ᕿᒥᕐᕈᐊᕐᓂᕐᒥᒃ ᑲᑎᒪᔩᑦ ᐃᑲᔪᖅᑐᐃᔪᑦ ᐹᕙᓐᓛᓐᑯᑦ ᑐᒃᓯᕋᐅᑎᖓᓂ ᐊᖏᓂᕐᓴᒥ ᐊᐅᓪᓚᖅᑎᑦᑎᖃᑦᑕᕈᒪᓂᕐᒧᑦ

For English version, see Review board backs Baffinland’s proposal for higher shipping limit

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏ ᐊᖏᖅᑕᐅᖁᔨᓯᒪᔪᑦ ᐸᕙᓐᓛᓐᑯᑦ ᓴᕕᕋᔭᒃᓴᒥ ᐅᔭᕋᒃᓯᐅᕐᕕᐅᑉ ᐱᔪᒪᓯᒪᔭᖓᓂᒃ ᑲᔪᓯᔪᓐᓇᕐᓂᐊᕐᒪᑕ ᐊᐅᓪᓚᖅᑎᑦᑎᕙᖕᓂᕐᒥᒃ 6 ᒥᓕᐊᓐ ᑕᓐᔅᓂ ᓴᕕᕋᔭᒃᓴᓂᒃ ᓄᓘᔮᑦ ᕿᙳᐊᒍᑦ 2024 ᓄᙳᐊᓄᑦ.

ᑭᖑᓪᓕᖅᐹᖅ ᐃᓱᒪᓕᐅᓇᔭᕐᑐᖅ ᐊᖏᖅᑕᐅᓂᕐᒧᑦ ᐅᓇ ᒐᕙᒪᑐᖃᒃᑯᓐᓄᑦ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕ ᑖᓂᐅᓪ ᕚᓐᑐᓪ. ᓄᓇᕗᒻᒥ ᐊᕙᑎᓕᕆᔨᒃᑯᑦ ᖃᐅᔨᓴᖃᑦᑕᕐᒪᑕ ᐊᕙᑎᒋᔭᐅᔪᒥᒃ ᐊᒻᒪ ᐃᓅᖃᑎᒌᖕᓂᕐᒧᑦ ᐊᒃᑐᐃᔾᔪᑎᐅᔪᓂᒃ ᐱᓕᕆᐊᓄᑦ ᓄᓇᕗᒥᑦ ᐊᒻᒪᓗ ᐃᓱᒪᓕᐅᕆᕙᒃᖢᑎᒃ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᒧ ᑲᔪᓯᖁᔨᓗᑎᒃ ᐋᒃᑲᓘᓐᓃᑦ.

ᕚᓐᑐᓪ ᑐᓴᐅᒪᔾᔪᑎᓕᓂᕐᒧᑦ ᑐᑭᒧᐊᖅᑎᑦᑎᔨᖓ, ᑲᐃᐅᓪ ᐋᓚ, ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᓯᑎᐱᕆ 14-ᒥ ᐅᓇ ᕚᓐᑐᓪ ᐱᓚᐅᕐᓂᕋᖅᖢᓂᐅᒃ ᐊᕙᑎᓕᕆᔨᒃᑯᓐᓂ ᐅᓂᒃᑳᓂ ᐊᒻᒪᓗ ᑖᔅᓱᒪ ᐊᓯᖏᓪᓗ ᒥᓂᔅᑕᐅᖃᑕᐅᔪᑦ ᑖᔅᓱᒥᖓ ᕿᒥᕐᕈᐊᕐᓂᐊᖅᖢᑎᒃ.

ᐋᓚᓐ ᑐᓂᓯᔪᓐᓇᓚᐅᙱᑦᑐᖅ ᖃᓄᖅ ᐊᑯᓂᐅᓇᔭᕐᒪᖓ ᐱᓕᕆᐊᖑᓂᖓ ᑭᓯᐊᓂᓕ ᐅᖃᖅᖢᓂ ᐃᓱᒪᓕᐅᕆᓂᐊᕐᓂᖏᓐᓂᒃ “ᓈᒻᒪᒃᓯᒃᐸᑦ ᐊᒻᒪ ᖃᐅᔨᓴᖅᑕᐅᒻᒪᕆᓚᐅᕐᑎᓪᓗᒍ.”

ᐹᕙᓐᓛᓐᑯᑦ ᓚᐃᓴᓐᓯᖓ ᒫᓐᓇ ᐊᐅᓪᓚᖅᑎᑦᑎᔾᔪᑎᐅᔪᓐᓇᕐᒪᑦ 4.2 ᒥᓕᐊᓐ ᑕᓐᔅᓂ ᓴᕕᕋᔭᒃᓴᓂᒃ ᐊᕐᕌᒍᒥ ᓄᓘᔮᓂ ᐅᔭᕋᒃᓯᐅᕐᕕᒃᒥ ᕿᑭᖅᑖᓘᑉ ᐅᐊᖕᓇᖅᐸᓯᐊᓂᒃ. ᑭᓯᐊᓂᓕ ᑕᐃᒪᙵ 2018-ᒥ, ᑖᒃᑯᐊ ᑲᒻᐸᓂᐅᔪᑦ ᐱᔪᓐᓇᐅᑎᒃᑯᑎ ᐊᐅᓪᓚᖅᑎᑦᑎᔪᓐᓇᖃᑦᑕᕐᒪᑕ 6 ᒥᓕᐊᓐ ᑕᓐᔅᓯ ᐊᕐᕌᒍᒥ.

ᐃᓚᒋᔭᐅᓪᓗᓂ ᐱᔪᒪᔾᔪᑎᓄᑦ 6 ᒥᓕᐊᓐ ᑕᓐᔅᓂ ᐃᓱᖃᕈᒪᓂᕐᒥᒃ, ᐹᕙᓐᓛᓐᑯᑦ ᑐᒃᓯᕋᐅᑎᖓ ᐱᔪᒪᔾᔪᑎᖃᕐᒥᔪᖅ ᐊᐅᓪᓚᖅᑎᑦᑎᔪᓐᓇᕐᓂᕐᒥᒃ 900,000 ᑕᓐᔅᓂ ᑕᒫᓂᕐᕆᑐᐃᓐᓇᖅᑐᓂᒃ ᓴᕕᕋᔭᒃᓴᓂᒃ, ᐅᑯᐊᓕ ᐊᕐᕌᓂᐅᓚᐅᕐᑐᖅ ᑕᒪᐅᙵᖅᑕᐅᓂᑯᑦ ᑭᓯᐊᓂ ᐊᐅᓪᓚᖅᑎᑕᐅᓯᒪᙱᑦᑐᑦ ᓈᒻᒪᙱᓕᐅᕈᑎᖃᕐᓯᒪᓂᕐᒥᒃ ᓯᓚᑦᑎᐊᕙᐅᙱᓐᓂᕐᒥᒃ ᐅᕝᕙᓘᓐᓃᑦ ᐊᐅᓪᓚᖅᑎᑦᑎᓂᕐᒧᑦ ᓄᖅᑲᖅᑕᕈᑎᓄᑦ.

ᐱᖁᔭᐅᒍᑎᒃ ᐅᓇ ᐹᕙᓐᓛᓐᑯᓐᓂᒃ ᐊᐅᓪᓚᖅᑎᑦᑎᔪᓐᓇᕐᓯᔾᔪᑎᐅᓇᔭᕐᑐᖅ ᒪᐅᖓ ᑎᑭᑦᑐᓂᒃ 6.9 ᒥᓕᐊᓐ ᑕᓐᔅ ᓴᕕᕋᔭᒃᓴᓂᒃ 2023-ᒥ ᐊᒻᒪᓗ 2024-ᒥ.

ᐱᓇᓱᒍᑎᖏᓐᓂᒃ ᐊᖏᓂᕐᓴᒥ ᐊᐅᓪᓚᖅᑎᑦᑎᔪᓐᓇᕐᓯᔪᒪᓂᕐᒥᒃ, ᐹᕙᓐᓛᓐᑯ ᐅᖃᓚᐅᕐᑐᑦ ᐅᓇ ᑐᒃᓯᕋᐅᑎᖓ ᐊᖏᖅᑕᐅᒃᐸᑦ ᐃᑲᔪᕈᑎᒻᒪᕆᐅᓕᕋᔭᕐᓂᖓᓂᒃ ᑲᑉᐸᓂᐅᑉ ᐊᐅᓚᑕᐅᓂᖓᒍᑦ.

“ᖁᕕᐊᓱᒃᑐᒍᑦ ᖃᐅᔨᒐᑦᑕ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑭᐅᔾᔪᑎᖃᓚᐅᕐᓂᖏᓐᓂᒃ ᓈᒻᒪᒋᔭᑦᑎᓐᓂᒃ ᐃᓱᒪᓕᐅᕈᑎᑦᑎᓐᓂᒃ ᒐᕙᒪᑐᖃᒃᑯᑦ ᒥᓂᔅᑕᖓᓄᑦ ᐅᑭᐅᕐᑕᖅᑐᕐᓕᕆᓂᕐᒧᑦ,” ᐹᕙᓛᓐᑯ ᑐᓴᐅᒪᔾᔪᑎᓕᕆᓂᕐᒧ ᐊᖓᔪᖅᑳᖓ ᐲᑕ ᐋᒃᒪᓐ ᐅᖃᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ.

ᐅᖃᓚᐅᕐᑐᖅ ᑲᑎᒪᔩᑦ ᐃᓱᒪᓕᐊᖓ ᖃᐅᔨᓯᒪᓂᖏᓐᓂᒃ ᐱᐅᓯᕚᓪᓕᕈᑎᐅᓇᓱᖕᓂᖓᓂᒃ ᐹᕙᓐᓛᓐᑯᑦ ᐊᒃᑐᐃᔾᔪᑎᒋᓯᒪᔭᖏᓐᓂᒃ ᐊᕙᑎᒋᔭᐅᔪᒥᒃ ᐊᒻᒪᓗ ᑕᕆᐅᕐᒥᐅᑕᓄᑦ ᖃᓄᐃᓕᐅᕈᑎᐅᔪᓂᒃ ᑭᑭᖅᑖᓘᑉ ᐅᐊᖕᓇᖓᓂ.

ᐃᓱᒪᓕᐊᖏᓐᓂ ᐅᑯᐊ ᑲᑎᒪᔩᑦ ᐅᖃᓚᐅᕐᑐᑦ ᐹᕙᓐᓛᓐ ᐱᓕᕆᐊᒧᑦ ᐱᔪᓐᓇᐅᑎᓂᒃ ᒪᓕᑐᐊᖅᐸᑕ ᐊᒻᒪ ᐱᐅᓯᕚᓪᓕᖅᑎᑦᑎᓂᕐᒥᒃ ᐱᓇᓱᓪᓚᕆᒃᑯᑎᒃ ᐊᒻᒪᓗ ᖃᐅᔨᓴᖅᐸᓪᓕᐊᓂᕐᒥᒃ ᐊᕙᑎᒋᔭᒥ ᐊᒃᑐᐃᔾᔪᑎᓂᒃ ᐅᔭᕋᒃᓯᐅᕐᕕᒃᒥ.

ᐃᓱᒪᓕᐊᖏᓐᓂᒃ ᑲᑎᒪᔩᑦ ᐅᖃᓚᐅᕐᑐᑦ ᐅᑯᐊ ᐹᕙᓐᓛᓐᑯᑦ ᐱᓕᕆᐊᒧᑦ ᓇᓗᓇᐃᒃᑯᑎᖏᓐᓂᒃ ᐊᑐᕆᐊᖃᖅᑕᖏᑦ ᐊᒻᒪ ᐱᓇᓱᐊᒐᒃᓴᖏᓐᓂᒃ ᒪᓕᑐᐊᖅᐸᑕ ᒪᐅᓇ ᐱᐅᓯᕚᓪᓕᖅᑎᑦᑎᓂᕐᒥᒃ ᐊᒻᒪ ᖃᐅᔨᓴᖅᐸᓪᓕᐊᓂᕐᒥᒃ ᐊᕙᑎᒋᔭᒥ ᐊᒃᑐᐃᔾᔪᑎᐅᔭᕆᐊᓕᖕᒪ ᐅᔭᕋᒃᓯᐅᕐᕕᖕᒧ, “ᓈᒻᒪᙱᓕᐅᕈᑎᐅᑐᐃᓐᓇᕆᐊᓕᖕᓂ ᐊᒻᒪ ᐃᓅᑲᑎᒌᖕᓂᒃᑯᑦ ᐊᒃᑐᐃᔾᔪᑎᓂ ᐊᒃᑐᐊᔪᓂᒃ ᑐᒃᓯᕋᐅᑎᓂᒃ ᐊᐅᓚᑕᐅᔪᓐᓇᖅᐸᑕ.”

ᑲᑎᒪᔩᑦ ᖃᐅᔨᓴᕐᓂᖅ ᑎᑎᕋᖅᑕᐅᓯᒪᔪᓂᒃ ᕿᒥᕐᕈᐊᕐᓂᒃᑰᖓᓚᐅᕐᑐᑦ ᐊᒻᒪᓗ ᒪᕐᕈᐃᖅᖢᑎᒃ ᐅᐸᖃᑎᒌᖕᓂᒃᑯᑦ ᓄᓇᓕᖕᓂ ᑲᑎᒪᑎᓪᓗᒋᑦ. ᐊᑕᐅᓯᖅ ᐃᖃᓗᖕᓂ ᔪᓚᐃ 27-ᒥ ᔪᓚᐃ 29-ᒧ ᐊᒻᒪᓗ ᐊᐃᑉᐸᖓ ᒥᑦᑎᒪᑕᓕᖕᒥ ᐋᒐᓯ 1 ᐊᒻᒪ 2-ᒥ.

ᑲᑎᒪᔩᑦ ᐅᖃᓚᐅᕐᒥᔪᑦ ᖃᐅᔨᓴᖅᑎᓪᓗᒋ ᐃᑲᔪᖅᑕᐅᖃᑦᑕᓚᐅᕐᓂᖏᓐᓂᒃ ᕼᐋᒻᒪᓚᓄᑦ, ᓇᖕᒥᓂᖅ ᐱᓕᕆᐊᖃᖅᑐᓄᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᑕᒫᓂ ᓄᓇᖃᖅᑐᓂᒃ ᐅᖃᖅᑐᓂᒃ ᐃᖅᑲᓇᐃᔮᖃᕈᓐᓇᕐᓂᖅ ᐱᑕᖃᕐᓂᕐᓴᐅᓂᐊᕐᓂᖓᓂᒃ ᐊᒻᒪ ᑮᓇᐅᔭᑎᒍ ᐃᑲᔪᕈᑎᖃᕐᓂᖓᓂᖓᓂᒃ ᐅᓄᕐᓂᕐᓴᓂ ᐊᐅᓪᓚᖅᑎᑦᑎᔪᓐᓇᖅᓯᒃᐸᑕ.

ᑭᓯᐊᓂᓕ ᑲᑎᒪᔩᑦ ᐅᖃᓚᐅᕐᒥᔪᑦ ᐹᕙᓛᓐᑯᑦ ᑐᒃᓯᕋᐅᑎᖓ ᑕᒪᐃᓐᓄᑦ ᐃᑲᔪᖅᑐᖅᑕᐅᓚᐅᙱᓐᓂᕋᖅᖢᒍ. ᒥᑦᑎᒪᑕᓕᒃᒥ ᐃᓚᖏ ᓄᓇᖃᖅᑐᑦ ᐅᖃᓚᐅᕐᑐᑦ ᐊᑐᖃᖅᑕᖅᑕᖏ ᒪᑯᐊ ᐃᒪᐃᑦ ᑕᕆᐅᙳᙱᑦᑐ ᐊᒻᒪ ᓄᓇᐃᑦ ᐅᔭᕋᒃᓯᐅᕐᕕᐅᑉ ᖃᓂᒋᔭᖓᓃᑦᑐᑦ ᐊᒻᒪ ᐅᓯᑲᖅᑕᕐᕕᒃᒧ ᐊᖅᑯᑎᒧ ᖃᓂᒃᓴᖅᑐᐃ ᐊᓯᙳᕐᓯᒪᓕᕐᓂᖏᓐᓂᒃ ᐳᔪᕐᒧᑦ ᐅᔭᕋᒃᓯᐅᕐᕕᖕᒥᙶᖅᑐᓂᒃ.

ᐃᓚᖏ ᒥᑦᑎᒪᑕᓕᖕᒥᐅᑕᑦ ᐅᖃᓚᐅᕐᒥᔪᑦ ᑮᓇᐅᔭᓕᐅᕐᓂᒃᑯ ᓈᒻᒪᙱᓕᐅᕈᑎᖃᓚᐅᕐᓂᖓᓂᒃ ᓄᓇᓕᖕᓄᐊᖅᐸᓪᓕᐊᔪᓂᒃ.