ᓄᓇᕗᒻᒥ ᒐᕙᒪᒃᑯᑦ ᓄᑖᙳᖅᑎᑦᑎᔾᔮᙱᓚᖅ ᑳᓐᑐᕌᖑᔪᒥ ᑲᑎᙵᔪᓄᑦ ᐊᖏᕐᕋᒥ ᐊᐅᓚᑦᑎᔨᐅᔪᒧᑦ

For the English version of this story, please see GN won’t renew contract with Chesterfield Inlet group home operator.

ᓄᓇᕗᒻᒥ ᒐᕙᒪᒃᑯᑦ ᓄᑖᙳᕆᐊᖅᑎᑦᑎᔾᔮᙱᓚᑦ ᑳᓐᑐᕌᖓᓂ ᐊᐅᓚᑦᑎᔨᐅᔪᒧᑦ ᐃᒡᓗᓕᒑᕐᔪᖕᒥ ᑲᑎᙵᔪᓄᑦ ᐊᖏᕐᕋᐅᔪᒥ ᑐᖁᔪᖃᓚᐅᖅᑎᓪᓗᒍ ᒪᕐᕉᖕᓂ ᒪᒃᑯᒃᑐᓂ ᐃᓄᖕᓂ ᓱᓕ ᖃᐅᔨᓴᖅᑕᐅᔪᒥ, ᐅᖃᖅᐳᖅ ᐃᓄᓕᕆᔨᒃᑯᓐᓂ ᒥᓂᔅᑕᖓ ᒫᒡᒍᓕ ᓇᑲᓱᒃ.

ᐊᖏᖃᑎᒌᙱᓐᓂᐅᔪᒥ ᐆᒧᖓ ᓇᔭ ᐃᓴᐱᐅᓪ ᐊᖏᕐᕋᐅᔪᒥ ᓴᖅᑭᒃᑲᓐᓂᓚᐅᖅᐳᖅ ᒪᓕᒐᓕᐅᕐᕕᖕᒥ ᕕᕗᐊᕆ 23−ᒥ ᑲᖏᖅᖠᓂᖅ ᐅᐊᖕᓇᒥ-ᐃᒡᓗᓕᒑᕐᔪᖕᒥ ᒪᓕᒐᓕᐅᖅᑎ ᐋᓕᒃᓵᓐᑐᕐ ᓴᒻᒧᖅᑐᖅ ᐊᐱᖅᓱᓚᐅᖅᑎᓪᓗᒍ ᓇᑲᓱᖕᒥ ᒪᕐᕈᖓᓂ ᐅᓪᓗᖓᓂ ᐊᑲᐅᙱᓕᐅᕈᑕᐅᔪᒧᑦ.

ᐊᐅᓚᑕᐅᓪᓗᓂ ᐱᒪᒃᓯᓕᕐᕕᒃ ᑎᒥᖁᑕᐅᔪᓂ, ᓇᔭ ᐃᓴᐱᐅᓪ ᐊᖏᕐᕋᐅᔪᖅ ᑐᓂᓯᓲᖑᕗᖅ ᐱᔨᑦᑎᕋᕐᓂᕐᒥ ᐃᓄᖕᓄᑦ ᐅᑭᐅᓕᖕᓂ 40 ᑐᖔᓂ ᐊᓯᐊᒎᖅᑐᒥ ᐃᓅᓕᓴᖅᑕᐅᓂᕐᒥ ᐱᔭᕆᐊᖃᖅᑐᓄᑦ.

ᑐᖁᓂᐅᔪᓂ ᒪᕐᕉᖕᓂ ᓄᓇᖃᖅᑎᐅᔪᓂ, ᐅᑭᐅᓕᖕᓂ 12 ᐊᒻᒪ 19−ᒥ, ᐱᒋᐊᖅᑎᑦᑎᓚᐅᖅᐳᖅ ᑲᓇᑕᒥ ᐸᓖᓯᒃᑯᓐᓂ, ᓄᓇᕗᒻᒥ ᑐᖁᖓᔪᓕᕆᔨᒥ ᐊᒻᒪ ᓄᓇᕗᒻᒥ ᒐᕙᒪᒃᑯᓐᓂ ᖃᐅᔨᓴᖅᓯᓂᖏᓐᓂ. ᑐᖁᓂᐅᔪᑦ ᐱᓚᐅᖅᐳᑦ ᔭᓄᐊᕆᒥ ᐊᒻᒪ ᐅᒃᑐᐱᕆᐅᓚᐅᖅᑐᒥ, ᒪᓕᖃᑦᑕᐅᑎᔪᓂ.

ᐊᑎᖏᑦ ᐅᖃᐅᓯᐅᓯᒪᙱᓚᑦ.

ᑲᑎᒪᓂᐅᔪᓂ ᕕᕗᐊᕆ 22−ᒥ, ᓴᒻᒧᖅᑐᖅ ᖃᐃᖁᔨᓂᖃᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᓐᓂ ᑕᑯᒃᓴᐅᓂᖃᑦᑎᐊᕐᓂᖏᓐᓂ ᖃᐅᔨᓴᖅᑕᐅᓂᐅᔪᒥ ᐊᒻᒪ ᐊᐱᕆᓚᐅᖅᐳᖅ ᓄᓇᖃᖅᑎᐅᔪᓂ ᕿᓄᐃᓵᕐᓂᕐᒥ ᐊᒻᒪ ᓱᓕᙱᑦᑐᓂ ᐅᖃᐅᓯᖃᑲᑕᕈᓘᔭᖁᙱᖦᖢᓂᒋᑦ ᐱᒧᓐᓇᕐᓂᖃᖅᑎᐅᔪᑦ ᖃᐅᔨᓴᖅᑎᓪᓗᒋᑦ ᑐᖁᔾᔪᑕᐅᔪᓄᑦ.

ᖃᐅᑎᓪᓗᒍ, ᓴᒻᒧᖅᑐᖅ ᐅᖃᓚᐅᖅᐳᖅ ᐃᓕᑦᑎᓚᐅᕐᓂᖓᓂ ᓄᓇᕗᒻᒥ ᒐᕙᒪᒃᑯᑦ ᓄᑖᙳᕆᐊᖅᑎᑦᑎᔾᔮᙱᓐᓂᖏᓐᓂ ᑳᓐᑐᕌᖓᓂ ᐱᒪᒃᓯᓕᕐᕕᒃ ᑎᒥᖁᑕᐅᔪᓂᑦ ᐊᐱᕆᓚᐅᖅᐳᖅ ᓇᑲᓱᖕᒧᑦ ᓇᓗᓇᐃᖅᓯᓂᖓᓂ ᑕᒪᓐᓇ ᓱᓕᖕᒪᖔᑦ.

“ᑎᑎᕋᕐᓂᖃᖅᓯᒪᕗᖓ ᐱᒪᒃᓯᓕᕐᕕᒃ ᑎᒥᖁᑕᐅᔪᓂᑦ, ᐊᒻᒪ ᓇᒃᓯᐅᔾᔨᓚᐅᕆᕗᒍᑦ ᑎᑎᖅᑲᒥᒃ ᓇᓗᓇᐃᖅᓯᔪᒥᒃ ᒫᔾᔨ 31, 2024−ᒥ, ᐃᓱᒋᓂᖓᓂ ᐃᓱᓕᕝᕕᒃᓴᖓᓂ, ᐊᒻᒪᓗ ᓄᑖᙳᕆᐊᖅᑎᑦᑎᔾᔮᙱᓐᓂᑦᑎᓐᓂ ᑳᓐᑐᕌᖑᔪᒥ ᑕᐃᔅᓱᒪᓂ,” ᓇᑲᓱᒃ ᑭᐅᓚᐅᖅᐳᖅ.

ᐅᓂᒃᑳᕆᐊᓪᓚᓚᐅᙱᓚᖅ ᐅᓂᒃᑳᕐᓂᐅᔪᒥ ᐃᓱᒪᓕᐊᖑᔪᒧᑦ ᑭᓯᐊᓂ ᐅᖃᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᑦ “ᐊᖏᖅᓯᒪᓂᖏᓐᓂ” ᑖᔅᓱᒧᖓ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᓇᒃᓯᐅᑎᓚᐅᖅᐳᑦ ᑲᐃᓯ ᓚᓵᑦᒥ, ᐅᖃᖅᑎᐅᔪᒥ ᒐᕙᒪᓕᕆᔨᒃᑯᓐᓄᑦ, ᐊᐱᖅᑯᑕᐅᔪᓂ ᑳᓐᑐᕌᖑᔪᒥ ᐱᒪᒃᓯᓕᕐᕕᒃ ᑎᒥᖁᑕᐅᔪᓄᑦ ᐊᒻᒪ ᖃᓄᐃᒻᒪᑦ ᓄᑖᙳᕆᐊᖅᑎᑕᐅᔾᔮᙱᓐᓂᖓᓂ, ᐊᒻᒪ ᐊᐱᕆᓚᐅᖅᐳᖅ ᑐᓴᒐᒃᓴᓂ ᐊᓯᐊᒎᕈᓐᓇᕋᔭᖅᑐᓂ ᐃᓇᖏᖅᓯᓇᔭᖅᑐᓂ ᓇᔭ ᐃᓴᐱᐅᓪᒧᑦ ᐃᒡᓗᖃᖅᑐᓄᑦ.

ᓚᓵᑦ ᓱᓕ ᑐᓂᓯᓚᐅᙱᓚᖅ ᑭᐅᔾᔪᑎᓂ ᕕᕗᐊᕆ 23−ᖑᖅᑎᓪᓗᒍ.

ᐊᒻᒪᓗᑦᑕᐅᖅ, ᐱᒪᒃᓯᓕᕐᕕᒃ ᑎᒥᖁᑕᐅᔪᑦ ᑭᐅᓯᒪᙱᓐᓂᕗᑦ ᑐᒃᓯᕋᕐᓂᐅᔪᓂ ᐅᖃᐅᓯᒃᓴᓕᐅᕐᓂᕐᒧᑦ ᓇᒃᓯᐅᔾᔭᐅᔪᓂ ᖃᕋᓴᐅᔭᑎᒍᑦ ᑎᑎᕋᖅᑕᐅᔪᓄᑦ ᐊᒻᒪ ᐅᖃᓗᖕᓂᐅᔪᓄᑦ.

“ᖃᔅᓯᒐᓚᖕᓂ ᓄᓇᖃᖅᑎᐅᔪᓂ ᓄᓇᓕᖕᒥ ᐃᒡᓗᓕᒑᕐᔪᖕᒥ ᐃᖅᑲᓇᐃᔮᖃᖅᐳᑦ ᓇᔭ ᐃᓴᐱᐅᓪ ᐊᖏᕐᕋᐅᔪᒥ, ᐊᒻᒪᓗ ᐃᖅᑲᓇᐃᔮᖏᑦ ᐊᒻᒪ ᐃᓱᒪᒋᔭᐅᓂᖏᓐᓂ ᐅᓗᕆᐊᓇᖅᑐᒦᑉᐳᑦ; ᐱᓪᓗᐊᖅᐳᑦ ᒪᑐᐃᖓᓂᐅᔪᒥ ᐊᒻᒪ ᓱᓕᔪᓂ ᑐᓴᐅᒪᑎᑕᐅᓂᐅᔪᒥ ᖃᓄᐃᓐᓂᐅᔫᑉ ᒥᒃᓵᓄᑦ,” ᓴᒻᒧᖅᑐᖅ ᐅᖃᓚᐅᖅᐳᖅ ᒪᓕᒐᓕᐅᕐᕕᖕᒥ.

ᐊᐱᕆᓚᐅᖅᐳᖅ ᓇᑲᓱᖕᒧᑦ ᑐᓂᓯᔪᓐᓇᕐᒪᖔᑦ ᑕᒪᒃᑭᐅᒪᔪᒥ ᐅᓂᒃᑳᓕᐊᒥ “ᕿᒪᒻᒥᐅᓛᖑᔪᒥ ᐱᔪᓐᓇᕐᓂᐅᔪᒥ.”

“ᐱᔾᔪᑎᖃᖅᑐᒥ ᐃᖅᑲᓇᐃᔭᖅᑎᐅᔪᓄᑦ, ᐃᓱᒪᒃᓴᖅᓯᐅᕆᑎᒋᓂᐊᖅᐸᕗᑦ ᐱᓕᒻᒪᒃᓴᖅᓯᒪᖕᒪᑕ ᐸᖅᑭᓂᕐᒥ ᑐᔪᕐᒥᔪᓄᑦ,” ᓇᑲᓱᒃ ᐅᖃᓚᐅᖅᐳᖅ.

“ᐅᓂᒃᑳᓕᐅᕐᓂᐊᖅᐳᒍᑦ. ᓱᓕ ᖃᐅᔨᓴᖅᑕᐅᖕᒪᑦ, ᐅᖃᓪᓚᒍᓐᓇᙱᓚᒍᑦ ᐱᓕᕆᐊᖑᔪᓂ ᒫᓐᓇᐅᔪᒥ.”