ᓄᓇᕗᒻᒥ ᒐᕙᒪᒃᑯᑦ ᐃᓐᓇᐅᓗᐊᓕᕐᓂᖏᓐᓄᑦ ᓄᖅᑲᖅᑕᐅᓕᒪᕙᒃᐳᑦ ᐊᖏᕐᕋᖃᕈᓐᓃᖅᑕᐃᓕᒪᓂᕐᒧᑦ: ᒪᓕᒐᓕᐅᖅᑎ

For English version, see GN workers resist retirement to avoid homelessness, MLA claims

ᓄᓇᕗᒻᒥ ᒪᓕᒐᓕᐅᖅᑎ ᐅᖃᖅᐳᖅ ᐱᔾᔪᑎᖃᕐᓂᖓᓂ ᐱᑕᖃᙱᓗᐊᕐᓂᖓᓂ ᐃᓄᓕᒫᓄᑦ ᐃᒡᓗᒃᓴᐅᔪᓂ, ᓄᓇᕗᒻᒥ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᐅᔪᑦ ᐃᖅᑲᓇᐃᔭᖅᑎᐅᔪᓄᑦ ᐃᒡᓗᖁᑎᖏᓐᓂ ᐃᓐᓇᐅᓗᐊᓕᕐᓂᖏᓐᓄᑦ ᓄᖅᑲᕈᒪᙱᓚᑦ ᐃᒻᒥᓂᒃ ᐊᒻᒪ ᐃᓚᖏᑦ ᓵᙵᓇᔭᕐᒪᑕ ᐊᖏᕐᕋᖃᙱᓐᓂᐅᔪᒥ.

ᓇᑦᓯᓕᖕᒥ ᒪᓕᒐᓕᐅᖅᑎ ᔫᓯᐱ ᐃᓇᒐᔪᒃ ᖁᖅᑭᐊᖅ ᐊᐱᕆᓚᐅᖅᐳᖅ ᒪᓕᒐᓕᐅᕐᕕᖕᒥ ᒪᐃ 25−ᒥ ᒐᕙᒪᒃᑯᑦ ᖃᓄᐃᓕᐅᕈᓐᓇᕐᓂᖏᓐᓂ ᓇᓗᓇᐃᖅᓯᓂᕐᒥ ᐃᓐᓇᐅᓗᐊᓕᕐᓂᖏᓐᓄᑦ ᓄᖅᑲᖅᐸᓪᓕᐊᔪᓂ ᓄᓇᕗᒻᒥ ᒐᕙᒪᒃᑯᓐᓂ ᐃᖅᑲᓇᐃᔭᖅᑎᐅᔪᓂ ᐊᖏᕐᕋᖃᕈᓐᓇᕐᓂᖏᓐᓂ ᐱᐊᓂᒃᑎᓪᓗᒋᑦ ᐃᖅᑲᓇᐃᔭᕐᓂᕐᒥ ᐃᓄᓕᒫᓄᑦ ᐱᔨᑦᑎᕋᕐᓂᐅᔪᒥ.

ᖃᔅᓯᒐᓚᖕᓂ ᖃᓄᐃᓐᓂᖃᖅᐳᖅ ᐃᓐᓇᐅᓗᐊᓕᕐᓂᖏᓐᓄᑦ ᓄᖅᑲᖅᐸᓪᓕᐊᔪᓂ-ᐅᑭᐅᓕᖕᓂ ᐃᖅᑲᓇᐃᔭᖅᑎᐅᔪᓂ ᐃᓐᓇᐅᓗᐊᓕᕐᓂᖏᓐᓄᑦ ᓄᖅᑲᕈᒪᙱᓚᑦ ᐱᔾᔪᑎᖃᖅᑐᒥ ᐱᑕᖃᙱᓗᐊᕐᓂᖓᓂ ᐃᓄᓕᒫᓄᑦ ᐅᕝᕙᓘᓐᓃᑦ ᓂᐅᕕᐊᒃᓴᐅᔪᓂ ᐃᒡᓗᒃᓴᓂ.

“ᐊᔪᖅᓯᓯᒪᔫᔮᖅᐳᑦ ᐊᒻᒪ ᓄᖅᑲᕈᓐᓇᖅᑑᔮᙱᓚᑦ,” ᖁᖅᑭᐊᖅ ᐅᖃᓚᐅᖅᐳᖅ.

ᐊᐱᕆᓚᐅᖅᐳᖅ ᒐᕙᒪᒃᑯᓐᓂ ᐃᓱᒪᒃᓴᖅᓯᐅᕆᖁᔨᓪᓗᓂ ᓴᖑᑎᑦᑎᓂᕐᒥ ᐱᑕᖃᖅᐸᒌᖅᑐᓂ ᐃᓄᖃᙱᑦᑐᓂ ᐃᖅᑲᓇᐃᔭᖅᑎᐅᔪᓄᑦ ᐃᒡᓗᒋᔭᐅᔪᓂ ᐃᓄᓕᒫᓄᑦ ᐃᒡᓗᒃᓴᙳᕐᓗᑎᒃ, ᐅᖃᐅᓯᖃᖅᖢᓂ 15−ᓂ ᐃᒡᓗᓂ ᒫᓐᓇᓕᓴᐅᔪᒥ ᓴᒃᑯᑕᐅᓚᐅᖅᑐᓂ ᒐᕙᒪᒃᑯᓐᓂ ᐃᖃᓗᒃᑑᑦᑎᐊᕐᒧᑦ ᐃᒡᓗᓕᕆᔨᒃᑯᓐᓄᑦ ᐱᓱᖕᓂᐅᓂᖓᓂ ᓇᓚᐅᑦᑎᐊᕐᓂᐅᔪᒧᑦ ᑐᕌᖓᓂᓕᖕᒥ.

ᑭᓯᐊᓂ ᓗᐊᓐ ᑯᓱᒐᖅ, ᒥᓂᔅᑕ ᑲᒪᒋᔭᖃᖅᑐᖅ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᐅᖃᓚᐅᖅᐳᖅ ᓴᖑᑎᑦᑎᓂᕐᒥ ᐱᑕᖄᓂᒃᑐᓂ ᐃᒡᓗᓂ ᓴᖅᑭᑎᑦᑎᑐᐃᓐᓇᕋᔭᖅᐳᖅ ᐊᑲᐅᙱᓕᐅᕈᑎᒃᓴᒃᑲᓐᓂᕐᓂ.

“ᐊᑕᐅᓯᖅ ᑐᓂᔭᐅᒍᓂ ᑕᐃᒃᑯᓄᖓ ᓄᓇᓕᖕᓂ ᐃᒡᓗᓕᕆᔨᒃᑯᓐᓂ, ᑐᑭᖃᕋᔭᖅᐳᖅ ᖄᖏᖅᓯᓂᖏᓐᓂ ᐅᑕᖅᑭᔪᓂ ᐃᓚᖏᓐᓂ ᐅᑕᖅᑭᑎᑕᐅᔪᓂ−ᑎᑎᕋᖅᓯᒪᔪᓂ ᐊᕐᕌᒍᓄᑦ ᒪᕐᕉᖕᓂ ᑎᓴᒪᓄᑦ ᐊᕐᕌᒍᓄᑦ,” ᐅᖃᓚᐅᖅᐳᖅ.

ᑯᓱᒐᖅ, ᒪᓕᒐᓕᐅᖅᑎ ᑲᖏᖅᖠᓂᕐᒧᑦ ᓂᒋᕐᒥ, ᒥᓂᔅᑕᐅᕗᖅ ᑲᒪᒋᔭᖃᖅᑐᒥ ᐃᓄᓕᒫᓄᑦ ᐃᒡᓗᓕᕆᓂᕐᒥ ᓄᓇᕗᒻᒥ.

ᐅᓇ ᓄᑖᖑᓪᓗᓂ ᐊᑲᐅᙱᓕᐅᕈᑕᐅᙱᓚᖅ.

“ᖃᔅᓯᒐᓚᖕᓂ ᑲᑎᒪᔨᐅᖃᑎᓐᓂ ᓴᖅᑭᑎᑦᑎᓯᒪᕗᑦ ᐃᓱᒫᓘᑕᐅᔪᓂ” ᐅᑭᐅᒃᑯᑦ ᐃᒃᓯᕚᕐᓂᐅᔪᒥ, ᖁᖅᑭᐊᖅ ᐅᖃᓚᐅᖅᐳᖅ.

ᒐᕙᒪᒃᑯᑦ ᕿᒥᕐᕈᕗᑦ ᓂᕈᐊᒐᒃᓴᐅᔪᓂ ᑭᐅᓂᕐᒧᑦ ᖁᖅᑭᐊᑉ ᐊᒻᒪᓗ ᐊᓯᖏᓐᓂ ᒪᓕᒐᓕᐅᖅᑎᐅᔪᓂ ᐃᓱᒫᓘᑎᖏᓐᓂ, ᑯᓱᒐᖅ ᐅᖃᓚᐅᖅᐳᖅ.