ᕆᕗᐊᕐ ᐅᖃᐅᓯᖃᖅᑎᐅᔪᖅ ᐃᓄᑑᓚᐅᙱᓚᖅ ᐅᓂᒃᑳᕆᓂᕐᒥ ᖁᓄᔪᓐᓂᐊᕐᓂᐅᔪᒥ

For English version, see Decades after reporting Rivoire, whistleblower learns she wasn’t the only one

ᐊᑕᐅᓯᐅᔪᒥ ᓯᕗᓪᓕᖅᐹᖑᔪᒥ ᐃᓄᖕᒥ ᐅᖃᐅᔾᔨᓂᕐᒥ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖁᑎᖓᓂ ᐸᓯᒃᓯᔾᔪᑕᐅᔪᕐᓄᑦ ᖁᓄᔪᓐᓂᐊᕐᓂᐅᔪᒥ ᐃᒃᓯᕋᕐᔪᐊᖅ ᔪᕼᐋᓂᔅ ᕆᕗᐊᕐᒥ ᐅᖃᖃᑎᖃᖅᓯᒪᕗᖅ ᓴᐳᔾᔨᓯᒪᓂᐅᔪᒥ ᑭᓪᓕᓯᓂᐊᖅᑎᓄᑦ ᕿᒥᕐᕈᐊᕐᓂᖏᓐᓂ ᑐᒃᓯᐊᕐᕕᐅᑉ ᑲᒪᒋᓂᑯᖏᓐᓂ ᐅᑯᓄᖓ ᐅᖃᐱᓘᑕᐅᔪᓄᑦ.

ᑭᐊᕆᓐ ᐴᒡᒥᓐ ᐅᖃᖃᑎᖃᓚᐅᖅᐳᖅ ᓄᖅᑲᖓᓕᖅᑐᒥ ᑯᐸᐃᖕᒥ ᐃᖅᑲᖅᑐᐃᔨᕐᔪᐊᒧᑦ ᐃᖅᑲᖅᑐᐃᔨᐅᔪᒧᑦ ᐋᓐᑐᕋᐃ ᑕᓃᒧᑦ ᐅᐃᓂᐱᐊᒡᒥ ᐋᒍᔅᑎ 24−ᒥ. ᑕᓃ ᑎᒃᑯᐊᖅᑕᐅᓚᐅᖅᐳᖅ ᐃᒃᓯᕋᕐᔪᐊᓂ Mary Immaculate−ᒧᑦ ᑐᕌᖅᑎᑦᑎᓂᕐᒥ ᑭᓪᓕᓯᓂᐊᖅᑎᐅᔪᓂᑦ.

ᕆᕗᐊᕐ ᐱᓕᕆᓂᖃᓚᐅᖅᐳᖅ ᐃᒃᓯᕋᕐᔪᐊᖑᓪᓗᓂ ᑲᖏᖅᖠᓂᕐᒥ, ᐃᒡᓗᓕᒃ ᐊᒻᒪ ᐊᕐᕕᐊᓂᑦ ᐃᓚᒋᔭᐅᓪᓗᓂ ᐃᒃᓯᕋᕐᒧᐊᓂ, ᐅᒃᐱᖅᑐᓂ ᑎᓕᔭᐅᓯᒪᔪᓂ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖁᑎᖓᓂ. ᓱᓕ ᒫᓐᓇ ᐃᓚᒋᔭᐅᕗᖅ.

ᐴᒡᒥᓐ ᓄᓇᖃᖅᐳᖅ ᐳᕆᑎᔅ ᑲᓕᒻᐱᐊ ᑲᓇᖕᓇᖓᓂ, ᑕᐃᒫᒃ ᑭᓪᓕᓯᓂᐊᖅᑎᑦ ᖃᖓᑕᓲᒃᑰᖅᑎᑦᑎᓚᐅᖅᐳᑦ ᐅᖃᓪᓚᖃᑎᖃᕐᓂᕐᒧᑦ ᑕᓃᒧᑦ.

ᐊᐱᖅᓱᖅᑕᐅᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ, ᐴᒡᒥᓐ ᐅᖃᓚᐅᖅᐳᖅ ᓯᕗᓪᓕᖅᐹᖑᔪᒥ ᑐᓴᓚᐅᖅᐳᖅ ᐸᓯᒃᓯᔾᔪᑕᐅᔪᕐᓄᑦ ᕆᕗᐊᕐᒧᑦ ᓄᓇᖃᖅᑎᓪᓗᒍ ᐊᕐᕕᐊᓂ 1990−ᖏᓐᓂ ᐱᒋᐊᕐᓂᐸᓗᐊᓂ.

ᐴᒡᒥᓐ ᐅᖃᓚᐅᖅᐳᖅ ᐅᓂᒃᑳᕆᓚᐅᖅᐳᖅ ᑐᓴᓚᐅᖅᑕᒥᓂ ᑎᑎᖅᑲᒧᑦ ᐃᒃᓯᕋᕐᔪᐊᒃᑯᓐᓄᑦ ᐱᓕᕆᔨᕐᔪᐊᖑᔪᒧᑦ ᒫᓂᑑᐸᒥ ᑭᓯᐊᓂ ᑭᐅᔭᐅᓚᐅᖅᓯᒪᙱᓚᖅ.

ᕆᕗᐊᕐ, 90−ᖏᓐᓃᓕᖅᑐᒥ, ᐃᖅᑲᖅᑐᒐᒃᓴᙳᖅᑎᑕᐅᓚᐅᖅᐳᖅ ᖁᓄᔪᓐᓂᐊᕐᓂᕐᒧᑦ ᐱᕋᔭᖕᓂᐅᔪᓄᑦ ᒪᒃᑯᒃᑐᓄᑦ 1998−ᒥ ᑭᓯᐊᓂ ᓅᕌᓂᓚᐅᖅᐳᖅ ᕗᕌᓐᔅᒧᑦ, ᓱᓕ ᐅᓪᓗᒥ ᑕᐃᑲᓂᕐᒥᐅᑕᐅᓪᓗᓂ.

ᐅᑯᐊ ᐃᖅᑲᖅᑐᒐᒃᓴᐅᔪᑦ ᓄᖅᑲᖅᑎᑕᐅᓚᐅᑲᓚᐅᖅᐳᖅ 2017−ᒥ.

ᑲᓇᑕᒥ ᐸᓖᓯᒃᑯᑦ ᓄᑖᖑᔪᒥ ᖁᓄᔪᓐᓂᐊᕐᓂᕐᒧᑦ-ᐱᔾᔪᑎᓕᖕᒥ ᐃᖅᑲᖅᑐᒐᒃᓴᓕᐅᓚᐅᖅᐳᑦ ᕕᕗᐊᕆ 2022−ᒥ. ᕆᕗᐊᕐ ᐊᖏᖅᓯᒪᙱᓚᖅ ᐅᑎᕐᓂᕐᒧᑦ ᑲᓇᑕᒧᑦ ᑭᐅᓂᕐᒧᑦ ᐃᖅᑲᖅᑐᒐᒃᓴᙳᖅᑎᑕᐅᓂᖓᓄᑦ.

ᐴᒡᒥᓐ ᐅᖃᓚᐅᖅᐳᖅ ᐃᓕᑦᑎᓚᐅᖅᐳᖅ ᓄᑖᖑᔪᒥ ᐅᖃᖃᑎᖃᓚᐅᖅᑎᓪᓗᒍ ᑕᓃᒧᑦ.

“ᖃᐅᔨᓚᐅᖅᐳᖓ ᐅᓪᓛᖅ ᐊᐱᖅᓱᐃᓂᓐᓂ … ᓯᕗᓪᓕᖅᐸᐅᙱᓐᓂᓐᓂ ᐃᓄᑐᐊᖑᙱᖦᖢᖓᓗ” ᐃᓅᓪᓗᖓ ᖃᐅᔨᒋᐊᕐᓂᕐᒧᑦ ᑐᒃᓯᐊᕐᕕᖕᒧᑦ.

ᐴᒡᒥᓐ ᐅᖃᓚᐅᖅᐳᖅ ᑕᓃ ᐅᖃᐅᔾᔭᐅᓚᐅᖅᐳᖅ ᒪᕐᕈᒃᑲᓐᓂᕐᓂ ᐊᓯᖏᓐᓂ ᑐᒃᙳᐊᕐᕕᖕᒥ ᐱᓕᕆᔨᕐᔪᐊᖑᔪᓂ ᐅᖃᓚᐅᕐᒥᔪᓂ ᑐᓴᓚᐅᖅᓯᒪᓂᖏᓐᓂ ᐸᓯᒃᓯᔾᔪᑕᐅᔪᕐᓄᑦ.

“ᑕᓃ ᐅᖃᓚᐅᖅᐳᖅ ᓇᓂᓯᓚᐅᙱᓐᓂᖓᓂ ᑎᑎᕋᖅᑕᐅᓯᒪᓂᐅᔪᒥ ᑎᑎᕋᓚᐅᖅᑕᓐᓂ ᑐᖅᑯᖅᑕᐅᓯᒪᓂᐅᔪᓂ,” ᐴᒡᒥᓐ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐅᖃᐅᑎᓪᓗᓂᐅᑦ ᑐᒃᓯᐊᕐᕕᖕᒥ ᐱᓕᕆᔨᕐᔪᐊᖑᔪᖅ ᒫᓂᑑᐸᒥ “ᐅᖃᓚᐅᖅᐳᖅ ᑎᑎᖅᑲᖅ ᐱᓚᐅᖅᓯᒪᙱᓐᓂᕋᖅᖢᓂᐅᒃ.”

ᐃᒃᓯᕋᕐᒧᐊᒃᑯᑦ ᓴᐳᔾᔨᓯᒪᓂᐅᔪᒥ ᑭᓪᓕᓯᓂᐊᖅᑎᑦ ᐅᖃᐅᓯᐅᓚᐅᖅᐳᖅ ᔫᓂᒥ ᕿᒥᕐᕈᓂᕐᒧᑦ ᑕᒪᒃᑭᓂ ᑕᐃᔅᓱᒪᓂᒃᑲᓐᓂᖅ ᐸᓯᒃᓯᔾᔪᑕᐅᔪᕐᓄᑦ ᖁᓄᔪᓐᓂᐊᕐᓂᐅᔪᓂ ᕆᕗᐊᕐᒧᑦ ᐊᒻᒪ ᖃᐅᔨᓴᖅᑕᐅᓗᑎᒃ ᖃᓄᖅ ᑭᐅᔭᐅᓚᐅᕐᓂᖏᓐᓂ ᐃᓗᐊᓂ ᑐᒃᓯᐊᕐᕕᐅᔪᒥ.

“ᓇᓗᓕᖅᓯᒪᓚᐅᖅᐳᖓ ᐃᓚᐅᖃᑕᐅᓂᕐᒥ,” ᐴᒡᒥᓐ ᐅᖃᓚᐅᖅᐳᖅ.

“ᑭᓯᐊᓂ ᐃᓚᖓᓐᓂ ᐃᖅᑲᐅᒪᓂᐅᔪᒥ ᐊᒻᒪ ᐅᖃᓪᓚᖕᓂᐅᔪᒥ, ᐃᓱᒪᓕᐅᕆᓚᐅᖅᐳᖓ ᐆᒪᔪᒪᓇᖓ ᐆᒥᖓ ᐅᒃᐱᕈᓱᖕᓂᖃᙱᓐᓂᐅᔪᒥ [ᐱᓕᕆᓂᐅᔪᒥ]. ᐅᐸᒍᒪᓚᐅᖅᐳᖓ ᐅᒃᐱᕈᓱᖕᓂᕐᒥ ᐊᒻᒪ ᓂᕆᐅᖕᓂᖃᕐᓂᕐᒥ ᐃᓚᖓᒍᑦ ᐊᓯᔾᔨᕐᓂᖃᕐᓂᐊᕐᓂᖓᓂ.”

ᐴᒡᒥᓐ ᐅᖃᓚᐅᖅᐳᖅ ᑐᓴᖅᓯᒪᓂᖓᓂ ᐊᓯᖏᓐᓂ ᐅᖃᖅᑐᓂ ᐅᒃᐱᕈᓱᒃᑲᔭᙱᑦᑎᐊᕐᓂᖏᓐᓂ ᑭᓇᑐᐃᓐᓇᒥᒃ ᑮᓇᐅᔭᖃᖅᑎᑕᐅᔪᒥ ᐃᒃᓯᕋᕐᔪᐊᒃᑯᓐᓂ ᖃᐅᔨᓴᕐᓂᕐᒧᑦ ᐃᒃᓯᕋᕐᔪᐊᒃᑯᓂ.

ᖃᐅᔨᓚᐅᖅᐳᖅ ᑕᓃ ᐃᖅᑲᓇᐃᔭᓚᐅᖅᓯᒪᓂᖓᓂ ᐊᕐᕌᒍᓄᑦ 25−ᓂ ᐃᖅᑲᖅᑐᐃᔨᐅᓪᓗᓂ ᑯᐸᐃᖕᒥ ᐊᒻᒪ 2021−ᒥ ᐃᖅᑲᓇᐃᔮᖅᑖᖅᑎᑕᐅᓚᐅᖅᐳᖅ ᒪᓐᑐᕆᐋᓪᒥ ᐃᒃᓯᕋᕐᒧᐊᕌᐱᖕᒧᑦ ᖃᐅᔨᓴᕐᓂᕐᒥ ᑕᐃᔅᓱᒪᓂᑐᖃᖅ ᖁᓄᔪᓐᓂᐊᕐᓂᐅᔪᒥ ᐸᓯᒃᓯᔾᔪᑕᐅᔪᕐᓄᑦ ᐃᓗᐊᓂ ᑕᐃᔅᓱᒧᖓ ᐅᒃᐱᖅᑑᔪᓄᑦ.

“ᐅᔾᔨᖅᓱᑦᑎᐊᖅᖢᖓ ᓂᕆᐅᖕᓂᖃᖅᐳᖓ,” ᐴᒡᒥᓐ ᐅᖃᓚᐅᖅᐳᖅ ᑭᓪᓕᓯᓂᐊᖅᑎᒃᑯᑦ ᐱᓕᕆᓂᖏᓐᓂ.

ᐴᒡᒥᓐ ᐅᖃᓚᐅᖅᐳᖅ ᓂᕆᐅᖕᓂᖃᖅᐳᖅ ᐸᓯᒃᓯᔾᔪᑕᐅᔪᑦ ᐅᒃᐱᕆᔭᐅᓂᐊᕐᓂᖏᓐᓂ ᐊᒻᒪ ᐱᓕᕆᐊᖑᓗᓂ ᒪᑐᐃᖓᔪᒥ ᐊᒻᒪ ᐃᓄᓕᒫᓄᑦ ᐱᓕᕆᓂᐅᔪᒥ. ᓂᕆᐅᒃᐳᖅ ᖃᐅᔨᓴᖅᑕᐅᓂᐅᔪᖅ ᑭᒡᓕᖃᖅᑎᑕᐅᔾᔮᙱᓐᓂᖓᓂ ᑐᒃᓯᐊᕐᕕᐅᑉ ᖃᓄᐃᓕᐅᕐᓂᖏᓐᓂ.

“ᑲᓇᑕᒥ ᐸᓖᓯᒃᑯᑦ ᐱᓕᕆᓂᖃᓚᐅᖅᐳᑦ ᐊᖏᔪᒥ ᐱᓕᕆᓂᐅᔪᒥ ᐆᒪᙵᑦ,” ᐅᖃᓚᐅᖅᐳᖅ. “ᖃᐅᔨᒪᕗᖓ ᒪᕐᕈᓪᓗᐊᓂ ᖁᓄᔪᓐᓂᐊᖅᑕᐅᓯᒪᔪᓂ ᐃᓄᖕᓂ ᐅᐸᓚᐅᖅᑐᓂ ᑲᓇᑕᒥ ᐸᓖᓯᒃᑯᓐᓄᑦ ᐃᓐᓇᐅᓕᖅᑎᓪᓗᒋᑦ ᐊᒻᒪ ᑲᓇᑕᒥ ᐸᓖᓯᒃᑯᑦ ᖃᓄᐃᓕᐅᕐᓂᖃᓚᐅᙱᑦᑎᐊᖅᐳᑦ.

“ᑐᑭᓯᐅᒪᓂᓐᓂ, ᐅᕙᙵᑦ 1991–92−ᒥ, ᐱᔾᔪᑎᒃᓴᖃᓚᐅᖅᐳᑦ ᐃᖅᑲᖅᑐᒐᒃᓴᙳᖅᑎᑦᑎᓂᕐᒥ ᐊᒻᒪ ᑕᐃᒪᐃᓚᐅᙱᓚᑦ.”

ᐅᖃᓚᐅᖅᐳᖅ ᑕᓃ ᐅᖃᐅᑎᓚᐅᕆᕙᖓ ᑐᒃᓯᕋᖅᓯᒪᓂᖓᓂ ᑐᖅᑯᖅᑕᐅᓯᒪᔪᓂ ᑐᓴᒐᒃᓴᓂ ᑲᓇᑕᒥ ᐸᓖᓯᒃᑯᓐᓂᑦ.

ᐴᒡᒥᓐ ᐅᖃᓚᐅᖅᐳᖅ ᑕᓃ ᐅᖃᐅᓯᖃᓗᐊᓚᐅᙱᓚᖅ ᑲᔪᓰᓐᓇᖅᑐᒥ ᖃᐅᔨᓴᖅᑕᐅᓂᐅᔪᒥ ᑭᓯᐊᓂ ᐅᖃᓚᐅᖅᐳᖅ ᑕᒪᒃᑭᐅᒪᔪᒥ ᐊᑐᐃᓐᓇᖃᕐᓂᖓᓂ ᐃᒃᓯᕋᕐᔪᐊᒃᑯᑦ ᑐᖅᑯᖅᑕᐅᓯᒪᓂᐅᔪᓄᑦ ᐊᒻᒪ ᑲᑎᒪᖃᑎᖃᖅᓯᒪᕗᖅ ᐃᓄᖕᓂ ᓄᓇᓕᖕᒥᐅᑕᓂ ᐊᒻᒪ ᐃᓚᒋᔭᐅᔪᓂ ᑐᒃᓯᐊᕐᕕᖕᓂ.

ᑕᓃ ᐊᖏᓚᐅᙱᓚᖅ ᑐᒃᓯᕋᕐᓂᐅᔪᒥ ᐊᐱᖅᓱᖅᑕᐅᓂᕐᒧᑦ ᐱᓕᕆᓂᖓᓄᑦ ᓴᐳᔾᔭᐅᓯᒪᓂᐅᔪᒥ ᑭᓪᓕᓯᓂᐊᖅᑎᓄᑦ.

ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ, ᐅᖃᓚᐅᖅᐳᖅ ᐅᐃᓂᐱᐊᒡᒧᐊᖅᓯᒪᕗᖅ ᐊᒻᒪᓗᑦᑕᐅᖅ ᑰᒡᔪᐊᕌᓗᒃ, ᒫᓂᑑᐸᒧᑦ ᐊᒻᒪ ᑲᖏᖅᖠᓂᕐᒧᑦ. ᐊᐅᓪᓛᕐᕕᒃᓴᖃᒃᑲᓐᓂᙱᓚᖅ, ᐅᖃᓚᐅᖅᐳᖅ, ᐱᓯᒪᙱᒻᒪᑦ ᑐᓴᐅᒪᑎᑦᑎᓂᐅᔪᒥ ᐃᓄᖕᓂ ᑲᑎᒪᖃᑎᖃᕈᒪᔪᓄᑦ.

“ᑭᓯᐊᓂ ᐸᕐᓇᒃᓯᒪᕗᖓ ᓇᒧᑐᐃᓐᓇᖅ ᐊᐅᓪᓛᕐᓂᕐᒧᑦ ᐃᓄᖕᓂ ᑕᑯᔭᐅᔪᒪᒍᒪ,” ᐅᖃᓚᐅᖅᐳᖅ.

ᐴᒡᒥᓐ ᐅᖃᓚᐅᖅᐳᖅ ᐃᒃᐱᒍᓱᖕᓂᖓᓂ ᐊᑐᕐᓂᑰᔪᒥ ᐊᑑᑎᖃᓚᐅᕐᓂᖓᓂ ᐊᒻᒪ ᓂᕆᐅᒃᐳᖅ ᐅᓄᕐᓂᖅᓴᓂ ᐃᓄᖕᓂ ᐃᓴᖕᓂᖏᓐᓂ ᑕᓃᒧᑦ.

ᐱᕋᔭᒃᑕᐅᓯᒪᔪᓂ ᐸᓯᒃᓯᔾᔪᑕᐅᔪᓂ ᖁᓄᔪᓐᓂᐊᕐᓂᕐᒧᑦ, ᐃᓚᒋᔭᐅᔪᓂ ᐅᕝᕙᓘᓐᓃᑦ ᑭᓇᑐᐃᓐᓇᖅ ᐅᖃᐅᓯᒃᓴᖃᖅᑐᑦ ᕆᕗᐊᕐᒥ ᖃᕋᓴᐅᔭᑎᒍᑦ ᑎᑎᕋᕈᓐᓇᖅᐳᑦ ᐃᖅᑲᖅᑐᐃᔨᐅᔪᒥ ᑕᓃᒧᓪᓚᕆᒃ ᐅᕗᖓ: j.andreᑕᓃ@icloud.com.

ᑕᓃᐅᑉ ᑭᖑᓪᓕᖅᐹᖑᔪᒥ ᐅᓂᒃᑳᓕᐊᖓ ᓴᖅᑭᑕᐅᔪᒃᓴᐅᑕᐅᕗᖅ ᐊᐃᑉᕆᓕ 2024−ᒥ.