ᓄᓇᕗᒧᑦ ᑳᓐᓲᕕᑎᕝᑯᓐᓄᑦ ᓂᕈᐊᒐᒃᓴᖅ ᐱᒃᑲᖅᑎᑦᑎᕗᖅ ᐳᔪᕐᒧᑦ ᑖᒃᓰᔭᕆᐊᖃᕈᑎᓂᒃ ᖁᕝᕙᖅᐹᓪᓕᕈᑎᐅᓂᖓᓂᑦ ᐊᑭᒋᔭᐅᔪᓂᒃ “ᑭᓱᓕᒫᑦᑎᐊᓄᑦ”
ᓕᐅᓇ ᐊᒡᓘᒃᑲᖅ ᐅᖃᐅᓯᖃᖅᐳᖅ ᓂᕈᐊᒐᒃᓴᐅᓪᓗᓂ ᖃᓄᐃᓕᐅᕈᑎᒋᓂᐊᖅᑕᖏᓐᓂᒃ ᓄᓇᕗᒧᑦ
ᓕᐅᓇ ᐊᒡᓘᒃᑲᖅ, ᓄᓇᕗᒧᑦ ᑳᓐᓲᕕᑎᕝᑯᓐᓂᑦ ᓂᕈᐊᒐᒃᓴᖅ, ᑕᑯᑎᑦᑎᕗᖅ ᑲᓲᕕᑎᕝᑯᑦ ᐊᖓᔪᖅᑳᖓᓂᒃ ᐋᓐᑐᕉ ᓯᓂᐅ ᐱᕈᖅᑐᓂᒃ ᐃᖃᓗᐃᑦ ᓯᐊᕕᐊ ᒍᕆᓄᓪ ᒥᕐᖑᐃᕐᓯᕕᒃᒥᑦ ᑖᓐᓇ ᐳᓛᖅᑎᓪᓗᒍ ᓄᓇᓕᐸᐅᔭᓄᑦ ᔫᓂ 19-ᖑᑎᓪᓗᒍ. (ᐊᔾᔨᓕᐅᕆᔨ ᐃᐊᒪ ᑐᕌᓐᑐ)
For an English version of this story, see Nunavut’s Conservative candidate blames carbon tax for raising cost of “absolutely everything”
ᓄᓇᕗᒧᑦ ᑳᓐᓲᕕᑎᕝᑯᓐᓄᑦ ᓂᕈᐊᒐᒃᓴᖅ ᐅᖃᖅᑐᖅ ᑲᓐᓲᕕᑎᕝᑯᑦ ᒐᕙᒪᙳᕐᓂᐊᖅᐸᑕ, ᐱᑕᖃᕈᓐᓃᖅᑎᑦᑎᓇᔭᖅᑐᑦ ᐳᔪᕐᒧᑦ (carbon) ᑖᒃᓯᒥᑦ ᓲᖃᐃᒻᒪᑦ “ᐊᑭᒋᔭᐅᔪᓂᒃ ᖁᕝᕙᖅᐹᓪᓕᖅᑎᖕᒪᑦ ᑭᓱᓕᒫᑦᑎᐊᓄᑦ.”
ᓕᐅᓇ ᐊᒡᓘᒃᑲᖅ ᐱᒋᐊᓕᓚᐅᕐᐳᖅ ᓂᕈᐊᒐᒃᓴᐅᓂᕐᒧᑦ ᓄᓇᕗᒥ ᓄᓇᓕᖕᓅᑲᑕᖕᓂᖓ. ᓄᓇᕗᒧᑦ ᒪᓕᒐᓕᕆᔨᕐᔪᐊᖑᓂᖑ ᐱᒋᐊᓕᓚᐅᕐᐸᖓ ᓂᕈᐊᒐᒃᓴᐅᓂᖓ ᐃᖃᓗᖕᓂ ᖃᓄᐃᓕᐅᕐᓂᖃᖅᑎᑦᑎᓪᓗᓂ ᓯᑎᐱᕆ 12-ᒥᑦ ᕗᕉᐱᓱ ᑐᔪᕐᒥᕕᒃᒥ.
ᑭᖑᓂᐊᒍᑦ ᑲᖏᖅᖠᓂᕐᒧᑦ ᖃᖓᑕᓚᐅᕐᑐᖅ ᖃᐅᒃᐸᙳᖅᑎᓪᓗᒍ ᐃᖃᓗᖕᓄᑦ ᐅᑎᒃᑲᓐᓂᕐᓂᐊᓵᕐᓂᖓᓂᒃ ᐱᓇᓱᐊᕈᓯᐅᓂᐊᕐᑐᒥᒃ. ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᖃᓪᓚᖃᑎᖃᕈᓐᓇᓚᐅᕐᒪᑕ ᐊᒡᓘᒃᑲᕐᒥᒃ ᐃᖃᓗᖕᓃᑎᓪᓗᒍ.
ᐅᓇ ᐳᔪᕐᒧᑦ ᑖᒃᓯ (carbon tax) “ᖁᕝᕙᖅᐹᓪᓕᖅᑎᑦᑎᖕᒪᑦ ᖃᖓᑕᓲᒃᑯᑦ ᐊᑭᓂᒃ, ᓂᐅᕕᒐᒃᓴᓂᒃ, ᐊᐅᓪᓚᖅᑎᑦᑎᓂᕐᒧᑦ, ᐊᖑᓇᓱᖕᓂᕐᒧᑦ ᐊᒻᒪ ᓇᖕᒥᓂᖅ ᐃᒡᓗᖃᕐᓂᕐᒧᑦ,” ᐅᖃᕐᓯᒪᔪᖅ ᐊᒡᓘᒃᑲᐅᑉ ᓂᕈᐊᒐᒃᓴᐅᓂᕐᒧᑦ ᐊᑭᓐᓇᒥᐅᑕᖅ ᒪᓂᓴᐅᑎᖓ. ᐊᒡᓘᒃᑲᖅ ᐅᖃᓚᐅᕐᒥᔪᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᓇ ᑖᓰᕈᑎ ᓈᒻᒪᙱᑦᑐᒃᑯᑦ ᐊᒃᑐᐃᒍᑎᖃᕐᓂᖓᓂᒃ ᐸᐃᕆᕝᕕᖕᓂᒃ ᐊᒻᒪ ᐃᓐᓇᑐᖃᐃᑦ ᐊᖏᕐᕋᖏᓐᓄᑦ ᖁᕝᕙᕆᐊᖅᑕᐅᓂᖓᓄᑦ ᐅᖅᑰᓴᐅᑎᒃᓴᖅ.
“ᑕᒪᐃᓐᓂᓕᒫᖅ ᓴᓈᕆᔭᐅᔪᑦ ᐊᒃᑐᖅᑕᐅᖕᒪᑕ ᑕᔅᓱᒧᖓ ᐳᔪᕐᒧᑦ ᑖᒃᓯᒧᑦ.” ᐊᒡᓘᒃᑲᖅ ᐅᖃᖅᑐᖅ. “ᐅᓇ ᐳᔪᕐᒧᑦ ᑖᒃᓰᔭᕈᑎ ᐊᑭᓕᕐᓱᐃᕌᓂᒍᓐᓇᙱᑎᓪᓗᑕ ᐃᒪᐃᓕᖓᖕᒪᑦ ᓲᕐᓗ ᖃᕋᓴᐅᑉ ᐃᒡᓗᐊ ᐃᒡᓗᐊᓄᑦ ᐅᖃᕈᓐᓇᕋᓂ.”
ᑭᓯᐊᓂᓕ ᔪᐊᔾ ᕼᐃᒃᔅ, ᓄᓇᕗᑦ ᑮᓇᐅᔭᓕᕆᓂᕐᒧᑦ ᒥᓂᔅᑕᖓ, ᑐᓴᖅᑎᑦᑎᓚᐅᕐᓯᒪᔪᖅ ᒪᐃᖑᑎᓪᓗᒍ ᐊᖏᖃᑎᒌᒍᑎᒃᑯᑦ ᐋᑐᕚᒥ, ᖃᐅᒻᒪᖁᑎᑦ ᐊᒻᒪ ᖃᖓᑕᓲᓄᑦ ᐅᕐᓱᐊᓗᐃᑦ ᓄᓇᕗᒻᒥ ᐱᒋᔭᐅᓯᒪᓕᕐᑐᑦ ᑕᒪᑐᒧᖓ ᑖᒃᓰᕈᑎᒧᑦ ᐃᓚᐅᑎᑕᐅᙱᓐᓂᕋᓚᐅᕐᑕᖏᑦ. ᓄᓇᕗᑦ ᒐᕙᒪᖓᑦ ᐊᒻᒪ ᐃᑲᔫᑎᖃᖅᑎᑦ ᓇᑉᐸᖓᓄᑦ ᐊᑭᓕᐅᑎᒃᓴᓂᒃ ᐳᔪᕐᒧᑦ ᑖᒃᓰᔭᕈᑎᒥᑦ ᓄᓇᕗᒥᑦᐅᓄᑦ.
ᐊᒡᓘᒃᑲᐅᑉ ᓂᕈᐊᒐᒃᓴᐅᒍᑎᒋᔭᖏᑦ ᓄᓇᕗᒧᑦ ᑎᓴᒪᓂᒃ ᓯᕗᓪᓕᐅᑎᒐᒃᓴᖃᖅᑐᑦ: ᐊᑭᓕᒐᕐᓂᕐᓂᖅᓴᓂᒃ, ᐃᒡᓗᓕᕆᓂᖅ, ᐃᓱᒪᒃᑯᑦ ᐋᓐᓂᐊᕐᑐᓕᕆᓂᖅ ᐊᒻᒪᓗ ᓴᓇᕝᕕᒃᓴᓕᐅᕐᓂᖅ.
“ᖃᓄᕐᓕ ᒐᕙᒪᐅᓗᑕ ᐊᒻᒪᓗ ᐃᒻᒥᒃᑰᖓᔪᑦ ᐱᓕᕆᐊᖃᖅᑐᑦ ᐊᒻᒪᓗ ᓄᓇᕗᑦ ᒐᕙᒪᖓ ᐱᓕᕆᖃᑎᒌᒍᓐᓇᖅᐸᑦ ᐆᒥᖓ ᐊᖏᔪᒻᒪᕆᐊᓗᖕᒥᓐ ᐃᒡᓗᑖᕆᐊᖃᕐᓂᖅ ᐅᑭᐅᕐᑕᖅᑐᓕᒫᒥ?”
ᐃᒡᓗᓕᕆᓂᕐᒧᑦ ᐊᒡᓘᒃᑲᐅᑉ ᓂᕈᐊᒐᒃᓴᐅᒍᑎᖓᓄᑦ ᓯᕗᓪᓕᐅᑎᒋᔭᖓ ᐃᒪᐃᓕᖓᔪᖅ ᐋᕿᒃᓱᐃᓇᔭᕐᓂᖓᓂᒃ ᖃᓄᐃᓕᐅᕈᑎᒃᓴᐅᓇᔭᖅᑐᓂᒃ ᐃᓚᖃᕐᓗᓂ ᐃᒡᓗᒃᓴᓂᒃ ᐃᑲᔪᖅᑕᐅᒋᐊᖃᕐᓂᕐᒧᑦ, ᐃᓐᓇᑐᖃᐃᑦ ᐃᒡᓗᒃᓴᖏᓐᓂᒃ ᐊᒻᒪᓗ ᐊᔪᕈᑎᖃᖅᑐᓄᑦ ᐃᒡᓗᒃᓴᓂᒃ.
ᒐᕙᒪᑐᖃᒃᑯᑦ ᐊᒻᒪ ᑎᐅᕆᑑᕇᑦ ᒐᕙᒪᖏᑦ ᐊᒻᒪ ᐃᓱᒪᒋᔭᖃᕆᐊᖃᕐᒥᔪᑦ ᓴᖅᑭᑦᑎᕚᓪᓕᕈᑎᓂᒃ ᓇᖕᒥᓂᖅ ᐃᒡᓗᖃᓕᕈᓐᓇᕐᓂᕐᒥᒃ, ᐅᑲᖅᑐᖅ.
ᐊᒡᓘᒃᑲᖅ ᐅᖃᓚᐅᕐᒥᔪᖅ ᐅᑭᐅᕐᑕᖅᑐᕐᒥ ᐱᓕᕆᕝᕕᒃᓴᒃᓴᓂᒃ ᓴᓇᕝᕕᐅᓇᔭᖅᑐᓂᒃ ᐊᒻᒪᓗ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒥᑦ ᐃᓕᓐᓂᐊᖅᑎᑦᑎᓂᕐᒥᒃ ᓄᓇᕗᒻᒥᐅᓄᑦ.
“ᓄᓇᕗᑦ ᐊᖏᔪᐊᓘᖕᒪᑦ ᓯᒡᔭᖃᑦᑎᐊᖅᖢᓂ ᑲᓇᑕᒥ ᐊᒻᒪᓗ ᓱᓕ ᕿᒪᒃᑕᐅᓯᒪᕗᒍᑦ ᐊᑐᕆᐊᓕᖕᓂᒃ ᑕᕆᐅᕐᒥᐅᑕᓄᑦ ᐱᓕᕆᔾᔪᑎᒃᓴᓂᒃ ᓄᓇᑦᑎᓐᓂᒃ, ᑕᐃᒪᓕ ᐃᓱᒪᒋᔭᕆᐊᖃᕋᑦᑎᒍᑦ ᐊᖏᔪᐊᓗᐃᑦ ᖃᓄᐃᓕᐅᕈᑎᒃᓴᑦ ᑕᐃᒪᐃᑦᑐᑎᑐᑦ ᐅᑭᐅᕐᑕᖅᑐᕐᒥᑦ,” ᐅᖃᖅᑐᖅ.
“ᐱᓕᕆᐊᕆᔭᕆᐊᖃᕋᑦᑎᒍᑦ ᐃᒡᓗᖃᕆᐊᖃᕐᓂᖅ, ᐊᔪᕈᓐᓃᕐᓴᖅᑎᑦᑎᓂᖅ ᓄᓇᕗᒻᒥᐅᓂᒃ ᐃᓱᒪᓕᕆᓂᒃᑯᑦ ᐋᓐᓂᐊᖃᖅᑕᐃᓕᓂᕐᒥᒃ ᐱᔨᑦᑎᕋᐅᑎᓂᒃ ᓄᓇᓕᕗᑦ ᐃᑲᔪᕈᓐᓇᕐᓂᐊᕋᑦᑎᒍᑦ.”
ᐊᐱᕆᔭᐅᒐᒥ ᐊᓱᙳᐃᑎᑦᑎᓇᔭᕋᐊᒃᓴᖓᓂᒃ ᒐᕙᒪᑐᖃᒃᑯᑦ ᐅᑭᐅᕐᑕᖅᑐᕐᒥᑦ ᓂᕿᑦᑎᐊᕙᓕᕆᓂᕐᒧᑦ ᐱᓕᕆᐊᒥᒃ, ᐊᒡᓘᒃᑲᖅ ᐅᖃᓚᐅᕐᑐᖅ ᐳᔪᕐᒧᑦ ᑖᒃᓰᔭᕈᑎ ᓂᕿᓂᒃ ᐊᑭᑦᑐᖅᐹᓪᓕᖅᑎᑦᑎᓯᒪᓂᖓᓂᒃ ᒪᐅᓇ ᖃᖓᑦᑕᐅᑎᖏᑦ ᐊᑭᑦᑐᕆᐊᖅᑕᐅᓂᖏᑦᑎᒍᑦ.
ᐊᐱᕆᔭᐅᑎᓪᓗᒍ ᐃᓱᒪᔭᕆᐊᒃᓴᖓᓂᒃ ᑖᓐᓇ ᐱᓕᕆᓂᐅᔪᖅ ᐊᑐᕆᐊᒃᓴᖓᓂᒃ, ᐊᒻᒪ ᑕᐃᒪᐃᙱᒃᑯᓂᑦ, ᖃᓄᐃᓕᐅᕋᔭᕆᐊᒃᓴᖓᓂᒃ ᑖᔅᓱᒪ ᐳᔪᕐᒧᑦ ᑖᒃᓰᔭᕈᑎᐅᑉ ᐊᓯᐊᒍᑦ, ᐅᖃᓚᐅᕐᑐᕐᓕ ᐅᖃᖃᑎᖃᕋᔭᕐᓂᖓᓂᒃ ᓂᕿᑎᑦᐊᕙᓕᕆᔨᒃᑯᑦ ᐅᑭᐅᕐᑕᖅᑐᕐᒥᑦ ᑲᑎᒪᔨᖏᓐᓄᑦ. ᐅᖃᖅᖢᓂ ᑲᓲᕕᑎᕝᑯᑦ ᒐᕙᒪᙳᕈᑎᒃ, ᑖᒃᑯᐊ ᑲᑎᒪᔩᑦ ᐱᑕᖃᐃᓐᓇᕋᔭᕐᓂᕋᖅᖢᓂᒋᑦ.
“ᐱᒻᒪᕆᐊᓘᖕᒪᑦ ᐱᑕᖃᕐᓗᓂ ᐃᓄᖕᓂ ᐅᑭᐅᕐᑕᖅᑐᕐᒥᐅᑕᒥ ᐅᖃᐅᔾᔨᔪᓐᓇᖅᑐᒥ ᒐᕙᒪᒃᑯᓐᓂᒃ ᖃᓄᖅ ᐱᐅᓯᕚᓪᓕᖅᑎᑦᑎᒍᓐᓇᕆᐊᒃᓴᖅ ᐱᓕᕆᐊᒃᓴᒥᑦ. ᐅᓇ ᐱᐅᓪᓚᕆᐊᓗᙱᑦᑐᖅ ᐱᓕᕆᐊᒃᓴᖅ. ᑭᓱᓕᒫᑦ ᐱᐅᓪᓚᕆᐊᓗᙱᒻᒪᑕ ᓄᓇᕐᔪᐊᒥ. ᑭᓯᐊᓂᓕ ᐃᑲᔫᑎᑕᖃᕆᐊᖃᕐᒪᑦ ᐅᑭᐅᕐᑕᖅᑐᕐᒧᑦ ᓂᕿᓄᑦ.”
ᐊᒡᓘᒃᑲᖅ ᓇᓗᓇᐃᓪᓚᕆᒍᒪᓚᐅᙱᑦᑐᖅ ᖃᓄᖅ ᐅᖃᐅᔨᖃᓕᕋᔭᕆᐊᒃᓴᖅ ᐅᑭᐅᕐᑕᖅᑐᕐᒥᑦ ᓂᕿᑦᑎᐊᕙᓕᕆᓂᖅ, ᑭᓯᐊᓂᓕ ᐅᖃᖅᖢᓂ ᐃᑲᔫᑎᒃᓴᖅᑕᖃᕆᐊᖃᕐᓂᖓᓂᒃ ᓂᕿᓄᑦ ᐊᒻᒪᓗ “ᐲᖅᑕᐅᑎᓐᓂᖓ” ᐃᑲᔪᕋᔭᙱᖢᓂ.
ᖃᖓᑦᑎᐊᓵᕐᓕ, ᖃᐅᔨᓴᕈᑎᕕᓂᐅᔪᑦ ᓴᖅᑭᑕᐅᓂᑯᑦ ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑲᑐᔾᔨᖃᑎᒌᑦ ᐅᖃᓕᒫᒐᓕᐊᕆᕙᒃᑕᖏᓐᓂᒃ ᖃᐅᔨᓚᐅᕐᓂᕋᖅᖢᑎᒃ ᓂᕿ ᐊᔪᕐᓇᕐᓂᕐᓴᐅᓗᐊᓕᕐᓂᖓᓂᒃ ᓄᓇᕗᒥᑦ ᐅᕘᓇ ᐅᑭᐅᕐᑕᖅᑐᕐᒥᑦ ᓂᕿᑦᑎᐊᕙᓕᕆᓂᒃᑯᑦ, ᐅᑯᑎᒎᓇᖅ ᓇᓗᓇᐃᔭᖅᑕᐅᓯᒪᔪᓂᒃ ᑲᓇᑕᒥᑦ ᓄᓇᓕᖕᓂ ᐋᓐᓂᐊᖃᖅᑕᐃᓕᓂᕐᒧᑦ ᖃᐅᔨᓴᕈᑎᓂᒃ.
ᐊᒡᓘᒃᑲᖅ ᐅᖃᓚᐅᕐᑐᖅ ᐱᓕᕆᐊᕆᓯᒪᓂᑯᖓ ᒥᓂᔅᑕᐅᓪᓗᓂ ᐊᕙᑎᓕᕆᓂᕐᒧᑦ ᐃᑲᔪᕈᑎᒋᓇᔭᕐᓂᕋᖅᖢᓂᐅᒃ ᓯᓚᐅᑉ ᐊᓯᙳᖅᐸᓪᓕᐊᓂᖓᒍᑦ ᐊᒻᒪᓗ ᐳᔪᐃᑦ ᓯᓚᐃᓐᓇᕐᒧᐊᖅᐸᓪᓕᐊᔪᑦ ᒥᒃᖠᕚᓪᓕᖅᑎᑕᐅᓂᖓᓂᒃ, ᑭᓯᐊᓂᓕ ᐅᖃᒻᒪᕆᓚᐅᙱᑦᑐᖅ ᖃᓄᖅ ᐱᓕᕆᐊᖃᕐᓂᐊᕐᒪᖔᑦ.
ᐅᖃᓚᐅᕐᑐ ᐃᑲᔪᕐᑐᐃᓂᐊᕐᓂᕋᖅᖢᓂ ᑭᕙᓪᓕᕐᒥ ᐊᑦᑕᑕᕈᓐᓇᐅᑎᓕᕆᓂᖅ (hydro-fibre link) ᐊᒻᒪᓗ ᒍᕇᔅ ᐸᐃ ᐊᖅᑯᑎᖓᓂᒃ ᐊᒻᒪᓗ ᕿᑎᕐᒥᐅᑦ ᑐᓚᒃᑕᖅᕕᒋᓇᔭᖅᑕᖓᓂᒃ ᐅᒥᐊᕐᔪᐊᓄᑦ.
“ᐅᕐᓱᐊᓗᖕᒥᑦ ᐊᑐᕆᐊᖃᕈᓐᓃᕈᓐᓇᕐᓵᓕᓂᐊᖅᑰᖅᐱᑖ ᖃᓂᑦᑐᒃᑯ? ᐋᒃᑲ,” ᐅᖃᖅᑐᖅ.
ᐅᑯᐊ ᑲᓐᓲᕕᑎᕝᑯᑦ ᐊᖓᔪᖅᑳᖓᑦ ᐋᓐᑐᕉ ᓯᐅ ᐃᖃᓗᖕᓄᐊᖅᑎᓪᓗᒍ ᔫᓂᐅᓚᐅᕐᓯᒪᔪᒥᑦ, ᐅᖃᓚᐅᕐᓯᒪᔪᖅ ᓄᓇᕗᑦ ᐋᕿᒃᓱᐃᔭᕆᐊᖃᕐᓂᖓᓂᒃ ᐊᑐᒃᑲᓐᓂᕈᓐᓇᖅᑐᓕᕆᓂᖅᒥᒃ, ᐅᖃᖅᖢᓂ “ᐊᔪᕐᓇᕆᔭᐅᒻᒪᕆᒃᑐᕐᓕ” ᐅᑯᑎᒎᓇᖅ ᒫᓐᓇ ᓕᐳᕈ ᒐᕙᒪᐅᔪᑎᒍᑦ.
ᐊᒡᓘᒃᑲ ᐅᖃᓚᐅᕐᒪᑦ ᐅᒃᐱᕈᓱᖕᓂᕋᖅᖢᓂ ᐊᑐᐊᒐᐃᑦ ᐋᕿᒃᑕᐅᓯᒫᓂᓕᖅᑐᑦ ᐃᓄᖕᓂ ᐅᖃᖃᑎᕋᕈᓐᓇᕐᓂᕐᒥ ᐊᑐᒃᑲᓐᓂᕈᓐᓇᖅᑐᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒥᑦ ᐊᒻᒪᓗ ᒫᓐᓇ ᐋᕿᒃᑕᐅᓂᐊᕆᐊᒃᓴᖅ ᓇᓗᓇᖅᖢᓂ.
“ᓄᓇᕗᑦᒥ ᓄᓇᑖᕐᓂᕐᒧᑦ ᐊᖏᕈᑎᑦ ᑐᑭᓯᒋᐊᖅᑎᑦᑎᓯᒪᖕᒪᑕ ᖃᓄᖅ ᓇᖕᒥᓂᕆᔭᐅᔪᑦ ᐱᓕᕆᐊᖑᔭᕆᐊᖃᕐᓂᖏᓐᓂᒃ ᐅᑭᐅᕐᑕᖅᑐᕐᒥᓐ.. ᓄᓇᑖᕐᓂᕐᒧᑦ ᐊᖏᕈᑎᑦ, ᐃᓱᒪᒋᔭᒃᑯᓪᓕ, ᐱᒻᒪᕆᐅᓛᙳᖕᒪᑦ ᐊᕙᑎᓕᕆᓂᕐᒥᑦ ᐸᕐᓇᐅᑎᓂᒃ. ᓴᐳᔾᔨᓯᒪᖕᒪᑦ ᓄᓇᑦᑎᓐᓂᒃ, ᓴᐳᔾᔨᓯᒪᓪᓗᓂ ᐃᒪᑦᑎᓐᓂᒃ, ᓴᐳᔾᔨᓯᒪᓪᓗᓂ ᓂᕐᔪᑎᑦᑎᓐᓂᒃ.
“ᐋᕿᒃᑕᐅᓯᒫᓂᓕᕐᒪᑦ ᐱᔭᕆᐊᓕᖕᓂᑦ ᖃᓄᖅ ᐱᓕᕆᐊᒃᓴᐃᑦ ᐱᓕᕆᐊᖑᔭᕆᐊᖃᕐᓂᖏᓐᓂᒃ. ᐊᒻᒪᓕ ᒪᓕᒐᓕᕆᓂᒃᑯᑦ ᐱᒻᒪᕆᐅᓕᖅᑎᓯᒪᓪᓗᓂ ᐊᒻᒪ ᐱᒃᑯᒋᔭᕆᐊᖃᒻᒪᕆᒃᖢᑎᒍᑦ. ᐊᒻᒪᓗ ᐃᓱᒪᓕᐊᕆᔭᐅᔪᑦ ᐅᑭᐅᕐᑕᖅᑑᑉ ᒥᒃᓵᓄᑦ ᐃᓄᖕᓂᙶᕆᐊᖃᕐᒪᑦ ᐅᑭᐅᕐᑕᖅᑐᕐᒥᐅᓂᒃ, ᐋᑐᕚᒥᐅᙱᑦᑐᖅ.”
ᐊᒡᓘᒃᑲᖅ ᐊᖓᔪᖅᑳᖃᕐᕕᒃ ᕿᒪᓚᐅᖅᑕᖓ ᒥᑦᑎᒪᑕᓕᓕᐊᖅᖢᓂ ᐊᒻᒪ ᐃᒃᐱᐊᕐᔪᒃᒧᑦ ᓯᑎᐱᕆ 19-ᖑᑎᓪᓗᒍ, ᑎᑎᕋᕐᕕᖓ ᐅᖃᓚᐅᕐᑐᑦ. ᐸᕐᓇᒃᓯᒪᖕᒥᔪᖅ ᐸᖕᓂᖅᑑᒧᑦ,, ᕿᑭᖅᑕᖅᔪᐊᖅᒧᑦ ᐊᒻᒪ ᑭᖑᖅᑐᒑᐱᒃᒧᑦ ᐊᖅᑯᓵᕈᒪᓪᓗᓂ ᑭᕙᓪᓕᕐᒧᑦ ᐊᒻᒪ ᕿᑎᕐᒥᐅᓄᑦ ᐅᐸᓚᐅᙱᓐᓂᕐᒥᓂᒃ.
(0) Comments