ᓄᓇᕗᒻᒥᑦ ᑲᓛᖡᑦ ᓄᓈᓐᓄᑦ: ᓴᐳᑎᓚᕗᑦ ᓄᓇᒋᔭᕗᑦ

ᐋᐱᒐᐃᔪᓪ ᐊᓕᐊᓇᖅ

For the English version of this article, please see From Nunavut to Greenland; protecting our homeland.

ᑲᓛᖡᑦ ᓄᓈᑦ ᐃᓱᒪᒋᑲᑕᒃᑲᒃᑯ. ᐱᖃᓐᓇᕆᔭᖃᐅᕋᒪ ᑲᓛᖡᑦ ᓄᓈᓂᑦ ᐃᓅᓪᓗᖓ ᓄᓇᕗᒻᒥ, ᑕᒪᓐᓇ ᐅᕙᓐᓄᑦ ᐊᒃᑑᑎᓯᒪᕗᖅ.  ᓂᐅᕕᐊᒃᓴᐅᖏᑦᑐᖅ ᑲᓛᖡᑦ ᓄᓈᑦ. ᑐᓴᑲᑕᒃᑲᒪ ᐱᕙᓪᓕᐊᔪᒃᑯᑦ, ᑲᓛᖡᑦ ᓄᓈᑦ ᐊᒥᐊᓕᑲᐅᑉ ᓂᐅᕕᕋᓱᒃᑕᖓ, ᐊᒃᓱᐊᓗᒃ ᑕᒪᓐᓇ ᓈᒻᒪᒋᖖᒋᑕᕋ. ᓄᓇᖓ ᑖᓄᑦ ᑐᕋᒻᑉ (Trump) ᓂᐅᕕᕆᐊᖃᖖᒋᑕᖓ ᐊᒻᒪᓗ ᐱᑐᐃᓐᓇᕆᐊᖃᖖᒋᑕᖓ ᑎᓐ ᒫᒃᑭᒥᑦ! ᐃᓄᖕᓄᑦ ᓄᓇᒋᔭᐅᖕᒪᑦ! ᐊᕐᕌᒍᒐᓴᖕᓄᑦ ᑲᓛᖡᑦ ᓄᓇᖃᖅᓯᒪᖕᒪᑕ ᑕᐅᕙᓂ. ᐃᓕᖅᑯᓯᑐᖃᖃᐅᖅᖢᓂ, ᐅᓂᒃᑳᖅᑐᐊᖃᐅᖅᖢᓂ, ᐱᖅᑯᓯᖃᐅᖅᖢᓂᓗ. ᐃᓅᓂᑦᑕ ᐃᓚᒋᖕᒪᒍ ᑖᓐᓇ.

ᖁᕕᐊᒋᙱᑕᕋ ᓴᙱᔪᐊᓗᐃᑦ ᓲᕐᓗ ᐊᒥᐊᓕᑲᒥᐅᑦ, ᐃᓱᒪᓕᐅᕆᑐᐃᓐᓇᕈᓐᓇᕋᓱᒋᔪᕈᓗᐃᑦ ᓄᓇᒋᙱᑕᒥᓂᒃ.  ᓄᓇᖃᖅᑳᖅᓯᒪᖏᑦᑐᑦ ᐃᓱᒪᓕᐅᕆᑐᐃᓐᓇᕆᐊᖃᖏᒃᑲᓗᐊᕐᒪᑕ ᐃᓄᐃᑦ ᓄᓇᖓᓄᑦ ᓲᕐᓗ ᑲᓛᖡᑦ ᓄᓈᓄᑦ ᐅᕝᕙᓘᓐᓃᑦ ᓄᓇᕗᒻᒧᑦ. ᐅᕙᒎᓪᓗᑕ ᓴᐳᔾᔨᔭᕆᐊᖃᖅᐳᒍ ᐃᓱᒪᓕᐅᕆᓗᑕᓗ ᑲᓛᖡᑦ ᓄᓈᓐᓄᑦ. ᑲᓛᖠᒥᐅᑦ ᓇᖏᖃᑎᒋᕙᒃᑲ ᐊᔾᔨᒌᒥᒃ ᑐᙵᕕᖃᕋᑦᑕ, ᐃᓕᖅᑯᓯᑐᖃᖃᖅᖢᑕ, ᐊᔾᔨᖃᖏᖦᖢᓂᓗ ᓄᓇᕗᑦ, ᓄᓇᖅᑲᑎᒌᖏᒃᑲᓗᐊᖅᖢᑕ ᐃᓅᓂᖅᐳᑦ ᐊᔾᔨᒌᒃᐳᖅ. ᐃᖃᔪᖅᑎᒌᒋᐊᖃᖅᖢᑕᓗ.

ᓄᓇᕗᑦ ᓄᓇᕗᑐᐃᓐᓇᐅᖏᒻᒪᑦ. ᑭᓇᐅᓂᕆᒐᑦᑎᒍ ᐅᕙᒎᓪᓗᑕ, ᐱᖅᑯᓯᑐᖃᕗᑦ ᐊᒻᒪᓗ ᓯᕗᓂᒃᓴᕗᑦ. ᐃᓄᐃᑦ ᑐᑭᓯᖁᕙᒃᑲ ᑲᓛᖡᑦ ᓄᓇᖓ ᑕᐅᖅᓰᔾᔪᑕᐅᑐᐃᓐᓇᕆᐊᖃᖏᑦᑐᖅ ᐅᕝᕙᓘᓐᓃᑦ ᓂᐅᕕᐊᒃᓴᐅᑐᐃᓐᓇᕆᐊᖃᖏᑦᑐᖅ. ᐃᓄᐃᑦ ᓂᐱᖏᑦ ᑐᓴᖅᑕᐅᔭᕆᐊᓖᑦ ᐃᒃᐱᒋᔭᐅᑦᑎᐊᕐᓗᑎᒡᓗ. ᐃᓅᓪᓗᖓ ᓄᓇᕗᒻᒥ, ᐃᒻᒥᓂᒃ ᐱᒃᑯᒋᕗᖓ ᓇᖏᖃᑎᒋᒐᒃᑭᑦ ᑲᓛᖡᒥᐅᑦ ᐊᒻᒪᓗ ᐱᖃᓐᓇᕆᔭᒃᑲ ᑕᐅᕙᓂ. ᐃᓕᖅᑯᓯᑐᖃᖅᐳᑦ ᐱᖅᑯᓯᕗᑦ ᓄᓇᕗᓪᓗ ᐱᒻᒪᕆᐅᓗᐊᖅᑐᑦ ᑕᐃᒪᓐᓇᕈᓗᒃ ᐱᔭᐅᑐᐃᓐᓇᕆᐊᒃᓴᖅ ᑖᓄᑦ ᑐᕋᒻᑉᒧᑦ ᓂᐅᕕᖅᑕᐅᓗᓂ. ᑲᓛᖡᑦ ᓄᓈᑦ ᓂᐅᕕᐊᒃᓴᐅᖏᑦᑐᖅ, ᓂᐅᕕᐊᒃᓴᐅᓚᐅᖅᓯᒪᔾᔮᖏᑦᑎᐊᒻᒪᕆᒃᖢᓂᓗ!

ᓄᓇᑦᓯᐊᕐᒥᑦ ᐱᕙᓪᓕᐊᔪᓕᕆᔩᑦ ᓄᓇᕗᒻᒥ ᓯᓚᑦᑐᖅᓴᕐᕕᒃᑯᓪᓗ ᐱᓕᕆᖃᑎᒌᖕᒪᑕ ᐅᖃᓕᒫᖅᑕᐅᔪᒃᓴᓂᒃ ᐅᖃᓕᒫᖅᐸᒃᑐᓄᑦ ᖃᓄᖅ ᐃᓱᒪᒋᔭᖃᕐᒪᖔᑕ ᐃᓕᓐᓂᐊᖅᑏᑦ ᑎᑎᕋᖅᐸᒃᑕᖏᑕ ᒥᒃᓵᓄᑦ ᑕᕝᕙᓂ ᐃᓕᓐᓂᐊᖅᑎᓪᓗᒋᑦ ᑐᓵᔨᐅᓂᕐᒧᑦ ᑐᑭᓕᐅᕆᓂᕐᒧᓪᓗ.