ᓄᓇᕗᑦ ᑐᙵᓱᒃᑎᑦᑎᕗᖅ ᐋᕆᐊᒃ ᐅᑎᕐᓂᖓᓂᒃ ᑲᒥᓯᓇᐅᓕᕐᓗᓂ

ᓄᓇᕗᒻᒥᐅᑕᑦ ᑐᙵᓱᒃᑎᑦᑎᓚᐅᕐᑐᑦ ᑐᓴᕋᒥᒃ ᓯᕗᓕᐅᕐᑎᐅᓚᐅᕐᓯᒪᔪᖅ ᐄᕙ ᐋᕆᐊᒃ ᐱᓕᕆᐊᖃᕐᓂᐊᕐᓂᖓᓂᒃ ᑭᒃᑯᓕᒫᓄᖓᔪᓂᒃ — ᒫᓐᓇᓕ ᑲᒥᓯᓇᐅᓗᓂ ᓄᓇᕗᒧᑦ.

ᑲᓇᑕᒧᑦ ᐊᖓᔪᖅᑳᖅ ᔭᔅᑎᓐ ᑐᕉᑑ ᑐᓴᖅᑎᑦᑎᓚᐅᕐᑐᖅ ᐋᕆᐊᒃ ᑎᒃᑯᐊᕐᑕᐅᓚᐅᕐᓂᖓᓂᒃ ᑖᔅᓱᒥᖓ ᐱᓕᕆᐊᖃᕐᓂᐊᓕᕐᓗᓂ ᐊᐃᑉᐹᓂᒃ, ᔭᓄᐊᕆ 12-ᖑᑎᓪᓗᒍ.

“ᖁᕕᐊᓱᒻᒪᕆᒃᑐᖓ ᒥᔅ ᐋᕆᐊᒃ ᑖᔅᓱᒥᖓ ᐱᓕᕆᐊᖃᕐᓂᐊᓕᕐᒪᑦ, ᐊᒻᒪᓗ ᖃᐅᔨᒪᔪᖓ ᐱᒻᒪᕆᐅᑎᑦᑎᔪᓐᓇᒃᓂᖃᒃᓂᐊᓂᒃ ᐊᒻᒪᓗ ᓴᙱᓂᖃᕐᓂᕐᒥ ᐱᓕᕆᐊᖓᒍᑦ,” ᐅᖃᖅᑐᖅ ᓄᓇᕗᒥᑦ ᓯᕗᓕᐅᕐᑎ ᔫ ᓴᕕᑲᑖᖅ ᑐᓴᒐᒃᓴᓕᐅᕐᑎᓪᓗᒍ. “ᓂᕆᐅᒃᐳᖓ ᐱᓕᕆᖃᑎᖃᕐᓂᐊᕐᓂᓐᓂᑦ ᐊᒻᒪᓗ ᖃᐅᔨᒪᑦᑎᐊᖅᖢᖓ ᐱᓕᕆᐊᖃᓕᒪᓂᖓᒍᑦ ᐱᔨᑦᑎᕋᑦᑎᐊᕐᓂᐊᕐᓂᖓᓂᒃ ᓄᓇᕗᒥᑦ.”

ᓄᓇᕗᒥᑦ ᓯᕗᓕᐅᕐᑎ ᐃᓱᒪᓕᐅᕆᔪᓐᓇᙱᑎᓪᓗᒍ ᑭᓇ ᑲᒥᓯᓇᐅᓂᐊᕐᓂᖓᓂᒃ, ᐅᑯᐊᓕ ᓄᓇᕗᒥᑦ ᒪᓕᒐᓕᐅᕐᑎᐅᔪᑦ ᐱᕕᖃᕈᓐᓇᕐᓯᓚᐅᕐᒪᑕ ᐊᑎᕐᓂᒃ ᑐᓂᓯᔪᓐᓇᖅᖢᑎᒃ ᐊᒻᒪ ᐱᓇᓱᒍᑎᓂᒃ ᑲᒥᓯᓇᐅᓂᕐᒧᑦ, ᐊᒻᒪᓗ ᑭᖑᓂᐊᒍᑦ ᑲᓇᑕᒧᑦ ᐊᖓᔪᖅᑳᑉ ᑎᑎᕋᕐᕕᐊᓄᑦ ᐊᐅᓪᓚᖅᑎᑕᐅᓪᓗᑎᒃ ᐃᓱᒪᒃᓴᕐᓯᐅᕈᑎᐅᓂᐊᕐᒪᑕ.

ᐋᕆᐊᒃ ᐃᖅᑲᓇᐃᔮᖅᑖᕐᑐᖅ ᐃᓄᖃᕈᓐᓃᓚᐅᕐᓯᒪᔪᒥ ᔫᓂ 2020-ᒥᑦ, ᐅᓇ ᓄᓇᕗᒧᑦ ᑲᒥᓯᓇᐅᓚᐅᕐᑐᖅ ᓇᓕ ᑯᓱᒐᐅᑉ ᐱᓕᕆᓂᖓ ᐃᓱᓕᑎᓪᓗᒍ.

ᐃᒃᐱᐊᕐᔪᒃᒥ ᓄᓇᖃᕐᓂᑰᓪᓗᓂ, ᐋᕆᐊᒃ ᐃᖅᑲᓇᐃᔮᖃᑲᑕᒋᐊᓕᓚᐅᕐᓯᒪᔪᖅ ᐃᓕᓐᓂᐊᕐᓂᓕᕆᔨᒃᑯᓐᓂᒃ, ᐃᓕᓐᓂᐊᖅᑎᑦᑎᕙᒃᖢᓂ ᓄᓇᓕᖕᓂᒃ ᓄᓇᕗᒦᑦᑐᓂᒃ. ᑭᖑᓂᐊᒍᓪᓗ ᑐᓴᒐᒃᓴᓕᕆᔨᐅᓕᓚᐅᕐᓯᒪᓪᓗᓂ ᓰᐲᓰᑯᓐᓄᑦ ᑎᒃᑯᐊᕐᑕᐅᓚᐅᕐᑎᓐᓇᒍ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᓂᕐᒧᑦ ᓄᓇᕗᒥᑦ.

ᐃᖃᓗᖕᓄᑦ ᓅᓚᐅᕐᑎᓪᓗᒍ, ᐋᕆᐊᒃ ᐃᑲᔪᓚᐅᕐᓯᒪᔪᖅ ᒪᑐᐃᕐᑕᐅᑎᓪᓗᒍ ᐊᒻᒪ ᐊᐅᓚᑦᑎᓂᕐᒥᒃ ᒪᓕᒃᑳᑦ ᓂᐅᕕᕐᕕᒃᒥᑦ.

2008-ᒥᑦ, ᐋᕆᐊᒃ ᓂᕈᐊᕆᔭᐅᓚᐅᕐᓯᒪᔪᖅ ᒪᓕᒐᓕᐅᕐᑎᐅᓂᐊᕐᓗᓂ ᐃᖃᓗᐃᑦ ᑲᓇᖕᓇᖓᓄᑦ, ᑕᐃᔅᓱᒪᓂᓗ ᑲᑎᒪᔨᕐᔪᐊᓄᑦ ᓂᕈᐊᕆᔭᐅᓪᓗᓂ ᓯᕗᓕᐅᕐᑎᐅᓂᕐᒧᑦ — ᓯᕗᓪᓕᕐᐹᖅ ᐊᕐᓇᖅ ᑕᐃᒪᓐᓇ ᐃᖅᑲᓇᐃᔮᖃᖅᑐᑦ ᓄᓇᕗᒥᑦ. ᓄᓇᕗᒧᑦ ᓯᕗᓕᐅᕐᑎᐅᓚᐅᕐᑐᖅ ᑎᑭᖢᒍ 2013.

ᐃᒪᓐᓇᐅᕙᓗᐊᙱᒃᑲᓗᐊᕐᑎᓪᓗᒍ ᓯᕗᓕᐅᕐᑎᕕᓂᕐᒥᒃ ᑲᒥᓯᓇᐅᓕᕐᑐᒥᒃ, ᐅᓄᕐᑐᓄᑦ ᑐᙵᓱᒃᑎᑕᐅᓚᐅᕐᑐᖅ ᐱᓕᕆᓕᒪᓂᖓᓄᑦ ᒪᓕᒐᓕᕆᓂᕐᒥᒃ ᐊᑐᕋᔭᖅᑕᖏᓐᓂᒃ ᐱᓕᕆᐊᕆᓂᐊᓕᕐᑕᖓᓄᑦ.

“ᐃᓱᒪᔪᖓᓕᒃ ᑖᓐᓇ ᐃᑲᔫᑎᒻᒪᕆᐅᓂᐊᕐᓂᖓᓂᒃ, ᑖᔅᓱᒧᖓ ᐊᒻᒪ ᓄᓇᕗᒻᒥᐅᓄᑦ,” ᐅᖃᖅᑐᖅ ᐋᓐ ᒥᑭᑦᔪᑦ ᕼᐋᓐᓴᓐ, ᑲᒥᓯᓇᐅᓚᐅᕐᓯᒪᔪᖅ ᓄᓇᕗᒧᑦ 2005-ᒥᑦ 2010-ᒧᑦ, ᑖᓐᓇ ᐋᕆᐊᒃ ᓯᕗᓕᐅᕐᑎᐅᑎᓪᓗᒍ.

“ᖃᐅᔨᒪᑦᑎᐊᕐᒪᑦ ᖃᓄᐃᓕᐅᕐᒪᖔᑕ ᒐᕙᒪᒃᑯᓐᓂ.”

ᕼᐋᓐᓴᓐ ᐅᖃᓚᐅᕐᑐᖅ ᐋᕆᐊᒃ ᖃᐅᔨᒪᓂᖓ ᓄᓇᕗᒥᑦ ᒪᓕᒐᓕᕆᓂᕐᒧᑐᐃᓐᓇᐅᙱᓐᓂᖓᓂᒃ; ᐅᖃᖅᖢᓂ ᐋᕆᐊᒃ ᑐᑭᓯᓯᒪᓂᖓᓂᒃ ᓄᓇᕗᑦ ᓄᓇᓕᖏᓐᓂᒃ ᐊᒻᒪ ᐱᕙᕆᐊᖃᖅᑕᖏᓐᓂᒃ, ᐊᒻᒪᓗ ᐱᓕᕆᔾᔪᓯᐅᔭᕆᐊᖃᖅᑐᒥᒃ ᑖᓐᓇ ᑲᒥᓯᓇ ᑕᒪᒃᑯᓂᖓ ᐊᒃᑐᐃᒍᑎᖃᓕᕈᓐᓇᕐᓂᕐᒥᒃ.

“ᖁᕕᐊᒋᑦᑎᐊᓚᐅᕐᑕᕋ ᐱᓕᕆᖃᑎᒋᓪᓗᒍ,” ᕼᐋᓐᓴᓐ ᐅᖃᖅᑐᖅ. “ᖁᕕᐊᓱᒻᒪᕆᒃᑐᖓ ᑲᒥᓯᓇᖃᓕᕐᓂᑦᑎᓐᓂᒃ ᐊᒻᒪᓗ ᖁᕕᐊᓱᒃᐳᖓ ᐄᕙᐅᓂᖓᓂᒃ.”

ᑲᒥᓯᓇ ᑎᒃᑯᐊᖅᑕᐅᕙᒃᑐᖅ ᐊᕐᕌᒍᓂ ᑕᓪᓕᒪᓂᒃ ᐱᓕᕆᐊᖃᕐᓂᐊᕐᓗᓂ.

ᓄᓇᕗᒧᑦ ᑲᒥᓯᓇᐅᔪᑦ ᐱᓕᕆᐊᖃᖃᑦᑕᕐᒥᔪᑦ ᐊᔾᔨᒋᓐᓂᒃ ᒪᑯᐊ ᐳᕌᕕᓐᓯᓂ ᓘᑕᓇᓐᑦ ᒐᕙᒪᐅᔪᓄᑦ: ᒪᑐᕐᓯᔨᐅᓪᓗᑎᒃ ᒪᓕᒐᓕᕆᕕᒡᔪᐊᑉ ᐱᒋᐊᕐᓂᖓᓂᒃ, ᑲᑎᒪᔨᐅᖃᑕᐅᔪᓂᒃ ᐊᖏᖅᑎᑦᑎᔨᐅᓪᓗᑎᒃ ᐊᒻᒪᓗ ᒐᕙᒪᓕᕆᓂᕐᒧᑦ ᑲᑎᒪᔨᓂᒃ ᐊᒻᒪᑦᑕᐅᖅ ᐊᖏᖅᑎᐅᓪᓗᓂ, ᐅᕝᕙᓘᓐᓃᑦ ᑭᖑᓪᓕᕐᐹᒃᑯᑦ ᐊᖏᖅᑎᐅᓂᒃᑯᑦ ᒪᓕᒐᓕᕆᔨᒃᑯᓐᓄᑦ.