ᖃᐅᔨᓴᕐᓂᖅ ᐱᕋᔭᒍᑎᒥᒃ: ᖃᓄᖅ ᐃᓄᐃᑦ ᐊᐱᕆᓯᒪᕙᑦ ᓄᓇᕗᒥᑦ ᒐᕙᒪᒃᑯᓐᓄᑦ 2022ᒥ

For English version, see A study in spam: What people asked the GN in 2022

ᐊᐱᖅᑯᑎᓂᒃ ᒪᑯᓇᙵᑦ ᓄᕙᒡᔪᐊᕐᓇᖅ-19ᒧᑦ ᑲᐱᔭᐅᔾᔪᑎᓂᒃ ᒪᐅᖓ ᓄᓇᕗᑦ ᐊᐅᓚᖁᑎᖏᓐᓄᑦ ᐊᒻᒪ ᐃᓱᒪᓕᐅᕆᔪᓂᒃ ᓇᓄᕐᓄᑦ ᑎᒍᔭᐅᓯᒪᕝᕕᖃᖁᔨᓂᕐᒧᑦ, ᐃᓄᐃᑦ ᑕᑯᔪᒥᓇᕐᑐᓂᒃ ᑎᑎᕋᐅᓯᖃᖃᑦᑕᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᓐᓄᑦ 2022-ᖑᑎᓪᓗᒍ.

775 ᑎᑎᕋᖅᑕᐅᓚᐅᕐᑐᑦ ᑕᕝᕘᓇ ᔭᓄᐊᕆ 2 ᐊᒻᒪ ᐋᒐᓯ 30ᐅᑉ ᐊᑯᓐᓂᖓᓂ, ᑖᒃᑯᐊᓗ ᐊᐱᖅᑯᑎᐅᓪᓗᑎᒃ ᐊᒻᒪ ᐃᓱᒪᓕᐅᕆᔾᔪᑎᐅᓪᓗᑎᒃ ᑎᑎᕋᕐᓯᒪᔪᑦ ᓄᓇᕗᒥᑦ ᒐᕙᒪᒃᑯᑦ ‘ᐅᕙᑦᑎᓐᓂ ᐅᖃᖃᑎᖃᕐᓗᓯ’ ᒪᒃᐱᒐᖓᓄᑦ ᓴᖅᑭᔮᒐᖓᓂ ᖃᕋᓴᐅᔭᒃᑯᑦ.

ᓄᓇᑦᓯᐊᕐᒥ ᐱᕙᓪᓕᐊᔪᑦ ᑖᒃᑯᓂᖓ ᖃᐅᔨᔪᓐᓇᕐᓯᓚᐅᕐᑐᑦ ᒪᐅᓇ ᑐᓴᒐᒃᓴᓂᒃ ᐊᑐᐃᓐᓇᖃᕆᐊᖃᕐᓂᒃᑯᑦ ᐱᔪᒪᓪᓗᑎᒃ.

ᑎᑎᕋᖅᑕᐅᓯᒪᔪᑦ ᐊᑦᑕᑕᐅᑎᑖᖅᑎᑕᐅᕙᖕᒪᑕ ᑭᐅᔭᕆᐊᓕᒃ ᐅᕝᕙᓘᓐᓃᑦ ᖃᐅᔨᓇᓱᒍᑎ; ᓄᓇᕗᒥᑦ ᒐᕙᒪᒃᑯᓐᓄᑦ ᐋᖅᑭᒋᐊᕈᑎᐅᔪᓐᓇᖅᑐᑦ, ᓱᕋᒃᓯᒪᔪᑦ ᐊᑦᑕᑕᐅᑎ ᐅᕝᕙᓘᓐᓃᑦ ᐊᓯᖏᑦ ᐃᓱᒫᓘᑎᑦ; ᐅᕝᕙᓘᓐᓃᑦ ᖃᕋᓴᐅᔭᒃᑯᑦ ᓴᖅᑭᔮᒐᒧᑦ ᑭᐅᔭᐅᔭᕆᐊᓕᒃ.

ᓴᕿᑎᑦᑎᓯᒪᔪᑦ ᐃᓄᐃᑦ ᐃᓱᒪᒋᓯᒪᔭᖏᓐᓂᒃ ᐊᕐᕌᒎᑉ ᐃᓗᐊᓂ.

ᔭᓄᐊᕆᒥ ᐅᓇ ᓄᕙᒡᔪᐊᕐᓇᖅ-19 ᐅᒥᑯᕌᓐ ᐋᓐᓂᐊᕈᑎ ᓄᓇᕗᒧᐊᖅᑎᓪᓗᒍ, ᐊᐱᖅᑯᑏᑦ ᑲᐱᔭᐅᔭᕆᐊᖃᕐᓂᕐᒧᑦ ᓄᓇᕗᒥᑦ ᐊᐅᓪᓚᕐᓂᐊᕐᓗᓂ ᓄᓇᕗᒧᐊᕐᓂᐊᕐᓗᓂᓘᓐᓃᑦ, ᖃᓄᕐᓗ ᓂᕿᓂ ᐱᔪᓐᓇᕆᐊᒃᓴᖏᓐᓂᒃ ᐊᓂᑲᑕᒃᑕᐃᓕᑎᓪᓗᒋᑦ ᐊᒻᒪ ᐊᐱᖁᑎᑕᖃᐅᓚᐅᖅᖢᓂ ᓄᓇᕗᒥᑦ ᖃᓄᐃᑉᐸᓪᓕᐊᔾᔪᑎᓂᒃ.

ᐅᕌᓯᐊ ᔫᑯᕇᓐᒥ ᐅᓇᑕᓕᖅᑎᓪᓗᒍ ᕕᕝᕗᐊᕆᒥ, ᑎᑎᕋᕐᓯᒪᔪᑦ ᐅᑯᓇᙶᖅᑰᔨᓪᓗᑎᒃ ᔪᑯᕇᓐᒥᐅᑕᓂᒃ ᖃᓄᖅ ᓄᓇᕗᑦ ᐱᖁᔭᖃᕐᒪᖔᑕ ᓄᓇᖃᙱᑦᑐᓂᒃ ᓄᒃᑎᕐᕕᐅᓂᐊᖅᑎᓪᓗᒋᑦ.

ᐅᐱᕐᖔᖑᓕᕐᑎᓪᓗᒍ ᐊᒻᒪ ᐊᐅᔭᙳᓕᕐᑎᓪᓗᒍ, ᓄᓇᕗᒥᐅᑕᐅᙱᑦᑐᑦ ᐊᐱᖅᑯᑎᖃᖃᑦᑕᓚᐅᕐᑐᑦ ᐃᖃᓗᒐᓱᒍᓐᓇᐅᑎᓂᒃ ᐊᒻᒪ ᐊᖑᓇᓱᒍᓐᓇᐅᑎᓂᒃ ᐊᒻᒪᓗ ᖃᓄᐃᑦᑐᓂᒃ ᑐᔪᕐᒥᕕᒃᑕᖃᕐᒪᖔᑕ ᒥᑭᓐᓂᕐᓴᐃᑦ ᓄᓇᓖᑦ.

ᐃᓕᓐᓂᐊᖅᑎᑦ ᒍᕇᑦ 2ᒥ ᐋᐴᑕᒥ ᐱᓕᕆᐊᖃᓚᐅᕐᓯᒪᖕᒪᑕ ᓄᓇᕗᓕᕆᓪᓗᑎᒃ ᐊᒻᒪ ᐊᐱᖅᑯᑎᖃᐅᓚᐅᖅᖢᑎᒃ ᓄᓇᕗᒥᑦ ᒐᕙᒪᒃᑯᓐᓄᑦ ᐃᒪᐃᑦᑐᓂᒃ, “ᑭᓱ ᐱᙳᐊᕈᓯᖅ ᐱᒻᒪᕆᐅᓛᖑᕙ ᓄᓇᕗᒥ?”, “ᖃᓄᐃᑦᑐᖅ ᐃᖃᓗᒃ ᐱᔭᐅᓛᖑᖃᑦᑕᖅᐸ ᐃᓄᖕᓄᑦ?”, “ᖃᓄᐃᒻᒪ ᐊᑕᐅᓯᑯᓗᖕᒥ ᐋᓐᓂᐊᕕᐊᓗᖃᖅᐸ ᓄᓇᕗᒥ?”, “ᐳᓯ ᑳᑦᑕᖃᖅᐹ ᓄᓇᕗᒥ?”

ᐅᓄᕈᓘᔭᕐᑐᑦ ᐊᐱᖅᑯᑎᖃᓚᐅᕐᑐᑦ ᖃᓄᖅ ᐃᓐᑲᒻ ᑖᒃᓯᓕᕆᔾᔪᑎᓂᒃ ᓇᓂᓯᔪᓐᓇᕐᒪᖔᑦ ᐊᒻᒪ ᐃᑦᑐᕐᓯᐅᑎᒃᓴᓂᒃ ᐊᐱᕆᔪᓂᒃ. ᐊᑕᐅᓯᖅ ᐊᐱᕆᓚᐅᕐᑐᖅ ᐊᕕᑦᑎᔾᔪᑎᓂ ᖃᓄᖅ ᐱᔪᓐᓇᕆᐊᒃᓴᖓᓂᒃ ᐊᒻᒪᓗ ᐊᓯᖓ ᐊᐱᕆᓪᓗᓂ ᖃᓄᖅ ᑎᒍᔭᐅᔪᕕᓂᖅ ᐊᓂᑎᑕᐅᔪᓐᓇᕆᐊᒃᓴᖓᓂᒃ.

ᖃᐅᔨᓴᖅᑎᐅᔪᑦ ᖃᐅᔨᔪᒪᓚᐅᕐᒥᔪᑦ ᐊᖏᖅᑕᐅᔭᕆᐊᖃᕐᒪᖔᑕ ᑲᑎᕐᓱᐃᔪᒪᒍᑎ ᐅᔭᕋᖕᓂᙶᖅᑐᓂᒃ ᖃᐅᔨᓴᖅᑕᐅᔪᒃᓴᓂᒃ, ᐊᒻᒪᓗ ᓯᑳᑦᓚᓐᒥᐅᑕᖅ ᐊᐱᕆᓪᓗᓂ ᐃᑲᔪᖅᑕᐅᔪᓐᓇᕆᐊᒃᓴᖓᓂᒃ ᑲᑎᕐᓱᐃᓂᕐᒥᒃ ᓇᓂᒥᐅᑕᑦ ᓄᓇᕐᔪᐊᒥ ᒪᑯᓂᖓ ᐊᖑᑎᓂᒃ ᐊᕐᓇᙳᖅᑐᕕᓂᕐᓂᒃ ᐃᓅᔾᔪᑎᖏᓐᓂᒃ ᐋᖅᑭᒃᓯᔪᓐᓇᕆᐊᒃᓴᖏᓐᓂᒃ ᐊᒻᒪᓗ ᔪᒪᓂᒥᐅᑕᕐᒥ ᖃᐅᔨᔪᒪᔪᖃᖅᖢᓂ ᖃᓄᖅ ᐊᓘᒥᓇᒻᒥ ᐃᐳᐃᑦᑐᐃᑦ ᐱᓕᕆᐊᖑᖕᒪᖔᑕ ᓄᓇᕗᒥᑦ.

ᐃᓕᓐᓂᐊᖅᑐᖅ ᖃᐅᔨᓴᖅᖢᓂ ᓯᖓᐃᔪᓂᒃ ᐊᕐᓇᓂᒃ ᖃᓪᓗᓈᓄᑦ ᐊᐅᓪᓚᖃᑦᑕᖅᑐᓂᒃ ᐃᕐᓂᔭᖅᑐᖅᖢᑎᒃ ᐊᐱᕆᓚᐅᕐᑐᖅ ᖃᓄᖅ ᓇᓂᓯᔪᓐᓇᕐᒪᖔᑦ ᑕᒪᑐᒧᖓ ᑲᑎᑕᐅᓯᒪᔪᓄᑦ.

ᖃᔅᓯᒐᓴᐃᑦ ᑎᑎᕋᓚᐅᕐᑐᑦ ᐊᐱᖅᑯᑎᖃᖅᖢᑎᒃ ᐋᓐᓂᐊᖅᑐᓕᕆᓂᕐᒧᑦ ᐊᐅᓪᓚᕈᑎᓂᒃ, ᖃᓄᕐᓗ ᐊᑭᓕᐅᑎᓄᑦ ᓇᓗᓇᐃᒃᑯᑎᓂᒃ ᑲᑎᑦᑎᔭᕆᐊᖃᕐᒪᖔᑦ ᐊᒻᒪᓗ ᖃᖓᑕᓲᒃᑰᕈᑎᐅᓂᐊᖅᑐᖅ ᓄᖃᖅᑎᑕᐅᒃᐸᑦ ᖃᓄᖅ ᐃᓂᒃᓴᓕᐅᒃᑲᓐᓂᕈᓐᓇᕐᒪᖓᑕ. ᐊᒻᒪᓗ ᐊᐱᕆᔪᖃᐅᓚᐅᕆᓪᓗᓂ ᐃᒡᓗᐃᑦ ᓈᒻᒪᙱᓗᐊᕐᓂᖏᓐᓂᒃ ᑕᒫᓂ.

ᐃᓚᖏᑦ ᓄᓇᕗᒥᙶᖅᑐᓂᒃ ᐱᑖᑲᑕᒍᒪᓚᐅᕐᑐᑦ – ᐅᓄᙱᑦᑐᑦ ᑲᑎᑦᑎᕙᓪᓕᐊᕙᒃᑐᑦ ᐱᖁᑎᓂᒃ ᓄᓇᕐᔪᐊᕐᒥ ᐱᔪᒪᓚᐅᕐᑐᑦ ᓄᓇᕗᑦ ᐊᐅᓚᖁᑎᖓᓂᒃ, ᐃᓚᖏᓪᓗ ᓄᓇᕗᑦ ᓄᓇᓯᐅᑎᓄᑦ ᓚᐃᓴᓐᓯᓂ ᐱᔪᒪᓪᓗᑎᒃ ᐊᒻᒪᓗ ᐊᑕᐅᓯᖅ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᕐᓇᒥ ᖃᑭᖅᑯᐊᕐᒥ ᐱᔪᒪᓪᓗᓂ.

ᒪᓐᑐᕆᐊᒥᐅᑕᒥ ᓴᓇᙳᐊᖅᑎᒥ ᐱᔪᒪᔪᖃᓚᐅᕆᓪᓗᓂ ᐃᒡᓗᓕᒃᒥ ᓴᕕᕋᔭᒃᒥ ᐊᒻᒪᓗ ᐊᒥᐊᓕᑲᒥ ᑐᓴᒐᒃᓴᓕᐅᕐᑎ ᑐᓴᕈᒪᓚᐅᕆᓪᓗᒍ ᕼᐋᓐᔅ ᕿᑭᖅᑕᐅᑉ ᒥᒃᓵᓄᑦ.

ᐃᓚᖏᑦ ᐃᓄᐃᑦ ᓄᓇᕗᒥᑦ ᒐᕙᒪᒃᑯᓐᓂ ᐃᓱᒪᓕᐅᕆᓇᓱᓚᐅᕐᒥᔪᑦ, ᐊᑕᐅᓯᖅ ᐃᓱᒪᒋᔭᖃᖅᖢᓂ ᐱᑕᖃᓕᖁᔨᓪᓗᓂ ᒐᕙᒪᒃᑯᓐᓄᑦ ᐊᑭᓕᕐᓱᖅᑕᐅᔪᓂᒃ ᐃᖅᑲᓇᐃᔮᒃᓴᓂᒃ ᐃᓄᒋᐊᓃᑦᑐᓂᒃ ᐃᓄᖕᓄᑦ ᐊᒻᒪᓗ ᐃᓄᐃᑦ ᖃᓪᓗᓈᓃᑦᑐᓄᑦ ᐋᓐᓂᐊᕐᕕᓕᐊᕐᓯᒪᓪᓗᑎᒃ. ᐊᓯᑲᓐᓂᖓ ᐃᓱᒪᓕᐅᕆᓚᐅᕐᒥᔪᖅ ᕼᐊᐃᑐᕈᔨᓐ ᐅᕐᓱᐊᓗᖕᒥ ᐱᑕᖃᓕᖁᔨᓪᓗᓂ ᓄᓇᕗᒥᑦ, ᐊᒻᒪᓗ ᐊᑕᐅᓯᖅ ᐱᒋᐊᖁᔨᓪᓗᓂ ᓄᓇᕗᒥᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᓈᒻᒪᙱᓕᐅᕈᑎᖃᓕᕈᑎᒃ ᐃᓐᓇᑐᖃᕐᓂᒃ ᐅᖃᖃᑎᖃᕈᓐᓇᖅᑎᑕᐅᓗᑎᒃ.

ᐊᑕᐊᓯᖅ ᐅᖃᓚᐅᕐᒥᔪᖅ ᓇᓄᕐᓄᑦ ᑎᒍᔭᐅᕝᕕᒃᑕᖃᕆᐊᖃᕐᓂᖓᓂᒃ ᑰᔾᔪᐊᕌᓗᒃ, ᒫᓂᑑᐸᑎᑐᑦ, ᓇᓄᐃᑦ ᖃᐅᔨᓴᖅᑕᐅᓚᐅᕐᓗᑎᒃ ᑎᒍᔭᐅᓯᒪᔪᓐᓃᕐᐸᒡᓗᑎᒃ.

ᐋᓐᓂᐊᓯᐅᖅᑎᓂᙶᖅᑐᓂᒃ ᑎᑎᖅᑲᖅᑕᖃᖃᑦᑕᓚᐅᕐᒥᔪᖅ ᓄᓇᕗᒥᑦ ᐃᖅᑲᓇᐃᔭᕈᒪᔪᓂᒃ ᐊᒻᒪᓗ ᑭᒍᑎᓕᕆᔨᓂᒃ ᖃᐅᔨᑎᑎᔪᒪᔪᓂᒃ ᐊᐅᓪᓚᑲᑕᒡᓗᑎᒃ ᑭᒍᑎᓕᕆᖃᑦᑕᕈᓐᓇᖅᑐᓂᒃ.

ᐊᑕᐅᓯᖅ ᐃᖅᑲᓇᐃᔮᒃᓴᖅᓯᐅᖅᖢᓂ ᐊᒻᒪᓗ ᑮᓇᐅᔭᓕᐅᕈᑎᐅᔪᓐᓇᖅᑐᓂᒃ ᐊᒻᒪ ᐱᔨᑦᑎᕋᐅᑎᓂᒃ ᐊᔪᕈᑎᓕᖕᓄᑦ ᐃᓄᖕᓄᑦ ᐊᒻᒪᓗ ᐊᓯᐊᓂᒃ ᐊᐱᕆᔪᖃᖅᖢᓂ ᑲᑐᔾᔨᖃᑎᒌᓂᒃ ᐱᓕᕆᐊᖃᖅᑐᖃᕐᒪᖔᑦ ᑐᓄᒃᑯᑦ ᐋᓐᓂᖅᑐᕕᓂᕐᓂᒃ ᑲᒪᒋᔭᖃᕈᓐᓇᖅᑐᓂᒃ.

ᐃᖅᑲᓇᐃᔮᖅᑖᕋᓲᑎᑦ ᐱᑕᖃᖃᑦᑕᓚᐅᕐᒥᔪᑦ ᓄᓇᕗᒥᑦ ᒐᕙᒪᒃᑯᓐᓄᑦ, ᐅᖓᓯᒃᑐᒥᙶᖅᑐᓪᓗ ᐄᔭᑉᒥ, ᐃᕈᐊᒃ, ᒪᒃᓯᑯ ᐊᒻᒪ ᓚᐸᓈᓐᒥ.

ᐱᑕᖃᖃᑦᑕᓚᐅᕐᒥᔪᑦ ᐃᓄᒃᑐᑦ ᑐᑭᓕᐅᕆᔨᓂᒃ ᖃᐅᔨᔪᒪᔪᓂᒃ.

ᐅᑯᓇᙵᑦ 775ᓂ ᑎᑎᕋᖅᑕᐅᓯᒪᔪᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐱᔭᐅᔪᓐᓇᖅᑐᓂᒃ ᐊᑐᐃᓐᓇᖃᕈᓐᓇᕐᓂᒃᑯᑦ ᑐᓴᒐᒃᓴᓂᒃ, ᒫᓃᑦᑐᑦ 210 ᑎᑎᕋᖅᑕᐅᔪᓂᒃ ᓇᓗᓇᐃᖅᑕᐅᓯᒪᓚᐅᕐᑐᑦ ᓄᓇᕗᒥᑦ ᒐᕙᒪᒃᑯᓐᓄᑦ ᖃᐅᔨᒋᐊᖅᑕᐅᒃᑲᓐᓂᕐᓂᐊᕐᓂᖏᓐᓂᒃ.

ᑭᓯᐊᓂᓕ ᖃᐅᔨᔪᒪᔪᑐᐃᓐᓇᐅᓚᐅᙱᒻᒥᔪᑦ — ᒫᓂ 350 ᑎᑎᕋᖅᑕᐅᔪᑦ, 45 ᐳᓴᓐᑎᓪᓘᓐᓃᑦ ᑕᒪᐃᓐᓂ ᑎᑎᕋᖅᑕᐅᔪᓂᒃ, ᐱᕋᔭᒃᓯᓯᒪᓂᒃᑰᖓᓚᐅᕐᑐᑦ.

ᐱᕋᔭᒃᓯᒪᓂᒃᑯᑦ ᑎᑎᕋᕐᑐᑦ ᓄᓇᕗᒥᑦ ᒐᕙᒪᒃᑯᓐᓂᒃ ᐱᔨᑦᑎᕋᐅᑎᓂᒃ ᒪᓂᒪᑎᑦᑎᓇᓱᖃᑦᑕᓚᐅᕐᑐᑦ ᒪᑯᓂᖓ ᐱᔨᑦᑎᕋᐅᑎᓂᒃ ᐱᕙᓪᓕᐊᔾᔪᑎᐅᔪᓐᓇᖅᑐᓂᒃ, ᐊᒻᒪ ᑮᓇᐅᔭᓄ ᐃᑲᔪᕈᑎᐅᔪᓐᓇᖅᑐᓂᒃ ᐊᒻᒪᓗ ᐊᔾᔨᙳᐊᓂᒃ ᑕᑯᔪᒥᓇᙱᑦᑐᓂᒃ ᑕᑯᖁᔨᓯᒪᔪᓂᒃ.

ᑕᐃᒪᓕ 2023 ᐊᕐᕌᒍᒧᑦ ᓄᑖᒧᑦ ᐅᑯᐊ ᓄᓇᕗᒥᑦ ᒐᕙᒪᒃᑯᑦ ᐱᐅᓂᕐᓴᓂᒃ ᐱᕋᔭᔭᑦᑐᓄᑦ ᐃᓯᖅᑕᐃᓕᔾᔪᑎᓂᒃ ᖃᕋᓴᐅᔭᓄᑦ ᐱᓇᓱᓪᓗᐊᖅᑐᑦ.