ᑲᐱᔭᐅᕙᓪᓕᐊᔪᑦ ᓄᓇᕕᒻᒥᐅᑕᑦ ᐅᑭᐅᓖᑦ 12-ᓂ ᐅᖓᑖᓄᑦ, ᓄᓇᓕᒃᑎᒍᑦ, ᑎᑭᖢᓂ ᐋᒐᓯ 22. (ᐊᔾᔨᙳᐊᖅ ᐅᑯᓇᙵᑦ NRBHSS)
ᓄᓇᕕᒻᒥ ᑲᐱᔭᐅᔪᓐᓇᖅᑐᑦ ᑲᐱᔭᐅᓂᕐᓴᐅᕙᓪᓕᐊᕗᑦ, ᑭᓯᐊᓂᓕ ‘ᑕᒪᑐᒧᖓ ᐱᓕᕆᑎᑦᑎᓂᕐᓴᐅᔭᕆᓖᑦ’ ᐅᖃᖅᑐᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑎᒪᔨᖏᑦ
ᐋᒐᓯ 22-ᒥᑦ, 44 ᐳᓴᓐᑎᖏᑦ ᑲᐱᔭᐅᔪᓐᓇᖅᑐᐃᑦ ᑲᐱᔭᐅᕌᓂᒃᓯᒪᓕᖅᐳᑦ ᑕᒪᐃᓐᓂᒃ
For an English version of this story, see Nunavik’s vaccination rate on the rise, but ‘efforts must be increased’ says health board
ᓄᓇᕕᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔨᒻᒪᕆᖏᑦ ᐅᖃᒪᐅᕐᑐᑦ ᑲᐱᓯᓚᐅᕐᓂᖏᓐᓂᒃ 8 ᐳᓴᓐᑎᒃᑲᓐᓂᖏᓐᓂᒃ ᑲᐱᔭᐅᔪᓐᓇᖅᑐᐃᑦ ᔪᓚᐃᒥ ᐊᒻᒪ ᐋᒐᓯᒥ.
ᔪᓚᐃ ᐱᒋᐊᓕᓵᖅᑎᓪᓗᒍ, 36 ᐳᓴᓐᑎᖏᑦ ᓄᓇᕕᒻᒥᐅᑕᑦ ᐊᕐᕌᒍᓖᑦ 12-ᓂᑦ ᐅᖓᑖᓄ ᑲᐱᔭᐅᓯᒪᓚᐅᕐᓂᖏᓐᓂ ᒪᕐᕈᐃᓂᒃ ᑲᐱᔭᐅᔾᔪᑎᒃᓴᓂᒃ ᓄᕙᒡᔪᐊᕐᓇᖅ-19 ᑲᐴᑎᒧᑦ. ᐋᒐᓯ 22-ᒥ, 44 ᐳᓴᓐᑎᖏᑦ ᑲᐱᔭᐅᔪᓐᓇᖅᑐᐃᑦ ᑕᒫᓂ ᑲᐱᔭᐅᕌᓂᒃᓯᒪᓕᓚᐅᕐᑐᑦ ᑕᒪᐃᓐᓂ, ᐅᑯᐊ ᓄᓇᕕᒻᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐃᓄᓕᕆᔨᒃᑯᑦ ᐅᖃᓚᐅᕐᑐᖅ ᓯᑎᐱᕆ 14-ᒥ ᑐᓴᒐᒃᓴᓕᐅᖅᖢᑎᒃ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑎᒪᔨᖏᑦ ᓱᓕ ᓄᓇᕕᒻᒥᐅᓂᒃ ᑲᐱᓯᑲᑕᓚᐅᕐᑐᑦ ᐊᐅᔭᓕᒫᖅ ᐃᓂᒃᓴᓕᐅᖅᐸᒃᖢᑎᒃ ᓄᓇᓕᖕᓂ ᐋᓐᓂᐊᕕᖕᓂᒃ ᐊᒻᒪᓗ ᐃᓅᓱᒃᑐᓂᒃ ᓄᓇᕕᒃ ᐃᓕᓐᓂᐊᕐᕕᒃᓂᒃ ᑲᐱᓯᑲᑕᒃᖢᑎᒃ.
ᐅᑯᐊ ᐅᕆᐊᑦ ᑯᕌᔅᑯᑦ ᒪᕐᕈᐃᓂ ᐱᓕᕆᖃᑎᒌᓕᒃ ᐱᓕᕆᑎᑦᑎᓚᐅᕐᓯᒪᖕᒥᔪᑦ ᐋᒐᓯᐅᒥ ᑕᒪᓐᓇ ᖃᐅᔨᒪᔭᐅᑎᓐᓇᓱᒃᖢᒍ ᑲᐱᔭᐅᑲᑕᒋᐊᖃᕐᓂᖅ.
ᑭᓯᐊᓂᓕ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᐱᔭᐅᔭᕆᐊᓕᖕᓂ ᐱᐊᓂᒃᓯᙱᓗᐊᕐᓂᕋᖅᖢᑎᒃ ᑕᒫᓃᑦᑐᓂᒃ.
“ᑕᒪᑐᒥᖓ ᐱᓕᕆᐊᖃᕐᓂᖅᓴᐅᔭᕆᐊᖃᕐᑐᑦ ᑎᑭᐅᑎᓂᐊᖅᐸᑕ 75 ᐳᓴᓐᑎᖏᓐᓂᒃ ᑲᐱᔭᐅᔪᓐᓇᖅᑐᓂᒃ ᑲᐱᓯᓇᓱᒃᑎᓪᓗᒋᑦ,” ᐅᖃᖅᑐᖅ ᑲᑎᒪᔨᓄᑦ ᐅᖃᖅᑎᒋᔭᐅᔪᖅ ᔫᓯ ᓚᕙᒃ.
“ᐅᓇ ᑲᐴᑎ ᓱᓕ ᐊᑐᐃᓐᓇᐅᔪᖅ ᑲᐱᔭᐅᔪᒪᔪᓄᑦ.”
ᑲᐱᔭᐅᖃᑦᑕᖅᑐᑦ ᓇᓕᒧᒌᒃᑕᙱᑦᑐᑦ ᓄᓇᕕᒻᒥ 14-ᓂ ᓄᓇᓕᖏᓐᓂᒃ: 65 ᐳᓴᓐᑎᖏᑦ ᑰᔾᔪᐊᕌᐱᒃᒥᐅᑕ ᑲᐱᔭᐅᕌᓂᒃᖢᑎᒃ ᐊᒻᒪᓗ ᐅᕙᓂ ᐊᑯᓕᕕᒃᒥᑦ 29 ᐳᓴᓐᑎᑐᐃᓐᓇᖏᑦ ᑕᒪᐃᓐᓂ ᑲᐱᔭᐅᕌᓂᒃᓯᒪᓪᓗᑎᒃ.
ᑕᖅᑭᖅ ᐱᒋᐊᓕᖅᑎᓪᓗᒍ, ᓄᓇᕕᒃ ᒪᓕᒃᓴᓚᐅᖅᓯᒪᔪᖅ ᑯᐸᐃᒃᒥ ᐊᕐᕌᒍᓖᑦ 12-ᓂᒃ ᐅᖓᑖᓄ ᓴᖅᑭᑎᑦᑎᖃᑦᑕᕐᓗᑎᒃ ᑲᐱᔭᐅᕌᓂᒃᓯᒪᓂᖏᓐᓂᒃ ᓇᒧᑦ ᐃᓯᖅᑎᑕᐅᓚᐅᙱᓐᓂᖏᓐᓂᒃ.
ᑕᐃᒪᓐᓇᑦᑕᐃᓐᓇᖅ, ᐅᓄᖅᑐᖅ ᐊᐅᓪᓚᖃᑦᑕᖅᑐᑦ ᓄᓇᕕᒃᒧᑦ ᓴᖅᑭᑎᑦᑎᔭᕆᐊᖃᕐᒪᑕ ᑲᐱᔭᐅᓯᒫᓂᕐᓂᖏᓐᓂᒃ ᐃᓄᑑᓐᓇᖅᑐᒦᑦᑕᕆᐊᖃᔾᔮᙱᒻᒪᑕ.
ᓄᓇᖃᖅᑐᑦ ᖃᕋᓴᐅᔭᒦᑦᑐᓂᒃ ᐆᒥᖓ VaxiCode ᐃᓚᒃᓴᒥᒃ ᐱᔭᕆᐊᖃᖅᑐᑦ ᐅᕝᕙᓘᓐᓃᑦ QR (Quick Response) ᓇᓗᓇᐃᒃᑯᑎᒥᒃ ᐸᐃᑉᐹᒃᑯᑦ.
ᓄᓇᕕᒃᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᖃᖓᑦᑎᐊᓵᖅ ᑐᓴᖅᑎᑦᑎᓚᐅᕐᒪᑕ ᓄᑖᓂᒃ ᒪᓕᒋᐊᓕᖕᓂ ᐱᒋᐊᕐᓗᓂ ᐅᒃᑑᐱᕆ 15-ᒥ ᐊᑐᖃᑦᑕᕐᓂᐊᕐᓂᖏᓐᓂᒃ ᑭᓇᑐᐃᓐᓇ ᐳᓛᖅᑐᖅ ᐋᓐᓂᐊᖃᕐᓇᙱᑦᑐᓕᕈᔨᒃᑯᓐᓄᑦ ᐃᓄᓕᕆᔨᒃᑯᓐᓄᓪᓗ ᐱᔨᑦᑎᕋᕐᕕᒃᓄᑦ ᑲᐱᔭᐅᓯᒫᓂᒋᐊᖃᕐᓂᕋᖅᑕᐅᓪᓗᑎᒃ.
ᑕᒪᒃᑯᐊᓕ ᒪᓕᒐᒃᓴᐅᑎᑕᐅᔪᑦ ᐊᑐᕋᔭᙱᑦᑐᖅ ᐊᐃᑉᐸᕆᔭᐅᔪᓄᑦ ᐊᕐᓇᓄᑦ ᐃᕐᓂᔭᖅᑐᖅᑐᓂᒃ, ᑖᒃᑯᐊ ᐅᐸᒍᓐᓇᖅᑎᑕᐅᖕᒪᑕ ᐃᕐᓂᓱᒃᑐᓂᒃ. ᐊᒻᒪᓗ ᐊᖓᔪᖅᑳᕆᔭᐅᔪᑦ ᓱᕈᓯᕐᓄᑦ ᐋᓐᓂᐊᕐᕕᖕᒦᑦᑐᓂᒃ ᑐᐊᕕᕐᓇᖅᑐᒥᓪᓘᓐᓃᑦ ᑲᐱᔭᐅᕌᓂᒃᓯᒪᔭᕆᐊᖃᙱᑦᑐᑦ ᐅᐸᒃᓯᓯᒪᓂᐊᕈᑎᒃ.
ᓄᓇᕕᒻᒥᐅᑕᑦ ᐃᑲᔪᖅᑕᐅᔭᕆᐊᖃᖅᑐᑦ ᓇᓗᓇᐃᒃᑯᑎᒥᑦ ᑲᐱᔭᐅᓯᒪᓂᕐᒧᑦ ᓄᓇᕕᒻᒥ ᓄᕙᒡᔪᐊᕐᓇᖅ-19-ᒧᑦ ᖃᐅᔨᒋᐊᕐᕕᖓᓄᑦ ᐅᕗᖓ 1-888-662-7482. ᓄᓇᕕᒻᒥᐅᑦ ᑲᐱᔭᐅᔪᕕᓃᑦ ᓄᓇᕕᒃ ᐊᓯᐊᓂᒃ ᐅᖄᓚᔪᓐᓇᖅᑐᑦ ᐅᕗᖓ 1-877-644-4545 ᐃᑲᔪᖅᑕᐅᔪᒪᓗᑎᒃ.
(0) Comments