ᓄᖅᑲᖅᑎᑦᑎᔭᕆᐊᖃᓕᕋᑦᑕ ᐊᐅᓚᑦᑎᔪᒪᓂᐊᓗᒃᒥᓐ

ᓇᓂᓯᔪᖃᓚᐅᕐᓂᖅ ᐅᓄᒻᒪᕆᒃᑐᐊᓗᖕᓂ ᓱᕈᓰᑦ ᓴᐅᓂᕕᓂᖏᓐᓂᒃ ᐃᓕᓐᓂᐊᕆᐊᖅᕕᕕᓂᐅᑉ ᓄᓇᖁᑎᖓᓂ ᑳᒻᓘᑉᔅ ᐳᕆᑎᔅ ᑲᓚᒻᐱᐊᒥ ᓇᓗᓇᐃᖅᓯᒍᑎᒻᒪᕆᐅᔪᖅ ᓄᓇᖃᖅᑳᖅᑐᑦ ᑲᓇᑕᒥ ᐅᖃᖃᑦᑕᐃᓐᓇᖅᓯᒪᔭᖓᓂᒃ. ᐃᒪᓐᓇ ᐅᓄᖅᑐᒻᒪᕆᐊᓗᐃᑦ ᓄᓇᖃᖅᑳᖅᑐᑦ ᓱᕈᓯᖏᑦ ᐃᓅᔪᓐᓃᖅᓯᒪᓂᖏᓐᓂᒃ ᒐᕙᒪᒃᑯᓐᓄᑦ ᑲᒪᒋᔭᐅᑎᓪᓗᒋᑦ ᐊᒻᒪᓗ ᑐᒃᓯᐊᖅᕕᓕᕆᔨᒻᒪᕆᐅᔪᓄᑦ.

ᑲᓇᑕᒥ ᒪᓕᒐᓕᕆᕕᒡᔪᐊᖅ ᒪᒥᐊᓚᐅᖅᑐᑦ ᐃᓕᓐᓂᐊᕆᐊᖅᕕᕕᓂᕐᓄᑦ. ᑲᑐᓕᒃ ᑐᒃᓯᐊᕕᖓᓂᒃ ᒪᒥᐊᑦᑐᖃᓚᐅᙱᑦᑐᖅ ᐃᓚᒋᔭᐅᓯᒪᓂᖏᓐᓄᑦ ᐃᓅᔪᓐᓃᖅᑎᑦᑎᑲᑕᖕᓂᖅᒥᒃ ᐊᒻᒪᓗ ᑐᓂᓯᔪᒪᙱᖢᑎᒃ ᑎᑎᖃᓂᒃ ᓇᓂᔭᐅᓂᑯᕕᓂᕐᓅᖓᔪᓂᒃ.

ᐅᑯᐊ ᑲᑐᓕᒃ ᑐᒃᓯᐊᖅᕕᒃ ᐃᓅᔪᓐᓃᖅᑎᑦᑎᓯᒪᓪᓚᕆᖕᒪᑕ. ᐃᒃᓯᕋᖅᔪᐊᕌᓗᒃ ᑕᒪᑐᒧᖓ ᓈᒻᒪᒃᑐᒥ ᐱᓕᕆᐊᖃᕆᐊᖃᖅᑐᖅ ᐊᒻᒪᓗ ᓇᓗᓇᐃᓪᓚᕆᒡᓗᓂ ᑐᒃᓯᐊᖅᕕᒃ ᖃᓄᐃᓕᐅᖃᑕᐅᓯᒪᓂᖏᓐᓂᒃ ᓄᑕᕋᑯᓗᖕᓂ ᖃᓄᐃᓕᐅᖅᓯᒪᙱᑦᑐᓂᒃ ᐃᓅᔪᓐᓃᖅᑎᑦᑎᓯᒪᓂᖅᒥᒃ ᐊᒻᒪᓗ ᑖᒃᑯᓄᖔᖓᔪᓂᒃ ᑎᑎᖃᓂᒃ ᓴᖅᑭᑎᑦᑎᓗᑎᒃ. ᑖᒃᑯᐊ ᑖᖅᑐᐊᓗᖕᒥᓐ ᐃᔨᖅᓯᒪᔭᕆᐊᖃᕈᓐᓃᖅᑐᑦ.

ᑳᒻᓘᑉᔅ ᓇᓂᓯᕝᕕᐅᔪᑐᐊᖑᔾᔮᙱᑦᑐᖅ ᐃᓗᕕᓕᐊᖑᓯᒪᔪᓂᒃ. ᐊᓯᖃᕐᓂᐊᕐᒥᔪᑦ. ᐃᖅᑲᐅᒪᔭᕆᐊᖃᕐᒥᔪᒍᑦ ᐅᑯᓂᖓ ᐅᓄᖅᑐᐊᓗᐃᑦ ᐃᓄᐃᑦ ᐳᕙᒡᓗᒃᓂᕐᒧᑦ ᐊᐅᓪᓚᖅᑎᑕᐅᔪᕕᓂᕐᓂᒃ ᐊᒻᒪ ᐃᓅᔪᓐᓃᖅᑐᕕᓂᕐᓂᒃ ᖃᓪᓗᓈᑦ ᐋᓐᓂᐊᕕᖏᓐᓂᒃ ᐊᒻᒪᓗ ᐃᓗᕕᖅᑕᐅᓂᑰᓪᓗᑎᒃ ᓇᓗᓇᐃᒃᑯᑎᖃᖅᑎᑕᐅᙱᖢᑎᒃ. ᐊᒻᒪᓗ ᒐᕙᒪᒃᑯᑦ ᑖᒃᑯᐊ ᐃᓚᖏᓐᓂᒃ ᑐᓴᖅᑎᑦᑎᕙᓚᐅᙱᑦᑐᑦ ᐃᓅᔪᓐᓃᕐᓂᖏᓐᓂᒃ.

ᐃᓕᓐᓂᐊᕆᐊᖅᕖᑦ, ᐊᓯᐊᓄᑦ ᓅᑕᐅᑎᑕᐅᓂᖅ, ᕿᒻᒥᓂᒃ ᑐᖁᕋᐃᑲᑕᖕᓂᖅ, ᐃᓕᖅᑯᓯᑦᑎᓐᓂᒃ ᐱᑕᖃᕈᓐᓃᖅᑎᑦᑎᓇᓱᖕᓂᖅ, ᐅᖃᐅᓯᑦᑎᓐᓂᒃ, ᑭᓇᐅᓂᑦᑎᓐᓂᒃ ᐊᒻᒪᓗ ᐊᑐᖃᑦᑕᐃᓐᓇᐅᔭᖅᑕᑦᑎᓐᓂ ᐊᐅᓚᑦᑎᓇᓱᖕᓂᖅᒨᖓᔪᑦ. ᐋᖅᑭᒋᐊᒃᑲᓐᓂᕈᑎᒥᒃ ᐱᓇᓱᖕᓂᐊᕈᑎᒃ ᑕᐃᒪᓕᒃ ᕿᓄᐃᓵᕆᐊᖃᕐᓇᕐᓂᐊᖅᑐᖅ, ᐱᕕᖃᕈᑎᐅᓐᓇᕐᓗᓂ ᐊᒻᒪᓗ ᓄᑖᓂᒃ ᐃᓱᒪᑲᑕᒍᓐᓇᖅᓯᓂᖅᒥᒃ.

ᐋᖅᑭᒃᓱᖅᐸᓪᓕᐊᒐᓱᖕᓂᖅ ᐊᑯᓂᐊᓘᒐᓗᐊᖅᑎᓪᓗᒍ ᐊᒻᒪ ᐊᔪᕐᓇᓚᐅᕐᐸᒡᓗᓂᓗ ᑭᓯᐊᓂᓕ ᐱᒋᐊᖅᕕᖃᕆᐊᖃᕋᑦᑕ. ᐅᓇ ᐱᒋᐊᖅᑎᑦᑎᐊᕙᐅᔪᒃᓴᐅᔪᖅ ᓄᓇᖅᑲᑎᒌᒃᑎᑕᐅᓂᖅ ᐊᒻᒪᓗ ᐊᐅᓚᑕᐅᑲᑕᖕᓂᖅ ᓄᖅᑲᖅᑎᓐᓇᓱᓕᕐᓗᒍ.

ᐊᓪᓚᓄᑦ ᒪᓕᒐᖅ ᐊᑐᖅᑐᕕᓂᕐᓄᑦ ᐊᒃᑕᑯᓄᐊᖅᑕᐅᔭᕆᐊᖃᖅᑐᑦ. ᑲᓇᑕᒥ ᒐᕙᒪᒃᑯ ᐊᑐᐊᒐᖏᓐᓂᒃ ᐊᑐᕈᓐᓃᖅᑎᑦᑎᔭᕆᐊᖃᖅᑐᑦ “ᒪᓂᑐᐃᓐᓇᖁᔨᓂᖏᑦ” ᐊᒻᒪᓗ “ᐊᑐᕈᓐᓃᖅᑎᑦᑎᓂᖏᓐᓂᒃ” ᐱᔪᓐᓇᐅᑎᑦᑎᓐᓂᒃ. ᑕᐃᒪᓐᓇ ᐱᒋᐊᕐᕕᑦᑎᐊᕙᐅᓇᔭᖅᑐᖅ.