ᓄᓇᕗᒻᒥᐅᑕᑦ ᓂᕆᐅᖁᔭᐅᔪᑦ ᐋᓐᓂᐊᕖᑦ ᒪᑐᓯᒪᓂᐊᕆᐊᒃᓴᖏᓐᓂᒃ, ᐱᔨᑦᑎᕋᐅᑎᓂᒃ ᐱᓕᕆᐊᖃᙱᓐᓂᕐᓴᐅᓗᑎᒃ ᐊᐅᔭᖅ

For English version, see Nunavummiut told to expect health centre closures, service cuts this summer

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᑦ ᓄᓇᓕᖏᓐᓂᒃ ᐅᓄᒻᒪᕆᒃᑐᓂᒃ ᒪᑐᓯᒪᔾᔪᔾᔨᓂᐊᕐᑐᑦ ᐅᕝᕙᓘᓐᓃᑦ ᐱᔨᑦᑎᕋᐅᑎᒋᔭᐅᔪᑦ ᐅᓄᕈᓐᓃᖅᐹᓪᓕᖅᑎᑕᐅᓗᑎᒃ ᐊᐅᔭᖅ.

ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ “ᐊᔪᕐᓴᑲᑕᒃᑐᑦ” ᐊᐅᔭᖅ ᐃᖅᑲᓇᐃᔭᖅᑎᒋᔭᐅᓂᐊᕐᑐᓂᒃ, ᑐᓴᒐᒃᓴᕆᔭᐅᔪᑦ ᐅᖃᕐᓯᒪᓚᐅᕐᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ, ᐅᖃᐅᓯᖃᖅᖢᑎᒃ ᐊᒥᒐᖅᓯᑲᑕᖕᓂᖏᓐᓂᒃ ᐋᓐᓂᐊᓯᐅᖅᑎᐅᓇᔭᖅᑐᓂᒃ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐅᖃᓪᓚᒃᑎ ᑯᕆᔅ ᐸᒡᓕᐊ ᐅᖃᓚᐅᙱᑦᑐᖅ ᓇᓕᐊᒃ ᐋᓐᓂᐊᕖᑦ ᐊᒃᑐᖅᑕᐅᓇᔭᕐᒪᖔᑕ, ᐅᕝᕙᓘᓐᓃᑦ ᐅᖃᙱᖢᓂ ᑕᒪᓐᓇ ᖃᑯᒍ ᐊᑐᕋᔭᕐᒪᖔᑦ, ᐅᖃᖅᖢᓂ ᑕᒪᓐᓇ “ᐊᐅᓚᔪᒦᓐᓂᖓᓂᒃ.”

“ᐃᖅᑲᓇᐃᔭᖅᑖᕈᓐᓇᕐᓂᕐᒧᑦ ᐅᓇ ᒪᓕᒐᔭᕐᑐᖅ,” ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᑕᖏᓐᓂᒃ.

ᐅᓇ ᑐᓴᒐᒃᓴᓕᐊᕆᔭᐅᔪᖅ ᐅᖃᕐᓯᒪᓚᐅᕐᑐᖅ ᓄᓇᓖᑦ ᖃᐅᔨᑎᑕᐅᓇᔭᕐᓂᖏᓐᓂᒃ ᐋᓐᓂᐊᕕᖏᑦ ᒪᑐᓂᐊᕐᒪᖔᑕ ᓈᓛᐅᑎᒃᑯᑦ ᐅᕝᕙᓘᓐᓃᑦ ᑐᓴᒐᒃᓴᓕᕆᓂᒃᑯᑦ ᐱᓇᓱᐊᕈᓰᒃ ᒪᕐᕉᒃ ᑐᒑᒍᑦ ᑕᐃᒪᐃᓐᓂᐊᓕᕐᓂᖅᐸᑕ.

ᖃᕋᓴᐅᔭᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᐅᑎᑕᖃᕐᓂᐊᕐᑐᖅ ᐊᒻᒪᓗ ᖃᖓᑕᓲᒃᑯᑦ ᑎᑭᑦᑕᖅᑐᓂᒃ ᓄᓇᓕᖕᓂ ᐋᓐᓂᐊᕕᖏᑦ ᒪᑐᔭᐅᓯᒪᔪᓄᑦ ᐱᔨᑦᑎᕋᐅᑎᖏᓪᓘᓐᓃᑦ ᐅᓄᕈᓐᓃᖅᐹᓪᓕᖅᑎᑕᐅᔪᓄᑦ.

“ᐅᖄᓚᕝᕕᐅᔪᓐᓇᐃᓐᓇᕐᓂᐊᖅᑐᑦ ᐋᓐᓂᐊᕖᑦ ᐊᒻᒪᓗ ᖃᕋᓴᐅᔭᒃᑯᑦ ᐃᑲᔪᖅᑕᐅᔪᓐᓇᕐᓗᑎᒃ,” ᑐᓴᒐᒃᓴᐃᑦ ᐅᖃᕐᓯᒪᔪᑦ.

“ᐃᓚᖏᑦ ᐅᖄᓚᐅᑎᒋᔭᐅᔪᑦ ᐊᓯᐊᓄᑦ ᓄᓇᓕᖕᓄᑦ ᑐᕌᖓᑎᑕᐅᓇᔭᕐᑐᑦ. ᐊᒻᒪᓗ ᑭᖑᕙᓯᖕᓇᕋᔭᖅᖢᑎᒃ ᑕᐃᒪᓐᓇᐅᑎᓪᓗᒋᑦ ᑭᓯᐊᓂᓕ ᐅᖄᓚᔪᑦ ᐃᓕᓯᑐᐃᓐᓇᖃᑦᑕᖁᔭᐅᔾᔮᙱᑦᑐᑦ.”

ᐃᓄᐃᑦ ᐃᓅᓕᓴᐅᑎᖃᐃᓐᓇᕆᐊᓖᑦ ᐄᔭᒐᖏᓐᓂᒃ ᐱᓕᕆᐊᕆᔭᐅᑎᑦᑎᔭᕆᐊᓖᑦ ᒪᑐᔭᐅᓚᐅᖅᑎᓐᓇᒋᑦ, ᑐᓴᒐᒃᓴᖅ ᐅᖃᕐᓯᒪᖕᒥᔪᖅ.

ᐊᐅᔭᐅᓚᐅᕐᓯᒪᔪᖅ ᒪᕐᕉᒃ ᐋᓐᓂᐊᕖᒃ ᒪᑐᓯᒪᓚᐅᕐᓯᒪᖕᒪᑕ ᐊᒻᒪᓗ 6 ᐋᓐᓂᐊᕖᑦ ᐃᑲᕋᖏᑦ ᒪᑐᐃᕐᓯᒪᓂᖏᓐᓄᑦ ᐅᓄᕈᓐᓃᖅᐹᓪᓕᖅᑕᐅᓯᒪᓪᓗᑎᒃ ᐋᓐᓂᐊᓯᐅᖅᑎᑕᖃᙱᓗᐊᕐᓂᕐᒧᑦ.