ᔫᓇ ᖃᐅᓐᓇᖅ ᓵᓚᒃᓴᒃᑲᓐᓂᕐᑐᖅ ᐱᖓᔪᖓᓐᓂ ᓄᓇᕗᑦ ᑯᐃᐊᔅᑦ ᕿᒧᒃᓯᐅᔾᔪᐊᕐᑐᓂᒃ

ᓯᓚ ᓈᒻᒪᒍᓐᓃᕐᓯᒪᓂᖓᓄᑦ ᕿᒧᒃᓯᐅᔾᔪᐊᕐᑐᑦ ᐅᓪᓗᓂᒃ ᕿᒧᒃᓯᓚᐅᙱᑦᑐᑦ

ᐃᒡᓗᓕᒃᒥᐅᑕᖅ ᔫᓇ ᖃᐅᓐᓇᖅ ᑎᑭᑉᐸᓪᓕᐊᓯᔪᖅ ᐱᐊᓂᒃᓯᕝᕕᒃᒥ ᐊᖏᕋᖓᓂ ᐃᒡᓗᓕᖕᒥ ᐄᐳᕈᓪ 27 ᐅᓪᓗᓂ ᖁᓕᓂ (10) ᕿᒧᒃᓯᐅᔾᔪᐊᖅᑎᓪᓗᒋᑦ ᓄᓇᕗᑦ ᑯᐃᐊᔅᑦᒥ, ᑖᒃᑯᐊ ᐱᒋᐊᓚᐅᕐᓯᒪᔪᑦ ᐃᒃᐱᐊᕐᔪᒃᒥ. (ᐊᔾᔨᓕᐅᕆᔨ ᑕᔅᑎᓐ ᐸᑕᕐ)

By ᑕᐃᕕᑦ ᕕᐊᓐ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

ᐃᒡᓗᓕᒃᒥᐅᑕᖅ ᕿᒧᒃᓯᕐᑎ ᔫᓇ ᖃᐅᓐᓇᖅ ᐱᖓᓱᐃᖅᖢᓂ ᑐᒡᓕᕇᓂᒃ ᓵᓚᒃᓴᕐᓯᒪᓕᕐᐳᖅ ᓄᓇᕗᑦ ᑯᐃᐊᔅᑦᒥ — ᐊᒃᓱᕈᕐᓇᕐᓂᖅᐹᖑᓪᓗᓂᓗ, ᐅᖃᕐᑐᖅ.

12 ᕿᒧᒃᓯᖅᑐᑦ ᐱᐊᓂᒃᓯᓚᐅᕐᑐᖅ ᐄᐳᕈᓪ 27-ᒥ ᐃᒡᓗᓕᒃᒥ 500 ᑭᓛᒥᑕᓂ ᐅᖓᓯᖕᓂᓕᖕᒥ ᕿᒧᒃᓯᐅᔾᔪᐊᓚᐅᖅᖢᑎᒃ ᐱᒋᐊᓚᐅᕐᑐᒥ ᐃᒃᐱᐊᕐᔪᒃᒥ ᐅᓪᓗᑦ ᖁᓕᑦ ᓯᕗᓂᐊᓂ. ᖃᐅᓐᓇ ᓵᓚᒃᓴᕐᓂᕋᖅᑕᐅᓚᐅᕐᑐᖅ ᖃᐅᒃᐸᖓᑕ ᐅᓐᓄᖓᓂᒃ ᐃᓗᓕᒃ ᐱᙳᐊᕐᕕᖓᓂᒃ ᓵᓚᒃᓴᐅᓯᐊᖅᑐᓂᒃ ᖁᕕᐊᓲᑎᖃᓕᕐᑎᓪᓗᒋᑦ. ᑲᑎᓗᑎᒃ ᐃᑲᕐᕋᓂᒃ 28:43:55 ᕿᒧᒃᓯᓚᐅᕐᑐᖅ.

7-ᐃᕐᓱᖅᖢᓂ ᕿᒧᒃᓯᐅᑎᔪᓂ ᐃᓚᐅᓯᒪᓪᓗᓂ ᑯᐃᐊᔅᑦᒥ ᐅᖃᓚᐅᕐᑐᖅ ᓵᓚᒃᓴᕐᓂᖓ ᐃᒃᐱᒍᓱᕈᓘᔭᕐᓇᓚᐅᕐᓂᖓᓂ ᐃᓱᒪᒋᓪᓗᓂᐅ ᐊᖓᔪᓂ ᑲᑎᒪᔨᐅᖃᑕᐅᓚᐅᕐᓯᒪᔪᖅ ᓄᓇᕗᑦ ᑯᐃᐊᔅᒥ.

“ᐃᒃᐱᕈᓱᕈᓘᔭᕐᓇᓚᐅᕐᑐᖅ. ᕿᒧᒃᓯᐅᔾᔪᐊᖃᑕᐅᓕᕌᖓᒪ ᐃᒃᐱᒍᓱᕈᓘᔭᕐᓇᕆᔭᖓ ᑭᓯᐊᓂᓕ ᑕᒪᑐᒪᓂ ᐱᓗᐊᖅᖢᓂ,” ᖃᐅᓐᓇᖅ ᐅᖃᓚᐅᕐᑐᖅ ᐊᐱᖅᓱᖅᑕᐅᑎᓪᓗᒍ ᓵᓚᒃᓴᐅᓯᐊᒥᓂ ᑐᓂᔭᐅᓯᒪᓕᕐᑎᓪᓗᒍ.

ᖃᐅᓐᓇᖅ ᑭᖑᓪᓖᖕᓂ ᓵᓚᒃᓴᓚᐅᕐᓯᒪᔪᖅ 2018-ᒥ ᐊᒻᒪ 2019-ᒥ. ᑭᓯᐊᓂᓕ ᑲᑎᒪᔩᑦ ᑖᔅᓱᒥᖓ ᐅᖃᕙᕆᐊᖅᑎᑦᑎᓚᐅᕐᒪᑕ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ ᐱᔾᔪᑎᐅᓪᓗᓂ.

ᓵᓚᒃᓴᕌᖓᒥ ᐃᓱᒪᒋᖃᑦᑕᓚᐅᕐᒪᒋᑦ ᐃᓚᒋᓚᐅᕐᓯᒪᔭᖏᑦ.

“ᐊᖏᕐᕋᖅᖢᖓ ᐃᒃᐱᒍᓱᑲᑕᕈᓘᔭᕐᓇᖅᑐᖅ,” ᖃᐅᓐᓇᖅ, ᐃᒡᓗᓕᒃᒥᐅᑕᖅ, ᐅᖃᓚᐅᕐᑐᖅ.

ᑕᒪᑐᒪᓂ ᕿᒃᒧᒃᓯᖅᖢᓂ ᐊᒃᓱᕈᕈᓘᔭᕐᓇᓚᐅᕐᑐᖅ. ᕿᒧᒃᓯᖅᑏᑦ ᐊᒻᒪ ᐃᑲᔪᕐᑎᒋᔭᖏᑦ ᑐᓚᒃᑕᑲᑕᒃᑲᓗᐊᖅᖢᑎᒃ ᑲᔪᓰᓐᓇᖃᑦᑕᓚᐅᕐᑐᖅ ᐊᒻᒪᓗ ᐊᓄᕌᕐᔪᐊᖅᑐᒃᑰᓚᐅᑦᖢᓂ ᐊᒻᒪ ᐱᕐᓯᖅᑐᒧᑦ ᑭᖑᕙᕆᐊᖅᓯᒪᓪᓗᑎᒃ.

ᑲᑎᒪᔨᐅᖃᑕᐅᔪᖅ ᑯᕆᔅᑐᓪ ᓈᑕᓇᐃ ᐅᖃᓚᐅᕐᑐᖅ ᐅᓪᓗᖅ 2-ᖓᓂ ᕿᒧᒃᓯᐅᔾᔪᐊᓕᖅᑎᓪᓗᒋᑦ ᐅᓇ ᕿᒧᒃᓯᖅᑎ ᐅᐊᓐ ᕗᐃᓕ ᐃᓚᐅᔪᓐᓃᓚᐅᕐᑐᖅ ᕿᒻᒥᖏᑦ ᐊᓄᖏᓐᓂᒃ ᓂᕆᓚᐅᕐᓂᖏᓐᓄᑦ ᐅᓐᓄᐊᖓᓂ.

ᐅᓪᓗᖅ 4-ᒥᓪᓕ, ᕿᒧᒃᓯᖅᑎᐅᖃᑕᐅᔪᖅ ᔨᐅᕆᒥ ᑯᓄ ᕿᒻᒦᕐᓯᖅᖢᓂ ᑖᒃᑯᐊᓕ ᐃᑲᔪᕐᑎᒋᔭᖏ ᕿᒻᒥᓂ ᕿᓂᑲᑕᒋᐊᖃᓕᓚᐅᕐᑐᑦ. ᑯᓄ ᕿᒧᒃᓯᐅᔾᔪᐊᖃᑕᐅᖏᓐᓇᓚᐅᕐᑐᖅ.

ᐅᓪᓗᖓᓂᓕ 6-ᒥ ᑕᒪᕐᒥᒃ ᕿᒧᒃᓯᖅᑎᐅᔪᑦ ᐊᒻᒪ ᐃᑲᔪᕐᑎᒋᔭᐅᔪᑦ ᑖᒃᑯᓂᖓ ᕿᒻᒥᕆᔭᐅᔪᓂᒃ ᐅᓯᓕᖅᖢᑎᒃ 160 ᑭᓛᒥᑕᓂ ᐃᖏᕐᕋᔾᔪᔾᔨᓕᓚᐅᕐᓯᒪᔪᑦ ᓄᖅᑲᖓᕝᕕᒋᓂᐊᖅᑕᖓᓄᑦ ᐃᖃᓗᒐᓱᒡᕕᒃᒥ ᓲᖃᐃᒻᒪ ᑭᖑᕙᓯᓗᐊᓕᓚᐅᕐᒪᑕ ᐅᖃᕐᑐᖅ ᓈᑕᓇᐃ.

ᖃᐅᒃᐸᙳᖅᑎᓪᓗᒍ ᕿᒧᒃᓯᖃᑕᐅᔪᖅ ᔮᓱᐊ ᕼᐊᐅᓕ ᐃᑲᔪᕐᑎᖏᓐᓄᑦ ᐊᐃᔭᐅᔭᕆᐊᖃᓕᓚᐅᕐᑐᖅ ᐱᕐᓯᖅᑐᒧᑦ, ᐅᖃᕐᑐᖅ.

ᑭᖑᓂᐊᒍᓪᓕ ᐅᓪᓘᖕᓂ ᒪᕐᕉᖕᓂ ᓄᖅᑲᖔᕆᐊᖃᓚᐅᕐᒥᔪᑦ ᓯᓚᑦᑎᐊᕙᐅᙱᓗᐊᕐᓂᖓᓄᑦ ᐃᓱᓕᑦᑎᓇᓱᓕᓚᐅᕐᑎᓐᓇᒋ ᐄᐳᕈᓪ 27-ᒥ, ᑖᓐᓇᓗ ᐅᓪᓗᕆᓚᐅᕐᑕᖓ 10.

ᑕᐃᒪᓕ ᐃᖏᕐᕋᔪᓐᓇᓚᐅᙱᑦᑐᑦ ᐅᓪᓗᓂ ᑎᓴᒪᓂᒃ ᑖᒃᑯᓇᖓ ᖁᓕᓂ ᐃᖏᕐᕋᓂᕆᓂᐊᕐᑕᖓᓂ ᓯᓚᑦᑎᐊᕙᐅᙱᓗᐊᓚᐅᕐᓂᖓᓄᑦ. ᓯᓚ ᐱᐅᙱᒃᑲᓗᐊᕐᒪᑦ ᐊᒻᒪ ᐊᓄᕌᕐᔪᐊᖅᖢᓂ ᖃᐅᓐᓇᖅ ᐅᖃᓚᐅᕐᑐᖅ ᐊᒃᓱᕈᒃᑲᓐᓂᓕᓚᐅᕐᓂᕋᖅᖢᓂ ᕿᒻᒥᖓᑦᑕ ᐃᓚᖓ ᓇᔾᔨᔪᖅ ᖃᐅᔨᒐᒥᐅᒃ. ᓱᒃᑲᐃᑉᐹᓪᓕᓚᐅᕐᒪ ᑕᐃᒪᓕ ᓯᑭᑑᒃᑯ ᑲᓕᑕᐅᓕᓚᐅᕐᑐᖅ ᐊᖏᕐᕋᕋᓱᖕᓂᖏᓐᓂᒃ.

ᑯᓄ ᐆᔪᑯᓗᒃ ᐃᒃᐱᐊᕐᔪᒃᒥᐅᑕᖅ ᑐᒡᓕᕆᔭᐅᓚᐅᕐᑐᖅ ᑎᑭᖢᓂ ᐃᑲᕐᕋᖃᖅᖢᓂ 29:43:45; ᒥᑦᑎᒪᑕᓕᒃᒥᐅᑕᖅ ᓖ ᐃᓄᐊᕋᖅ ᐱᖓᔪᒋᔭᐅᓪᓗᓂ ᐃᑲᕐᕋᖃᖅᖢᓂ 29:57:25; ᐃᒡᓗᓕᒃᒥᐅᑕᖅ ᑎᐅᕆ ᐅᔭᕋᒃ ᑎᓴᒪᒋᔭᐅᓪᓗᓂ ᑎᑭᖢᓂ ᐃᑲᕐᕋᓂᒃ 30:23:20; ᐊᒻᒪᓗ ᒥᑦᑎᒪᑕᓕᒃᒥᐅᑕᖅ ᒪᐃᑯᓪ ᐃᓄᐊᕋᖅ ᑕᓪᓕᒪᒋᔭᐅᓪᓗᓂ ᐃᑲᕐᕋᖃᖅᖢᓂ 34:19:30-ᓂ.

ᖃᐅᓐᓇᖅ ᑐᓂᔭᐅᓂᐊᕐᑐᖅ $20,000-ᓂ ᓵᓚᒃᓴᐅᓯᐊᖏᓐᓂᒃ. ᐅᖃᓚᐅᕐᑐᖅ ᓂᐅᕕᕐᓂᐊᕈᒪᓪᓗᓂ ᓄᑖᓂ ᐊᖑᓇᓱᒍᑎᒃᓴᖏᓐᓂᒃ.

“ᐃᕐᓂᑯᓗᖓ … ᐅᖃᐅᓯᖃᒡᒍᖕᒪᑦ ᐊᐅᓚᐅᑎᓂᒃ ᓇᑦᑎᕐᓯᐅᕆᐊᖃᑦᑕᕐᓂᐊᕋᑦᑕ,” ᐅᖃᕐᑐᖅ.

ᐆᔪᑯᓗᒃ ᓵᓚᒃᓴᐅᓯᐊᓚᐅᕐᑐᖅ $15,000, ᐃᓄᐊᕋᖅ $10,000, ᐊᒻᒪᓗ ᑎᓴᒪᒋᔭᐅᔪᒥᑦ 7-ᒋᔭᐅᔪᒧᑦ ᐊᕕᒃᑎᑕᐅᓂᐊᖅᖢᑎᒃ $14,000-ᓂ.

ᐊᕐᕌᒍ ᕿᒧᒃᓯᐅᔾᔪᐊᓛᖅᑐᑦ ᐃᒡᓗᓕᒃᒥ ᐃᒃᐱᐊᕐᔪᒃᒧᑦ.

Share This Story

(1) Comment:

  1. Posted by Beleaver on

    ᑯᐃᐊᔅᑦ? ᑐᑭᖃᖏ!

    ᓄᓇᕗᖕᒥ ᐊᐅᓚᐅᔨᒥᕐᒧᑦ

Join the Conversation

Your email address will not be published. Required fields are marked *

*