ᓄᓇᕕᖕᒥ ᑎᑕᒃᑎ ᐅᖃᓪᓚᒃᐳᖅ ᐱᕈᖅᐸᓪᓕᐊᓂᐅᔪᒥ ᓯᕗᓪᓕᖅᐹᒥ ᖁᕕᐊᓱᒍᑕᐅᔪᒥ ᐊᕐᕌᒎᑉ ᐃᓚᖓᓐᓂ

ᔮᓂ ᓵᓐᑐᔅ ᓵᓚᖃᖅᐳᖅ ᓯᕘᕋᓂᕆᔭᖓᓂ ᐃᑲᔪᖅᓯᖅᑕᐅᓪᓗᓂ ᖁᙱᐊᖅᑐᓂᑦ, ᑎᑕᒃᑎᐅᖃᑎᒥᓂᒃ

ᔮᓂ ᓵᓐᑐᔅ ᐱᙳᐊᖅᐳᖅ ᐋᒍᔅᑎ 15−ᒥ, ᓯᕗᓪᓕᖅᐹᒥ ᐅᓪᓗᖓᓂ ᐊᖅᐱᒃ ᓂᔾᔮᑎᑦᑎᓂᐅᔪᒥ ᑐᓴᕐᓈᕐᓂᕐᒧᑦ ᖁᕕᐊᓱᒍᑕᐅᔪᒥ ᑰᔾᔪᐊᕐᒥ. (ᓴᑐᕆᒃ ᒐᓛᓐᑦ ᐊᔾᔨᓕᐅᖅᑕᖓ)

By ᓴᑐᕆᒃ ᒐᓛᓐᑦᒧᑦ
ᓄᓇᓕᖕᓂ ᑐᓴᒐᒃᓴᓕᐅᕐᓂᕐᒧᑦ ᐱᒋᐊᕈᑕᐅᔪᒥ ᑐᓴᒐᒃᓴᓕᐅᖅᑎ

For English version, see New Nunavik musician talks growth after playing 1st festival season

ᖁᙱᐊᕐᕕᖕᒧᐊᑐᐊᕋᒥᒃ, ᓯᕗᓪᓕᖅᐹᖑᔪᖅ ᐊᒥᓱᓂ ᑎᑕᒃᑎᐅᔪᑦ ᓵᓚᖃᕆᐊᖃᕐᓂᕐᒥᓂᒃ ᐃᒻᒥᓂᒃ.

ᐊᒃᓱᓪᓘᓐᓃᑦ,ᑕᐃᒪᐃᑉᐳᖅ ᓄᑖᖑᔪᒥ ᑎᑕᒃᑎᐅᔪᒥ ᔮᓂ ᓵᓐᑐᔅᒧᑦ, ᐱᙳᐊᓚᐅᖅᑐᒥ ᐃᓄᒋᐊᖑᔪᓄᑦ ᖁᕕᐊᓱᒍᑕᐅᔪᓄᑦ ᓲᕐᓗ ᐊᖅᐱᒃ ᓂᔾᔮᑎᑦᑎᓂᐅᔪᒥ ᑰᔾᔪᐊᕐᒥ ᑕᖅᑭᐅᓚᐅᖅᑐᒥ.

40-ᓂᒃ-ᐅᑭᐅᓕᒃ ᐃᓱᒪᓕᐅᕆᓚᐅᖅᐳᖅ ᖄᖏᖅᓯᒪᔪᒥ ᐊᕐᕌᓂᐅᓚᐅᖅᑐᒥ ᓂᕕᙵᖅᓯᓂᖓᓂ ᓴᓇᓂᕐᒧᑦ ᑲᒫᓗᖏᓐᓂ ᐅᐊᔭᓕᕆᔨᐅᓂᕐᒥ ᑕᐅᑐᒃᑕᑐᐊᖃᑲᐃᓐᓇᕐᓂᕐᒥ ᓂᔾᔮᑎᑦᑎᓂᖓᓂ. ᑎᒍᒥᐊᖅᖢᓂ ᑯᑭᑦᑕᐹᖓᓂ ᐊᒻᒪ ᑎᑎᕋᖅᑕᒥᓂᑦ ᐱᓯᕐᓂ, ᐊᐱᖅᓱᖅᐸᓪᓕᐊᓕᓚᐅᖅᐳᖅ ᖁᕕᐊᓱᒍᑕᐅᔪᓂ ᐊᕕᒃᑐᖅᓯᒪᓂᐅᔪᒥ ᐱᙳᐊᕈᓐᓇᕐᒪᖔᑦ.

ᓵᓐᑐᔅ ᖃᐃᖁᔭᐅᓚᐅᖅᐳᖅ ᐱᙳᐊᕐᓂᕐᒥ ᓯᕗᓪᓕᖅᐹᖓᓂ ᖁᙱᐊᕐᕕᐅᔪᒥ ᓴᓪᓖᑦ ᖁᕕᐊᓱᒍᑕᐅᔪᒥ.

“ᖃᓄᓕᒫᖅ, ᐱᔪᓐᓇᕐᓂᕆᔭᐃᑦ ᐅᒃᐱᕆᔾᔮᙱᓚᑦ ᖁᙱᐊᕐᕕᖕᒧᐊᕐᓂᐊᓕᕐᓗᓂ. ᓯᕘᕋᓂᐊᖅᐳᑎᑦ,” ᐅᖃᓚᐅᖅᐳᖅ.

“ᐊᓇᐅᓪᓚᖅᑎᖃᙱᓐᓇᒪ, ᑎᑕᒃᑎᖃᙱᓐᓇᒪ. ᐅᕙᖓᑐᐊᖅ ᐊᒻᒪ ᑯᑭᑦᑕᐹᓐᓂ.”

ᖃᐅᔨᒪᒐᓗᐊᖅᑎᓪᓗᒍ ᐱᔪᓐᓇᕐᓂᕆᔭᖏᓐᓂ, ᓱᓕ ᐊᐱᖅᓱᓲᖑᕗᖅ ᐃᒻᒥᓂᒃ ᖁᙱᐊᖅᑕᐅᓚᐅᙱᓐᓂᖓᓂ ᑭᓯᐊᓂ ᐃᓚᐅᖅᓯᓐᓇᕆᕙᖓ ᖃᐅᔨᒪᓂᕐᒥ ᐊᓯᖏᓐᓂ ᑎᑕᒃᑎᐅᔪᓂ ᐹᖅᓯᒪᔭᖏᓐᓂ ᑕᒪᑐᒪᓂ ᐊᐅᔭᐅᔪᒥ ᑕᐃᒪᓐᓇᑦᑕᐅᖅ ᐃᒃᐱᒍᓱᓲᖑᓕᖏᓐᓂ.

ᓵᓐᑐᔅ ᐹᖅᓯᓚᐅᖅᐳᖅ ᒫᒃ ᐋᑕᒻᔅᒥ, ᒪᒃᑯᒃᖢᓂ ᐊᓇᐅᓪᓚᖅᑎ ᐊᒻᒪ ᕌᐳᕐ ᐱᙳᐊᖅᓯᒪᔪᒥ ᐅᓄᕐᓂᖅᓴᐅᔪᒥ 30−ᖑᔪᓂ.

“ᓱᓕ ᓯᕘᕋᓲᖑᕗᖅ,” ᐅᖃᓚᐅᖅᐳᖅ ᓵᓐᑐᔅ. “ᖃᓱᓐᓇᕆᓚᐅᖅᐸᕋ ᖃᐅᔨᒪᓂᕐᒧᑦ 30−ᓂ ᖁᙱᐊᖅᑕᐅᓂᐅᔪᒥ ᐅᕝᕙᓘᓐᓃᑦ 50 ᖁᙱᐊᖅᑕᐅᓂᐅᔪᓂ, ᓱᓕ ᓯᕘᕋᓂᐊᖅᐳᑎᑦ.”

ᐅᕙᓐᓂ ᐅᔾᔨᕆᑎᑦᑎᓚᐅᖅᐳᖅ ᐱᔾᔪᑎᖃᕐᓂᖅᓴᐅᓂᖓᓂ “ᖃᓄᐃᓕᐅᕐᓂᐊᕐᓂᕐᓂ ᓯᕘᕋᓂᕆᔭᕐᓂᑦ.”

ᓄᓇᕗᒻᒥ Northern Haze ᑎᑕᒃᑏᑦ, ᖃᐅᔨᒪᔭᐅᔪᓂ ᐆᒻᒪᕆᒃᑐᒥ ᐱᙳᐊᕐᓂᐅᔪᓂ, ᐃᓚᒋᔭᐅᓚᐅᕆᕗᑦ ᓴᓪᓗᐃᑦ ᖁᕕᐊᓱᒍᑕᐅᔪᒥ ᐱᙳᐊᕐᓂᐊᖅᑐᓄᑦ. ᓵᓐᑐᔅ ᐅᖃᓚᐅᖅᐳᖅ ᐊᒃᓱᐊᓗᒃ ᑲᒪᓚᐅᖅᐳᖅ ᖃᓄᐃᑉᐸᖏᓐᓂᖏᓐᓂ ᖁᙱᐊᕐᕕᖕᒧᐊᓚᐅᙱᓐᓂᖏᓐᓂ.

“ᐅᒃᐱᕈᓱᓚᐅᙱᓚᖓ ᓴᐃᓕᓂᖃᑦᑎᐊᕐᓂᖏᓐᓂ,” ᐅᖃᓚᐅᖅᐳᖅ.

“ᑕᒪᒃᑭᑦ ᐃᒃᓯᕚᓚᐅᖅᐳᑦ ᖃᐅᖏᑦ ᐃᓕᓯᒪᓪᓗᑎᒃ ᖁᖓᓯᖓᓂ ᑎᑕᐅᑎᖏᓐᓂ, ᐃᔨᖏᑦ ᒪᑐᓯᒪᓪᓗᑎᒃ. ᑕᐃᒪᐃᖃᑎᒌᓚᐅᖅᑎᓪᓗᒋᑦ, ᓯᕗᓕᐅᖅᑎᒋᔭᐅᔪᖅ ᒪᑭᖦᖢᓂ ᐊᒻᒪ ᐃᕿᖃᑦᑕᐅᑎᓪᓗᑎᒃ.”

ᐊᖅᐱᒃ ᓂᔾᔮᑎᑦᑎᓂᐅᔪᒥ ᓯᕗᓪᓕᖅᐹᕆᓚᐅᕐᒥᕙᖓ — ᓵᓐᑐᔅ ᐱᙳᐊᖃᑎᒋᔭᐅᓚᐅᖅᐳᖅ ᑎᑕᒃᑎᐅᔪᓂ. ᑐᓴᓚᐅᖅᓯᒪᙱᓚᖅ ᐱᓯᖏᓐᓂ ᐱᙳᐊᖅᑕᐅᔪᓂ ᑲᑎᙵᓂᐅᔪᒥ.

“ᓂᐱᓂᒃ ᖃᐅᔨᓴᖅᑕᐅᓂᓕᐊᕋᒥᒃ ᐊᒻᒪ ᐊᑕᐅᓯᕐᒥ ᐃᙱᓚᐅᖅᑎᓪᓗᒍ ᕿᐊᓕᓚᐅᖅᐳᖓ,” ᐅᖃᓚᐅᖅᐳᖅ. “ᑐᓴᓚᐅᖅᓯᒪᙱᓚᖓ ᐱᓯᓕᐊᓐᓂ ᑕᐃᒪᓐᓇᑎᒋᐊᓗᒃ.”

ᖁᙱᐊᖅᑕᐅᓚᐅᙱᓐᓂᖓᓂ, ᓵᓐᑐᔅ ᓯᕘᕋᕐᔪᐊᓚᐅᖅᐳᖅ ᐊᒃᓱᐊᓗᒃ.

ᐃᓚᖓᒍᑦ, 30 ᒥᓂᑦᑐᐃᓐᓇᕐᓂ ᖁᑎᐊᕐᕕᓕᐊᓚᐅᙱᓐᓂᖏᓐᓂ ᐃᒻᒥᓂᒃ ᐊᒻᒪ ᑎᑕᒃᑎᖏᑦ ᓱᓕ ᐋᖅᑭᒃᓱᐃᕙᓪᓕᐊᓚᐅᕐᒪᑕ ᐱᓯᕐᓄᑦ ᐱᙳᐊᕐᓂᐊᖅᑕᒥᓂᒃ.

“ᑕᐃᒪᓐᓇᑎᒋᐊᓗᒃ ᓴᙱᔪᐊᓗᖕᓂ ᓯᕘᕋᓂᖃᔾᔮᕋᓱᒋᓚᐅᙱᓚᖓ,” ᐃᖅᑲᐅᒪᓚᐅᖅᐳᖅ.

“ᑭᓯᐊᓂ ᐊᐅᓚᑦᑎᓐᓇᓱᐊᓚᐅᖅᐸᕋ ᓯᕘᕋᓂᓐᓂ ᐱᐅᓂᖅᓴᐅᔪᓄᑦ ᐃᓱᒪᓂᐅᔪᓂ ᓯᕘᕋᓂᐅᙱᑦᑐᒧᑦ. ᐃᓄᖕᓂ ᐅᖃᐅᔾᔨᓚᐅᖅᐳᖓ ᐆᒻᒪᕆᖕᓂᖅᑖᖅᐸᓪᓕᐊᓂᖓᓂ, ᐅᖃᙱᖔᖅᖢᖓ ᓱᕚᕋᕙᓪᓕᐊᓂᓐᓂ.”

ᑎᑕᒃᑎ ᐅᐃᓕᔅ ᑕᒍᕐᓈ ᐱᙳᐊᖃᑎᖃᓚᐅᖅᐳᖅ ᓵᓐᑐᔅᒥ ᑕᐃᔅᓱᒪᓂ ᐅᓪᓘᔪᒥ, ᐊᒻᒪ ᓵᓐᑐᔅ ᐅᖃᓚᐅᖅᐳᖅ ᐃᑲᔪᕐᓂᖃᕐᔪᐊᓚᐅᖅᐳᖅ.

“ᐃᓱᒪᓚᐅᖅᐳᖓ ᑭᒃᑯᑦ ᖁᙱᐊᖅᑐᓃᓐᓂᖏᓐᓂ, ᐃᓚᒃᑲ, ᐱᖃᓐᓇᕆᔭᒃᑲ, ᐊᒻᒪ ᐅᐃᓕᔅ ᐅᖃᓚᐅᖅᐳᖅ, ᐋᒃᑲ, ᐃᓱᒪᒋᙱᓪᓗᒍ, ᖁᕝᕕᐅᓕᖅᑎᑦᑎᓂᐊᖅᑐᖅ.’”

ᐊᓂᒍᕐᒪᑦ, ᓵᓐᑐᔅ ᐅᖃᓚᐅᖅᐳᖅ ᓈᒻᒪᒃᓴᑦᑎᐊᓚᐅᙱᓚᖅ ᓂᐱᖓᓂ ᑭᓯᐊᓂ ᐊᓕᐊᓇᐃᒋᔭᖃᑦᑎᐊᓚᐅᖅᐳᖅ ᐊᑐᕐᓂᑯᖓᓂ.

“ᐃᓄᒋᐊᑦ ᐸᑦᑕᒃᑐᕐᔪᐊᓚᐅᖅᐳᑦ, ᑐᓂᓯᕐᔪᐊᙱᒃᑲᓗᐊᖅᑎᓪᓗᖓ,” ᐅᖃᓚᐅᖅᐳᖅ. “ᑎᑭᐅᑎᑎᓪᓗᒍ ᐱᔪᓐᓇᕐᓂᕆᔭᓐᓂ, ᐃᓄᒋᐊᑦ ᓱᓕ ᑕᑯᔭᒃᓴᖃᕐᔪᐊᖅᐳᑦ ᐅᕙᓐᓂᑦ.”

ᒫᓐᓇ ᑕᑯᒃᓴᐅᑎᑦᑎᓯᒪᒐᒥ ᐱᔪᓐᓇᕐᓂᕆᔭᖏᓐᓂ ᓄᓇᕕᖕᒥ, ᓵᓐᑐᔅ ᐅᖃᓚᐅᖅᐳᖅ ᐱᕙᓪᓕᐊᓕᓚᐅᖅᐳᖅ ᐃᑲᔪᖅᓱᐃᓂᐅᔪᒥ ᐃᓄᖕᓂ ᑐᓴᖅᓯᒪᔪᓂ ᐃᙱᐅᓯᖏᓐᓂ, ᐱᓗᐊᖅᑐᒥ ᐊᑕᐅᓯᐅᔪᒥ ᑕᐃᔭᐅᔪᒥ ᑲᔪᓯᓗ, ᓯᕗᓂᐊᓂ ᐊᑦᑎᖅᓯᒪᓚᐅᖅᑐᒥ ᐃᓗᐃᓪᓕᕿᔪᖅ ᐃᙱᐅᓯᖅ.

“ᐃᓄᐃᑦ ᑎᒃᑯᐊᕆᓚᐅᖅᐳᑦ ᐱᒻᒪᕆᐅᓂᖓᓂ ᑕᐃᒎᓯᖓᓂ ᐊᒻᒪ ᐅᕙᓐᓄᑦ ᐅᖃᓚᐅᖅᐳᑦ ᐊᑐᒐᔪᒃᑲᕕᐅᒃ ᐅᖃᐅᓯᖅ ᑲᔪᓯᓗ ᐃᙱᐅᓯᒥ,” ᐅᖃᓚᐅᖅᐳᖅ ᓵᓐᑐᔅ. “ᐊᓯᔾᔨᕈᒪᓕᓚᐅᖅᐸᕋ ᑕᐃᔅᓱᒧᖓ, ᑐᑭᖃᕐᒪᑦ ᑲᔪᓰᓐᓇᕐᓂᕐᒧᑦ, ᑲᔪᓰᓐᓇᓚᐅᖅᑕ.”

ᐅᖃᐅᓯᐅᓂᔪᓂ ᐅᕙᓐᓂ ᐃᑲᔪᖅᐳᖅ ᐱᕈᖅᐸᓪᓕᐊᑎᑦᑎᓂᖓᓂ ᐃᒻᒥᓂᒃ ᐅᒃᐱᕈᓱᖕᓂᖓᓂ, ᐅᖃᓚᐅᖅᐳᖅ ᓵᓐᑐᔅ. ᐊᒻᒪ ᐅᖃᖅᐳᖅ ᐃᒃᐱᒍᓱᒃᐸᓪᓕᐊᓂᖓᓂ ᑲᒪᓇᖅᑐᒥ ᐃᒃᐱᒍᓱᖕᓂᐅᔪᒥ ᓈᒻᒪᒃᓴᕐᓂᖓᓂ ᐆᒻᒪᑎᖓᓂ.

“ᐅᐃᕆᖅᑰᓕᖅᑐᖓ ᑕᐃᔅᓱᒧᖓ ᑲᑉᐱᐊᓱᖕᓂᐅᔪᒥ ᐊᒻᒪ ᓈᒻᒪᒃᓴᕐᓂᐅᔪᒥ ᐱᓕᖅᑭᒃᑕᕐᓂᐅᔪᒥ,” ᐅᖃᓚᐅᖅᐳᖅ, ᐃᒡᓚᖅᖢᓂ.

“ᑕᐃᓐᓇᐅᕗᖅ ᑲᑉᐱᐊᓱᖕᓂᕐᒥ ᖁᙱᐊᕐᕕᖕᒧᐊᓚᐅᖅᑳᕐᓇᓂ, ᑕᐃᓐᓇ ᓯᕘᕋᓂᐅᔪᒥ ᐃᓇᖏᖅᓯᕗᖅ. ᐊᓱᐃᓛᒃ ᑕᐃᑯᙵᕋᕕᑦ ᐊᒻᒪ ᐃᙱᖅᖢᑎᑦ ᐊᒻᒪ ᐃᓄᒋᐊᑦ ᐃᓕᖕᓂᑦ ᓈᓚᓕᖅᖢᑎᒃ.”

Share This Story

(0) Comments