ᖃᐅᔨᓇᓱᒃᑐᑦ ᐃᖅᑲᖅᑐᐃᕕᒃᑯᑦ ᐅᖃᓚᐅᕐᑐᖅ ᓵᓕ ᕿᓂᖅ ᑐᖁᑕᐅᓂᕐᒧᑦ ᐃᓅᔪᓐᓃᕐᓂᕋᖅᑕᐅᓪᓗᓂ

ᐃᖅᑲᖅᑐᐃᕕᐅᔪᑦ ᐊᖏᖅᑐᑦ ᑐᖁᖓᔪᓕᕆᔨᐅ ᓴᖅᑭᑎᓯᒪᔭᖓ ᓇᓗᓇᙱᓗᐊᓚᐅᕐᒪᑦ ᐃᒻᒥᓃᕋᔭᕆᐊᒃᓴᖓᓂᒃ

ᐃᖅᑲᖅᑐᐃᕕᒃᑯᑦ ᖃᐅᔨᓇᓱᒍᑎᐅᔪᖅ ᖁᑭᖅᑕᐅᓪᓗᓂ ᐃᓅᔪᓐᓃᖅᑐᕕᓂᕐᒥᒃ, ᓵᓕ ᕿᕐᓂᖅ, 21, ᐃᓅᔪᓐᓃᕐᓂᑯ ᐅᖅᓱᖅᑑᑉ ᒥᑦᑕᕐᕕᖓᓂᒃ ᑎᓯᐱᕆ 2016-ᖑᑎᓪᓗᒍ, ᐃᓱᓕᒍᑎᖃᓚᐅᕐᑐᖅ ᑖᓐᓇ ᐃᓅᔪᓐᓃᕐᓂᕋᖅᑕᐅᓪᓗᓂ ᑐᖁᑕᐅᓂᖓᓄᑦ. ᐃᓱᒪᓕᐅᕆᔾᔪᑎᐅᔪᑦ ᐃᖅᑲᖅᑐᐃᕕᖕᒥᒃ ᐃᓚᖃᓚᐅᕐᑐᖅ ᐹᓖᓯᒃᑯᑦ ᓄᓇᓯᐅᑎᖏᓐᓂᒃ ᓄᓇᕗᒥᑦ ᐱᖁᑎᖃᖅᑎᑕᐅᓂᕐᓴᐅᓗᑎᒃ ᒪᑐᒧᖓ ᑖᓗᐊᖃᑦᑕᕐᓂᕐᒧᑦ. (ᐊᔾᔨᙳᐊᖁᑎᒋᔭᐅᔪᖅ)

By ᒫᑕᓕᓐ ᕼᐊᐅᕕᑦ

For an English version of this story, see Inquest jury rules Charles Qirngnirq’s death a homicide

ᐃᖅᑲᖅᑐᐃᔨᒃᑯᑦ ᐅᑎᓚᐅᕐᒪᑕ ᖃᓄᐃᓕᐅᒍᑎᐅᓂᐊᖅᑐᒥᒃ ᐆᒧᖓ ᑎᓯᐱᕆ 2016-ᒥᑦ ᖁᑭᖅᑕᐅᓪᓗᓂ ᐃᓅᔪᓐᓃᓚᐅᕐᓯᒪᔪᒧᑦ ᓵᓕ ᕿᕐᓂᖅ ᐸᓖᓯᒧᑦ ᐅᖅᓱᖅᑑᖅᒥ ᑐᖂᑦᑎᓂᕐᒨᖓᓚᐅᕐᓂᕋᖅᖢᒍ.

“ᐃᖅᑲᖅᑐᐃᕕᐅᔪᑦ ᐃᓱᒪᒃᓴᖅᓯᐅᕈᑎᖃᓚᐅᕐᒪᑕ ᖃᓄᐃᓕᐅᕈᑎᕕᓂᕐᓂᒃ ᐊᒻᒪᓗ ᐃᒪᓐᓇ ᐃᓱᒪᓕᐅᕆᓕᓚᐅᖅᖢᑎᒃ…

ᐃᓅᔪᓐᓃᕈᑎᖓ: ᑐᖁᑕᐅᓪᓗᓂ,” ᐃᖅᑲᖅᑐᐃᔨᐅᔪᓄᑦ ᐊᖓᔪᖅᑳᕆᔭᐅᔪᖅ ᐅᖃᓕᒫᓚᐅᕐᑐᖅ ᖃᓄᐃᓕᐅᔾᔪᑎᒥᒃ ᐅᒃᑑᐱᕆ 8-ᒥ ᑖᓐᓇᓗ ᐃᓱᓕᑦᑎᔾᔪᑎᐅᓪᓗᓂ ᐅᓪᓗᓂ ᑕᓪᓕᒪᓂᒃ ᑐᖁᖓᔪᓕᕆᔨᒧᑦ ᖃᐅᔨᓴᖅᑕᐅᔾᔪ ᐱᓕᕆᐊᖑᓚᐅᖅᑎᓪᓗᒍ ᐅᖅᓱᖅᑑᑉ ᐱᙳᐊᕐᕕᖓᓂᒃ.

ᐱᔾᔪᑎᒋᔭᐅᔪᕐᓕ ᖃᐅᔨᓇᓱᒍᑎᒋᔭᐅᔪᒧ ᐅᓇ 21-ᓂ ᐅᑭᐅᖃᖅᑐᖅ ᕿᕐᓂᖅ ᐃᓅᔪᓐᓃᓚᐅᕐᓂᖓᓄᑦ, ᑖᓐᓇᓗ ᖁᑭᖅᑕᐅᓚᐅᕐᓯᒪᓪᓗᓂ ᐸᓖᓯᒧᑦ ᐅᖅᓱᖅᑑᖅ ᒥᑦᑕᕐᕕᖓᓂᒃ, ᐊᒻᒪᓗ ᑖᓐᓇ ᐸᓯᔭᒃᓴᐅᙱᓐᓂᕋᖅᑕᐅᓪᓗᓂ, ᑭᓯᐊᓂᓕ ᐃᓱᒪᒋᔭᖃᖁᔭᐅᓪᓗᓂ ᖃᓄᐃᓕᐅᕈᑎᐅᓂᑯᓂᒃ ᐊᒻᒪᓗ ᐃᓱᒪᓕᐅᕆᓪᓗᑎᒃ ᖃᓄᐃᓕᐅᕈᑎᐅᖔᕈᓐᓇᕋᔭᖅᑐᓂᒃ ᑕᐃᒪᓐᓇ ᐃᓅᔪᓐᓃᖅᑐᖃᒃᑲᓐᓂᖁᓇᒍ.

ᐃᓅᔪᓐᓃᕐᑎᓪᓗᒍ, ᕿᕐᓂᖅ ᖁᑭᐅᑎᒥᓂᒃ ᑎᒍᓯᓪᓗᓂ ᐅᖅᓱᖅᑑᑉ ᒥᑦᑕᕐᕕᖓᓄᙵᐅᓚᐅᕐᓯᒪᔪᖅ ᓲᖃᐃᒻᒪ ᓈᒻᒪᒃᓴᓚᐅᕐᓯᒪᙱᒻᒪᑦ ᐊᐃᑉᐸᖓ ᐊᒻᒪ ᕿᑐᕐᖓᖓ ᐊᐅᓪᓚᓕᒑᖕᒪᑎᒃ ᓄᓇᓕᖕᓂ.

ᑐᖁᖓᔪᓕᕆᔨᒃᑯᑦ ᓗᐊᐃᔭᖏᑦ ᐊᒻᒪᓗ ᐅᑯᓄᖓ ᕿᕐᓂᐅᑉ ᐃᓚᖏᓐᓄᑦ ᓇᓗᓇᐃᕐᓯᓕᓚᐅᕐᓯᒪᔪᑦ ᐃᓅᔪᓐᓃᕐᓂᖓ ᑐᖁᑕᐅᓂᕐᒨᖓᓂᖓᓂᒃ.

ᒪᓕᒐᓕᕆᔨᒋᔭᐅᔪᑦ ᐸᓖᓯᒃᑯᓐᓄᑦ ᐅᖃᓚᐅᕐᑐᑦ ᐃᒻᒥᓃᕐᓂᕋᖅᑕᐅᓪᓗᓂ ᒪᓕᒃᖢᓂ ᕿᓂᐅᑉ ᐅᖃᐅᓯᕕᓂᖏᓐᓂᒃ ᐃᓅᔪᓐᓃᕐᓂᐊᓵᖅᑎᓪᓗᒍ ᑕᐃᒪᓐᓇᓗ ᐃᓱᒪᓇᖅᖢᓂ ᐃᒻᒥᓃᕐᓂᕐᒥᒃ. ᓄᓇᕗᒥᑦ ᒐᕙᒪᒃᑯ ᑕᒪᑐᒧᖓ ᐅᖃᕈᒪᓚᐅᙱᑦᑐᑦ.

ᐅᖃᓪᓛᓂᓕᕐᑎᓪᓗᒍ ᐅᓇ ᑐᖁᖓᔪᓕᕆᔨᐅᑉ ᓗᐊᐃᔭᖓ ᓯᐊᑕᓐ ᑑᓄ ᐅᖃᓪᓚᓚᐅᕐᑐᖅ ᐃᖅᑲᖅᑐᐃᔨᓄᑦ ᑕᒪᑐᒧᖓ ᓴᖅᑭᔮᖅᑐᖅ ᐃᒻᒥᓃᕈᒪᓂᖓᓂ ᓇᓗᓇᙱᓗᐊᓚᐅᕐᒪ.

“ᐃᖅᑲᖅᑐᐃᔨᒃᑯᑦ ᐃᓱᒪᒋᔭᖃᕆᐊᖃᖅᑐᑦ ᐃᒻᒥᓃᕐᓂᖅ ᐃᓕᖅᑯᓯᐅᙱᒻᒪᑦ, ᐊᒻᒪᓗ ᐅᓇ ᐃᒻᒥᓃᕐᓂᕋᐃᓂᖅ ᐱᒻᒪᕆᐊᓘᖕᒪᑦ, ᖃᓄᐃᓕᒍᑎᐅᓐᓇᓗᐊᖅᖢᓂ. ᐅᑯᐊ ᓴᖅᑭᔮᖅᑎᑦᑎᔾᔪᑎᐅᔪᑦ ᓱᖅᑯᐃᓇᑦᑎᐊᕆᐊᖃᕐᒪᑕ,” ᐅᖃᖅᑐᖅ. ᐅᖃᐅᓯᖃᖅᖢᓂ ᐅᖃᐅᓯᐅᓂᑯᓂᒃ ᑕᐅᑐᒃᑐᕕᓂᕐᓂᒃ ᕿᕐᓂᐅᑉ ᐅᖃᖅᑕᕕᓂᖏᓐᓂᒃ ᐃᓅᔪᓐᓃᓚᐅᕐᑎᓐᓇᒍ, ᑑᓄ ᐅᖃᓚᐅᕐᑐᖅ ᖃᓄᐃᓕᐅᕐᓂᐅᔪᑦ ᐃᒻᒥᓃᕐᓂᕐᒨᖓᔭᕆᐊᖃᙱᓐᓂᕋᖅᖢᓂᒋᑦ.

“ᓴᖅᑭᔮᕈᑎᐅᔪᖅ ᓱᖅᑯᐃᓇᓗᐊᙱᒻᒪ ᐅᖃᐅᓯᐅᔪᑦ ᑐᕌᖓᔭᕆᐊᒃᓴᖏᓐᓂᒃ ᐸᓖᓯᓄᑦ, ᐅᕝᕙᓘᓐᓃᑦ ᐅᔾᔨᕈᓱᒋᐊᒃᓴᖓᓂᒃ ᑕᒫᓃᓚᐅᕐᓂᖏᓐᓂᒃ. ᓱᖅᑯᐃᓇᓗᐊᙱᒻᒪ ᑭᐅᓘᑎᓕᓚᐅᕆᐊᒃᓴᖏᓐᓂᒃ ᑕᐃᒪᓐᓇᓗ ᑐᖁᑦᑐᒪᒋᐊᒃᓴᖓᓂ ᑖᒃᑯᓇᖓ ᐅᖃᐅᓯᐅᕈᓗᔭᖅᑐᓂᒃ ᑕᐃᒪᓐᓇ ᐋᖅᑭᒃᑕᐅᐃᓐᓇᕆᐊᖃᖅᖢᓂ,” ᐅᖃᖅᑐᖅ.

“ᐃᒪᓐᓇᓕ ᐃᓱᒪᓕᕐᓇᒪᑦ ᐊᒃᓱᐊᓗᒃ ᓂᙵᐅᒪᓚᐅᕆᐊᒃᓴᖓᓄᒃ ᑭᒃᑯᓕᒫᓄᑦ ᐊᒻᒪᓗ ᖁᕕᐊᓱᙱᖢᓂᐅᒃ ᖃᓄᐃᓕᖓᓂᖓ. ᐊᒻᒪᓗ ᑕᒪᒃᑯᐊ ᓴᖅᑭᔮᕈᑎᐅᔪᑦ ᑕᐅᑐᒃᑐᕕᓂᕐᓄᑦ ᑕᐃᒪᓐᓇᑦᑕᐃᓐᓇ ᐅᖃᖅᓯᒪᓚᐅᖅᖢᑎᒃ ᑭᖑᓪᓕᖅᐹᒥ ᓵᓕ ᑕᑯᔭᐅᒐᒥ ᖁᕕᐊᓱᙱᒻᒪᕆᓚᐅᕐᓂᖓᓂᒃ. ᑭᓯᐊᓂᓕ ᑕᒪᓐᓇ ᐃᒥᓃᕈᒪᓕᕐᓂᒨᙱᑦᑐᖅ.”

ᐃᖅᑲᖅᑐᐃᔨᐅᔪᑦ ᐊᖏᓚᐅᕐᑐᑦ ᑕᐃᒪᐃᓚᐅᕐᓂᖓᓂᒃ ᐊᒻᒪᓗ ᖃᓄᐃᓕᐅᖁᔨᓂᒃᑯᑦ 6-ᓂ ᐃᓱᒪᓕᐅᕆᒪᐅᕐᖢᑎᒃ ᐸᓖᓯᓄᑦ:

  • ᑕᒪᕐᒥ ᐸᓖᓯᒃᑯᑦ ᐃᒻᒥᓃᖅᑎᑦᑎᑦᑕᐃᓕᓂᕐᒥᒃ ᐊᔪᕈᓐᓃᓴᕐᓗᑎᒃ ᐃᒥᓃᕈᒪᔪᓂᒃ ᐱᓕᕆᐊᖃᕈᓐᓇᕐᓯᓗᑎᒃ
  • ᑕᒪᕐᒥ ᐸᓖᓯᒃᑯᑦ ᓄᓇᓯᐅᑎᖏ ᓄᓇᕗᒥᑦ ᖃᐅᒻᒪᖅᑯᑎᖃᕐᓗᑎᒃ ᐸᓖᓯᒃᑯᑦ ᑖᒐᓚᓗᐊᖅᑐᒥ ᑕᑯᔪᓐᓇᖃᑦᑕᕐᓂᐊᕐᒪᑕ.
  • ᑕᒪᕐᒥ ᐸᓖᓯᑦ ᓄᓇᕗᒦᑦᑐᑦ ᐊᔪᕈᓐᓃᕐᓴᖅᓯᒪᔭᕆᐊᖃᖅᑐᑦ ᐋᓐᓂᖅᑐᓂᒃ ᑲᒪᒋᔭᖃᕈᓐᓇᕐᓂᕐᒥᒃ.
  • ᐸᓖᓯᒃᑯᑦ ᓄᓇᓯᐅᑎᖏᑦ ᓂᐱᖃᕈᓐᓇᐅᑎᖃᖅᑎᑕᐅᓗᑎᒃ ᑐᓴᐅᒪᖃᑦᑕᐅᑎᓂᕐᓴᐅᓂᐊᕐᒪᑕ ᐱᓕᕆᐊᕆᔭᖏᓪᓗ.
  • ᐸᓖᓯᒃᑯᑦ ᓴᓇᕝᕕᖏᑦ ᐊᒻᒪ ᓄᓇᓯᐅᑎᖏ ᓄᓇᕗᒥᑦ ᕿᙳᑎᖃᖅᐸᒡᓗᑎᒃ ᑕᑯᑦᑎᐊᒃᑲᓐᓂᕈᑎᒃᓴᓂ ᐅᖓᓯᒃᑐᓂᒃ ᐊᒻᒪᓗ ᑖᕈᔪᓕᕌᖓᑦ.
  • ᐸᓖᓯᒃᑯᑦ ᓄᓇᓯᐅᑎᖏ ᓄᓇᕗᒥᑦ ᐋᓐᓂᖅᑐᖅᓯᐅᑎᖃᕆᐊᖃᖅᑐᑦ.

ᐃᖅᑲᖅᑐᐃᔩᑦ ᐃᓱᒪᓕᐅᕆᓚᐅᕐᒥᔪᑦ ᐱᐅᓯᕚᓪᓕᖅᑎᑦᑎᓇᓱᖕᓂᕐᒥᒃ ᐃᓱᒪᒃᑯᑦ ᐋᓐᓂᐊᖃᖅᑐᓕᕆᓂᕐᒧᑦ ᐃᑲᔫᑎᑕᖃᕆᐊᖃᕐᓂᕐᒥᒃ ᓄᓇᕗᒥᑦ, ᐊᒻᒪᓗ ᐱᐅᓯᕚᓪᓕᖅᑎᑕᐅᓗᑎᒃ ᑐᐊᕕᕐᓇᖅᑐᓕᕆᓂᕐᒧᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᕈᑎᐅᔪᑦ.

ᑕᒪᕐᒥ ᓗᐊᐃᔭᒋᔭᐅᔪᑦ ᐃᖅᑲᖅᑐᐃᔨᓄᑦ ᐊᑐᖁᔭᐅᔪᓂᒃ ᐊᖏᖅᑐᐃᓐᓇᐅᓚᐅᕐᑐᑦ.

Share This Story

(0) Comments

Join the Conversation

Your email address will not be published. Required fields are marked *

*