ᓄᓇᕗᒥᑦ ᐃᒡᓗᓕᕆᓂᕐᒧᑦ ᐊᒃᓱᕈᓐᓇᖅᑐᖅ ‘ᐋᕿᒐᒃᓴᐅᔪᖅ,” ᒐᕙᒪᑐᖃᒃᑯᓐᓄᑦ ᒥᓂᔅᑕ ᐅᖃᕐᑐᖅ

ᓵᓐ ᕗᕇᓱ ᐃᖃᓗᖕᓄᐊᖅᑐᖅ ᑲᑎᒪᑲᑕᒋᐊᖅᑐᖅᖢᓂ, $27 ᒥᓕᐊᓐ ᑖᓚᓂ ᐃᑲᔫᑎᒃᓴᓂᒃ ᑐᓴᖅᑎᑦᑎᓪᓗᓂ

ᒐᕙᒪᑐᖃᒃᑯᑦ ᐃᒡᓗᓕᕆᓂᕐᒧᑦ ᒥᓂᔅᑕᖓ ᓵᓐ ᕗᕇᓱ ᐃᖃᓗᖕᓂ ᑐᓴᒐᒃᓴᓕᐅᖅᑐᖅ ᔭᓄᐊᕆ 5ᒥ. (ᐊᔾᔨᓕᐅᕆᔨ ᔨᐊᕝ ᐱᐊᑦᓯᐄ)

By ᔨᐊᕝ ᐱᐊᑦᓯᐄ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

ᒐᕙᒪᑐᖃᒃᑯᑦ ᐃᒡᓗᓕᕆᓂᕐᒧᑦ ᒥᓂᔅᑕᖓ ᐅᖃᓚᐅᕐᑐᖅ ᓄᓇᕗᒥᑦ ᐃᒡᓗᓕᕆᓂᕐᒧᑦ ᐊᒃᓱᕈᓐᓇᖅᑐᖅ “ᐋᕿᒐᒃᓴᐅᔪᖅ” ᖃᓄᐃᓕᐅᕈᑎᒋᓇᓱᒡᓗᒍ ᐊᒻᒪᓗ ᓄᓇᓕᖕᓂ ᐱᓕᕆᖃᑎᖃᕐᓂᕐᓴᐅᔪᒪᓪᓗᓂ ᑕᒪᑐᒧᖓ.

ᓵᓐ ᕗᕇᓱ ᓄᓇᕗᑦ ᐊᖓᔪᖅᑳᖃᕐᕕᖓᓄᑦ ᐳᓛᕈᑎᒋᓚᐅᕐᑕᖓ ᐃᓱᓕᓚᐅᕐᑐᖅ ᔭᓄᐊᕆ 5ᒥ.

ᐅᓪᓘᖕᓂ ᒪᕐᕉᖕᓂ ᐃᓚᓪᓗᒍ, ᕗᕇᓱ, ᐃᒡᓗᓕᕆᓂᕐᒧᑦ ᒥᓂᔅᑕ, ᓴᓇᔭᕆᐊᓕᖕᓄᑦ ᐊᒻᒪ ᓄᓇᓕᖕᓄᑦ, ᑲᑎᒪᖃᑎᖃᓚᐅᕐᒪᑦ ᓄᓇᕗᒥᑦ ᒐᕙᒪᒃᑯᓐᓂ ᐊᒻᒪ ᐃᖃᓗᐃᑦ ᓄᓇᓕᐸᖑᔭᖓᓄᑦ ᑭᒡᒐᖅᑐᐃᔨᓂᒃ ᐊᒻᒪᓗ ᐃᑲᔫᑎᒃᓴᓂᒃ ᐅᖃᐅᓯᖃᕆᐊᖅᑐᖅᖢᓂ ᐃᒡᓗᓕᐅᕐᓂᖅ ᐱᓕᕆᐊᖑᑲᐅᖅᑐᕐᓂᐊᕐᒪᓐ ᓄᓇᕗᒥᑦ.

ᑐᓴᖅᑎᑦᑎᒃᑲᓐᓂᓚᐅᕐᒥᔪᖅ ᓴᓇᔭᐅᓂᐊᕐᒥᔫᑉ ᒥᒃᓵᓄᑦ ᔭᓄᐊᕆ 4-ᒥ: ᐱᓕᕆᖃᑎᒌᖕᓂᕐᒧᑦ ᐸᕐᓇᐅᑎᑦ ᓄᓇᕗᒥᑦ ᒐᕙᒪᒃᑯᓐᓂ ᐊᒻᒪᓗ ᒐᕙᒪᑐᖃᒃᑯᓐᓄᑦ ᐅᓇ $194 ᒥᓕᐊᓐ ᑖᓚᓂ ᓴᓇᔭᐅᓂᐊᖅᑐᓄᑦ ᓄᓇᕗᒥᑦ ᓄᓇᓕᖕᓂ 6-ᓂ ᓄᓇᓕᐅᔪᓂ ᓄᓇᕗᒥᑦ.

“ᑕᒪᓐᓇ ᖃᓄᐃᓕᐅᕈᑎᒃᓴᖅ ᐊᖏᔪᐊᓘᒐᓗᐊᖅᑎᓪᓗᒍ ᑕᐃᒪᓕ ᐋᕿᒐᒃᓴᐅᔪᑦ ᐊᒻᒪᓗ ᐋᕿᑕᐅᔪᓐᓇᖅᖢᓂ ᐱᓕᕆᖃᑎᖃᕐᓗᓂ ᑕᒫᓃᑦᑐᓂᒃ ᐱᑖᕆᐊᓕᖕᓂ ᐊᒻᒪᓗ ᑐᑭᓯᓯᒪᓪᓗᑎᒃ ᖃᓄᖅ ᑕᒪᒃᑯᐊ ᐋᖅᑭᒍᓐᓇᕋᔭᕐᒪᖔᑕ,” ᕗᕇᓱ ᐊᐱᕐᓱᖅᑕᐅᓪᓗᓂ ᐅᖃᓚᐅᕐᑐᖅ.

“ᐃᓄᖕᓂ ᐱᓕᕆᖃᑎᖃᕆᐊᖃᕋᑦᑕ ᖃᐅᔨᒪᓂᖏᓐᓄᑦ ᐊᔾᔨᐅᙱᔾᔪᑎᖏᓐᓂᒃ ᐊᒻᒪᓗ ᑕᒪᓐᓇ ᐱᒻᒪᕆᐅᓪᓗᓂ ᐊᒻᒪ ᖃᐅᔨᕚᓪᓕᕈᑎᒋᓪᓗᒍ ᑕᒪᑐᒥᖓ ᐊᒻᒪᓗ ᐱᔨᑦᑎᕋᕈᓐᓇᕐᓂᕐᓴᐅᓂᐊᓕᖅᖢᖓ ᓄᓇᕗᒥᑦ.”

ᕗᕇᓱ ᐅᖃᕐᕕᒃᒧᐊᓚᐅᕐᑐᖅ ᕗᕌᖕᑯ ᐅᐸᒡᕕᒃᒥ ᔭᓄᐊᕆ 5-ᒥ ᑐᓴᖅᑎᑦᑎᓇᓱᒃᖢᓂ ᓄᓇᕗᑦ ᑐᓂᔭᐅᓂᐊᕐᓂᖓᓂᒃ $27 ᒥᓕᐊᓐ ᑖᓚᓂ ᐃᑲᔪᕈᑎᒃᓴᓂᒃ 459-ᓂ ᐃᒡᓗᒃᓴᐅᓂᐊᖅᑐᓂᒃ ᐊᕐᕌᒍᓂ ᐱᖓᓱᓂᒃ ᐊᒻᒪᓗ 3,100 ᐃᒡᓗᐃᑦ ᓴᓇᔭᐅᓂᐊᖅᖢᑎᒃ ᐊᕐᕌᒍ ᖁᓕᑦ ᐃᓗᐊᓂ.

ᖁᐊᓴ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓂ, ᐅᖃᓚᐅᕐᑐᖅ 22 ᓄᓇᓖᑦ ᐃᑲᔫᑎᓄᑦ ᐃᑲᔪᖅᑕᐅᓂᐊᕐᓂᕋᖅᖢᓂᒋᑦ ᐃᑲᔫᑎᓂ ᐅᑯᐊ ᓄᓇᕗᒥᑦ ᒐᕙᒪᒃᑯᑦ 3,000ᓂ ᐃᒡᓗᓕᐅᕋᓱᒃᑎᓪᓗᒋ ᓄᓇᕗᒥᑦ ᐊᕐᕌᒍᑦ ᖁᓕᑦ ᐊᓂᒍᓚᐅᖅᑎᓐᓴᒋᑦ.

“ᓈᒻᒪᓈᕐᓯᒪᔪᒍᑦ ᐱᓕᕆᐊᑦᑎᓐᓄᑦ ᐆᒧᖓ ᓄᓇᕗᑦ 3000 ᐸᕐᓇᐅᑎᓂᒃ,” ᑯᓱᒐᖅ ᐅᖃᕐᑐᖅ.

ᑲᑎᒪᖃᑎᒋᓚᐅᕐᓂᖓ ᕗᕇᓱᒥ ᐱᓇᓱᐊᕈᓯᐅᓚᐅᕐᑐᒥᑦ “ᐱᒻᒪᕆᐅᓚᐅᕐᑐᖅ,” ᐅᖃᕐᑐᖅ, “ᓂᕆᐅᒃᑲᓐᓂᖅᖢᑕᓗᑦ ᑐᓴᒐᒃᓴᕆᔭᐅᓂᐊᖅᑐᓂᒃ ᑕᐃᒪᓐᓇ ᓄᓇᕗᒻᒥᐅ ᐅᓗᕆᐊᓇᙱᑦᑐᒥᒃ ᐊᖏᕐᕋᖃᕈᓐᓇᖁᓪᓗᒋᑦ.”

ᐃᖃᓗᐃᑦ ᐃᑲᔫᑎᒃᓴᑦ ᐱᖓᓱᐃᓕᖓᒍᓂ ᐊᑕᐅᓯᕐᒥᒃ ᑐᓂᔭᐅᓂᐊᖅᑐᖅ, ᐅᕝᕙᓘᓐᓃᑦ $8.9 ᒥᓕᐊᓐ ᑖᓚᓂ, ᐃᑲᔪᕈᑎᐅᓗᓂ 160-ᓂ ᐃᒡᓗᓕᐊᕆᔭᐅᓂᐊᖅᑐᓂᒃ ᐊᕐᕌᒍᓂ ᐱᖓᓱᓂᒃ. ᓄᓇᓕᐸᐅᔭᓄᑦ ᑲᑎᒪᔩᑦ ᐊᐅᔭᐅᓚᐅᕐᑐᖅ ᓂᕈᐊᓚᐅᕐᒪᑕ ᒐᕙᒪᑐᖃᒃᑯᑦ ᐃᑲᔫᑎᒃᓴᖏᓐᓂᒃ ᐱᓇᓱᒍᒪᓪᓗᑎᒃ.

ᒪᐃᔭ ᓵᓚᒪᓐ ᐊᕙ ᐃᑲᔫᑎᒃᓴᓂ ᑐᙵᓱᒃᑎᑦᑎᓚᐅᕐᑐᖅ ᐅᖃᖅᖢᓂ ᑐᓴᒐᒃᓴᓕᐅᖅᑎᓄᑦ ᑭᖑᓪᓕᕐᒥ ᐃᑲᔫᑎᒃᓴᖅ ᐊᑐᖅᑕᐅᓂᐊᕐᓂᖓᓂᒃ ᓄᓇᓕᐸᐅᔭᐃᑦ ᐸᕐᓇᒃᑕᐅᕙᓪᓕᐊᔾᔪᑎᒃᓴᖏᓐᓂᒃ ᐱᕙᓪᓕᐊᓂᕐᒧᑦ.

“ᐃᑲᔫᑎᒃᓴᓄᑦ ᖃᐃᑕᐅᓂᐊᖅᑐᓄᑦ ᐃᓱᒪᔪᖓᓕ ᐸᕐᓇᐅᓯᐅᖅᐸᓪᓕᐊᔭᕆᐊᖃᓕᕐᓂᑦᑎᓐᓂᒃ, ᕿᓂᕋᓱᒡᓗᑕ ᓇᓃᓐᓇᔭᕐᓂᖏᓐᓂᒃ,” ᐊᕙ ᐅᖃᓚᐅᕐᑐᖅ ᑐᓴᒐᒃᓴᓕᐅᖅᑎᓪᓗᒋᑦ.

“ᐃᒡᓗᓕᐅᖅᑎᐅᙱᓐᓇᑦᑕ ᑭᓯᐊᓂᓕ ᓴᓇᖃᑦᑕᖅᑐᒍᑦ ᐊᖅᑯᑎᓂᒃ ᐊᒻᒪᓗ ᐃᒡᓗᓄᑦ ᐃᓂᒃᓴᐅᓂᐊᖅᑐᓂ ᐊᑐᐃᓐᓇᐅᓕᖅᑎᑦᑎᓗᑕ… ᐃᒪᐃᑦᑕᕆᐊᖃᖅᐸᓪᓘᓐᓃᑦ, ᐋᖅᑭᒃᓱᐃᔭᕆᐊᖃᑐᐃᓐᓇᕆᐊᖃᕋᑦᑕ ᓱᓪᓗᓕᒃᓴᓂᒃ.”

ᐊᐱᕐᓱᖅᑕᐅᑎᓪᓗᒍ, ᓄᓇᕗᒥᑦ ᒪᓕᒐᓕᐅᖅᑎ ᓘᕆ ᐃᓪᓚᐅᖅ ᐅᖃᓚᐅᕐᑐᖅ ᖁᕕᐊᓱᖕᓂᕋᖅᖢᓂ ᕗᕇᓱᒥ ᑐᙵᓱᒃᑎᑦᑎᓚᐅᕐᓂᖓᓂ ᐃᖃᓗᖕᓄᑦ.

ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᕗᕇᓱ ᓄᓇᕗᒧᑦ ᐅᑎᓛᖁᓪᓗᓂᐅᒃ ᐊᓯᖏᓐᓂᒃ ᓄᓇᓕᖕᓂ ᐳᓛᕐᓗᓂ ᐃᒡᓗᓂ ᓈᒻᒪᙱᓕᐅᕈᑎᖃᓗᐊᖅᑐᓂ ᓄᓇᖃᖅᑐᓂ ᐊᔾᔨᒋᙱᒻᒪᒋ ᓄᓇᓕᐸᐅᔭᐅᑉ.

ᕗᕇᓱ — ᓅᕙ ᓯᑰᓯᐊᒥ ᓕᐳᕈᒃᑯᓐᓄᑦ ᒪᓕᒐᓕᐅᖅᑎ ᐊᒻᒪᓗ ᐃᒡᓗᓕᕆᓂᕐᒥ ᐱᓕᕆᐊᖃᓕᕐᓂᑰᓪᓗᓂ ᔪᓚᐃ 2023ᒥ — ᐅᖃᓚᐅᕐᑐᖅ ᑕᐃᒪᐃᓛᕐᓂᕋᖅᖢᓂ.

ᐃᖃᓗᖕᓃᓚᐅᑲᑐᐃᓐᓇᕋᓗᐊᖅᖢᓂ ᕗᕇᓱ ᐅᖃᓚᐅᕐᑐᖅ ᑲᑎᖃᑎᖃᑲᑕᖕᓂᖓᓂᒃ ᑭᒡᒐᖅᑐᐃᔨᐅᔪᓂᒃ ᓄᓇᕗᒥᑦ, ᑖᒃᑯᓇᙵᓪᓗ ᑐᓴᖅᑎᑕᐅᑲᑕᒃᖢᓂ ᖃᓄᖅ ᒐᕙᒪᖓ ᓄᓇᓕᖕᓂ ᐃᒡᓗᓕᕆᔨᐅᔪᓂ ᐃᑲᔪᕈᓐᓇᕐᓂᖓᓂᒃ.

ᐅᖃᓚᐅᕐᑐᖅ ᐱᓕᕆᖃᑎᖃᐃᓐᓇᕐᓂᐊᕐᓂᕋᖅᖢᓂ ᐋᑐᕚᒦᓪᓗᓂ.

“ᐅᓇ ᑐᓴᕈᓐᓇᕈᑎᒋᓚᐅᖅᑕᕋ ᐃᓄᖕᓂ ᖃᐃᔨᒪᑐᐃᓐᓇᙱᑦᑐᓂᒃ ᖃᓄᐃᓕᐅᕈᑎᐅᔭᕆᐊᓕᖕᓂ ᓄᓇᖏᓐᓂᒃ ᖃᐅᔨᒪᖕᒪᑕ ᖃᓪᓗᓈᓂᓪᓕ, ᑭᓯᐊᓂᑦᑕᐅᖅ ᐋᖅᑭᒋᐊᕈᑎᐅᔪᓐᓇᖅᑐᓂᒃ ᖃᐅᔨᒪᖕᒥᖕᒪᑕ,” ᐅᖃᕐᑐᖅ.

“ᐃᓕᖕᓂ ᑕᑯᓗᖓ ᐅᖃᐅᑎᔪᓐᓇᙱᓐᓇᒃᑯᑦ ᐃᖃᓗᖕᓄ ᐅᐸᓚᐅᕐᓂᓐᓄᑦ ᑕᒪᒃᑯᐊ ᓈᒻᒪᙱᓕᐅᕈᑎ ᓄᓇᕗᒥᑦ ᐋᖅᑭᓯᑲᐅᑎᒋᔪᓐᓇᒋᓐᓇᑭᑦ. ᑭᓯᐊᓂᓕ ᐃᑲᔫᑎᒻᒪᕆᐅᖕᒪ ᑕᒪᓐᓇ ᐱᓕᕆᖃᑎᖃᖃᕈᒪᓐᓇᖅᑐᖅ ᓄᓇᓕᖕᓂ ᑲᑎᖃᑎᒋᔭᑦᑎᓐᓂᒃ.”

Share This Story

(0) Comments