒻᒪᒃᓯᑲᐅᖅᑐᖅᑎᓪᓗᒋᑦ ᐃᑲᕐᕋᑦ 24 ᑐᖔᓂ.
ᐅᓇ STEAM ᑐᒃᖃᖅᑎᓯᒪᔪᖅ ᐅᑯᓄᖓ ᖃᓪᓗᓈᑐᑦ ᑎᑎᕋᖅᓯᒪᓂᖏᑦᑎᒍᑦ ᐅᑯᐊ ᖃᐅᔨᓴᖅᑐᓕᕆᓂᖅ, ᐱᓕᕆᔾᔪᑎᓕᕆᓂᖅ, ᐊᐅᓚᔾᔪᑎᒃᓴᓕᕆᓂᖅ, ᑎᑎᕋᐅᔭᒐᕐᓂᖅ ᐊᒻᒪᓗ ᓇᐃᓴᐅᓯᕆᓂᖅ, ᐊᒻᒪᓗ ᖃᐅᑕᒫᑦ ᐃᓕᓐᓂᐊᖅᑎᓪᓗᒋ ᑖᒃᑯᓂᖓ ᓇᓕᐊᓐᓂᒃ ᐃᓕᓐᓂᐊᖅᑎᑕᐅᖃᑦᑕᕐᓂᐊᖅᖢᑎᒃ, ᐃᓕᓐᓂᐊᕐᕕᒃᒧᑦ ᐊᖓᔪᖅᑳᖅ ᐱᐊᓐ ᕗᐊᔅᕕᐊᓪ ᐅᖃᓚᐅᕐᑐᖅ.
“ᖁᕕᐊᓱᕈᓘᔭᒻᒪᕆᒃᑐᖓ ᑕᒪᑐᒥᖓ ᐱᓕᕆᖃᑎᖃᕐᓂᐊᕐᓂᓐᓂᒃ (STEAM) ᓄᑕᕋᕐᓂᒃ ᐊᒻᒪ ᐃᓕᓐᓂᐊᕐᓗᑎᒃ ᑕᐅᑐᒡᓗᒋᑦ,” ᐅᖃᖅᑐᖅ ᕗᐊᔅᕕᐊᓪ, ᑖᓐᓇ ᐊᖓᔪᖅᑳᕆᔭᐅᔪᖅ ᐃᓕᓐᓂᐊᕐᕕᒃᒥᑦ ᐅᑯᓄᖓ ᐱᙳᐊᖅᒧᑦ.
ᐱᙳᐊᖅ – ᑐᑭᓕᒃ ᐱᙳᐊᖅ – ᑲᑐᔾᔨᖃᑎᒌᖑᔪᑦ ᓄᓇᖃᖅᑳᖅᑐᓂᒃ ᐊᒻᒪ ᓄᓇᓕᕋᓛᓂ ᐱᓕᕆᖃᑎᖃᖅᐸᒃᖢᑎᒃ ᐊᔪᕈᓐᓃᖅᓴᖅᑎᑦᑎᓂᕐᒥᒃ STEAM ᐃᓕᓐᓂᐊᒐᒃᓴᓂᒃ.
“ᖁᕕᐊᓇᖅᑐᐊᓘᖕᒪ ᑕᐅᑐᒃᖢᓂ ᓱᕈᓯᕐᓂ ᐃᓕᑉᐸᓪᓕᐊᕙᒃᑐᓂ ᐃᔨᖏ ᖃᐅᔨᑳᓪᓚᒃᑐᑦ ᓇᓗᓇᖅᐸᙱᖢᑎᒃ.”
ᐅᓇ ᐃᓕᓐᓂᐊᕐᓂᖅ ᒪᕐᕈᐃᓂᒃ ᐱᓇᓱᐊᕈᓰᖕᓂ ᑕᑭᓂᖃᕐᑐᖅ, ᓯᕗᓪᓕᖅ ᐱᒋᐊᕐᕕᖃᕐᓂᐊᖅᖢᓂ ᐋᒐᓯ 23 ᐊᒻᒪ ᐊᐃᑉᐸᖓ ᐋᒐᓯ 30-ᒥ.
ᓯᕗᓪᓕᕐᒥ ᐅᓪᓗᕐᒥ ᐃᓕᓐᓂᐊᕆᐊᖅᑐᑦ – ᐊᕐᕌᒍᓖᑦ 8-ᓂ 14-ᓄ – ᐃᓕᓐᓂᐊᖅᑎᑕᐅᓂᐊᕐᑐᑦ ᖃᓄᖅ DNA ᐱᓕᕆᔾᔪᑎᐅᕙᖕᒪᖔᑦ, ᓯᑐᕌᐱᐅᕆᔅᓂᒃ ᐊᑐᕐᓗᑎᒃ ᖃᐅᔨᓇᓱᒡᓗᑎᒃ.
ᐅᓪᓗᖅ 2 ᐱᓕᕆᔾᔪᑎᓕᕆᓂᐊᖅᖢᑎᒃ ᐊᒻᒪᓗ ᐃᓕᓐᓂᐊᕈᑎᐅᓂᐊᖅᖢᓂ ᖃᓄᖅ ᖃᕋᓴᐅᔭᖅ “ᐃᓱᒪᕙᖕᒪᖔᑦ.”
ᐊᐅᓚᔾᔪᑎᓕᕆᓂᕐᒥᒃ ᒪᓐᓂᖕᒥ ᑲᑕᑦᑎᑕᐅᔪᒥ ᖁᑦᑎᒃᑐᒥ ᓱᕋᒃᑎᑦᑎᑦᑕᐃᓕᔾᔪᑎᒃᓴᓕᕆᓂᐊᖅᖢᑎᒃ.
ᑎᑎᕋᐅᔭᒐᕐᓂᕐᒧᓪᓕ, ᕗᐊᔅᕕᐊᓪ ᐋᖅᑭᒃᓯᓂᐊᖅᖢᓂ ᐱᙳᐊᖅ ᐅᓄᖅᓯᓕᕆᔾᔪᑎᖓᓂᒃ 3D-ᒥ ᐊᒥᐊᕈᓐᓇᓕᖅᑎᑦᑎᓗᓂ ᑖᒃᑯᐊ ᑎᑎᕋᐅᔭᒐᕈᓐᓇᕐᓂᐊᕐᒪᑕ.
ᑭᖑᓪᓕᖅᐹᒥᓪᓕ ᐅᓪᓗᕐᒥ, ᐃᓕᓐᓂᐊᕐᑎᐅᔪᑦ ᖃᐅᔨᓴᕐᓂᐊᖅᑐᑦ ᓇᐃᓴᐅᓯᕆᓂᕐᒥᒃ ᓇᐃᓴᐃᓗᑎᒃ ᐊᒻᒪ ᐊᕕᒃᑐᐃᓗᑎᒃ ᐲᑦᓴᓂᒃ.
ᐅᓇᓕ ᐃᓅᓱᒃᑐᓂ ᐃᖃᓗᖕᓂ ᓄᓇᕗᒥᓪᓗ ᖁᕕᐊᒋᔭᖃᓕᖅᑎᑦᑎᔾᔪᑎᐅᓇᓱᒃᑐᖅ ᑖᒃᑯᓂᖓ ᐃᓕᓐᓂᐊᕈᑎᐅᔪᓂᒃ, ᕗᐊᔅᑦᕕᐊᓪ ᐅᖃᖅᑐᖅ.
“ᐅᓄᕐᓂᕐᓴᐃᑦ ᐃᓅᓱᒃᑐ ᑕᒪᒃᑯᓂᖓ ᖁᕕᐊᒋᔭᖃᓕᖅᐸᑕ ᐱᐅᓂᕐᓴᐅᓇᔭᕐᒪ ᐃᓐᓇᕈᒃᑲᓐᓂᕐᓯᒪᓕᕈᑎᒃ ᐊᒻᒪᓗ ᐃᓕᓐᓂᐊᕈᒪᓂᕐᓴᐅᓗᑎᒃ ᐃᓕᓐᓂᐊᕐᕕᐊᓗᖕᒥᑦ ᐊᒻᒪ ᓯᓚᑦᑐᖅᓴᕐᕕᒃᒥᑦ,” ᐅᖃᖅᑐᖅ.
ᐅᓇ ᐃᓕᓐᓂᐊᕐᓇᖅ ᓯᕗᓪᓕᖅᐹᖅ ᐅᐸᒍᑎᓯᒪᓂᒃᑯᑦ ᐅᑯᐊ ᐱᙳᐊᖅ ᐱᓕᕆᐊᕆᔭᖏᓐᓂᒃ ᐃᓅᓱᒃᑐᓄᑦ ᑕᐃᒪᙵᑦ ᓄᕙᒡᔪᐊᕐᓇᖅ-19 ᓄᖅᑲᖅᑎᑦᑎᔾᔪᑎᐅᑲᑕᓚᐅᖅᑐᑦ ᐊᑐᖅᑕᐅᙱᔾᔫᒥᓕᖅᑎᓪᓗᒋᑦ, ᑕᐃᒪᓐᓇᓗ ᐊᐅᔭᐅᔪᖅ ᐃᓕᓐᓂᐊᕈᑎᐅᔪᓐᓇᕐᓂᐊᖅᖢᓂ.
ᐃᓂᒃᓴᕆᑎᑕᐅᔪᑦ ᐃᓄᖃᓕᑲᐅᖅᑐᖅᑎᓪᓗᒋ ᕿᓚᒥᕈᓗᒃ, ᕗᐊᔅᕕᐊᓪ ᐅᖃᓚᐅᕐᑐᖅ ᑲᑐᔾᔨᖃᑎᒌᖑᔪᑦ ᐃᓱᒪᓂᖏᓐᓂᒃ ᐱᓇᓱᐊᕈᓯᒃᑲᓐᓂᕐᒥᒃ ᐃᓚᒋᐊᕈᒪᓪᓗᒍ.
ᐃᓅᓱᒃᑐ ᑖᔅᓱᒥᖓ ᖁᕕᐊᒋᔭᖃᖅᐸᑕ ᐊᒻᒪᓗ ᐱᓕᕆᔨᐅᔪᑦ ᐱᙳᐊᖅᒧᑦ ᑕᒪᑐᒥᖓ ᐊᒃᑐᐃᓂᖃᑦᑎᐊᕈᓱᒃᐸᑕ, ᕗᐊᕕᐊᓪ ᐅᖃᓚᐅᕐᑐᖅ ᑕᒪᓐᓇ “ᑲᔪᓯᓪᓚᕆᓛᖅᑐᖅ” ᓯᕗᓂᒃᓴᑦᑎᓐᓂᒃ.
(0) Comments