ᓯᕗᓕᐅᕐᑎ ᐅᖃᖅᑐᖅ ᒐᕙᒪᒃᑯ ᐱᖁᔭᓕᐅᔾᔮᙱᓐᓂᖏᓐᓂᒃ ᖃᕋᓴᐅᔭᒃᑯᑦ ᑐᒃᑐᐃᑦ ᓂᕿᖏᓐᓂᒃ ᓂᐅᕐᕈᑎᖃᖃᑦᑕᕐᓂᖅᒧᑦ

ᓄᓇᕗᒥᑦ ᓯᕗᓕᐅᕐᑎ ᐅᖃᓚᐅᕐᑐᖅ ᒐᕙᒪᖏᑦ ᐃᓱᒪᙱᓐᓂᖏᓐᓂᒃ ᐱᖁᔭᓕᐅᕈᒪᓂᕐᒥᒃ ᒪᑯᓄᖓ ᖃᕋᓴᐅᔭᒃᑯᑦ ᑐᒃᑐᓂ ᓂᐅᕈᑎᖃᖃᑦᑕᖅᑐᓄᑦ ᐃᓄᖕᓄᑦ.

ᑭᓯᐊᓂᓕ, “ᑕᒪᓐᓇ ᑲᒪᒋᔭᐅᔭᕆᐊᖃᖅᑐᖅ ᓄᓇᕗᑦ ᑐᙵᕕᒃᑯᓐᓄᑦ,” ᔫ ᓴᕕᑲᑖᖅ ᐅᖃᓚᐅᕐᑐᖅ ᐊᐱᖅᓱᕐᓇᐅᑎᓪᓗᒍ ᒪᓕᒐᓕᕆᕕᒡᔪᐊᒥ ᒫᔅᓯ 15-ᒥᑦ.

“ᒐᕙᒪᐅᓪᓗᑕ, ᓄᓇᕗᒧᑦ ᐊᖏᕈᑎᓄᑦ ᐊᐅᓚᑕᐅᒐᑦᑕ.”

ᓴᕕᑲᑖᖅ ᑕᐃᒪᐃᓕᓕᓚᐅᕐᓯᒪᔪᖅ ᐅᓇ ᖃᒪᓂᑦᑐᐊᕐᒧᑦ ᒪᓕᒐᓕᐅᖅᑎ ᒍᕆᒡ ᓯᒪᐃᓛᒃ, ᐅᖃᖅᑎᓪᓗᒍ ᒐᕙᒪᒃᑯᑦ ᐱᓕᕆᖃᑎᖃᕐᓗᑎᒃ ᓄᓇᕗᑦ ᑐᙵᕕᒃᑯᓐᓂ ᒪᑐᕐᓯᓗᑎ ᐃᓚᖏᓐᓂᒃ ᐊᖏᕈᑎᓃᑦᑐᓂᒃ ᓴᐳᔾᔭᐅᓯᒪᖁᓪᓗᒋᑦ ᑐᒃᑐᐃᑦ ᐅᓄᕈᓐᓃᓗᐊᓕᕐᓂᖏᓐᓂᒃ ᑭᕙᓪᓕᕐᒥ.

ᑕᒪᓐᓇ ᐃᓱᒫᓘᑎᐅᔪᖅ, ᓴᖅᑭᑕᐅᓚᐅᕐᑐᖅ ᑭᕙᓪᓕᖅᒥ ᒪᓕᒐᓕᐅᖅᑎᒧᑦ ᐅᑭᐅᖅ ᑲᑎᒪᑎᓪᓗᒋᑦ ᐊᒻᒪᓗ ᑭᖑᓂᐊᒍᑦ ᑲᑎᒪᓂᒃᑯᑦ, ᒪᑯᐊ ᖃᕋᓴᐅᔭᒃᑯᑦ ᓂᐅᕕᐊᒃᓴᖃᖃᑦᑕᖅᑐᑦ ᐃᓚᒋᔭᐅᔭᕆᐊᒃᓴᖏᓐᓂᒃ ᒫᓐᓇ ᐅᓄᕈᓐᓃᖅᐹᓪᓕᕐᓯᒪᔪᓄᑦ ᑐᒃᑐᓄᑦ.

“ᑐᒃᑐᐃ ᑭᕙᓪᓕᕐᒥ ᐅᓗᕆᐊᓇᖅᑐᒦᓕᕐᒪᑕ,” ᐅᖃᖅᑐᖅ ᑳᑎ ᑕᐅᑐᙱ, ᒪᓕᒐᓕᐅᖅᑎ ᑲᖏᖅᖠᓂᐅᑉ ᐅᐊᖕᓇᖓᓄᑦ-ᐃᒡᓗᓕᒑᕐᔪᒃᒧᓪᓗ.

“ᑕᒪᓐᓇᓕ ᐱᔾᔪᑎᖃᓗᐊᓕᕐᑐᖅ ᐊᖑᓇᓱᒃᑕᐅᓂᕐᓴᐅᓕᕐᓂᖏᓐᓄᑦ ᐊᒻᒪ ᖃᕋᓴᐅᔭᒃᑯᑦ ᓂᐅᕕᐊᒃᓴᖃᖃᑦᑕᕐᓂᕐᒧᑦ.”

ᓴᕕᑲᑖᖅ ᐅᖃᓪᓚᖃᑎᖃᓚᐅᙱᒃᑲᓗᐊᖅᖢᓂ ᓄᓇᕗᑦ ᑐᙵᕕᒃᑯᓐᓂ ᒪᑐᒥᖓ ᓂᐅᕐᕈᑎᖃᖃᑦᑕᕐᓂᕐᒥᒃ ᑐᒃᑐᑦ ᓂᕿᖏᓐᓂᒃ ᑕᐃᒪᙵᑦ ᐊᖏᕈᑎ ᐊᑎᓕᐅᖅᑕᐅᓚᐅᕐᓯᒪᑎᓪᓗᒍ, ᐃᓱᒪᓚᐅᕐᑐᕐᓕ ᓄᓇᕗᑦ ᑐᙵᕕᒃᑯᑦ ᑕᒪᑐᒥᖓ ᐱᓕᕆᐊᖃᕈᒪᒍᑎ ᐃᒪᓐᓇ “ᓄᓇᕗᑦ ᑐᙵᕕᒃᑯ ᐊᐅᓚᑦᑎᔪᓐᓇᕐᒪᑕ ᑐᒃᑐᐃᑦ ᓂᕿᖏᓐᓂᒃ ᓂᐅᕐᕈᑎᖃᕐᓂᐅᕙᒃᑐᒥᒃ ᖃᕋᓴᐅᔭᒃᑯ ᓄᓇᕗᒥᑦ.”

2018-ᒥᑦ ᓴᕕᑲᑖᖅ ᓴᖅᑭᑦᑎᓚᐅᕐᓯᒪᖕᒪᑦ ᖃᐅᔨᔭᐅᓯᒪᔪᓂᒃ ᓄᓇᕗᒥᑦ ᒐᕙᒪᒃᑯᓐᓂ ᐃᑲᔫᓯᐊᖃᕐᓂᒃᑯᑦ ᖃᐅᔨᓴᕈᑎᓂᒃ ᑐᒃᑐᓂᒃ ᓴᖅᑭᑎᑦᑎᓯᒪᓂᖓᓂᒃ “ᐅᓄᕈᓐᓃᖅᐸᓪᓕᐊᑐᐃᓐᓇᖅᑐᓂᒃ” ᑭᕙᓪᓕᖅᒥᑦ ᖃᒪᓂᕐᔪᐊᖅ ᑐᒃᑐᖏᓐᓂᒃ.

ᒫᓐᓇᐅᔪᕐᓕ, ᐅᖃᓚᐅᖅᑐᖅ ᐱᓕᕆᕝᕕᒋᔭᖓ ᐱᓕᕆᖃᑎᖃᐃᓐᓇᕐᓂᐊᕐᓂᕋᖅᖢᓂᒋ ᐅᑯᓂᖓ ᐸᕗᓕ ᐊᒻᒪ ᖃᒪᓂᕐᔪᐊᖅ ᑐᒃᑐᓂ ᐊᐅᓚᑦᑎᓂᕐᒧᑦ ᑲᑎᒪᔨᓂ ᖃᐅᔨᓇᓱᒡᓗᓂ ᐊᐅᓚᑦᑎᓂᒃᑯᑦ ᐱᓕᕆᓂᖅᑕᖃᕆᐊᖃᕐᒪᖔᑦ.

ᑭᖑᓂᑦᑎᓐᓂᒃ ᐊᕐᕌᒍᒧᑦ ᐅᓂᒃᑳᓕᐊᖑᓯᒪᔪᑦ ᑲᑎᒪᔨᓄᑦ ᐅᖃᖃᑦᑕᕐᓯᒪᔪᑦ ᖃᕋᓴᐅᔭᒃᑯᑦ ᓂᐅᕐᕈᑎᖃᖃᑦᑕᕐᓂᖅ ᐊᒃᑐᐃᒍᑎᖃᕆᐊᒃᓴᖓᓂᒃ ᑐᒃᑐᐃᑦ ᐅᓄᕈᓐᓃᖅᐸᓪᓕᐊᓂᖏᓐᓄᑦ.

ᓄᓇᕗᑦ ᑐᙵᕕᒃᑯᓐᓄᓪᓕ ᐊᒃᑐᐊᒍᑎᐅᓇᔭᕐᑐᑦ ᑭᕙᓪᓕᕐᒥ ᑐᒃᑐᐃᑦ ᐅᓄᕈᓐᓃᖅᐸᓪᓕᐊᓂᖏᑦ ᐊᒻᒪᓗ ᖃᕋᓴᐅᔭᒃᑯᑦ ᑐᒃᑐᓂ ᓂᐅᕕᐊᒃᓴᖃᖃᑦᑕᕐᓂᖅ ᑐᑭᓯᓈᙱᓗᐊᕐᒪᑕ.

“ᒫᓐᓇᐅᔪᕐᓕ, ᓱᓕ ᓇᓗᓇᕐᒪᑕ ᖃᓄᑎᒋ ᓂᕿᓂᒃ ᓂᐅᕕᐊᒃᓴᖃᖃᑦᑕᕐᒪᖔᑕ, ᐱᓗᐊᕐᑐᒥ ᑐᓴᐅᒪᔾᔪᑎᓕᕆᓂᒃᑯᑦ, ᐊᒻᒪᓗ ᑕᒪᑐᒪ ᐊᒃᑐᐃᒍᑎᒋᔭᖏᓐᓂᒃ ᑐᒃᑐᐃᑦ ᐅᓄᕐᓂᖏᓐᓄᑦ,” ᐅᖃᓚᐅᖅᑐᖅ ᔭᐃᒥᓯ ᐃᑦᑐᓗᒃ, ᐊᖓᔪᖅᑳᒧᑦ ᑐᒡᓕᕆᔭᐅᔪᖅ ᓄᓇᕗᑦ ᑐᙵᕕᒃᑯᓐᓄᑦ, ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᖃᓪᓚᒃᑎᓪᓗᒍ.

“ᐱᑕᖃᙱᑎᓪᓗᒍ ᑐᓴᐅᒪᔾᔪᑎᐅᔭᕆᐊᓕᖕᓂᒃ, ᑕᐃᒪᓕ ᓈᒻᒪᙱᓗᐊᕐᒪᓐ ᐋᖅᑭᒃᓱᐃᓇᓱᒋᐊᒃᓴᖅ ᑕᒪᑐᒧᖓ ᐊᑐᖅᑕᐅᔭᕆᐊᓕᖕᓂᒃ.”

ᓄᓇᕗᑦ ᑐᙵᕕᒃᑯᑦ ᐅᖃᓚᐅᕐᒥᔪᑦ ᑲᔪᓯᓂᐊᕐᓂᕋᖅᖢᑎᒃ ᓄᓇᕗᒥᑦ ᒐᕙᒪᒃᑯᓐᓂ ᐊᒻᒪ ᐊᓯᖏᓐᓂᒃ ᐊᐅᓚᑦᑎᓂᕐᒧᑦ ᐱᓕᕆᖃᑎᒋᔭᐅᔪᓂᒃ ᑲᑎᕐᓱᐃᕙᓪᓕᐊᓂᕐᒥᒃ ᖃᓄᑎᒋ ᓂᐅᕕᐊᒃᓴᖃᖃᑦᑕᕐᓂᖏᓐᓂᒃ ᓂᕿᓂᒃ ᖃᕋᓴᐅᔭᒃᑯᑦ, ᑕᒪᒃᑯᐊᓗ ᓇᑭᑦ ᑐᒃᑐᑕᐅᕙᓪᓕᐊᖕᒪᖔᑕ ᐊᒻᒪ ᓇᒧᑦ ᐊᕕᒃᑐᖅᓯᒪᓂᒃᑯ ᐊᐅᓪᓚᖅᑎᑕᐅᓂᐊᕐᒪᖔᑕ.

ᖃᖓᑕᓲᒃᑰᖅᐸᓪᓕᐊᔪᓂᒃ ᓂᐅᕐᕈᑎᐅᓂᑯᓂᒃ ᖃᐅᔨᓴᖅᐸᓪᓕᐊᓂᖅ ᐱᓕᕆᐊᕆᓇᓱᒃᑕᖓ ᐊᓂᒃᒍᑦᑎᐊᓚᐅᕐᓯᒪᙱᒻᒪᑦ.

ᐃᓱᒪᒋᓪᓗᒋᑦ ᐃᓱᒫᓘᑎᐅᔪᑦ ᖃᕋᓴᐅᔭᒃᑯᑦ ᓂᐅᕐᕈᑎᐅᖃᑦᑕᖅᑐᑦ ᑐᒃᑐᐃᑦ ᓂᕿᖏᓐᓂᒃ, ᓄᓇᕗᑦ ᑐᙵᕕᒃᑯᑦ ᐋᖅᑭᒃᓯᓚᐅᕐᒪᑕ ᐊᕕᒃᑐᖅᓯᒪᓂᒃᑯᑦ ᑐᒃᑐᐃᑦ ᒥᒃᓵᓄᑦ ᑲᑎᒪᓂᒃᑯᑦ ᐊᔪᕈᓐᓃᕐᓴᕈᑎᒃᓴᓂᒃ ᐊᕐᕌᓂᐅᓚᐅᕐᑐᖅ, ᑭᓯᐊᓂᓕ ᕿᒥᕐᒥᐅᓂᒃ ᑲᑎᒪᓂᒃᑯᑦ ᐊᔪᕈᓐᓃᖅᓴᖅᑎᑦᑎᓂᖅ ᐊᑐᕈᓐᓇᓚᐅᖅᑕᖓᑦ ᓄᖅᑲᖅᑎᑦᑎᔭᕆᐊᖃᓕᓚᐅᕐᓂᖏᓐᓄᑦ ᐅᓇ ᐱᔾᔪᑎᐅᓪᓗᓂ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᐅᔪᖅ.

ᓄᓇᕗᑦ ᑐᙵᕕᒃᑯᑦ ᐅᖃᓚᐅᕐᑐᑦ ᒫᓐᓇ ᐱᓕᕆᐊᖃᕐᓂᖏᓐᓂᒃ ᑖᒃᑯᐊ ᑲᑎᒪᓂᒃᑯᑦ ᐃᓕᓐᓂᐊᕈᑎᒃᓴ ᑲᔪᓯᑎᒐᓱᒃᖢᒋᑦ ᑭᕙᓪᓕᖅᒧᑦ ᐊᒻᒪ ᕿᑭᖅᑖᓗᒃᒧᑦ, ᑖᒃᑯᓇᓂᓗ ᐅᖃᐅᓯᖃᖃᑦᑕᕐᓂᐊᕈᒪᓪᓗᑎᒃ, ᐊᓯᖏᓐᓂᒡᓗ ᐅᑯᓂᖓ ᓄᓇᓕᖕᓂᙶᖅᑐᓂᒃ ᐊᐅᓚᑦᑎᒍᑎᒃᓴᓄᑦ ᐸᕐᓇᐅᓯᐅᕐᓂᕐᒥᒃ

“ᐊᐅᓚᑦᑎᓂᕐᒧᑦ ᐸᕐᓇᐅᑎᐅᔪᑦ ᐊᑑᑎᖃᖅᖢᑎᒃ ᐱᓕᕆᔾᔪᑎᐅᔪᓐᓇᕐᒪᑕ ᐊᐅᓚᑦᑎᓂᕐᒥ ᐆᒪᔪᓕᕆᓂᕐᒥᒃ ᓄᓇᕗᒥᑦ ᐊᒻᒪᓗ ᐊᑐᖅᑕᐅᔪᓐᓇᕆᓪᓗᑎᒃ ᐊᓯᖏᓐᓂᒃ ᐊᐅᓚᑦᑎᓂᕐᒧᑦ ᐱᓕᕆᔾᔪᑎᐅᔪᓂᒃ ᒪᑯᑎᑐᓇᖅ ᑲᑎᖢᑎᒃ ᐱᔭᐅᔪᓐᓇᖅᑐᓄᑦ ᐊᒻᒪ ᐊᖑᓇᓱᒃᑕᐅᔪᓐᓇᖅᑐᒃᑯᑦ ᐃᓱᖃᖅᑎᑕᐅᕙᒃᑐᓂ,” ᐃᑦᑐᓗᒃ ᐅᖃᖅᑐᖅ.

ᑭᓯᐊᓂᓕ ᓯᕗᓪᓕᕐᒥ, ᓄᓇᕗᑦ ᑐᙵᕕᒃᑯᑦ ᐅᖃᓚᐅᕐᑐᑦ ᑐᓴᐅᒪᒃᑲᓐᓂᕆᐊᖃᕐᓂᕋᖅᖢᑎᒃ ᑐᒃᑐᐃᑦ ᓂᕿᖏᓐᓂᒃ ᓂᐅᕐᕈᑎᒋᔭᐅᕙᓪᓕᐊᔪᓂᒃ ᑲᑎᕐᓱᐃᒍᑎᐅᔪᓂᒃ.