ᓴᓇᔨᐅᕙᒃᑐᖅ ᐅᖃᕐᑐᖅ ᐃᖃᓗᖕᓂ ᓇᖕᒥᓂᖃᖅᑐᓄᑦ ᑖᒃᓰᔭᕈᑎᑦ ‘ᓈᒻᒪᑐᐃᓐᓇᖅᑐᑦ’

ᓄᓇᓕᐸᐅᔭᐃᑦ ᐃᖃᓗᖕᓂ ᐊᑭᑦᑐᕆᐊᖅᑎᑦᑎᔪᒪᓂᖏᑦ ᓇᖕᒥᓂᕆᔭᐅᔪᓄᑦ ᑖᒃᓰᔭᕈᑎᓂᒃ ᐊᒻᒪᓗ ᐃᒪᖃᖅᑎᑕᐅᓂᕐᒧᑦ ᐊᒻᒪ ᑯᕕᖅᑕᖅᕕᒃᒧᑦ ᐊᑭᓕᐅᑎᐅᔪᒃᓴᑦ “ᓈᒻᒪᑐᐃᓐᓇᖅᑐᑦ,” ᑭᓯᐊᓂᓕ ᓇᓗᓇᐃᕐᓯᔪᖅ ᐃᑲᔪᖅᑕᐅᔭᕆᐊᖃᕐᓂᐊᕐᓂᖏᓐᓂᒃ ᒐᕙᒪᑐᖃᒃᑯᓐᓂᒃ ᐊᒻᒪ ᓄᓇᕗᒥᑦ ᒐᕙᒪᒃᑯᓐᓂᒃ ᑕᒪᑐᒥᖓ ᐋᖅᑭᒍᑎᐅᓂᐊᕐᑐᓄᑦ, ᐅᖃᖅᑐᖅ ᓄᓇᓂ ᐋᖅᑭᒃᓱᐃᔨ.

ᓄᓇᓕᐸᐅᔭᐃᑦ ᐃᖃᓗᖕᓂ ᑲᑎᒪᔨᖏ ᐊᓂᒍᖅᑎᑦᑎᓚᐅᕐᑐᑦ ᐱᓇᓱᐊᕈᓯᐅᓚᐅᕐᑐᒥᓐ 3 ᐳᓴᓐᑎᒥ ᐊᑭᑦᑐᕆᐊᕈᑎᒃᓴᓂᒃ ᓇᖕᒥᓂᕆᔭᐅᔪᓄᑦ ᑖᒃᓰᔭᕈᑎᒃᓴᓂᒃ, 0.5 ᐳᓴᓐᑎᒥ ᐊᖏᒡᓕᒋᐊᖅᖢᓂ ᐃᒪᕐᒧᑦ ᐊᑭᓕᐅᑎᐅᕙᒃᑐᑦ ᐊᒻᒪᓗ 2 ᐳᓴᓐᑎᒥ ᐊᖏᒡᓕᒋᐊᖅᖢᓂ ᑯᕕᖅᑕᖅᑕᐅᕙᖕᓂᕐᒧᑦ.

ᐊᑭᑦᑐᕆᐊᖅᐸᓪᓕᐊᑎᓪᓗᒋ ᐃᓅᓇᓱᒍᑎᑦ, ᐅᕐᓱᐊᓗᐃᓪᓗ ᐊᑭᑐᓂᕐᓴᐅᓕᖅᖢᑎᒃ ᐊᒻᒪ ᓴᓇᕙᓪᓕᐊᓂᖅ ᐊᒻᒪᓗ ᐅᓇ ᐃᒪᕐᒧᑦ ᑐᐊᕕᕐᓇᖅᑐᕆᔭᐅᓂᑯ ᐊᒻᒪ ᐋᓐᓂᐊᕕᒡᔪᐊᕐᓇᖅ ᓱᓕ ᑕᕝᕙᐅᑎᓪᓗᒍ ᑕᒪᒃᑯᐊ ᐊᑭᓕᐅᑎᒃᓴᐃᑦ “ᖁᕝᕙᓯᖕᓂᖅᓴᐅᔪᓐᓇᑦᑎᐊᓚᐅᕐᑐᑦ,” ᐅᖃᖅᑐᖅ ᓄᓇᓯᑖ ᓇᖕᒥᓂᖏᑦ ᐊᖓᔪᖅᑳᖓ ᐃᐊᑦ ᕉᒪᓇᐅᔅᑭ.

ᕉᒪᓇᐅᔅᑭ ᐅᖃᓚᐅᕐᑐᖅ ᓂᕆᐅᖕᓂᕋᖅᖢᓂ ᓇᖕᒥᓂᕆᔭᐅᔪᓄᑦ ᑖᒃᓰᔭᕈᑎᑦ ᐊᖏᒡᓕᒋᐊᕐᓂᐊᕐᓂᖏᓐᓂᒃ ᒫᓂᒃ 2 ᐳᓴᓐᑎᒥ 3 ᐳᓴᓐᑎᒧ ᑕᒪᑐᒪᓂ ᐊᕐᕌᒍᒥ ᐊᒻᒪᓗ ᓄᓇᓕᐸᐅᔭᐃᑦ ᐊᓯᔾᔨᖅᓯᓚᐅᕐᓯᒪᓂᖏᓐᓂᒃ ᐊᑐᐊᒐᓂᒃ ᒪᑯᓄᖓ ᑖᒃᓰᒧᑦ ᐊᑭᓕᐅᑎᐅᕙᒃᑐᓄᑦ ᐊᔾᔨᒌᙱᑦᑐᓄᑦ ᐊᑐᖅᑕᐅᔪᓐᓇᖅᑐᓂᒃ ᓇᖕᒥᓂᕆᔭᐅᔪᓄᑦ, ᑕᐃᒪᓕ ᑲᒻᐸᓂᖓ ᐊᑭᑦᑐᕆᐊᕈᑎᐅᔪᓂᒃ ᐱᓕᕆᐊᖃᖅᐸᓪᓕᐊᔪᓐᓇᓚᐅᕐᑐᑦ ᐊᒻᒪᓗ “ᐃᒡᓗᓂ ᐊᑐᖅᑐᐊᕈᑎᓄᑦ ᐊᑭᒃᑐᕆᐊᕈᑎᓂᒃ.”

ᒪᑯᓄᖓᓕ ᒪᕐᕉᖕᓂ ᐃᒡᓗᕈᓯᖃᕐᑐᓄᑦ ᐃᒡᓗᓄ ᑲᑎᕐᖓᐅᕐᑐᓂᒃ ᐃᒡᓗᐊᓗᒃᒥ, ᐅᓇ 3 ᐳᓴᓐᑎ ᓇᖕᒥᓂᕐᓄᑦ ᑖᒃᓰᔭᕈᑎᒧ ᐊᖏᒡᓕᒋᐊᕈᑎ ᓇᓕᒧᖃᑐᐃᓐᓇᖅᑐᖅ $4-ᒥ ᐊᖏᒡᓕᒋᐊᕈᑎᖃᕋᔭᖅᑐᑦ ᐊᐅᓚᑦᑎᓂᕐᒧᑦ ᐊᑭᓕᐅᑎᓄᑦ ᑕᖅᑭᒥ, ᐅᖃᖅᑐᖅ, ᐅᖃᒃᑲᓐᓂᖅᖢᓂ ᐃᓚᓯᒪᙱᖢᒋᑦ ᐃᒪᕐᒧᑦ ᐊᒻᒪ ᑯᕕᖅᑕᖅᑕᐅᕙᖕᓂᕐᒧᑦ, ᓇᐅᑦᑎᐅᒃᑯᒫᓄᑦ ᐊᒻᒪᓗ ᓱᕋᒃᓯᒪᔪᓕᕆᓂᕐᒧᑦ ᐊᑭᓕᐅᑎᐅᕙᒃᑐᑦ ᐊᓯᒃᑲᓐᓂᖏᓪᓗ.

ᑲᑎᒪᔨ ᑲᐃᐅᓪ ᓯᐊᐳᑦ, ᑮᓇᐅᔭᓕᕆᔨᒃᑯᑦ ᑲᑎᒪᔨᕋᓛᖏᓐᓄᑦ ᐃᒃᓯᕙᐅᑕᖅ, ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᐊᑭᑦᑐᕆᐊᖅᑎᑦᑎᓇᓱᓚᐅᕐᓂᖏᓐᓂᒃ ᖁᕝᕙᓯᓗᐊᙱᑦᑐᓂᒃ ᑕᒪᑐᒧᖓ ᐊᕐᕌᒍᒧᑦ ᐃᑲᔫᑎᒃᓴᖃᖅᑎᑦᑎᒐᓗᐊᖅᑎᓪᓗᒋᑦ ᐊᖏᔪᓂᒃ ᐱᓕᕆᐊᒃᓴᓄᑦ ᐆᑐᓇᖅ ᓄᑖᙳᕆᐊᖅᑎᑦᑎᓂᖅ ᐃᒪᖃᐅᑎᖃᕐᕕᒃᒥᒃ ᐊᒻᒪᓗ ᑯᕕᖅᑕᖅᕕᓕᕆᓂᖅᒥᒃ.

ᑕᒪᐃᓐᓂ ᓯᐊᐳᑦ ᐊᒻᒪ ᕉᒪᓇᐅᔅᑭ ᐅᖃᓚᐅᕐᑑᒃ ᐊᑭᑐᓗᐊᕐᓂᐊᓗᖓ ᐃᒪᖃᐅᑎᖃᕐᕕᒃᒥᒃ ᐊᒻᒪ ᑯᕕᖅᑕᖅᕕᓕᕆᓂᖅᒥᒃ ᐊᖏᒡᓕᒋᐊᖅᑎᑦᑎᓂᕐᒧᑦ ᑐᓚᒃᑕᕈᑎᐅᓛᖑᓯᒪᖕᒪᑦ ᐱᕙᓪᓕᐊᔪᓕᕆᓂᕐᒧᑦ ᓄᓇᓕᐸᐅᔭᓂᒃ, ᐊᒻᒪᓗ ᓄᓇᓖᑦ ᓯᓚᑎᑦᑎᐊᖓᓂᒃ ᓴᓇᓇᓱᒃᖢᓂ ᐊᑭᑐᓂᕐᓴᐅᒻᒪᕆᒃᖢᓂ.

“ᐊᖏᓂᕐᓴᒃᑯᑦ ᑕᐅᑐᒃᖢᒍ ᓄᓇᓕᐸᐅᔭᐃᑦ ᐊᑭᑦᑐᖅᑎᑦᑎᙱᓐᓂᕐᓴᐅᓇᓱᖕᓂᖏᑦ ᐃᓚᒋᔭᐅᖕᒪᑦ ᓄᓇᓕᖕᓂ ᖃᓄᐃᓕᐅᖅᐸᓪᓕᐊᓇᓱᖕᓂᕐᒧᑦ,” ᕉᒪᓇᐅᔅᑭ ᐅᖃᖅᑐᖅ.

ᒫᓐᓇᓕ ᓄᓇᓯᑖᑯᑦ ᐃᒡᓗ 350 ᓴᓂᑦᑎᐊᖓᓃᑦᑐᒥᒃ ᓴᓇᔪᒪᖕᒪᑕ, ᐊᑭᑦᑎᐊᖓᑕ ᐋᑎᒃ ᕙᓐᓱᔅ, ᐊᒻᒪᓗ ᑖᓐᓇ ᓄᓇᓖᑦ ᐊᑯᓐᓂᐊᓃᖢᓂ ᐊᒻᒪᓗ ᑯᕕᖅᑕᖅᕕᒃᑖᕆᐊᖃᓛᖅᖢᓂ ᑯᕕᔭᐅᔭᖅᑐᕆᐊᖃᖅᐸᒃᑐᒥᑦ ᐱᓕᕆᓐᓇᐅᓗᐊᖅᑎᓪᓗᒍ.

ᑖᓐᓇ ᓴᓇᔭᐅᔪᖅ ᑕᐃᔭᐅᔪᖅ ᑲᑎᕝᕕᒃ ᖃᖃᔮᒧᑦ ᐃᓯᕆᐊᕐᕕᒃ (Astro Hill Gate), ᐅᕝᕙᓘᓐᓃᑦ ᐃᒡᓗ 351. ᐅᖃᐅᓯᐅᓯᒪᖕᒪᑦ 31-ᓂ ᐃᒡᓗᖃᕐᓂᐊᖅᖢᓂ ᐊᒻᒪᓗ 3,500 ᑭᑉᐹᕆᒃᑎᓯᒪᔪᑦ ᑎᑎᕋᕐᕕᒃᓴᖅ ᐊᒻᒪ ᕉᒪᓇᐅᔅᑭ ᐃᓱᒪᔪᖅ ᐊᕐᕌᒍ ᓄᒃᑎᕐᕕᐅᔪᓐᓇᓕᓛᕐᓂᖓᓂᒃ.

ᐃᒡᓗᓕᐅᕐᐸᓪᓕᐊᓂᖅ ᐃᖃᓗᖕᓂ ᐊᑭᑐᓂᕐᓴᐅᒻᒪᕆᒃᑎᓪᓗᒍ ᑐᕌᓐᑐᒥ, ᐃᒡᓗᓕᐅᕋᓱᖕᓂᖅ ᐊᔪᕐᓇᕐᓂᕐᓴᐅᖕᒪᑦ ᐊᖏᕐᕋᕆᔭᐅᓂᐊᕐᑐᓂᒃ ᐊᒻᒪ ᓴᓇᕝᕕᐅᕙᖕᓂᐊᕐᑐᓂᒃ, ᕉᒪᓇᐅᔅᑭ ᐅᖃᓚᐅᕐᑐᖅ. “ᐆᒻᒪᖅᑯᑎᓄᑦ ᐊᑭᓕᐅᑎᓄᑑᙱᑦᑐᖅ, ᑭᓯᐊᓂᓕ ᒪᑐᒧᖓ ᑭᓱᒧᓪᓕ ᐱᓇᓱᒍᑎᖃᕋᔭᕐᒪᑕ? ᐱᓇᓱᒍᑎᒃᓴᖅᑕᖃᕆᐊᖃᕐᒪ ᐅᓇ ᐃᒡᓗᖃᙱᓗᐊᕐᓂᐊᓗᒃ ᐱᓕᕆᐊᖑᓂᐊᕐᓗᓂ.”

ᑯᕕᖅᑕᖅᕕᒃᓴᖅ ᓄᓇᓯᑖᒃᑯᓐᓄᑦ ᐊᑭᑐᔪᐊᓘᓇᔭᕐᑐᖅ, ᕉᒪᓇᐅᔅᑭ ᐅᖃᕐᑐᖅ, ᑭᓯᐊᓂᓕ ᐊᑭᖓ ᐊᑐᖅᑐᐊᖅᑐᑦ ᐊᑭᓕᐅᑎᖏᓐᓄᑦ ᐊᑭᓕᖅᑕᐅᕙᓪᓕᐊᓇᔭᖅᖢᓂ. ᑭᓯᐊᓂᓕ ᐃᒡᓗᒃᓴᖅᑕᖃᖅᐸᑦ, ᑖᒃᑯᐊᓗ ᓄᓇᓕᐸᐅᔭᐃᑦ ᑕᐃᒪᐃᑦᑐᓂᒃ ᕿᓂᖅᖢᑎᒃ ᓄᑖᙳᕆᐊᖅᑎᑦᑎᓂᒃᑯᑦ ᑕᒪᑐᒪᓂ ᐊᕐᕌᒍᒥ ᑕᐃᒪᓕ ᐊᑭᓕᐅᑎᒃᓴᑦ ᐊᑦᑎᖕᓂᕐᓴᐅᓇᔭᖅᑐᑦ.

“ᑕᒪᓐᓇ ᐊᒃᑐᐃᓂᖃᕐᓂᕐᓴᐅᓇᔭᖅᑐᖅ ᐊᑭᓕᒐᕐᓂᕐᓂᖅᓴᓂᒃ ᐃᒡᓗᖃᕐᓂᕐᒥᒃ ᓄᓇᓕᖕᓂ ᐃᒪᓐᓇᐅᙱᖔᖅᑐᖅ ᐊᑭᑦᑐᕆᐊᖅᑎᑦᑎᑲᑕᖕᓂᕐᒥᒃ ᐊᑐᖅᑐᐊᕈᑎᓂᒃ,” ᐅᖃᖅᑐᖅ.

ᐅᖃᓚᐅᕐᑐᖅ ᐊᑭᓕᐅᑎᐅᕙᒃᑐᑦ ᐃᒪᕐᒧᑦ, ᑯᕕᖅᑕᖅᑕᐅᓂᕐᒧᑦ, ᓇᖕᒥᓂᖃᕐᓂᕐᒧᑦ ᑖᒃᓰᔭᕈᑎᑦ ᐊᒻᒪᓗ ᐊᑐᖅᑐᐊᕈᑎᑦ ᒥᒃᖠᕚᓪᓕᕋᔭᙱᑦᑐᑦ ᑭᓯᐊᓂ ᒐᕙᒪᑐᖃᒃᑯᑦ ᐊᒻᒪ ᓄᓇᕗᒥᑦ ᒐᕙᒪᒃᑯᑦ ᐃᑲᔪᖃᑦᑕᖅᐸᑦ ᐊᑭᓕᐅᑎᒃᓴᓂᒃ ᐱᐅᓂᕐᓴᓄᑦ ᒪᑯᓂᖓ ᐱᐅᓂᕐᓴᓂᒃ ᐃᒪᕐᒧᑦ ᐊᖅᑯᑎᓄᑦ ᐊᒻᒪᓗ ᐃᒪᖃᐅᑎᖃᕐᕕᒃᒧᑦ.

“ᑕᑯᔭᕆᐊᖃᕋᑦᑕ ᐱᓂᐊᕐᓂᕋᓪᓚᕆᒃᑐᓂᒃ ᖁᕝᕙᓯᖕᓂᕐᓴᓂᒃ ᒐᕙᒪᓕᕆᔨᓂᒃ,” ᐅᖃᖅᑐᖅ. “ᑕᒪᒃᑯᓂᖓ ᐊᒡᒋᖅᑐᖃᖅᑑᒐᓗᐊᖅ ᑭᓯᐊᓂᓕ ᐅᓄᕐᓂᕐᓴᓂᒃ ᐱᑕᖃᕆᐊᖃᕐᒪᑦ.”