ᓄᓇᕗᑦ ᓱᕈᓯᖏ ᐋᓐᓂᕐᓯᒪᕗᑦ ᑐᓴᐅᒪᔾᔪᑎᓕᕆᓂᒃᑯᑦ ᓈᒻᒪᙱᓕᐅᕈᑎᖃᕐᓂᕐᒧᑦ, ᓇᐅᑦᑎᖅᓱᖅᑎ ᐅᖃᖅᑐᖅ

ᓄᓇᕗᒥ ᓱᕈᓰᑦ ᐃᑲᔪᖅᑕᐅᔭᕆᐊᖃᖅᑐᑦ ᐱᔨᑦᑎᕋᖅᑕᐅᓂᒃᑯᑦ ᓱᓕ ᐋᓐᓂᕐᓯᒪᑐᐃᓐᓇᖅᐳᑦ ᒪᑯᓄᖓ ᓴᙱᙱᔾᔪᑎᐅᓗᐊᕐᑐᓄᑦ ᐃᓄᓕᕆᔨᒃᑯᓐᓂ ᐊᒻᒪᓗ ᑐᑭᒧᐊᖅᑕᐅᑦᑎᐊᙱᓗᐊᕐᓂᖏᓐᓄᑦ ᒐᕙᒪᒃᑯ ᓄᓇᕗᒥᑦ ᐱᓕᕆᕝᕕᖏᑦ ᑲᒪᒋᔭᖃᓪᓗᐊᖅᑐᑦ ᑕᒪᒃᑯᓂᖓ ᐱᔨᑦᑎᕋᐅᑎᓂᒃ, ᓄᓇᕗᒧᑦ ᓱᕈᓯᕐᓂ ᐊᒻᒪ ᐃᓅᓱᒃᑐᓂ ᓇᐅᑦᑎᖅᓱᖅᑎ ᐅᖃᓚᐅᕐᑐᖅ ᒪᓕᒐᓕᐅᖅᑎᓄᑦ ᐄᐳᕈᓪ 10-ᒥ.

ᓯᐅᕆ ᒪᒃᓂᐅᓪ-ᒧᓚᒃ, ᓄᓇᕗᒥᑦ ᑭᒡᒐᖅᑐᐃᔨ ᓱᕈᓯᓂᒃ ᐊᒻᒪ ᐃᓅᓱᒃᑐᓂᒃ, ᑖᔅᓱᒥᖓ ᐅᖃᓚᐅᕐᑐᖅ ᒪᓕᒐᓕᕆᔨᒃᑯᑦ ᑲᑎᒪᔨᖏᓐᓄᑦ ᒐᕙᒪᒃᑯᑦ ᐊᐅᓚᑦᑎᓂᖏᑦᑎᒍᑦ ᐊᒻᒪ ᑭᒃᑯᓕᒫᓅᖓᔪᑎᒎᖓᔪᒥ, ᑕᕝᕙᓂᓗ ᑕᐅᑐᖕᓂᑰᓂᑯᒧᑦ ᐅᐸᒋᐊᖃᕆᔭᐅᓪᓗᓂ.

“ᐃᓱᒫᓘᑎᖃᒻᒪᕆᓕᕋᑦᑕ ᓴᙱᙱᓗᐊᕈᑎᐅᔪᓂᒃ ᒫᓐᓇ ᐱᓕᕆᔾᔪᓯᕐᓂᒃ,” ᐅᖃᓚᓯᒋᐊᕋᒥ ᐅᖃᓚᐅᕐᑐᖅ, ᐱᔾᔪᑎᖃᖅᖢᓂ ᐃᓄᓕᕆᔨᒃᑯᑦ ᓱᕈᓯᕐᓂᒃ ᐊᒻᒪ ᐃᓅᓱᒃᑐᓂᒃ ᐱᔨᑦᑎᕋᐅᑎᖃᙱᓗᐊᕐᓂᖏᓐᓄᑦ.

ᒪᓕᒐᓕᕆᔨᒃᑯᓐᓄᑦ ᑲᑎᒪᔩ, ᐱᖓᓯᕐᒥ, ᐄᐳᕈᓪ 10, ᐱᒋᐊᓕᓚᐅᕐᒪᑕ ᐅᓪᓘᖕᓂ ᒪᕐᕉᖕᓂ ᑕᓚᕖᓴᓐᑯᑦ ᖃᐅᔨᓇᓱᒍᑎᐅᓂᐊᖅᑐᒥᑦ.

ᓱᕈᓰᑦ ᒪᓕᒐᓕᕆᓂᕐᒧᑦ ᐊᑲᐅᙱᓕᐅᕈᑎᖃᒻᒪᕆᓕᕐᐳᑦ

ᓱᕈᓯᕐᓂ ᐃᓅᓱᒃᑐᓂᒡᓗ ᑭᒡᒐᖅᑐᐃᔨᐅᑉ 2017/18-ᒥ ᐊᕌᒍᒧᑦ ᐅᓂᒃᑳᖏ ᐅᖃᕐᓯᒪᓚᐅᕐᒪᑕ ᐃᓄᓕᕆᔨᒃᑯᑦ 72 ᐳᓴᓐᑎᒥ ᒪᑯᓇᙵᑦ “ᐃᒻᒥᒃᑰᖓᓂᒃᑯ ᐃᑲᔪᕈᑎᒃᓴᓂᒃ” ᐱᓕᕆᐊᖃᓚᐅᕐᓂᖏᓐᓂᒃ ᓴᓇᕝᕕᖓᓂᒃ ᑕᒪᑐᒧᖓ ᐊᕐᕌᒍᒧ.

“ᐃᒻᒥᒃᑰᖓᓂᒃᑯ ᐃᑲᔪᕈᑎᒃᓴᓂᒃ” ᑐᑭᖃᖅᑐᖅ ᐱᓕᕆᐊᖃᕐᓂᖅ ᐃᑲᔪᕐᓂᕐᒥ ᓱᕈᓯᖅ ᐅᕝᕙᓘᓐᓃᑦ ᐃᓅᓱᒃᑐᐃᑦ ᐱᔨᑦᑎᕋᖅᑕᐅᔪᓐᓇᕐᓯᓗᑎᒃ ᒐᕙᒪᒃᑯ ᐃᖅᑲᓇᐃᔭᖅᑎᖏᓐᓂᒃ, ᐊᒻᒪᓗ ᒪᓕᒐᓕᕆᓂᒃᑯᑦ ᐱᓕᕆᓂᐅᔪᓂᒃ ᓈᒻᒪᙱᓕᐅᕈᑎᑦ ᐃᓛᓐᓂ ᓱᕈᓯᕐᓂ ᐃᒃᓯᖕᓇᖅᑕᐅᒍᑕᐅᑐᐃᓐᓇᖅᖢᑎᒃ.

ᑕᐃᒪᓐᓇ ᐱᓕᕆᐊᓄᑦ ᐅᓄᕐᓯᕙᓪᓕᐊᔪᓄᑦ ᐃᓚᒋᔭᐅᕗᖅ ᐃᓅᓱᒃᑐᓂᑦ ᑭᒡᒐᖅᑐᐃᔨᓄᑦ ᐱᓕᕆᐊᒃᓴᑎᒍᑦ..

“ᑕᐃᒪᙵᑦ ᒪᑐᐃᓚᐅᕐᑎᓪᓗᒍ, ᑎᑎᕋᕐᕕᕗᑦ ᐱᓕᕆᐊᖃᕐᓯᒪᓕᕐᑐᑦ 200-ᓂᒃ ᐃᒻᒥᒃᑰᖓᔪᓂᒃ ᑲᒪᒋᔭᕆᐊᓕᖕᓂᒃ, ᐊᒻᒪᓗ ᐃᓱᒪᓪᓗᑕ ᐱᐅᓯᕚᓪᓕᕐᓯᒪᙱᑦᑎᐊᕐᓂᖓᓂᒃ ᑕᒪᓐᓇ ᐅᖃᐅᓯᐅᓚᐅᕐᑎᓪᓗᒍ,” ᒪᒃᓂᐅᓪ-ᒧᓚᒃ ᐅᓂᒃᑳᖏᑦ 2017/18-ᒥ ᐅᖃᕐᓯᒪᓚᐅᕐᑐᑦ.

ᓈᒻᒪᓚᐅᙱᒻᒥᔪᖅ ᖃᐅᔨᓴᕈᑎᑎᒍᑦ ᐅᓇ 68 ᐳᓴᓐᑎᖏ ᐃᓄᓕᕆᔨᒃᑯᑦ ᑲᒪᒋᔭᕆᐊᖃᖅᑕᖏᑦ ᐅᑯᓄᖓᐅᓚᐅᕐᑐᖅ ᐃᓅᓱᒃᑐᓂᒃ ᓴᐳᔾᔨᓯᒪᓂᕐᒧ.

ᐊᐃᑉᐸᖓᓕ ᐊᖏᓂᖅᐹᒧ ᓇᐃᓴᐅᑎᑎᒍᑦ ᐃᒻᒥᒃᑰᖓᔪᓂ ᐃᑲᔪᕈᑎᐅᔪᑦ 2017/18-ᒥ—31 ᐳᓴᓐᑎ—ᐋᓐᓂᐊᖃᕐᓇᙱᑦᑐᓕᕆᔨᒃᑯᓅᖓᓚᐅᕐᑐᖅ. ᒪᑯᓄᖓ ᓈᒻᒪᙱᓕᐅᕈᑎᐅᔪᓂᒃ ᐃᓱᒪᓕᕆᓂᕐᒧᑦ ᐊᒻᒪ ᓘᒃᑖᓄᑦ ᐱᔨᑦᑎᕋᐅᑎᓄᑦ, ᐊᒻᒪᓗ ᖃᓂᒃᑯᑦ ᐋᓐᓂᐊᖃᖅᑕᐃᓕᓂᕐᒧᑦ, ᐊᒻᒪᓗ ᐊᑲᐅᙱᓕᐅᕈᑎᓄᑦ ᐊᒃᑐᐃᔪᓂᒃ ᐃᓅᓱᒃᑐᓂᒃ ᓄᓇᕗᑦ ᓯᓚᑖᓂ ᑲᒪᒋᔭᐅᔪᓄᑦ.

ᐊᒻᒪᓗ 27 ᐳᓴᓐᑎ ᐃᓕᓐᓂᐊᕐᓂᓕᕆᔨᒃᑯᑎᒍᑦ.

ᑕᒪᐅᓇᑦᑕᐃᓐᓇᖅ, ᐊᒥᓱᑦ ᐃᑲᔫᑎᒃᓴ ᐊᔾᔨᒌᙱᑦᑐᓂᒃ ᐱᓕᕆᕝᕕᖕᓅᖓᓚᐅᕐᒥᔪᑦ.

ᐊᒻᒪᑦᑕᐅᕐ, ᒪᒃᓂᐅᓪ-ᒧᓚᒃ ᐅᖃᓚᐅᕐᒥᔪᖅ ᒪᓕᒐᓕᐅᕐᑎᓄ ᐊᒥᓱᑦ ᐃᑲᔫᑎᒃᓴᑦ ᑎᑎᕋᕐᕕᖓᓄᐊᖅᑕᐅᔪᑦ ᐅᑯᓇᙶᓚᐅᕐᑐᑦ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᓈᒻᒪᙱᓕᐅᕈᑎᖃᕌᖓᑕ ᓱᕈᓯᕐᓂ ᐃᑲᔪᕋᓱᒃᑎᓪᓗᒋ ᓈᒻᒪᙱᓕᐅᕈᑎᓕᖕᓂ.

“ᓈᒻᒪᙱᓕᐅᕐᓇᕈᓘᔭᖃᑦᑕᕐᒪᑦ ᐃᖅᑲᓇᐃᔭᖅᑎᓄᑦ ᑲᒪᒋᔭᖃᖅᐸᒃᑐᓄᑦ,” ᐅᖃᖅᑐᖅ.

ᐃᓕᓐᓂᐊᖅᑐᓕᕆᔨᒃᑯᑦ ᐃᓱᒪᓕᐊᕆᔭᖓᑦ ᓱᕋᐃᕗᖅ ᓱᕈᓯᐅᑉ ᐃᓕᓐᓂᐊᕐᓂᕐᒧᑦ ᐱᔪᓐᓇᐅᑎᖏᓐᓂᒃ

ᐊᑕᐅᓯᕐᒥ ᑕᒻᒪᕐᓯᒪᕐᔪᐊᖅᑐᓂ ᐅᖃᐅᓯᐅᓂᑯ ᐱᓕᕆᕝᕕᐅᑉ 2017/18-ᒥ ᐊᕐᕌᒍᒧ ᐅᓂᒃᑳᖏᓐᓂᒃ, ᓱᕈᓯᖅ ᓈᒻᒪᙱᓕᐅᕈᑎᖃᖅᑐᖅ ᐊᓯᐅᔨᑎᑕᐅᑐᐃᓐᓇᓚᐅᕐᓯᒪᕗᖅ ᑕᖅᑮᖕᓂ ᒪᕐᕉᖕᓂ ᐃᓕᓐᓂᐊᓪᓗᐊᖅᑕᖏᓐᓂ ᐱᔾᔪᑎᒋᓪᓗᒍ ᑐᓴᐅᒪᖃᑦᑕᐅᑎᑦᑎᐊᙱᓐᓂᖅ ᐅᑯᓄᖓ ᐃᓕᓐᓂᐊᖅᑐᓕᕆᔨᒃᑯᓐᓂᒃ, ᐃᓕᓐᓂᐊᕐᕕᒃᒥᑦ, ᓄᓇᓕᖕᓂ ᐃᓄᓕᕆᔨᒥ ᐊᒻᒪᓗ ᐃᓱᒪᓕᕆᔨᒃᑯᓐᓂᒃ.

ᑖᓐᓇ ᓱᕈᓯᖅ, ᐃᓄᓕᕆᔨᒃᑯᓐᓄ ᑲᒪᒋᔭᐅᔪᖅ, “ᐃᒻᒥᓃᕐᓂᐊᕈᒪᖂᔨᕙᖕᓂᖓᓂᒃ” ᐃᓕᓐᓂᐊᕐᕕᒦᓐᓂᖓᓂᒃ. (ᐃᒻᒥᓃᕐᓂᐊᕈᒪᖂᔨᔪᖅ ᐃᓱᒪᕙᒃᖢᓂ ᐃᒻᒥᓃᕐᓂᕐᒥᒃ.)

ᑖᓐᓇ ᓱᕈᓯᖅ ᐃᓱᒪᓕᕆᔭᐅᓚᐅᑲᓚᐅᕐᓯᒪᔪᖅ, ᑭᓯᐊᓂᓕ ᑲᒪᒋᔭᐅᕌᓂᙱᖢᓂ.

ᑕᒪᐅᓇᑦᑕᐃᓐᓴᖅ, ᐃᓕᓐᓂᐊᖅᑐᓕᕆᔨᒃᑯᑦ ᐅᖃᓚᐅᕐᓯᒪᔪᑦ ᑖᓐᓇ ᓱᕈᓯᖅ ᐃᓕᓐᓂᐊᕐᕕᒃᒧᑦ ᐅᑎᕈᓐᓇᙱᓐᓂᕋᖅᑕᐅᓪᓗᓂ ᑭᓯᐊᓂ ᖃᐅᔨᓴᖅᑕᐅᑦᑎᐊᓚᐅᕐᑎᓪᓗᒍ.

ᑖᓐᓇ ᐃᓕᓐᓂᐊᖅᑐᓕᕆᔨᒃᑯᑦ ᖃᓄᐃᓕᐅᕐᓂᖓ ᓱᕋᐃᓂᐅᓚᐅᕐᓯᒪᕗᖅ ᓱᕈᓯᐅᑉ ᐃᓕᓐᓂᐊᕈᓐᓇᕐᓂᕐᒧᑦ ᐱᔪᓐᓇᐅᑎᖓᓂᒃ, ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ ᐃᑲᔪᖅᑎᐅᔪᑦ ᖃᐅᔨᓕᓚᐅᕐᓯᒪᔪᑦ.

ᓱᕈᓯᕐᓂ ᐃᑲᔪᕐᑎ ᑕᒪᑐᒥᖓ ᐋᕿᒋᐊᕐᓯᓚᐅᕐᓯᒪᔪᖅ ᐃᓕᓐᓂᐊᕐᕕᒃ ᑐᓂᓯᖁᔭᐅᓪᓗᓂ ᑖᔅᓱᒪ ᓱᕈᓯᐅᑉ ᐊᖏᕐᕋᖓᓂ ᐃᓕᓐᓂᐊᕐᓂᐊᖅᑕᖏᓐᓂᒃ, ᑭᓯᐊᓂᓕ ᐃᓱᒪᓕᕆᔨᐅᑉ ᖃᐅᔨᓴᕈᑎᖏᑦ ᑭᖑᕙᕆᐊᖅᑕᐅᒃᑲᓐᓂᓚᐅᕐᓯᒪᔪᑦ ᓈᒻᒪᙱᓕᐅᕈᑎᓄᑦ ᓄᓇᓕᖕᓂ ᐃᓄᓕᕆᔨᐅᑉ ᐊᒻᒪᓗ ᐃᓄᓕᕆᔨᐅᑉ ᑲᒪᔨᒋᔭᖓᑕ.

ᑭᓯᐊᓂᓕ, ᑕᖅᑮᒃ ᒪᕐᕉᒃ ᐊᓂᒍᖅᑎᓪᓗᒍ ᑖᓐᓇ ᐋᕿᒃᑕᐅᓕᓚᐅᕐᓯᒪᔪᖅ.

“ᑕᒪᕐᒥᒃ ᐱᔨᑦᑎᕋᐅᑎᓕᕆᔨᐅᔪᑦ ᑐᓴᐅᒪᔾᔪᑎᓕᕆᓂᒃᑯᑦ ᐊᔪᕈᓐᓃᖅᐹᓪᓕᖁᔭᐅᓪᓗᑎᒃ ᓈᒻᒪᒃᑯᑐᒃᑯᑦ ᑐᑭᒧᐊᖅᑎᑦᑎᔪᓐᓇᕐᓂᐊᕐᒪᑕ ᐱᔨᑦᑎᕋᐅᑎᓂᒃ,” ᐅᓂᑳᑦ ᐅᖃᕐᓯᒪᔪᑦ.

ᐃᖅᑲᓇᐃᔭᖅᑎᑖᕐᓴᕋᐃᑦᑐᑦ, ᐃᖅᑲᓇᐃᔭᖅᑎᖃᙱᓗᐊᕐᓂᖅ

ᐊᕐᕕᐊᑦ ᐅᐊᖕᓇᖓ-ᑎᑭᕋᕐᔪᐊᕐᒧᑦ ᒪᓕᒐᓕᐅᕐᑎ ᔮᓐ ᒪᐃᓐ, ᐃᒃᓯᕙᐅᑕᕆᔭᐅᔪᖅ ᑲᑎᒪᔨᓄ, ᐊᐱᕆᓚᐅᕐᑐᖅ ᒪᒃᓂᐅᓪ-ᒧᓚᒃ ᑲᑎᒫᓂᒃᐸᓪᓕᐊᓕᖅᑎᓪᓗᒋ, ᐊᒃᑐᐊᓂᖃᖅᑐᒥᑦ ᑐᓴᐅᒪᔾᔪᑎᓕᕆᓂᕐᒥᒃ ᐊᑲᐅᙱᓕᐅᕈᑎᓂᒃ ᐊᒃᑐᐃᓂᖃᖅᖢᓂ ᓱᕈᓯᓕᕆᓂᕐᒧᑦ ᐃᓅᓱᒃᑐᓄᓪᓗ ᐱᔨᑦᑎᕋᐅᑎᓂᒃ, ᓇᓗᓇᐃᕐᓯᖁᔨᓪᓗᓂ “ᑭᓇ ᐅᖃᓪᓚᒍᓐᓇᙱᒻᒪ ᑭᓇᒧᑦ.”

ᒪᒃᓂᐅ-ᒧᓚᒃ ᑭᐅᓚᐅᕐᑐᖅ ᐅᖃᖅᖢᓂ ᑕᐃᒪᐃᔭᓐᓂᖏᓐᓂ ᓇᓂᑐᐃᓐᓇᖅ ᓄᓇᕗᑦ ᒐᕙᒪᒃᑯᓐᓂ.

“ᑐᓴᐅᒪᖃᑦᑕᐅᑎᓂᒃᑯᑦ ᓈᒻᒪᙱᓕᐅᕈᑎᑕᖃᕐᒪᑦ ᑕᒪᐃᓐᓂ ᒐᕙᒪᒃᑯᓐᓂ,” ᐅᖃᖅᑐᖅ.

ᒪᑯᓄᖓᓕ ᓴᙲᓐᓂᐅᔪᓂ ᐃᓄᓕᕆᔨᒃᑯᓐᓂ, ᐱᓕᕆᕝᕕᐅᑉ ᒥᓂᔅᑕᖓᑕ ᑐᒡᓕᖓ, ᐃᕚᓐ ᓇᐃᒍ, ᐅᖃᓚᐅᕐᑐᖅ ᐱᓕᕆᕝᕕᖓ ᓱᓕ ᐃᖅᑲᓇᐃᔭᖅᑎᖃᙱᓗᐊᕐᓂᖏᓐᓂᒃ.

ᑐᑭᖃᖅᑐᖅ ᐊᒥᓱᑦ ᐃᖅᑲᓇᐃᔭᖅᑎᐅᔪᑦ ᖃᐅᔨᒪᙱᒻᒪᑕ ᓱᓕ ᑭᓇᒧ ᐅᖃᓪᓚᒍᓐᓇᕆᐊᒃᓴᖏᓐᓂᒃ, ᑭᒃᑯᓂ ᑐᓴᖅᑎᑦᑎᔪᓐᓇᕐᓂᖏᓐᓂᒃ, ᐊᒻᒪᓗ ᑭᒃᑯ ᐊᓯᖏᑦ ᓱᕈᓯᕐᓂᒃ ᐱᔨᑦᑎᕋᐅᑎᓕᕆᔨᐅᒋᐊᒃᓴᖏᓐᓂᒃ.

ᐊᒻᒪᓗ ᒪᒃᓂᐅᓪᒧᓚᒃ ᐅᖃᓚᐅᕆᓪᓗᓂ ᒪᓕᒐᓕᐅᖅᑎᓄ ᓇᓗᓇᙱᓐᓂᕋᖅᖢᓂᐅᒃ ᐃᓄᓕᕆᔨᒃᑯᑦ ᐃᖅᑲᓇᐃᔭᖅᑎᖏ, ᐱᓗᐊᖅᑐᒥᑦ ᓄᓇᓕᖕᓂ ᐃᓄᓕᕆᔨᐅᔪᑦ ᐱᓕᕆᐊᒃᓴᖃᓗᐊᖅᑐᐊᓘᓂᖏᓐᓂᒃ ᐊᒻᒪ ᐱᔭᒃᓴᖃᓗᐊᕆᓪᓗᑎᒃ.

“ᑕᑯᓯᒪᕗᒍ ᐱᔭᒃᓴᒻᒪᕆᖕᓂ ᐃᓄᓕᕆᔨᒃᑯᓐᓄᑦ ᑲᒪᒋᔭᐅᖁᔭᐅᓯᒪᔪᓂᒃ,” ᐅᖃᖅᑐᖅ.

ᓇᐃᒍ ᐅᖃᓚᐅᕐᑐᖅ ᐃᓄᓕᕆᔨᒃᑯᑦ ᑐᙵᕕᖃᓪᓚᕆᒍᓐᓇᓗᐊᙱᒻᒪᑕ ᐲᖅᑕᐅᓚᐅᖅᑎᓪᓗᒋ ᐋᓐᓂᐊᖃᖅᑕᐃᓕᔨᒃᑯᓐᓂᒃ 2013-ᒥ ᐊᒻᒪᓗ ᐋᕿᒃᑕᐅᓪᓗᓂ ᐃᒻᒥᒃᑰᖓᓕᕐᓗᓂ ᐱᓕᕆᕝᕕᐅᓂᐊᕐᓗᓂ.

ᐅᓇ ᐃᓚᖃᓚᐅᕐᑐᖅ ᐃᓇᖏᕐᓯᑲᑕᖕᓂᕐᒥ ᐊᒥᓱᓂᒃ ᒥᓂᔅᑕᐅᑉ ᑐᒡᓕᖏᓐᓂᒃ ᐊᒻᒪ ᐊᒥᓱᓂᒃ ᒥᓂᔅᑕᓂᒃ.

“ᐋᕿᒃᓱᐃᓇᓱᒃᑲᓗᐊᖅᑐᒍᑦ ᑐᙵᕕᑦᑎᐊᕙᐅᔪᓐᓇᖅᑐᒥᑦ ᐱᓕᕆᕝᕕᒃᒥ,” ᐅᖃᖅᑐᖅ.

ᖁᓄᔪᕐᓂᐊᖃᑦᑕᕐᓂᖅ ᓯᕗᓪᓕᐅᑎᑕᐅᔭᕆᐊᓕᒃ ᐃᓄᓕᕆᔨᑯᓐᓄᑦ

ᐊᓯᒃᑲᓐᓂᐊᓕ ᖃᓄᐃᓕᐅᕐᓂᐅ ᐅᓇ ᓇᐃᒍ, ᐸᓖᓯᕕᓂᖅ, ᐃᓱᒪᒋᓂᕐᓇᖓ ᓯᕗᓪᓕᐅᔭᕆᐊᖃᕆᓪᓗᓂᐅᒃ ᖁᓄᔪᕐᓂᐊᖃᑦᑕᕐᓂᖅ ᓱᕈᓯᕐᓂ.

ᑕᐃᒪᓐᓇ ᐅᖃᓚᐅᕐᓯᒪᔪᖅ ᐅᓇ ᐃᖃᓗᐃᑦ-ᒪᓂᕋᔭᒃᒧᑦ ᒪᓕᒐᓕᐅᕐᑎ ᐋᑕᒻ ᐋᕆᐊᒃ ᓚᐃᑦᓯᑑᓐ ᐅᖃᓚᐅᕐᑎᓪᓗᒍ ᑲᒪᓂᕋᖅᖢᓂ ᖁᓄᔪᕐᓂᐊᖃᑦᑕᕐᓂᖅ ᓱᕈᓯᕐᓂ ᐅᖃᐅᓯᐅᓯᒪᙱᓐᓂᖓᓂᒃ ᒪᒃᓂᐅ-ᒧᓚᒃ ᐅᓂᒃᑳᖏᓐᓂᒃ.

ᒪᐃᓐ ᐊᐱᕆᓚᐅᕐᒥᔪᖅ ᐊᔾᔨᑲᓴᖓᓂᒃ ᐊᐱᖁᑎᒥ.

“ᐅᓇ ᐅᖃᐅᓯᖅ ᐃᓱᒪᒋᔭᕋ ᖃᐅᔨᒪᑦᑎᐊᕐᓂᓐᓂᒃ,” ᓇᐃᒍ ᐅᖃᖅᑐᖅ.

ᐅᖃᐅᓯᖃᖅᖢᓂ ᑐᓴᒐᒃᓴᓕᐊᕆᓯᒪᔭᖓ ᒪᒃᓂᐅ-ᒧᓚᒃ ᐅᖃᐅᓯᕆᖃᑦᑕᕐᓯᒪᔭᖓ ᐊᒥᓱᐃᖅᖢᓂ, ᓇᐃᒍ ᐅᖃᓚᐅᕐᑐᖅ ᖁᓄᔪᕐᓂᐊᖅᑕᐅᔪᓕᕆᓗᓂ ᐱᔨᑦᑎᕋᖅᑎᐅᔪᑦ ᑐᓵᖃᑦᑕᕆᐊᖃᕐᓂᖏᓐᓂᒃ ᓱᕈᓯᕐᓂᒃ.

“ᐊᖏᖃᑎᖃᑦᑎᐊᖅᐳᒍ ᑐᓵᖃᑦᑕᕆᐊᖃᕐᓂᕐᒥ ᐃᓅᓱᒃᑐᑦ ᓂᐱᖏᓐᓂᒃ. ᑕᒪᓐᓇ ᐱᒻᒪᕆᐊᓘᖕᒪ,” ᓇᐃᒍ ᐅᖃᖅᑐᖅ.

ᑕᒪᓐᓇᓗ ᐱᔾᔪᑎᖃᓗᐊᕐᑐᖅ ᓱᕈᓰᑦ ᐱᑦᑎᐊᖅᑕᐅᙱᓗᐊᖅᑐᑦ ᐅᒃᐱᕆᔭᐅᙱᓐᓂᕐᓴᐅᕙᖕᓂᖏᓐᓂᒃ ᓄᓇᖏᓐᓂ.

“ᐅᒃᐱᕈᓱᓗᐊᙱᓐᓇᒪ ᓄᓇᓕᕗᑦ ᓱᕈᓯᕐᓂ ᑐᓵᔪᓐᓇᕆᐊᒃᓴᖏᓐᓂᒃ,” ᓇᐃᒍ ᐅᖃᖅᑐᖅ.

ᑕᐃᒪᐃᓐᓂᖓᓄᑦ, ᐊᒻᒪᓗ ᐊᒥᓱ ᐋᓐᓂᖅᑕᐅᓯᒪᔪ ᓱᕈᓰᑦ ᖃᐅᔨᓪᓚᕆᒍᓐᓇᙱᒻᒪᑕ ᖃᓄᐃᑕᐅᔭᕆᐊᒃᓴᖏᓐᓂᒃ, “ᑭᓇᑐᐃᓐᓇᖅ ᐅᔾᔨᕈᓱᒋᐊᖃᖅᑐᖅ ᓇᓗᓇᐃᒃᑯᑎᐅᓇᔭᖅᑐᓂᒃ ᖃᓄᓕᐅᕈᓯᕐᓂᒡᓗ ᖁᓄᔪᕐᓂᐊᖅᑕᐅᓯᒪᔪᓂᒃ,” ᓇᐃᒍ ᐅᖃᖅᑐᖅ.

ᒪᒃᓂᐅᓪ-ᒧᓚᒃ ᐅᖃᓚᐅᕐᑎ ᑎᑎᕋᕐᕕᖓ ᐸᕐᓇᖕᓂᕋᖅᖢᓂᒋᑦ ᐅᓂᒃᑳᓂ ᑐᓐᓂᖁᑎᐅᓂᐊᖅᑐᓂ, ᐱᔾᔪᑎᓕᖕᓂ ᖃᐅᔨᓴᕐᓂᐅᕙᒃᑐᓂᒃ ᐃᓱᒪᓕᕆᕐᒧᑦ ᐋᓐᓂᐊᖃᖅᑕᐃᓕᓂᕐᒧᑦ, ᓄᓇᕗᑦ ᒐᕙᒪᒃᑯᓐᓄ ᑕᒪᑐᒪᓂ ᐊᕐᕌᒍᒥ. ᐅᖃᖅᖢᓂ ᑖᓐᓇ ᐅᓂᒃᑳᖅ ᐃᓗᓕᖃᕐᓂᐊᕐᓂᕋᖅᖢᓂᐅᒃ 15-ᓂ ᐃᓱᒪᓕᐅᕈᑎᒃᓴᓂᒃ ᐊᒻᒪᓗ ᐃᑲᔪᕈᑎᐅᓂᐊᕐᑐᓂᒃ ᖁᓄᔪᕐᓂᐊᕐᓂᓕᕆᓂᕐᒧᑦ.

ᓱᕈᓰᑦ ᐱᔪᓐᓇᐅᑎᖏ ᐋᓪᓚᐅᖕᒪᑕ ᐃᓄᖕᓅ?

ᐅᓪᓗᓕᒫᖅ ᐱᓕᕆᐊᖃᖅᑎᓪᓗᒋ, ᐃᓚᖏᑦ ᒪᓕᒐᓕᐅᕐᑎᐅᔪᑦ ᐃᓱᒪᓕᐅᕆᓚᐅᕐᑐᑦ ᖃᓄᖅ ᓴᕿᑎᑦᑎᔪᓐᓇᕐᒪᖔᑦ ᓱᕈᓯᑦ ᐱᔪᓐᓇᐅᑎᖏᓐᓂᒃ, ᑕᒪᓐᓇᓗ ᐅᖃᐅᓯᕇᓐᓇᖅᖢᓂᐅᒃ ᒪᒃᓂᐅᓪ-ᒧᓚᒃ, ᐋᓪᓚᐅᖕᒪᑦ ᐃᓄᖕᓄᑦ.

“ᐃᓅᓪᓗᖓ, ᑖᓐᓇ ᐅᕙᓐᓄ ᐋᓪᓚᐅᖕᒪᑦ,” ᑲᖏᖅᖠᓂᐅᑉ ᐅᐊᖕᓇᖓ-ᐃᒡᓗᓕᒑᕐᔪᒃᒧᑦ ᒪᓕᒐᓕᐅᕐᑎ ᑳᑎ ᑕᐅᑐᙱ ᐅᖃᓚᐅᕐᑐᖅ ᐅᓇ ᐱᔾᔪᑎᒋᓪᓗᒍ ᓱᕈᓰᑦ ᐱᔪᓐᓇᐅᑎᖓ.

ᐊᒻᒪᓗ ᐱᔾᔪᑎᖃᖅᖢᑎᒃ ᑎᓴᒪᓂ ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ ᖃᐅᔨᓇᓱᖕᓂᕐᒥ ᐱᓕᕆᐊᖑᔪᓂᒃ

—ᐃᓄᓕᕆᔨᒃᑯ,ᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ, ᐃᓕᓐᓂᐊᕐᓂᓕᕆᔨᒃᑯᑦ ᐊᒻᒪ ᒪᓕᒐᓕᕆᔨᒃᑯᑦ—ᑕᐅᑐᒋ ᐅᖃᓚᐅᕐᑐᖅ ᑖᒃᑯᐊᑦᑕᐅᖅ ᐋᓪᓚᓂ ᐱᓕᕆᔾᔪᓯᓂ ᐱᓕᕆᐊᖃᕐᓂᖏᓐᓂᒃ.

“ᑕᐅᑐᙳᐊᖏᓐᓇᒪ ᓇᓕᐊᒃ ᑖᒃᑯᐊ ᐱᓕᕆᔾᔪᓯᐅᔪᑦ ᐃᓕᖁᓯᑦᑎᓐᓂᑦ ᓴᕿᔮᖅᑎᑦᑎᔭᕆᐊᒃᓴᖏᓐᓂᒃ,” ᐅᖃᖅᑐᖅ.

ᐊᒡᒍᒧᑦ ᒪᓕᒐᓕᐅᕐᑎ ᐹᓪ ᖁᐊᓴ ᐊᒻᒪ ᐅᖃᓚᐅᕐᒥᔪᖅ ᐃᓗᐊᕐᓴᓗᐊᑦᑎᐊᙱᓐᓂᕋᖅᖢᓂ ᓱᕈᓰᑦ ᐱᔪᓐᓇᐅᑎᖏᓐᓂᒃ.

“ᓱᕈᓰᑦ ᓱᕈᓯᑎᑐᑦ ᐱᔭᐅᔭᕆᐊᖃᕐᒪᑕ… ᒫᓐᓇᐅᓕᕐᑐᕐᓕ ᐃᓐᓇᑯᓗᒃᑎᑑᖅᑕᐅᓇᓱᓕᕐᒪᑕ,” ᖁᐊᓴ ᐅᖃᖅᑐᖅ.

ᖃᒪᓂᑦᑐᐊᕐᒧ ᒪᓕᒐᓕᐅᕐᑎ ᓯᒥᐅᓐ ᒥᑭᙳᐊᒃ ᐊᐱᕆᓚᐅᕐᑐᖅ ᐃᒪᓐᓇ: “ᖃᓄᕐᓕ ᐃᓱᒪᒃᑭᐊᓗᖕᓂ ᐱᓕᕆᐊᖃᖃᑦᑕᕐᒪᑕ ᓴᓇᕝᕕᔅᓯᓐᓂ?”

ᒪᒃᓂᐅᓪ-ᒧᓚᒃ ᑭᐅᓚᐅᕐᑐᖅ ᐅᖃᖅᖢᓂ ᑎᑎᕋᕐᕕᖓ ᑲᒪᒋᔭᖃᖃᑦᑕᙱᓐᓂᖏᓐᓂᒃ ᐃᓚᒌᓄᑦ ᓈᒻᒪᙱᓕᐅᕈᑎᓂᒃ.

ᒥᑭᙳᐊᒃ ᐊᐱᖁᑎᒥᓂ ᑐᑭᓯᓇᕐᓯᑎᑦᑎᒋᐊᖅᖢᓂ ᐃᒪᓐᓇ ᐅᖃᖅᖢᓂ ᐃᓱᒪᒋᔭᖃᕋᒥᓕᒎᖅ ᓱᕈᓯᕐᓂ ᓲᖑᓴᓗᐊᖅᐸᒃᑐᓂᒃ ᐊᓯᖏᓐᓂᒃ ᓱᕈᓯᕐᓂ, ᓇᐃᒍ ᐅᖃᓚᐅᕐᑐᖅ ᑕᐃᒪᐅᓕᕐᑐᑦ ᐱᔾᔪᑎᖃᖅᑐᒃᓴᐅᒐᒥ ᑭᓯᐊᓂ ᐊᓯᐊᒍᑦ ᓈᒻᒪᙱᓕᐅᕈᑎᒥ.

ᒪᒃᓂᐅᓪ-ᒧᓚᒃ, ᑎᒃᑯᐊᕐᑕᐅᓂᑯ ᐱᓕᕆᐊᒥᓄ ᔫᓂ 2, 2014-ᒥ, ᐱᐊᓂᒃᓯᓕᒑᔪᖅ ᐃᖅᑲᓇᐃᔮᖓᓂ ᑕᓪᓕᒪᓅᖓᔪ ᔫᓂᐅᓂᐊᕐᑐᒥ.

ᐅᖃᓚᐅᕐᑐᖅ ᒪᓕᒐᓕᐅᕐᑎᓄ ᑖᓐᓇ ᐱᓕᕆᕝᕕᐅᔪᖅ, ᑎᑎᕋᕐᕕᒃ ᒪᓕᒐᓕᕆᕕᒃᒥᑦ, ᒪᕐᕉᖕᓂ ᐃᖅᑲᓇᐃᔭᖅᑎᑖᒃᑲᓐᓂᕆᐊᖃᕐᓂᖓᓂᒃ: ᐊᑕᐅᓯᖅ ᖃᐅᔨᓴᓕᖅᑎᑦᑎᔪᓐᓇᕐᓗᓂ ᓱᕈᓰᑦ ᐃᓅᔪᓐᓃᕐᓂᖏᓐᓄᑦ ᐊᒻᒪ ᐋᓐᓂᓗᐊᖅᓯᒪᔪᓂᒃ, ᐊᒻᒪᓗ ᐃᓄᖕᒥ ᓯᕗᓕᐅᕐᑎᐅᔪᓐᓇᖅᑐᒥᒃ “ᐱᓕᕆᔾᔪᑎᑎᒍᑦ’ ᐃᑲᔪᕈᑎᒃᓴᒃᑯᑦ ᓱᕈᓰᑦ ᐃᓅᓱᒃᑐᓪᓗ ᐱᔪᓐᓇᐅᑎᖏᑦᑎᒍᑦ.

ᒪᓕᒐᓕᕆᕕᒃ ᒪᓂᓴᐅᑎᓕᐅᕐᓯᒫᓂᓕᕐᑐᖅ ᓄᓇᕗᒥ ᓱᕈᓯᕐᓂ ᐃᓅᓱᒃᑐᓂᒡᓗ ᑭᒡᒐᖅᑎᐅᓂᐊᖅᑐᒥ, ᑭᓯᐊᓂᓕ ᐊᑎᕐᒥ ᖃᐅᔨᒪᙱᑦᑐᓱᓕ ᒪᒃᓂᐅᓪ-ᒧᓚᒃ ᐃᓇᖏᖅᑎᒋᓂᐊᖅᑕᖓᓂᒃ.

ᑎᑎᕋᕐᕕᒃ ᐱᒋᐊᖅᑕᐅᓚᐅᕐᓯᒪᔪᖅ 2014-ᒥᑦ, ᒪᓕᒐᓕᕆᔨᒃᑯᑦ ᐊᓂᒍᐃᑎᑦᑎᑦᑎᐊᓚᓚᐅᖅᑎᓪᓗᒍ ᓱᕈᓯᓄᑦ ᐊᒻᒪ ᐃᓅᓱᒃᑐᓄᑦ ᐱᖁᔭᖅᔪᐊᒥᑦ 2013-ᒥ.

ᑭᓯᐊᓂᓕ ᐊᕐᕌᒍᒐᓴᖕᓂ ᐋᔩᑲᑕᓚᐅᖅᑎᓪᓗᒋ, ᐱᒋᐊᖅᖢᑎᒃ 2000-ᖏᑦ ᐱᒋᐊᓕᖅᑎᓪᓗᒋᑦ ᐆᒧᖓ ᐃᖃᓗᒃᑑᑦᑎᐊᕐᒥ ᒪᐃᔭᐅᓚᐅᕐᓯᒪᔪᒧᑦ ᐊᒻᒪ ᒪᓕᒐᓕᐅᖅᑎᒧᑦ ᑮᑦ ᐲᑐᓴᓐ ᐊᒻᒪ ᐊᓯᖏᓐᓄᑦ.