ᓇᓗᓇᐃᖅᑕᐅᓯᒪᔪᖅ ᐊᖏᖃᑎᒌᒍᑎ ᐃᓚᖃᖅᑐᖅ ᐅᖓᑖᓂᒃ 40-ᓂ ᐅᓪᓗᒃᑯᑦ ᐃᓕᓐᓂᐊᕐᕕᖕᓂ ᐅᐸᒃᑕᐅᖃᑦᑕᖅᑐᓂᒃ ᐃᓄᖕᓄᑦ

For an English version of this story, see Landmark settlement includes more than 40 day schools attended by Inuit

ᐃᓄᐃ ᒫᓂ 1950-ᖏᓐᓂᒃ, 1960-ᖏᓐᓂᒃ ᐊᒻᒪ 1970-ᖏᓐᓂ ᐃᓕᓐᓂᐊᕆᐊᖃᑦᑕᓚᐅᕐᓯᒪᔪᑦ ᓇᓗᓇᐃᖅᑕᐅᓯᒪᔪᓂ 40 ᐅᖓᑖᓃᑦᑐᓂᒃ ᒐᕙᒪᑐᖃᒃᑯᑦ ᐃᓕᓐᓂᐊᕐᕕᖏᓐᓄᑦ ᑮᓇᐅᔭᖅᑖᕈᓐᓇᕐᓯᔪ ᐅᕙᙵᑦ $1.3 ᐱᓕᐊᓐ ᑖᓚᓂ ᐊᖏᕈᑎᑎᒍᑦ ᐋᕿᒃᓴᐅᑕᓂᑯᓂᒃ ᒐᕙᒪᑐᖃᒃᑯᑦ ᐃᖃᖅᑐᐃᕕᒡᔪᐊᖓᑦ ᑲᓇᑕᒥ ᐊᖏᓚᐅᕐᑕᖓᑦ ᐋᒐᓯ 19-ᖑᑎᓪᓗᒍ.

ᐃᖃᖅᑐᐃᕕᖕᒥᑦ ᐃᓱᒪᓕᐊᕆᔭᐅᔪᖅ ᐋᕿᒃᓯᒍᑎᐅᕗᖅ ᐃᖃᖅᑐᖅᑕᐅᕕᒃᑰᕈᑎᐅᓂᑯᒥᒃ, ᐱᒋᐊᖅᑕᐅᓂᑯ 2009-ᒥ, ᖃᐅᔨᒪᔭᐅᔪᖅ “ᐊᓪᓚᐃᑦ ᐅᓪᓗᒃᑯᑦ ᐃᓕᓐᓂᐊᕆᐊᖅᐸᒃᑐᑦ ᐃᖃᖅᑐᐃᕕᒃᑰᕈᑎᖓ” ᐅᕝᕙᓘᓐᓃᑦ “ᒪᒃᓖᓐ ᐊᑕᐅᑦᑎᒃᑯᑦ ᖃᓄᐃᓕᐅᕈᑎᖏᑦ ᒐᕙᒪᑐᖃᒃᑯᑦ ᐃᓕᓐᓂᐊᕐᕕᖏᓐᓄᑦ,” ᐅᕙᙵ ᐃᓅᔪᓐᓃᕐᓂᑯᒧᑦ ᒋᐅᕆ ᓚᔅᓕ ᒪᒃᓖᓐ, ᐃᓕᓐᓂᐊᕆᐊᖃᑦᑕᓚᐅᕐᓯᒪᔪᖅ ᐱᒋᐊᖅᑎᒃᑦᑎᓂᑯᑦ ᐱᒋᐊᕐᖓᐅᑎᕕᓂᕐᒥᒃ ᐱᓇᓱᒍᑎᒥᒃ.

ᒐᕙᒪᑐᖃᒃᑯᑦ ᐊᒻᒪᓗ ᓗᐊᐃᔭᐅᔪᑦ ᑭᒡᒐᖅᑐᐃᔪᑦ ᐸᓯᔭᒃᓴᙳᖅᑎᑦᑎᓯᒪᔪᓄᑦ ᐊᖏᖃᑎᒌᓕᓚᐅᕐᐳᑦ ᐋᕿᒃᑕᐅᔪᒥᒃ ᒫᑦᓯᐅᓚᐅᕐᑐᒥᑦ. ᑲᑎᒪᓚᐅᕐᑎᓪᓗᒋᑦ ᒪᐃᒥ, ᒐᕙᒪᑐᖃᒃᑯᑦ ᐃᖃᖅᑐᐃᕝᕕᖏᑦ ᐊᖏᓕᓚᐅᕐᐳᑦ ᐊᖏᕈᑎᒋᔭᐅᔪᒥᒃ ᐋᒐᓯ 19-ᖑᑎᓪᓗᒍ.

ᐊᖏᖃᑎᒌᒍᑎ ᑮᓇᐅᔭᖅᑖᖅᑎᑦᑎᒍᑎᐅᓂᐊᕐᑐᖅ ᓄᓇᖃᖅᑳᖅᑐᓂᒃ—ᐃᓕᓐᓂᐊᕆᐊᓚᐅᕐᓯᒪᔪᑦ ᒐᕙᒪᑐᖃᒃᑯᑦ ᐃᓕᓐᓂᐊᕐᕕᖏᓐᓄᑦ—ᐃᓚᐅᑎᑕᐅᓚᐅᕐᓯᒪᙱᑦᑐᑦ $1.9 ᐱᓕᐊᓐ ᑖᓚᐅᓂ ᐃᓕᓐᓂᐊᕆᐊᖅᑎᑕᐅᕙᒃᑐᓄᑦ ᐊᖏᕈᑎᕕᓂᕐᒥᒃ 2007-ᖑᑎᓪᓗᒍ.

ᐅᕘᓇᓕ ᐅᓪᓗᒃᑯᑦ ᐃᓕᓐᓂᐊᕐᕕᒃᓄᑦ ᐊᖏᕈᑎᑎᒍᑦ, ᒐᕙᒪᑐᖃᒃᑯᑦ ᑐᓂᓯᓇᔭᖅᑐᑦ $1.3 ᐱᓕᐊᓐ ᑖᓚᓂᒃ ᑯᐊᐳᕇᓴᒧᑦ ᐸᐸᑦᑎᔨᐅᓇᔭᖅᑐᒥᒃ ᐊᑭᓕᐅᑎᒃᓴᐅᓇᔭᖅᑐᓂᒃ ᐃᓕᓐᓂᐊᕆᐊᖅᐸᒃᑐᕕᓂᕐᓄᑦ.

ᑕᒪᕐᒥᒃ ᐃᓕᓐᓂᐊᕆᐊᖃᑦᑕᕐᓯᒪᓂᑯᑦ ᐱᔪᓐᓇᖅᑐᑦ ᑮᓇᐅᔭᖅᑖᕈᓐᓇᕐᓗᑎᒃ $10,000 ᐊᑐᓂᑦ.

ᑭᓯᐊᓂᓕ ᖁᓄᔪᕐᓂᐊᖅᑕᐅᖃᑦᑕᐃᓐᓇᕐᓂᑯᓄᑦ ᐅᕝᕙᓘᓐᓃᑦ ᐋᓐᓂᕐᓱᖅᑕᐅᖃᑦᑕᐃᓐᓇᕐᓯᒪᓂᑯᐃᑦ ᐊᑯᓂᕈᓗᒡᓗ ᓈᒻᒪᙱᓕᐅᕈᑎᐅᓯᒪᓗᓂ, ᐃᒻᒥᒃᑰᖓᓗᑎᒃ, ᒪᓕᒃᑕᐅᓂᐊᕐᓗᓂ ᖃᓄᑎᒋ ᐋᓐᓂᖅᑕᐅᓯᒪᓂᕐᒧᑦ, ᐊᑭᓖᒍᑎᒃᓴ ᒫᙵᑦ ᐱᒋᐊᕋᔭᖅᑐᑦ $50,000-ᓂ $200,000-ᓄ.

ᐊᒻᒪᓗ ᐊᖏᕈᑎᒋᔭᐅᓯᒪᔪᖅ ᓴᕿᑎᑦᑎᒍᑎᐅᓂᐊᖅᖢᓂ $200 ᒥᓕᐊᓐᑖᓚᓂᒃ ᐃᑲᔫᑎᒃᓴᓂᒃ ᐱᓕᕆᐊᒃᓴᓄᑦ, ᐅᖃᐅᓯᓕᕆᓂᕐᒧᑦ ᐊᒻᒪ ᐃᓕᖁᓯᓕᕆᓂᕐᒧᑦ ᐱᓕᕆᐊᒃᓴᓄᑦ, ᐊᒻᒪᓗ ᐋᓐᓂᐊᖃᖅᑕᐃᓕᓂᕐᒧᑦ ᒪᒥᓴᕈᑎᓄᓪᓗ ᐱᓕᕆᐊᒃᓴᓄᑦ.

ᓗᐊᐃᔭᐅᔪᑦ ᑖᒃᓱᒥᖓ ᐃᖃᖅᑐᐃᕕᒃᑰᕈᑎᐅᓯᒪᔪᒥ ᐱᓕᕆᐊᖃᕐᓂᑯᑦ ᐊᑭᓕᖅᑕᐅᓇᔭᖅᑐᑦ $55 ᒥᓕᐊᓐ ᑖᓚᓂ, ᐊᒻᒪᓗ ᐊᖏᖃᑎᒌᒍᑎ ᓴᓂᕐᕙᐅᓯᒪᓪᓗᓂ $7 ᒥᓕᐊᓐ ᑖᓚᓂ ᐃᑲᔪᕈᑎᐅᓂᐊᕐᓗᓂ ᐊᑭᓕᕈᑎᒃᓴᓄᑦ ᐱᓇᓱᒃᓯᒪᔪᓄᑦ.

ᖃᓄᖅ ᐱᓇᓱᒍᓐᓇᕐᒪᖔᑦ

ᐃᓕᓐᓂᐊᕆᐊᖃᑦᑕᕐᓂᑯᑦ ᐱᓇᓱᒍᓐᓇᕐᓯᔪᑦ ᒫᓐᓇ ᑮᓇᐅᔭᖅᑖᕈᑎᒃᓴᓂᒃ, ᑭᓯᐊᓂ ᐊᑭᓕᕐᓱᐃᓕᕋᔭᖅᑐᑦ ᐅᓪᓗᑦ 120 ᐊᓂᒍᓚᐅᖅᑎᓪᓗᒋ ᐅᕙᙵᑦ ᐋᒐᓯ 19-ᒥᑦ ᐊᖏᖃᑎᒌᒍᑎᕕᓂᕐᒥᑦ.

ᑮᓇᐅᔭᖅᑖᕋᓱᖕᓂᐊᕐᓗᑎᑦ, ᐅᕗᙵᕆᐊᖃᖅᐳᑎᑦ ᖃᕋᓴᐅᔭᒃᑯᑦ indiandayschools.com, ᐅᓇᓗ ᖃᕋᓴᐅᔭᕐᓄᐊᕐᓗᒍ PDF-ᑯᑦ ᐱᓇᓱᒍᑎᒃᓴᖅ ᑕᑕᑎᕆᐊᓕᒃ, ᑕᑕᑎᕐᓗᒍ ᐊᒻᒪ ᓇᒡᓯᐅᑎᓗᒍ ᐅᕗᖓ Gowling WLG Canada, ᓗᐊᐃᔭᐃᑦ ᑭᒡᒐᖅᑐᐃᔪᑦ ᐃᖃᖅᑐᐃᕕᒃᑰᖅᑎᑦᑎᔪᓂᒃ.

ᐃᓕᓐᓂᐊᕆᐊᕐᓯᒪᓂᑯᑦ ᐊᕐᕌᒎᖕᓂ ᒪᕐᕉᖕᓂᒃ ᓇᑉᐸᕐᒥᒡᓗ ᐱᓇᓱᒍᓐᓇᖅᑐᑦ. ᖃᐅᔨᒋᐊᒃᑲᓐᓂᕈᒪᒍᔅᓯ, ᐅᓇ ᑕᑯᖏᐊᕈᓐᓇᖅᑕᓯ ᐊᐱᖅᑯᑎᐅᓂᖅᐹᖑᕙᒃᑐᑦ (FAQ) ᓴᕿᔮᖅᑎᑕᐅᔪᓂᒃ.

ᑕᕝᕙᓂᓕ, ᑕᑯᔪᓐᓇᕐᓂᐊᖅᑐᓯ ᐃᓕᓐᓂᐊᕐᕕᖕᓂ ᐊᔪᙱᑎᑕᐅᓯᒪᔪᓂᒃ.

ᐃᓕᓐᓂᐊᕆᐊᖃᑦᑕᕐᓂᑯᑦ ᐱᓇᓱᙱᑦᑐᓐᓇᖅᑐᑦ

ᑕᒪᒃᑯᐊ ᐃᓕᓐᓂᐊᕆᐊᖃᑦᑕᕐᓂᑯᐃ ᖁᕕᐊᒋᔭᖃᙱᒃᑯᑎ ᐊᖏᖃᑎᒌᒍᑎᐅᔪᒥ ᐊᒻᒪᓗ ᐃᒻᒥᒃᑰᖓᓗᑎᒃ ᐃᖃᖅᑐᐃᕕᒃᑰᖅᑎᑦᑎᔪᒪᓗᑎᒃ ᐱᓇᓱᙱᑦᑐᓐᓇᖅᑐᑦ ᑖᔅᓱᒥᖓ ᐊᖏᕈᑎᒥ ᐅᓪᓗᐃᑦ 90 ᐃᓗᐊᓂ ᐱᒋᐊᕐᓗᓂ ᐋᒐᓯ 19-ᒥᑦ ᐊᖏᕈᑎᕕᓂᕐᒥᑦ.

ᐃᓕᓐᓂᐊᕆᐊᖃᑦᑕᕐᓂᑯᑦ ᑕᐃᒪᐃᓕᐅᕈᓐᓇᖅᑐᑦ ᖃᕋᓴᐅᔭᖏᓐᓄᑦ ᓴᕿᑎᑦᑎᓗᑎᒃ ᐃᓚᐅᔪᒪᙱᓐᓂᕐᒧᑦ ᑕᑕᑎᕆᐊᓕᖕᓂᑦ ᐅᕙᙵᑦ indiandayschools.com ᖃᕋᓴᐅᔭᒃᑯᑦ ᓴᕿᔮᒐᑎᒍᑦ. ᑕᑕᑎᕈᓐᓇᖅᑕᐃᑦ ᐊᒻᒪ ᓇᒡᓯᐅᑎᓗᒍ ᖃᕋᓴᐅᔭᒃᑯᑦ, ᓱᑲᑦᑐᒃᑯᑦ ᐅᕝᕙᓘᓐᓃᑦ ᑎᑎᖃᒃᑯᕕᒃᑯᑦ ᐅᕗᖓ Gowling WLG Canada.

ᑕᐃᒃᑯᐊ ᐃᓕᓐᓂᐊᕆᐊᖃᑦᑕᕐᓂᑯᑦ ᐃᓚᐅᔪᒪᓯᒪᙱᑦᑐᑦ ᑮᓇᐅᔭᖅᑖᕋᔭᙱᑦᑐᑦ, ᑭᓯᐊᓂᓕ ᐱᕕᖃᕈᓐᓇᖅᖢᑎᒃ ᐃᒻᒥᒃᑯᑦ ᐃᖃᖅᑐᐃᕕᒃᑰᖅᑎᑦᑎᓂᕐᒥᒃ.

“ᐃᓚᐅᔪᒪᙱᓐᓂᖅ ᐱᒻᒪᕆᐊᓘᕗᖅ ᐊᒻᒪᓗ ᐊᓯᔾᔨᖅᑕᐅᔪᓐᓇᔾᔮᙱᖢᓂ,” ᒐᐅᓕᖕᑯᑦ (Gowling WLG) ᐅᖃᕐᓯᒪᔪᑦ ᖃᕋᓴᐅᔭᒃᑯᑦ ᓴᕿᔮᒐᖓᓂᒃ.

ᐃᓄᐃᑦ, ᐊᓪᓚᖓᔪᐃᑦ, ᐊᓪᓚᐃᑦ ᑕᒪᐃᓐᓂ ᐊᔪᙱᑦᑐᑦ

ᐅᓇ ᐅᖃᐅᓯᖅ ᐊᑐᖅᑕᐅᖃᑦᑕᕋᓗᐊᖅᑎᓪᓗᒍ “ᐊᓪᓚᐃᑦ ᐅᓪᓗᒃᑯᑦ ᐃᓕᓐᓂᐊᕐᕕᖏᑦ,” ᑕᒪᐃᓐᓂᓕᒫᖅ ᓄᓇᖃᖅᑳᖅᓯᒪᔪᑦ—ᐃᓄᐃᑦ, ᐊᓪᓚᖓᔪᐃᑦ ᐅᕝᕙᓘᓐᓃᑦ ᐊᓪᓚᐃᑦ—ᑖᒃᑯᓂᖓ ᐃᓕᓐᓂᐊᕐᕕᖕᓂ ᐅᐸᖃᑦᑕᕐᓂᑯᑦ ᐊᔪᙱᑎᑕᐅᔪᑦ ᑮᓇᐅᔭᖅᑖᖅᑎᑕᐅᓂᕐᒥᒃ.

“ᑖᔅᓱᒥᖓ ᐅᖃᐅᓯᕐᒥ ᐊᑐᖅᖢᓂ ᐊᔪᓐᓇᕈᔪᓚᐅᕐᑐᖅ, ᓲᖃᐃᒻᒪ ᖃᐅᔨᒪᒐᑦᑎᒍᑦ ᓈᒻᒪᙱᓐᓂᖓᓂ ᐅᖃᐅᓯᖅ ᐊᒥᓱᓄᑦ. ᒐᕙᒪᑐᖃᒃᑯᑦ “ᐊᓪᓚᐃᑦ ᐅᓪᓗᒃᑯᑦ ᐃᓕᓐᓂᐊᕐᕕᖏᑦ” ᐋᕿᒃᑕᐅᓚᐅᕐᓯᒪᔪᖅ ᐅᕘᓇ ᑲᓇᑕᐅᑉ ‘ᐊᓪᓚᓄᑦ ᒪᓕᒐᕐᔪᐊᖅ,’ ᑐᕌᖓᓪᓗᓂ ᐊᓪᓚᓄᑦ, ᐃᓄᖕᓄᑦ ᐊᒻᒪ ᐊᓪᓚᖓᔪᓄᑦ,” ᒪᓕᒐᓕᕆᔨᒃᑯᑦ ᑲᒪᒋᔭᖃᖅᑐᑦ ᐃᖃᖅᑐᐃᕕᒃᑰᓕᕆᓂᕐᒥ, ᒐᐅᓕᖕ WLG, ᐅᖃᕐᓯᒪᔪᑦ ᖃᕋᓴᐅᔭᒃᑯᑦ ᓴᕿᔮᖅᑐᓂᒃ.

ᑕᐃᒪᓕ ᐅᑯᓇᙵᑦ 700 ᐅᖓᑖᓃᑦᑐᓂᒃ ᐃᓕᓐᓂᐊᕐᕕᖕᓂ ᓇᓗᓇᐃᖅᑕᐅᓯᒪᔪᓂᒃ ᐊᖏᕈᑎᓂᒃ, ᖃᔅᓯᐅᓂᖏᑦ ᐃᓕᓐᓂᐊᕐᕕᐅᔪᑦ ᐃᓄᖕᓄᑦ ᐅᐸᒃᑕᐅᖃᑦᑕᕐᓂᑯᑦ ᐃᒪᐃᓕᖓᔪᑦ:

• ᒫᓐᓇ ᓄᓇᕘᓕᖅᑐᒥᑦ: 27 ᒐᕙᒪᑐᖃᒃᑯᑦ ᐃᓕᓐᓂᐊᕐᕕᖏᑦ, ᐃᓚᐅᓪᓗᑎᒃ ᐃᓕᓐᓂᐊᕐᕕᐅᔪᑦ ᐊᐅᓚᑕᐅᔪᑦ ᓄᓇᓕᖕᓂ ᐃᓄᖃᖅᑐᑦ ᐊᓯᖓᓂᖔᕐᓂᑯᓂᑦ, ᒪᑯᑎᑐᓇᖅ, ᐳᐊᑦ ᐴᕕᐊᓪ (Port Burwell), ᐸᑦᓗᐱᖕ (Padoping) ᕿᑭᖅᑕᖅ, ᐊᒻᒪ ᓴᐅᑦ ᑳᒻᑉ ᐱᐊᓱ ᕿᑭᖅᑕᓂᒃ (South Camp, Belcher Islands-ᓂ).

ᐃᓚᐅᑎᑦᑎᖕᒥᔪᑦ ᓂᐊᖁᙴᒥᑦ ᐊᒻᒪ ᓱ ᒫᑎᓐ ᕗᕉᐱᔪ ᐃᓕᓐᓂᐊᕐᕕᒃᓂᑦ, ᐊᒻᒪ ᐃᓕᓐᓂᐊᕐᕕᖕᓂᑦ ᐊᔾᔨᒌᙱᑦᑐᓃᑦᑐᓂ ᐊᓯᙳᕐᓯᒪᓕᕐᓯᒪᔪᓂᑦ ᒫᓐᓇ ᓄᓇᒋᔭᐅᓪᓚᕆᓕᖅᑐᓂᒃ.

ᑭᓯᐊᓂᓕ ᐊᔪᔾᔮᙱᓪᓗᓂ, ᐃᓕᓐᓂᐊᕆᐊᖃᑦᑕᕐᓂᑰᔭᕆᐊᖃᖅᐳᑎᑦ ᓇᓕᐊᓐᓄᑦ 27-ᓄᑦ ᐃᓕᓐᓂᐊᕐᕕᖕᓄᑦ ᓯᕗᓂᐊᓂ ᐄᐳᕈᓪ 1, 1970, ᑕᒪᒃᑯᐊ ᐃᓕᓐᓂᐊᕐᕕᐅᔪᑦ ᑲᒪᒋᔭᐅᓂᖏᑦ ᓅᑕᐅᑎᓪᓗᒋ ᓄᓇᑦᓯᐊᑉ ᒐᕙᒪᖓᓄᑦ.

• ᒫᓐᓇ ᓄᓇᕕᐅᓕᖅᑐᒥᑦ: 11 ᐃᓕᓐᓂᐊᕐᕕᐅᔪᑦ. ᐊᒥᓲᓂᕐᓴᑦ ᓄᓇᓖᑦ ᐊᑎᑐᖃᖏᓐᓂᒃ ᐊᑎᖃᕐᒪᑕ ᐊᑐᖅᑕᐅᖃᑦᑕᕈᓐᓃᖅᑐᓂᒃ, ᐃᓛᓐᓂ ᑎᑎᕋᕐᓂᙱᖢᑎᒃ, ᐅᑯᑎᑐᓇᖅ ᒍᕇᑦ ᕗᐃᐅᓪ ᐃᓕᓐᓂᐊᕐᕕᒃ (ᑰᔾᔪᐊᕌᐱᒃ), ᕗᐊᐃᑲᒻ ᐸᐃ ᒐᕙᒪᒃᑯᑦ ᐃᓕᓐᓂᐊᕐᕕᖓᑦ (ᑲᖏᖅᓱᔪᐊᖅ), ᓇᑐᕈ-ᑖᒻ ᐃᕗᔨᕕᒃᒥ ᐃᓕᓐᓂᐊᕐᕕᒃ (ᐃᕗᔨᕕᒃ) ᐊᒻᒪ ᐃᓄᒃᔪᐊᒃ ᐃᓕᓐᓂᐊᕐᕕᒃ (ᐃᓄᒃᔪᐊᒃ).

ᐊᒥᓲᓂᕐᓴᒃᑯᓪᓕ, ᑲᒪᒋᔭᖃᕐᓂᖅ ᑖᒃᑯᓂᖓ 11-ᓂ ᓄᓇᕕᒃᒥ ᐃᓕᓐᓂᐊᕐᕕᖕᓂᒃ ᓅᑕᐅᓚᐅᕐᓯᒪᔪᑦ ᐅᑯᓄᖓ ᑲᑎᕕᒃ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᓯᑎᐱᕆ 1, 1978-ᒥᑦ.

• ᒫᓐᓇ ᓄᓇᑦᓯᐊᖑᓕᖅᑐᒥ: ᑎᓴᒪᐅᔪᑦ ᒐᕙᒪᑐᖃᒃᑯᑦ ᐃᓕᓐᓂᐊᕐᕕᖏᑦ ᐅᕙᓂ ᑐᒃᑐᔭᖅᑐᖅ, ᓵᒃ ᕼᐋᐳ, ᕼᐅᒪᓐ ᐊᐃᓚᓐ ᐊᒻᒪ ᐃᓅᕕᒃᒥᑦ.

ᑲᒪᒋᔭᖃᕐᓂᖅ ᑖᒃᑯᓂᖓ ᐃᓕᓐᓂᐊᕐᕕᖕᓂ ᓅᑕᐅᓚᐅᕐᓯᒪᔪᑦ ᓄᓇᑦᓯᐊᑉ ᒐᕙᒪᖓᓄᑦ ᐄᐳᕈᓪ 1, 1969-ᒥᑦ.

ᑕᒪᓐᓇᓕ ᑐᑭᖃᖅᑐᖅ ᐃᓕᓐᓂᐊᖅᑎᕕᓂᐅᔪᑦ ᒪᑯᓇᓂ ᐃᓕᓐᓂᐊᕐᕕᖕᓂ ᒍᐊᑕᓐ ᐅᕌᐳᑦᓴᓐ ᐃᓕᓐᓂᐊᕐᕕᐊᓗᒃ ᐃᖃᓗᖕᓂᑦ, ᓲ ᔮᓐ ᕗᕌᖕᒃᓕᓐ ᐃᓕᓐᓂᐊᕐᕕᒃ ᔭᓗᓇᐃᒥ, ᑭᕙᓪᓕᕐᒥᑦ ᐃᓕᓐᓂᐊᕆᐊᕐᕕᒃ ᑲᖏᖅᖠᓂᕐᒥ ᐊᒻᒪᓗ ᑰᔾᔪᐊᕌᓗᖕᒥᑦ ᐃᓕᓐᓂᐊᕐᕕᒃᒥᑦ ᐃᓕᓐᓂᐊᕆᐊᕐᓂᑯᑦ ᐊᔪᖅᑎᑕᐅᔪᑦ.

ᐃᓄᐃᑦ ᑲᑐᔾᔨᖃᑎᒌᖏᑦ ᓈᒻᒪᒃᓴᙱᑦᑐᑦ ᐊᖏᕈᑎᐅᔪᒥᑦ

ᓄᓇᕕᒃᒥᑦ, ᒫᓃᐸᓗᖕᒪᑕ 3,000 ᐃᓕᓐᓂᐊᕆᐊᖃᑦᑕᕐᓂᑯᑦ 11-ᓂ ᐊᔾᔨᒌᙱᑦᑐᓂᒃ ᐃᓕᓐᓂᐊᕐᕕᒃᒥᑦ ᐱᔪᓐᓇᕋᔭᖅᑐᒃᓴᐅᔪᑦ.

ᒪᑭᕕᒃ ᑯᐊᐳᕇᓴᓐᑯᑦ ᐅᖃᓚᐅᕐᑐᑦ ᓄᓇᕕᒃᒥ ᐃᓄᐃᑦ ᐊᐱᖁᑎᒃᓴᖃᖅᑐᑦ ᐱᔪᓐᓇᕆᐊᒃᓴᖏᓐᓂᒃ ᒪᑭᕕᒃᑯᑦ ᒪᓕᒐᓕᕆᓂᕐᒧᑦ ᐱᓕᕆᕝᕕᖓᓄᑦ ᐅᖄᓚᔪᓐᓇᖅᑐᑦ ᐅᕗᖓ 418-522-2224, ext. 4.

ᓄᓇᕗᑦ ᑐᙵᕕᒃ ᑎᒥᖓ, ᐃᓚᐅᓪᓗᑎᒃ ᒪᑭᕕᒃ ᐊᒻᒪ ᐃᓄᕕᐊᓗᐃᑦ ᑯᐊᐳᕇᓴᒃᑯ, ᓈᒻᒪᒃᓴᓚᐅᙱᑦᑐᑦ ᐊᖏᖃᑎᒌᒍᑎᒥ ᓲᖃᐃᒻᒪ ᐃᓄᖕᓂ ᑭᒡᒐᖅᑐᐃᔨᑕᖃᙱᑦᑐᑦ ᐃᑲᔫᓯᐊᒃᓴᓕᕆᓂᒃᑯᑦ.

ᓄᓇᕗᑦ ᑐᙵᕕᒃᑯᑦ ᑎᒥᖓ ᐊᒻᒪ ᓈᒻᒪᒃᓴᖅᓯᒪᙱᑦᑐᑦ ᐋᕿᒃᑕᐅᓯᒪᔪᒥᑦ ᐊᖏᕈᑎᐅᑉ ᐃᓱᖃᖅᑎᕝᕕᖏᓐᓂᒃ.

ᐄᐳᕉᓚᐅᕐᓯᒪᔪᒥ, ᓄᓇᕗᑦ ᑐᙵᕕᒃ ᑎᒥᖓ, ᐃᓚᖃᖅᖢᑎᒃ 6-ᓂ ᑲᑐᔾᔨᖃᑎᒌᓂᒃ ᐊᒻᒪ ᐸᓯᔭᒃᓴᐅᑎᑦᑎᔨᓂᒃ, ᕿᓂᕋᓱᓚᐅᕐᓯᒪᕗᑦ ᑲᒪᒋᔭᖃᖃᑕᐅᔪᓐᓇᕐᓂᕐᒥᒃ, ᑭᓯᐊᓂᓕ ᒐᕙᒪᑐᖃᒃᑯᑦ ᐃᖃᖅᑐᐃᕕᖓᑦᑕ ᐃᖃᖅᑐᐃᔨᖓ ᐋᒃᑳᓚᐅᕐᓯᒪᔪᖅ ᑐᒃᓯᕋᐅᑎᒋᔭᖏᓐᓂᒃ.

ᖁᕕᐅᓱᙱᓗᐊᕈᕕᑦ ᐊᒻᒪᓗ ᐅᖃᓪᓚᖃᑎᖃᕈᒪᓗᑎᑦ, ᐃᖃᖅᑐᐃᕕᒃᑰᖅᑎᑦᑎᔪᑦ ᒪᓕᒐᓕᕆᔨᖏ ᐅᖃᕐᓯᒪᔪᑦ ᐅᖄᓚᒍᓐᓇᕐᓂᔅᓯᓐᓂᒃ ᐅᕗᖓ Hope for Wellness Helpline ᐅᕙᓂ 1-855-242-3310, ᑖᓐᓇᓗ ᐊᑐᐃᓐᓇᐅᖏᓐᓇᐅᔭᖅᑐᖅ ᐃᑲᕐᕋᓂ 24-ᓂ ᐅᓪᓗᕐᒥᑦ, ᐅᓪᓗᓂ 7-ᓂ ᐱᓇᓱᐊᕈᓯᕐᒥᑦ.