ᓄᓇᕗᒥᑦ ᐸᓖᓯᒃᑯᑦ ᐊᖓᔪᖅᑳᖓ ᐃᓄᖕᓂ ᑐᓴᒃᑲᓐᓂᕈᒪᔪᑦ ᐸᓖᓯᑦ ᐊᔾᔨᓕᐅᕈᑎᓂᒃ ᐊᑐᖃᑦᑕᕐᓂᖏᓐᓂᒃ

For an English version of this story, please see Nunavut’s RCMP chief wants better Inuit outreach on police body cameras.

ᐸᓖᓯᒃᑯᑦ ᐃᓄᖕᓂ ᑐᓴᑲᑕᒃᑲᓐᓂᕈᒪᔪᑦ ᒪᑯᓄᖓ ᐸᓖᓯᒃᑯᑦ ᐊᑐᖃᑦᑕᕈᒪᓂᖏᓐᓂᒃ ᐊᔾᔨᓕᐅᕈᑎᓂᒃ, ᐅᖃᓚᐅᕐᑐᖅ ᓄᓇᕗᒥᑦ ᐸᓖᓯᑯᑦ ᐊᖓᔪᖅᑳᖓ ᐊᒫᓐᑕ ᔪᐆᓐᔅ.

ᐸᓖᓯᒃᑯᑦ ᐃᖃᓗᖕᓂ ᐊᔾᔨᓕᐅᕈᑎᓂᒃ ᐊᑐᑲᑕᓚᐅᕐᓯᒪᔪᑦ ᓄᕕᐱᕆ 2020-ᓗ ᒪᐃ 2021-ᓗ ᐊᑯᓐᓂᖓᓂᒃ, ᐊᒻᒪᓗ ᐱᓇᓱᐊᕈᓯᐅᓚᐅᕐᑐᒥᒃ ᐸᓖᓯᒃᑯᑦ ᑐᓴᖅᑎᑦᑎᓕᓚᐅᕐᑐᑦ ᐃᓚᖏᓐᓂᒃ ᖃᐅᔨᔾᔪᑎᒋᓯᒪᔭᖏᓐᓂᒃ ᓄᓇᓕᖕᓂ ᑐᓴᖅᑕᖏᓐᓂᒃ ᖃᓄᐃᔾᔪᑎᐅᓚᐅᕐᒪᖔᑦ.

ᑲᑎᖢᑎᒃ 73 ᐃᓄᐃᑦ ᖃᐅᔨᓴᕈᑎᓂᒃ ᐱᐊᓂᒃᓯᓚᐅᕐᑐᑦ ᑖᔅᓱᒥᖓ ᐱᓕᕆᐊᕆᔭᐅᓂᑯᒥᒃ. ᑖᒃᑯᓇᙵᑦ 13 ᐃᓅᓂᕋᓚᐅᕐᑐᑦ ᐊᒻᒪᓗ 13 ᓇᓗᓇᐃᕈᒪᓚᐅᙱᖢᑎᒃ, ᔪᐆᓐᔅ ᐅᖃᖅᑐᖅ.

“ᑖᓐᓇᓕ ᐊᑦᑎᒃᑐᒻᒪᕆᐊᓗᒃ ᐃᓱᒪᒋᓪᓗᒍ 85 ᐳᓴᓐᑎᖏᑦ ᓄᓇᕗᒥᐅᑕᑦ ᐃᓅᓂᖏᓐᓄᑦ,” ᐅᖃᖅᑐᖅ.

ᐃᖃᓗᖕᓂ ᓄᓇᖃᖅᑐᑦ ᓇᑉᐸᓪᓗᐊᖏᑦ (50 ᐳᓴᓐᑎ) ᐃᓅᖕᒪᑕ ᐅᕙᓂᓕ 2016-ᒥ ᓇᐃᓴᐃᔾᔪᑎᕕᓂᕐᓂᒃ.

ᖃᐅᔨᓴᕈᑎᕕᓂᐅᔪᑦ ᓴᖅᑭᑎᑦᑎᓯᒪᔪᑦ 60 ᐳᓴᓐᑎᐅᑉ ᐅᖓᑖᓃᑦᑐᑦ ᑭᐅᔪᕕᓃᑦ ᐱᐅᒃᓴᕐᓂᖅᓴᐅᓚᐅᕐᓯᒪᔪᑦ ᐸᓖᓯᒃᑯᑦ ᐊᑐᖃᑦᑕᕐᓂᖏᓐᓂᒃ ᐊᔾᔨᓕᐅᕈᑎᓂᒃ ᐃᓱᒪᒋᓪᓗᒍ ᓴᖅᑭᔮᕈᓐᓇᕆᐊᖃᕐᓂᖅ, ᐸᓖᓯᓂᒡᓗ ᐅᒃᐱᕈᓱᒍᓐᓇᕐᓂᕐᒧᑦ ᐊᒻᒪᓗ ᑭᒃᑯᓕᒫᓄᑦ ᐱᕐᕈᓗᐊᕿᑎᑦᑎᑦᑕᐃᓕᓂᕐᒧᑦ.

ᑕᐃᒪᐃᑎᓪᓗᒋᓪᓕ, ᐅᓄᕐᓂᖅᓴᐃᑦ ᐃᓄᐃᑦ ᑭᐅᔨᐅᔪᑦ ᐅᖃᕐᓯᒪᓚᐅᕐᑐᑦ ᐅᒃᐱᕈᓱᖕᓂᕋᖅᖢᑎᒃ ᐊᔾᔨᓕᐅᕈᑎᑦ ᑎᒥᖏᓐᓃᑦᑐᑦ ᐱᑲᑦᑕᓗᖕᓇᙱᓐᓂᕐᓴᐅᓇᔭᕆᐊᒃᓴᖏᓐᓂᒃ ᑕᐅᑐᒃᖢᒋᓪᓕ ᖃᓪᓗᓈᑦ ᑭᐅᔪᑦ. ᐅᓄᕐᓂᕐᓴᐃᑦ ᖃᓪᓗᓈᑦ ᑭᐅᔪᑦ ᐅᖃᓚᐅᕐᑐᑦ ᐊᔾᔨᓕᐅᕈᑎᑦ ᖃᓄᐃᓐᓂᕐᒧᑦ ᓴᖅᑭᔮᕈᑎᐅᔭᓗᐊᕐᓂᖓᓂᒃ ᐊᖏᖃᑎᖃᙱᓐᓂᕋᖅᖢᑎᒃ.

ᔪᐆᓐᔅ ᐅᖃᓚᐅᕐᑐᖅ ᐸᓖᓯᒃᑯᑦ ᐅᖃᓪᓚᖃᑎᖃᓚᐅᕐᓂᖏᓐᓂᒃ ᒪᓕᒐᓕᐅᖅᑎᓂᒃ ᐊᒻᒪᓗ ᒪᐃᔭᓂᒃ ᓄᓇᕗᒥ ᖃᓄᖅ ᑕᒪᓐᓇ ᐱᐅᓯᕚᓪᓕᖅᑎᑦᑎᓇᔭᕆᐊᒃᓴᖏᓐᓂᒃ ᓯᕗᓂᑦᑎᓐᓂᒃ ᖃᐅᔨᓴᕈᑎᑎᒍᑦ, ᐃᓱᒪᓕᐅᕈᑎᒋᔭᐅᔪᑦ ᐃᓂᖃᖅᑎᑕᐅᓗᑎᒃ ᕼᐋᒻᒪᓚᒃᑯᑦ ᑎᑎᕋᕐᕕᖏᓐᓂᒃ. ᐅᖃᒃᑲᓐᓂᖅᖢᓂ ᐸᓖᓯᒃᑯᑦ ᓄᓇᓕᖕᓂ ᑲᑎᒪᑎᑦᑎᔪᒪᓂᖏᓐᓂᒃ ᓄᕙᒡᔪᐊᕐᓇᖅ-19 ᓄᖑᔾᔫᒥᒃᐸᑦ.

ᔪᐆᓐᔅ ᐅᖃᐅᓯᖃᓚᐅᕐᑐᖅ ᐃᓚᖏᓐᓂᒃ ᐊᑐᐊᒐᓕᐊᕆᔭᐅᔪᓂᒃ ᐸᓖᓯᒃᑯᓐᓄᑦ ᐅᖃᐅᓯᖃᖅᖢᑎ ᒪᓕᒃᑕᐅᔭᕆᐊᓕᖕᓂᒃ ᐊᔾᔨᓕᐅᕈᑎᓂᒃ ᐊᑐᕐᓂᐊᕐᓗᓂ.

“ᓲᖃᐃᒻᒪᓗ ᑕᒪᐅᖓᒥᐊᖅ ᑐᓴᐅᒪᔭᐅᔭᕆᐊᖃᙱᑦᑐᑦ ᐃᓱᒪᒋᔭᕆᐊᖃᕐᒥᖕᒪᑕ.” ᐅᖃᕐᑐᖅ, ᓇᓗᓇᐃᒃᑯᑎᖃᕐᖢᓂ ᐋᓐᓂᐊᕐᕕᓕᐊᕆᐊᖃᖅᑐᖃᕐᓂᕐᐸᑦ.

ᔮᓇᑕᓐ ᐃᐊᔅᕗᑦ, ᐊᖓᔪᖅᑳᖅ ᐊᐅᓚᑦᑎᔨ ᓄᓇᕗᒥᑦ ᒪᓕᒐᓕᕆᔨᒃᑯᑦ ᑲᑎᒪᔨᓄᑦ ᓄᓇᕗᒥᑦ, ᐅᖃᓚᐅᕐᑐᖅ ᐊᑐᐊᒐᖅ ᓱᖅᑯᐃᓇᑦᑎᐊᕆᐊᖃᕐᓂᖓᓂᒃ ᐃᓚᖏᑦᑎᒍᑦ ᐅᖃᐅᓯᖅᑎᒍᑦ ᓲᕐᓗ ᐊᔾᔨᓕᐅᕈᑎ ᑲᒥᙶᖅᑎᑕᐅᔭᕆᐊᖃᖅᐸᑦ. ᔪᐆᓐᔅ ᐊᖏᖃᑕᐅᓚᐅᕐᑐᖅ ᑕᒪᑐᒥᖓ.

“ᑖᓐᓇ ᐊᔾᔨᓕᐅᕈᑎ ᐲᖅᑕᐅᒃᐸᑦ, ᑖᓐᓇ ᐸᓖᓯ ᓇᓗᓇᐃᔭᕆᐊᖃᕋᔭᖅᑐᖅ ᖃᓄᐃᒻᒪ ᐲᕐᓯᒪᖕᒪᖔᑦ,” ᐅᖃᖅᑐᖅ.

ᔪᐆᓐᔅ ᐅᖃᓚᐅᕐᑐᖅ ᑐᕌᒐᖃᕐᓂᕋᖅᖢᓂ ᐸᓖᓯᒃᑯᑦ ᑕᒪᕐᒥᒃ ᓄᓇᓕᖕᓃᑦᑐᓕᒫᑦ ᐊᔾᔨᓕᐅᕈᑎᖃᕐᑐᐃᓐᓇᐅᓕᕐᓗᑎᒃ ᓄᓇᕗᒥᑦ ᑕᖅᑭᑦ 18 ᐃᓗᐊᓂ ᐊᒻᒪᓗ ᐃᖃᓗᖕᓂ ᐅᐱᕐᖔᖅ ᐊᑐᖅᑐᓂᒃ ᑕᑯᖃᑦᑕᓛᖅᖢᑎᒃ.

ᐊᑐᖅᑕᐅᖃᑦᑕᕐᓂᐊᖅᑐᑦ ᐊᔾᔨᓕᐅᕈᑎᑦ ᐃᑲᔫᓯᐊᖅᑖᕐᓂᒃᑯᑦ ᒐᕙᒪᑐᖃᒃᑯᓐᓂ, ᑭᓯᐊᓂᓕ ᐊᕐᕌᒍ 2023-24 ᐅᖓᑕᓂ ᑖᒃᑯᐊ ᓄᓇᕗᒥᑦ ᒐᕙᒪᒃᑯᓐᓂᒃ ᐃᑲᔫᓯᐊᖅᑖᖃᑦᑕᕋᔭᖅᖢᑎᒃ, ᔪᐆᓐᔅ ᐅᖃᖅᑐᖅ. ᐅᖃᒃᑲᓐᓂᓚᐅᕐᑐᖅ ᐊᑕᐅᓯᖅ ᐊᔾᔨᓕᐅᕈᑎ ᐊᑭᖃᕐᓂᖓᓂᒃ $2,000-ᓂ $3,000-ᓄ ᐊᕐᕌᒍᒧ. ᔪᐆᓐᔅ ᐅᖃᓚᐅᕐᑐᖅ ᐊᔾᔨᓕᐅᕈᑎᑦ ᓴᖅᑭᔮᕐᓇᕐᓂᕐᓴᐅᓂᐊᕐᓂᖏᓐᓂᒃ ᑭᓯᐊᓂᓕ ᐃᓚᐃᓐᓇᕆᔭᖓ ᑖᒃᑯᐊ ᐃᓄᖕᓄᑦ ᐅᒃᐱᕆᔭᐅᔪᓐᓇᕐᓂᐊᕐᓂᖏᑦᑎᒍᑦ.

“ᓱᓕ ᐱᓕᕆᐊᒃᓴᖃᕈᓘᔭᕋᑦᑕ ᐊᒻᒪᓗ ᖃᐅᔨᒪᓪᓗᖓ ᐸᓖᓯᒃᑯᑦ ᐱᓕᕆᐊᖃᕋᓱᖕᓂᖏᓐᓂᒃ ᐅᒃᐱᕆᔭᐅᔪᓐᓇᕐᓯᓂᕐᒥᒃ,” ᐅᖃᖅᑐᖅ.

ᒪᒃᐱᒐᓕᒃ 116-ᓂ ᐅᓂᒃᑳᓕᐊᕆᔭᐅᔪᖅ ᐊᑐᐃᓐᓇᐅᓕᕐᓂᐊᖅᒪᑕ ᑕᖅᑭᐅᓂᐊᕐᑐᖅ ᓇᑉᐸᕐᒥ ᐃᓚᓪᓗᒍ ᑕᒪᒃᑯᐊ ᑎᑎᕋᖅᑕᐅᕌᓂᒃᐸᑕ ᐃᓄᒃᑎᑐᑦ ᐊᒻᒪ ᐅᐃᕖᑎᑐᑦ, ᔪᐆᓐᔅ ᐅᖃᖅᑐᖅ.