ᓄᓇᕗᒥᑦ ᐃᖅᑲᖅᑐᐃᔨ ᐅᖓᕙᕆᐊᖅᑎᑦᑎᕗᖅ ᐃᖅᑲᖅᑐᐃᕕᒡᔪᐊᒃᑯ Gladue ᐱᔾᔪᑎᒋᓪᓗᒍ
Gladue ᐱᔾᔪᑎᒻᒪᕆᖏ ᐊᑐᙱᑦᑐᑦ ᐃᖅᑲᖅᑐᖅᑕᐅᓂᐊᓵᕐᓂᕐᒥᓐ ᐊᓂᓯᒪᔪᒪᓂᕐᒧᑦ, ᐃᖅᑲᖅᑐᐃᔨ ᐹᓪ ᐳᐊᐃᓴᒃ ᐅᖃᖅᐳᖅ
A hearing on the Government of Nunavut’s application to have a judge dismiss Nunavut Tunngavik Inc.’s lawsuit on Inuktut education began Tuesday at the Nunavut Court of Justice. (File photo)
For an English version of this story, see Nunavut judge pushes back against Supreme Court’s Gladue doctrine
ᐃᓚᖏᓐᓄᑦ ᐃᖅᑲᖅᑐᐃᔨᓄᑦ ᖃᐅᔨᔭᐅᓯᒪᒐᓗᐊᖅᑎᓪᓗᒍ, ᐅᓇ ᐃᖅᑲᖅᑐᐃᔨ ᐹᓪ ᐳᐊᐃᓴᒃ ᓄᓇᕗᒥᐅᑕᖅ ᐃᒪᓐᓇᖔᖅ ᐅᖃᓕᓚᐅᕐᑐᖅ ᓄᕕᐱᕆᐅᓚᐅᕐᑐᒥᑦ ᐅᑯᐊ ᐃᖅᑲᖅᑐᐃᕕᒡᔪᐊᑦ ᑲᓇᑕᒥ ᖃᐅᔨᒪᒻᒪᕆᒃᑕᖓᑦ Gladue ᐃᓱᒪᓕᐅᕆᓂᖅ ᐊᑐᙱᓐᓂᕋᖅᖢᓂᐅᒃ ᐃᖅᑲᖅᑐᖅᑕᐅᓂᐊᓵᕐᓗᓂ ᐊᓂᓯᒪᔪᒪᓂᕐᒧᑦ ᐱᓕᕆᐊᖑᓂᕐᒥ ᐃᖅᑲᖅᑐᐃᕕᒃᑯᑦ.
“ᐅᖃᓚᐅᕐᑕᑎᑐᑦ, ᐅᓇ Gladue ᖃᓄᐃᒍᑎᕕᓂᖓ ᐃᖅᑲᖅᑐᖅᑕᐅᓂᐊᓵᕐᓗᓂ ᐊᓂᓯᒪᔪᒪᓂᕐᒥᒃ ᐃᑲᔪᖅᑕᐅᓯᒪᙱᒻᒪᑦ ᐱᖁᔭᒻᒪᕆᒃᑎᒍᑦ ᐅᕝᕙᓘᓐᓃᑦ ᑐᙵᕕᖃᓪᓚᕆᒃᓯᒪᙱᖢᓂ ᒪᓕᒐᓕᕆᓂᒃᑯᑦ,” ᐳᐊᐃᓴᒃ ᐅᖃᖅᑐᖅ.
ᑕᐃᒪᐃᓕᓚᐅᕐᓯᒪᔪᖅ ᓄᕕᐱᕆ 29, 2018-ᒥ, ᐅᓇ ᑯᕆᔅ ᔭᐃᐴᑎ, 38, ᑲᖏᖅᑐᒑᐱᖕᒥᐅᑕᖅ, ᑕᐃᔅᓱᒪᓂ ᐃᓄᐊᓯᓂᕐᒧᑦ ᐸᓯᔭᒃᓴᐅᑎᓪᓗᒍ, ᐃᖅᑲᖅᑐᖅᑕᐅᓂᐊᓵᕐᓂᖓᓂ ᐊᓂᓯᒪᔪᑎᒥ ᐱᓇᓱᒃᑎᓪᓗᒍ.
ᐊᓂᓯᒪᓚᐅᑲᒍᒪᓂᕐᒧᑦ ᐱᓕᕆᐊᖑᓂᖅ ᐃᖅᑲᖅᑐᐃᕕᒃᑯᑦ ᐅᓂᒃᑲᐅᓯᐅᒋᐊᖃᙱᑎᑕᐅᓚᐅᑲᒃᐸᒃᖢᑎᒃ.
ᑕᒪᓐᓇ ᑐᑭᖃᖅᑐᖅ ᐃᖅᑲᖅᑐᖅᑕᐅᓂᖅ ᐱᐊᓂᒃᑕᐅᓯᒪᙱᓐᓂᖓᓂ ᐃᖅᑲᖅᑐᐃᕕᒃᑯᑦ, ᓱᕋᐃᒍᑎᐅᕗᖅ ᑐᓴᒐᒃᓴᓕᐅᖅᑎᓄᑦ ᐅᓂᒃᑳᓕᐅᑎᓪᓗᒋ ᐅᖃᐅᓯᕆᔭᐅᔪᓂᒃ ᐊᓂᓯᒪᓚᐅᑲᒍᒪᓂᕐᒧᑦ ᐱᓕᕆᐊᖑᑎᓪᓗᒋᑦ, ᐃᓚᖃᖅᖢᓂ ᐃᖅᑲᖅᑐᐃᕕᐅᑉ ᐱᔾᔪᑎᒋᔭᖏᑦ ᐊᓂᓯᒪᔪᒪᓂᕐᒧᑦ ᐃᓱᒪᓕᐊᖏᓐᓂᒃ.
ᐆᒧᖓᓕ ᔭᐃᐴᑎᐅᑉ ᐱᓕᕆᐊᖑᓂᖓᓄᑦ, ᐅᓇ ᑎᑎᕋᐅᓯᖃᖅᑕᐃᓕᓂᖅ ᐊᑐᕈᓐᓃᖅᑎᑕᐅᓚᐅᕐᔪᖅ ᔫᓂ 27-ᐅᑎᓪᓗᒍ, ᐊᓯᖓᓂᒃ ᐃᖅᑲᖅᑐᐃᔨᒥᑦ, ᐃᖅᑲᖅᑐᐃᔨ ᓲᓴᓐ ᑰᐳ, ᔭᐃᐴᑎᒥ ᐃᖅᑲᖅᑐᐃᑎᓪᓗᒍ ᐊᕐᕌᒍᓂ ᑎᓴᒪᓂ ᑎᒍᔭᐅᓯᒪᓂᐊᕐᓗᓂ ᐃᓄᐊᕐᓯᓯᒪᓂᖓᓄᑦ.
ᑕᕝᕙᓂᑦᑕᐃᓐᓇᖅ ᐅᓪᓗᕐᒥ, ᑖᓐᓇ ᑐᓴᒐᒃᓴᓕᐅᕐᑕᐃᓕᓂᖅ ᐊᑐᕈᓐᓃᕐᑎᓪᓗᒍ, ᓄᓇᕗᑦ ᐃᖅᑲᖅᑐᐃᕕᒃᑯᑦ ᓴᕿᑎᑦᑎᓕᓚᐅᕐᑐᑦ ᐅᖃᐅᓯᓕᒫᖑᓂᑯᓂᑦ ᒪᒃᐱᒐᓕᖕᓂᑦ 25-ᓂ ᐳᐊᐃᓴᒃ ᐃᖅᑲᖅᑐᖅᑕᐅᓚᐅᖅᑎᓐᓇᒍᑦ ᐊᓂᓯᒪᔪᒪᓂᕐᒧᑦ ᐃᓱᒪᓕᐊᕕᓂᖏᓐᓂᒃ.
ᑕᕝᕙᓂ, ᐳᐊᐃᓴᑦ ᐊᖏᕐᓯᒪᓚᐅᕐᑐᖅ ᔭᐃᐴᑎ ᕿᒫᒐᔭᙱᓐᓂᖓᓂ ᐅᕝᕙᓘᓐᓃᑦ ᐱᕋᔭᒃᑲᓐᓂᕋᔭᕆᐊᒃᓴᖓᓂᒃ.
ᐃᖅᑲᖅᑐᐃᔨ ᐋᒃᑳᖅᑐᖅ ᐸᓯᔭᒃᓴᐅᑎᑦᑎᔨᓄᑦ, ᓴᐳᔾᔨᔨᓄᑦ
ᑭᓯᐊᓂᓕ ᔭᐃᐴᑎᐅᑉ ᐊᓂᓯᒪᔪᒪᓂᖓᓂᒃ ᐋᒃᑳᓚᐅᕐᓯᒪᔪᖅ, ᐱᔾᔪᑎᒋᓪᓗᓂᐅᒃ ᐊᓂᑎᑕᐅᒍᓂ ᑭᒃᑯᓕᒫᑦ ᒪᓕᒐᓕᕆᓂᕐᒧᑦ ᐱᓕᕆᓂᕐᒥᒃ ᐃᓱᒪᒋᔭᐅᑦᑎᐊᕈᓐᓃᕋᔭᕐᓂᖏᓐᓂᒃ, ᐱᓗᐊᕐᑐᒥᑦ ᑲᖏᖅᑐᒑᐱᒻᒥ.
ᑕᐃᒪᐃᓕᐅᕐᖢᓂ, ᒪᓕᓚᐅᙱᓚᖅ ᑐᓐᓂᖁᑎᐅᔪᓂᒃ ᐸᓯᔭᒃᓴᙳᖅᑎᑦᑎᔨᓂᒃ ᐊᒻᒪ ᓴᐳᓐᓂᐊᖅᑎᓂᒃ ᓗᐊᐃᔭᓂᒃ, ᑖᒃᑯᐊ ᐊᖏᖃᑎᒌᒃᑎᓪᓗᒋ ᔭᐃᐴᑎ ᐊᓂᑎᑕᐅᔭᕆᐊᖃᕐᓂᖓᓂ ᐃᖅᑲᖅᑐᖅᑕᐅᓚᐅᖅᑎᓐᓇᒍ ᐊᒻᒪᓗ ᑭᒃᑯᑐᐃᓐᓇᕐᓄᑦ ᖁᐊᕐᓵᕐᓇᙱᓐᓂᕋᖅᑕᐅᓪᓗᓄ.
ᐃᒪᓐ ᓂᐅᒪᓐ, ᔭᐃᐴᑎᐅᑉ ᓴᐳᓐᓂᐊᕐᑎᖓ ᓗᐊᐃᔭ, ᐱᔪᒪᓚᐅᕐᑐᖅ ᔭᐃᐴᑎ ᐊᓂᑎᑕᐅᓗᓂ ᑲᒪᒋᔭᐅᓂᐊᕐᓗᓂ ᔭᐃᐴᑎᐅᑉ 56-ᓂ ᐅᑭᐅᓕᒃ ᐊᓈᓇᖓᓄᑦ ᐊᒻᒪᓗ 70-ᓂ ᐅᑭᐅᓕᒃ ᐊᑖᑕᒃᓴᖓᓄᑦ, ᑖᒃᑯᐊᓗ ᐊᑭᓖᔨᐅᓇᔭᖅᖢᑎᒃ. ᑖᕝᕘᓇ ᖃᓄᐃᓕᐅᕈᒪᓂᒃᑯᑦ, ᔭᐃᐴᑎ ᐊᖏᕐᕋᖓᓃᓐᓇᔭᖅᑐᖅ.
ᓗᐊᐃᔭ ᑭᒡᒐᖅᑐᐃᔪᖅ ᐸᓯᔭᒃᓴᐅᑎᑦᑎᔨᓂᑦ ᑕᕝᕙᓂ ᐅᓪᓗᕐᒥ, ᒧᕆᐃ ᕗᐃᐊᔅ, ᐊᑭᕋᖅᑐᓚᐅᙱᑦᑐᖅ ᐃᖅᑲᖅᑐᖅᑕᐅᓚᐅᖅᑎᓐᓇᒍ ᐊᓂᓯᒪᔪᒪᓂᖓᓂᒃ, ᐊᒻᒪᓗ ᐃᓱᒪᓕᐅᕆᓪᓗᓂ ᐃᓯᕐᓯᒪᓕᖃᑦᑕᕆᐊᖃᕐᓗᓂᒃ 9-ᒥ ᐅᓐᓄᒃᑯ 7-ᒧᑦ ᐅᓪᓛᒧᑦ ᖃᐅᑕᒫᑦ, ᐊᒻᒪᓗ ᑖᒃᑯᐊ ᑲᒪᔨᐅᓂᐊᖅᑑᒃ ᐊᑭᓖᓗᑎᒃ $1,000-ᓂ.
ᐊᒻᒪᓗ, ᐆᒧᖓᓕ ᐳᐊᐃᓴᒃᒧᑦ, ᐸᓯᔭᒃᓴᐅᑎᑦᑎᔨᓄᑦ ᓗᐊᐃᔭ ᐅᖃᓚᐅᕐᓂᖓᓂᒃ ᔭᐃᐴᑎ ᐊᓂᑎᑕᐅᒃᐸᑦ ᓄᓇᓕᖕᓄᑦ ᑲᒪᖏᔭᐅᓇᔭᙱᓐᓂᖓᓂᒃ ᑲᖏᖅᑐᒑᐱᒻᒥᐅᑕᓄᑦ, ᓲᖃᐃᒻᒪ “ᑕᐃᒪᐅᑐᐃᓐᓇᒡᒍᖕᒪᑦ ᑕᒫᓂ.”
ᑭᓯᐊᓂᓕ ᐳᐊᐃᓴᒃ ᑭᐅᑲᐅᑎᒋᓚᐅᕐᑐᖅ ᑖᔅᓱᒥᖓ “ᑐᐸᖕᓇᖅᑐᒥᑦ ᐃᓱᒪᒋᔭᖃᕐᓂᕐᒥᒃ,” ᐅᖃᖅᖢᓂ ᐃᓚᒌᓄᑦ ᐱᑦᑎᐊᖃᑦᑕᐅᑎᕙᙱᓐᓂᖅ ᓄᓇᕗᒥ ᐃᓕᖁᓯᑐᐃᓐᓇᐅᔭᕆᐊᖃᙱᓐᓂᖓᓂ ᑕᐃᒪᐃᒐᔪᖕᓂᖏᓐᓄᑦ.
“ᒪᑯᐊ ᐊᑐᖅᑕᐅᕙᓗᐊᖅᑐᑦ ᐱᑦᑎᐊᖃᑦᑕᐅᑎᕙᙱᓐᓂᖅ ᐊᒻᒪ ᐃᓚᒌᓂᒃ ᐋᓐᓂᕐᓱᐃᕙᖕᓂᖅ—ᐅᑯᐊ ᐸᓯᔭᒃᓴᐅᑎᑦᑎᔨᑦ ᑕᐃᔭᖓ ‘ᐊᑐᖅᑕᐅᒐᔪᒃᑐᖅ’—ᒪᑯᓂᖓ ᐱᑦᑎᐊᖃᑦᑕᐅᑎᕙᑎᓐᓂᖅ ᐊᒻᒪ ᐋᓐᓂᕐᓱᐃᕙᖕᓂᖅ, ᐃᓚᐅᓪᓗᓂ ᐃᓄᐊᕐᓯᕙᖕᓂᖅ, ᐊᖏᕐᕋᑦᑎᓐᓂᒃ ᐱᐅᙱᔾᔪᑎᒻᒪᕆᐅᕗᑦ,” ᐅᖃᖅᑐᖅ.
“ᐃᓱᒪᒋᖃᑎᒋᙱᓚᕋ ᐸᓯᔭᒃᓴᐅᑎᑦᑎᔨᐅᑉ ᐋᖅᑭᒃᓯᒪᔭᖓ ᐅᓇ ᐱᑦᑎᐊᖃᑦᑕᐅᑎᕙᙱᓐᓂᕐᒥᒃ ᐊᒻᒪ ᐃᓚᒌᓄ ᐊᒃᑐᐊᔪᓂᒃ ᐃᓄᐊᕐᓯᕙᖕᓂᕐᒥᒃ ᓄᓇᕗᒥᑦ. ᐃᓱᒪᒋᔭᖃᕐᓂᒃᑯᑦ ᐊᓯᓐᓂ ᐃᓱᒪᒋᔭᕋᓕ ᐃᒪᓐᓇ ᑐᓴᖅᖢᓂ ᐃᖅᑲᖅᑐᖅᑕᐅᓂᓵᕐᓗᓂ ᐊᓂᑎᑦᑎᓂᖅ ᐆᒥᖓ ᒥᔅᑕ ᔭᐃᐴᑎᒥ ᑭᒃᑯᓕᒫᓂᒃ ᐃᓱᒪᒋᔭᐅᓯᒪᔪᒥᒃ ᒪᓕᒐᓕᕆᓂᒃᑯᑦ ᐱᒻᒪᕆᐅᑎᑦᑎᕙᖕᓂᖏᑦ ᐱᑦᑎᐊᖃᑦᑕᐅᑎᕙᙱᓐᓂᕐᒥᒃ ᐊᒻᒪ ᐋᓐᓂᕐᓱᐃᕙᖕᓂᕐᒥᒡᓗ ᓲᕐᓗ ᑭᓲᖏᓐᓂᐅᑎᑦᑎᓂᐅᓪᓗᓂ.”
Gladue ᐊᒃᑐᐃᓂᖃᙱᓚᖅ ᐃᖅᑲᖅᑐᖅᑕᐅᓂᓵᕐᓗᓂ ᐊᓂᔪᒪᓂᕐᒧᑦ, ᐃᖅᑲᖅᑐᐃᔨ ᐅᖃᖅᑐᖅ
ᐊᒻᒪᓗ ᐃᓚᖓᓂ ᐃᖅᑲᖅᑐᐃᓂᕐᒧᑦ ᐋᕿᒃᓯᒍᑎᖏᓐᓅᖓᔪᓂᑦ ᒪᒃᐱᖓᕐᓂ ᑕᓪᓕᒪᓂᒃ, ᐳᐊᐃᓴᑦ ᐊᑐᖅᑎᑦᑎᓚᐅᙱᒻᒥᔪᖅ ᑐᓐᓂᖁᑎᐅᓯᒪᔪᓂᒃ ᓴᐳᓐᓂᐊᖅᑎᒥᑦ ᓗᐊᐃᔭ ᓂᐅᒪᓐᒥᑦ ᐅᖃᕐᓯᒪᔪᒥ ᐃᖅᑲᖅᑐᐃᔨᐅᔪᑦ ᐃᓱᒪᒋᔭᖃᖃᑦᑕᕆᐊᖃᕐᓂᖏᓐᓂᒃ Gladue ᐱᒻᒪᕆᐅᒋᔭᖏᓐᓂᒃ ᐃᖅᑲᖅᑐᖅᑕᐅᓚᐅᖅᑎᓐᓇᒋᑦ ᐊᓂᔪᒪᓂᕐᒧᑦ ᐱᓕᕆᐊᖑᓂᐅᔪᓂᒃ.
ᐅᕙᓂᓕ Gladue ᐃᓱᒪᓕᐊᖏᓐᓂᒃ, ᑎᑎᕋᖅᑕᐅᓯᒪᓂᑯᑦ 1999-ᒥ, ᐃᖅᑲᖅᑐᐃᕕᒡᔪᐊᒃᑯᑦ ᑲᓇᑕᒥ ᐅᖃᕐᓯᒪᖕᒪᑕ ᓄᓇᖃᖅᑳᖅᑐᓂᒃ ᐸᓯᔭᒃᓴᐅᔪᓂᒃ ᐃᖅᑲᖅᑐᐃᑎᓪᓗᒋᑦ, ᐃᖅᑲᖅᑐᐃᕕᐅᔪᑦ ᖃᓄᐃᓕᖓᒍᓯᖏᑦ ᐃᓱᒪᒋᔭᐅᖃᑦᑕᕆᐊᖃᕐᓂᖏᓐᓂᒃ.
ᐳᐊᐃᓴᒃ ᐅᖃᓚᐅᕐᑐᖅ ᐅᑯᐊ ᐃᖅᑲᖅᑐᐃᕕᒡᔪᐊᒃᑯᑦ ᑕᐃᒪᐃᑎᓪᓗᒋᑦ, ᐋᕿᒃᓯᓚᐅᕐᓯᒪᙱᒻᒪᑕ “ᓄᑖᒥ ᐱᖁᔭᕐᒥ.” ᑐᑭᓕᐅᕆᑐᐃᓐᓇᓚᐅᕐᓯᒪᔪᑦ ᓴᖅᑭᔮᕌᓂᒃᓯᒪᔪᒥᒃ ᐱᖁᔭᕐᒥᒃ ᓄᓇᖃᖅᑳᖅᑐᑦ ᐃᖅᑲᖅᑐᖅᑕᐅᓕᕌᖓᑕ ᒪᓕᒃᑕᐅᔭᕆᐊᖃᖅᐸᒃᑐᓂᒃ ᐅᑯᐊ ᒪᓕᒐᓕᕆᕕᒡᔪᐊᖅ ᐃᓚᓕᐅᑎᓚᐅᕐᓯᒪᔭᖓᑦ ᐱᕋᔭᒃᑐᓕᕆᓂᕐᒧᑦ ᒪᓕᒐᓂᒃ 1996-ᒥᑦ.
ᑭᓯᐊᓂᓕ ᒪᓕᒐᓕᕆᕕᒡᔪᐊᖅ, ᑕᐃᔅᓱᒪᓂ, ᓂᕈᐊᕐᓂᕐᓴᐅᓚᐅᕐᓯᒪᖕᒪᑕ ᑕᒪᒃᑯᓂᖓ ᐱᒻᒪᕆᐅᒋᔭᐅᔪᓂᒃ ᐊᑐᖅᑎᑦᑎᔪᒪᙱᖢᑎᒃ ᐊᓂᓯᒪᔪᒪᓂᕐᒧᑦ ᐱᓕᕆᐊᖑᔪᓄᑦ, ᐳᐊᐃᓴᒃ ᐅᖃᖅᑐᖅ.
ᐃᖅᑲᖅᑐᐃᕕᐅᔪᑦ ᓵᓚᖃᕈᓐᓇᙱᒻᒪᑕ ᒪᓕᒐᓕᕆᕕᒡᔪᐊᕐᒥᓐ
“ᐃᓱᒪᒋᔭᒃᑯᓪᓕ, ᐱᕕᖃᕈᓐᓇᙱᒻᒪᑕ—ᐅᕝᕙᓘᓐᓃᑦ ᐱᔪᓐᓇᐅᑎᖃᙱᖢᓂ—ᐃᖅᑲᖅᑐᐃᔨᔨᐅᔪᑦ ᒪᓕᒐᓕᕆᕕᒡᔪᐊᕐᒥ ᐱᓂᕐᓴᐅᓗᑎᒃ ᑕᒪᐅᓇ. ᐅᖃᖅᑕᐅᓯᒪᓪᓗᓂ ᐊᔾᔨᒋᙱᑕᖓᒍᑦ. ᒪᓕᒐᓕᕆᓂᒃᑯᑦ ᑐᙵᕕᖃᖏᒻᒪᑕ ᑕᒪᒃᑯᐊ ᐃᖅᑲᖅᑐᐃᔨᐅᔪᑦ ᐃᓱᒪᔭᕆᐊᖃᓕᕐᓗᑎ ᐊᒻᒪ ᓇᓂᓯᓂᕐᒥᒃ Gladue-ᑯᑦ ᐃᖅᑲᖅᑐᖅᑕᐅᓂᖅ ᐃᓱᒪᓕᐅᕆᔾᔪᑎᐅᔭᕆᐊᖃᕐᓂᖓᓂᒃ ᐃᖅᑲᖅᑐᖅᑕᐅᓚᐅᕐᑎᓐᓇᒋᑦ ᐊᓯᒪᔪᒪᓂᕐᒧᑦ ᐱᖁᔭᓂᒃ,” ᐳᐊᐃᓴᒃ ᐅᖃᖅᑐᖅ.
ᐃᓚᖏᑦ ᐃᖅᑲᖅᑐᐃᔨᐅᔪᑦ ᐱᓇᓱᒃᓯᒪᑎᓪᓗᒋ Gladue ᐃᓱᒪᓕᕆᓂᕐᒨᖓᔪᓂᒃ ᐃᓚᓕᐅᔾᔨᓇᓱᒃᖢᑎᒃ “ᓄᑖᓂᒃ ᐃᖅᑲᖅᑐᐃᔨᒧᑦ-ᐋᕿᒃᑕᐅᔪᓂᒃ ᐃᓱᒪᓕᐊᓂᒃ ᐃᖅᑲᖅᑐᐃᓂᐊᓵᕐᓂᕐᒧᑦ ᐊᓂᒍᓐᓇᕐᓂᕐᒧᑦ ᖃᓄᐃᒍᑎᒃᓴᓂᒃ,” ᐳᐊᐃᓴᒃ ᑕᐃᒪᐃᓕᐅᔾᔮᙱᓐᓂᕋᖅᑐᖅ.
ᑕᐃᒪᓕ ᓂᐅᒪᓐ ᑐᒃᓯᕋᐅᑎᖓ ᐆᒥᖓ “ᓄᑖᖅ ᐃᖅᑲᖅᑐᐃᔨᒧᑦ-ᐋᕿᒃᑕᐅᔪᒥᑦ ᐃᖅᑲᖅᑐᐃᓂᐊᓵᕐᓗᑎᒃ ᐊᓂᒍᓐᓇᖅᑎᑦᑎᓂᕐᒥ ᓄᓇᕗᒥᑦ” ᐊᑐᔾᔮᙱᑦᑐᖅ, ᐳᐊᐃᓴᒃ ᐅᖃᖅᑐᖅ.
“ᑕᐃᒪᐃᓕᐅᕈᓐᓇᙱᓐᓇᒪ. ᐃᓱᒪᖏᔭᒃᑯᓪᓕ, ᐅᓇ ᐱᓕᕆᐊᒃᓴᐅᖕᒪᑦ ᒪᓕᒐᓕᕆᕕᒡᔪᐊᕐᒥᑦ ᒪᓕᒐᓕᕆᔨᓅᙱᑦᑐᖅ,” ᐳᐊᐃᓴᒃ ᐅᖃᖅᑐᖅ.
ᐊᐱᕐᓱᖅᑕᐅᑎᓪᓗᒍ, ᓂᐅᒪᓐ ᐅᖃᓚᐅᕐᑐᖅ ᐃᓱᒪᒋᑦᑎᐊᕐᓂᕋᖅᖢᓂᐅᒃ ᐳᐊᐃᓴᒃ ᐃᓱᒪᒋᔭᖓ, ᑭᓯᐊᓂᓕ ᐅᖃᕐᒥᔪᖅ ᐊᓯᖏᑦᑕᐅᖅ ᐃᖅᑲᖅᑐᐃᔨᐅᔪᑦ ᐊᔾᔨᒋᙱᑕᖏᓐᓂᒃ ᐃᓱᒪᒋᔭᖃᕐᓯᒪᓂᖏᓐᓂᒃ.
“ᓈᒻᒪᒋᙱᓪᓗᒎᙱᑕᕋ ᐃᖅᑲᖅᑐᐃᔨ ᐳᐊᐃᓴᒃ, ᑭᓯᐊᓂᓕ ᐊᓯᖏᓐᓂᒃ ᑕᒪᑐᒧᖓ ᐃᓱᒪᒋᔭᖃᕐᓯᒪᖕᒪᑕ ᖃᓄᖅ ᐱᓕᕆᐊᒍᔭᕆᐊᖃᕐᓂᖓᓂᒃ,” ᓂᐅᒪᓐ ᐅᖃᖅᑐᖅ.
ᓲᕐᓗ ᐃᒪᓐᓇ, ᑐᑭᒧᐊᕈᑎ ᐅᖃᓕᒫᒐᑦ ᐋᕿᒃᓱᖅᑕᐅᔪᑦ ᒪᓕᒐᓕᕆᔨᒃᑯᑦ ᑲᑐᔾᔨᖃᑎᒌᓂ ᐳᕆᑎᔅ ᑲᓚᒻᐱᐊᒥ, ᐃᓗᓕᖃᖅᖢᓂ ᑎᑎᕋᖅᑕᐅᓂᑯᓂᒃ ᓗᐊᐃᔭᒥᑦ ᔮᓇᑕᓐ ᕈᑎᓐ ᓄᓇᖃᖅᑳᑐᓄᑦ ᒪᓕᒐᓕᕆᔨ ᑐᕌᓐᑐᒥ, ᐅᖃᐅᔨᓯᒪᖕᒪᑦ ᐃᓄᖕᓂ Gladue ᐅᓂᒃᑳᓄᑦ ᐃᑲᔪᖅᑕᐅᔪᓐᓇᐃᓂᕋᖅᖢᓂ ᐃᖅᑲᖅᑐᖅᑕᐅᓚᐅᖅᑎᓐᓇᒋᑦ ᐊᓂᓯᒪᔪᒪᓂᕐᒧᑦ.
ᐱᖁᔭᕐᔪᐊᖅ C-75 ᐊᓯᔾᔩᕗᖅ ᐊᓂᓯᒪᓚᐅᑲᓐᓂᕐᒧᑦ ᒪᓕᒐᕐᓂᒃ
ᑕᐃᒪᐃᒃᑲᓗᐊᕐᑎᓪᓗᒍ, ᐳᐊᐃᓴᒃ ᖃᓄᐃᓕᖓᓂᖓ Gladue ᒥᒃᓵᓄᑦ ᐊᒻᒪ ᐃᖅᑲᖅᑐᖅᑕᐅᓚᐅᖅᑎᓐᓇᒋ ᐊᓂᓯᒪᔪᒪᓂᕐᒧᑦ ᐱᓕᕆᓂᐅᔪᑦ ᖃᑯᒍᑦᑎᐊᖅ ᐊᑐᕈᓐᓃᓛᖅᑐᒃᓴᐅᕗᑦ.
ᑕᐃᒪᐃᔾᔪᑎᓕᒡᓕ ᐱᖁᔭᕐᔪᐊᖅ C-75, ᐊᓯᔾᔨᕈᑎᒐᓚᐃᑦ ᐱᕋᔭᒃᑐᓕᕆᓂᕐᒧᑦ ᒪᓕᒐᓂᒃ ᐊᒻᒪᓗ ᑯᐃᓐᑎᒍᑦ ᐊᓂᒍᖅᑎᑕᐅᓚᐅᖅᖢᑎᒃ ᔫᓂ 21-ᖑᓚᐅᕐᑐᒥᓐ.
ᐃᓚᖓᓕ ᐊᓯᔾᔨᕈᑎᐅᔪᖅ ᐊᑐᕐᓂᒃᑯᑦ ᐃᖅᑲᖅᑐᐃᔨᑦ ᐃᓱᒪᒋᔭᖃᖅᐸᒡᓗᑎᒃ Gladue ᐱᒻᒪᕆᒋᔭᖏᓐᓂᒃ ᐃᓱᒪᓕᐅᕆᓕᕌᖓᑕ ᐃᖅᑲᖅᑐᖅᑕᐅᓚᐅᖅᑎᓐᓇᒋ ᐊᓂᔪᒪᓯᒪᔪᓂᒃ.
ᓇᐃᓈᕐᓯᒪᔪᖅ ᐅᑯᓂᖓ ᓄᑖᓂ ᐃᓚᓕᐅᑎᓂᒃ, ᑖᒃᑯᐊᓗ ᐊᑐᓕᒻᒪᕆᖕᓂᐊᖅᖢᑎᒃ ᐅᑭᐊᒃᓵᖅ, ᐅᖃᕐᓯᒪᔪᑦ ᐃᖅᑲᖅᑐᖅᑕᐅᓚᐅᖅᑎᓐᓇᒋᑦ ᐊᓂᔪᒪᓯᒪᔪᓄᑦ ᐃᓱᒪᓕᐅᕆᓂᕐᒥᒃ, ᐃᖅᑲᖅᑐᐃᔨᐅᔪᑦ ᐅᔾᔨᕈᓱᑦᑎᐊᕆᐊᖃᕐᓂᖏᓐᓂᒃ ᓄᓇᖃᖅᑳᖅᑐᑦ ᐸᓯᔭᒃᓴᐅᔪᑦ ᖃᓄᐃᒍᓯᖏᓐᓂᒃ.
ᐊᒻᒪᓗ ᐃᖅᑲᖅᑐᐃᔨᐅᔪᑦ ᐅᔾᔨᕈᓱᑦᑎᐊᕆᐊᖃᒻᒪᕆᒃᐳᑦ ᒪᑯᓂᖓ ᐃᓄᖕᓂ “ᐃᓚᒋᔭᐅᔪᓂᒃ ᑲᒪᒋᔭᐅᕙᙱᓗᐊᖅᑐᓂᒃ ᐱᕋᔭᒃᑐᓕᕆᓂᒃᑯᑦ ᒪᓕᒐᓕᕆᓂᕐᒥᒃ ᐊᒻᒪᓗ ᓈᒻᒪᙱᓕᐅᕈᑎᖃᖅᖢᑎᒃ ᐊᓂᑎᑕᐅᔪᓐᓇᕐᓂᒃᑯᑦ ᑕᕝᕘᓇ.”
ᑕᒪᐅᓇᑦᑕᐃᓐᓇᖅ, ᐱᖁᔭᕐᔪᐊᖅC-75 ᐃᓗᓕᖃᕐᑐᖅ ᐅᖃᐅᓯᕐᒥ ᓈᒻᒪᙱᓕᐅᕈᑎᐅᔪᓐᓇᖅᑐᓂ ᐸᓯᔭᒃᓴᐅᔪᓄᑦ ᐃᓄᖕᓄᑦ ᓄᓇᕗᒥᑦ, ᐱᔾᔪᑎᒋᓪᓗᒍ ᓄᓇᕗᒥᑦ ᖁᑦᑎᓗᐊᕐᓂᖏᓐᓂ ᐃᓚᒌᑦ ᐱᑦᑎᐊᖃᑦᑕᐅᑎᖃᑦᑕᙱᓐᓂᖏᑦ: “ᐃᒡᓗᖔᖓᓄᑦ ᐃᓱᒪᒋᔭᒃᓴᑦ” ᑕᒪᒃᑯᓄᖓ ᐸᓯᔭᒃᓴᐅᔪᓄᑦ ᐊᐃᑉᐸᖏᓐᓂᒃ ᐱᑦᑎᐊᖅᐸᙱᓗᐊᖅᑐᓂ.
ᐅᓇ “ᐃᒡᓗᖔᖓᓄᑦ ᐃᓱᒪᒋᔭᒃᓴᖅ” ᑐᑭᖃᖅᑐᖅ ᑖᓐᓇ ᐸᓯᔭᒃᓴᐅᔪᖅ ᓴᕿᑎᑦᑎᔪᓐᓇᕐᓗᓂ ᖃᓄᐃᒻᒪ ᐊᓂᑎᑕᐅᓚᐅᑲᒍᓐᓇᕐᓂᖓᓂᒃ ᐃᖅᑲᖅᑐᖅᑕᐅᓚᐅᖅᑎᓐᓇᒍ. ᐱᒻᒪᕆᐅᓗᐊᙱᓐᓂᕐᓴᓄᑦ ᐸᓯᔭᒃᓴᐅᔾᔪᑎᓄᑦ, ᐸᓯᔭᒃᓴᓕᕆᔨᒃᑯᑦ ᓴᕿᑎᑦᑎᔭᕆᐊᖃᕐᒪᑕ ᐱᔪᓐᓇᐅᑎᐅᔪᓐᓇᖅᑐᓂᒃ.
ᐊᓯᒃᑲᓐᓂᖓ ᐋᕿᖏᐊᕈᑎ ᐅᕙᓂ ᐱᖁᔭᕐᔪᐊᖅ C-75 ᖁᕝᕙᕆᐊᕈᑎᐅᑐᐃᓐᓇᕆᐊᖃᖅᑐᑦ ᓄᓇᕗᒥᑦ ᑎᒍᔭᐅᕙᒃᑐᓂᒃ ᐅᓇ ᐃᓗᓕᕆᔭᐅᔪᖅ ᐃᖅᑲᖅᑐᖅᑕᐅᔪᑦ ᑎᒍᔭᐅᓯᒪᓂᖏ ᐅᓄᕐᓯᒋᐊᖅᑕᐅᓗᓂ ᐱᕋᔭᐃᓐᓇᔭᓗᐊᖅᑐᓄᑦ ᒪᐅᓇ ᐊᐃᑉᐸᖏᓐᓂᒃ ᐱᑦᑎᐊᙱᓗᐊᕐᓂᕐᒧᑦ.
ᓄᓇᕗᑦ ᖁᑦᑎᖕᓂᖅᐹᖑᔪᖅ ᐱᑦᑎᐊᖅᐸᙱᓐᓂᕐᒧᑦ ᐱᕋᔭᖃᑦᑕᕐᓂᕐᒥᒃ ᑲᓇᑕᒥ.
ᑕᐃᒪᐃᑎᓪᓗᒍ, ᐳᐊᐃᓴᒃ ᐃᓄᑑᙱᓚᖅ ᐊᑐᕈᒪᓯᒪᙱᑦᑐᒥᒃ ᐊᖏᒡᓕᒋᐊᕈᑎᐅᔪᓂᒃ Gladue ᐱᒻᒪᕆᐅᒋᔭᖏᓐᓂᒃ ᐃᖅᑲᖅᑐᐃᕕᒃᓂᑦ.
ᖃᖓᒃᑲᓐᓂᕐᓕ, ᓈᒻᒪᒃᓴᖏᓐᓂᕐᒧᑦ ᖃᓄᐃᓕᐅᕐᑎᐅᔪᑦ ᒪᑯᓇᓂ ᓄᓇᖃᖅᑳᖅᑐᑦ ᐊᕐᓇᐃᑦ ᑲᑐᔾᔨᖃᑎᒌᑦ, ᐅᑯᑎᑐᓇᖅ ᐸᐅᒃᑑᑎᒃᑯᑎᑐᑦ, ᐅᖃᕐᓯᒪᖕᒪᑕᑕ Gladue ᐃᓱᒪᓕᐅᕆᓂᖓ ᓴᕿᑎᑦᑎᒍᑎᐅᓂᖓᓂ ᐃᖅᑲᖅᑐᐃᕕᒃᑯᑦ ᑎᒍᔭᐅᓯᒪᓂᐅᔪᓂᒃ ᓴᙱᑎᑦᑎᙱᓗᐊᕐᓂᖏᓐᓂᒃ ᓄᓇᖃᖅᑳᖅᑐᑦ ᐊᖑᑎᓄᑦ ᐋᓐᓂᕐᓱᐃᕙᖕᓂᕐᒥᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ.
ᖃᖓᑦᑎᐊᓵᖑᓚᐅᕐᑐᕐᓗ ᐅᓂᒃᑳᓕᐊᕕᓃᑦ ᑲᓇᑕᒥ ᖃᐅᔨᓇᓱᖕᓂᒧᑦ ᐊᓯᐅᓯᒪᔪᓂᒃ ᐃᓄᐊᕐᑕᐅᓯᒪᔪᓂᓪᓗ ᓄᓇᖃᖅᑳᖅᑐᓂᒃ ᐊᕐᓇᓂᒃ ᐊᒻᒪ ᓂᕕᐊᕐᓵᓂᒃ ᐅᖃᐅᓯᖃᓚᐅᕐᒪᑦ ᓈᒻᒪᙱᓕᐅᕈᑎᖃᖅᑐᓂᒃ ᑐᓴᒐᒃᓴᓂᒃ ᐊᑐᐊᒐᓕᐅᖅᑎᐅᕙᒃᑐᓂᒃ.
ᐃᓚᖓᓕ ᐃᓱᒪᓕᐅᕆᒍᑎᐅᔪᖅ, ᐅᖃᕐᓯᒪᖕᒪᑕ ᒐᕙᒪᑐᖃᒃᑯᑦ, ᐳᕌᕕᓐᓯᑎᒍᑦ ᐊᒻᒪ ᑎᐅᕆᑑᕆᓂ ᒐᕙᒪᐅᔪᑦ ᐃᓕᓴᕐᓯᓯᒪᓗᑎ ᐅᓇ ᓴᕿᑕᐅᓂᑯ Gladue ᐅᓂᒃᑳᑦ “ᐱᔪᓐᓇᕐᓂᖃᕐᓂᐅᓂᖓᓂᒃ.”
ᐊᓯᒃᑲᓐᓂᖓᑦᑕᐅᖅ ᐃᓱᒪᓕᐊᕆᔭᐅᓂᑯ, ᐅᖃᕐᓯᒪᓪᓗᑎ ᒐᕙᒪᑐᖃᒃᑯᑦ, ᐳᕌᕕᓐᓯᑎᒍᑦ ᐊᒻᒪ ᑎᐅᕆᑑᕆᑦ ᒐᕙᒪᖏᑦ ᕿᒥᕐᕈᐊᑦᑎᐊᖁᓪᓗᒋ ᐊᒃᑐᐃᒍᑎᐅᕙᒃᑐᑦ ᐆᒧᖓ Gladue ᐱᒻᒪᕆᐅᒋᔭᖏᓐᓂᒃ “ᐊᒃᑐᐊᓂᖏᓐᓄᑦ ᐱᑦᑎᐊᙱᓗᐊᖃᑦᑕᕐᓂᕐᒥ ᓄᓇᖃᖅᑳᖅᑐᑦ ᐊᕐᓇᖏᓐᓂᒃ ᐊᒻᒪ ᓂᕕᐊᕐᓵᓂᒃ ᐊᒻᒪᓗ 2SLGBTQQIA ᐃᓄᖕᓂ.”
ᓄᓇᕗᒥᑦ, 55 ᐳᓴᓐᑎᖏᑦ ᑎᒍᔭᐅᓯᒪᔪᑦ ᑎᒍᔭᐅᓯᒪᐃᓐᓇᖅᑐᑦ ᐃᖅᑲᖅᑐᖅᑕᐅᓂᐊᕐᓂᕐᒥᓂᒃ ᐅᑕᖅᑭᓪᓗᑎᒃ ᐊᓂᑎᑕᐅᑲᐃᓐᓇᕈᓐᓇᙱᑦᑐᑦ.
ᑕᐃᒪᓕ ᑕᑯᓂᐊᑐᐃᓐᓇᖅᑐᒃᓴᐅᕗᒍ ᑕᒪᒃᑯᐊ ᖃᖓᑦᑎᐊᓵᖅ ᐊᓯᙳᖅᑕᐅᔪᑦ ᒥᒃᖠᕚᓕᕈᑎᐅᓂᐊᕆᐊᒃᓴᖏᓐᓂᒃ ᐊᖏᒡᓕᕚᓪᓕᕈᑎᐅᓗᑎᒡᓘᓐᓃᑦ ᓄᓇᕗᒥᑦ ᑎᒍᔭᐅᕙᒃᑐᑦ ᐅᓄᕐᓂᖏᓐᓂᒃ.
(0) Comments