ᓄᓇᕗᒥᑦ ᒐᕙᒪᒃᑯᑦ ᐱᒋᐊᖅᑎᑦᑎᓂᐊᕈᒪᔪᑦ ᖃᐅᔨᓴᕈᑎᒥᓐ ᖃᖓᑕᓲᓕᕆᓂᖅᒥᒃ ᐃᖃᓗᖕᓂᑦ ᓴᓂᑭᓗᐊᖅᒧᑦ

ᓄᓇᕗᒥᑦ ᒐᕙᒪᒃᑯᑦ ᐱᒋᐊᖅᑎᑦᑎᓂᐊᕈᒪᔪᑦ ᖃᐅᔨᓴᕈᑎᒥᒃ ᖃᖓᑕᓲᓕᕆᓂᖅᒥᒃ ᐃᖃᓗᐃᓪᓗ ᓴᓂᑭᓗᐊᓪᓗ ᐊᑯᓐᓂᖓᒍᑦ, ᑖᓐᓇᓗ ᓄᓇᓕᒃ ᖃᖓᑕᓲᒃᑯᑦ ᐊᒃᑐᐊᓂᖃᙱᑦᑎᐊᖅᖢᓂ ᓄᓇᕗᒥᙶᖅᑐᓂᒃ.

ᓄᓇᕗᒥᑦ ᒐᕙᒪᒃᑯᑦ ᓴᖅᑭᑎᑦᑎᓚᐅᖅᒪᑕ ᐱᔪᒪᔾᔪᑎᓂᒃ ᑐᒃᓯᕋᐅᑎᓂᒃ ᐱᓇᓱᐊᕈᓯᐅᓚᐅᖅᑐᒥᓐ, ᕿᓂᖅᖢᑎᒃ ᖃᖓᑕᓲᖃᖅᑐᓂᒃ ᐱᓕᕆᐊᖃᕈᒪᓇᔭᖅᑐᓂᒃ ᒪᕐᕈᐃᕐᓗᑎᒃ ᐱᓇᓱᐊᕈᓯᖕᒥᒃ ᐃᖃᓗᖕᓂᑦ ᓴᓂᑭᓗᐊᕐᒧᐊᖃᑦᑕᕋᔭᖅᑐᒥᒃ ᐃᓄᖃᓪᓗᐊᖅᖢᓂ 900-ᓂᒃ ᓴᓂᑭᓗᐊᑉ ᕿᑭᖅᑕᖏᓐᓂᒃ.

ᓄᓇᕗᑦ ᖃᖓᑕᓲᓕᕆᓂᒃᑯᑦ ᐱᔨᑦᑎᕋᐅᑎᓕᕆᓂᖅᒥ ᖃᐅᔨᓴᕈᑎᖃᕋᓱᒃᑐᑦ: ᒐᕙᒪᒃᑯᑦ ᐊᖏᕈᑎᑎᒍᑦ ᐱᓕᕆᑎᑦᑎᔪᒪᔾᔪᑎᖓ ᕿᓂᕈᑎᒋᔭᐅᔪᖅ ᖃᖓᑕᓲᓕᕆᓂᖅᒥᑦ ᐊᐅᓚᑦᑎᔪᒪᓇᔭᖅᑐᓂᒃ ᑕᖅᑭᓂᒃ 6-ᓂᒃ ᐱᒋᐊᖅᓗᓂ ᒪᐃᒥ ᑎᓯᐱᕆᒧᑦ, ᑭᓯᐊᓂᓕ ᑖᓐᓇ ᐊᑭᑦᑐᕋᐅᑎᑦᑎᔾᔪᑎ ᐊᓯᐊᒎᕈᑎᖃᕈᓐᓇᖅᓯᒪᑎᑦᑎᔪᖅ ᑖᓐᓇ ᐊᖏᖃᑎᒌᖕᓂᒃᑯᑦ ᐱᓕᕆᐊᖃᖅᑎᑦᑎᓂᖅ ᐃᓚᒋᐊᖅᑕᐅᔪᓐᓇᖅᓯᒪᓪᓗᓂ ᑕᖅᑭᒃᑲᓐᓂᖅᓂᒃ 18-ᓂᒃ.

ᒫᓐᓇ ᓴᓂᑭᓗᐊᖅᒧᑦ ᖃᖓᑕᓲᖅᑕᖃᖃᑦᑕᙱᒻᒪᑦ ᐊᓯᖏᓐᓂᒃ ᓄᓇᕗᑦ ᓄᓇᓕᖏᓐᓂᙶᖅᑐᓂᒃ.

ᒫᓐᓇᓕ ᓴᓂᑭᓗᐊᖅᒥᐅᑕᑦ ᖃᖓᑕᔪᓐᓇᖅᒪᑕ ᖃᓪᓗᓈᓄᑦ ᕗᐃᓂᐱᒡᒧᑦ ᑳᒻ ᐃᐅᑯᑦ. ᑖᓐᓇᑦᑕᐅᖅ ᓄᓇᓕᒃ ᐱᔨᑦᑎᕋᖅᑕᐅᖃᑦᑕᕐᒥᔪᖅ ᐃᓄᐃᑦ ᖃᖓᑕᓲᖓᓂᒃ ᓄᓇᕕᒃᒥᑦ, ᑭᓯᐊᓂᓕ ᑖᓐᓇ ᖃᖓᑕᓲᖅ ᓄᖅᑲᖅᑎᑦᑎᓯᒪᓕᖅᑐᖅ ᖃᖓᑕᓂᐅᕙᒃᑐᓂᒃ ᓄᓇᓕᖕᓄᙵᐅᔪᓂᒃ ᑕᐃᒪᙵᑦ ᐋᓐᓂᐊᕕᒡᔪᐊᕐᓇᖅ ᐱᒋᐊᓚᐅᖅᓯᒪᑎᓪᓗᒍ.

ᓴᓂᑭᓗᐊᖅᒥᑦ ᐊᖓᔪᖅᑳᕆᔭᐅᕙᒃᑐᑦ ᐊᑯᓂᕈᓗᒃ ᐱᐅᓂᖅᓴᒥᒃ ᖃᖓᑕᓲᓕᕆᓂᒃᑯᑦ ᐱᔨᑦᑎᕋᖅᑕᐅᖃᑦᑕᕈᒪᓯᒪᔪᑦ ᓄᓇᓕᖕᓄᙵᐅᔪᓂᒃ ᐊᒻᒪ ᓄᓇᓕᖕᓂᙶᖅᑐᓂᒃ, ᐊᒻᒪᓗ ᑕᒪᓐᓇ ᐱᓕᕆᐊᖑᒃᑲᓐᓂᓕᓚᐅᖅᓯᒪᔪᖅ ᓄᕙᒡᔪᐊᕐᓇᖅ-19 ᐱᔾᔪᑎᐅᓪᓗᓂ ᑕᒪᒃᑯᐊ ᐊᐅᓪᓚᕆᐊᖃᖅᐸᒃᑐᑦ ᐃᓄᑑᓐᓇᖅᑐᒦᑦᑕᕆᐊᖃᖃᑦᑕᓕᖅᑎᓪᓗᒋᑦ ᐱᓇᓱᐊᕈᓰᖕᓂᒃ ᒪᕐᕉᖕᓂ ᕿᒪᐃᑐᐊᕌᖓᑕ ᓄᓇᕗᒥᑦ.

“ᐱᑕᖃᙱᓗᐊᕐᓂᖓ ᖃᖓᑕᓲᒃᑯᑦ ᐱᔨᑦᑎᕋᐅᑎᓂᒃ ᐊᒃᓱᐊᓗᒃ ᓄᓇᓕᖕᓄᑦ ᐊᒃᑐᐃᒍᑎᖃᕐᒪᑦ,” ᑕᓯᐅᔭᕐᔪᐊᖅᒧᑦ ᒪᓕᒐᓕᐅᖅᑎ ᐋᓚᓐ ᕋᒻᐳᑦ ᐅᖃᓚᐅᖅᑐᖅ ᓄᓇᕗᑦ ᒪᓕᒐᓕᕆᕝᕕᐊᓂᒃ ᑕᖅᑭᐅᓚᐅᖅᑐᒥᓐ.

ᑕᒪᒃᑯᐊᓕ ᖃᖓᑕᓂᐅᖃᑦᑕᕈᒪᔪᑦ ᐋᖅᑭᒃᑕᐅᓯᒪᔪᖅ ᓇᒡᒐᔾᔭᐅᒃᑯᑦ ᐊᒻᒪ ᑎᓴᒻᒥᒃᑯᑦ, ᖃᖓᑕᓲᒃᑯᑦ 8-ᓂ ᐃᓄᖃᕈᓐᓇᖅᑐᒥᑦ, ᑖᓐᓇ ᐊᑭᑦᑐᕋᐅᑎ ᐅᖃᖅᓯᒪᔪᖅ.

ᖃᖓᑕᓲᓕᕆᔨᐅᔪᖅ ᓇᖕᒥᓂᖅ ᒪᓂᓴᐅᓯᐅᕆᐊᖃᕋᔭᖅᖢᓂ ᐊᒻᒪᓗ ᖃᖓᑦᑕᐅᑎᓂᒃ ᓂᐅᕐᕈᑎᖃᖅᐸᒡᓗᓂ ᓄᓇᕗᒥᑦ ᒐᕙᒪᒃᑯᓐᓄᑦ ᐊᒻᒪ ᑭᒃᑯᑐᐃᓐᓇᖅᓄᑦ; ᑖᒃᑯᐊᓕ ᒐᕙᒪᒃᑯᑦ ᖃᐅᔨᒪᓂᕋᖅᑐᑦ ᐊᒃᓱᓪᓘᓐᓃᑦ 6-ᓂᒃ ᓂᐅᕕᖅᓯᒪᔪᖃᕋᔭᖅᑐᖅ ᖃᖓᑕᓂᑕᒫᑦ.

ᑖᓐᓇ ᐱᔪᒪᔾᔪᑎ ᑐᒃᓯᕋᐅᑎᓂᒃ ᒪᑐᐃᓚᐅᖅᑐᖅ ᐄᐳᕈᓪ 12-ᒥᑦ ᐊᒻᒪ ᒪᑐᓂᐊᖅᖢᓂ ᐄᐳᕈᓪ 26-ᒥᑦ.

ᓴᓂᑭᓗᐊᖅ ᒪᐃᔭ ᔮᓂ ᑯᑭ ᐃᑲᔪᖃᑦᑕᖅᓯᒪᔪᖅ ᓄᓇᕗᒥᑦ ᖃᖓᑕᓂᐅᔪᓂᒃ ᓄᓇᖓᓂᒃ. ᑎᑎᕋᓚᐅᖅᑐᖅ ᓄᓇᕗᒥᑦ ᒐᕙᒪᒃᑯᓐᓄᑦ ᐊᕐᕌᓂ ᓇᓗᓇᐃᖅᓯᓯᒪᓪᓗᓂ ᓄᓇᕗᒥᑦ ᓯᓚᑦᑐᖅᓴᖅᕕᒃᒥᑦ ᐃᓕᓐᓂᐊᖅᑎᐅᔪᖅ ᐃᖃᓗᖕᓄᙵᐅᓚᐅᖅᓯᒪᖕᒪᑦ ᑭᓯᐊᓂᓗ ᒪᕐᕉᖕᓂ ᐱᓇᓱᐊᕈᓰᖕᓂᒃ ᐃᓄᑑᓐᓇᖅᑐᒦᑦᑕᕆᐊᖃᖅᖢᓂ ᐊᒻᒪᓗ ᐅᓪᓗᓂᒃ ᑕᓪᓕᒪᓂᒃ ᐃᖏᕐᕋᓪᓗᓂ ᑕᒪᒃᑯᐊᓗ ᐊᑭᖃᕐᓂᑰᓪᓗᑎᒃ ᑲᑎᖢᑎᒃ $9,000-ᖑᓪᓗᓂ.

ᑯᑭ ᑐᙵᓱᒃᑎᑦᑎᒻᒪᕆᒃᑐᖅ ᑐᓴᒐᒃᓴᒥᒃ ᖃᐅᔨᓴᕐᓂᐅᓂᐊᖅᑐᒥ ᖃᖓᑕᓲᒃᑯᑦ ᐱᔨᑦᑎᕋᐅᑎᓕᕆᕿᕐᒧᑦ ᓄᓇᓕᖕᓄᑦ ᐊᒻᒪ ᓄᓇᓕᖕᓂᑦ.

“ᑕᑯᓂᐊᓪᖤᖅᐳᒍᑦ ᖃᓄᐃᓕᕈᑎᐅᓂᐊᕐᓂᖓᓂᒃ ᑐᑭᓯᕋᐅᑎᒋᔭᐅᔪᖅ,” ᐅᖃᖅᑐᖅ.

“ᓄᓇᖃᙱᑦᑑᒐᓗᐊᓪᓘᓐᓃᑦ ᑕᒪᑐᒥᖓ ᖁᕕᐊᒋᔭᖃᖅᑐᑦ ᑲᔪᓯᑐᐃᓐᓇᕆᐊᖃᕐᓂᖓᓂᒃ.”