ᓄᓇᕗᒻᒥ ᓯᓚᑦᑐᖅᓴᕐᕕᒃ ᐱᒋᐊᖅᑎᑦᑎᕗᖅ ᐃᓄᓕᕆᓂᖅᒧᑦ ᐃᓕᓐᓂᐊᕈᑎᒃᓴᒃᑲᓐᓂᕐᓂᒃ

ᐊᓂᒍᐃᔪᕕᓃᑦ ᓯᓚᑦᑐᖅᓴᕐᕕᐅᑉ ᐃᓄᓕᕆᓂᖅᒧᑦ ᐃᓕᓐᓂᐊᒐᒃᓴᖓᓂᒃ ᓄᑖᒥᒃ ᐃᓕᓐᓂᐊᕈᑎᒃᓴᒥᒃ ᐱᓇᓱᒍᓐᓇᖅᓯᔪᑦ

ᓄᓇᕗᒻᒥ ᓯᓚᑦᑐᖅᓴᕐᕕᒃ ᐱᓕᕆᖃᑎᖃᖅᖢᑎᒃ ᒪᒨᕆᐅᓪ ᔫᓂᕘᓯᑎᒥ ᐃᓄᓕᕆᓂᖅᒧᑦ ᐸᐃᑉᐹᖅᑖᕈᑎᒃᓴᒥ ᐃᓕᓐᓂᐊᒐᒃᓴᖃᖅᑎᑦᑎᓯᕗᑦ ᓄᓇᕗᒥᑦ. (ᐊᔾᔨᙳᐊᖁᑎᒋᔭᐅᔪᖅ/NAC)

By ᓴᐃᕋ ᕌᔾᔪᔅ

For an English version of this story, see Nunavut Arctic College launches bachelor of social work

ᓄᓇᕗᒻᒥ ᓯᓚᑦᑐᖅᓴᕐᕕᒃ ᐱᓕᕆᖃᑎᖃᕐᒪᑕ ᒪᒨᕆᐅᓪ ᔫᓂᕘᓯᑎᒥ ᓂᐅᕙᐅᓐᓛᓐ ᐊᒻᒪ ᓛᐸᑐᐊᒥ ᐃᓄᓕᕆᓂᕐᒧᑦ ᐃᓕᓐᓂᐊᒃᑲᓐᓂᕈᑎᒃᓴᓂᒃ ᐅᑭᐊᒃᓵᖅ, ᓯᓚᑦᑐᖅᓴᕐᕕᒃᑯᑦ ᑐᓴᖅᑎᑦᑎᓚᐅᖅᑐᑦ ᔫᓂ 23-ᒥᑦ.

ᓯᓚᑦᑐᖅᓴᕐᕕᒃ ᒫᓐᓇ ᐊᕐᕌᒎᖕᓂ ᒪᕐᕉᖕᓂ ᐃᓄᓕᕆᓂᕐᒧᑦ ᐃᓕᓐᓂᐊᒐᒃᓴᖃᕐᒪᑕ. ᐅᑭᐊᒃᓵᕐᓕ, ᐊᓂᒍᐃᓯᒪᔪᑦ ᑖᔅᓱᒥᖓ ᐃᓕᓐᓂᐊᒐᒃᓴᒥ ᐱᓇᓱᒍᓐᓇᖅᓯᔪᑦ ᓯᕗᓪᓕᖅᐹᖑᖃᑕᐅᓗᑎᒃ ᓯᓚᑦᑐᖅᓴᕐᕕᒃᒥ ᐃᓕᓐᓂᐊᒃᑲᓐᓂᒐᒃᓴᒥ ᐃᓄᓕᕆᓂᖅᒧᑦ (bachelor of social work), ᑖᓐᓇᓗ ᐊᕐᕌᒎᖕᓂ ᒪᕐᕉᖕᓂ ᐃᓕᓐᓂᐊᖅᑕᐅᓇᔭᖅᖢᓂ ᐃᖃᓗᒃᑑᑦᑎᐊᕐᒥ ᑕᒪᑐᒪᒥ ᐊᕐᕌᒍᒥ ᐱᒋᐊᕐᓗᑎᒃ.

ᐅᓇ ᐃᓕᓐᓂᐊᒐᒃᓴᖅ ᐅᕘᓇ ᓇᓗᓇᐃᒃᑯᑎᑖᕐᓇᕐᓂᐊᖅᑐᖅ ᓴᐃᓐ ᔮᓐᔅᒥ ᒪᒨᕆᐅᓪ ᔫᓂᕘᓯᑎᒥ, ᑖᒃᑯᐊᓗ ᐊᕐᕌᒍᓂ ᖁᓕᓂᒃ ᐊᖏᖃᑎᒌᒍᑎᑎᒍᑦ 2019-ᖑᑎᓪᓗᒍ ᓯᓚᑦᑐᖅᓴᕐᕕᒃᒥᑦ ᐃᓕᓐᓂᐊᒃᑲᓐᓂᕈᑎᒃᓴᓂ ᐋᖅᑭᒃᓱᐃᓂᐊᕐᓂᖅᒧᑦ.

“ᐅᓇ ᒪᓕᒃᓯᒪᔪᖅ ᒐᕙᒪᒃᑯᑦ ᓯᕗᓪᓕᐅᑎᑦᑐᒪᔭᖏᓐᓂᒃ ᐃᓕᓐᓂᐊᖅᑎᑦᑎᖃᑦᑕᕐᓂᕐᒥᒃ ᐊᒻᒪ ᐊᔪᕈᓐᓃᖅᓴᖅᑎᑦᑎᖃᑦᑕᕐᓂᖅᒥᒃ ᐃᓅᓱᒃᑐᓂᒃ ᐊᒻᒪ ᐃᓐᓇᕐᓂᒃ ᐃᓅᖃᑎᒌᖕᓂᖅᒧᑦ ᐃᓚᐅᖃᑦᑕᕈᓐᓇᕐᓗᑎᒃ ᐊᒻᒪ ᐃᖅᑲᓇᐃᔮᓄᑦ ᐊᔪᕈᓐᓃᖅᓴᕐᓂᖅᒧᑦ ᐅᑯᑎᒎᓇᖅ ᓯᕗᒧᐊᖅᐸᓪᓕᐊᔾᔪᑎᕗᑦ,” ᐅᖃᖅᑐᖅ ᓄᓇᕗᒥᑦ ᐃᓕᓐᓂᐊᕐᓂᓕᕆᓂᖅᒧᑦ ᒥᓂᔅᑕ ᑕᐃᕕᑦ ᔪᐊᓇᓯ ᔫᓂ 21-ᒥᑦ ᑐᓴᒐᒃᓴᔨᕆᑎᓪᓗᒋᑦ, ᐅᖃᐅᓯᖃᖅᖢᓂ ᓄᓇᕗᒥᑦ ᒐᕙᒪᒃᑯᑦ ᐊᕐᕌᒍᓂ ᖁᓕᓂᒃ ᐃᓕᓐᓂᐊᖅᑐᓕᕆᓂᖅᒧᑦ ᖃᓄᐃᓕᐅᕈᑎᒋᓂᐊᖅᑕᖏᓐᓂᒃ.

“ᐃᓚᐅᑎᑦᑎᓂᖅ ᐃᓐᓇᑐᖃᕐᓄᑦ ᐃᓱᒪᒋᔭᐅᔪᓂᒃ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐅᕙᓂ ᐊᕐᕌᒎᖕᓂ ᒪᕐᕉᖕᓂ ᐃᓕᓐᓂᐊᒐᒃᓴᒥ ᐃᖃᓗᒃᑑᑦᑎᐊᕐᒥᑦ, ᑐᑭᖃᕐᒥᖕᒪᑕ ᓯᕗᓂᒃᓴᑦᑎᓐᓂᑦ ᐃᓄᐃᑦ ᐃᓄᓕᕆᓂᖅᒥᒃ ᐊᓂᒍᐃᔪᑦ ᐸᕐᓇᒃᓯᒪᔪᓐᓇᕐᓂᐊᕐᓂᖏᓐᓂᒃ ᐃᓄᐃᑦ ᐃᓅᖃᑎᒌᖕᓂᕐᒧᑦ ᐱᒻᒪᕆᒋᔭᖏᓐᓂᒃ ᓯᕗᓂᒃᓴᑦᑎᓐᓂ ᐃᓄᓕᕆᓂᕐᒧᑦ ᐱᓕᕆᐊᒃᓴᖏᑦᑎᒍᑦ.”

ᓄᓇᕗᒥᑦ ᒐᕙᒪᒃᑯᑦ ᓴᓂᕐᕙᐃᓯᒪᓕᕐᑐᑦ $1.8 ᒥᓕᐊᓐᓂᒃ ᐊᕐᕌᒍᓂ ᐱᖓᓱᓂᒃ ᐊᑐᖅᑕᐅᓂᐊᖅᑐᒥᑦ ᐃᓕᓐᓂᐊᖅᑎᑦᑎᓂᖅᒧᑦ, ᓯᓚᑦᑐᖅᓴᕐᕕ ᐅᖃᓚᐅᖅᑐᖅ.

ᕕᐋᓐ ᑎᒪᓐᔅ, ᐊᖓᔪᖅᑳᖅ ᐊᒻᒪ ᐃᓚᒋᔭᐅᖃᑕᐅᔪᖅ ᒪᒨᕆᐅᓪ ᔫᓂᕘᓯᑎᒥ, ᐅᖃᓚᐅᖅᑐᖅ ᐊᓂᒍᐃᔾᔪᑎᒋᔭᐅᔪᓂᒃ ᐱᓕᕆᖃᑎᒌᖕᓂᒃᑯᑦ ᐅᑯᓂᖓ ᓄᓇᑦᓯᐊᕗᑦ ᒐᕙᒪᒃᑯᓐᓂ ᐃᓕᓐᓂᐊᖅᑎᑦᑎᓕᕋᔭᕐᓂᖏᓐᓂᒃ ᐃᓄᖕᓂ ᐃᓄᓕᕆᓂᕐᒧᑦ ᐸᐃᑉᐹᖅᑖᕋᓱᒍᑎᒃᓴᓂᒃ ᐃᓄᖕᓄᑦ ᓛᐸᑐᐊᒦᑦᑐᓄᑦ.

“ᖁᕕᐊᓱᒻᒪᕆᒃᑐᒍᑦ ᐃᓚᒋᔭᐅᓂᑦᑎᓐᓂᒃ ᖃᓄᐃᓕᐅᕈᑎᐅᓇᓱᒃᑐᓂᒃ ᓄᓇᕗᒻᒥ ᓯᓚᑦᑐᖅᓴᕐᕕᒃᒥᑦ,” ᑎᒪᓐᔅ ᐅᖃᖅᑐᖅ ᑐᓴᒐᒃᓴᑎᒍᑦ. “ᑕᒪᓐᓇ ᐃᓕᓐᓂᐊᒐᒃᓴᖅ ᒪᓂᒪᔭᐅᓕᑐᐃᓐᓇᕆᐊᓖᑦ ᓄᓇᕗᒥᑦ ᓄᓇᓕᖕᓂ ᓯᕗᓂᑦᑎᓐᓂᒃ, ᑐᕌᒐᖃᖅᓗᑎᒃ ᐋᖅᑭᒃᓱᐃᕙᓪᓕᐊᓂᕐᒥᒃ ᐃᓄᓕᕆᓂᕐᒧᑦ ᐃᓕᓐᓂᐊᕈᑎᒃᓴᓂᒃ ᓄᓇᕗᒻᒥ ᓯᓚᑦᑐᖅᓴᕐᕕᒃᒥᑦ.

ᓄᓇᕗᒥᑦ ᒐᕙᒪᒃᑯ ᑲᒪᒋᔭᖃᓚᐅᕐᓯᒪᖕᒪᑕ ᑕᒪᓐᓇ ᖃᐅᔨᓴᖅᑕᐅᓂᖓ ᐊᑐᕈᓐᓇᕆᐊᒃᓴᖓᓂᒃ 2016-ᖑᑎᓪᓗᒍ ᓄᓇᕗᒥᑦ ᐃᑲᔪᕈᑎᒃᓴᖃᑦᑎᐊᕆᐊᒃᓴᖓᓂᒃ ᐊᒻᒪ ᐃᓕᓐᓂᐊᖅᑐᖃᕋᔭᕆᐊᒃᓴᖓᓂᒃ, ᑭᓯᐊᓂᓕ ᐃᓱᒪᓕᓚᐅᕐᓯᒪᖕᒪᑕ ᐱᓕᕆᖃᑎᖃᕈᑎᒃ ᐱᐅᓛᖑᓇᔭᕐᓂᖓᓂᒃ ᑕᒪᓐᓇ ᐱᓕᕆᐊᕆᓂᐊᖅᐸᒍ.

Share This Story

(0) Comments

Join the Conversation

Your email address will not be published. Required fields are marked *

*