ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏ ᐊᒻᒪ ᐹᕕᓐᓛᓐ ᐊᑎᓕᐅᕐᐳᑦ ᓄᑖᒥ ᑮᓇᐅᔭᖅᑖᕈᑎᓄᑦ ᐃᑲᔫᑎᒃᓴᓂᒃ ᐊᖏᕈᑎᓂ
Inuit Certainty Agreement “ᐋᖅᑭᒃᓯᓯᒪᔪᖅ ᓄᑖᓂᒃ ᖃᓄᐃᓕᐅᕈᑎᒃᓴᓂ ᐃᓄᐃᑦ ᐃᑲᔫᑎᒃᓴᖏᓐᓄᑦ ᐊᖏᕈᑎᓂᒃ”
ᐹᕕᓐᓛᓐ ᓴᕕᕋᔭᒃᓴᒧᑦ ᐅᔭᕋᒃᓯᐅᕐᕕᒃ ᑯᐊᐳᕇᓴᓐᑯᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑎᓕᐅᓚᐅᕐᐳᑦ ᓄᑖᒥᓐ ᐃᓄᐃᑦ ᐊᒃᑐᖅᑕᐅᓂᖏᓐᓄᑦ ᐱᕚᓪᓕᕈᑎᒃᓴᖏᓐᓄᓪᓗ ᐊᖏᖃᑎᒌᒍᑎᓂᒃ ᓄᓘᔮᑦ ᐅᔭᕋᒃᓯᐅᕐᕕᖕᒧᑦ, ᒥᑦᑎᒪᑕᓕᐅᑉ ᓯᓚᑎᑦᑎᐊᖓᓃᑦᑐᒧᑦ. (ᐊᔾᔨᙳᐊᖅ ᐹᕕᓐᓛᓐᑯᓐᓂᑦ)
For an English version of this story, see Qikiqtani Inuit Association and Baffinland sign new multimillion-dollar benefit agreement
ᓄᑖᖅ ᒥᓕᐊᓐᑖᓚᑲᓪᓚᓄᑦ ᐋᖅᑭᒋᐊᕈᑎ ᐅᑯᓄᖓ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᓂ ᐊᑎᓕᐅᖅᑕᐅᓚᐅᕐᑐᑦ ᐹᕕᓐᓛᓐ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᒃ ᑯᐊᐳᕇᓴᓐᑯᓐᓄᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᓄᓘᔮᖕᓂ ᐅᔭᕋᒃᓯᐅᕐᕕᖕᒧᑦ “ᐊᑐᖅᑕᐅᓚᐅᕐᓯᒪᙱᑦᑐᖅ” ᓄᓇᕗᑦ ᐃᓄᖏᓐᓄᑦ, ᐅᖃᖅᑐᖅ ᐊᖓᔪᖅᑳᖅ ᐸᐅᓗᓯ ᐊᕿᐊᕈᖅ.
ᐋᖅᑭᒋᐊᕈᑎ, ᑕᐃᒎᓯᖃᖅᑎᑕᐅᔪᖅ Inuit Certainty Agreement, 34-ᓂ ᐊᑐᓃᖓᔪᓂᒃ ᐃᓚᒍᑎᖃᖅᑐᖅ ᓇᓗᓇᐃᔭᐃᓯᒪᔪᓂᒃ ᓄᓇᓕᖕᓄᑦ ᐃᑲᔫᑎᐅᑲᐅᑎᒋᕙᒃᑐᓂᒃ ᐊᒻᒪ ᐃᓄᐃᑦ ᑲᒪᒋᔭᖏᓐᓂᒃ ᐱᓕᕆᐊᒃᓴᐅᔪᓂᒃ ᐊᒻᒪᓗ ᐊᖏᒡᓕᒋᐊᖅᑎᑦᑎᒍᑎᓂᒃ ᐱᓕᕆᐊᓄᑦ ᐊᒃᑐᖅᑕᐅᔪᓄᑦ ᓄᓇᓕᖕᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᒐᒃᓴᓕᐊᑎᒍᑦ ᐅᖃᓚᐅᕐᑐᑦ.
“ᑕᒪᓐᓇ ᐃᓄᖕᓂ ᐊᐅᓚᑎᑦᑎᓂᕐᓴᐅᑎᑦᑎᔪᖅ,” ᐊᕿᐊᕈᖅ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.
ᐊᕿᐊᕈᖅ ᐅᖃᓚᐅᕐᒥᔪᖅ ICA ᐋᖅᑭᒃᑕᐅᓚᐅᕐᓂᖓᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᖃᑦᑕᕐᓯᒪᔭᖏᓐᓂᒃ ᓄᓇᓕᖕᓂᒃ ᑲᑎᒪᑎᑦᑎᕙᖕᓂᒃᑯᑦ ᐊᒻᒪ ᓄᓇᓕᖕᓂ ᑐᓴᕋᓱᑲᑕᖕᓂᒃᑯᑦ.
“ᐅᓇ ᐊᕐᕌᒍᒐᓴᖕᓂ ᐱᓕᕆᐊᖑᓯᒪᓂᕐᒧᑦ ᐋᖅᑭᒃᓯᒪᔪᖅ,” ᐊᕿᐊᕈᖅ ᐅᖃᖅᑐᖅ.
ᓄᕕᐱᕆ 2019-ᒥᑦ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑲᑎᒪᕕᒡᔪᐊᖅᑎᑦᑎᑎᓪᓗᒋᑦ ᐹᕕᓐᓛᓐ ᐱᓕᕆᓂᖅ 2 ᑐᒃᓯᕋᐅᑎᖏᓐᓄᑦ ᓄᓘᔮᖕᓄᑦ, ᓄᖅᑲᑳᓪᓚᓚᐅᕐᓯᒪᖕᒪᑕ ᐅᖃᕈᓐᓇᕐᕕᖃᕈᒪᓯᒪᔪᑦ ᐃᓚᖏᑦ, ᐃᓚᒋᔭᐅᓪᓗᑎᒃ ᒥᑦᑎᒪᑕᓕᒃᒥᑦ ᐊᖑᓇᓱᒃᑎᒃᑯ ᑲᑎᒪᔨᖏᑦ, ᐃᓱᒫᓘᑎᖏᓐᓂᒃ ᐅᖃᓪᓚᑲᑕᓕᖅᑎᓪᓗᒋᑦ ᐱᓕᕆᐊᖑᔫᑉ ᐊᕙᑎᒋᔭᖓᑕ ᒥᒃᓵᓄᑦ ᐊᒻᒪᓗ ᓄᓇᓕᖕᓂ ᑐᓴᑲᑕᒐᓱᙱᓗᐊᕐᓂᖏᓐᓂᒃ.
ᑲᑎᒪᓂᖅ ᑲᔪᓯᑎᑕᐅᓂᐊᓚᐅᕐᓯᒪᔪᖅ ᒫᑦᓯᒥᑦ, ᐊᒻᒪ ᐄᐳᕈᒥ,, ᑭᓯᐊᓂᓕ ᓄᖅᑲᖅᑎᑕᐅᒃᑲᓐᓂᓚᐅᕐᑐᖅ ᐱᔾᔪᑎᐅᓪᓗᓂ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ.
ᑕᐃᒪᐃᓐᓂᖓᓄᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᐊᖃᒃᑲᓐᓂᕈᓐᓇᓚᐅᕐᑐᑦ ᐆᒥᖓ ICA, ᐊᕿᐊᕈᖅ ᐅᖃᖅᑐᖅ.
“ᑕᐃᒪᙵᑦ ᐃᓄᐃᑦ ᐊᕙᑎᓕᕆᔨᒃᑯᑦ ᑲᑎᒪᔩᑦ ᐱᓕᕆᐊᖏᑦ ᓄᖅᑲᖅᑎᑕᐅᓚᐅᕐᑎᓪᓗᒋᑦ, ᐱᕕᖃᕐᓯᒪᒐᑦᑕ ᑲᑎᖃᑎᖃᑲᑕᒍᓐᓇᖅᖢᑕ ᓄᓇᓕᖕᓂ ᐊᒃᑐᖅᑕᐅᓯᒪᔪᓂᒃ ᐅᖃᐅᓯᖃᑲᑕᒃᖢᑕ ᐊᓯᐊᒍᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐊᒻᒪᓗ ᐊᓯᖏᓐᓂᒃ ᓯᕗᓪᓕᐅᔭᕆᐊᓕᖕᓂᒃ, ᐊᓯᖏᓐᓂᒃ ᐃᓱᒫᓘᑎᓂᒃ ᐊᒻᒪᓗ ᒪᑯᓇᓂ ᓄᓇᓖᑦ ᓯᕗᓪᓕᐅᑎᖁᓯᒪᔭᖏᓐᓂᒃ,” ᐅᖃᖅᑐᖅ.
ᐅᑯᐊ ICA ᐋᔩᖃᑎᒌᒍᑎᐅᓚᐅᕐᑐᖅ ᐅᑯᓄᖓ ᐹᕕᓐᓛᓐᑯᓐᓄᑦ, ᐊᕿᐊᕈᖅ ᐅᖃᓚᐅᕐᑐᖅ. ᒫᓐᓇᐅᔪᖅ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ. ᐋᖅᑭᒃᑕᐅᓂᑯᑦ 2013-ᒥᑦ ᐊᒻᒪ ᐋᖅᑭᒋᐊᖅᑕᐅᓯᒪᓂᑰᓪᓗᑎᒃ 2018-ᒥᑦ, ᐋᖅᑭᒋᐊᖅᑕᐅᒃᑲᓐᓂᕆᐊᖃᕐᓂᐊᕐᒪᑕ ᐃᓚᒋᔭᐅᑎᑕᐅᓕᕐᓗᓂ ICA.
ᐊᓯᐊᒍᓪᓕ ᑐᓴᒐᒃᓴᓕᐊᑎᒍᑦ, ᐅᑯᐊ ᐹᕕᓐᓛᓐᑯᑦ ᐅᖃᓚᐅᕐᑐᑦ ᐅᓇ ᓄᑖᖅ ᐊᖏᕈᑎ “ᓴᙱᒃᑎᕚᓪᓕᕈᑎ ᐱᓕᕆᖃᑎᒌᖕᓂᕐᒥᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓪᓗ ᐊᒻᒪ ᐹᕕᓐᓛᓐᑯᑦ ᐊᒻᒪᓗ ᓴᖅᑭᑎᑦᑎᒃᑲᓐᓂᕐᖢᓂ ᐊᖏᕈᑎᐅᓯᒫᓂᒃᑐᓂᒃ ᖃᓄᐃᓕᐅᒐᒃᓴᓄᑦ ᓄᓘᔮᖕᓂ ᐱᓕᕆᐊᒥ ᐱᕙᓪᓕᐊᑎᓪᓗᒋᑦ ᐃᓄᐃᑦ ᓄᓇᖁᑎᖏᓐᓂᒃ.”
“ᐹᕕᓐᓛᓐᑯᑦ ᐱᐅᒃᓴᒻᒪᕆᒃᑐᑦ ᐱᓕᕆᐊᕆᓯᒫᓂᒃᑕᖏᓐᓂᒃ ᐊᖏᖃᑎᒌᒍᓐᓇᕐᓯᓂᕐᒧᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐅᓄᕐᑐᑦ ᐃᓄᐃᑦ ᐃᓱᒫᓘᑎᖏᓐᓂᒃ ᐋᖅᑭᒃᑕᐅᓯᒪᔪᑦ ᒪᐅᓇ ᐊᐅᓚᑕᐅᓂᖓᓄᑦ ᐊᒻᒪᓗ ᐊᖏᒡᓕᒋᐊᖅᑎᑦᑎᓂᕐᒥ ᓄᓘᔮᖕᓂ ᐱᓕᕆᐊᒥᑦ. ᓂᕆᐅᒃᐳᒍ ᐱᓕᕆᖃᑎᖃᕐᓂᐊᕐᓂᑦᑎᓐᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᓄᓇᓕᖕᓂ ᐊᒃᑐᖅᑕᐅᓯᒪᔪᓂᒃ ᑖᓐᓇ ICA ᐊᑐᓕᖅᑎᑕᐅᓂᐊᕐᓂᖓᓂ ᐱᖁᔭᐅᓯᒪᓕᒫᓂᖏᑦᑎᒍᑦ,” ᐹᕕᓐᓛᓐᑯᑦ ᑐᓴᒐᒃᓴᖏᑦ ᐅᖃᕐᓯᒪᓚᐅᕐᑐᑦ.
ᐃᓄᐃᑦ “ᑕᐅᑐᒃᑎᐅᓗᑎᒃ ᐊᒻᒪ ᑐᓴᖅᑎᐅᕙᒡᓗᑎᒃ” ᐱᓕᕆᐊᒧᑦ
ᑭᖑᓪᓕᖅᐹᒥᑦ ᑲᑎᒪᕕᒡᔪᐊᖅᑎᑦᑎᑎᓪᓗᒋᑦ, ᑐᓴᖃᑦᑕᐃᓐᓇᓚᐅᕐᑐᑦ ᓄᓇᓖᑦ ᐃᓱᒫᓘᑎᖏᓐᓂᒃ ᐊᕙᑎᒋᔭᐅᔪᖅ ᐊᒃᑐᖅᑕᐅᓇᔭᕐᓂᖓᓂᒃ ᐹᕕᓐᓛᓐ ᐱᓕᕆᓂᖅ 2 ᑐᒃᓯᕋᐅᑎᖓᓂᒃ, ᐃᓚᒋᔭᐅᓪᓗᓂ ᓴᓇᔭᐅᔪᒪᔪᖅ 110 ᑭᓚᒥᑕᓂᒃ ᑕᑭᓂᓕᒃ ᓄᓇᓯᐅᑎᑯᑖᖕᒧᑦ ᐊᖅᑯᑎᒃᓴᖅ ᐅᐊᖕᓇᒧᙵᐅᓯᒪᔪᖅ ᓄᓘᔮᑦ ᑭᙳᐊᑕ ᑐᓚᒃᑕᕐᕕᐊᓄᑦ.
ᐅᓇ ICA ᐋᖅᑭᒃᑕᐅᓯᒪᓇᓱᒃᑐᖅ ᐃᓱᒫᓘᑎᐅᓂᒃᑯᓂᒃ ᐱᓕᕆᐊᖃᕐᓯᒪᓪᓗᓂ, ᐊᕿᐊᕈᖅ ᐅᖃᖅᑐᖅ.
“ᑕᒪᓐᓇ ᐃᓱᒪᒋᓪᓗᒍ, ᐊᒃᓱᕈᕐᓯᒪᒐᑦᑕ ᒪᑯᓂᖓ ᑐᓴᕐᓯᒪᔭᑦᑎᓐᓂᒃ ᓄᓇᓕᖕᓂᑦ ᐱᓕᕆᐊᖃᕋᓱᒃᖢᑕ … ᐊᒻᒪᓗ ᓂᕈᐊᖅᑕᐅᓯᒪᓂᑦᑎᓐᓄᑦ ᐃᓄᐃᑦ ᑲᑐᔾᔨᖃᑎᒌᒍᓪᓗᑕ, ᐱᓕᕆᐊᒃᓴᖃᕋᑦᑕ ᑕᒪᒃᑯᐊ ᐊᕙᑎᓕᕆᓂᕐᒧᑦ ᐃᓱᒫᓘᑎᐅᕙᒃᑐᑦ ᐊᒻᒪᓗ ᐃᓅᖃᑎᒌᖕᓂᒃᑯᑦ ᑮᓇᐅᔭᓕᐅᕈᑎᐅᔪᓐᓇᖅᑐᑦ ᐃᓄᖕᓄᑦ ᓇᓕᒧᒌᒃᑎᒐᓱᒃᖢᒋᑦ.”
ᐅᕘᓇ ICA-ᑎᒍᑦ, ᒥᑦᑎᒪᑕᓕᒃ ᐊᖑᓇᓱᒃᑐᓕᕆᔨᒃᑯᑦ ᑲᑎᒪᔨᖏᑦ ᒥᑦᑎᒪᑕᓕᖕᒥ ᑐᓂᔭᐅᓂᐊᕐᒪᑕ ᐊᑕᐅᓰᖅᑕᐅᓗᑎ ᐊᑭᓕᐅᑎᒥᓐ $1.3 ᒥᓕᐊᓐ ᑖᓚᓂ ᐃᑲᔫᑎᒃᓴᒥᑦ ᐊᖑᓇᓱᖕᓂᕐᒧᑦ ᖃᓄᐃᓕᐅᕈᑎᒃᓴᓄᑦ ᐱᔭᐅᔭᕆᐊᖃᕐᓯᒪᓂᑯᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᑦ.
“ᐅᓇ ᐊᖏᕈᑎᒃᓴᖅ ᐋᖅᑭᒃᓯᒪᖕᒪᑦ ᓄᑖᓂᒃ ᖃᓄᐃᓕᐅᕈᑎᒃᓴᓂᑦ ᐃᓄᖕᓄᑦ ᐃᑲᔫᑎᒃᓴᓂᒃ ᐊᖏᕈᑎᓄᑦ,” ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓴᒐᒃᓴᑎᒍᑦ ᐅᖃᓚᐅᕐᑐᑦ.
ᐹᕕᓐᓛᓐᑯᑦ ᒫᓐᓇ ᐊᖑᓇᓱᒃᑎᓄᑦ ᐃᑲᔫᑎᖓ ᑐᓂᓯᒍᑎᐅᖃᑦᑕᕐᒪᓐ $400,000-ᓂᒃ ᐅᕐᓱᒃᓴᒧᑦ ᐃᓄᖕᓄᑦ ᒥᑦᑎᒪᑕᓕᖕᒥᑦ ᐊᕐᕌᒍᑕᒫᓐ. ᐅᕘᓇᓕ ICA-ᑯᑎᒍᑦ, ᐅᓇ ᐃᑲᔫᑎᒃᓴᖅ ᑲᔪᓯᑎᑕᐅᓂᐊᕐᑐᖅ ᐅᔭᕋᒃᓯᐅᕐᕕᒃ ᐊᐅᓚᑕᐅᓂᖓᓂᒃ, ᐊᒻᒪᓗ $750,000-ᓂᒃ ᐊᕐᕌᒍᑕᒫᓐ ᐅᕐᓱᒃᓴᒧᑦ ᐊᕕᒃᑕᐅᓂᐊᕐᓗᓂ ᐊᖑᓇᓱᒃᑐᓕᕆᔨᓂᒃ ᐊᒃᑐᖅᑕᐅᓯᒪᖕᒥᔪᓂᒃ ᓄᓇᓕᖕᓂ.
ᐊᒻᒪᓗ ᐅᕘᓇ ICA-ᑯᑎᒍᑦ, ᐃᓄᖕᓂ ᑲᑎᒪᔨᒃᓴᓂᒃ ᓄᓘᔮᖕᓂᑦ ᐱᓕᕆᐊᒧᑦ ᐋᖅᑭᒃᓯᓂᐊᕆᓪᓗᑎᒃ. ᑲᑎᒪᔨᐅᓇᔭᖅᑐᓪᓕ ᖃᐅᔨᒪᔨᒻᒪᕆᐅᔪᑦ ᓄᓇᓕᖕᓂᙶᕐᓗᑎᒃ ᐊᒃᑐᖅᑕᐅᓯᒪᔪᓂᒃ ᐅᔭᕋᒃᓯᐅᕐᕕᖕᒧᑦ.
ᓇᐅᑦᑎᖅᓱᖅᑏᑦ ᐃᓄᐃᑦ ᑲᒪᔨᐅᓂᕐᒧᑦ ᐱᓕᕆᐊᖑᔪᖅ ᐋᖅᑭᒃᑕᐅᓂᑯ ᑕᓪᓗᕈᑎᐅᑉ ᐃᒪᖓᓂ ᐃᒪᕐᒥᐅᑕᓄᑦ ᓴᐳᔾᔨᓯᒪᕝᕕᖕᒥ ᐊᖏᒡᓕᒋᐊᖅᑕᐅᓂᐊᖅᑐ ᐃᒪᐅᓕᕐᓗᑎᒃ ᑕᒪᕐᒥᒃ ᓄᓇᓖᑦ ᐊᒃᑐᖅᑕᐅᓯᒪᔪᑦ ᓄᓘᔮᖕᓂ ᐱᓕᕆᐊᒧᑦ. ᐃᑲᔫᑎᑖᕈᑎᐅᖃᑦᑕᕋᔭᖅᑐᖅ ᐅᑯᓇᙵᑦ ᐹᕕᓐᓛᓐᑯᓐᓂᑦ ᐊᒻᒪ ᐊᐅᓚᑕᐅᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ.
ᐹᕕᓐᓛᓐᑯᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᑦ ᐊᑐᕆᐊᖃᖅᑕᖏᓐᓂᒃ ᐃᓚᖃᕐᓂᐊᕐᒥᔪᖅ ᖃᐅᔨᒍᑎᐅᔪᓐᓇᖅᑐᓂᒃ ᐊᒻᒪᓗ ᖃᐅᔨᓴᕈᑎᓂᒃ ᐋᖅᑭᒃᑕᐅᔪᓂᒃ ᐃᓄᖕᓄᑦ ᐅᑯᐊ ᐹᕕᓐᓛᓐᑯᑦ ᖃᓄᐃᓕᐅᕈᑎᒃᓴᖏᓐᓂᒃ ᓄᓇᒥ ᐊᕙᑎᒋᔭᐅᔪᒥ ᓴᐳᔾᔨᓯᒪᓂᕐᒧᑦ. ᑕᒪᒃᑯᐊ ᖃᐅᔨᒍᑎᐅᔪᑦ ᖃᐅᔨᓴᖅᑕᐅᖃᑦᑕᕐᓂᐊᖅᑐᑦ ᓇᐅᑦᑎᖅᓱᖅᑏᑦ ᐱᓕᕆᐊᒧᑦ.
ᐅᑯᐊ ICA-ᑯᑦ ᐱᖁᔨᓂᐊᕐᒥᔪᑦ ᐹᕕᓐᓛᓐᑯᑦ ᐊᐅᓚᑦᑎᓂᕐᒧᑦ ᐸᕐᓇᐅᑎᒋᓂᐊᖅᑕᖏᑦ ᐅᔭᕋᒃᓯᐅᕐᕕᖕᒧᑦ ᐊᖏᖅᑕᐅᔭᕆᐊᖃᕐᓂᐊᕐᓗᑎᒃ ᐃᓄᖕᓄᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᔪᓐᓇᕐᓂᖃᕐᒥᔪᑦ ᐊᖏᕆᐊᖃᕐᓂᕐᒥᑦ ᐊᐅᓚᑦᑎᓂᕐᒧᑦ ᐊᑐᖁᔭᐅᔪᓄᑦ ᐸᕐᓇᐅᑎᓂᒃ.
“ᐱᓕᕆᓯᒪᖕᒪᕆᒃᑲᑦᑕ ᐊᒃᓱᕈᖅᖢᑕ ᑐᙵᕕᓕᐅᕋᓱᖕᓂᕐᒥᑦ ᑕᒪᒃᑯᐊ ᐃᓄᐃᑦ ᓯᕗᓪᓕᐅᑎᑕᐅᓂᐊᕐᓗᑎᒃ. ᑕᒪᑐᒥᖓ ᐱᐅᒃᓴᒻᒪᕆᒃᐳᖓ ᑕᒪᐅᓇ, ᓲᕐᓗ ᐋᖅᑭᒃᓱᐃᔪᓐᓇᓚᐅᕐᓂᑦᑎᓐᓂᒃ,” ᐊᕿᐊᕈᖅ ᐅᖃᖅᑐᖅ.
“ᒪᐅᓇᓕ ᖃᓄᖅ ᐊᒃᑐᐃᓂᖃᕐᓂᐊᕐᓂᖓᒍᑦ, ᐃᓱᒪᔪᖓᓕ ᐋᖅᑭᒋᐊᕐᓯᔪᓐᓇᓚᐅᕐᓂᖏᓐᓂᒃ ᖁᕝᕙᓯᒃᑲᓐᓂᖅᑐᒃᑯᑦ ᑕᒪᐃᓂ ᐱᓕᕆᐊᒃᓴᐅᔪᓂᒃ ᒪᐅᓇ ᑭᓱᑦ ᐃᑲᔫᑎᑖᕈᑎᐅᔪᓐᓇᕐᒪᖔᑦ ᐊᒻᒪᓗ ᐊᐅᓚᑦᑎᔨᐅᔪᓐᓇᖅᑐᓂᒃ ᐊᒻᒪ ᑲᒪᔨᐅᓂᖅ ᖃᓄᐃᓕᖓᒐᔭᕐᓂᖓᓂᒡᓗ.”
ᓄᑖᒥ ᐃᓅᖃᑎᒌᖕᓂᕐᒧᑦ ᖃᐅᔨᓴᕐᓂᕐᒧᑦ ᖃᓄᐃᓕᐅᕈᑎᒃᓴᓂᒃ ᐋᖅᑭᒃᓯᓂᐊᕐᒥᔪᑦ. ᓄᓇᓕᖕᓂ ᓄᓇᖃᖅᑐᓂᒃ ᐱᓕᕆᑎᑦᑎᓕᕐᓂᐊᖅᑐᑦ ᓄᓇᓕᖕᓂ ᖃᐅᔨᓴᖅᑎᐅᓂᐊᖅᑐᓂᒃ ᑲᑎᕐᓱᐃᕙᓪᓕᐊᓗᑎᒃ ᑐᓴᒐᒃᓴᓂᒃ ᐊᒻᒪᓗ ᖃᐅᔨᓴᖅᐸᒡᓗᑎᒃ ᐅᖃᐅᓯᖅ ᐊᑐᖅᑕᐅᓯᒪᓂᖓᓂᒃ, ᐃᒡᓗᓕᕆᓂᕐᒥᓐ, ᐃᓕᓐᓂᐊᕐᓂᓕᕆᓂᕐᒥᓐ ᐊᒻᒪᓗ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᓂᕐᒥᓐ.
ᐃᓄᐃᑦ ᑲᑎᒪᔨᕋᓛᖑᔪᑦ ᑲᒪᒋᔭᖃᕐᓂᐊᕐᒥᔪᑦ ᐃᓕᖅᑯᓯᓕᕆᓂᕐᒥᓐ, ᓄᓇ ᐊᑐᖅᑕᐅᕙᖕᓂᖓᓂᒃ ᐊᒻᒪᓗ ᐊᑐᕈᑎᒃᓴᓄᑦ ᖃᐅᔨᓴᕈᑎᓕᕆᓂᕐᒥᑦ ᐅᓇ ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᖅᑕᐅᖃᑦᑕᕋᓗᐊᕐᒪᖔᑦ ᐃᒻᒪ ᐃᓚᓕᐅᔾᔭᐅᓯᒪᑎᑕᐅᓗᑎᒃ ᐱᓕᕆᐊᒃᓴᓄᑦ. ᐃᓕᖅᑯᓯᓕᕆᓂᖅ, ᓄᓇ ᐊᑐᖅᑕᐅᕙᖕᓂᖓ ᐊᒻᒪ ᐊᑐᕆᑎᒃᓴᓂᒃ ᖃᐅᔨᓴᕐᓂᖅ, ᑮᓇᐅᔭᖃᖅᑎᑕᐅᓗᑎᒃ ᐹᕕᓐᓛᓐᑯᓐᓂᑦ, ᐱᓕᕆᓂᐅᖃᑦᑕᕐᓂᐊᖅᑐᖅ ᐊᖏᔪᓂᒃ ᓴᓇᓕᓚᐅᙱᓐᓂᖏᓐᓂᒃ ᐱᓕᕆᐊᖃᕈᒪᔪᑦ.
“ᐃᓄᖕᓄᑦ ᐊᐅᓚᑕᐅᔪᖅ, ᐃᓄᖕᓄᑦ ᐱᓕᕆᐊᖑᓪᓗᓂ ᐊᒻᒪᓗ ᐅᓂᒃᑳᓕᐊᖑᓯᒪᑐᐃᓐᓇᔾᔮᕈᓐᓃᖅᖢᓂ ᑭᐳᒦᑐᐃᓐᓇᕐᓗᓂ. ᐃᓚᒋᔭᐅᓂᐊᕐᑐᕐᓕ ᖃᓄᖅ ᐱᓕᕆᐊᖑᔪᒪᔪᖅ ᑲᔪᓯᓇᔭᕐᓂᖓᓂᒃ,” ᐊᕿᐊᕈᖅ ᐅᖃᖅᑐᖅ.
ᒫᓐᓇ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑎᒍᑦ, ᐹᕕᓐᓛᓐᑯᑦ ᐃᒪᕐᒧᑦ ᐊᖏᕈᑎᖃᖅᑐᑦ ᐊᒃᑐᖅᑕᐅᓯᒪᔪᓂᒃ ᓄᓇᓕᖕᓂᑦ. ᐅᕘᓇᓕ ICA-ᑯᑦ ᐅᑯᐊ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓇᓗᓇᐃᕐᓯᒐᔭᖅᑐᑦ ᐃᒪᕐᓂᒃ ᐊᒃᑐᖅᑕᐅᓯᒪᔪᓂᒃ ᐱᓕᕆᐊᒧᑦ ᐊᒻᒪᓗ ᐋᖅᑭᒃᓯᓗᑎᒃ ᖃᓄᑎᒋ ᐃᑲᔫᑎᑖᕋᔭᕐᓂᖏᑦ ᓄᓇᓖᑦ.
ICA-ᑯᑦ ᒥᓕᐊᓐᑲᓪᓚᖕᓂᒃ ᐋᖅᑭᒃᓯᕗᑦ, ᓱᕈᓯᖅᑖᕈᑎᒃᓴᓄᑦ ᐃᖅᑲᓇᐃᔭᖅᑐᓄᑦ, ᐊᖏᒡᓕᕚᓪᓕᖅᖢᓂ ᑮᓇᐅᔭᖅᑖᕈᑎᑦ
ᓱᕈᓯᖅᑖᕈᑎᒃᓴᑦ $19 ᐅᓪᓗᕐᒧᑦ ᕿᑐᕐᖓᕆᔭᐅᔪᓄᑦ ᐅᑭᐅᓕᖕᓂ 14 ᑐᖔᓂ ᐃᓄᖕᓄᖕᓄᑦ ᐃᖅᑲᓇᐃᔭᖅᑐᓄᑦ ᓄᓘᔮᖕᓂ ᐋᖅᑭᒃᑕᐅᓂᐊᖅᑐᖅ ᐅᕘᓇ ICA ᐊᒻᒪᓗ ᐃᑲᔫᓯᐊᖅᑖᖅᑎᑕᐅᕙᒡᓗᓂ ᐹᕕᓐᓛᓐᑯᓐᓂᑦ.
ᐊᒻᒪᒃᑲᓐᓂᖅ, ᐹᕕᓐᓛᓐᑯᑦ ᐊᑐᕐᓂᐊᖅᑐᑦ ᑎᑭᓪᓗᒍ $3 ᒥᓕᐊᓐ ᑖᓚᓂ ᓄᓇᓕᖕᓂ ᐊᒃᑐᖅᑕᐅᓯᒪᔪᓂᒃ ᐸᐃᕆᕝᕕᓕᐅᕈᑎᒃᓴᓄᑦ. ᐸᐃᕆᕝᕕᐅᔪᑦ ᐱᔪᓐᓇᐅᑎᖃᕋᔭᖅᑐᑦ ᐊᒻᒪ ᐊᐅᓚᑕᐅᓗᑎᒃ ᓄᓇᓕᖕᓂᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᖃᓚᐅᕐᑐᑦ.
“ᐅᓇ ᐃᑲᔫᑎᒃᓴᓄᑦ ᐊᖏᕈᑎ ᐅᑯᑎᒎᖓᖕᒪᑦ ᐃᓄᐃᓪᓗ ᐹᕕᓐᓛᑯᓪᓗ, ᑕᐃᒪᓕ ᐱᓕᕆᖃᑎᒋᔭᐅᓂᖏᓐᓄᑦ ᐱᓕᕆᐊᖃᖃᑕᐅᓂᐊᕐᒥᔪᑦ, ᐅᑯᑎᒎᓇᕐᓕ ᐱᓕᕆᐊᖑᓂᐊᕐᓯᒪᔪᑎᒍᑦ,” ᐊᕿᐊᕈᖅ ᐅᖃᖅᑐᖅ.
ᒫᓐᓇᐅᔪᕐᓕ, ᐹᕕᓐᓛᓐ ᐃᓄᐃᑦ ᐃᖅᑲᓇᐃᔭᕈᓐᓇᖅᑎᑕᐅᓂᖏᑦ ᒥᑭᓛᒃᑰᖓᕙᖕᒪᑦ ᓄᓘᔮᖕᓂ ᐊᕐᕌᒍᑕᒫᓐ. ᐅᕘᓇᓕ ICA-ᑯᑦ, ᐊᓯᙳᖅᑎᑕᐅᓂᐊᖅᑐᖅ ᐊᕐᕌᒍᑦ ᐱᖓᓱᓅᖓᓕᕐᓗᓂ. ᐹᕕᓐᓛᓐᑯᑦ ᑕᒪᒃᑯᓂᖓ ᒪᓕᒍᓐᓇᙱᑉᐸᑕ, ᑮᓇᐅᔭᖅᑖᖅᑎᑦᑎᔭᕆᐊᖃᕐᓂᖏᓐᓄᑦ ᐊᒃᑐᖅᑕᐅᓯᒪᔪᓄᑦ ᐋᖅᑭᒃᓯᓯᒪᔪᑦ.
ᐊᒻᒪᓗ ᐅᕘᓇ ICA-ᑯ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑭᓕᖅᑕᐅᓂᐊᖅᑐᑦ ᐊᑕᐅᑦᑎᒃᑯᑦ $400,000-ᓂᒃ “ᐊᓂᒍᕐᓯᒪᔪᓄᑦ ᐃᓄᖕᓂ ᐃᖅᑲᓇᐃᔭᖅᑎᑦᑎᒋᐊᖃᕐᓯᒪᓂᕐᒧᑦ,” ᑖᓐᓇᓗ ᐊᕕᒃᑎᑕᐅᓇᔭᖅᖢᓂ ᓄᓇᓕᖕᓄᑦ ᐃᑲᔫᑎᒃᓴᓄᑦ.
ICA-ᑯᑦ ᐊᓯᔾᔨᕐᓯᓂᐊᕐᒥᔪᑦ ᖃᓄᐃᓕᐅᕈᑎᐅᕙᒃᑐᓂᒃ ᐅᑯᐊ ᐅᔭᕋᒃᓯᐅᕐᕕᒃ ᒪᑯᓂᖓ ᐃᓄᖕᓄᑦ ᓇᖕᒥᓂᕆᔭᐅᔪᓂᒃ ᐱᓕᕆᐊᓂᒃ ᐃᑲᔫᑎᑖᕈᓐᓇᕐᒥᓗᑎᒃ ᐱᓕᕆᐊᒧᑦ, ᐊᕿᐊᕈᖅ ᐅᖃᖅᑐᖅ
ᐅᑯᐊ ICA-ᑯᑦ ᐊᒻᒪ ᑳᒻᐸᓂᐅᔫᑉ ᐊᑭᓖᒍᑎᒃᓴᖏᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ ᖁᕝᕙᖅᐸᓪᓕᐊᑎᑦᑎᓇᔭᖅᑐᖅ, ᐅᓇ ᐱᓕᕆᓂᖅ 2 ᑲᔪᓯᓂᐊᕈᓂ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᒫᓐᓇ ᑮᓇᐅᔭᖅᑖᕆᕙᓪᓕᐊᔪᓂᒃ ᒫᓃᒻᒪᓐ 1.19 ᐳᓴᓐᑎ. ᐅᓇ ᐱᓕᕆᓂᖅ 2 ᐊᖏᖅᑕᐅᒃᐸᑦ ᐊᖏᒡᓕᒋᐊᕐᓂᐊᖅᑐᖅ 1.50 ᐳᓴᓐᑎᒧᑦ, ᑖᓐᓇᓗ ᐊᖏᒡᓕᒋᐊᕐᓂᖓ ᐱᒋᐊᕐᕕᖃᕐᓗᓂ ᔫᓂ 15, 2020-ᒥᑦ. ᐊᕐᕌᒍᑦ ᑕᓪᓕᒪᑦ ᐊᓂᒍᖅᐸᑕ ᐱᓕᕆᓂᖅ 2 ᐱᒋᐊᕐᕕᖓᓂᒃ ᑖᓐᓇ ᐊᖏᒡᓕᒋᐊᕋᔭᖅᑐᖅ 3 ᐳᓴᓐᑎᒧᑦ.
ᐊᖅᑭᐊᕈᖅ ᑐᑭᓯᒋᐊᖅᑎᑦᑎᒃᑲᓐᓂᓚᐅᕐᑐᖅ ᐅᑯᐊ CIA-ᑯᑦ ᐃᑲᔪᕈᑎᐅᓂᐊᕋᓗᐊᖅᑎᓪᓗᒍ ᐊᒥᓱᓂ ᓈᒻᒪᙱᓕᐅᕈᑎᐅᓯᒪᔪᓂᒃ ᓄᓇᓕᖕᓂᑦ ᑲᑎᒪᓂᒃᑯᑦ, ᑖᓐᓇ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᖃᓄᐃᓕᐅᕐᓂᖏᓐᓂᒃ ᓵᓚᖃᙱᑦᑐᖅ.
“ICA-ᑯᑦ ᓄᖃᖓᑎᑦᑎᔾᔮᙱᑦᑐᑦ ᐊᔪᙱᓐᓂᕆᔭᐅᔪᓂᒃ ᕼᐋᒻᒪᓚᐅᔪᓄᑦ ᐅᕝᕙᓘᓐᓃᑦ ᐊᖑᓇᓱᒃᑐᓕᕆᔨᓄᑦ ᐃᓱᒪᒋᔭᖏᓐᓂᒃ ᐅᖃᕈᓐᓇᕐᓂᖏᓐᓂᒃ ᐊᒻᒪᓗ ᐃᓱᒪᒋᔭᖏᓐᓂᒃ ᓄᖅᑲᖅᑎᑦᑎᓯᒪᓇᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔩ ᖃᓄᐃᓕᐅᕈᓯᖏᓐᓄᑦ… ᐅᓇ ᓯᕗᒧᒃᐹᓪᓕᕈᑎᒋᔭᕗᑦ ᓄᓇᕗᒻᒥ ᐊᕙᑎᓕᕆᔨᒃᑯᓐᓄᑦ ᑐᓂᓯᔪᓐᓇᕐᓗᑕ ᐋᖅᑭᒍᑎᐅᔪᓐᓇᕋᔭᖅᑐᓂᒃ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐱᓕᕆᐊᖓᒍᑦ ᖃᓄᐃᓕᐅᕈᑎᒃᓴᓕᐅᕐᓯᒪᓂᑦᑎᓐᓂ ᖃᓄᖅ ᐃᓄᐃᑦ ᑲᒪᒋᔭᖃᕈᓐᓇᕐᓂᖏᓐᓂᒃ ᐱᓕᕆᐊᒥᑦ ᐱᓕᕆᐊᖑᓚᐅᕐᓯᒪᙱᑦᑐᒥᒃ,” ᐊᕿᐊᕈᖅ ᐅᖃᖅᑐᖅ.
ᐅᑯᐊ ICA ᐊᖏᖅᑕᐅᕌᓂᓚᐅᕐᑐᑦ ᕿᑭᖅᑕᓂ ᐃᓄᐃᑦ ᖃᑐᔾᔨᖃᑎᒌᖏᓐᓄᑦ ᑲᑎᒪᔨᓄᑦ ᑕᖅᑭᐅᓚᐅᕐᑐᒥᓐ ᐊᒻᒪᓗ ᐱᒻᒪᕆᐅᓕᕐᓯᒪᓪᓗᓂ, ᐊᕿᐊᕈᖅ ᐅᖃᖅᑐᖅ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᖃᑎᖃᕐᓂᐊᖅᑐᑦ ᓄᓇᓕᖕᓂ “ᓇᓗᓇᐃᕐᓯᓂᕐᒥᒃ ᐸᕐᓇᐅᑎᑦ ᖃᓄᖅ ᐱᐅᓛᒃᑯᑦ ᐱᓕᕆᐊᖑᔪᓐᓇᕐᓂᖏᑦ ᐃᑲᔫᑎᒃᓴᖅᑖᕆᔭᐅᔪᓂᒃ,” ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐅᖃᓚᐅᕐᑐᑦ ᑐᓴᒐᒃᓴᓕᐅᕐᓇᒥᓐ. ᐅᑯᐊ ᐸᕐᓇᐅᑎᑦ ᑐᓐᓂᖅᑯᑎᐅᓂᐊᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᕕᒡᔪᐊᖅᑎᑦᑎᓚᐅᙱᓐᓂᖏᓐᓂᒃ ᐅᒃᑑᐱᕆᐅᓛᖅᑐᒥᓐ.
ᐊᕿᐊᕈᖅ ᐅᖃᓚᐅᕐᒥᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑭᖑᓪᓕᖅᐹᓄᑦ ᑐᓴᖅᑎᑦᑎᓂᕐᒥ ᑲᑎᒪᕕᒡᔪᐊᖁᔨᓪᓗᓂ ᐹᕕᓐᓛᓐᑯᑦ ᐊᖏᒡᓕᒋᐊᕈᒪᓂᖏᓐᓄᑦ ᐅᐸᒍᑎᓯᒪᓗᑎᒃ ᒥᑦᑎᒪᑕᓕᖕᒥᑦ, ᑖᒃᑯᐊ ᓄᓇᓖᑦ ᐊᒃᑐᖅᑕᐅᓯᒪᓛᖑᓂᖏᓐᓄᑦ ᐅᔭᕋᒃᓯᐅᕐᕕᖕᒧᑦ.
(0) Comments