ᓄᓇᕗᑦ ᓯᕗᓂᒃᓴᕗᒃᑯᑦ ᐱᓕᕆᐊᖃᖅᖢᑎᒃ ᐊᑎᓕᕆᓂᕐᒥᒃ, ᐊᕐᓇᖅ ᐅᕙᓂ ᐊᔾᔨᙳᐊᓕᒃ ᓇᓗᓇᐃᖅᑕᐅᓚᐅᕐᑐᖅ ᐄᑎᑦ ᐸᑦᓴᐅᖅᖑᓂᖓᓂᒃ, ᒫᑰᓯ ᐸᑦᓴᐅᖅ ᐊᓈᓇᖓ, ᑖᓐᓇᓗ 1953-ᒥ ᓅᑕᐅᖃᑕᐅᓚᐅᕐᓯᒪᓪᓗᓂ ᐃᓚᒌ ᖃᐅᓱᐃᑦᑐᒧᑦ. ᐅᓇ ᐃᓚᒋᔭᐅᔪᖅ ᒐᕙᒪᒃᑯ ᐊᔾᔨᙳᐊᖁᑎᖏᓐᓂᒃ ᐊᔾᔨᓕᐅᖅᑕᐅᖃᑦᑕᖅᑐᕕᓂᕐᓂᒃ ᒐᕙᒪ ᔭᓄᕈ ᕕᓐᓴᓐ ᒫᓯ ᐳᓛᖅᑎᓪᓗᒍ 1956-ᒥᑦ ᖃᐅᓱᐃᑦᑐᒧᑦ, ᐃᓚᒋᔭᐅᓪᓗᓂ ᐅᑭᐅᕐᑕᖅᑐᕐᒥᒃ ᐳᓚᕋᑲᑕᖕᓂᖓᓂᒃ ᒫᑦᓯᐅᑎᓪᓗᒍ. (ᐅᖃᓕᒫᒐᖃᕐᕕᒃᒥᑦ ᐊᒻᒪ ᐸᐸᑕᐅᔪᓂᒃ ᑲᓇᑕᒥ)

ᓄᒃᑎᖅᑕᐅᓂᖅ ᓱᕈᓯᐅᓪᓗᓂ: ᐊᑕᐅᓯᕐᒧᑦ ᐊᖑᑎᒧᑦ ᐊᑐᖅᑕᐅᓂᑯᑦ – ᐃᓚᖓ 1

ᐊᖏᕐᕋᖅᓯᖅᑑᒐᓗᐊᖅ ᐊᓈᓇᑦᑎᐊᕆᔭᐅᔪᖅ ᐊᖏᕐᕋᓚᐅᕐᓯᒪᙱᓚᖅ

By ᒫᑰᓯ ᐸᑦᓴᐅᖅ

1953-ᒥᑦ ᐊᒻᒪ 1055-ᒥᑦ, ᒐᕙᒪᑐᖃᒃᑯᑦ ᓄᒃᑎᖅᑎᑦᑎᓚᐅᕐᓯᒪᖕᒪᑕ 90 ᐅᖓᑖᓃᑦᑐᓂᒃ ᐃᓄᖕᓂ ᐃᓄᒃᔪᐊᒃᒥᑦ ᐊᒻᒪ ᒥᑦᑎᒪᑕᓕᒃᒥᑦ ᖃᐅᓱᐃᑦᑐᒧᑦ ᐊᒻᒪᓗ ᒍᕆᒡ ᕼᐋᐳᒧᑦ ᐅᕙᓂ Ellesmere Island-ᒥ. 1956-ᓗ 1962-ᓗ ᐊᑯᓐᓂᖓᓂ, ᐃᓚᒌ ᒍᕆᒡ ᕼᐋᐳᒦᑦᑐᑦ ᓄᒃᑎᓚᐅᕐᓯᒪᔪᑦ 40 ᒪᐃᓕᒥ ᐅᖓᓯᖕᓂᓕᖕᒧᑦ ᐊᐅᓱᐃᑦᑐᒧᑦ.

ᒫᑰᓯ ᐹᑦᓴᐅᖅ ᐃᓄᒃᔪᐊᒃᒥᐅᑕᖅ, ᒫᓐᓇ ᐅᑭᐅᖃᖅᑐᖅ 77-ᓂ, ᐃᓚᖃᖅᖢᓂ ᐊᑖᑖᖓᓂᒃ, ᐊᓈᓇᖓᓂᒃ, ᓇᔭᖓᓂᒃ ᐊᒻᒪ ᐱᖓᓱᑦ ᓄᑲᖏ, ᓅᑕᐅᓚᐅᕐᓯᒪᖕᒪᑕ ᖃᐅᓱᐃᑦᑐᒧᑦ 1953-ᒥᑦ.

ᐅᑯᓇᓂ ᑎᓴᒪᐅᓕᖓᔪᓂ ᐅᓂᒃᑳᓕᐊᓂ ᑐᓂᔭᐅᓂᑯᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ, ᐹᑦᓴᐅᖅ ᐃᖅᑲᐅᒪᕗᖅ ᐊᒃᓱᕈᓚᐅᕐᓯᒪᓂᖏᓐᓂᒃ ᐃᓅᖃᑎᖏᓪᓗ ᖁᑦᑎᒃᑐᒧᑦ ᓅᑕᐅᓵᕐᓯᒪᑎᓪᓗᒋᑦ.

ᔪᓚᐃ 28, 1953-ᒥᐅᓚᐅᕐᓯᒪᔪᖅ, ᑖᓐᓇ ᐊᑯᓂᐊᓗᒃ ᐃᓛᓐᓂᒃᑯᓪᓗ ᖁᕕᐊᓇᙱᒻᒪᕆᓚᐅᖅᐸᒃᖢᓂ ᖁᑎᒃᑐᕐᒦᓐᓂᕗᑦ ᐱᒋᐊᖅᑎᓪᓗᒍ, ᑖᓐᓇ ᐅᓪᓗᖅ ᐃᖅᑲᐅᒪᐃᓐᓇᕐᓂᐊᖅᑕᕗᑦ ᑐᖁᓂᑦᑎᓐᓄᑦ.

ᑕᕝᕙᓂ ᐅᓪᓗᕐᒥ ᐃᓄᒃᔪᐊᒃᒥᑦ, ᑎᒎᑎᑲᑕᓚᐅᕐᓯᒪᕗᒍᑦ ᐃᓚᑦᑎᓐᓂ ᑭᖑᓪᓕᖅᐹᕐᒥ. ᐃᖅᑲᐅᒪᔪᖓ ᐊᑦᑕᒐ ᒥᓂ ᕿᐊᔪᖅ ᓂᐱᖃᑦᑎᐊᖅᖢᓂ ᐸᓂᖕᒥᓂ ᐃᕿᑦᑎᓪᓗᓂ ᐊᒻᒪ ᐊᓈᓇᓐᓂ. ᐊᒥᓱᑦ ᐊᕐᓇᐃᑦ ᓂᐱᖃᖅᖢᑎᒃ ᕿᐊᓚᐅᕐᓯᒪᖕᒥᔪᑦ.

ᓄᓇᕗᑦ ᓯᕗᓂᒃᓴᕗᒃᑯᑦ ᐱᓕᕆᐊᖃᖅᖢᑎᒃ ᐊᑎᓕᕆᓂᕐᒥᒃ, ᐊᕐᓇᖅ ᐅᕙᓂ ᐊᔾᔨᙳᐊᓕᒃ ᓇᓗᓇᐃᖅᑕᐅᓚᐅᕐᑐᖅ ᐄᑎᑦ ᐸᑦᓴᐅᖅᖑᓂᖓᓂᒃ, ᒫᑰᓯ ᐸᑦᓴᐅᖅ ᐊᓈᓇᖓ, ᑖᓐᓇᓗ 1953-ᒥ ᓅᑕᐅᖃᑕᐅᓚᐅᕐᓯᒪᓪᓗᓂ ᐃᓚᒌ ᖃᐅᓱᐃᑦᑐᒧᑦ. ᐅᓇ ᐃᓚᒋᔭᐅᔪᖅ ᒐᕙᒪᒃᑯ ᐊᔾᔨᙳᐊᖁᑎᖏᓐᓂᒃ ᐊᔾᔨᓕᐅᖅᑕᐅᖃᑦᑕᖅᑐᕕᓂᕐᓂᒃ ᒐᕙᒪ ᔭᓄᕈ ᕕᓐᓴᓐ ᒫᓯ ᐳᓛᖅᑎᓪᓗᒍ 1956-ᒥᑦ ᖃᐅᓱᐃᑦᑐᒧᑦ, ᐃᓚᒋᔭᐅᓪᓗᓂ ᐅᑭᐅᕐᑕᖅᑐᕐᒥᒃ ᐳᓚᕋᑲᑕᖕᓂᖓᓂᒃ ᒫᑦᓯᐅᑎᓪᓗᒍ. (ᐅᖃᓕᒫᒐᖃᕐᕕᒃᒥᑦ ᐊᒻᒪ ᐸᐸᑕᐅᔪᓂᒃ ᑲᓇᑕᒥ)

ᖃᓄᐃᖅᑰᔨᓐᓇᓚᐅᕐᓯᒪᔪᖅ ᐊᒥᓱᑦ ᐃᓐᓇᐃ ᕿᐊᑎᓪᓗᒋᑦ ᐊᑕᐅᑦᑎᒃᑯᑦ. ᐊᒥᓲᙱᑦᑐᑦ ᐅᖃᓪᓚᓚᐅᕐᑐᑦ ᐃᑲᔫᑎᓂᒃ.

“ᐅᑎᓛᖅᑐᒍᑦ ᐊᕐᕌᒎ ᒪᕐᕉᖕᓂ.” “ᑕᑯᖃᑦᑕᐅᑎᒃᑲᓐᓂᓛᖅᑐᒍᑦ ᖃᓂᑦᑐᒥ.” ᑖᒃᑯᐊᓕ ᐅᖃᐅᓰᑦ ᓱᓕᑎᑕᐅᓚᐅᕐᓯᒪᙱᑦᑐᑦ.

ᐅᓐᓄᓴᑯᓗᑐᐃᓐᓇᒥᑦ, ᑐᙵᕕᒃᐳᑦ, ᑕᒫᓃᒻᒪᕆᒃᑐᑦ ᓄᓇᑦᑎᓐᓂ, ᐊᒧᔭᐅᓪᓗᑎ ᐃᓚᒌᖕᓂᕗᓪᓗ ᓱᕋᒃᑕᐅᓪᓗᓂ. ᐊᓯᐅᔨᓂᖅ ᓄᓇᒋᔭᒥ ᐊᒻᒪ ᕿᒪᐃᓪᓗᓂ ᐃᓚᑦᑎᓐᓂᒃ ᐊᔪᕐᓇᕐᓂᖅᐹᖑᓚᐅᕐᑐᖅ ᐊᑐᖅᖢᒍ.

ᐅᑭᐅᕐᑕᖅᑑᑉ ᖁᑦᑎᒃᑐᖓ, 1950-ᖏᓐᓂ ᐃᓂᒃᓴᐅᓚᐅᕐᙱᑦᑐᖅ ᐃᓐᓇᑐᖃᕐᓄᑦ, ᐋᓐᓂᐊᖅᑐᓄᑦ, ᐊᔪᕈᑎᓕᖕᓄᑦ, ᑳᒃᑐᓄᑦ, ᐊᔪᖅᑐᓄᑦ ᐊᒻᒪ ᐊᓯᐅᔪᓄᑦ. ᑭᓯᐊᓂᓕ 1953/54-ᒥ ᓯᕗᓕᖅᐹᒥ ᐅᑭᐅᕐᓯᐅᖅᖢᑕ ᓅᑕᐅᕝᕕᒋᔭᑦᑎᓐᓂᒃ ᖁᑦᑎᒃᑐᒥᑦ, ᑕᐃᒪᐃᓕᖓᑦᑎᐊᓚᐅᕐᓯᒪᕗᒍᑦ.

ᐃᖏᕐᕋᒃᑲᓐᓂᓕᕐᑎᓪᓗᑕ ᐅᐊᖕᓇᕐᒧᑦ ᐅᓪᓗᓂ ᖁᓕᓂ ᑰᔾᔪᐊᕌᓗᖕᒦᓚᐅᕐᖢᑕ, ᐅᓪᓗᐃᑦ ᓂᒡᓚᓱᖕᓂᕐᓴᐅᓕᓚᐅᕐᑐᑦ ᐊᒻᒪ ᓯᑯᑕᖃᐅᖅᐸᓪᓕᐊᓪᓗᓂ ᐊᖁᑎᕗᑦ. ᑕᒪᑦᑕ ᑲᒪᓚᐅᕐᑐᒍᑦ ᓯᑯᑕᖃᕐᓂᖓᓂᒃ ᐊᐅᔭᒃᑯᑦ.

ᐊᓱᐃᓛᒃ ᐸᖕᓂᕐᑑ ᖃᓂᒋᔭᖓᓄᐊᓕᕐᖢᑕ, ᓲᕐᓗ ᐅᑭᐅᖑᔪᖅ, ᐊᖏᔫᑎᐊᓗᖕᓂ ᓯᑯᑕᖃᐅᕐᖢᓂ ᑕᕆᐅᖅ. ᑭᙶᓗᐃ ᕿᑭᖅᑖᓘ ᓂᒋᕐᐸᓯᐊᓂᒃ ᓴᕿᖢᑎᒃ ᑕᒃᓯᖅᑐᒥ ᐊᒻᒪᓗ ᓯᓚ ᒪᑐᐃᑳᓪᓚᒃᖢᓂ ᑕᐅᑐᒃᖢᑎᒍ, ᑖᒃᑯᐊ ᑭᙶᓗᐃᑦ ᕿᓚᖕᒧ ᑎᑭᑲᓴᒃᓯᒪᔪᑦ.

ᐃᖏᕐᕋᑎᓪᓗᑕ ᖁᑦᑎᒃᑐᒧᙵᐅᕙᓪᓕᐊᓪᓗᑕ ᐋᒐᓯ ᓄᖑᓕᕐᑎᓪᓗᒍ, ᓄᓇᐃᑦ ᕿᑭᖅᑖᓘ ᐅᐊᖕᓇᖓᓃᑦᑐᑦ ᐊᐳᑎᖃᕇᓕᓚᐅᕐᑐ. ᐊᒻᒪᓗ ᐅᑭᐅᕐᑕᖅᑑᑉ ᐊᓄᕆᖓ ᓂᒡᓚᓱᖕᓈᓘᓪᓗᑎᒃ ᐅᓪᓗᒃᑯ, ᖃᓂᒡᓕᑎᓪᓗᑕ ᖃᐅᓱᐃᑐᒧᑦ ᐅᕙᓂ Cornwallis Island.

ᐊᖏᕐᕋᕐᓯᖅᑐᖅ ᐊᓈᓇᑦᑎᐊᖅ

ᐊᓈᓇᑦᑎᐊᕋ, ᓇᓕ ᐊᒪᕈᐊᓕᒃ, ᐃᓅᓚᐅᕐᓯᒪᔪᖅ 1874-ᒥᑦ. ᐃᓐᓇᐅᓕᕋᓗᐊᖅᖢᓂ, ᐊᖏᕐᕋᑦᑎᓐᓃᖢᑕ ᓱᓕ ᐃᓄᒃᔪᐊᒃᒥᑦ, ᖃᓄᐃᓚᐅᕐᓯᒪᙱᑦᑐᖅ ᐋᓐᓂᐊᙱᖢᓂ ᐊᒻᒪᓗ ᐱᓕᕆᔭᒃᓴᖃᐃᓐᓇᐅᔭᖅᖢᓂ ᐅᓪᓛᖓᓂ ᐅᓐᓄᒃᒧᑦ, ᑲᑎᕐᓱᐃᓪᓗᓂ ᕿᔪᒐᓚᖕᓂ ᐊᒻᒪ ᕿᓚᒃᖢᓂᒋ ᓇᖕᒪᓕᖅᐸᒃᖢᓂᒋ ᐃᓚᒌᑦ ᑐᐱᖓᓄᑦ.

ᒥᕐᓱᐃᓐᓇᐅᔭᓚᐅᕐᓯᒪᔪᖅ ᑲᒥᖕᓂᒃ ᐅᕝᕙᓘᓐᓃᑦ ᓂᕿᓕᐅᖅᖢᓂ ᐃᓚᒌᓄᑦ. ᕿᑲᑕᐃᓐᓇᖅᑰᔨᕙᓚᐅᕐᑐᖅ ᐱᓕᕆᐊᖏᓐᓂ ᐸᐅᕐᖓᖅᑕᕐᓇᕐᓯᑎᓪᓗᒍ.

ᑕᐃᒪᐃᓕᕌᖓ ᐊᕐᓇᐃᑦ ᓱᕈᓰᓪᓗ ᐊᕝᕗᖃᑦᑕᓕᓚᐅᕐᓯᒪᖕᒪᑕ ᓄᓇᒥᙶᖅᑐᓂᒃ ᐊᒻᒪ ᐊᖏᕐᕋᐅᑎᓪᓗᒋ ᐃᓚᒌᓄᑦ ᓂᕆᔭᐅᓂᐊᕐᒪᑕ.

ᐊᓈᓇᑦᑎᐊᕋ ᐃᓚᐅᖃᑦᑕᐃᓐᓇᓚᐅᕐᓯᒪᔪᖅ ᖃᓄᐃᓕᐅᖅᐸᓪᓕᐊᑎᓪᓗᑕ ᐊᖏᕐᕋᑦᑎᓐᓂ. 1953 ᐊᐅᔭᖓᓂᒡᓕ, ᑭᓯᐊᓂ, ᑖᓐᓇᑦᑕᐅᖅ ᑐᙵᕕᐊᓂᒃ ᐊᒧᔭᐅᑐᐃᓐᓇᓚᐅᕐᓯᒪᔪᖅ ᐊᖏᕐᕋᕇᓐᓇᐅᔭᖅᑕᑦᑎᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂ.

ᑕᐃᒪᙵᓂᒃ ᑎᑭᓐᓇᑦᑕ ᐅᑭᐅᕐᑕᖅᑑᑉ ᖁᑦᑎᒃᑐᖓᓄᑦ ᐅᑭᐊᒃᓵᒃᑯᑦ ᑕᕝᕙᓂ ᐊᕐᕌᒍᒥ, ᐱᓇᓱᐊᕈᓰ 6 ᐃᖏᕐᕋᓪᓗᑕ ᑕᕝᕙᓂ ᓰ ᑏ ᕼᐊᐅᒥ, ᐊᓈᓇᑦᑎᐊᒪ ᐃᓅᓯᖓ ᐊᓯᙳᕐᔪᐊᓚᐅᕐᓯᒪᔪᖅ.

ᖁᕕᐊᓱᒃᑲᐅᔪᓐᓃᖅᖢᓂ, ᐅᖃᓪᓗᕆᒍᓐᓃᖅᖢᓂ ᐊᒻᒪ ᓇᒡᓕᒍᓱᖂᔨᔪᓐᓃᖅᖢᓂ. ᓄᖃᕈᓐᓇᙱᓐᓂᖓ ᐅᖃᐱᓗᐃᓐᓇᖃᑦᑕᕐᓂᖓ ᓂᕿᖃᑦᑎᐊᙱᓐᓂᕐᒥᒃ ᐊᒻᒪᓗ ᓄᓇ ᑭᓱᖃᙱᓐᓂᖓ ᓈᒻᒪᙱᓐᓂᕐᓴᒃᑯᑦ ᐊᒃᑐᐃᒍᑎᐅᓕᓚᐅᕐᓯᒪᔪᖅ ᐃᓚᒌᓕᒫᓄ.

ᖁᑦᑎᒃᑐᒥ ᐅᑭᐅᕐᑕᖅᑐᕐᒥ ᑭᓱᑕᖃᕈᓘᔭᙱᒻᒪ ᐊᒻᒪ ᐆᒪᔪᖃᑦᑎᐊᙱᖢᓂ. ᓂᕿᒋᕙᒃᑕᕗᑦ ᒪᑯᐊ ᓂᕐᓖᑦ, ᑲᖑᐃᑦ, ᒥᑏᑦ, ᐊᕿᒌᑦ ᐊᒻᒪ ᐊᓯᖏᑦ ᑎᖕᒥᐊᑦ ᐊᒻᒪ ᒪᓐᓂᖏ, ᐃᖃᓗᐃᑦ ᐊᔾᔨᒌᖏᑦᑑᑎ, ᐊᒻᒪᓗ ᐸᐅᕐᖓᐃᑦ ᓄᓇᒥᙶᖅᑐᑦ ᐊᓯᐅᑐᐃᓐᓇᓚᐅᕐᑐᑦ ᐃᓅᓯᑦᑎᓐᓂ ᖁᑦᑎᒃᑐᒥ ᐅᑭᐅᕐᑕᖅᑐᕐᒧᐊᕋᑦᑕ.

ᐃᓄᒃᑎᑐᑦ ᓇᓂᑐᐃᓐᓇᖅ, ᑳᖃᑦᑕᓚᐅᕐᐳᒍᑦ ᓂᕿᓂᒃ ᐊᔾᔨᒌᙱᑦᑐᓂᒃ ᑎᒥᑎᓐᓄᑦ ᐊᒻᒪ ᐋᓐᓂᐊᖃᕐᑕᐃᓕᓂᕐᒧ ᐱᔭᕆᐊᖃᖅᑕᑦᑎᓂᒃ. ᐃᓄᒃ ᐊᑕᐅᓯᑐᐊᕐᒥ ᓂᕆᖃᑦᑕᐃᓐᓇᓕᕈᓂ ᐊᑯᓂᕈᓗ, ᑎᒥᖓ ᑖᔅᓱᒥᖓ ᐱᔪᒪᔪᓐᓂᕈᓐᓇᕐᒪᑕ ᐊᒻᒪᓗ ᑳᒍᓐᓃᕈᑎᐅᓕᕐᖢᓂ.

ᑕᒪᓐᓇᓕ ᐊᔪᕐᓇᓗᐊᓚᐅᕐᑐᖅ ᐊᓈᓇᑦᑎᐊᓐᓄ ᐃᖃᓗᒍᐃᓐᓇᖅᐸᒃᖢᓂ ᐊᒻᒪ ᐊᕿᒡᒋᕈᒃᐸᒃᖢᓂ.

ᓯᕗᓕᖅᐹ ᐅᑭᐅᖅ ᑕᐅᕙᓃᑎᓪᓗᑕ ᖁᖓᒍᓐᓇᑦᑎᐊᕈᓐᓃᓚᐅᕐᑐᒍ, ᓲᖃᐃᒻᒪ ᓄᓇ ᓱᕐᓗ ᑐᖁᔪᖅ. ᐱᕐᓕᕋᔭᒻᒪᕆᓚᐅᕐᓯᒪᔪᒍᑦ ᖃᓪᓗᓈᑦ ᐊᒃᑕᑯᖃᙱᑉᐸᑕ ᐅᕙᒍᑦ ᓂᕆᔪᓐᓇᖅᑕᖏᓐᓂᒃ. “ᖃᑯᒍᓕ ᐊᖏᕐᕋᐅᓛᕋᑦᑕ?” ᐊᓈᓇᑦᑎᐊᕋ ᐊᐱᕆᒡᒍᓚᐅᕐᑐᖅ.

ᑭᓯᐊᓂᓕ ᐊᐱᖁᑎᖓ ᑭᐅᔭᐅᔪᓐᓇᓚᐅᙱᑦᑐᖅ. ᓱᓇᐅᕝᕙᓕ ᐃᓚᒋᔭᐅᓂᐊᖅᑐᖅ ᐊᒥᓱᓄᑦ ᐃᓚᑦᑎᓐᓂ ᐊᖏᕐᕋᖓᓂ ᑕᑯᓚᐅᕐᓯᒪᔾᔮᔪᓐᓃᖅᑐᓂᒃ.

ᐊᐃᑦᑖᖑᒐᓗᐊᖅ, ᐊᓈᓇᑦᑎᐊᕋ ᐋᓐᓂᐊᕐᒥᓂᒃ ᑳᖕᓂᕐᒥᓂᒡᓗ ᒪᒥᐊᓂᒍᓐᓇᓚᐅᙱᑦᑐᖅ.

ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒍ ᐃᓅᔪᓐᓃᓚᐅᕐᓯᒪᔪᖅ, ᓱᓕ ᐊᐱᖅᓱᖅᐸᒃᖢᓂ ᖃᑯᒍ ᐊᖏᕐᕋᓛᕆᐊᒃᓴᑦᑎᓐᓂ. ᕕᕝᕗᐊᕆ 1956-ᒥ, ᐃᓅᓯᑯᑖᖓ ᐃᓱᓕᓚᐅᕐᓯᒪᕗᖅ ᐅᖓᓯᒻᒪᕆᒃᑐᐊᓗᖕᒥ ᐃᓚᖏᓐᓄᑦ ᐊᒻᒪ ᐊᖏᕐᕋᑐᖃᖃᓂ. ᐊᓈᓇᒐ ᐅᖃᒡᒍᓚᐅᕐᓯᒪᔪᖅ ᐊᓯᖑᑳᓪᓚᖕᓂᐊᓗᐊ ᓯᓚᐅ ᖃᓄᐃᓕᖓᓂᖓ ᐊᒻᒪᓗ ᑳᖏᓐᓇᐅᔭᕐᓂᖓ ᐃᖃᓗᖕᒥ ᐊᒻᒪ ᐊᓯᖏᓐᓂ ᓂᕿᓂ ᓄᓇᖓᓂ ᐱᔭᒃᓴᐅᖃᑦᑕᕐᓂᑯᓂ ᐃᑲᔪᕈᑎᐅᓚᐅᕐᓂᕋᖅᖢᓂᒋ ᐊᓈᓇᑦᑎᐊᒪ ᐃᓅᔪᓐᓃᕈᑎᐊᓄᑦ.

ᐊᓈᓇᒐ ᐅᖃᓚᐅᕐᒥᔪᖅ ᑕᐃᒪᙵ ᑐᒃᑲᒥᒃ ᑕᕝᕗᖓ ᓯᒡᔭᖓᒧᑦ ᐃᓅᔪᓐᓃᕐᓂᖓᓂᒃ, ᐊᓈᓇᑦᑎᐊᕋ ᖁᖓᒍᓐᓇᐃᓪᓕᖂᔨᔭᐅᕐᓯᒪᔪᖅ ᐊᓈᓇᓐᓄ ᐊᑕᐅᓰᖅᖢᓂᓘᓐᓃᑦ.

ᐅᖃᓕᒫᕈᓐᓇᕐᑕᓯ ᐃᓚᖓ 2 ᒫᑰᓯ ᐹᑦᓴᐅᖅ ᐅᓂᒃᑳᖓ ᐱᓇᓱᐊᕈᓯᐅᓂᐊᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

(0) Comments