ᓄᓇᕕᖕᒥ ᑲᓇᖕᓇᕐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑏᑦ ᐃᓚᐅᖃᑕᐅᕗᑦ ᓅᓐᓂᐅᔪᒥ ᓄᓇᒥᐅᑕᓂ ᐆᒻᒪᖅᑯᑎᓂ

For English version, see NEAS on board with transition to renewable energy shipping

ᐊᖓᔪᖅᑳᖓ ᓄᓇᕕᖕᒥ ᑲᓇᖕᓇᕐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑎᓂᑦ ᐊᖏᖃᑎᖃᖅᐳᑦ ᓯᕗᓕᐅᖅᑎᐅᔪᓂ ᐃᓚᖏᓐᓂ ᓄᓇᕐᒧᐊᑉ ᐊᖏᓛᖑᔪᓂ ᐅᓯᑲᑦᑕᖅᑎᐅᔪᓂ ᑲᒻᐸᓂᐅᔪᓂ ᖃᐃᖁᔨᓂᐅᔪᒥ ᐊᑐᕈᓐᓃᖅᑎᑕᐅᕙᓪᓕᐊᓂᖓᓂ ᓴᓇᓂᕐᓂ ᓄᑖᓂ ᐅᒥᐊᕐᔪᐊᓂ ᐊᐅᓚᑕᐅᔪᓂ ᐅᔭᕋᖕᓂ ᐅᖅᓱᐊᓗᒃᓴᓂᑦ.

@body: “ᐸᐅᖃᕈᓐᓃᖅᑎᑦᑎᓂᐅᔪᒥ ᖁᑦᑎᓛᖑᕗᖅ ᐃᓱᒪᒋᔭᐅᓂᐅᔪᓂ ᑕᒪᒃᑭᓂ ᐅᒥᐊᕐᔪᐊᓂ ᐊᐅᓚᑦᑎᔨᐅᔪᓂ ᓄᓇᕐᔪᐊᓕᒫᒥ,” ᐅᖃᓚᐅᖅᐳᖅ ᓄᓇᕕᖕᒥ ᑲᓇᖕᓇᕐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑏᑦ ᐊᖓᔪᖅᑳᖓ ᑖᓂᐅᓪ ᑎᒋᓇᐃᐊᐱᖅᓱᖅᑕᐅᓂᐅᔪᒥ.

ᓄᓇᕕᖕᒥ ᑲᓇᖕᓇᕐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑏᑦ ᑐᓂᓯᓲᖑᕗᑦ ᐅᒥᐊᕐᔪᐊᒃᑰᖅᑎᑦᑎᓂᕐᒥ ᐅᓯᑲᑦᑕᕐᓂᐅᔪᒥ ᓄᓇᕗᒻᒥ ᐊᒻᒪ ᓄᓇᕕᖕᒥ. ᐊᒥᓲᓛᖑᔪᓂ ᓇᖕᒥᓂᖃᖅᑎᐅᔪᑦ ᒪᑭᕝᕕᒃ ᑎᒥᖁᑕᐅᔪᓂᐅᕗᖅ.

28−ᖓᓂ ᐊᕐᕌᒍᑕᒫᒥ ᓄᓇᕐᔪᐊᕐᒥᐅᓕᒫᓄᑦ ᓯᓚᕐᔪᐊᒥ ᓯᓚᖓᓂ ᑲᑎᒪᕕᒡᔪᐊᕐᓂᐅᔪᒥ, ᖃᐅᔨᒪᔭᐅᔪᒥ COP28−ᒥ,ᐱᓕᕆᐊᖑᓚᐅᖅᐳᖅ ᑐᐸᐃᒥ ᑕᐃᑯᖓ ᑎᓯᐱᕆ 12−ᒧᑦ.

ᑲᑎᒪᕕᒡᔪᐊᕐᓂᐅᔪᒥ, ᐊᐅᓚᑦᑎᔨᒻᒪᕇᑦ ᓯᓚᕐᔪᐊᒥ ᑕᕆᐅᕐᒥ ᐅᓯᑲᑦᑕᖅᑎᐅᔪᓂ ᑲᒻᐸᓂᐅᔪᓂ MSC, Maersk, CMA CGM, Hapag-Lloyd ᐊᒻᒪ Wallenius Wilhelmsen ᖃᐃᖁᔨᓂᖃᓚᐅᖅᐳᑦ ᐃᓱᓕᕝᕕᒃᓴᐅᔪᒥ ᐅᓪᓗᖓᓂ ᓴᓇᓂᐅᔪᒥ ᐅᒥᐊᕐᔪᐊᓂ ᐊᐅᓚᑕᐅᔪᓂ ᐅᔭᕋᖕᓂ ᐅᖅᓱᐊᓗᑐᐃᓐᓇᕐᓄᑦ.

ᓄᓇᕕᖕᒥ ᑲᓇᖕᓇᕐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑏᑦ ᕿᓂᕐᓂᖅᓴᐅᕗᑦ ᐊᑐᕐᓂᐅᔪᒥ ᓄᓇᒥᐅᑕᓂ ᐆᒻᒪᖅᑯᑎᓂ, ᑎᒋᓇᐃ ᐅᖃᓚᐅᖅᐳᖅ, ᐃᒪᐃᒻᒪᑦ ᐅᓇ ᐊᑲᐅᙱᓕᐅᕈᑕᐅᔪᖅ ᒪᕐᕈᖓᓂ ᐃᓱᒪᒃᓴᖅᓯᐅᕆᔭᐅᕙᓚᐅᖅᑎᓪᓗᒍ.

“ᒫᓐᓇ ᖁᑦᑎᓛᖑᕗᖅ ᐃᓱᒪᒋᔭᑦᑎᓐᓂ, ᐱᖁᑎᕗᑦ ᐊᐅᓚᖕᒪᑕ ᐊᕐᕌᒍᓄᑦ 15−20-ᓄᑦ ᐊᒻᒪ ᐃᓛᓐᓂᒃᑯᑦ ᐅᖓᑖᓄᑦ,” ᐅᖃᓚᐅᖅᐳᖅ.

ᓄᓇᕕᖕᒥ ᑲᓇᖕᓇᕐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑎᓄᑦ, ᐅᓇ ᐱᔭᕆᐊᖃᖅᑎᑦᑎᕗᖅ ᓄᑖᙳᖅᐸᓪᓕᐅᓂᐅᔪᓂ ᐊᐅᓚᔪᓐᓇᖅᑐᓂ ᐅᑭᐅᖅᑕᖅᑐᒥ ᖃᓄᐃᓐᓂᐅᔪᓂ.

ᐅᑭᐅᖅᑕᖅᑐᒥ ᓂᒡᓚᓱᖕᓂᖓᓂ ᐊᒃᓱᕈᖅᑎᑦᑎᖃᑦᑕᕐᒪᑦ ᐅᒥᐊᕐᔪᐊᑉ  ᐅᐊᔭᒨᖅᑐᓄᑦ ᐆᒪᖅᑯᑎᖏᓐᓄᑦ, ᓄᓇᕕᖕᒥ ᑲᓇᖕᓇᕐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑏᑦ ᕿᓂᖅᐳᑦ ᓄᓇᒥᙶᖅᑐᓂ ᐅᖅᓱᐊᓗᖕᓂ ᓲᕐᓗ ᐃᒥᐊᓗᓕᖕᒥ (ᐃᑕᓅᓪ), ᐊᒨᓂᐊ ᐅᕝᕙᓘᓐᓃᑦᕼᐊᐃᑐᕆᔨᓐᒧᑦ, ᑎᒋᓇᐃ ᐅᖃᓚᐅᖅᐳᖅ.

ᓇᓗᓇᐃᖅᓯᓂᕐᒥ ᓄᓇᓕᐅᔪᑦ ᓈᒻᒪᒃᑐᒥ ᐱᔨᑦᑎᕋᖅᑕᐅᓂᖏᓐᓂ, ᓄᓇᕕᖕᒥ ᑲᓇᖕᓇᕐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑏᑦ ᓱᒃᑲᐃᑦᑐᒥ ᓴᖑᑎᑦᑎᓂᖃᕐᓂᐊᖅᐳᑦ ᓄᓇᒥᐅᑕᓂ ᐆᒻᒪᖅᑯᑎᓄᑦ.

“ᑭᖑᓪᓕᖅᐹᖅ ᐱᓕᕆᔪᒪᔭᑦᑎᓐᓂ ᐊᖏᖅᓯᒪᓂᕐᒧᑦ ᐆᒧᖓ ᓅᓐᓂᐅᔪᒥ ᕿᓚᒻᒥᐅᓗᐊᖅᑐᒥ ᐊᒻᒪ ᐅᓗᕆᐊᓇᖅᑐᒦᓕᖅᑎᑦᑎᓂᕐᒥ ᐱᔨᑦᑎᕋᕐᓂᐅᔪᒥ ᑐᓂᓯᕙᒃᑕᑦᑎᓐᓂ ᐅᖓᓯᒃᑐᓄᑦ ᓄᓇᓕᐅᔪᓄᑦ,” ᑎᒋᓇᐃ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑕᑯᔪᒪᓇᔭᙱᓚᖅ ᖃᓄᐃᓐᓂᐅᔪᒥ ᓄᓇᕕᖕᒥ ᑲᓇᖕᓇᕐᒥ ᐅᑭᐅᖅᑕᖅᑐᒥ ᐅᓯᑲᑦᑕᖅᑏᑦ ᐅᒥᐊᕐᔪᐊᒥ ᐊᐅᓚᔪᓐᓇᙱᓐᓂᖓᓂ ᓄᑖᙳᖅᐸᓪᓕᐅᓂᐅᔪᒥ ᐅᕝᕙᓘᓐᓃᑦ ᐅᖅᓱᐊᓗᖕᒧᑦ ᐊᑲᐅᙱᓕᐅᕈᑕᐅᔪᒧᑦ.

“ᐱᕕᑭᑦᑐᒻᒪᕆᐅᕗᖅ ᑕᒻᒪᕐᓂᐅᔪᒧᑦ ᐅᕙᓂ,” ᐅᖃᓚᐅᖅᐳᖅ.

ᐊᕙᑎᓕᕆᓂᕐᒧᑦ ᑮᓇᐅᔭᓕᐅᕋᓱᐊᙱᑦᑐᓄᑦ ᑲᑎᙵᓂᐅᔪᑦ ᓴᓗᒪᔪᒥ ᐅᑭᐅᖅᑕᖅᑐᒥ ᑲᑐᔾᔨᖃᑎᒌᖑᔪᓂ ᓇᒃᓯᐅᔾᔨᓚᐅᖅᐳᑦ ᑐᓴᒐᒃᓴᓕᐊᖑᔪᒥ ᑎᓯᐱᕆ 7−ᒥ ᐅᖃᖅᖢᑎᒃ ᑲᑎᙵᓂᐅᔪᑦ ᐅᔾᔨᕆᓚᐅᕐᓂᖏᓐᓂ ᑲᑐᔾᔭᐅᔪᒥ ᐅᖃᐅᓯᒃᓴᓕᐊᖑᔪᒥ”ᐱᔪᒪᓂᖃᖅᖢᑎᒃ” ᐊᒻᒪ ᐊᔭᐅᕆᓚᐅᖅᐳᑦ ᐅᓯᑲᑦᑕᕐᓂᐅᔪᒥ ᑲᒻᐸᓂᐅᔪᓂ ᐃᖏᕐᕋᓂᖃᒃᑲᓐᓂᕐᓂᖓᓂ ᐃᓚᒋᐊᖅᓯᓪᓗᑎᒃ ᓂᐱᖏᓐᓂ ᐊᕐᕌᒎᔪᒥ ᖃᐃᖁᔨᓂᐅᔪᒥ ᐊᐅᓚᑦᑎᓂᕐᒧᑦ ᕿᕐᓂᖅᑕᒥ ᐸᐅᕐᒥ ᐊᓂᐊᑎᑦᑎᓂᐅᔪᓂ.

ᕿᕐᓂᖅᑕᒥ ᐸᐅᖅ ᓴᖅᑭᑎᑕᐅᓲᖑᕗᖅ ᐃᑭᑎᑦᑎᓪᓗᑎᒃ ᐅᖁᒪᐃᑦᑐᓂ ᐅᖅᓱᐊᓗᒃᓴᒥ — ᐊᑭᑭᓛᖑᔪᒥ ᐊᒻᒪ ᐃᑉᐸᓛᖑᔪᒥ ᐅᖅᓱᐊᓗᖕᒥ ᕿᒪᒃᑕᐅᔪᒥ ᐊᑯᓂᐅᔪᒥ ᐅᖅᓱᐊᓗᖕᒥ ᐱᐅᓯᒋᐊᖅᑕᐅᓂᖓᓂ ᐱᓕᕆᓂᐅᔪᒥ. ᐅᖁᒪᐃᑦᑐᓂ ᐅᖅᓱᐊᓗᒃᓴᒥ ᐊᑐᖅᑕᐅᒐᔪᒃᐳᖅ ᐅᒥᐊᕐᔪᐊᓂ ᓄᓇᕐᔪᐊᓕᒫᒥ, ᐅᖃᐅᓯᐅᓪᓗᓂ ᓴᓗᒪᔪᒥ ᐅᑭᐅᖅᑕᖅᑐᒥ ᑲᑐᔾᔨᖃᑎᒌᖑᔪᓂ.

ᑲᑐᔾᔨᖃᑎᒌᖑᔪᑦ ᐅᖃᐅᔾᔨᔨᒻᒪᕆᖓ, ᓯᐊᓐ ᓱᕋᐃᕈᕐ, ᐅᖃᓚᐅᖅᐳᖅ ᓯᕗᓪᓕᖅᐸᐅᔪᒥ ᐱᓕᕆᓂᐅᔪᒥ ᐅᒥᐊᕐᔪᐊᓄᑦ ᐊᐅᓚᑕᐅᔪᓂ ᐅᑭᐅᖅᑕᖅᑐᒥ ᓅᓐᓂᖏᓐᓂ ᐅᖁᒪᐃᑦᑐᓂ ᐅᖅᓱᐊᓗᒃᓴᒥ ᐅᕿᓐᓂᖅᓴᐅᔪᓄᑦ ᐅᖅᓱᐊᓗᖕᓄᑦ ᒥᒃᖠᒋᐊᖅᑎᑦᑎᓂᕐᒥᕿᕐᓂᖅᑕᒥ ᐸᐅᕐᒥ ᐊᓂᐊᑎᑦᑎᓂᐅᔪᓂ.

“ᐊᓱᐃᓛᒃ … ᕿᕐᓂᖅᑕᒥ ᐸᐅᕐᒥ ᒪᓕᑦᑎᐊᕐᓂᐅᔪᒥ ᑎᑭᐅᑎᓂᐅᔪᒥ ᓴᖅᑭᑎᑕᐅᔭᕆᐊᖃᖅᐳᖅ ᓱᑲᒃᑎᒋᐊᖅᑕᐅᔪᓐᓇᖅᑐᒥ ᐊᑯᓂᐅᔪᒥ ᐊᑐᕈᓐᓃᖅᑎᑦᑎᓂᕐᒥ ᕿᕐᓂᖅᑕᒥ ᐸᐅᕐᒥ ᐊᓂᐊᑎᑦᑎᓂᐅᔪᓂ,” ᐅᖃᓚᐅᖅᐳᖅ ᑐᓴᒐᒃᓴᓕᐊᖑᔪᒥ.

“ᐊᑐᐃᓐᓇᕐᓂᕐᒥ ᐅᖁᒪᐃᑦᑐᓂ ᕿᒻᒪᑯᖃᓲᓂ ᐅᖅᓱᐊᓗᖕᓂ ᐅᕝᕙᓘᓐᓃᑦ ᓅᓐᓂᕐᒧᑦ ᐊᓯᐊᒎᖅᑐᒥ ᒥᑕᐃᓐᒥ−ᑐᙵᕕᓕᖕᓂ ᐅᖅᓱᐊᓗᖕᓂ ᓈᒻᒪᙱᓚᖅ.”

ᐊᓯᖏᓐᓂ ᑲᑎᙵᓂᐅᔪᓂ ᓲᕐᓗ ᐃᓄᐃᑦ ᐅᑭᐅᖅᑕᖅᑐᕐᒥᐅᖃᑎᒌᑦ ᑲᑎᒪᔨᖏᑦ ᖃᐃᖁᔨᓂᖃᕆᕗᑦ ᐲᖅᑕᐅᓂᖓᓂ ᕿᕐᓂᖅᑕᒥ ᐸᐅᕐᒥ ᐅᑭᐅᖅᑕᖅᑐᒥ ᐃᒪᐅᔪᓂ. ᑭᓯᐊᓂ ᐊᕐᕌᒎᑉ ᐃᓱᐊᓂ, ᑲᑎᒪᔨᐅᔪᑦ ᐋᖅᑭᒃᑕᐅᓯᒪᔪᓂ ᑎᑎᕋᖅᓯᒪᓂᖏᑎᒍᑦ ᐅᖃᖃᑎᖃᕐᓂᐅᔪᒥ ᐃᓚᒋᔭᐅᕗᑦ ᓄᓇᕐᔪᐊᕐᒥᐅᓕᒫᓄᑦ ᓄᓇᕐᒧᐊᒥ ᒥᐊᕆᑕᐃᒻᒥ ᑲᑐᔾᔨᖃᑎᒌᖑᔪᓄᑦ, ᑲᒪᒋᔭᖃᖅᑐᒥ ᓄᓇᕐᒧᐊᒥ ᐅᓯᑲᑦᑕᕐᓂᐅᔪᒥ ᐱᖁᔭᖏᓐᓂ.

ᐃᓄᐃᑦ ᐅᑭᐅᖅᑕᖅᑐᕐᒥᐅᖃᑎᒌᑦ ᑲᑎᒪᔨᖏᑦᑕ ᑲᓇᑕᒥ ᐊᖓᔪᖅᑳᖓ ᓖᓴ ᖁᐱᖅᑯᐊᓗᒃ ᐃᓚᐅᖃᑕᐅᓚᐅᖅᐳᖅ United Arab Emirates−ᓂ COP28−ᒧᑦ ᐊᒻᒪ ᐊᑐᐃᓐᓇᐅᓚᐅᙱᓚᖅ ᐊᐱᖅᓱᖅᑕᐅᓂᕐᒧᑦ.