ᕿᑭᖅᑕᓂ ᐃᓄᐃᑦ ᒪᑐᐃᕐᓯᒃᑲᓐᓂᕈᒪᔪᑦ ᐃᑲᔫᑎᑖᕈᑎᓄᑦ ᐊᖏᕈᑎᓂᒃ ᐅᑯᓄᖓ ᐹᕕᓐᓛᓐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓚᖓᑦ ᓕᕙᐃ ᐹᓇᐸᔅ ᐱᒋᐊᖁᔨᕗᖅ ᒪᑐᐃᕐᓯᒃᑲᓐᓂᖁᔨᓪᓗᓂ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᓂᒃ ᐅᑯᓄᖓ ᐹᕕᓐᓛᓐ ᓴᕕᕋᔭᒃᓴᒧᑦ ᐅᔭᕋᒃᓯᐅᕐᕕᒃ ᑯᐊᐳᕇᓴᓐ ᓄᓘᔮᖕᓂᑦ ᓴᕕᕋᔭᒃᓴᒧᑦ ᐅᔭᕋᑦᓯᐅᕐᕕᐊᓂᒃ.

ᐹᓇᐸᔅ, ᑲᑎᒪᔨᐅᖃᑕᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᑲᑎᒪᔨᖏᓂᒃ, ᑕᐃᒪᓐᓇ ᐱᐊᓂᒍᑎᖃᓚᐅᖅᑐᖅ ᐅᖃᖅᖢᓂ ᐱᖓᑦᓯᕐᒥᑦ, ᔫᓂ 19-ᖑᑎᓪᓗᒍ, ᐱᓕᕆᔾᔪᑎᓕᕆᓂᕐᒧᑦ ᑲᑎᒪᑎᓪᓗᒋ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐃᖃᓗᖕᓂᑦ ᐱᓇᓱᐊᕈᓯᐅᓚᐅᕐᑐᒥᑦ ᕿᒥᕐᕈᐊᖅᖢᑎᒃ ᐹᕕᓐᓛᓐ ᐸᕐᓇᐅᑎᖏᓐᓂᒃ ᐊᖏᒡᓕᒋᐊᖅᑎᑦᑎᔪᒪᓂᕐᒧᑦ ᐱᓕᕆᐊᖏᓐᓂᒃ.

ᒫᓐᓇᐅᔪᖅ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᑦ, ᑖᓐᓇ ᐊᑐᖅᑕᐅᖔᓕᕐᓂᑯ ᓯᕗᓪᓕᖅᐹᒥᑦ ᐊᖏᕈᑎᐅᓚᐅᕐᓯᒪᔪᒥᑦ ᐊᑎᓕᐅᖅᑕᐅᓂᑯᒥᑦ 2013-ᒥᑦ, ᐊᑎᓕᐅᕐᑕᐅᓚᐅᕐᑐᖅ ᐅᒃᑑᐱᕆᐅᓚᐅᕐᑐᒥᑦ.

ᑭᓯᐊᓂᓕ ᐋᔩᖃᑎᒌᒍᑎᐅᔪᑦ ᑖᔅᓱᒪᙵᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎ ᐱᓕᕆᐊᖑᓚᐅᕐᓯᒪᖕᒪᑦ ᐹᕕᓐᓛᓐ ᐋᕿᒋᐊᖅᓯᒪᔪᒥᑦ ᑐᒃᓯᕋᐅᑎᒥᑦ ᑐᓂᓯᓚᐅᙱᑎᓪᓗᒋ ᐅᑯᓄᖓ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓄᑦ ᐊᖏᒡᓕᒋᐊᖅᑎᑦᑎᔪᒪᓪᓗᑎᒃ ᐊᐅᓚᑕᖏᓐᓂᒃ ᕿᑭᖅᑖᓘᑉ ᐅᐊᖕᓇᖓᓂᒃ.

ᐊᒻᒪᓗ ᐊᖏᕈᑎᐅᕌᓂᓚᐅᕐᓯᒪᓪᓗᓂ ᓯᕗᓂᐊᒍᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏ ᐅᔾᔨᕆᓚᐅᖅᑎᓐᓇᒋᑦ ᖃᓄᖅ ᐅᔭᕋᒃᓯᐅᕐᕕᐅᑉ ᐊᖏᒡᓕᒋᐊᕐᓂᖓ ᐊᒃᑐᐃᓂᖃᕋᔭᕆᐊᒃᓴᖓᓂᒃ ᐃᓄᖕᓂ ᐊᒻᒪ ᐊᕙᑎᒋᔭᐅᒧᒥᓐ.

ᐅᓇ ᐅᔾᔨᕐᓇᕐᓯᒃᑲᓐᓂᓚᐅᕐᑐᖅ ᐊᐃᑉᐸᖓᓂᒃ ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᕐᒥᒃ ᐆᒧᖓ ᐹᕕᓐᓛᓐ ᐱᓕᕆᐊᒧᑦ ᑐᒃᓯᕋᐅᑎᖓ ᐅᑯᑎᒌᓇᖅ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᒃ, ᑲᑎᒪᓚᐅᖅᖢᑎᒡᓗ ᐱᓇᓱᐊᕈᓯᐅᓚᐅᕐᑐᒥᒃ.

ᕿᓚᒥᕈᓗᒃᑯᑦ, ᐹᕕᓐᓛᓐ ᓴᓇᔪᒪᖕᒪᑕ 110 ᑭᓛᒥᑕᓂᒃ ᑕᑭᓂᓕᖕᒥ ᓄᓇᓯᐅᑎᑯᑖᖕᒧᑦ ᐊᖅᑯᑎᒃᓴᒥ ᕿᑭᖅᑖᓘᑉ ᐅᐊᖕᓇᖓᓂᒃ, ᓴᕕᕋᔭᒃᓴᓂᒃ ᓴᖅᑭᑦᑎᕙᓪᓕᐊᓂᖓᓂᒃ ᐊᖏᒡᓕᒋᐊᖅᑎᑦᑎᒻᒪᕆᒡᓗᑎᒃ ᒪᐅᖓ 12 ᒥᓕᐊᓐ ᑕᓐᔅ ᐊᕐᕌᒍᒥ ᐊᒻᒪᓗ ᐅᒥᐊᕐᔪᐊᒃᑰᖅᑎᑦᑎᕙᖕᓂᖏᑦ ᐊᑯᓂᐅᓂᕐᓴᐅᓕᕐᓗᓂ ᒫᙵᑦ ᔪᓚᐃ 1-ᒥ ᓄᕕᐱᕆ 15-ᒧᑦ ᐅᑯᐊ 175-ᖑᔪᑦ ᐃᖏᕐᕋᔾᔪᑏᑦ ᓴᕕᕋᔭᒃᓴᒥᓐ ᐅᓯᑲᖅᑕᐅᑎᑦ ᐅᒥᐊᕐᔪᐊᑦ ᐊᑐᖅᑕᐅᔪᓐᓇᖁᓪᓗᒋᑦ.

ᓄᓇᓯᐅᑎᑯᑖᑉ ᐊᖅᑯᑎᖓ ᓄᓘᔮᑦ ᐅᐊᖕᓇᖓᓄᙵᐅᔪᖅ ᐊᑐᖅᑕᐅᓕᕋᔭᖅᑐᒃᓴᐅᔪᖅ 2021-ᒥᑦ ᐊᒻᒪᓗ ᐊᑐᕐᑕᐅᕙᒡᓗᓂ ᑕᓪᓕᒪᓂᒃ ᓄᓇᓯᐅᑎᑯᑖᓂᒃ 200-ᓂ ᐅᓂᐊᒐᖃᕐᓗᑎᒃ. ᓴᓇᓂᐊᕐᓗᒍ ᐃᓗᑐᖅᑎᕆᔭᕆᐊᖃᕐᓂᐊᕐᑐᑦ ᐊᒻᒪᓗ ᒫᓂ 12.7 ᒥᓕᐊᓐ ᑭᐅᐱᒃ ᒦᑕᔅᓯ ᐅᔭᕋᒃᑖᕐᕕᒃᓴᓂᒃ.

ᐅᖃᐅᓯᖃᑲᑕᖕᓂᖅ ᐊᖏᒡᓕᒋᐊᖅᑎᑦᑎᓇᓱᖕᓂᕐᒧᑦ ᐅᓗᓂ ᑲᑎᒪᑎᓪᓗᒋᑦ ᐱᓕᕆᔾᔪᑎᓕᕆᓂᕐᒥᒃ ᐱᔪᑎᖃᕐᓂᕐᓴᐅᖃᑦᑕᓚᐅᕐᑐᖅ ᖃᓄᖅ ᓇᓗᓇᕋᔭᕐᓂᖓᓂᒃ ᐃᓅᖃᑎᒌᖕᓂᕐᒧᑦ ᐊᒻᒪ ᐊᕙᑎᒋᔭᒧᑦ ᐊᒃᑐᐃᒍᑎᐅᓇᔭᖅᑐᓂᒃ.

ᐅᓇ ᓄᓇᙳᐊᖅ ᓴᕿᑎᑦᑎᓯᒪᔪᖅ ᑕᒪᐃᓐᓂ ᐊᖏᒡᓕᒋᐊᕐᕕᐅᔪᒪᔪᓂ ᑖᒃᑯᓇᙵᑦ ᑲᒻᐸᓂᐅᔪᓂ ᓯᕗᓂᒃᓴᒥᑦ ᐸᕐᓇᐅᑎᖏᓐᓂᒃ: ᐊᑕᐅᓯᖅ ᓄᓇᓯᐅᑎᑯᑖᒧᑦ ᐊᖅᑯᑎ ᐅᐊᓇᒧᑦ ᐃᖏᕐᕋᕝᕕᐅᓗᓂ ᓄᓘᔮᑦ ᕿᙳᐊᓄᑦ ᐊᒻᒪ ᐊᓯᒃᑲᓐᓂᖓ ᓂᒋᕐᒧᑦ Steensby Inlet-ᒧᑦ, ᓴᕿᑎᑦᑎᖃᑦᑕᓕᕐᓂᐊᕈᒪᓪᓗᑎᒃ 30 ᒥᓕᐊᓐ ᑕᓐᔅ ᓴᕕᕋᔭᒃᓴᒥᑦ ᐊᕐᕌᒍᑕᒪᓐ. (ᐊᔾᔨᙳᐊᖁᑎᒋᔭᐅᔪᖅ)

ᑲᑎᒪᖃᑕᐅᔪᑦ ᐊᒻᒪ ᐅᖃᐅᓯᖃᑲᑕᓚᐅᕐᒥᔪᑦ ᑕᑯᓯᒪᓕᖅᑕᖏᓐᓂᒃ ᐊᒃᑐᐃᒍᑎᐅᔪᓂᒃ ᐅᔭᕋᒃᓯᐅᕐᕕᐅᑉ ᐊᐅᓪᓚᖅᑎᑦᑎᖃᑦᑕᕐᓂᖓᒍᑦ ᐊᒻᒪ ᐅᔭᕋᒃᓯᐅᕐᕕᐅᑉ ᐊᐅᓚᑕᐅᓂᖓᒍᑦ: ᕿᓚᓗᒐᐃᑦ ᑑᒑᓖᑦ ᐊᓯᐊᒎᖓᓕᕐᓂᖏᓐᓂᒃ ᒥᑦᑎᒪᑕᓕᐅᑉ ᐅᖓᓯᒋᔭᖓᒍᑦ ᐊᒻᒪᓗ ᐳᔪᕐᒥ ᐊᑲᐅᙱᓕᐅᕈᑎᓗᐊᕌᓗᐃᑦ ᓄᓇᒧ ᓴᕿᔮᓗᐊᕐᓂᖓ ᒪᑯᐊ ᖃᐅᓪᓗᖅᑕᐃᑦ ᑎᕆᒐᓂᐊᕐᔪᐃᑦ ᐊᐅᐸᔪᒃᓯᖃᑦᑕᕐᒪᑕ ᐊᐅᐸᖅᑐᒥᑦ ᓴᕕᕋᔭᒃᓴᐅᑉ ᐳᔪᖓᓄᑦ.

ᐹᓇᐸᔅ ᐅᖃᓚᐅᕐᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᔪᓰᓐᓇᕐᓂᐊᕐᓂᕋᖅᖢᓂᒋᑦ ᐱᓕᕆᖃᑎᖃᕐᓂᒃᑯᑦ ᐹᕕᓛᓐᑯᓐᓂᑦ.

ᑭᓯᐊᓂᓕ ᐅᖃᓚᐅᕐᑐᖅ ᐱᓕᕆᔾᔪᑎᓕᕆᓂᕐᒧᑦ ᑲᑎᒪᓂᐅᔪᖅ ᐃᓱᒫᓘᑎᑖᕈᑎᒋᓂᕋᖅᖢᓂᐅᒃ ᐊᒻᒪᓗ ᐱᕕᖃᙱᓗᐊᓕᖅᖢᑎᒃ ᐅᖃᐅᓯᕆᑦᑎᐊᕆᐊᒃᓴᖅ.

ᐅᑯᐊ ᐃᓄᐃᑦ ᖃᐅᔨᒪᔭᑐᖃᖏᑦ ᓱᓕ ᐃᓱᒫᓘᑎᐅᖏᓐᓇᖅᐳᖅ ᕿᑭᖅᑕᓂ ᐃᓄᐃᒃ ᑲᑐᔾᔨᖃᑎᒌᓄᑦ, ᑖᒃᑯᐊᓗ ᐅᓂᒃᑳᓂᒃ ᓴᖅᑭᑎᑦᑎᓚᐅᕐᖢᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒃᑐᐊᔪᓂ ᑕᒪᑐᖓ ᐅᔭᕋᒃᓯᐅᕐᕕᒃᒧᑦ ᑲᑎᒪᑎᓪᓗᒋᑦ.

ᐊᑐᖅᑕᐅᖃᑦᑕᕐᓂᖓ ᐃᓄᐃᑦ ᖃᐅᔨᒪᔭᖏᑦ “ᐱᒻᒪᕆᐊᓘᖕᒪᑕ,” ᐹᓇᐸᔅ ᐅᖃᖅᑐᖅ, ᐅᖃᕆᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᑦ ᑕᐅᑐᒍᑎᐅᔭᕆᐊᖃᕐᓂᖏᓐᓂᒃ ᐹᕕᓐᓛᓐ ᖃᐅᔨᓴᓕᕌᖓᑦ ᐅᔭᕋᒃᓯᐅᕐᕕᒃᒥᑦ.

ᐅᓇ ᑐᓴᖅᑕᐅᓚᐅᕐᑐᖅ ᒪᑐᕙᓪᓕᐊᓕᖅᑎᓪᓗᒍ ᐅᖃᐅᓯᕆᔭᐅᔪᓂᒃ ᕗᕌᖕᒃ ᑎᐊᔅᑐᒧᑦ, ᖃᐅᔨᓴᖅᑎᒋᔭᐅᔪᖅ ᒥᑦᑎᒪᑕᓕᖕᒥᐅᓄᑦ ᐆᒧᖓ ᐹᕕᓐᓛᓐᑯᑦ ᐱᓕᕆᐊᖓᓄᑦ, ᐅᖃᖅᖢᓂ ᒥᑦᑎᒪᑕᓕᒃ ᐃᑲᔪᖅᑐᐃᓂᖏᓐᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᒪᑐᐃᖅᓯᖁᔨᓂᖏᓐᓂᒃ ᐆᒥᖓ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎᒥᑦ.

ᑎᐊᔅᑐ, ᖃᐅᔨᓴᖅᑎ ᖃᐅᔨᒪᔭᐅᔪᖅ ᓯᕗᓂᐊᒍᑦ ᖃᐅᔨᓴᕈᑎᒋᓂᑯᖏᓐᓂᒃ ᐊᒃᑐᐃᒍᑎᐅᓇᔭᖅᑐᓂᒃ ᐅᔭᕋᒃᓯᐅᕐᕕᐅᑉ ᓄᓇᕗᑦ ᑭᕙᓪᓕᕐᒥᐅᖓᓂᒃ, ᐊᒻᒪᓗ ᐅᖃᐅᓯᖃᖅᖢᓂ ᐹᕕᓐᓛᓐᑯᑦ ᓈᒻᒪᙱᓕᐅᕈᑎᒋᓗᐊᖅᑕᖏᓐᓂᒃ ᐊᒥᓱᕈᓘᔭᕐᓂᒃ.

ᑎᐊᔅᑐ ᐅᖃᓚᐅᕐᑐᖅ ᐃᓄᐃᑦ ᖃᐅᔨᒪᔭᑐᖃᖏᑦ “ᓈᒻᒪᙱᓗᐊᕐᓂᖏᓐᓂᒃ,” “ᑐᑭᓯᔭᐅᓯᒪᙱᓗᐊᕐᓂᖓᓂᒃ” ᐊᒻᒪᓗ “ᓈᒻᒪᙱᑦᑐᒃᑯᑦ” ᐊᑐᖅᑕᐅᕙᖕᓂᖓᓂᒃ ᐹᕕᓐᓛᓐᑯᓐᓂᒃ.

ᐅᖃᖅᖢᓂ ᐃᓅᖃᑎᒌᖕᓂᕐᒧᑦ ᐊᒻᒪ ᐃᓕᖁᓯᑐᖃᕐᒧᑦ ᖃᐅᔨᓴᕈᑎ, ᐅᖃᐅᓯᕆᔭᖓ ᐱᑕᖃᙱᓗᐊᕐᓂᖓ ᐃᓚᐅᑎᑦᑎᓂᖏᓐᓂᒃ ᐊᕐᓇᓂᒃ, ᐃᓚᒌᒃᑐᓂᒃ ᐊᒻᒪ ᓂᕿᖃᕈᓐᓇᑦᑎᐊᕐᓂᕐᒥᒃ, “ᓈᒻᒪᙱᓗᐊᕐᓂᖓᓂᒃ.”

ᐊᖏᒡᓕᕙᓪᓕᐊᓂᖓᓄᓪᓕ ᖃᐅᔨᓴᕐᓂᒃᑯᑦ, ᑎᐊᔅᑐ ᐅᖃᓚᐅᕐᑐᖅ “ᓈᒻᒪᙱᓕᐅᕈᑎᐅᕙᖕᓂᖓᓂᒃ” ᐊᒻᒪᓗ ᓯᓚᐅᑉ ᐊᓯᙳᖅᐸᓪᓕᐊᓂᖓ ᖃᐅᔨᓴᖅᑕᐅᑦᑎᐊᓚᐅᕐᓯᒪᙱᓐᓂᖓᓂᒃ.

ᐅᖃᓚᐅᕐᒥᔪᖅ ᒥᑦᑎᒪᑕᓕᒃ ᐃᓱᒫᓘᑎᖃᒻᒪᕆᖕᓂᖓᓂᒃ ᐱᕙᓪᓕᐊᓂᐅᔪᖅ ᐅᓇ ᑐᒃᓯᕋᐅᑎᓕᐊᖑᓯᒪᔪᖅ ᓄᓇᓯᐅᑎᑯᑖᑉ ᐊᖅᑯᑎᒃᓴᖓ.

ᐊᓯᖏᑦ ᐃᓱᒫᓘᑎᑦ ᓴᖅᑭᑕᐅᔪᑦ ᐃᓄᖕᓄᑦ ᑲᑎᒪᔪᓂᒃ ᑭᖑᓪᓕᖅᐹᒥᒃ ᐅᖃᓪᓚᒃᑎᓪᓗᒋ ᐃᓚᖃᓚᐅᕐᑐᑦ ᐱᑕᖃᕆᐊᖃᕐᓂᖓᓂᒃ ᐱᐅᓂᕐᓴᒥᒃ ᓴᐳᔾᔨᓯᒪᒍᑎᓂᒃ ᐊᒻᒪ ᐊᓯᐅᑎᑦᑎᑦᑕᐃᓕᒍᑎᒃᓴᓂᒃ ᐃᑦᑕᕐᓂᓴᖃᕐᕕᐅᔪᑦ, ᐊᒻᒪᓗ ᐱᓕᕆᑎᑦᑎᓂᕐᓴᐅᔪᓐᓇᕐᓂᐊᕐᓗᑎᒃ ᐊᒻᒪ ᐃᓚᐅᑎᑦᑎᒃᑲᓐᓂᕐᓗᑎᒃ ᒥᑭᓐᓂᕐᓴᓂᒃ ᓄᓇᓕᖕᓂ ᖃᓂᕐᓴᖅᑐᓂᒃ ᐅᔭᕋᒃᓯᐅᕕᒃᒥᑦ.

ᒫᓐᓇᓕ ᐹᕕᓐᓛᓐ ᑕᖅᑭᓂᒃ ᐱᖓᓱᓂᒃ ᖁᕕᐊᓱᓕᖅᑎᑦᑎᔭᕆᐊᖃᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐋᕿᒃᓱᐃᓗᑎᒃ ᓈᒻᒪᙱᓕᐅᕈᑎᐅᑲᑕᒃᑐᓂᒃ, ᒪᑯᑎᑐᓇ, ᖃᓄᕐᓕ ᑐᒃᑐᐃᑦ ᐃᑳᖃᑦᑕᕋᔭᕐᒪᑕ ᓄᓇᓯᐅᑎᑯᑖᑉ ᐊᖅᑯᑎᐊᓂᒃ, ᑐᓴᐅᒪᑎᑦᑎᒃᑲᓐᓂᕐᓗᑎᒃ ᑐᓴᐅᒪᔭᐅᔪᒪᔪᓂᒃ ᑲᑎᒪᔭᖅᑐᖅᑐᑦ ᐱᔪᒪᔭᖏᓐᓂᒃ ᐊᒻᒪᓗ ᐋᕿᒃᓱᐃᓗᑎᒃ ᑭᒃᑯᓕᒫᑦ ᑲᑎᒪᑎᑦᑎᓂᐊᕐᓗᑎᒃ ᐱᓕᕆᓂᖅ 2-ᒥᑦ ᑐᒃᓯᕋᐅᑎᖏᓐᓂᒃ.

ᐅᓇ ᑲᑎᒪᓂᒃᓴᖅ ᒥᑦᑎᒪᑕᓕᖕᒦᓐᓂᐊᓚᐅᕐᑐᓯ ᓯᑎᐱᕆᐅᑉ ᕿᑎᕐᐸᓯᐊᓂᒃ.

ᑭᓯᐊᓂᓕ ᐅᓄᕐᓂᐊᕐᓂᖏᓐᓄᑦ ᓂᕆᐅᒋᔭᐅᔪᑦ ᑲᑎᒪᔭᖅᑐᕐᓂᐊᕐᑐᑦ ᐊᒻᒪᓗ ᐃᓂᒃᓴᖅᑕᖃᙱᓗᐊᕐᓂᖓ ᓄᓇᓕᖕᓂ, ᑲᑎᒪᓂᐅᔪᖅ ᑕᒪᐃᓐᓂ ᒥᑦᑎᒪᑕᓕᒃᒥ ᐊᒻᒪ ᐃᖃᓗᖕᓃᓐᓂᐊᓕᕐᖢᓂ, ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᐅᓚᑦᑎᔨ ᐅᖃᓚᐅᕐᑐᖅ.

ᐅᓪᓗᐃᑦ ᑲᑎᒪᕝᕕᐅᓂᐊᕐᑐᑦ ᑖᑯᓄᖓ ᒪᕐᕉᖕᓄᑦ ᑲᑎᒪᓂᒃᓴᖏᑦ ᐅᖓᕙᕆᐊᖅᑕᐅᔪᑦ, ᐅᕗᖓ ᓯᑎᐱᕆ 23-ᒥᑦ ᓯᑎᐱᕆ 27-ᒧᑦ ᒥᑦᑎᒪᑕᓕᒃᒥᑦ ᐊᒻᒪ ᓯᑎᐱᕆ 30-ᒥᑦ ᐅᒃᑑᐱᕆ 4-ᒧᑦ ᐃᖃᓗᖕᓂᑦ.

ᒥᑦᑎᒪᑕᓕᒃᒥᑦ ᑲᑎᒪᓂᐅᓂᐊᕐᑐᖅ ᐱᔾᔪᑎᖃᓗᐊᕐᓂᐊᖅᑐᖅ ᐃᓚᐅᑎᑦᑎᓂᕐᒥᒃ ᓄᓇᓕᖕᓂᑦ ᐊᒻᒪ ᐱᓕᕆᖃᑎᒌᒃᑐᓂᒃ. ᐃᖃᓗᖕᓂ ᑲᑎᒪᓂᒃᓴᖅ ᐃᓚᖃᕐᓂᐊᖅᖢᓂ ᑲᑎᒪᖃᑕᐅᒃᑲᓐᓂᖅᑐᓂᒃ ᐊᒻᒪᓗ ᓄᓇᓕᖕᓂ ᑲᑎᒪᑎᑦᑎᓗᑎᒃ ᑕᓪᓕᒪᓂᒃ ᑭᒡᒐᖅᑐᐃᔨᐅᔪᓂᒃ ᑐᙵᓱᒃᑎᑕᐅᓯᒪᔪᓂᒃ ᐅᑯᓇᙵᑦ ᐃᒡᓗᓕᒃ, ᓴᓂᕋᔭᒃ, ᑲᖏᖅᑐᒑᐱᒃ, ᒥᑦᑎᒪᑕᓕᒃ, ᐃᒃᐱᐊᕐᔪᒃ, ᖃᐅᓱᐃᑦᑐᖅ ᐊᒻᒪ ᐊᐅᓱᐃᑦᑐᖅ.

ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐸᕐᓇᐅᓯᐅᕐᒥᔪᑦ ᐳᓛᕈᒪᓪᓗᑎᒃ ᓄᓘᔮᓂᑦ ᐅᔭᕋᒃᓯᐅᕐᕕᒃᒥᑦ ᑲᑎᒪᑎᑦᑎᓚᐅᙱᓐᓂᖏᓐᓂᒃ.

ᐊᓯᙳᕈᑎᐅᔪᑦ ᓯᕗᓪᓕᕐᒥ ᐋᕿᒃᑕᐅᓚᐅᕐᑐᒥ ᑭᖑᓕᖅᐹᒥᑦ ᑲᑎᒪᑎᑦᑎᓂᕐᒥ ᑐᑭᖃᖅᑐᖅ ᓄᓇᕗᒥᑦ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐅᓂᒃᑳᖏᑦ ᐃᓱᒪᓕᐅᕆᔾᔪᑎᖃᖅᖢᑎᒃ ᐅᑯᐊ ᐹᕕᓐᓛᓐ ᐊᖏᒡᓕᒋᐊᕈᒪᓂᖓ ᒥᓂᔅᑕᓄᑦ ᐋᑐᕚᒥ ᐱᔭᐅᓂᐊᕐᓗᑎᒃ ᐱᓇᓱᐊᕈᓰᑦ ᐱᖓᓱᑦ ᐊᓂᒍᓚᐅᕐᑎᓪᓗᒋᑦ ᒐᕙᒪᑐᖃᒃᑯᑦ ᓂᕈᐊᖅᑎᑦᑎᓚᐅᕐᑎᓪᓗᒋᑦ ᐅᒃᑑᐱᕆ 21-ᒥᑦ.