ᐄᕙ ᐋᕆᐊᒃ, ᓄᓇᕗᒥᑦ ᓯᕗᓕᐅᕐᑎᐅᓂᑯ, ᑕᑯᓯᒪᕗᖅ ᐊᑯᑦᑐᔫᑎᓂᒃ ᓴᕿᑉᐸᓪᓕᐊᔪᓂᒃ. “ᒥᑭᓐᓂᕐᓴᑦ ᓄᓇᓖᑦ ᓱᓕ ᐱᔭᒃᓴᖃᕐᔪᐊᕐᒪᑕ,” ᐅᖃᖅᑐᖅ. “ᐱᔨᑦᑎᕋᐅᑎᑖᕆᐊᖃᒻᒪᕆᖕᒪᑕ.” (ᐊᔾᔨᙳᐊᖅ ᐅᕙᙵᑦ ᐄᕙ ᐋᕆᐊᒃ)

ᓄᓇᕗᑦ ᑮᓇᐅᔭᓕᐅᕐᓂᒃᑯᑦ ᖁᕝᕙᖅᐹᓪᓕᓗᐊᕐᓂᖓᓄᑦ ᒥᑭᑦᑐᑦᓂᒃ ᓄᓇᓕᖕᓂ ᐃᒃᓯᖕᓇᖅᑕᐅᕚ?

“ᒥᑭᓐᓂᕐᓴᑦ ᓄᓇᓖᑦ ᓱᓕ ᐱᕕᒃᓴᖃᕐᔪᐊᕐᒪᑕ”

By ᑯᕆᔅ ᑕᒡᓚᔅ

For an English version of this article, see Has Nunavut’s economic boom left the small communities behind?

 ᖁᕕᐊᓲᑎᖃᕋᑦᑕ ᓄᓇᕗᑦ 20-ᐅᓕᕐᓂᖓᓂᒃ ᕿᒥᕐᕈᐊᖅᖢᑎᒍᑦ ᑖᔅᓱᒪ ᓇᖕᒥᓂᖅ ᒐᕙᒪᓕᕆᔨᖃᖅᑐᑦ ᑎᐅᕆᑑᕆᐅᑉ ᐊᓂᒍᐃᓯᒪᓂᖏᓐᓂ ᐊᒻᒪ ᐱᓇᓱᒋᐊᖃᖅᓯᒪᔭᖏᓐᓂᒃ ᒫᙵᑦ ᑎᑕᐅᓯᕆᓂᕐᒥᒃ ᐊᒻᒪ ᑕᑯᓐᓇᒐᒃᓴᓕᕆᓂᕐᒥᒃ ᒪᐅᖓ ᑮᓇᐅᔭᓕᐅᕋᓱᖕᓂᕐᒧᑦ, ᐃᓄᒃᑐᑦ ᖃᓄᐃᓕᕐᓂᖓᓂᒃ ᐊᒻᒪᓗ ᓯᓚᐅᑉ ᐊᓯᙳᖅᓂᖓᓂᒃ. ᐃᓚᖏᓐᓂᒃ ᓄᓇᕗᒻᒥᐅᑕᑦ ᐅᓂᒃᑲᐅᓯᖏᓐᓂᒃ ᑐᓴᕐᓂᐊᖅᑐᒍ ᖃᓄᖅ ᓄᓇᕗᑦ ᑐᑭᖃᕐᒪᖔᑦ ᑖᒃᑯᓄᖓ ᐊᒻᒪᓗ ᖃᓄᐃᑦᑐᓂ ᐊᓯᙳᕈᑎᒃᓴᓂᒃ ᑕᑯᔪᒪᖕᒪᖔᖏᓐᓂᒃ ᐊᕐᕌᒍ 20 ᐊᒡᒋᖅᑐᓂᒃ. 

ᐊᕐᕌᒍᒐᓴᖕᓂ ᕿᓚᒥᐊᓗᒃ ᑮᓇᐅᔭᓕᐅᕐᐸᓪᓕᐊᓂᐅᑉ ᐱᕈᖅᐸᓪᓕᐊᓂᖓ ᓄᓇᕗᒥᑦ ᐊᑯᑦᑐᖅᐸᓪᓕᐊᒍᑎᐅᕗᖅ ᒪᐅᓇ ᐃᑲᔫᑎᑖᖅᐸᓪᓕᐊᔪᓂᒃ ᐱᕙᓪᓕᐊᔪᓕᕆᓂᕐᒧᑦ ᐊᒻᒪᓗ ᐅᑯᐊ ᕿᒪᒃᑕᐅᑐᐃᓐᓇᖅᑐ.

ᑕᒪᐅᓇᑦᑕᐃᓐᓇᖅ, ᑕᐃᒪᙵᑦ ᑮᓇᐅᔭᓕᐅᕐᓇᑦᑎᐊᙱᓚᐅᖅᑎᓪᓗᒍ ᑭᖑᓪᓕᖅᐹᒥᑦ 2009-ᒥᑦ, ᓄᓇᕗᑦ ᓱᑲᓛᒃᑯᑦ ᑮᓇᐅᔭᓕᐅᕈᑎᓕᕆᕗᑦ ᑲᓇᑕᒥ. 2017-ᒥᑦ, ᓄᓇᕗᑦ ᑮᓇᐅᔭᓕᐅᕈᑎᓕᕆᓂᖓ ᖁᕝᕙᖅᐹᓪᓚᐅᕐᓯᒪᓚᐅᕐᑐᖅ 9.8 ᐳᓴᓐ

ᑎᒥᑦ, ᐊᓯᖏᓪᓕ ᐳᕌᕕᓐᓯᐅᔪᑦ ᐊᒻᒪ ᑎᐅᕆᑑᕆᐅᔪᑦ ᑲᑎᖢᑎᒃ ᐱᕈᖅᐹᓪᓕᕈᑎᖃᖅᖢᑎᒃ 3 ᐳᓴᓐᑎᑐᐃᓐᓇᕐᒥᒃ.

ᓇᐅᒃᑯᑐᐃᓐᓇᖅ ᖃᓄᐃᓕᐅᕈᑎᐅᕙᒃᑐᒃᑯᑦ, ᓄᓇᕗᑦ ᑮᓇᐅᔭᓕᐅᕈᑎᖃᕐᓂᖓ ᖄᖏᖅᓯᓯᒪᓚᐅᕐᑐᖅ ᐃᓱᒪᒋᔭᐅᓯᒪᔪᓂᒃ ᑕᒪᑐᒧᖓ ᓄᓇᕗᑦ ᐱᒋᐊᓕᖅᑎᓪᓗᒍ. ᑮᓇᐅᔭᓕᐅᕐᓂᖅ ᒪᕐᕈᐃᖅᖢᓂ ᐅᓄᕐᓯᕚᓪᓕᖅᑐᖅ ᑕᐃᒪᙵᑦ ᓄᓇᑦᓯᐊᕐᒥ ᐃᓚᒋᔭᐅᔪᓐᓃᓚᐅᕐᒪᑦ, ᑎᑭᖢᓂ $2.23 ᐱᓕᐊᓐ 2017-ᒥᑦ.

ᓄᓇᕗᒥᑦ ᑮᓇᐅᔭᓕᐅᕈᑎᐅᔪᑦ ᐊᑐᖅᑕᐅᓕᕐᓂᕐᒧᑦ ᐅᓄᕐᓂᖏᑦᑎᒍᑦ, ᑖᓐᓇ ᓇᓗᓇᐃᒃᑯᑎᒋᔭᐅᒡᒍᓪᓗᓂ ᐃᓅᖃᑎᒌᖕᓂᕐᒧᑦ ᐊᔪᕐᓴᙱᔾᔪᑎᒧᑦ, ᒫᓃᑦᑐᖅ $75,788, ᑲᓇᑕᓕᒫᒥᑦ ᓇᓗᓇᐃᒃᑯᑎᐅᒡᒍᔪᒥᑦ ᖁᑦᑎᖕᓂᕐᓴᒻᒪᕆᐅᓪᓗᓂ ᐊᒻᒪᓗ ᖁᑦᑎᖕᓂᕐᓴᐅᒋᓪᓗᓂ ᔭᒪᓂᒥᑦ ᐅᕝᕙᓘᓐᓃᑦ ᓵᑎ ᐊᕇᐱᐊᒥᑦ.

ᑖᓐᓇ ᐊᔪᕐᓴᙱᔾᔪᑎᐅᓂᕐᓕ, ᒪᑯᓄᖓ ᐱᔭᐅᕙᓪᓕᐊᙱᑦᑐᖅ ᐊᔪᕐᓴᓛᓂᒃ ᓄᓇᕗᒥᐅᓂᒃ. 2017-ᒥᑦ ᖁᑎᖕᓂᖅᐹᑦ 10 ᐳᓴᓐᑎᒋᔭᐅᔪᑦ ᑮᓇᐅᔭᓕᐅᕐᑎᐅᔪᑦ ᓄᓇᕗᒥᑦ ᑎᑭᐅᑎᓯᒪᔪᑦ 34 ᐳᓴᓐᑎᒥᑦ ᑲᑎᖢᑎᒃ ᑮᓇᐅᔭᓕᐅᕈᑎᓂᒃ. ᐊᓪᓕᐅᓂᕐᓴᑦ 10 ᐳᓴᓐᑎᐅᔪᑦ, ᐅᖃᐅᓯᖃᕐᓯᒪᕗᑦ ᑮᓇᐅᔭᓕᐅᕐᓯᒪᓂᖏᓐᓂᒃ $2,435 ᐃᓄᒃ ᐊᑕᐅᓯᖅ.

ᔮᓐ ᒪᐃᓐ, ᒪᓕᒐᓕᐅᕐᑎ ᐊᕐᕕᐊᑦ-ᑎᑭᕋᕐᔪᐊᖅᒧᑦ, ᑕᒪᑐᒥᖓ ᑕᑯᓯᒪᕗᖅ ᐱᓪᓚᕆᐅᓂᕐᒥᑦ ᒪᓕᒐᓕᕆᒡᕕᐊᓂᑦ.

ᔮᓐ ᒪᐃᓐ, ᒪᓕᒐᓕᐅᕐᑎ ᐊᕐᕕᐊᑦ-ᑎᑭᕋᕐᔪᐊᕐᒧᑦ, ᐅᖃᖅᑐᖅ ᑮᓇᐅᔭᓕᐅ­ᕈᑎᐅᔪᑦ ᓇᓕᒧᒌᙱᓐᓂᖏᑦ ᐱᐅᔪᓐᓃᖅᐸᓪᓕᐊᔪᖅ. (ᐊᔾᔨᓕ­ᐅᕆᔨ ᓯᑏᕝ ᑐᓵᒻ)

ᑮᓇᐅᔭᓕᐅᕐᓂᖅ ᐊᔾᔨᒌᙱᓗᐊᕐᓂᖓ ᐱᐅᔪᓐᓃᖅᐸᓪᓕᐊᔪᖅ

“ᑮᓇᐅᔭᓕᐅᕐᓂᖅ ᐊᔾᔨᒌᙱᓗᐊᕐᓂᖓ ᐱᐅᔪᓐᓃᖅᐸᓪᓕᐊᔪᖅ,” ᐅᖃᖅᑐᖅ. “ᐃᓚᐃᓐᓇᑯᓗᖏᑦ ᐃᓄᐃᑦ ᐃᖅᑲᓇᐃᔭᕐᒪᑕ, ᓂᕆᑦᑎᐊᖅᐸᒃᖢᑎᒃ ᐊᒻᒪ ᑲᒪᒋᔭᐅᑦᑎᐊᖅᖢᑎᒃ ᐊᒻᒪᓘᑯᐊ ᐃᓚᖏᑦ ᕿᒪᒃᑕᐅᑐᐃᓐᓇᖅᑐᑦ. ᐱᑕᖃᕋᓗᐊᕐᒪᑦ ᐊᔪᙱᑦᑐᓐᓇᖅᑐᓂᒃ ᑭᓯᐊᓂᓕ ᐊᐃᑦᑖ ᐊᔪᓕᕐᓯᒪᑐᐃᓐᓇᖅᑐᑦ.”

ᑕᐃᒪᓐᓇ ᐋᕿᒃᓯᒪᔾᔮᓚᐅᙱᑦᑑᒐᓗᐊᖅ. ᓂᕆᐅᖕᓂᖅᑕᖃᑦᑎᐊᓚᐅᕐᓯᒪᖕᒪᑦ 1990-ᖏᓐᓂᑦ ᑕᒪᒃᑯᐊ ᐸᕐᓇᐅᑎᑦ ᐋᕿᒃᓱᖅᑕᐅᕙᓪᓕᐊᓕᖅᑎᓪᓗᒋᑦ ᓄᓇᕗᒧᑦ.

ᐃᓄᐃᑦ ᐊᖏᓂᖅᐹᒥᑦ ᓄᓇᒥᑦ ᓇᖕᒥᓂᖃᖅᑎᐅᓕᒑᓕᖅᑐᑦᓄᓇᕐᔪᐊᒥ, ᓂᕈᐊᑲᑖᓪᓚᓚᐅᖅᖢᑎᒃ ᓇᓕᐊᒃ ᐅᔭᕋᐅᔭᓄᑦ ᐃᑲᔫᑎᖃᕋᔭᕐᓂᖏᓐᓂᒃ. ᐊᒥᓱᑦ ᐅᒃᐱᕈᓱᓚᐅᕐᑐᑦ ᐊᑐᒃᑲᓐᓂᕈᓐᓇᖅᑐᓕᕆᓂᖅ ᓄᑖᓂᒃ ᐃᖅᑲᓇᐃᔮᒃᓴᓂᒃ ᓴᕿᑦᑐᖃᕐᓂᐊᕋᓱᒋᓪᓗᑎᒃ ᐊᒻᒪᓗ ᐃᖅᑲᓇᐃᔭᙱᑦᑐᑦ ᐅᓄᙱᓐᓂᕐᓴᐅᓗᑎᒃ.

ᐃᓱᒪᒋᔭᐅᓂᑯᑦ ᐃᓚᖓᒍᑦ ᑕᒻᒪᓚᐅᙱᑦᑐᑦ. ᑮᓇᐅᔭᓕᐅᕋᓱᖕᓂᒃᑯᑦ ᑲᑕᒃᓯᒪᓂᖅ ᐊᓂᒍᖅᑎᓪᓗᒍ, ᓄᓇᕗᒥᑦ ᐅᔭᕋᖕᓂᐊᕐᓂᕐᒧᑦᑮᓇᐅᔭᓕᐅᕐᓂᒃᑯᑦ ᐱᓛᖑᓯᒪᕗᖅ. ᓇᐃᓴᐅᑎᑎᒍᑦ. ᒪᑐᐹᖕᒃ ᐅᔭᕋᒃᓂᐊᕐᕕᒃ, ᐃᒻᒥᒃᑰᖓᓪᓗᓂ, 15-ᐳᓴᓐᑎᒥᑦ ᑮᓇᐅᔭᓕᐅᕐᓂᐅᕗᖅ ᓄᓇᕗᒥᑦ ᑮᓇᐅᔭᓕᐅᕐᓂᒃᑯᑦ, ᐅᑯᑎᒎᓇᕐᓕ ᑮᓇᐅᔭᓕᐅᕋᓱᒃᑐᓕᕆᔨᓄᑦ.

ᒪᑐᐹᖕᒃ ᓴᕿᑎᑦᑎᕙᓪᓕᐊᓕᓚᐅᕐᓯᒪᔪᖅ 2010-ᒥᑦ. ᑖᓐᓇ ᐅᔭᕋᒃᓂᐊᕐᕕᒃ ᓄᓇᖃᖅᑐᓂᒃ ᐃᖅᑲᓇᐃᔭᖅᑎᒃᓴᖅᓯᐅᕐᑎᓪᓗᒋ, ᐃᖅᑲᓇᐃᔭᖅᑎᐅᔪᑦ ᐊᑕᐅᓯᕐᒥᑦ ᓄᓇᓕᖕᓂᖔᖅᑐᑦ, ᖃᒪᓂᑦᑐᐊᕐᒥᑦ, 70 ᑭᓛᒥᑕᔅ ᐅᖓᓯᖕᓂᖃᖅᑐᖅ.

ᐅᔭᕋᒃᓂᐊᕐᕕᒃ ᒪᑐᐃᕐᑕᐅᑎᓪᓗᒍ, ᔫᓯ ᑯᓱᒐᖅ, ᐊᖓᔪᖅ ᕿᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᓄᑦ, ᐅᖃᓚᐅᕐᓯᒪᔪᖅ ᖃᒪᓂᑦᑐᐊᖅ, “ᖁᕕᐊᓱᖕᓂᖅᐹᖅ ᓄᓇᓕᖕᓂᑦ ᓄᓇᕗᒥᑦ.” ᐅᓇᓕ ᐃᒡᓗᖔᖓᒎᖓᒻᒪᕆᒃᑐᖅ ᐊᕕᓚᐅᖅᑎᓐᓇᒋᑦ, ᐅᖃᖅᑎᓪᓗᒍ ᐃᒪᓐᓇ, “ᐃᓄᐃᑦ ᕿᐊᑐᐃᓐᓇᓕᖅᑐᑦ ᓴᐱᓕᕐᓯᒪᓂᕐᒧᑦ.”

ᐅᔭᕋᒃᓂᐊᕐᕕᒃᒥᑦ ᐃᖅᑲᓇᐃᔭᖅᑐᑦ ᐊᒥᓲᙱᓐᓂᕐᓴᑦ ᓂᕆᐅᖏᔭᐅᓂᑯᒥᑦ

ᐅᓪᓗᒥ, ᒪᑐᐹᖕᒃ ᐃᓱᓕᑦᑎᓕᖅᑎᓪᓗᒍ ᐱᓕᕆᕝᕕᐅᔪᓐᓇᕐᓂᖓᓂ ᐃᓚᖏᑦ ᐊᐱᕆᓯᒪᓕᖅᑐᑦ ᑖᓐᓇ ᐅᔭᕋᒃᓂᐊᕐᕕᒃ ᖃᓄᐃᓐᓂᐊᕋᓱᒋᔭᐅᓂᖓᓄᑦ ᑕᐃᒪᐃᓯᒪᒐᓗᐊᕆᐊᒃᓴᖓᓂᒃ. ᑕᒪᒃᑯᐊ ᕿᑎᐊᒍᑦ ᑮᓇᐅᔭᓕᐅᕐᓂᖅ ᐃᓄᖕᓂ ᓄᓇᓕᖕᓂ ᐱᕈᖅᐹᓪᓕᕋᓗᐊᖅᑎᓪᓗᒍ ᓇᑉᐸᖓᑕ ᐅᖓᑖᓄᑦ ᐅᔭᕋᒃᓂᐊᕐᕕᒃ ᐱᒋᐊᓚᐅᖅᑎᓪᓗᒍ, ᑎᑭᐅᑎᓪᓗᑎᒃ $25,280 2015-ᒥᑦ, ᐃᖅᑲᓇᐃᔭᙱᑦᑐᑦ ᐅᓄᕐᓯᕚᓪᓕᕐᒥᔪᖅ 30-ᐳᓴᓐᑎᐅᑉ ᐅᖓᑖᓄᑦ.

ᐅᔭᕋᒃᓂᐊᕐᕕᒃ ᒪᑐᐃᓚᐅᙱᓐᓂᖓᓂᒃ, ᖃᒪᓂᑦᑐᐊᕐᒥᑦ ᕼᐋᒻᒪᓚᒃᑯᑦ ᑲᑎᒪᔨᖏᑦ ᓂᕆᐅᓚᐅᕐᓯᒪᔪᑦ ᑎᑭᐅᑎᔪᓐᓇᕐᓗᑎᒃ 50 ᐳᓴᓐᑎᒧᑦ ᐃᖅᑲᓇᐃᔭᖅᑐᑦ ᐃᓄᐃᑦ ᒪᑐᐹᖕᒃᒥᑦ. ᑕᐃᒪᙵᓪᓕ 2014-ᒥᑦ, 220 ᐃᓄᐃᑦ ᐃᖅᑲᓇᐃᔭᖅᑎᑕᐅᓯᒪᔪᑦ, ᑲᑎᖢᑎᒃ 29-ᐳᓴᓐᑎᒥᑦ ᐃᖅᑲᓇᐃᔭᖅᖢᑎᒃ ᐃᓄᐃᑦ. ᖃᔅᓯᐅᓂᖏᑦ ᐃᓄᐃᑦ ᖃᒪᓂᑦᑐᐊᕐᒥᑦ ᐃᓄᓕᕆᔨᒃᑯᓐᓂᑦ ᐃᑲᔪᖅᑕᐅᕙᒃᑐᑦ ᓱᓕ ᓱᖁᓯᕐᓯᒪᙱᓚᖅ.

2017 ᑎᑭᖢᒍ, ᖁᕕᐊᓱᕈᓘᔭᕐᓇᖅ ᐅᔭᕋᒃᓂᐊᕐᕕᐅᑉ ᒪᑐᐃᕐᓂᖓ ᖁᕕᐊᓇᓗᐊᕈᓐᓃᖅᐳᖅ. ᐅᖃᐅᓯᒃᓴᖏᑦᑎᒍᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᔾᔪᑎᖃᖅᖢᑎᒃ ᐊᒡᓂᑯ ᐄᒍᓪ ᑐᒃᓯᕋᐅᑎᖏᓐᓂᒃ ᓄᑖᒥ ᐅᔭᕋᒃᓂᐊᕐᕕᒃᓴᒧᑦ ᐅᕙᓂ ᐊᒪᕈᖅ ᐱᓕᕆᐊᒥᑦ, ᖃᒪᓂᑦᑐᐊᒥᑦ ᐊᖑᓇᓱᒃᑐᓕᕆᔨᒃᑯᑦ ᑎᑎᕋᓚᐅᕐᑐᑦ, “ᐃᖅᑲᓇᐃᔮᒃᓴᐃᑦ ᐃᑲᔪᒻᒪᕆᒃᑲᓗᐊᖅᑎᓪᓗᒍ ᐊᒥᓱᓂᒃ ᐃᓚᒌᓄᑦ, ᑖᓐᓇ ᒎᓗ ᓄᙳᑉᐸᑦ, ᐱᑕᖃᖅᑐᖃᔾᔮᙱᑦᑐᖅ ᐃᑲᔫᑎᕕᓂᕐᓂᒃ. ᑕᑯᓚᐅᙱᓐᓇᑦᑕ ᐊᖏᔪᓂᒃ ᐱᐅᓯᕚᓪᓕᕈᑎᐅᓇᔭᖅᑐᓂᒃ ᐱᖁᑎᑎᒍᑦ ᐅᕝᕙᓘᓐᓃᑦ ᐃᒡᓗᑎᒍ ᐅᔭᕋᒃᓂᐊᕐᓂᕐᒧᑦ.”

ᐊᔾᔨᐸᓗᖓᓂ ᑕᐃᒪᐃᓯᒪᖕᒥᔪᑦ ᒥᑦᑎᒪᑕᓕᒃᒥᑦ, ᐅᓇ ᖃᓂᒋᔭᖓᓃᑦᑐᖅ ᓄᓘᔮᓂᑦ ᐱᓕᕆᐊᖅ ᐊᐅᓚᑕᐅᓯᒪᓕᕐᒪᑦ ᑕᐃᒪᙵᓂᑦ 2014-ᒥᑦ. ᑭᖑᓕᖅᐹᒥᑦ ᐅᒥᐊᕐᔪᐊᖃᕐᓇᒥᑦ, ᐹᕕᓐᓛᓐᑯᑦ ᐊᐅᓪᓚᖅᑎᑦᑎᓚᐅᕐᑐᑦ ᐅᓄᕐᓂᖅᐹᓂ ᒫᓂ 5.1 ᒥᓕᐊᓐ ᑕᓐᔅᓂᒃ ᓴᕕᕋᔭᒃᓴᒥᑦ ᓄᓇᕗᒥᑦ ᐃᐅᕈᑉᒧᑦ ᐊᒻᒪ ᐄᓯᐊᒧᑦ, ᑮᓇᐅᔭᖃᓪᓛᓗᖕᓂᒃ ᓄᓇᕗᑦ ᑮᓇᐅᔭᓕᐅᕐᓂᖓᓄᑦ ᐃᓚᓕᐅᔾᔨᓪᓗᑎᒃ.

ᑲᒻᐸᓂᐅᔪᑦ ᐅᓂᒃᑲᐅᓯᖃᓚᐅᕐᑐᑦ ᐊᑭᓖᓯᒪᓂᕐᒥᒃ $819 ᒥᓕᐊᓐ ᑖᓚᓂᒃ ᐃᓄᐃᑦ ᓇᖕᒥᓂᖅ ᐱᓕᕆᐊᖏᓐᓄᑦ ᐊᒻᒪ ᑲᑐᔾᔨᓂᒃᑯᑦ ᐱᓕᕆᐊᓄᑦ ᑕᐃᒪᙵᑦ ᑖᓐᓇ ᐱᓕᕆᓂᖅ ᐱᒋᐊᓚᐅᕐᓯᒪᖕᒪᑦ ᐊᒻᒪᓗ $33.3 ᒥᓕᐊᓐ ᑖᓚᓂ ᐃᖅᑲᓇᐃᔭᖅᑎᓄᑦ ᐊᑭᓕᕐᓯᓯᒪᓪᓗᑎᒃ. 2017-ᒥᑦ, ᑭᓯᐊᓂᓕ, ᑕᒪᒃᑯᐊ ᑮᓇᐅᔭᓕᐊᕆᔭᐅᔪᑦ ᐃᖅᑲᓇᐃᔭᕐᓂᕐᒧᑦ 219 ᐃᓄᖕᓄᑦ ᑐᕌᖓᓚᐅᕐᑐᑦ ᑖᒃᑯᐊᓗ 14 ᐳᓴᓐᑎᑐᐃᓐᓇᐅᓪᓗᑎᒃ ᐃᖅᑲᓇᐃᔭᖅᑎᓂᒃ.

ᐅᓄᙱᓐᓂᐅᔪᑦ ᓈᒻᒪᒋᔭᐅᓚᐅᙱᓚᑦ ᕼᐋᒻᒪᓚᒃᑯᓐᓄᑦ ᑲᑎᒪᔨᓄᑦ ᐊᒻᒪᓗ ᒥᑦᑎᒪᑕᓕᒃᒥᑦ ᐊᖑᓇᓱᒃᑎᓄᑦ. ᐅᖃᐅᓯᒃᓴᑎᒍᑦ ᓄᓇᕗᑦ ᐸᕐᓇᐃᔨᓄᑦ, ᐅᖃᐅᓯᖃᕐᓯᒪᔪᑦ ᐃᖅᑲᓇᐃᔭᖅᑎᑕᐅᔪᑦ ᓄᓘᔮᖕᓂᑦ, “ᓄᒫᓇᕐᓂᕐᒥᑦ,” ᐊᒻᒪᓗ ᑭᐅᓗᒍᑎᖃᖅᖢᑎᒃ ᐅᔭᕋᒃᓂᐊᕐᕕᐅᑉ ᐊᒃᑐᐃᒍᑎᖓ ᐱᓗᐊᕐᓂᕐᓴᐅᓂᖓᓂᒃ ᓄᓇᓕᖕᓂᑦ ᐃᑲᔪᖅᑐᐃᓂᕐᒥᑦ.

ᑕᒪᒃᑯᐊ ᐊᑐᒃᑲᓐᓂᕈᓐᓇᖅᑐᓕᕆᔨᒃᑯᑦ ᓄᓇᓕᖕᓂᑦ ᐃᑲᔪᕈᓐᓇᙱᒃᑯᑎᒃ, ᑕᐃᒪᓕ ᒐᕙᒪᒃᑯᑦ ᐱᐅᓂᕐᓴᒥᒃ ᐊᑐᙱᒃᑭᕗᑦ. ᒐᕙᒪᑐᖃᒃᑯᑦ, ᓄᓇᕗᑦ ᐊᒻᒪ ᓄᓇᓕᖕᓄᑦ ᒐᕙᓚᐅᔪᑦ ᑲᑎᖢᑎᒃ ᑮᓇᐅᔭᓕᐅᕐᓂᕐᒥᑦ 50 ᐳᓴᓐᑎᒧᑦ ᑎᑭᐅᑎᒍᑎᐅᕗᑦ ᐊᒻᒪᓗ ᓇᑉᐸᖓᑕ ᐅᖓᑖᓂᑦ ᐃᓄᐃᑦ ᐃᖅᑲᓇᐃᔭᖅᑐᑦ ᓄᓇᕗᒥᑦ ᐱᔨᑦᑎᕋᐅᑎᓕᕆᓂᕐᒧᑦ ᐱᓕᕆᐊᖃᖅᖢᑎᒃ. ᐅᓇ ᐊᓯᙳᖅᓯᒪᓗᐊᙱᑦᑐᖅ ᑕᐃᒪᙵᑦ ᐊᕕᓚᐅᕐᑎᓪᓗᒋᑦ 1999-ᒥᑦ.

ᐊᑦᑎᖕᓂᕐᓴᒥᑦ ᑮᓇᐅᔭᓕᐅᕐᑐᑦ ᒐᕙᒪᓕᕆᕝᕕᖃᖅᑐᑦ ᓄᓇᓖᑦ

ᓄᓇᕗᑦ ᒐᕙᒪᓕᕆᕝᕕᐅᓇᔭᖅᑐᑦ ᐊᑐᕈᓐᓃᓚᐅᕐᓯᒪᔪᖅ ᐊᕕᓚᐅᖅᑎᓐᓇᒋ ᐃᒪᓐᓇ ᐃᖅᑲᓇᐃᔮᓂᒃ ᓯᐊᕐᒥᖅᑎᕆᔪᒪᓪᓗᑎᒃ ᐊᒻᒪᓗ ᑮᓇᐅᔭᓕᐅᕐᓂᒃᑯᑦ ᐃᑲᔫᑎᐅᓗᑎᒃ ᓄᓇᓕᖕᓄᑦ ᓄᓇᕗᒥᑦ.

ᐊᕐᕌᒍ ᐊᑕᑎᑦ (20) ᐊᓂᒍᖅᑎᓪᓗᒋ, ᑭᓯᐊᓂᓕ, ᑮᓇᐅᔭᓕᐊᖑᔪᑦ ᖁᓕᓂᑦ ᒐᕙᒪᓕᕆᕝᕕᐅᔪᓂᒃ ᓄᓇᓕᖕᓂ ᓱᓕ ᐊᑦᑎᖕᓂᕐᓴᐅᕗᑦ ᓄᓇᕗᓕᒫᖅ ᑕᐅᑐᒃᖢᒍ. ᐊᕐᕕᐊᓂᑦ, ᑮᓇᐅᔭᓕᐅᕐᓂ ᐃᓄᖕᓂ 2016-ᒥᑦ ᒫᓃᓚᐅᕐᑐᖅ $20,896, ᖁᒡᓗᖅᑑᒥ ᒫᓃᓚᐅᕐᑐᖅ $17,173 ᐊᒻᒪ ᑭᙵᓂᑦ $17,008.

ᑕᐃᒪᙵᓪᓕ 2016-ᒥᑦ, ᐃᒡᓗᓕᒃ, ᑖᓐᓇᑦᑕᐅᖅ ᒐᕙᒪᓕᕆᕝᐅᖃᑕᐅᔪᖅ ᓄᓇᓕᒃ, ᐅᓄᕐᓂᕐᓴᐃᑦᓂᖃᐃᓱᖃᑦᑕᖅᑐᑦ ᐃᖃᓗᖕᓂᐅᖓᓂᒡᓕ, ᓄᓇᓕᒃ ᑕᓪᓕᒪᐃᖅᖢᓂ ᐊᖏᓂᕐᓴᖅ ᑖᔅᓱᒪᙵᑦ. ᐱᖓᓱᑦ ᑎᓴᒪᓂᒃ ᐃᒡᓗᓕᖕᒥᐅᓂᒃ ᐃᓄᓕᕆᔨᒃᑯᓐᓄᑦ ᐃᑲᔪᖅᑕᐅᔭᕆᐊᖃᖃᑦᑕᖅᑐᑦ ᐊᕐᕌᒎ ᐃᓗᖓᒍᑦ ᑕᐅᑐᙳᐊᖅᖢᒍᓕ 14 ᐳᓴᓐᑎ ᐃᖃᓗᖕᓂᑦ.

ᑎᑎᕋᖅᑎᐅᔪᑦ ᑭᖑᓕᖅᐹᒥᑦ ᕿᒥᕐᕈᐊᕈᑎᓂᒃ ᒐᕙᒪᓕᕆᕝᕕᐅᓂᐊᖅᑐᓂᒃ 2011-ᒥᑦ ᖃᐅᔨᓐᓇᓚᐅᕐᑐᖅ ᐅᓇ ᐊᑐᐊᒐᖅ ᐋᕿᒃᓯᒪᒐᓱᒃᑎᓪᓗᒍ ᐃᓄᐃᑦ ᐃᖅᑲᓇᐃᔭᕐᓂᖏᓐᓂᒃ, ᐃᓄᐃᑦ ᐊᔪᕈᓐᓃᕐᓯᒪᔪᑦ ᐅᓄᙱᓗᐊᕐᓂᖏᓐᓄᑦ ᒐᕙᒪᒃᑯᓐᓂᑦ ᑎᑭᐅᑎᑎᑦᑎᑦᑐᓐᓇᖏᓚᖅ ᒐᕙᒪᓕᕆᓂᒃᑯᑦ ᑎᑭᐅᑎᔭᐅᓇᓱᒃᑐᓂᒃ.

ᐄᕙ ᐋᕆᐊᒃ, ᓄᓇᕗᒧᑦ ᓯᕗᓕᐅᕐᑎᐅᓂᑯ, ᐅᖃᓚᐅᕐᑐᖅ ᐃᓱᒪᒋᔭᐅᑦᑎᐊᖅᑐᕕᓃᑦ 1990-ᖏᓐᓂᒃ, ᓄᓇᕗᑦ ᐸᕐᓇᒃᑕᐅᓕᖅᑎᓪᓗᒍ, ᑕᐅᑐᑦᑎᐊᕐᓇᓚᐅᙱᒻᒪᑦ ᖃᓄᐃᓪᓚᕆᖕᓂᐊᕐᓂᖓ ᓄᓇᕗᑦ ᐊᐅᓚᑕᐅᓂᖓᒍᑦ.

ᐸᓛᓐᑎᓇ ᑲᔅᓚ, ᐅᓯᑲᖅᑕᐅᑎᒥ ᓄᓇᓯᐅᑎᒥ ᐊᖁᑎ ᖃᒪᓂᑦᑐᐊᕐᒥᐅᑕᖅ, ᐃᖅᑲᓇᐃᔭᖅᑐᖅ ᐊᒡᓂᑯ ᐄᒍᓪ ᒪᑐᐹᖕᒃ ᒎᓗᒧᑦ ᐅᔭᕋᒃᓂᐊᕐᕕᒃᒥᑦ ᔫᓂ 23, 2014-ᒥᑦ. ᑕᐃᔅᓱᒪᓂᑦ, ᐊᒥᓲᓂᕐᓴᑦ ᐃᓄᐃᑦ ᐅᓯᑲᖅᑕᐅᑎᓂᒃ ᓄᓇᓯᐅᑎᓂᒃ ᐊᖁᑎᐅᓚᐅᕐᓯᒪᔪᑦ, ᒫᓂᐸᓗᒃ 75-ᖑᓪᓗᑎᒃ. ᐱᖓᓱᓂᒃ ᐊᑕᐅᓯᖅ ᐅᕝᕙᓘᓐᓃᑦ 22 ᐊᕐᓇᐅᓚᐅᕐᑐᑦ ᑕᕝᕙᓂ ᐊᕐᕌᒍᒥᑦ. (ᐊᔾᔨᙳᐊᖁᑎ)

ᐱᖃᖅᑐᑦ ᐊᒻᒪ ᐱᖃᙱᑦᑐᑦ

ᐃᓱᒫᓘᑎᖃᕐᓂᕐᓴᐅᔪᕐᓕ ᒥᑭᓐᓂᕐᓴᓂᒃ ᓄᓇᓕᖕᓂ, ᐆᑐᓇᖅ ᑎᑭᕋᕐᔪᐊᖅᑎᑐᑦ, ᐃᓚᐅᑎᑕᐅᓯᒪᙱᒻᒪᑕ ᒐᕙᒪᓕᕆᓂᒃᓴᒧᑦ.

“ᐊᓯᐊᒍᖔᖅ ᓴᕿᑎᑦᑎᓯᒪᖕᒪᑕ ‘ᐱᖃᖅᑐᑦ’ᐊᒻᒪ ‘ᐱᖃᖏᑦᑐᓂᒡᓗ’, ᐅᖃᖅᑐᖅ

“ᑕᒪᓐᓇ ᑕᐅᑐᙳᐊᕐᓂᑐᐃᓐᓇᕐᒥᑦ ᓴᕿᑎᑦᑎᓯᒪᖕᒪᑦ,” ᒪᐃᓐ ᐅᖃᖅᑐᖅ ᑕᑯᔪᒪᓂᕋᖅᖢᓂ ᐊᐃᑉᐸᖓᓂᒃ ᒐᕙᒪᓕᕆᕝᕕᒃᓴᓂᑦ ᐃᒪᓐᓇ, “ᐃᓱᒪᒋᒃᑲᓐᓂᕐᓂᐊᕐᓗᒍ ᖁᕕᐊᓇᕈᓘᔭᓚᐅᕐᓯᒪᔪᖅ ᐊᕐᕌᓂᐅᓚᐅᕐᓯᒪᔪᓂᒃ 20 ᑭᖑᓂᑦᑎᓐᓂᒃ.”

ᐋᕆᐊᒃ ᑕᑯᓯᒪᖕᒥᔪᖅ ᐊᑯᑦᑐᔫᑎᐅᓂᕐᒥᒃᓴᕿᑉᐸᓪᓕᐊᔪᓂᒃ. “ᓄᓇᓕᕗᑦ ᒥᑭᑦᑐᐃᑦ ᓱᓕ ᐱᔭᒃᓴᖃᕐᔪᐊᕐᒪᑕ,” ᐅᖃᖅᑐᖅ. “ᐱᔨᑦᑎᕋᐅᑎᑖᕆᐊᖃᒻᒪᕆᒃᑐᑦ. ᓄᓇᓖᑦ ᐱᖃᖅᑎᑕᐅᔭᕆᐊᖃᕐᒪᑕ ᐃᑲᔫᑎᒃᓴᓂᐊᑐᕈᓇᖁᓪᓗᒋᑦᐊᑐᒃᑲᓐᓂᕈᓐᓇᖅᑐᓄᑦᐊᒻᒪ ᐃᑲᔫᑎᒃᓴᓄᑦ.”

ᑕᑯᓯᒪᖕᒪᑦ ᐱᔪᓐᓇᑦᑎᐊᕈᓐᓇᖅᑐᓂᒃ ᒥᑭᑦᑐᓂᒃ ᓇᖕᒥᓂᖅ ᐱᓕᕆᐊᖃᖅᑐᓂᒃ ᐊᒻᒪ ᖃᓄᐃᓕᐅᕋᓱᖕᓂᕐᒧᑦ ᐱᔨᑦᑎᕋᐅᑎᓕᕆᓂᒃᑯᑦ ᒐᕙᒪᒃᑯᓐᓄᑦ ᐊᒻᒪ ᐃᒻᒥᒃᑰᖓᔪᓂᒃ ᐱᓕᕆᐊᓂᒃ. “ᖃᓄᐃᓕᐅᕈᑎᒃᓴᖅᑕᖃᕐᒪᑦ—ᒪᑯᓂᖓᓘᓐᓃᑦ ᓄᓇᓕᖕᓂ ᑖᒃᓯᓕᕆᓂᕐᒥᒃ.”

ᔮᓐ ᒪᐃᓐ ᐅᖃᐅᓯᖃᓚᐅᕐᒥᔪᖅ ᒐᕙᒪᒃᑯᓐᓄᑦ ᐃᑲᔫᑎᑖᕐᓯᒪᓂᕐᒧᑦ ᐃᒡᓗᑖᕆᔭᐅᔪᓂᒃ ᓄᓇᓕᖕᓂᑦ ᐅᖃᖅᖢᓂᓗ ᓄᓇᕗᑦ ᑕᐃᒪᓐᓇ ᓄᖃᕆᐊᖃᕐᓂᖓᓂᒃ, “ᐃᖅᑲᓇᐃᔭᖅᑎᑦᑎᕙᒃᖢᑎᒃ ᐊᑎᖕᓂᕐᓴᓃᑦᑐᓂᒃ ᐃᓄᖕᓂᑦ ᑮᓇᐅᔭᖅᑐᔪᓄᑦ ᐱᓕᕆᐊᒃᓴᓄᑦ.”

ᐋᕆᐊᒃᓗ ᒪᐃᓐᓗ ᑕᒪᕐᒥᒃ ᐅᖃᓚᐅᖅᑑᒃ ᐃᓕᓐᓂᐊᕐᓂᖅ ᐊᒻᒪ ᐊᔪᕈᓐᓃᕐᓴᖅᑎᑦᑎᓂᖅ ᐱᒻᒪᕆᐅᓂᖏᓐᓂᒃ ᐅᓄᕐᓂᕐᓴᐃᑦ ᓄᓇᕗᒻᒥᐅᑦ ᐱᓇᓱᒍᓐᓇᕐᓂᕐᓴᐅᓂᐊᕐᒪᑕ ᓴᕿᑉᐸᓪᓕᐊᔪᓄᑦ ᖃᓄᐃᓕᐅᕈᑎᐅᕙᓪᓕᐊᔪᓂᒃ. ᑕᒪᓐᓇ ᑐᑭᓕᒃ ᐊᔪᕈᓐᓃᕐᓴᕈᑎᓂᒃ ᓄᓇᓕᖕᓄᐊᖅᑎᑦᑎᒃᑲᓐᓂᕐᓗᑎᒃ, ᒪᐃᓐ ᐅᖃᖅᑐᖅ.

“ᐃᓄᐃᑦ ᐊᔪᕈᓐᓃᕐᓴᖅᑎᑕᐅᔭᕆᐊᓖ ᒪᑯᐊ ᓇᒧᙵᐅᕝᕕᖃᙱᓗᐊᖅᑐᑦ,” ᐅᖃᖅᑐᖅ. “ᓄᖅᑲᕆᐊᖃᕋᑦᑕ ᑮᓇᐅᔭᖅᑖᖅᑎᑦᑎᕙᓪᓕᐊᓂᕐᒥᑦ ᐊᕕᒃᑐᖅᓯᒪᓂᒃᑯᑦ ᐱᓕᕆᕝᕕᐅᓛᖑᔪᓄᑦ ᒪᑯᐊᓕ ᑭᓱᖃᙱᑦᑐᑦ ᓄᓇᓖᑦ ᐃᒃᓯᖕᓇᖅᑕᐅᑐᐃᓐᓇᖅᖢᑎᒃ,” ᐅᖃᖅᑐᖅ.

ᑖᓐᓇ ᑐᓴᖅᑕᐅᕙᓪᓕᐊᖂᔨᓕᕐᑐᖅ. ᐅᑯᑎᒎᓇᕐᓕ ᓄᑖᓂ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᓂᒃ, ᐊᑎᓕᐅᖅᑕᐅᓯᒪᔪᖅ ᐅᒃᑑᐱᕆᒥ ᐅᑯᓇᙵᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᐹᕕᓐᓛᓐ ᑐᓂᓯᓂᐊᖅᑐᖅ 10 ᒥᓕᐊᓐ ᑖᓚᓂᒃ ᐊᔪᕈᓐᓃᕐᓴᕐᕕᐅᓂᐊᖅᑐᒧᑦ ᒥᑦᑎᒪᑕᓕᒃᒥᑦ. ᐅᑯᐊ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎ ᐱᖁᔨᓯᒪᖕᒥᔪᖅ ᐹᕕᓐᓛᓐ ᐱᓕᕆᓕᖅᑎᑦᑎᓗᑎᒃ ᐃᖅᑲᓇᐃᔮᒧᑦ ᐸᕐᓇᒍᓐᓇᐅᑎᒃᓴᒥᑦ ᐃᒡᓗᓕᒃᒥᑦ, ᓴᓂᕋᔭᒃᒥᑦ, ᐃᒃᐱᐊᕐᔪᒃᒥᑦ ᐊᒻᒪ ᑲᖏᖅᑐᒑᐱᒃᒥᑦ ᐊᒻᒪᓗ ᐅᕙᓂ ᒥᑦᑎᒪᑕᓕᒃᒥᑦ.

ᑕᒪᒃᑯᐊ ᓄᑖᑦ ᐱᔭᒃᓴᐅᑎᑕᐅᔪᑦ ᐊᔪᕈᓐᓃᕈᑎᐅᓂᐊᕆᐊᒃᓴᖓᓂᒃ ᐅᔭᕋᒃᓂᐊᕐᕕᒃ 50 ᐳᓴᓐᑎᓂᒃ ᐃᓄᖕᓂᑦ ᐃᖅᑲᓇᐃᔭᖅᑎᑦᑎᔭᕆᐊᖃᕐᓂᖓᓂᒃ ᑎᑭᐅᑎᓂᐊᕆᐊᒃᓴᖅ ᓱᓕ ᑕᑯᔭᒃᓴᐅᔭᕆᐊᓕᒃ. ᐅᕘᓇᓕ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑎᒍᑦ, ᑕᒪᓐᓇ ᖃᐅᔨᔭᐅᒋᐊᒃᑲᓐᓂᕐᓂᐊᖅᑐᖅ ᐊᕐᕌᒍ ᖁᓕᑦ ᐊᓂᒍᖅᐸᑕ ᒫᓐᓇᒥ.

ᓱᖅᑯᐃᓐᓇᑦᑎᐊᖅᑰᔨᔪᕐᓕ ᐅᓇ, ᐃᓄᒋᐊᒃᓯᕙᓪᓕᐊᒻᒪᕆᒃᑎᓪᓗᒍ, ᑐᑭᓕᐅᕆᒐᓱᖕᓂᖅ ᓄᓇᕗᑦ ᑮᓇᐅᔭᓕᐅᕐᓂᒃᑯᑦ ᐊᓂᒍᐃᑦᑎᐊᕐᓂᖓ ᐃᖅᑲᓇᐃᔮᑎᒍᑦ ᐊᒻᒪ ᑮᓇᐅᔭᓕᐅᕐᓂᒃᑯᑦ ᐅᓄᕐᓂᕐᓴᓂ ᐃᓄᖕᓂ ᓇᓗᓇᐃᒐᒃᓴᐅᓂᕐᓴᐅᓂᐊᖅᑐᖅ ᓄᓇᕗᑦ ᐊᕐᕌᒍᓂ ᐊᕙᑎᓂᒃ ᐊᓂᒍᐃᒃᑲᓐᓂᕈᓂ.

ᑯᕆᔅ ᑕᔅᓚ ᑐᓴᒐᒃᓴᓕᐅᖅᑎ ᐃᒻᒥᒍᑦ ᑎᑎᕋᖅᑎᐅᓪᓗᓂ ᐱᓕᕆᖃᑎᖃᕐᓯᒪᓪᓗᓂ ᐃᓄᖕᓂᑦ, ᐊᓪᓚᓂᒃ ᐊᒻᒪ ᒐᕙᒪᒃᑯᑦ ᑲᑐᔾᔨᖃᑎᒌᖏᓐᓂᒃ ᓄᓇᕗᒥᑦ ᐊᒻᒪ ᓄᓇᑦᓯᐊᕐᒥᑦ ᑕᐃᒪᙵ 1996-ᒥᑦ.

Share This Story

(0) Comments

Join the Conversation

Your email address will not be published. Required fields are marked *

*