ᓄᕙᒡᔪᐊᕐᓇᖅ-19-ᒥ ᐋᓐᓂᐊᖅᑖᖅᑕᐃᓕᒍᑎᒃᓴᑦ ᑲᐴᑎ ᑎᑭᑉᐳᑦ ᐊᒃᑐᖅᑕᐅᓯᒪᓛᒧᑦ ᐊᕐᕕᐊᓄᑦ

“ᖃᓄᐃᓕᐅᕐᓇᖅᑕᖃᓚᐅᕐᑎᓪᓗᒍ ᑕᒪᓐᓇ ᐃᖢᐊᖅᑐᐊᓗᒃ ᐃᒃᐱᒋᓐᓇᐅᔪᖅ,” ᐅᖃᖅᑐᖅ ᔮᓐ ᒪᐃᓐ

ᐊᕐᕕᐊᓂ ᐃᓐᓇᑐᖃᐃᑦ ᐅᑕᖅᑭᔪᑦ ᑲᐱᔭᐅᓂᐊᕐᓂᕐᒥᖕᓂᒃ ᐱᖓᔪᑦ, ᔭᓄᐊᕆ 13-ᒥᑦ ᐅᕙᓂ ᒫᒃ ᑲᓗᐊᒃ ᐱᙳᐊᕐᕕᒃᒥᑦ, ᑕᕝᕙᓂ ᓄᕙᒡᔪᐊᕐᓇᖅ-10-ᒧᑦ ᑲᐱᓯᑲᑕᒡᕕᖃᕐᒪᑕ ᑎᑭᓪᓗᒍ ᓇᒡᒐᔾᔭᐅ, ᔭᓄᐊᕆ 18. (ᐊᔾᔨᓕᐅᕆᔨ ᕼᐋᑎ ᐊᓚᕋᓚᒃ)

By ᓴᐃᕋ ᕌᔾᔪᔅ

For an English version of this story, see Uvagut TV fulfils a long-cherished dream, NITV chairperson says

ᓯᕿᓂᖅ ᓂᐱᓕᕐᑎᓪᓗᒍ ᔭᓄᐊᕆ 13 ᐅᓐᓄᓴᖓᓂᒃ, ᓄᓇᓯᐅᑎᕈᓘᔭᐃᑦ ᐊᕐᕕᐊᑦ ᒥᑦᑕᕐᕕᖓᓄᐊᓚᐅᕐᐳᑦ ᑐᙵᓱᒃᑎᑦᑎᓪᓗᑎᒃ ᐊᑕᐅᓯᓕᒃᒥᑦ ᖃᖓᑕᓲᒥᑦ ᒥᕋᑖᖅᑐᒥᑦ.

ᑖᓐᓇ ᖃᖓᑕᓲᖅ ᐅᓯᓚᐅᕐᒪᑦ ᐊᒥᓱᓄᑦ ᐃᓱᒪᒋᔭᐅᔪᒥᑦ ᐱᒻᒪᕆᐅᓂᖏᓐᓂᒃ: 1,100 ᑲᐴᑎᒃᓴᑦ Moderna (ᒪᑑᓇ) ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖅᑖᖅᑕᐃᓕᓂᕐᒧᑦ ᑲᐴᑎᒃᓴᒥᑦ.

ᐊᕐᕕᐊᑦ, ᐃᖃᓄᖃᕐᑐᖅ 2,700-ᓂᒃ, ᓄᓇᕗᒥᑦ ᓄᕙᒡᔪᐊᕐᓇᖅ-19-ᒧᑦ ᐊᒃᑐᖅᑕᐅᒻᒪᕆᓚᐅᕐᓯᒪᔪᖅ ᓄᕕᐱᕆᒥᑦ ᐊᒻᒪ ᑎᓯᐱᕆᒥᑦ, ᓄᓇᖃᕐᑐᑦ 222 ᐊᐃᑦᑐᖅᑕᐅᑎᓪᓗᒋᑦ ᑖᔅᓱᒥᖓ ᐋᓐᓂᐊᕆᔭᐅᓐᓇᕐᑐᒥᑦ. ᐊᑕᐃᓯ ᐊᖑᑎ ᐃᓄᒃ ᐃᓅᔪᓐᓃᖅᖢᓂ, ᑖᓐᓇᓕ ᐅᐃᓂᐱᒡᒧᑦ ᐊᐅᓚᖅᑎᑕᐅᓚᐅᕐᓯᒪᓪᓗᓂ ᑲᒪᒋᔭᐅᓂᐊᕐᒪᑦ ᐋᓐᓂᐊᓕᕐᑎᓪᓗᒍ.

“ᑎᑭᖃᐅᕐᑐᕈᓐᓇᙱᑐᐃᓐᓇᓚᐅᕐᑐᖅ,” ᐅᖃᖅᑐᖅ ᐊᕐᕕᐊᑦ ᐅᐊᖕᓇᒐᓄᑦ — ᑎᑭᕋᕐᔪᐊᕐᒧᑦ ᒪᓕᒐᓕᐅᕐᑎ ᔮᓐ ᒪᐃᓐ, ᐃᓚᒋᔭᐅᓚᐅᕐᑐᖅ ᒥᑦᑕᕐᕕᒃᒧᐊᕐᑐᓂᒃ ᑐᙵᓱᒃᑎᑦᑎᔪᓂ ᑲᐴᑎᒃᓴᑦ ᑎᑭᑎᓪᓗᒋᑦ.

“ᖃᓄᐃᓕᐅᕐᓇᖅᑕᖃᓚᐅᕐᑎᓪᓗᒍ ᑕᒪᓐᓇ ᐃᖢᐊᖅᑐᐊᓗᖕᒥ ᐃᒃᐱᒋᓐᓇᖅᑐᖅ.”

ᑭᖑᓂᑦᑎᐊᖓᒍᑦ, ᓄᓇᓖᑦ ᐃᓚᖏᑦ ᒫᒃ ᑲᓗᐊᒃ ᐱᙳᐊᕐᕕᒃᒥ, ᐅᖓᓯᒌᒃᑕᖅᖢᑎᒃ ᐊᒻᒪ ᑮᓇᑉᐸᒃᓯᒪᓪᓗᓂ, ᐅᑕᕿᓪᓗᑎᒃ ᑲᐱᔭᐅᕝᕕᒃᓴᖏᓐᓂᒃ.

ᓄᓇᖃᕐᑐᑦ ᐃᓂᒃᓴᓕᐅᕐᑎᑕᐅᓇᓱᒃᖢᑎᒃ ᑲᐱᔭᐅᓂᒃᓴᒧᑦ, ᕼᐋᒻᒪᓚᒃᑯᑦ ᑐᙵᓱᒃᑎᑦᑎᓚᐅᕐᑐᑦ ᑖᒃᑯᓂᖓ ᓯᕗᓪᓕᐅᓂᐊᕐᓗᑎᒃ ᑲᐱᔭᐅᔪᓂᒃ ᔭᓄᐊᕆ 13-ᒥᑦ ᑐᓐᓂᖅᑯᓯᐊᖅᑖᖅᑎᑕᐅᓪᓗᑎᒃ ᐅᓗᓂ.

ᕼᐋᑎ ᐊᓚᕋᓚᒃ ᐊᒻᒪ ᐅᐃᖓ ᐃᓚᒋᔭᐅᓚᐅᕐᑐᑦ. “ᑕᒪᓐᓇ ᖁᕕᐊᓱᖕᓇᕐᑐᖅ,” ᐅᖃᖅᑐᖅ.

ᑲᐱᓯᑲᑕᖕᓂᐊᕐᑐᑦ ᓄᓇᖃᖅᑐᓂᒃ ᔭᓄᐊᕆ 14-ᒥᑦ 18-ᒧᑦ, ᓯᕗᓪᓕᐅᓗᑎᒃ ᐃᓐᓇᑐᖃᐃᑦ ᐊᒻᒪ ᐃᖅᑲᓇᐃᔭᖅᑎᑦ ᐃᓄᖕᓂ ᐱᓕᕆᐊᖃᖅᐸᒃᑐᑦ, ᐊᒻᒪᓗ ᐃᓂᒃᓴᓕᐅᕐᑕᐅᑲᑕᖕᓂᒃᑯᑦ ᐊᒻᒪ ᐃᓯᑐᐃᓐᓇᕐᑐᓄᑦ ᐃᓂᒃᓴᓕᐅᕆᐊᕐᑐᓄᑦ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔨᖏᑦ ᐃᓐᓇᒃᑯᕕᖕᒧᐊᕐᓂᐊᒥᔪᑦ ᑕᕝᕙᓃᑦᑐᓂᒃ ᑲᐱᓯᑲᑕᒋᐊᕐᑐᕐᓗᑎᒃ.

ᐊᕐᕕᐊᓂ ᕼᐋᒻᒪᓚᒃᑯᑦ ᑕᒪᑯᒧᖓ ᒪᓂᓴᕈᑎᖃᓚᐅᕐᒥᔪᑦ; ᑭᓇᑐᐃᓐᓇᖅ ᑲᐱᔭᐅᔪᖅ ᐊᑎᓕᐅᖅᑕᐅᓂᐊᕐᓗᓂ ᐊᒧᔭᐅᔪᒃᓴᓄᑦ ᔭᓄᐊᕆ 19-ᒥᑦ ᑕᕝᕙᓂᓗ ᑕᓪᓕᒪᓂᒃ ᓵᓚᒃᓴᖅᑎᑦᑎᓂᐊᖅᖢᑎᒃ ᐊᑐᓂ $2,000-ᑖᕐᓗᑎᒃ.

ᖃᐅᔨᒪᔪᒍᑦ ᓄᓇᓖᑦ ᐋᓐᓂᐊᖃᑲᑕᓕᕈᑎᒃ ᓲᖃᐃᒻᒪ ᐊᑐᕐᓯᒪᒐᑦᑎᒍᑦ ᓄᓇᑦᑎᓐᓂ,” ᐅᖃᖅᑐᖅ ᐊᕐᒥᐊᑦ ᒪᐃᔭᖓ ᔫ ᓴᕕᑲᑖᖅ, ᓄᑲᖅᖠᖅ, ᑖᓐᓇᑦᑕᐅᖅ ᑲᐱᔭᐅᓚᐅᕐᖢᓂ ᐱᖓᔪᐊᓐᓂᑦ.

“ᖃᐅᔨᒪᒐᑦᑕ ᑲᐱᔭᐅᓯᒪᓂᖅ ᐋᓐᓂᐊᖅᑖᖅᑕᐃᓕᒪᓂᐅᓂᖓᓂᒃ ᑐᒡᓕᐅᓇᔭᕐᑐᓂᒃ ᐋᓐᓂᐊᒃᑲᓐᓂᕈᑎᐅᓇᔭᕐᑐᓂᒃ.”

ᓄᓇᖃᕐᑐᑦ ᐃᓚᖏᑦ ᑲᐱᔭᐅᔪᓐᓇᕐᓂᕐᒥᖕᓂ ᐱᓇᓱᑐᐃᓐᓇᕐᑎᓪᓗᒋᑦ, ᐃᓚᖏᑦᑕᐅᖅ ᑲᐱᔭᐅᔪᒪᙱᑦᑐᑦ, ᐅᓗᕆᐊᓱᒃᖢᑎᒃ ᖁᐊᕐᓵᕐᓇᕆᐊᒃᓴᖓᓂᒃ, ᓴᕕᑲᑖᖅ ᓄᑲᖅᖠᖅ ᐅᖃᓚᐅᕐᑐᖅ. ᑲᓇᑕᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯ, ᐊᖏᕐᓯᒪᔪᑦ ᐊᑐᖅᑕᐅᓂᖓᓄᑦ ᐃᓐᓇᕐᓄᑦ, ᓇᓗᓇᐃᕐᓯᓚᐅᙱᑦᑐᑦ ᐅᓗᕆᐊᓇᕈᑎᐅᓇᔭᕐᑐᓂᒃ ᒪᑑᓇ ᑲᐴᑎᒧᑦ.

“ᑐᓴᐅᒪᔾᔪᑎᓕᕆᓂᒃᑯᑦ ᑕᑯᕈᓘᔭᕐᓇᕐᒪᑦ ᐅᖃᐅᓯᐅᑲᑕᒃᑐᓂᒃ ᓱᓕᙱᓗᐊᕐᑐᓂᒃ ᑕᒪᑐᒧᖓ,” ᐅᖃᖅᑐᖅ.

ᓄᓇᓕᖕᓂ ᐱᓕᕆᔨᐅᔪᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᓗᕆᐊᓇᙱᓐᓂᖓᓂᒃ ᑕᒪᓐᓇ ᐱᓕᕆᐊᕆᓇᓱᒃᑕᖓ.

ᓄᓇᓕᖕᓂ ᑐᓴᕐᓴᐅᑎᓪᓗᒍ ᐊᒃᓱᕈᖅᖢᓂ ᓈᓚᐅᑎᒃᑯᑦ — ᐊᒻᒪ ᑭᖑᓂᐊᒍᑦ ᔭᓄᐊᕆ 14-ᒥ ᓄᓇᕗᒥᑦ ᒐᕙᒪᒃᑯᑦ ᑐᓴᒐᒃᓴᓕᐅᕐᑎᓪᓗᒋᑦ — ᐊᕐᕕᐊᓂ ᓄᓇᖃᕐᑐᖅ ᑕᐃᐋᓐ ᓴᒻᒧᕐᑐᖅ ᓂᐱᓕᐅᖅᖢᓂ ᑐᓴᒐᒃᓴᓕᐅᓚᐅᕐᓯᒪᔪᖅ ᓄᓇᕗᒻᒥᐅᓂᒃ ᑲᐱᔭᐅᑲᑕᖁᔨᓪᓗᓂ.

ᐅᐃᖓ, ᓘᑭ ᓴᒻᒧᕐᑐᖅ, ᐃᓅᔪᓐᓃᓚᐅᕐᓯᒪᖕᒪᑦ ᓄᕙᒡᔪᐊᕐᓇᖅ-19-ᒧᑦ ᑎᓯᐱᕆ 19-ᖑᑎᓪᓗᒍ.

“ᐊᑏ, ᐊᑏ ᓄᕙᒡᔪᐊᕐᓇᖅ-19-ᒧᑦ ᑲᐱᔭᐅᒋᑦᑎ,” ᓴᒻᒧᕐᑐᖅ ᐅᖃᓚᐅᕐᑐᖅ ᑐᓴᒐᒃᓴᓕᐊᖓᒍᑦ. “ᐊᑐᖅᑕᐃᓕᒋᑦᑎᓕ ᐊᑐᓚᐅᕐᑕᓐᓂᒃ. ᑕᐅᑐᒃᖢᓂ ᓇᒡᓕᒋᔭᐃᑦ ᐃᓅᔪᓐᓃᕐᑎᓪᓗᒍ ᐱᒻᒪᕆᐊᓘᖕᒪᓐ.”

ᒪᐃᓐ ᐅᖃᐅᔾᔭᐅᒃᑲᓐᓂᕆᐊᖃᓚᐅᙱᑦᑐᖅ.

“ᖃᐅᔨᒪᓪᓗᓂ ᑕᒪᑐᒥᖓ ᐃᒃᐱᒍᓱᖕᓂᕐᒥᒃ, ᓇᒡᓕᒋᔭᒥᑦ ᐋᓐᓂᐊᓕᕐᑐᖃᖅᖢᓂ — ᑲᑉᐱᐊᓇᖅᑐᐊᓘᖕᒪᓐ,” ᐅᖃᖅᑐᖅ ᒪᓕᒐᓕᐅᕐᑎ, ᐃᒡᓗᖃᑎᖓᓂᒃ ᑕᒪᑐᒥᖓ ᐊᐃᑦᑐᖅᑕᐅᔪᖃᓚᐅᕐᓯᒪᑎᓪᓗᒍ ᐊᕐᕌᓂᐅᓚᐅᕐᑐᖅ.

“ᐃᓄᐃᑦ ᑕᐅᑐᒃᐸᓪᓕᐊᒍᑎᒃ ᓄᓇᖅᑲᑎᖏᑦ ᑲᐱᔭᐅᕙᓪᓕᐊᔪᑦ, ᑕᐃᒪᓕ ᐃᓱᒪᔪᖓ ᐅᓄᕐᓂᕐᓴᐃᑦ ᑲᐱᔭᐅᔪᒪᓇᔭᕆᐊᒃᓴᖏᓐᓂᒃ,” ᐅᖃᖅᑐᖅ. “ᐃᓄᐃᑦ ᑕᒪᑐᒥᖓ ᐱᔪᒪᓂᕐᓴᐅᓕᕐᓂᐊᕋᓱᒋᔭᒃᑯ, ᒪᓕᒡᓗᑎᒃ ᓇᑎᒃ ᑕᒃᑯᓂᖓ ᑐᓴᖃᑦᑕᕐᓂᖏᑦᓂ ᐊᒻᒪ ᑐᓴᕈᓐᓇᙱᑕᖏᓐᓂᒃ.”

Share This Story

(0) Comments