ᓈᒻᒪᙱᑦᑐᓂ ᐱᓕᕆᐊᖃᖃᑦᑕᕐᓂᑯ ᒥᓂᔅᑕᐅᓕᕐᑐᖅ ᕿᒥᕐᕈᐊᕐᓂᐊᖅᑐᖅ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐃᒡᓗᖃᖅᑎᑦᑎᓂᕐᒥᒃ ᐱᓕᕆᐊᖏᓐᓂᒃ

ᐊᕐᕌᒍᒐᓴᖕᓂ ᒪᓕᒐᓕᕆᔨᕐᔪᐊᖑᓪᓗᓂ ᒥᓂᔅᑕᓂ ᐱᓕᕆᐊᖃᖃᑦᑕᕐᓯᒪᓪᓗᓂ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᐃᒡᓗᖃᖅᑎᑦᑎᓂᕐᒧᑦ ᐱᓕᕆᐊᖑᔪᓂᒃ, ᐅᓇ ᐃᖅᑲᓇᐃᔮᒃᓴᓕᕆᓂᕐᒧᑦ ᒥᓂᔅᑕ ᐋᑕᒻ ᓚᐃᑦᓯᑑᓐ ᑐᓴᖅᑎᑦᑎᓕᓚᐅᕐᑐᖅ ᐋᖅᑭᒃᓯᓯᒪᓂᖓᓂᒃ ᕿᒥᕐᕈᐊᕐᓂᐊᕐᓗᓂ ᖃᓄᐃᓕᐅᕈᓯᕐᓂᒃ ᐃᒡᓗᖃᖅᑎᑦᑎᔾᔪᑎᐅᔪᓂᒃ ᐃᖅᑲᓇᐃᔭᖅᑎᑦᑎᔨᓂᒃ.

ᐅᓇ ᑐᓴᖅᑎᑦᑎᔾᔪᑎᐅᓕᓚᐅᕐᑐᖅ ᐅᓇ ᔮᓇᑦ ᐱᑦᓯᐅᓛᖅ ᐳᕉᔅᑐ, ᒪᓕᒐᓕᐅᖅᑎ ᐃᖃᓗᐃᑦ-ᓯᓈᒧᑦ, ᐊᐱᕆᑎᓪᓗᒍ ᓚᐃᑦᓯᑑᓐᒥ ᒫᔅᓯ 9-ᒥ ᒪᓕᒐᓕᕆᔨᕐᔪᐊᑦ ᑲᑎᒪᑎᓪᓗᒋ ᖃᓄᐃᓕᐅᕐᓂᐊᕆᐊᒃᓴᖓᓂᒃ ᐃᒡᓗᖃᙱᓗᐊᕐᓂᖏᑦ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ.

“ᐅᓇ ᒥᓂᔅᑕ ᒫᓃᙶᖅᑎᓪᓗᒍ ᑭᖑᓪᓕᕐᒥ ᑲᑎᒪᔨᐅᓚᐅᕐᑐᓂᒃ, ᐅᖃᐅᓯᖃᖃᑦᑕᓚᐅᕐᓯᒪᖕᒪᑦ ᐃᖅᑲᓇᐃᔭᖅᑎᓄᑦ ᐃᒡᓗᒃᓴᕆᔭᐅᔪᓂᒃ ᖃᔅᓰᑲᓪᓚᒃᖢᓂ,” ᐳᕉᔅᑐ ᐅᖃᖅᑐᖅ.

“ᐊᐅᓚᑦᑎᔨᐅᓂᑰᓪᓗᖓ ᐅᕝᕙᓘᓐᓃᑦ ᑭᒃᑯᓕᒫᓄᑦ ᐱᔨᑦᑎᕋᐳᑎᓂᒃ ᐊᖓᔪᖅᑳᖑᓯᒪᓪᓗᖓ, ᐅᔾᔨᕈᓱᓗᐊᕋᒪ ᐅᓄᐊᓗᐊᕐᑐᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐃᒡᓗᖃᑦᑎᐊᖃᑦᑕᙱᓐᓂᖏᓐᓂᒃ.”

ᓚᐃᑦᓯᑑᓐ ᐅᖃᓚᐅᕐᑐᖅ, “ᖁᕕᐊᓱᒃᐳᖓ ᑲᑎᒪᔨᕐᔪᐊᓂᒃ ᑐᓴᖅᑎᑦᑎᓂᐊᕐᓂᓐᓂ ᐱᓕᕆᐊᒃᑯᑦ ᕿᒥᕐᕈᐊᕐᓂᐊᕋᑦᑕ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᓄᑦ ᐃᒡᓗᖃᖅᑎᑦᑎᓂᖏᓐᓂᒃ ᑕᒪᓐᓇ ᐱᓕᕆᐊᕆᓂᐊᕋᑦᑎᒍᑦ.”

ᐱᓕᕆᐊᒧᑦ ᐊᑐᐊᒐᖅ ᐅᖃᕐᓯᒪᖕᒪᑦ ᐃᖅᑲᓇᐃᔭᖅᑎᓂᒃ ᐃᖅᑲᓇᐃᔭᕐᓂᖏᓐᓂᒃ ᐃᒡᓗᖃᖅᑎᑕᐅᓗᑎᒃ ᐊᒻᒪᓗ ᐃᖅᑲᓇᐃᔮᖃᖅᑐᑦ ᓇᓗᓇᕐᑐᒥᒃ ᓄᖃᕐᕕᒃᓴᓕᖕᓂ ᐃᖅᑲᓇᐃᔭᖅᑎᑖᕋᓱᖕᓂᕐᒧᑦ ᐊᒻᒪ ᐃᖅᑲᓇᐃᔭᖅᑎᓂᒃ ᐃᖅᑲᓇᐃᔭᐃᓐᓇᖅᑎᑦᑎᓇᓱᒃᖢᑎᒃ ᓄᓇᕗᒥᑦ ᑭᒃᑯᓕᒫᓄᑦ ᐱᔨᑦᑎᕋᐅᑎᓂᒃ.

ᐊᕐᕌᓂᐅᓚᐅᕐᑐᖅ ᒪᐃᑦᓯᑑᓐ ᐅᖃᐅᓯᖃᓚᐅᕐᓯᒪᖕᒪᑦ ᐃᖅᑲᓇᐃᔭᖅᑎᖏᓐᓄᑦ ᐃᒡᓗᑖᖅᑎᑦᑎᔾᔪᑎᖏᓐᓂᒃ, ᐅᖃᕐᓯᒪᓪᓗᓂ 71 ᐳᓴᓐᑎᖏᑦ ᒐᕙᒪᒃᑯᑦ ᐃᒡᓗᖁᑎᖏᓐᓂᒃ ᐃᒡᓗᒋᔭᐅᓂᖏᓐᓂᒃ ᑮᓇᐅᔭᓕᐅᓛᓄᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᓄᑦ.

ᓴᖅᑭᑎᑦᑎᓚᐅᕐᓯᒪᒋᓪᓗᓂ ᐃᓄᐃᑦ ᐃᒡᓗᖃᕐᑎᑕᐅᔪᑦ ᐅᓄᙱᓐᓂᕐᓴᐅᓂᖏᓐᓂᒃ ᖃᓪᓗᓈᓂᒃ ᐃᖅᑲᓇᐃᔭᖃᑎᖏᓐᓂᒃ ᑕᒪᓐᓇᑦᑕᐅᖅ ᑖᔅᓱᒪ 2018-ᒥ ᐅᖃᐅᓯᕆᓚᐅᕐᓯᒪᒋᓪᓗᓂᐅᒃ.

ᐳᕉᔅᑐ ᐊᐱᕆᓚᐅᕐᒥᔪᖅ ᓚᐃᑦᓯᑑᓐᒧ ᖃᔅᓯᑦ ᐃᖅᑲᓇᐃᔭᖅᑎᒋᔭᐅᔪᑦ ᐊᒻᒪᓗ ᓇᓗᓇᖅᑐᒥ ᓄᖅᑲᕐᕕᒃᓴᓖᑦ ᓄᓇᕗᒥᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑐᑦ ᐃᒡᓗᖃᙱᑦᑕᕆᐊᒃᓴᖏᓐᓂᒃ ᐅᕝᕙᓘᓐᓃᑦ ᐃᒡᓗᖃᕈᓐᓃᓕᒑᕙᒃ, ᑭᓯᐊᓂᓕ ᐅᖃᓚᐅᕐᑐᖅ ᐱᓕᕆᕝᕕᖓ ᑕᒪᒃᑯᓂᖓ ᑎᑎᕋᐅᓯᖃᖃᑦᑕᙱᓐᓂᕋᖅᖢᓂᒋᑦ.

ᑐᓄᓂᕐᒧᑦ ᒪᓕᒐᓕᐅᕐᑎ ᑭᐅᕋᓐ ᓄᑕᕋᖅ ᐊᐱᖅᓱᓚᐅᕐᓯᒪᔪᖅ ᓚᐃᑦᓯᑑᒥ ᒫᔅᓯ 10-ᖑᑎᓪᓗᒍ ᖃᐅᔨᕚᓪᓕᕈᑎᐅᓚᐅᕐᑐᓂᒃ ᐃᖅᑲᓇᐃᔭᖅᑎᓄᑦ ᐃᒡᓗᓂᒃ ᓈᒻᒪᒃᓴᙱᔾᔪᑎᐅᔪᓂᒃ ᒥᑦᑎᒪᑕᓕᒃᒥ ᐱᓗᐊᕐᑐᒥ.

ᒫᓃ 70-ᖏᓐᓃᒻᒪᑕ ᓄᓇᕗᒥᑦ ᒐᕙᒪᒃᑯᓐᓄᑦ ᐃᖅᑲᓇᐃᔮᒃᓴᑦ ᐃᓄᖃᙱᑦᑐᑦ ᑕᕝᕙᓂ ᓄᓇᓕᖕᓂ, ᑕᐃᒪᓕ ᓄᑕᕋᖅ ᖃᐅᔨᔪᒪᓚᐅᕐᑐᖅ ᖃᓄᖅ ᒐᕙᒪᒃᑯᑦ ᐋᖅᑭᒃᓯᖃᑦᑕᕐᒪᖔᑦ ᓇᓕᐊᒃ ᐃᖅᑲᓇᐃᔮᒃᓴᖅ ᐃᒡᓗᖃᕈᑎᐅᔪᓐᓇᕐᒪᖔᑦ ᐊᒻᒪᓗ ᓇᓕᐊᒃ ᐊᔪᕈᑎᐅᖕᒪᖔ?

ᓚᐃᑦᓯᑑᓐ ᐅᖃᓚᐅᕐᑐᖅ ᐃᖅᑲᓇᐃᔭᖅᑎᓂᒃ ᐃᒡᓗᑖᖅᑎᑦᑎᓂᕐᒧᑦ ᑲᑎᒪᔨᕋᓛᑦ ᑲᒪᒋᔭᖃᖃᑦᑕᕐᓂᖏᓐᓂᒃ ᑕᒪᒃᑯᓂᖓ ᐃᒡᓗᑖᖅᑎᑦᑎᓇᓱᒃᖢᑎᒃ ᑭᓯᐊᓂᓕ “ᐊᔪᕐᓇᖅᑐᖅᓯᐅᑲᑕᓚᐅᕐᓂᕋᖅᑕᖏᑦ” ᖃᖓᑦᑎᐊᓵᖅ ᐅᓄᙱᑦᑐᕈᓗᖕᓂᒃ ᐃᒡᓗᑖᖅᑎᑦᑎᓯᒪᓪᓗᑎᒃ.

“ᑖᒃᑯᐊ ᑲᑎᒪᔨᕋᓛᑦ ᐃᒡᓗᑖᖅᑎᑦᑎᖁᔭᐅᓯᒪᓂᕐᓴᐅᓕᕐᒪᑕ ᐱᑐᐃᓐᓇᐅᓗᐊᙱᑦᑐᒃᑯᑦ,” ᓚᐃᑦᓯᑑᓐ ᐅᖃᓚᐅᕐᑐᖅ ᖃᓄᐃᓕᖓᓕᕐᓂᖏᓐᓂᒃ ᒫᓐᓇᐅᔪᖅ ᑕᖅᑭᐅᓵᖅᑐᓂᒃ.

ᐅᖃᓚᐅᕐᑐᖅ ᑖᓐᓇ ᑲᑎᒪᔨᕋᓛᓄᑦ ᐃᒡᓗᓂ ᑭᒃᑯᓕᒫᓂᒃ ᐱᕐᕈᓗᐊᕿᑎᑦᑎᑦᑕᐃᓕᓂᕐᒥᒃ ᐃᖅᑲᓇᐃᔮᖃᖅᑐᓄᑦ ᑐᓂᓯᓂᕐᓴᐅᓂᐊᕐᓂᕋᖅᖢᑎᒃ.

ᒫᓐᓇᓕ 8-ᖑᔪᑦ ᐃᖅᑲᓇᐃᔭᖅᑎᓄᑦ ᐃᒡᓗᒃᓴᐃᑦ ᒥᑦᑎᒪᑕᓕᒃᒥ ᐃᓄᖃᕈᓐᓇᕐᓯᔪᑦ, ᐅᖃᓚᐅᕐᑐᖅ ᓚᐃᑦᓯᑑᓐ. ᑎᓴᒪᑦ ᓄᑖᙳᕆᐊᖅᑕᐅᔭᕆᐊᖃᓚᐅᕐᒪᑕ ᐊᒻᒪᓗ ᐊᑐᐃᓐᓇᐅᓕᕐᓂᐊᖅᖢᑎᒃ ᑕᖅᑭᓂᒃ ᐱᖓᓱᓂᒃ ᐅᖓᑖᓂᓪᓘᓐᓃᑦ, ᐊᒻᒪᓗ ᑕᓪᓕᒪᑦ ᐃᒡᓗᐃᑦ ᐋᖅᑭᒃᓱᖅᑕᐅᒃᑲᓐᓂᕆᐊᖃᖅᖢᑎᒃ.

ᐊᕐᕕᐊᑦ ᓂᒋᐊᓄᑦ ᒪᓕᒐᓕᐅᖅᑎ ᔫ ᓴᕕᑲᑖᖅ ᐊᒻᒪ ᐃᖃᓗᐃᑦ-ᑕᓯᕐᓗᒃᒧᑦ ᒪᓕᒐᓕᐅᖅᑎ ᔪᐊᔾ ᕼᐃᒃᔅ, ᑕᒪᕐᒥᒃ ᒥᓂᔅᑕᐅᓂᑰᒃ ᐊᒻᒪ ᓚᐃᑦᓯᑑᓐᒥ ᑐᓴᒃᑲᓐᓂᕈᒪᓚᐅᕐᑐᑦ ᕿᒥᕐᕈᐊᖅᑕᖏᑦᑕ ᒥᒃᓵᓄᑦ.

ᓴᕕᑲᑖᖅ ᐊᐱᕆᓚᐅᕐᑐᖅ ᖃᑯᒍ ᕿᒥᕐᕈᐊᓯᒋᐊᕐᓂᐊᕐᒪᖔᑦ ᐊᒻᒪ ᖃᑯᒍ ᐱᐊᓂᒃᑕᐅᓇᔭᕐᒪᖔᑦ ᐊᒻᒪᓗ ᖃᐅᔨᔭᐅᔾᔪᑎᑦ ᒥᓂᔅᑕᒧᑦ ᓴᖅᑭᑎᑕᐅᓇᔭᕆᐊᒃᓴᖏᓐᓂᒃ.

ᓚᐃᑦᓯᑑᓐ ᐅᖃᓚᐅᕐᒥᔪᖅ ᐃᓚᖓ ᐱᓕᕆᐊᕆᔭᐅᓇᓱᒃᑐᑦ ᖃᐅᔨᓴᕐᓂᕐᒧᑦ ᓈᒻᒪᙱᓕᐅᕈᑎᓂᒃ ᓇᓂᓯᔪᓐᓇᕋᔭᕆᐊᒃᓴᖏᓐᓂᒃ ᑭᓯᐊᓂᓕ ᐅᖓᑖᓄᑦ ᑕᒪᑐᒧᖓ ᑐᓴᒐᒃᓴᖃᒃᑲᓐᓂᖏᑦᑐᖅ.

ᓚᐃᑦᓯᑑᓐ ᐅᖃᖅᑎᓪᓗᒍ ᖃᑯᒍ ᐱᐊᓂᒃᑕᐅᓇᔭᕐᓂᖓ ᓇᓗᓂᕋᖅᖢᓂᐅᒃ ᓴᕕᑲᑖᖅ ᐊᐱᕆᓕᓚᐅᕐᑐᖅ, “ᐅᓇ ᕿᒥᕐᕈᐊᕐᓂᖅ ᐸᕐᓇᒃᑕᐅᓯᒪᓚᐅᕐᐹ ᐅᕝᕙᓘᓐᓃᑦ ᐱᒋᐊᖅᑎᓕᓵᖅᑕᖓ?”

ᓚᐃᑦᓯᑑᓐ ᐅᖃᓚᐅᕐᑐᖅ ᑕᒪᓐᓇ ᐋᖅᑭᒃᓱᖅᑕᐅᕙᓪᓕᐊᓂᖓᓂᒃ ᓱᓕ, ᑭᓯᐊᓂᓕ ᐅᖃᓚᐅᕐᑐᖅ ᐃᖅᑲᓇᐃᔭᖅᑎᓂᒃ ᐅᖃᖃᑎᖃᕐᓯᒪᓂᖓᓂᒃ. “ᐅᖃᕈᓐᓇᖅᑐᖓ ᑲᑎᒪᔨᓄᑦ ᑖᓐᓇ ᕿᒥᕐᕈᐊᕐᓂᖅ ᐱᐊᓂᒃᑕᐅᓂᐊᕐᓂᖓᓂᒃ,” ᐅᖃᖅᑐᖅ.

ᐳᕉᔅᑐᑎᑐᑦ, ᓴᕕᑲᑖᖅ ᐅᖃᓚᐅᕐᒥᔪᖅ ᓚᐃᑦᓯᑑᓐ ᑕᒪᑐᒥᖓ ᐅᖃᐅᓯᖃᕈᓘᔭᖃᑦᑕᓚᐅᕐᓂᖓᓂᒃ ᒪᓕᒐᓕᕆᕕᒡᔪᐊᒥ.

“ᒪᓕᒐᓕᐅᖅᑎ ᓚᐃᑦᓯᑑᓐ ᐅᖃᓚᐅᕐᒪᑦ ᐃᓛᓐᓂ ᐃᓄᐃᑦ ᒐᕙᒪᒃᑯᑦ ᐃᒡᓗᖓᓃᑦᑐᑦ ᐊᑯᓂᐊᓘᓕᖃᑦᑕᕐᒪᑕ ᐊᒻᒪᓗ ᐃᖅᑲᓇᐃᔭᖅᑎᑦ ᐃᒡᓗᒦᑦᑐᓐᓇᕐᓂᖏᓐᓂᒃ ᖃᓄᖅ ᐊᑯᓂᐅᑎᒋᔪᒥᒃ ᐋᖅᑭᒃᑕᐅᔭᕆᐊᖃᕐᒪ ᐊᒻᒪᓗ ᐃᒡᓗᑖᕈᓐᓇᖅᑎᑕᐅᓕᕈᓐᓇᕐᓗᑎᒃ ᓇᖕᒥᓂᒃᓴᖏᓐᓂᒃ,” ᓴᕕᑲᑖᖅ ᐅᖃᓚᐅᕐᑐᖅ, ᐊᐱᕆᓪᓗᓂ ᑕᒪᓐᓇ ᐃᓱᒪᒋᔭᐅᓂᐊᕐᒪᖔᑦ ᕿᒥᕐᕈᐊᓕᕐᐸᑕ.

ᓚᐃᑦᓯᑑᓐ ᐅᖃᓚᐅᕐᑐᖅ ᖃᓄᓪᓚᕆᒃ ᐅᖃᓪᓚᕆᒍᓐᓇᙱᓐᓂᕋᖅᖢᓂ ᕿᒥᕐᕈᐊᕈᑎᐅᓂᐊᖅᑐᑦ ᒥᒃᓯᖏᓐᓄᑦ. “ᐱᒻᒪᕆᐊᓘᖕᒪᑦ ᐃᓱᒪᓕᐊᕆᔭᐅᔪᑦ ᐋᖅᑭᒃᓯᒪᓂᒃᑰᕆᐊᖃᕐᓂᖏᓐᓂᒃ,” ᐅᖃᖅᑐᖅ.

ᕼᐃᒃᔅ ᐊᐱᕆᓚᐅᕐᑐᖅ ᓚᐃᑦᓯᑑᓐ ᖃᓄ ᐱᓕᕆᐊᖃᕈᒪᓇᔭᕆᐊᒃᓴᖓᓂᒃ ᕿᒥᕐᕈᐊᕐᓂᕐᒧᑦ, ᑭᓯᐊᓂᓕ ᐅᖃᖅᖢᓂ ᑐᓴᖅᑎᑦᑎᒃᑲᓐᓂᕈᓐᓇᙱᓂᕋᖅᖢᓂᓗ ᑭᓯᐊᓂᓕ ᑕᒪᓐᓇ ᖃᓄᐃᓕᐅᕐᓂᖅ ᐱᕚᓪᓕᕈᑎᐅᓂᐊᕐᓂᖓᓂᒃ.