ᓴᓪᓕᓂᑦ ᐃᓕᓐᓂᐊᕐᕕᖓ ᐱᓕᐊᖅᐳᖅ ᐊᖏᔪᒥ ᓄᑖᙳᕆᐊᖅᑎᑕᐅᓂᐅᔪᒥ

For English version, see ‘Down to the studs’: Coral Harbour school to get major renovations

ᓴᓪᓕᓂ ᓴᒃᑯ ᐃᓕᓐᓂᐊᕐᕕᖓ ᓈᒻᒪᓈᖅᓯᒪᓕᖅᐳᖅ ᐱᒋᐊᕐᓂᖓᓂ ᐊᕐᕌᖑᓄᑦ−ᒪᕐᕉᖕᓄᑦ, $65-ᒥᓕᐊᓐᓂ ᓄᑖᙳᕆᐊᖅᑎᑕᐅᓂᖓᓂ ᑕᒪᑐᒪᓂ ᐅᑭᐊᒃᓵᖑᓂᐊᖅᑐᒥ.

ᐃᓕᓐᓂᐊᕐᕕᒃ, ᐃᓚᖃᖅᑐᒥ ᐃᓕᓐᓂᐊᖅᑎᓂ ᐱᒋᐊᓕᓵᖅᑐᓂ ᖁᑦᑎᖕᓂᓕᖕᓄᑦ 12−ᒧᑦ, ᐱᓕᕆᓂᐊᖅᐳᖅ ᐊᑯᓂᐅᔪᒥ ᐋᖅᑭᒋᐊᖅᑕᐅᑦᑎᐊᒃᑲᓐᓂᕐᓂᐅᔪᒥ ᑐᕌᖅᑎᑕᐅᔪᒥ Arctic Fresh Projects Inc.−ᑯᓐᓂ ᑕᑯᓂᐊᖅᑐᓂ ᓇᑉᐸᖅᑎᕆᓂᐅᔪᒥ “ᑕᐅᓗᖓᓗᒃᑖᖅ ᑭᑭᐊᖏᓐᓄᑦ,” ᐅᖃᓚᐅᖅᐳᖅ ᐃᓕᓐᓂᐊᖅᑐᓕᕆᔨᒃᑯᑦ ᒥᓂᔅᑕᖓ ᐹᒥᓚ ᒍᕉᔅ ᒪᓕᒐᓕᐅᕐᕕᖕᒥ ᒪᐃ 25−ᒥ.

“ᐃᓕᓐᓂᐊᕐᕕᒃ ᓄᑖᑦᑎᐊᐸᓘᓂᐊᖅᐳᖅ ᐃᓕᓐᓂᐊᕐᕕᐅᓗᓂ, ᐊᑐᑐᐃᓐᓇᕐᓗᑎᒃ ᓴᕕᕋᔭᖕᓂ ᐊᕙᓗᖓᓂ ᑕᐃᑲᓃᑦᑐᒥ,” ᐅᖃᓚᐅᖅᐳᖅ.

ᐃᓕᓐᓂᐊᕐᕕᒃ ᓴᓇᔭᐅᓚᐅᖅᐳᖅ 1979−ᒥ ᐊᒻᒪ ᓄᑖᙳᕆᐊᖅᑎᑕᐅᓪᓗᓂ 1995−ᒥ ᐊᒻᒪ 2007−ᒥ. ᑭᓯᐊᓂ, ᑕᐃᔅᓱᒪᓂᒃᑲᓐᓂ ᐊᑲᐅᙱᓕᐅᕈᑕᐅᔪᓂ ᑕᐃᒃᑯᓂᖓ ᓄᑖᙳᕆᐊᖅᑎᑕᐅᓂᐅᔪᓂ ᐊᒻᒪ ᑲᔪᓰᓐᓇᖅᑐᓂ ᐃᓱᒫᓘᑕᐅᔪᓂ ᐅᖁᖕᒥ ᑐᑭᖃᖅᓯᒪᕗᖅ ᐱᓕᕆᒃᑲᓐᓂᕐᓂᕐᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑐᓕᕆᔨᒃᑯᓐᓂ ᐱᓕᕆᐊᒃᓴᕆᔭᖏᓐᓂ “ᐊᑯᓂᒻᒪᕆᐊᓗᒃ,” ᒍᕉᔅ ᐅᖃᓚᐅᖅᐳᖅ.

ᐅᖃᐅᓯᐅᓪᓗᓂ ᑎᑎᕋᖅᑕᐅᓯᒪᓂᐅᔪᓂ ᓄᓇᕗᒻᒥ ᐃᓕᓐᓂᐊᕐᕕᖕᓄᑦ ᐋᖅᑭᐅᒪᑎᑦᑎᓂᐅᔪᓂ ᑐᒃᓯᕋᕈᑕᐅᔪᓂ ᐱᔭᐅᔪᓂ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ, ᓴᒃᑯ ᐃᓕᓐᓂᐊᕐᕕᖓ ᐊᑐᖅᓯᒪᕗᑦ ᖃᔅᓯᒐᓛᓗᖕᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᑲᐅᙱᓕᐅᕈᑕᐅᔪᓂ ᒫᓐᓇᓕᓴᐅᔪᓂ ᐊᕐᕌᒍᓂ ᐅᑯᓇᓂᒐᓚᒃ ᐅᖅᑰᓴᐅᑎᐅᑉ ᐆᓇᖅᑐᒥᒃ ᐃᒪᒃᓴᖓᓂ ᐊᒻᒪ ᐃᒪᕐᒥ ᑯᑐᖕᓂᐅᔪᓂ ᑯᕕᑦᑕᖅᑐᓂ ᐊᑲᐅᙱᓕᐅᕈᑕᐅᔪᓄᑦ, ᓇᑉᐸᖅᑎᓯᒪᓂᖓᓂ ᓱᔪᐃᓯᒪᓂᐅᔪᓂ ᐊᒻᒪ ᐅᖅᑰᓴᐅᑎᖓᓂ ᐊᑲᐅᙱᓕᐅᕈᑕᐅᔪᓂ.

ᓄᓇᐅᑉ ᐊᑖᓂ ᐃᒪᕐᒥ ᐃᓕᓐᓂᐊᕐᕕᐊᑉ ᐊᑖᓂ ᐃᑲᔪᖅᓱᐃᓂᖃᕆᕗᖅ ᐅᖁᖕᒧᑦ ᐃᓱᒫᓘᑕᐅᔪᓂ, ᐊᐃᕕᓕᒃ ᒪᓕᒐᓕᐅᖅᑎ ᓵᓚᒪᓐ ᒪᓕᑭ ᐅᖃᓚᐅᖅᐳᖅ.

“ᐅᖅᑰᓗᐊᖅᐸᒃᐳᖅ ᐅᕝᕙᓘᓐᓃᑦ ᓂᒡᓚᓱᓗᐊᖅᐳᖅ, ᑕᐃᒫᒃ [ᐅᖅᑰᒪᐅᑎᖓ] ᑐᙵᕕᖃᑦᑎᐊᙱᓚᖅ ᐃᓚᖓᓐᓂ ᐃᓚᒋᔭᐅᔪᓂ ᐃᓕᓐᓂᐊᕐᕕᖕᒥ, ᑭᓯᐊᓂ ᐊᑲᐅᙱᓕᐅᕈᑕᓪᓚᕆᐅᔪᖅ ᐅᖂᕗᖅ,” ᐅᖃᓚᐅᖅᐳᖅ.

“ᐃᓚᖏᑦ ᐃᓕᓐᓂᐊᖅᑏᑦ ᐅᕕᓂᕐᓗᖕᓂᖃᖅᐳᑦ ᐊᒻᒪ ᐊᓯᖏᑦ ᐊᓂᖅᑎᕆᓂᕐᒧᑦ ᐊᑲᐅᙱᓕᐅᕈᑎᖃᒻᒪᕆᒃᐳᑦ ᐅᖁᖕᒧᑦ ᐱᔾᔪᑎᖃᖅᑐᒥ.”

ᒫᔾᔨᒥ, ᐃᓕᓐᓂᐊᖅᑏᑦ ᐃᓕᓐᓂᐊᖅᑐᓂ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᓅᓚᐅᖅᐳᑦ ᐃᒡᓗᕐᔪᐊᒥ ᐊᑕᔪᒧᑦ ᓴᒃᑯ ᐃᓕᓐᓂᐊᕐᕕᖓᓄᑦ ᐅᖃᐱᓘᑎᖃᓚᐅᖅᑎᓪᓗᒋᑦ ᐅᖁᖕᒧᑦ ᐊᑲᐅᙱᓕᐅᕈᑕᐅᔪᓄᑦ.

ᒪᓕᑭ ᐅᖃᓚᐅᖅᐳᖅ ᓄᓇᖃᖅᑎᐅᔪᑦ ᐊᒻᒪ ᕼᐋᒻᓚᒃᑯᑦ ᓂᕆᐅᓚᐅᕋᓗᐊᖅᐳᑦ ᓴᓇᓂᕐᒥ ᓄᑖᑦᑎᐊᒥᒃ ᐃᓕᓐᓂᐊᕐᕕᖕᒥ, ᑭᓯᐊᓂ ᐃᓱᒪᓕᐅᕐᓂᐅᔪᖅ ᐃᓕᓐᓂᐊᖅᑐᓕᕆᔨᒃᑯᓐᓂ ᓄᑖᙳᕆᐊᖅᑎᑦᑎᓂᕐᒥ ᒫᓐᓇᐅᔪᒥ ᐃᒡᓗᕐᔪᐊᒥ ᑐᙵᕕᒋᔭᖓ ᑐᙵᕕᖃᑦᑎᐊᕐᒪᑦ.

ᓄᑖᙳᕆᐊᖅᑎᑕᐅᓂᖓ ᐃᓚᖃᕐᓂᐊᖅᐳᖅ ᓴᓇᓂᕐᒥ ᖃᐅᖅᑎᕐᓂᓂ ᐅᕝᕙᓘᓐᓃᑦ ᑯᕕᕕᐅᔪᓂ ᐃᓕᓐᓂᐊᕐᕕᐅᑉ ᐊᕙᓗᔭᖓᓂ ᓄᖅᑲᖅᑎᑦᑎᓂᕐᒧᑦ ᐃᒪᐅᑉ ᐊᑖᓂ ᐃᒪᖓᓐᓂ ᓱᔪᐃᑦᑕᐃᓕᒪᑎᑦᑎᓂᕐᒧᑦ ᓴᓇᓯᒪᓂᐅᔪᒥ, ᒪᓕᑭ ᐅᖃᓚᐅᖅᐳᖅ, ᐊᒻᒪ ᓴᓇᓯᒪᔪᒥ ᐊᔾᔨᐸᓗᐊᓂ ᐳᓯᑳᑦᓄᑦ ᖁᐃᕕᒋᕙᒃᑕᖏᓐᓂ ᐊᑐᖅᑕᐅᑐᐃᓐᓇᕆᐊᖃᖅᐳᖅ ᓄᓱᒃᓯᓂᕐᒥ ᒪᓴᐅᓂᐅᔪᒥ ᑕᐃᑲᙵᑦ ᐹᕐᙳᕐᕕᐅᔪᒥ ᐃᓂᐅᔪᒥ ᐃᓕᓐᓂᐊᕐᕕᐅᑉ ᐊᑖᓂ.

Arctic Fresh ᓇᑉᐸᖅᑎᕆᕙᓪᓕᐊᓂᐊᖅᐳᑦ ᑕᒪᑐᒪᓂ ᐅᑭᐊᒃᓵᖑᔪᒥ ᐅᒥᐊᕐᔪᐊᖅ ᑎᑭᓚᐅᖅᑎᓪᓗᒍ, ᒍᕉᔅ ᐅᖃᓚᐅᖅᐳᖅ. ᓄᑖᙳᕆᐊᖅᑎᑕᐅᓂᖓᓂ ᐱᔭᕇᖅᑕᐅᔪᒃᓴᐅᑕᐅᕗᖅ 2025-26−ᒥ ᐃᓕᓐᓂᐊᕐᓂᕐᒥ ᐊᕐᒡᕋᒍᖓᓄᑦ.

ᓄᑖᙳᕆᐊᖅᑎᑕᐅᓂᖓᓂ, ᐃᓕᓐᓂᐊᖅᑏᑦ ᐃᓕᓐᓂᐊᕐᕕᖕᒦᖏᓐᓇᕐᓂᐊᖅᐳᑦ ᑭᓯᐊᓂ ᓂᑭᑦᑖᖃᑦᑕᐅᑎᓂᐊᖅᐳᑦ ᐃᓕᓐᓂᐊᕐᕕᐊᕈᓯᖃᕐᓗᑎᒃ ᒪᓕᒃᑐᓄᑦ ᐊᕐᕌᒍᓄᑦ ᒪᕐᕉᖕᓄᑦ ᐱᓕᕆᐊᖑᔪᑦ ᐱᓕᕆᐊᕆᔭᐅᑎᓪᓗᒋᑦ.

ᖄᒃᑲᓐᓂᐊᒍᑦ ᐃᓕᓐᓂᐊᕐᕕᐅᑉ ᓄᑖᙳᕆᐊᖅᑎᑕᐅᓂᖓᓂ, ᐃᓚᖃᕐᓂᐊᖅᑐᒥ ᓄᑖᖑᔪᒥ ᐃᖃᐃᓕᓴᕐᕕᐅᔪᒥ, ᓴᓇᔩᑦ ᐃᓚᓯᓂᐊᖅᐳᑦ ᐸᐃᕆᕝᕕᖕᒥ ᐊᒻᒪ ᓄᑖᖑᔪᒥ ᐃᒡᓗᕐᔪᐊᒥ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒧᑦ ᑕᐃᑲᓂᑦᑕᐃᓐᓇᖅ ᐃᓕᓐᓂᐊᕐᕕᐅᑉ ᓄᓇᖁᑎᖓᓐᓂ.

ᓄᑖᙳᕆᐊᖅᑎᑕᐅᓂᖓ ᐱᔪᓐᓇᖅᑎᑦᑎᓂᖃᕐᓂᐊᖅᐳᖅ ᐅᓪᓗᓕᒫᖑᔪᒥ ᐱᒋᐊᓕᓵᖅᑐᓄᑦ ᐱᓕᕆᐊᖑᔪᒥ ᑐᓂᔭᐅᓂᖓᓂ ᓴᒃᑯ ᐃᓕᓐᓂᐊᕐᕕᖓᓂ.

“ᐅᓄᐸᓗᒃᑐᓂ ᑮᓇᐅᔭᓂ ᐊᑐᕐᓂᐊᖅᐳᑦ,” ᒪᓕᑭ ᐅᖃᓚᐅᖅᐳᖅ. “ᖁᕕᐊᓱᑐᐃᓐᓇᖅᐳᖓ ᐱᓕᕆᐊᖑᓛᓕᕐᓂᖓᓂ.”